Innehållsförteckning för 2026-04-16 från Isolezwe

UFUNA ukuba yisibonelo kubo bonke abantu abafuna ukungena emabhizinisini, uNkk Sithembile Magwaza, osanda kuqokwa njengomunye wosomabhizinisi abangene kwezwakala emikhakheni abakuyona. UNkk Magwaza waseMandeni, unehhotela iLa Clef Boutique Hotel, eseMidlands maphakathi neKwaZulu-Natal. Uthe wazinikela kulona zisuka njengoba wayehlose ukuthi libe ngenye yezindawo ezihamba phambili kulesi sifundazwe. NgoMgqibelo, eSibaya eThekwini uzobe ekwabazomukela izindondo emcimbini wokuhlonipha abesilisa nabesifazane ngezinto ezinhle abazenzayo emphakathini, kuma-Influential Awards 2026. Kulo mcimbi uthe kubhekwa abantu abasemikhakheni ehlukene bese bekhethwa ukuze bahlonishwe ngemisebenzi yabo. "Mina nabanye abangu-100, sizomela isifundazwe iKwaZulu-Natal kulo mcimbi, okuyinto engijabulisayo kakhulu. Ukuqokwa emicimbini yalolu hlobo ngisanda kungena ngisho kulo mkhakha kuyangikhuthaza futhi ngalokhu okwenzekayo ngifuna ukukhuthaza intsha yesifazane futhi ukuthi isukume, ikuqale lokhu ekucabangayo ngoba ayazi ukuthi ngelinye ilanga kuyoyibeka kuphi," kusho yena. Kukho konke akwenzayo uthe ubengacabangi ukuthi kunabambonayo, kodwa ngemuva kokuzwa lezi…

UMHOLI we-EFF, uMnuz Julius Malema, uveze ukuthi uyazisola ngokuqhumisa isibhamu. Ukusho lokhu ngesikhathi ezicelela ukuba anganikwa isigwebo sokubhadla ejele. UMalema ubevele eNkantolo yeMantshi e-East London izolo, lapho abameli bakhe benze izethulo zokuthi kungani kufanele anganikwa isigwebo esiqinile. Ummeli kaMalema, u-Advocate Laurance Hodes, uthe uMalema ukhombise ukuzisola. “Wayesemncane ngesikhathi enza icala agwetshelwe lona. Isibhamu wasinikwa umuntu ogunyaziwe ukuphatha isibhamu. Akazange asiphathe isikhathi eside isibhamu, wagcina nje ngokusiqhumisa futhi wayengahlosile ukulimaza umuntu. Uyazisola kakhulu. Wayeqhumisa nje isibhamu ngoba wayejabula. Kwakuhleliwe ukuthi aqhumise isibhamu.” UHodes uthe uMalema akazange enze icala ngesibhamu. UMbuso ufuna ukuthi uMalema agwetshwe iminyaka engu-15 ebhadla ejele nokuzomphunyukisa ngesikhundla sokuba ilungu lePhalamende. Umthetho awubavumeli abantu asebeke badonsa isigwebo esingaphezu kwezinyanga ezingu-12 ukuba babe amalungu ePhalamende. Omunye ummeli kaMalema, u-Advocate Tembeka Ngcukaitobi, uthe bafuna ukuthi okungenani uMalema akhokhiswe inhlawulo esikhundleni sokunikwa…

