Table of contents for 13 June 2024 in Landbouweekblad

Heineken is die wêreld se naasgrootste biermaatskappy, maar het besluit om in die wyer drankbedryf betrokke te raak. Nes baie wynmaatskappye is Heineken ’n familiebesigheid wat al 150 jaar aan die Heineken-familie behoort. In ’n groot stap het die familie besluit dis tyd om na ander drankies as net bier te beweeg. Ons het dit gedoen deur Distell te koop en Windhoek Breweries oor te neem en ’n nuwe maatskappy, Heineken Beverages, te skep. Só sien Heineken Beverages die toekoms van wyn. Heineken Beverages het meer as 85 handelsmerke in sy stal, soos Savanna, Amarula, Nederburg, Zonnebloem en Durbanville Hills. Toe Heineken na Distell gekom het, was selfs ons eie werknemers bekommerd daaroor of Heineken net belangstel in die siders en ’n paar ander handelsmerke, en Distell se wynbesigheid gaan…

IN ’n saak wat al lank voortsleep, het likwidateurs van ’n egpaar van Bothaville bloedneus gekry oor onregmatige prosedures en ontbrekende skriftelike bewyse. Die likwidateurs se appèlaansoek in ’n likwidasiegeding van die Land Bank teen ’n boerdery van Bothaville is einde Mei met koste deur die appèlhof van die hand gewys. Deon Botha, Johannes Muller en Louisa Sibiya, likwidateurs van Corporate Liquidators, het geappelleer teen ’n bevel van die Bloemfonteinse hooggeregshof dat ’n eerste krediteurevergadering, wat sonder die meester van die hof se toestemming gehou is, ongeldig verklaar word. Regters Glenn Goosen en David Unterhalter het in hul meerderheidsuitspraak ook ’n verklaring uitgereik dat die meester van die hof, ingevolge art. 78(1) van die Wet op Beslote Korporasies (Wet 69 van 1984), likwidateurs goedkeuring kan gee om die eerste krediteurevergadering…

MET die somergraanoes in volle gang word graandiewe slinkser en gesofistikeerder. Minstens drie vragmotorbestuurders is al in die verlede in kapings van graanvragte dood, en prostitute word ál meer in sindikate ingespan. Wimpie Nel, spesialisondersoeker en afgetrede polisiekaptein verbonde aan die handelsmisdaadeenheid, ondersoek al die afgelope 15 jaar graandiefstal. Hy sê nes met veediefstal en ander landelike misdaad is sindikate dikwels betrokke. Een van die scenario’s is dat prostitute wat kliënte langs die pad werf, die niksvermoedende vragmotorbestuurders vra om hulle af te laai op ’n plek waar die kapers hulle inwag. Kapers doen hulle ook as polisiebeamptes voor. Nel sê van die gebiede met die hoogste risiko vir graandiefstal is rondom Delmas, Bronkhorstspruit en Secunda in Mpumalanga. Die sindikate onderskep dikwels die identiteit van ’n kontrakteur wat aan die…

DIE hoofredes waarom TWK se kleinhandel-en-meganisasie-afdeling se ebitda (verdienste voor rente, belasting, waardevermindering en afskrywing) in die ses maande tot einde Februarie vanjaar met 29,69% tot R61,53 miljoen gestyg het, was die verbetering in die wins van sy kunsmisonderneming, Constantia Fertiliser, asook goeie kostebestuur, sê die maatskappy. Volgens André Myburgh, uitvoerende hoof, was kunsmispryse in dié halfjaar baie bestendiger as verlede jaar, toe pryse weens die oorlog in Oekraïne eers skerp gestyg en daarna weer kwaai gedaal het, en boere dus gewag het met aankope om te kyk of pryse nog verder sou daal. Danksy die bestendiger kunsmispryse het Constantia Fertiliser nou beter verkope behaal, het Myburgh in ’n onderhoud met die bekendmaking van die maatskappy se finansiële resultate gesê. Die verkope in die afdeling vir kleinhandel-en-meganisasie toon in die…

