Table of contents for 30 May 2024 in Landbouweekblad

Pure plaas ’n Troppie van die Hoër Landbouskool Oakdale se Jersey-koeie aan die wei buite Riversdal. Oakdale bedryf ’n kommersiële suiwelafdeling wat ’n groot bydrae tot die skool se inkomste lewer. Benewens dat die kudde vanjaar een van net ses platinumtoekennings in SA Stamboek en Telwiedre Voere se nasionale Elitestoetkuddekompetisie behaal het (sien die berig op bl. 80), is die suiwelafdeling ook ’n kampvegter vir die omgewing. Hennie Uys, bestuurder van die afdeling, sê hulle lewer die afgelope 15 jaar hul melk aan Nestlé en is deel van dié maatskappy se koolstofprojek. “Daar word gereeld monsters in ál ons weikampe geneem om ons koolstofvaslegging te meet. Ons word ook elke jaar geoudit om te kyk waar ons kan verbeter. Dit help ons om in harmonie met die omgewing te boer.”…

Op pad terug van Nampo bevind Manie hom in ’n bussie met ’n klomp nie-Vrystaters en Kollega agter die stuur. Eers kos dit fyn draai om heelhuids deur die slaggate in Viljoenskroon te kom, en toe vat ons die pad na Parys. So ’n kilometer of wat voor Parys, teen ’n afdraand waar geen streep op die pad naastenby sigbaar is nie, beduie ’n spietkop ons moet aftrek. Die man beveel die bestuurder, nou reeds ’n berugte oortreder van padreëls, om ’n draai om die bussie te loop en soos hy al geselsend loop en beduie, met ’n blou noot wat sigbaar agter sy selfoon uitpeul, begin die res van die span ’n spesmaas ontwikkel dat die spietkop eerder ’n “koevert onder die tafel” verwag as ’n boetebetaling … Kollega…

UIT alle oorde is die Plaaskombuis, ’n gesamentlike restaurantprojek tussen Landbou Boerekos en Syngenta, as dié groot suksesverhaal van die afgelope Nampo-oesdag bestempel. Meer as 8 000 etes – vars gemaak met gehalteprodukte van vyf proteïenborge – is oor die vier dae van dié landbouskou verkoop. Die konsep, wat ontstaan het nadat Graan SA versoek het dat ’n restaurant aan die gewoonlik stiller suidekant van die terrein gevestig word, was van die intrapslag af gewild. Die inligtingsentrum is oorval deur navrae en die aantal besoekers aan dié deel van die terrein het merkbaar verhoog en stabiel gebly. Dr. Tobias Doyer, uitvoerende hoof van Graan SA, het ná afloop van die week gesê die Plaaskombuis is ’n “dreunende sukses”. “Buiten dat dit heerlike kos en ’n stylvolle bydrae tot die restaurantaanbod…

DÍT blyk uit inligting van die 50 beste produsente, uit alle produksiestreke, wat in 2023 aan Vinpro se produksieplan-opname deelgeneem het. Inligting van 273 produksie-eenhede, 26 074 ha, 8 476 blokke en 389 934 ton druiwe is ingesluit, wat sowat ’n derde van die bedryf verteenwoordig. Volgens Yolandi Botha, landbou-ekonoom van Vinpro, lewer die meeste van die topwynboere druiwe aan produsentekelders. “Die hoeveelheid van hul wingerde wat ouer as 20 jaar is, is dalk nie na wense nie, maar dit is wel minder as 20% van die wingerde op hul plase. Hulle huiwer ook nie om aan te plant en te hervestig nie, selfs in moeilike jare, soos tydens die covid-19-pandemie. Wanneer produksiekoste hoog of oeste klein is, hou hulle by met ’n hervestigingskedule van 5% van hul totale wingerdoppervlakte…