BABHEKENE nengwadla omastende abakhala ngokuqonga kwezindleko zamanzi, ugesi kanjalo nezinye izinto kulabo abaqashise izitshudeni ezikhokhelwa yisikhwama esixhasa ngemali yokufunda ezikhungweni zemfundo ephakeme nasemakolishi amakhono amaTVET KwaZulu-Natal, iNational Students' Financial Aid Scheme (NSFAS). Labo mastende bakhala ngokuthi selokhu kuqale unyaka, abakaze bakhokhelwe yiNSFAS. Bathe iNSFAS izisabisa okwenyoka izitshudeni, bona ayibashayi ndiva ngoba ziyabhikisha uma imihlomulo yazo ingangenanga. Omunye womastende okhulume neSolezwe, wacela ukungavezwa, uthe sebecabanga ngisho ukukhipha izitshudeni, ngenxa yokuthi abakhokhelwe. "Asazi manje ukuthi kumele senzenjani, ngoba sihambise yonke into ezikhungweni nakwiNSFAS, kodwa kuze kube yimanje asikakhokhelwa. Konke okuthinta imininingwane yezitshudeni, nokusayinwa kwezinkontileka kwahanjiswa kodwa lutho imali." Umastende uveze ukuthi uma sekumele bakhokhelwe, uhlelo olusha olusetshenziswayo luyabakhahlela. "Senza ubuntu ngoba iNSFAS isikhokhela izinyanga ezingu-10 kuphela ngonyaka, kodwa thina siyazamukela izitshudeni kusuka ngoJanuwari ngoba zisuke zingenayo indawo yokufihla ikhanda. Sikwenza lokhu ngoba…

UYASHUBA umbango wokuhola i-DA KwaZulu-Natal, njengoba kwanda abaveza ukuthi bazongenela umbango wezikhundla zokuhola iqembu esifundazweni. I-DA izoba nengqungquthela yokukhetha ubuholi besifundazwe ngenyanga ezayo. IPhini lomholi we-DA KwaZulu-Natal eliyikhansela kuMasipala waseThekwini, uMnuz Sithembiso Ngema, seliveze ukuthi lizongenela umbango wokuhola iqembu esifundazweni. UNgema uthe abaphakamise igama lakhe bathe bayathembela ebuholini bakhe. "Kufanele ubabuze abantu abaphakamisa igama lakho ukuthi yini lena abayibonayo kuwe? Ungajabuleli nje ukuthi igama lakho liphakanyisiwe. Bathi kumina njengoba sibheke okhethweni (lohulumeni basekhaya), kufuneka umholi ozokwazi ukugijima kuso sonke isifundazwe uma ebizwa. Bathe kufuneka umholi ozokuba seduze nabantu nomholi oyaziyo into edingekayo." UNgema uthe i-DA uyazi njengoba ezazi yena njengoba ajoyina leli qembu ngo-2006. Useke waphatha izikhundla ezahlukene okubalwa kuzo esokukhulumela i-DA esifundazweni. "Ngikhulele kuyona i-DA esifundeni Ilembe, ngiyisishoshovu kwaze kwaba ngiba yikhansela eThekwini, ngo-2011. Ngaba usihlalo we-DA esifundeni iSouth…

UKUGQIGQA enkantolo kukamengameli we-South African Football Association (Safa), uDanny Jordaan, kufikisela ngamahloni uzibuze ukuthi kungani engashenxi? Lo mholi owayeyisikhulu esiphezulu kwiNdebe yoMhlaba eyayisingethwe eNingizimu Afrika ngo-2010, ubhekene necala lenkohlakalo nelokwebiwa kuka-R1.3 million okuthiwa kwenzeka phakathi kuka-2013 no-2018. Asinanxa noJordaan kodwa bekungakuhle alandele ozakwabo bepolitiki abashenxayo uma besabhekene nezinsolo zenkohlakalo ezisuke zithunaza isithunzi senhlangano. Akukuhle kwiSafa ngenxa yalesi simo abhekene naso sokuphuma engena enkantolo okuyinto ayengajutshelwanga yona. Isigigaba sokuphakama kwemimoya kwezinye izikhulu ezazisemhlanganweni wesigungu esiphezulu owawuseGauteng, kwakufakazela ukuthi kukhona okushaya amanzi ngobuholi bakhe. Lesi simo asigcini ngokuhlukanisa izifunda kodwa sesenze abazifela ngonobhutshuzwayo bangamethemba. Okunye okumenzele isigcwagcwa ukushabalala kwesikhungo i-Safa School of Excellence esakhiqiza abadlali abanjengoSteven Pienaar, Bryce Moon noBernard Parker. Sihlukanisa abaholi bezifundazwe nokuyinto ebambezela intuthuko kanobhutshuzwayo ezifundeni zeSafa ezingu-52. UJordaan ungomunye wabaholi abahlonishwayo e-Afrika yonkana ngakho-ke bekufanele ngabe kade…