Die onderlinge samewerking tussen bedryfsorganisasies en deelnemers in die landbouwaardeketting om nasionale bedryfstandaarde in te stel en om gesamentlik navorsing daaroor te doen, behoort nie deur die Mededingingswet (Wet 89 van 1998) geraak te word nie. Die bepalings van dié wet moet egter altyd in ag geneem word. Bedryfsorganisasies verteenwoordig hul lede en bevorder laasgenoemde se gemeenskaplike belange. Die lede van die bedryfsorganisasies of verenigings is gewoonlik mededingers in dieselfde bedryf of sektor en woon gereeld vergaderings van hul bedryfsorganisasie by. Die bedryfsorganisasie koördineer dikwels die uitruil van inligting tussen mededingers. Bedryfsorganisasies samel die inligting in en versprei dit onder lede. Dié soort inligting kan byvoorbeeld betrekking hê op beleggings, indiensnemingsyfers, lone en produkstandaarde. Die inligting word uitgeruil met die doel om kommunikasie tussen mededingers, kliënte en die staat te…

Trusts is dikwels ’n groot deel van ’n persoon se boedelbeplanning. Dit word onder meer gebruik as ’n hulpmiddel vir opvolgbeplanning in ’n boerdery, vir die beskerming van bates vir minderjariges en ander erfgename, asook vir risiko- en belastingbeplanning tydens die lewe en ná afsterwe. Soos alles anders in die lewe, raak trustaktes ook verouderd. Ons sien baie trustaktes met verouderde paragrawe of waar sekere paragrawe wat trustees in staat stel om die trust behoorlik te administreer, ontbreek. ’n Trust wat in lewe opgerig word (inter vivos-trust) is in wese ’n kontrak tussen die oprigter en die trustees wat bates tot voordeel van die begunstigdes van die trust moet administreer. Die trustees van ’n trust mag eers as trustees optree nadat hulle amptelik deur die meester van die hooggeregshof aangestel…

SEKERE grond het ’n inherente vermoë om wortelsiektes te onderdruk, dog wetenskaplikes kon nog nie vasstel watter grond dit kan vermag of hoe bestuurspraktyke die onderdrukking van siektes kan ondersteun nie. Navorsers aan universiteite in China, Spanje en Nederland het in houeren laboratorium-eksperimente bevind dat wortelvrotsiekte by grondbone onderdruk kan word deur wisselbou met mielies, aartappels en sojabone toe te pas, en die grond met inheemse mikro-organismes te inokuleer. Grondbone is een van die winsgewendste gewasse in China, maar wortelsiektes knou opbrengste en gehalte, veral waar dié gewas intensief en in monokultuur verbou word. Die artikel, “Crop rotation and native microbiome inoculation restore soil capacity to suppress a root disease”, deur dr. Yanyan Zhou van die Nanjing-bosbou-universiteit in China, en ander, is in Nature Communications gepubliseer. Daarin word genoem dat…

Diversifikasie Wat begin het met tien weesvarkies is vandag ’n onderneming met meer as 40 000 varke, sy eie slagplaas en verwerkingsfabriek, en wat werk op buurplase skep en eintlik onbeperkte moontlikhede het. Die sneller was toe Marius Malherbe, uitvoerende hoof van die Malu-groep, presisiebeginsels in een vertakking van ’n baie gediversifiseerde boerdery begin toepas het. Vandag is die Malu-groep die grootste verskaffer van varkvleis in die Noord-Kaap en Vrystaat, en hy droom steeds groot. Die groep boer met meer as 40 000 varke op twee plase buite Kimberley en een by Bloemhof, en het ’n slagplaas, asook ’n vleisverwerkingsfabriek en kleinhandelwinkel in Kimberley. Dit word nie verniet as een van die tien beste varkboerderye in Suid-Afrika beskou nie. Alles het begin met tien weesvarkies wat Charles Malherbe, toe pasgetroud…

Die meeste droogtebestuurspraktyke en hulppakkette in Suid-Afrika is nog baie reaktief, maar deur voorkomend op te tree, kan die nadelige gevolge van droogte op die landbou aansienlik verminder word. Daarom is dit nodig dat gebeurlikheidsplanne vir die verskillende kategorieë van droogte vir die staat, private sektor en boerderye ontwikkel word. Jacob le Roux het as deel van sy meestersgraad in rampbestuur aan die Universiteit van die Vrystaat droogte-gebeurlikheidsplanne vir die veebedryf in die Noord-Kaap nagevors. “Die grootste kwessie was om droogtebestuurspraktyke aan die droogtekategorieë te koppel. Die meeste boere pas reeds voorkomende droogtebestuurspraktyke as deel van hul algemene bestuur toe. In toekomstige studies behoort die gebeurlikheidsplanne vir landboubesighede, banke en die staat ondersoek te word. Dit kan voorkom dat hulppakkette altyd te min en te laat is, soos in die…