Die uitvoer van sagtevrugte is ’n sterk groeiende bedryf. Volgens die Kortbegrip van Landboustatistiek was die uitvoerverdienste in 2023 bykans R13 miljard, en dit bly groei wat tonnemaatuitvoer en verdienste betref. Die huidige jaar se uitvoerseisoen is in volle gang, en vergeleke met verlede jaar word beter resultate in die vooruitsig gestel. Groter tonnemaat met beter pryse, asook hopelik minder bottelnekke by die hawens word verwag. Volgens die bedryfsorganisasie Hortgro was die omset van die bedryf in 2023 nagenoeg R17,7 miljard, waarvan die meeste deur uitvoer verdien is. Chili is Suid-Afrika se grootste mededinger in die uitvoermark. Die belangrikste sagtevrugte-uitvoerprodukte is appels, gevolg deur pere, pruime en appelkose (wat daal). Die uitvoer van kersies het ook sterk groei getoon. Die produksie van sagtevrugte vir uitvoer vind hoofsaaklik in die Wes-Kaap…

1 Lenings met té kort of té lang terugbetaaltermyne Die terugbetaaltermyn van ’n lening en die leeftyd of gebruiksduur van die bate wat gefinansier word, moet met mekaar saamloop. Daar is veral twee foute wat boere maak. Die een is om ’n medium- tot langtermynbate met ’n korttermynlening te finansier. Die tweede is om ’n kort- of mediumtermynbate met ’n langtermynlening aan te koop. ’n Langertermynprojek, soos om besproeiing vir beweiding of voerproduksie te ontwikkel, gaan eers ná ’n tyd die maksimum opbrengs lewer. Die inkomstestroom is dus aanvanklik stadig en neem mettertyd toe totdat die weiding in volle produksie is. Die lening wat aangegaan is, moet dus by hierdie produksieritme van die besproeiing aangepas wees. Hoe korter die termyn van die lening, hoe hoër gaan die jaarlikse terugbetaling wees.…

Die strategiese gebruik van dekgewasse as deel van herlewingslandbou om grondgesondheid te herstel en gevolglik grond se vrugbaarheid en produktiwiteit volhoubaar te bevorder, kry die afgelope tyd baie aandag. As Barenbrug Suid-Afrika se verkoopsbestuurder vir die noordelike streek is Douw Steyn goed ingelig oor plaaslike boere se gebruik van dekgewasse. Hy sê hoewel boere verbeterings in grondgesondheid sien danksy dekgewasse, is daar ook ’n reeks bekommernisse en kwessies oor hierdie praktyk. Daaronder tel: ■ Dekgewasse se gebruik van grondvog. ■ Hoe dit onkruidbekamping raak. ■ Die geld wat nodig is vir toepaslike werktuie en vee om die dekgewasse te benut. ■ Die kontantvloei wat nodig is. ■ Die beskikbaarheid van kennis en ondersteuning oor die verbouing en bestuur van dekgewasse, veral in Suid-Afrika. ■ Hoe om eweknieë wat nie volhoubaar…

FOKUS ONS SKOLE DIE Hoër Landbouskool Oakdale se melkbeeskudde was een van slegs ses kuddes in Suid-Afrika wat ’n platinum-eerbewys in SA Stamboek en Telwiedre Voere se nasionale Elite-stoetkuddekompetisie vir 2024 ontvang het. Dit is die eerste keer dat dié eer hulle te beurt geval het sedert hy die kudde in 2003 begin bestuur het, sê Hennie Uys, bestuurder van die skool se suiwelafdeling. Die eer kom sy span toe, sê hy. “Dit is die hele span, ál die algemene assistente en Frans van Reenen, ons plaasvoorman wat my regterhand is, se prestasie. Sonder Frans en ons betroubare werkers sou ons dit nie kon regkry nie. Ons lê klem op spanwerk. Ons kom elke oggend bymekaar en bespreek die dag wat voorlê. Die werkers lewer dan ook ’n waardevolle…

Waar het jy grootgeword en hoe het jy in die afslaersbedryf beland? Ek het op Standerton grootgeword. My pa, Pieter, was van 1972-2001 in die afslaersbedryf. Hy konsentreer sedertdien op die bemarking van plaaseiendomme. My ma, Alta, het as ’n veilingsklerk gewerk. Sy het later tuine beplan en eiendomme bemark. My oupa was ook in die bedryf. Daar is nie baie afslaers wat kan sê hulle is die derde geslag in die bedryf nie. My afslaersdroom het in graad 11 begin. In Desember 2000 het ek as bemarker begin werk en in 2003 het ek vir die eerste keer begin opveil. Ek het deur die ranks gekom en begin deur op Vrydae varke op die Standerton-veilings te verkoop. Saterdae het ek losgoedveilings gedoen en later beeste en skape op weekveilings.…