KUKHUSHULWA izinga lomkhankaso wokulwa nobugebengu kuMasipala weTheku, kulandela ukwandiswa kwamaphoyisa ophiko oluhamba nezinja, i-K9. Ngalokhu umasipala uhlose ukulwa nobugebengu obuhleliwe ngokwandisa isibalo samaphoyisa kulolu phiko. Angu-13 amaphoyisa abeviliyela eThekwini, kuleli sonto, emuva kokuqeqeshwa ukuthi abe yingxenye yalolu phiko. IPhini leMeya emkhandlwini, uNksz Zandile Myeni, lithe la maphoyisa aqeqeshwe izinyanga ezine kanti manje isibalo sophiko lwe-K9, lwandisiwe njengoba seluzoba namalungu angu-20. "Anekhono eliphezulu lokukwazi ukuthola izidakamizwa, ukuthungatha izigebengu kanjalo nokunqanda izinto ezingalungile ezenzekayo edolobheni. ITheku liqinisa umkhankaso wokulwa nobugebengu," usho kanje. UNksz Myeni uthe lolu phiko luzoqinisa empini yokubhekwa kweziqhumane, izibhamu ezingekho emthethweni, ukushushumbiswa kwezidakamizwa, ukudunwa kwezimoto kanjalo nokulwa namacala anendlakadla. Uqhube wathi bafuna ukwenza iTheku indawo enakekela abantu ngo-2030. Kunxuswe amaphoyisa abebeqeshwa ukuthi avikele umphakathi. Inhloko yamaphoyisa eTheku, uSibonelo Mchunu, igqugquzele la maphoyisa ukuthi enze umsebenzi wawo ngobuqotho. UMchunu uthe:…

LIZOTHOLA ithuba lokuqala kabusha ochungechungeni lweT20 ne-India iqembu lakuleli lesizwe labesifazane lekhilikithi ngokusho komqeqeshi uMandla Mashimbyi. AmaProteas athole isikhashana sokuphuma ngemuva kohambo lwaseNew Zealand, lapho enqotshwe khona ngo 4-1 emidlalweni yeT20, aguqa ngo 2-1 kweyama-One Day International (ODI). Iqembu lakuleli lizodlala emihlanu yeT20 ne-India ezolisiza licijele iNdebe yomhlaba yeT20 ezoqala ngoJuni, e-England naseWales. Lizoqala ukududulana ne-India eHollywoodbets Kingsmead Stadium, eThekwini, kusasa ngo-6 ntambama, liphinde libhekane enkundleni efanayo ngeSonto ngo-2 ntambama. “Belunzima uhambo lwaseNew Zealand kodwa sifunde okuningi kulona. Asikho isikhathi esanele sokuthhi silungise konke esidinga ukukulungisa ngaphambi kokubhekana ne-India kodwa konke kuzosisiza njengoba sibheke eNdebeni yoMhlaba,” kusho uMashimbyi. “Engifuna ukukubona wukuthi iqembu liqale kabusha. Ngifuna siyilungele ngokomqondo le midlalo esizoyidlala ne-India. Kuhlezi kusho lukhulu ukubhekana nayo, ikakhulkazi lapha ekhaya. Izosivivinya ngendlela efanele ngaphambi kweNdebe yoMhlaba.” “Sixoxile ngezinto okufanele sizilungise emdlalweni…