BISCOTTI MET AMANDELS EN DROËPERE ■ 100 g gepelde amandels■ 6-8 droëpere, baie fyn gesnipper■ 3 eiers (teen kamertemperatuur), geskei■ 250 ml strooisuiker■ ’n Knippie sout■ Fyngerasperde skil van 1 suurlemoen■ 750 ml koekmeel■ 15 ml bakpoeier Voorverhit die oond tot 180 °C en smeer twee uitgevoerde bakplate met botter. Rooster die amandels baie liggies en oor lae hitte in ’n droë pan tot dit begin verkleur. Laat afkoel en meng met die fyngesnipperde droëpere. Hou eenkant. Klits die eiergele en strooisuiker goed saam. Hou eenkant. Klits nou die eierwitte en sout saam tot stywe punte vorm. Voeg die eiergeel-en-suikermengsel bietjie vir bietjie by die eierwitmengsel en hou aan klits tot goed gemeng. Voeg die suurlemoenskil, amandels en droëpere by en klits deur. Sif die meel en bakpoeier saam en…

Wanneer het jy besef daar is ’n geleentheid vir troublomme in jul omgewing? Ek is in 2022 op Cradock getroud met Graham Lombard, ’n melkboer van die plaas Littlefields, en het toe al besef hoe moeilik dit is om verskaffers te kry. Toe ek dus op ons plaas, sowat 30 km buite Cradock teen die Visrivier, kom bly, het ek geweet hier is ’n gaping in die mark om troublomme te verskaf, want hier is ’n hele paar venues in die omgewing. Met die eerste troue wat ek gedoen het, het ek al besef watter logistieke struikelblokke dit inhou. Hoekom het jy toe self blomme begin plant? My plan vir ’n blomboerdery is juis uit die logistieke probleme gebore. Sowat twee maande voor ’n troue stel ek en die bruid…

Grondtransaksies van groter as 10 ha in drie noordelike provinsies lyk redelik goed, met ’n paar uitskieters. In Mpumalanga het daar oor dié tydperk 340 transaksies in ses distrikte plaasgevind. In die proses is 83 280 ha teen ’n totale waarde van R2,228 miljard verhandel. Komatipoort staan uit met ’n styging van 21,6%, en by Acornhoek en Amsterdam is dalings van meer as 17% aangeteken. In die Noord-Kaap is 220 transaksies in 20 distrikte gesluit. In totaal is 549 870 ha verhandel teen R1,524 miljard. By Hanover (14,7%) en Prieska (10,2%) het grondpryse met meer as 10% toegeneem, en by Colesberg (-12,1%) was die grootste daling. In Noordwes het 694 transaksies in 13 distrikte plaasgevind. Nagenoeg 215 429 ha is teen R3,071 miljard verhandel. Mahikeng (16,9%) en Coligny (-17,4%) is…

Someroes laer, maar groter sekerheid oor syfers Die verwagte totale someroes is effens afwaarts aangepas van 16,024 miljoen ton tot 15,940 miljoen ton. Die nasionale oesskattingskomitee het in sy vierde produksieskatting die kommersiële mielie-oes met 0,61% afwaarts aangepas. Sonneblom se verwagte oes is 5,57% meer, sojabone 1,93% minder, grondbone 0,95% minder en sorghum 1,85% meer. Die oppervlakteskatting staan op 4,439 miljoen ha en is steeds die grootste aanplantings in 30 jaar, al is die verwagte oes 21% kleiner as die oes van 20,118 miljoen ton op 4,392 miljoen ha verlede jaar. Wandile Sihlobo, hoofekonoom van Agbiz, sê die data dui op die omvang van die skade vir die landbousektor weens die midsomer-droogte. Die finale omvang van die finansiële skade vir boerderye en landboubesighede moet nog beraam word. “Nogtans kan uit…

