Landbouweekblad 19 February 2026

Nie so dreigend soos dit lyk nie Sommige plase by Swellendam, Heidelberg en Riviersonderend het aan die einde van die eerste week van Februarie goed reën gekry nadat dit vir tot agt maande nie gereën het nie. Boere verwag dat die lusernkampe gaan bot en groei sodat daar weer vars weiding vir hul skape en volstruise is. Die reën maak ook voorplant-onkruidbekamping en vogbewaring moontlik. Op Kluitjieskraal, Pieter Crous se plaas by Swellendam, het dié dramatiese wolke op die foto ongelukkig nie reën gebring nie. Sy reënval vir Februarie was teen druktyd net 19 mm. Crous, wat onder meer mielies onder besproeiing, koring en kanola verbou, is een van die boere wat groot skade gekry het toe die Breërivier verlede jaar baie vroeër as gewoonlik gaan staan het. Dele van…

Uitvoerders ‘gestrand’ met Kaapse hawe Tafeldruifuitvoerders het nie veel alternatiewe as die Kaapstad-hawe verstop raak nie, maar hulle waag steeds hul kanse omdat die buiteland wel nog winsgewender as die swak binnelandse mark is. Al is vertragings in verskeping ’n risiko wat die gehalte van tafeldruiwe in Europa kan raak, gaan boere steeds voort om dié produk deur die Kaapstad-hawe uit te voer. In vergelyking met mededingende lande, soos Australië of Brasilië, is die binnelandse mark in Suid-Afrika eenvoudig nie groot en sterk genoeg om uitvoerdruiwe so maklik plaaslik te versprei wanneer dinge in die hawe skeefloop nie, sê Francois Rossouw, tafeldruifprodusent van Mooigezicht Estates in die Hexriviervallei. Dit volg op toenemende klagtes uit die sagtevrugte-uitvoerbedryf die afgelope weke oor produktiwiteit in die houereindpunt van Transnet-haweterminale (TPT) wat steeds laag…

MELKBOERE het volgens die Melkprodusente-organisasie (MPO) dringend ’n betekenisvolle styging in die plaashekprys nodig weens onder meer stygende koste verwant aan bek-en-klouseer. Bertus van Heerden, hoofekonoom van die MPO, sê die plaashekprys het die afgelope twee jaar grootliks sywaarts beweeg. Intussen ervaar boere stygende produksiekoste weens bek-en-klouseeruitbrekings en die koste om die immuniteit van koeie ’n hupstoot te gee, algemene koste-inflasie, die vlak van voermeelpryse en hoër koste weens klimaatstoestande. Hoewel die melk-tot-voerprysverhouding in November verlede jaar gunstig was, het voorgenoemde faktore dié voordele teengewerk. Daar moet ook in gedagte gehou word dat die melk-tot-voerprysverhouding JSE-pryse gebruik en nie werklike voermeelpryse vir die melkbedryf nie, sê hy. Die verwagte stimulering van produksie van onverwerkte melk, danksy ’n gunstige verhouding tussen die plaashekprys en die voerkonsentraatprys, het volgens hom nie verlede…

Sitrusboere ’n Nuwe vennootskap tussen twee voorste sitrusmaatskappye in Suid-Afrika en Europa beloof opwindende geleenthede in die Europese kleinhandel vir Suid-Afrikaanse mandarynboere. ClemenGold International, wat handelsmerke soos ClemenGold en Sweet C insluit, het hande gevat met Bollo Natural Fruit om die manier te verander waarop topgehalte-mandaryne deur die jaar aan Europese kleinhandelaars voorsien word deur die verskaffingsketting te vereenvoudig. Bollo het ’n sterk produksiebasis in die Noordelike Halfrond en is geïntegreer met Europa se top-kleinhandelaars. Bollo en ClemenGold sal bestaande kleinhandel- en produsenteverhoudinge versterk deur regdeur die jaar sitrus te voorsien en só nuwe geleenthede ontgin.…

Rooivleisboere Die Bhambanana-rooivleisabattoir in Noord-Zoeloeland, wat teen ’n aanvanklike koste van sowat R83 miljoen opgerig is, is tans vervalle en staan al 14 jaar grootliks onbenut. Intussen het talle vee-eienaars in KwaZulu-Natal se bek-en-klouseer-beheergebied min tot geen manier gehad om wettig ’n sent vir hul diere te verdien nie. Die bou van die abattoir in die Jozini-distrik het reeds in 2012 begin. Die oogmerk was om “ekonomiese ontwikkeling en werkskepping in dié streek te bevorder, en om die verwoestende impak van die 2011-uitbreking van bek-enklouseer in daardie gebied te versag”. Vrae word nou gevra oor wat geword het van ’n kontantinspuiting van R6,1 miljoen deur die provinsiale regering se landbousake-ontwikkelingsagentskap wat sake sou regruk.…

“DIT gaan nie daaroor om ondoeltreffendheid te beskerm of markkragte te weerstaan nie, maar om strukturele mislukkings, wat lewensvatbare produsente uitdwing, reg te stel,” sê dr. Tobias Doyer, uitvoerende hoof van Graan Suid-Afrika (GSA). “As dié produsente verdwyn, erf Suid-Afrika ’n langtermynvoedselsekerheidsrisiko wat nie oornag opgelos kan word nie.” Verminderde plaaslike produksie verhoog invoerafhanklikheid, ondermyn landelike ekonomieë en stel verbruikers bloot aan groter wêreldwye prys-en-aanbodwisselvalligheid. Koringboere het op GSA se streekvergaderings gewaarsku dat sodra die koringkapasiteit verlore gaan, sal produktiewe grond, vaardighede en infrastruktuur nie maklik herstel kan word nie. Dít is nodig: ■ ’n Volledig responsiewe, geoutomatiseerde invoertariefstelsel wat intyds funksioneer, marktoestande weerspieël en op ’n relevante basisverwysingsprys gegrond is. ■ Duidelike ingryping by die tydsberekening van koringinvoer, veral tydens plaaslike strooptydgleuwe; gerigte kosteverligtingsmaatreëls, insluitend ingrypings by logistiek en…