EKUSELE kancane ziphothulwe izinhlelo zomdlalo omusha ozovala isikhala seGenesis, efinyelela emaphethelweni kusasa. Lo mdlalo obukhonjiswa ngo-7.30, phakathi nesonto nogxile kwezenkolo, ukwengavuselelwanga emidlalweni ekhona kulesi siteshi, iningi layo eqale ngonyaka odlule. NgoFebhuwari umdlalo Ithonga ufinyelele emaphethelweni, okuze kube manje awukho umdlalo ovale isikhala sawo. Kunalokho uMzansi Magic uthathe umdlalo Inimba obukhonjiswa ngo-9 ebusuku, wawehlisela ku-8.30. Umthombo weSolezwe ongaphakathi kulo mdlalo, uveze ukuthi kusuka ngoJulayi, kuzoqala umdlalo ozovala isikhala seGenesis, kodwa umdlalo Inimba wona usazoqhubeka nokuba kulesi sikhathi okuso manje njengoba zingekho izindaba ezithinta ukumenyezelwa kwemidlalo emibili. "Ngenyanga ezayo sizomemezela umdlalo omusha ozovala isikhala seGenesis njengoba iphela manje. Okwamanje umdlalo basematasa nawo, uzoqala ukuqoshwa ngenyanga ezayo bese kuthi ngoJuni maphakathi nawo kumenyezelwe konke ngawo. Yebo iMultichoice ibhekene nobunzima bokubeka isenti phezu kwelinye kodwa kulesi sikhala ngeke kungabi khona mdlalo oba khona. Ngibona…

MHLELI: Kwelakho angizukuba mude kodwa nginesikhalo kuKhozi FM kanye nabo bonke abathintekayo odabeni luka-Ayanda Msweli(osesithombeni). Ngokwami besingekho isidingo sokumsusa emoyeni, anginankinga nondodakazi abamqashile wangena esikhaleni sakhe kodwa kubukeka sengathi umntwana ugqoke ijezi elimesindayo, ubufakazi kwalokho indlela akhuluma ngayo uma esethi “ziningi izimoto emgwaqweni”, vele lokho kuhlale kwenzeka izimoto zibe ningi emgwaqweni. Yena ubengaqambi amanga, kuwukuthi ufakwe esikhaleni somuntu obeshaya ngegiya eliphezulu, manje yena wafika wadlala kancane. Mhlawumbe sizomjwayela uma kuqhubeka isikhathi futhi siqonde ukuthi abafani futhi ngeke befane kanjalo nesiphiwo sikaMsweli. Bona abaphathi boKhozi bayamangaza, ungasho nje ukuthi wenzeni uLucky Nkosi kanjalo noSipho Mbatha? Kodwa ngeke sasho lutho ngoba bayayazi into abayenzayo. Kodwa ngiyafisa ukuthi uma bethatha izinqumo babuye bakhumbule ukuthi Ukhozi FM olwethu sonke, akulona olwabo kuphela. Thanda Mnikaziwempuphu Chonco EMPANGENI…

IJOKA lokumelwa wukuthola umphumela oncomekayo ngaphandle kwesitobha esibuqonda ukusuka nokuhlala ubunzima beCaf Champions League, uGrant Kekana, kwenza bonke abadlali beMamelodi Sundowns baye ngomqondo ohluzekile emdlalweni womlenze wesibili wowandulela owamanqamu ne-Esperance Sportive de Tunis yaseTunisia. Lokhu kushiwo yisitobha seSundowns, uKhulumani Ndamane, ngesikhathi edlana indlebe nabezindaba ngezinhlelo zokwamukela i-Esperance ngoMgqibelo ngo-3 ntambama, eLoftus Versfeld Stadium, ePitoli. ISundowns yanqoba ngo 1-0 wegoli likaBrayan Leon eTunisia, ngempelasonto edlule, kulandela ukukhishwa kukaKekana ngekhadi elibomvu esiwombeni sesibili. Emuva kwekhadi likaKekana, yahlasela ngamandla i-Esperance ngenhloso yokuthola igoli lokulinganisa kodwa yalwa iSundowns. UNdamane utshele abezindaba izolo ekuseni, eChloorkop, ukuthi yize kubathambisa ukugwetshwa kukaKekana kodwa banejoka lokuqedela umsebenzi abawuqala ekuhambeni ngempelasonto edlule. “Kuyabaphoqa laba abazonikwa isikimu ukuthi babambisane ngoba isipiliyoni sikaKekana kwiChampions League ngeke kuzibeke ukungabibikho kwaso,” kusho uNdamane. “Okuhle ngeSundowns ukuthi ukubambisana yinto yakhona ngakho-ke noma ngabe wubani…