Anderkant die reënboog Ek vermy politiek. Die oneerlikheid is een ding, maar dis die hoeveelheid tyd wat iets so voorspelbaars in beslag kan neem, wat my onderkry. Op ál wat ’n radiostasie of webwerf is, en in elke koerant, word politiek tot vervelens toe ontleed, terwyl (die meeste) politici eintlik maar net in die pad is. Wat my verder van Suid-Afrika se politiek afsit, is hoe dit ons so gereeld oor die afgrond laat kyk. Of dit nou staatskaping, politiekgedrewe onluste in KwaZulu-Natal of, soos nou weer, koalisiepolitiek is wat dreig om morsig te raak. Kinders wat met handgranate speel. Want hier is ons weer. Die politici moet vir ’n slag iets verantwoordeliks doen. Die land vir ’n slag eerste stel. Die konstruktiewe middeweg vind. Nie die EFF en MK…

DIE mededingingskommissie het onlangs in ’n verslag gesê maatskappye wat ingemaakte sardyne verkoop, ervaar ’n styging in verkope en dat dit ten koste van hoendervleis is. Chris Schutte, uitvoerende hoof van Astral Foods, sê die maatskappy kyk beslis na die moontlikheid van ingemaakte hoendervleis indien hy ’n geskikte fabriek kan vind waar dit vir ’n toetstydperk ingemaak kan word. Schutte het in ’n inligtingsessie tydens die bekendmaking van die maatskappy se finansiële resultate vir die ses maande tot 31 Maart vanjaar gesê ingemaakte sardyne het hoendervleis nie vervang as die gewildste proteïenbron in Suid-Afrika nie, maar verkope van sardyne het gestyg, terwyl hoendervleisverkope effens gedaal het. Hoendervleis bly per gram proteïen die goedkoopste. Twee van die redes hoekom platsak verbruikers neig om meer ingemaakte sardyne te koop, is dat dit…

DIE KAL-groep kon sy voorbelaste wins met 9,7% vergroot, sy skuldvlakke verlaag én ’n verhoogde dividend verklaar, het Sean Walsh, uitvoerende hoof, met die bekendmaking van die groep se halfjaarresultate gesê. Hy het bygevoeg dat die maatskappy waarskynlik nie sy eie teiken van R1 miljard se voorbelaste wins in die 2025-boekjaar sal haal nie. “Die sake-omgewing was taai die afgelope ses maande, maar ek glo ons het ’n hoë mate van veerkragtigheid getoon en ons kon gesonde groei lewer,” het Walsh in ’n aanlyn uitsending gesê waar aangekondig is dat die herhalende wesensverdienste met 8,1% gegroei het. ’n Tussentydse dividend van 54 sent is verklaar, wat 8% hoër as verlede jaar is. Volgens Graeme Simm, finansiële direkteur, is die groep ondanks die moeilike handelstoestande gerat vir verdere groei. “Ons kleinhandel-…

Werkloosheid in Suid-Afrika toon ’n stygende neiging en het ’n nuwe rekordhoogtepunt van 42% bereik, volgens die uitgebreide definisie van werkloosheid. Dit blyk uit die jongste syfers van Statistieke SA se kwartaallikse arbeidsopname. Twee definisies word gebruik: Die amptelike koers is tans sowat 32,9% en sluit mense van 15-64 jaar oud in wat aktief werk soek. Die definisie van uitgebreide werkloosheid sluit in mense van 15-64 jaar wat nie werk het nie en gewillig is om te werk, maar nie meer amptelik soek na werk nie. Laasgenoemde syfer is meer betekenisvol en weerspieël die ware stand van sake. Dit is eintlik skrikwekkend as ’n mens dink dat feitlik elke tweede persoon wat kan werk, nie werk het nie. Die beskikbare werksmag word op sowat 41,1 miljoen mense geraam, waarvan net…

Grondgesondheid Aalwurms is die graanboer se grootste gevaar en die probleem word vererger weens ’n gebrek aan kennis van en inligting oor die plaag. Boonop word aalwurmsimptome soms verkeerdelik as ’n tekort aan voedingstowwe, droë toestande of ander biotiese en abiotiese faktore gediagnoseer. Aalwurms rig ook skade aan gewasse en vrugtebome se wortels aan, met die gevolg dat opbrengste geskaad word deur die kleiner en minder doeltreffende wortelstelsel wat keer dat die plant voluit kan groei en produseer, het dr. Driekie Fourie, Syngenta se hoof van tegniese produkte vir Afrika en die Midde-Ooste, tydens ’n onlangse aalwurmwerksessie gesê. Die aalwurmprobleem het onder die soeklig gekom tydens ’n werksessie van die Pan-African Nematology Network (Panema) wat by die Universiteit van Mpumalanga in Mbombela gehou is, met die Nematologiese Vereniging van Suider-Afrika…