Bulle het goeie gemiddelde pryse behaal op die agttiende produksieveiling van die Vlakte Bonsmara-groep wat by Roedtan gehou is. Altesaam 29 bulle is vir gemiddeld R70 776 verkoop, wat volgens die deelnemende boere bevredigend was as Suid-Afrika se ekonomiese toestand en die droogte in sommige dele van die binneland in aanmerking geneem word. Die duurste bul, KDT 21-114, is vir R180 000 deur Du Toit Boerdery van Kobus du Toit, Marble Hall, aan André en Judie Thirion, AJT Boerdery, Pretoria, verkoop. Kommersiële vroulike diere het ook goeie pryse behaal. Die hoogste prys was R40 000 elk vir ’n groep van drie dragtige koeie met kalwers (3-in-1) wat deur Tian Kruger Boerdery, Roedtan, aan AAG Logistics verkoop is. Altesaam 53 dragtige koeie met kalwers het gemiddeld R31 443 stuk behaal, dragtige…

Troeba(b)oere sing oor landbouers se roeping Lion du Plessis (links) en Janneman Roberts van die musiekgroep LOX is twee leierboere van Ermelo in Mpumalanga wat deur hul musiek die boodskap wil uitdra dat “die boere wat regtig boere of landbouers is, net wil boer en kos produseer. Ons wil nie as politieke pionne gebruik word nie.” Hulle boer naby mekaar met skape, beeste, mielies en sojabone. Hul eerste eie liedjie, Roeping, is vroeg in Mei bekend gestel. LOX verwys na “ ’n tipe wol wat jy aan ’n skaap kry en wat vol mis, sweet en urine is, maar die koper was dit net en dan is dit spierwit en baie waardevol,” verduidelik Du Plessis. “Ons gedagte was dat ons as mense ook soos loks is. Ons is vol sonde…

IN vorige jare was saadbestellings teen hierdie tyd al vasgemaak, maar boere en agente in Noordwes sê die beplanning vir die komende seisoen gaan gepaard met baie onsekerhede en dat bestellings agter is. ’n Agent wat sonneblom-, mielie- en sojaboonsaad in dié provinsie verkoop, sê teen middel Mei het hulle gewoonlik al meer as 100% van hul doelwit vir nuwe aankope vasgemaak. “Met ‘vasmaak’ bedoel ek dat betalings ook afgehandel is. Tans het ons net sowat 80% van ons doelwit behaal en baie van die bestellings is nog nie vas nie,” sê die agent wat op grond van anonimiteit gepraat het. Jannie Blignaut, areabestuurder van Pannar in Noordwes, sê by hulle is die neiging ook dat saadbestellings vir die nuwe seisoen stadiger inkom as in vorige seisoene. “In dié stadium…

MOELETSI MBEKI het op die Nampo-oesdag deelgeneem aan ’n paneelbespreking oor die verkiesing en wat die landbousektor van die politieke omgewing te wagte kan wees. Hy het die stelling oor grondhervorming gemaak ná Waldimar Pelser, direkteur van kyk-NET en fasiliteerder van die gesprek, hom gevra het of dit regtig vir die landbousektor saak maak wie ná die verkiesing die land regeer. Mbeki het gesê hy stem nie saam dat Suid-Afrika grondhervorming nodig het nie. “Na my mening as politieke ontleder is die oordrag van grond van ’n wit persoon na ’n swart persoon nie gelykstaande aan grondhervorming nie. Dit is ’n transaksie.” Hy het voorts verwys na drie doelwitte van grondhervorming binne die raamwerk van die moderne wêreld. “Eerste is om ’n land se landbouprodukte uit te voer. As jou…