MGADLI ohamba phambili ngamagoli kwiKaizer Chiefs kule sizini, uFlavio Da Silva, akananxa nabalandeli baleli qembu laseNaturena abalijikela baze balibeke amabala uma izinto zingahambi kahle kulona ngoba lokhu kukhombisa uthando. UFlavio (30) waseGuinea-Bissau okuyisizini yakhe yokuqala ebholeni laseNingizimu Afrika, nguyena ozihola phambili kwiChiefs ngamagoli ayisishiyagalombili emidlalweni engu-24 uma ungabalwa owayizolo. Ngezinyanga zakhe zokuqala efikile eNingizimu Afrika, uFlavio wagxekwa okukhulu ngendlela ayedlala ngayo ekubeni kwakulindelwe lukhulu kuyena. IChiefs iyiqale kahle cishe kunawo wonke amaqembu isizini kodwa ukwehlelwa yifomu ngesikhathi esibi kuyikhiphe emjahweni wesicoco seBetway Premiership, Caf Confederation Cup nakwiNedbank Cup ngokwahlukana. Okuningi kwalokhu kuqondane nangesikhathi uFlavio esazijwayeza kwiChiefs. Sekufana nomlando nokho njengoba esephenduke elinye lamaqhawe eChiefs kusukela ibuyelwe wumgqigqo wayo eyayiqale ngawo. Muva nje, lo mgadli uhlale phansi nethimba labezindaba leChiefs lapho evule khona isifuba ngakho konke asekuqaphele kusukela efikile. Nakuba ekuqonda…

KUZIKHANDLA nokuphokophelela phambili emsebenzini wakhe awufundele womkhakha we-Clinical Technology, sekuthela izithelo kuNksz Thabile Mwandla, njengoba esethimbeni labacwaningi ababambe iqhaza ekwakheni nasekuhloleni i-Lenacapavir, okuwumjovo owakhelwe ukuvikela abantu ukuthi bangahaqwa yiHIV. UNksz Mwandla, oqeqeshelwe lo mkhakha eDurban University of Technology, uthe lokhu kuyizindaba ezinhle kakhulu kuyena, futhi kuyamjabulisa ukuba kuleli thimba njengoba isithelekile kuleli imijovo engu-37 920. Imijovo isazokwethulwa nguNgqongqoshe wezeMpilo uDkt Aaron Motsoaledi noMengameli Cyril Ramaphosa. Le ntokazi edabuka KwaMaphumulo, KwaZulu-Natal, iphawula ngalokhu ithe: “Sijabule kakhulu ngokuthi lo mjovo usuphasisiwe ukuthi usebenze, futhi sibona ukuthi uzoba wusizo kakhulu ukugwema ukuthelelana kwabantu ngegciwane lesandulela ngculazi, ikakhulu emphakathini wabantu basezindaweni zasemakhaya lapho abantu beswele ulwazi khona.” Eqhuba, uthe kubathathe cishe iminyaka emithathu ukuhlola lo mjovo, bebambisene nabacwaningi bakuleli nabase-Uganda, base besebenzisa iziguli ezineminyaka ewu-18 kuya ku-25 okubasize ngokuthi konke kuhambe ngendlela efanele kwaze…

I-DA KwaZulu-Natal ifuna kujutshwe uphenyo ngokusula kwamalungu ebhodi lebhange Ithala SOC Limited. Leli qembu lithe kudingeka kwenziwe uphenyo oluphuthumayo, ngokusula kwawo wonke amalungu amahlanu ebhodi. Ithe lokhu kusula ubuthaphuthaphu, kuqubula imibuzo ngokuyekelwa kwaleli bhange ukuthi libe kulesi simo. "Kumele nesifundazwe senze uphenyo mayelana nezinkinga kuleli bhange. Siyazi ukuthi neSpecial Investigating Unit (SIU) isiqale uphenyo ngalokhu. Kumele kutholakale umnyombo kule nkinga yaseThala." Income umsebenzi woMphathiswa wezimali esifundazweni, uMnuz Francois Rodgers, ukuvikela amakhasimende aleli bhange. Leli qembu likhale ngokuthi akumele abantu basesifundazweni, bathwale umthwalo wokuhluleka kwaleli bhange. Ukusula kwamalungu ebhodi leThala kumenyezelwe uNdunankulu waKwaZulu-Natal, uMnuz Thami Ntuli. UNtuli uthe amalungu ebhodi afake isicelo sokwesula emhlanganweni weThala. Akazange aziveze izizathu ezibekwe amalungu ebhodi ngesikhathi esula kanye kanye. Esitatimendeni, uNtuli uthe ukusula kwamalungu ebhodi kukhombisa ngokusobala ukuthi ziyezwakala izigi zikahulumeni wesifundazwe, osembhidlangweni wokubuyisela Ithala…