Veeboere leef tans in ’n lugleegte, sê dr. Frikkie Maré, hoofbestuurder van die Rooivleisprodusente-organisasie (RPO), oor die “perfekte storm” van struikelblokke wat die bedryf tans in die gesig staar. Boere se winsgewendheid word bedreig deur onder meer lae vleis- en wolpryse, hoë insetkoste, beurtkrag, ’n verval in infrastruktuur, entstoftekorte, droogtes en misdaad, maar hy het op die Nasionale Wolkwekersvereniging se Oos-Kaapse kongres aan boere gesê dié teëspoed bied ook die geleentheid om hul boerderye te vernuwe. Normale stygings in speenkalf-, stoorlam- en karkaspryse is laas in 2018 gesien. In 2019 en ’n deel van 2020 was pryse laer as in 2018. Al was 2021 en 2022 goeie jare wat pryse betref, het die pryse verlede jaar weer erg onder druk gekom. ’n Skerp styging in inflasie het die rentekoers laat…

Cedar bied ’n verskeidenheid pompreekse, waaronder klein DC- (gelykstroom) pompe wat ideaal is vir veesuipings. Die Multiflow-reeks is Cedar Solar se vlagskip-boorgatpomp, wat met gelykstroom én wisselstroom (AC) kan werk. Die tegnologie in dié pompe laat ook toe dat die vloei en kophoogte vermeerder kan word indien meer sonpanele bygevoeg word. Dié reeks is voortreflik vir veesuipings en kleinskaalse besproeiing. Die Veichi-aandrywingstegnologie is ontwerp om enige huidige AC-motor (tot en met ’n megawatt) om te skakel tot sonkrag of hibriede werking om ’n wesenlike besparing op krag- en brandstofuitgawes te bewerkstellig. Cedar se stelsels laat die boer toe om gedurende die dag water te pomp en te besproei, al is Eskom-krag nie beskikbaar nie. Cedar bied alles wat jy nodig het om water te pomp – van die pomp tot…

’n Mens dink altyd aan sitrus as jy Citrusdal noem. Hoe aard pere hier? My oupa het oorspronklik van Ceres gekom en die familieboerdery in 1923 in die Piekenierskloof kom vestig. Die kouer eenhede is heelwat hoër as in die vallei, dus leen ons omgewing hom tot ’n gehalteproduk. Watter pere verbou julle en waarmee boer julle nog? Ons boer met vroeë Bon Chretien-pere, wat ons spesifiek vir die droogmark geplant het. Die kultivar se kouebehoefte is ’n bietjie laer, en help dus dat ons meer gereeld ’n goeie oes het. Dit is ook ’n vroeë kultivar, wat beteken ons kan die pere vroeër op die droogbane kry en die goeie sonlig benut. Al ons pere word in die son gedroog. Ons het ook appelkose, nektariens, perskes en sitrus, en…

Op ’n keer het Petrus Jesus gevra: “Here, hoeveel keer moet ek my broer vergewe?” (Matt. 18:21). Dit laat my dink aan ’n ander vraag wat ek Jesus graag sou wou vra: “Hoeveel keer moet ek die duiwel teenstaan voordat dit genoeg sal wees? Sal daar ooit ’n tyd kom dat die duiwel sal besef dat hy genoeg geprobeer het?” Wel, ek het nuus vir jou – slegte nuus. Die duiwel ken nie iets soos ophou nie. As daar iets is wat ons by hom kan leer, is dit sy wil en vermoë om knaend aan te hou. Volharding en hardwerkendheid is twee skerp pyle wat hy voortdurend in sy pylkoker dra. As daar vandag of môre nie sukses is nie, is daar nog altyd oormôre, en al die dae…

GAUTENG PRETORIA GOEDGEDACHT (443) 29 ha, aan Bloekomspruit Plaas (Edms.) Bpk., van Duikerveld (Edms.) Bpk., R5 175 000. BRANDBACH (471) 86 ha, aan Strijbis Boerdery (Edms.) Bpk., van Brandbach Stead (Edms.) Bpk., R3 900 000. KAMEELFONTEIN (297) 21 ha, aan Grootvoet Eiendomme Beleggings (Edms.) Bpk., van W P & H A Strauss-familietrust, R2300000. KAMEELFONTEIN (297) 23 ha, aan Netal El Investments (Edms.) Bpk., van Eldorado Park Country Estate (Edms.) Bpk., R8 199 077. TWEEFONTEIN (413) 22 ha, aan Freecka Beleggings (Edms.) Bpk., van Freecka Landgoed (Edms.) Bpk., R3 460 000. TWEEFONTEIN (413) 36 ha, aan Freecka Beleggings (Edms.) Bpk., van Freecka Landgoed (Edms.) Bpk., R3 370 000. TWEEFONTEIN (413) 92 ha, aan Freecka Beleggings (Edms.) Bpk., van Freecka Landgoed (Edms.) Bpk., R13 180 000. KWAZULU-NATAL BALLITO KRUISFONTEIN (963) 41 ha…

KONFERENSIES 12-13 JUNIE: Nasionale Wolkwekersvereniging-kongres. Tel. 041 365 5030, web: nwga.co.za 25-27 JUNIE: Africa Agri Techkonferensie. CSIR-konferensiesentrum, Pretoria. Tel. 012 004 0811, web: africa-agri.co.za 22-25 JULIE: Negendewêreldkongres oor bewaringslandbou, aangebied deur John Deere, Landbouweekblad en die Wes-Kaapse departement van landbou. Kaapstadse Internasionale Konferensiesentrum. Talle topsprekers oor hoe bewaringslandbou die landbou se veerkragtigheid kan versterk. E-pos: events@landbou.com; nog inligting by wcca9.org 5-6 AUGUSTUS: Internasionale Varsproduktevereniging (IFPA) se Suider-Afrika-konferensie, Kaapstad. Web: freshproduce.com/events/the-southern-africa-conference 7-8 AUGUSTUS: Vrystaat Landbou-kongres, Bloemfontein. E-pos: cynthia@vslandbou.co.za of elana@vslandbou.co.za 1-3 OKTOBER: Windaba 2024, aangebied deur Sawea. Kaapstadse Internasionale Konferensiesentrum. Web: sawea.org.za/windaba FEESTE, EKSPO’S 7-9 JUNIE: Hankook Land Cruiser-fees en Afrika-rekord, Sondela-natuurreservaat-en-spa, Bela-Bela. Tersia Schneider, 072 487 000, e-pos: accounts@ekspo.co.za 14-15 JUNIE: Victoria-Weswildsfees, Victoria-Wes-skouterrein. E-pos: vicweswildsfees@gmail.com 14-16 JUNIE: Karoo-winterwolfees, Middelburg, Oos-Kaap. E-pos: info@karoowinterwoolfestival.com 15 JUNIE: Boeremusiekfees, Naboomspruit. Aangebied deur die Naboomspruitse…

DIE kollig het die afgelope maand opnuut geval op die aanstelling van buitelandse werkers op plase nadat ’n boer in die George-omgewing in hegtenis geneem is op ’n klag van die indiensneming van ’n onwettige immigrant. Dié klopjag is glo nie die uitsondering nie en kom ál meer gereeld in die landbousektor voor, meen Marelize Roets, arbeidsregkenner by Asambo Arbeidskonsultante. Een vraag wat arbeidsregkenners gereeld gevra word, is of ’n inspekteur geregtig is om sonder vooraf kennisgewing skielik by die werkplek op te daag. “Ons ontvang daagliks navrae oor die inspeksies wat die departement van arbeid by werkgewers uitvoer. Die algemeenste vraag is of die departement bloot mag opdaag sonder om vooraf ’n afspraak met die werkgewer te skeduleer,” sê Roets. “Ja, ’n inspekteur ís geregtig om dit te doen.…

Die Du Randts van die plaas Dalmally in die distrik Elliot boer wydsbeen, met een been op die rand van die Drakensberg met suurveld en ’n kouer klimaat, en die ander been in ’n warmer klimaat aan die voetenent van die berg. Dalmally, op die rand van die berg, is 2 000 m bo seespieël en die ander grond aan die voet van die berg, wat hulle huur, 1 400 m bo seespieël. As deel van hul bestuur moet hulle op Dalmally in die winter voorsiening maak vir temperature wat onder -14 °C kan daal, en temperature op die huurgrond wat in die somer tot 42 °C kan styg. Die Du Randts is ’n vyfdegeslagboerdery. Hulle boer met beeste en wolskape en bedryf die Mountain Shadows Sussex-, Dormer- en Suffolk-stoetery.…