INSELELO yokungabinamali eyanele ngasohlangothini lukahulumeni yenza ungakwazi ukuqasha othisha abadingeka ezikoleni zakuleli. Le nkinga ihlale ivezwa njengenye yezinselelo ezibhekene noMnyango weMfundo eyisiSekelo, njengoba othisha abangaqashiwe begcina sebeqhinqa emahhovisi befuna ukuqashwa. Sekuphenduke insakavukela ukuthi intsha ihlale ikhala kuhulumeni ngokushoda kwamathuba emisebenzi, kulo mkhakha. NoSolwazi uPhumlani Myende, wophiko loMkhakha wezeMfundo lwase-University of KwaZulu-Natal, uthe nakuba ekuqonda ukukhathazeka kwabantu abasha abaneziqu zalo mkhakha kodwa abangasebenzi, kepha ziningi izinselelo eziholela kuleso simo. UMyende uthe akukhona ukuthi amathuba omsebenzi walo mkhakha awasekho, kepha kunezimo ezenza ukuthi uhlelo lokuqasha othisha lungabe lusenzeka ngendlela efanele nobekwenzeka ngayo eminyakeni edlule, lapho othisha abebeqashwa khona kakhulu. “Enye yezingqinamba ezikhona wukuthi uhulumeni awunayo imali eyanele yokuthi kuqashwe futhi kukhokhelwe isibalo sothisha abadingekayo ezikoleni ezweni, lokho kufakazelwa wukuthi ngokomthetho, kumele ngabe amagumbi okufundela aba nezingane eziwu-35 igumbi ngalinye, kepha kwezinye izikole…

UNGQONGQOSHE wezokuBusa ngokuBambisana neziNdaba zoMdabu, uMnuz Velenkosini Hlabisa, ufuna kuqiniswe izinhlelo zokuvikela abantu kwizinhlekelele ezihlasela kungazelelwe. UHlabisa uthe izikhukhula zango-2022 KwaZulu-Natal, zenza abantu abevile ku-40 000 bangaba nendawo yokuhlala. "Kwafa abantu abangu-500 ngenxa yalezi zikhukhula. Muva nje kube nezikhukhula eLimpopo, ezidale umonakalo. Abantu balahlekelwa imizi," kusho uHlabisa ekhuluma engqungqutheleni ebibhunga ngezindlela zokubhekana nezinhlekelele ezweni, eGoli muva nje. UHlabisa uthe elakuleli libhekene nesimo sokuhlasela kwezinhlekelele. Ubale izikhukhula, isomiso, imililo yequbula, izimvula ezina ngamandla kanjalo neziphepho. "Lokhu kudalwa ukuguquguquka kwesimo sezulu. Kudingeka kube nezinhlelo zokukwazi ukuhlonza izinhlekelele zingakahlaseli." Ukhale ngokuthi abesifazane, izingane, abaphila nokukhubazeka nabadala, yibona ababa yizisulu zezinhlekelele. "Noma ikhona imithetho yezinhlekelele kodwa ngeke isebenze iyodwa. Kudingeka ubuholi obunqala ukubhekana nalesi simo." Uthe kudingeka kwenziwe izinhlelo kusenesikhathi kuphinde kube nezinto ezizosheshe zihlonze uma kuzoba nenhlekelele ukuze kusheshe kuxwayiswe abantu. "Omasipala baneqhaza…