Die Syngenta Boerekos Plaaskombuis op die Nampo-oesdag het vanjaar die ideale geleentheid geskep om te wys hoe ineengevleg kosproduksie met die lewe van die publiek is. Benewens dat Syngenta en Landbouweekblad wou wys dat plaaslik vervaardigde produkte by uitstek geskik vir die maak en opdis van smullekker geregte is, het dit ook die boodskap tuisgebring dat voedselveiligheid en -beskikbaarheid regdeur die waardeketting noodsaaklik is. “Met ons betrokkenheid wil Syngenta wys dat volhoubare kosproduksie moontlik is met die hulp van moderne tegnologie. Deel van Syngenta se volhoubaarheidsdoelwitte is om te verseker veilige en goeie kos is vir alle mense beskikbaar,” sê Hendrik van Staden, Syngenta Saad se besigheidshoof in Afrika suid van die Sahara. “Kos is deel van ons lewens, of dit by die huis, op ’n boeredag of op Nampo…

Landboutoerisme Toerisme kan die wa deur die drif trek wanneer natuurrampe en die politiek aan ’n plaas se winsgewendheid knaag. Voëlkyktoerisme is wêreldwyd ’n snel groeiende nismark in die ekotoerismebedryf, en plaaslik het dit ’n hupstoot gekry danksy ’n projek van BirdLife SA (BLSA) met belanghebbendes op die Tuinroete en in die Klein-Karoo. Dié ses maande lange projek is deur die Wes-Kaapse departement van ekonomiese ontwikkeling en toerisme gefinansier uit sy Growth For Jobs-toerisme-uitdagingsfonds. Dit het in Maart tot ’n einde gekom, maar vir grondeienaars op die Tuinroete en in die Klein-Karoo kan dit die begin van nuwe geleenthede vir diversifikasie wees. Voëlkyktoerisme is reeds in 2010 as ’n belangrike komponent van natuurtoerisme geïdentifiseer in ’n studie deur die departement van handel, nywerheid en mededinging. Plaaslike en oorsese reisigers in…

Wen - Wen - Wen! Vandeesweek kan 1 leser ‘n Boereplaas Bordspeletjie wen. Leidraad: ’n Vrug. Lees op bl. 90 hoe dit werk. WEN BOEREPLAAS-BORDSPELETJIE! Een leser kan 'n Boereplaas Bordspeletjie wen. NEEM SÓ DEEL: Vul die blokraai korrek in en gebruik die letters in die kleurblokke om die antwoord op die vraag op bl. 91 te ontrafel. SMS die woord LBW, gevolg deur jou antwoord, naam, van en dorp/stad na 33677. Deelnemers kan soveel keer SMS as wat hulle wil. Elke SMS kos R1,50. Net mense binne SA grense kan deelnee Die wenners sal die oorspronklike, voltooide blokraai en hul besonderhede moet verskaf. Geen werknemers of h gesinne van Media24 en sy reklamemaatskappye mag deelneem nie. Die sluitingsdatum is 27 Junie 2024. Geen posstukke word meer as inskrywing aanvaar…

Besoek landbou.com/veilings vir die jongste veilingsnuus. Ten spyte van die moeilike tye wat boere tans ervaar, het die Qualitrio Bonsmara-produksieveiling op 9 Mei op Viljoenskroon in die Vrystaat beter as verwag verloop. Die opkoms was goed en die pryse bo verwagting goed, het Paul Maré, medeteler van Qualitrio Bonsmaras, gesê. Die hoogste prys van R460 000 is betaal vir lot 9, ’n bul wat aan Rudi en Nickus Heinlein van Sirkel-N-Boerdery by Baltimore verkoop is. Altesaam 37 bulle is teen ’n gemiddelde prys van R101 500 verkoop. Paul sê hoewel dit hartseer was om van die diere afskeid te neem, is hy dankbaar dat almal na goeie eienaars gaan. Wat die kommersiële beeste betref, is ’n topprys van R27 000 vir ’n 3-in-1-koei betaal, met ’n gemiddelde bod van R24…