NIEMAND wil enige teken van antimikrobiese middels in hul cappuccino hê nie, sê dr. Theo Kotze, ’n veeartsenykundige konsultant in die beesbedryf, wat namens die Melkprodusente-organisasie (MPO) in ’n werksessie oor die weerstandigheid teen antimikrobiese middels gepraat het. Die suiwelbedryf en ander bedrywe het in die sessie terugvoering gegee oor die gebruik van antimikrobiese middels in hul bedrywe en die vordering wat hulle tot dusver in die bekamping van antimikrobiese weerstandigheid gemaak het. Die sessie is aangebied deur die vereniging van veevoervervaardigers (Afma) en die Suid-Afrikaanse vereniging vir dieregesondheid (SAAHA). In die melkbedryf is daar geen verdraagsaamheid ten opsigte van die aanwesigheid van enige antimikrobiese middels in die grootmaatmelk wat op ’n plaas opgelaai word nie, het Kotze gesê. Volgens hom is Melk SA en die MPO se planne deeglik…

“ONS het gewonder wanneer uitkappings en die ouderdom van ons wingerde ons gaan inhaal, en ek wil my verstout om te sê ons is nou daar,” het Yvette van der Merwe, uitvoerende bestuurder van Sawis (die Suid-Afrikaanse wynbedryfinligting en -stelsels), op Vinpro se inligtingsdag vir die Paarl en Swartland gesê. Suid-Afrika se wingerdstand het sedert ’n hoogtepunt van sowat 102 000 hektaar in 2006 tot ongeveer 88 000 hektaar verlede jaar gedaal. “Ons het in 2006 laas meer wingerd aangeplant as wat uitgekap word,” het sy gesê. In elkeen van die land se wynproduksiestreke haal boere tans meer wingerd uit as wat hulle aanplant. ’n Verdere dreigende probleem is die ouderdom van wingerde. Tien jaar gelede was 32% van Suid-Afrika se wingerde ouer as 16 jaar, maar tans val 56%…

Kortliks Sonder belasting op toegevoegde waarde (BTW) sal die verkope van sorghummeel toeneem. Dit sal die winsgewendheid verhoog en meer boere laat besluit om sorghum te verbou. Dít was die oorwoë mening van kenners op ’n sorghumboeredag wat Graan SA en die Sorghumtrust by Willand Boerdery van Willem Groothof, voorsitter van Graan SA se sorghumwerkgroep, by Settlers op die Springbokvlakte gehou het. Groothof het gesê ’n aansoek is ingedien om BTW op sorghummeel af te skaf, maar die bedryf wag nog vir terugvoer van die regering af. Op die 2022-wêreldsorghumkongres in Europa was dit vir hom opvallend watter beduidende aandag sorghum in Europa kry om die verbouing van hierdie gewas stukrag te gee. Hoewel sorghum grootliks vir diere gebruik word, word nuwe produkte vir menslike verbruik ontwikkel. Aanplantings neem ook…

Beesboer van die Jaar In ’n boerdery waar swart Angusse nie ’n kriesel byvoeding kry nie, bestempel Jason Carroll ’n halwe jaar nadat hy as Voermol se Beesboer van die Jaar aangewys is, steeds sy titel as ’n effense gelukskoot. Dié bestuurder van die lewendehawe-afdeling op Boschendal by Simondium, tussen Franschhoek en Stellenbosch, meen ’n mens moet die hele waardeketting besit, en jy hoef nie noodwendig ’n groot boer te wees om dit reg te kry nie. As daar oor die bekroonde kudde gepraat word, is die eerste onderwerp nooit die teelmateriaal, gesondheidsmaatreëls of uitslaggewig nie, maar hoe grondgesondheid die spil is om uiteindelik meer beeste aan te hou, deur eie verkoopspunte te bemark en soveel waarde moontlik toe te voeg. Sandgrond word hier ook opgebou om hoëwaarde-uitvoervrugte te vestig.…

Inspirasie Meer as 30 jaar later onthou Vivian Jakobs steeds die gesprek wat hy en sy oorlede pa, Abraham, op ’n Saterdagmiddag in die sitkamer van hul tweeslaapkamerhuis gehad het. Die huis se kamers was klein, heeltemal te klein vir ses mense. Die kombuis het ’n rak of twee gehad en die toilet was ’n ent weg buite op die erf. Maar vir Vivian, sy twee susters, ouers en ouma was dié plaaswerkershuis in die Warm Bokkeveld hul tuiste. Abraham, ’n kontrakwerker op plase, het sy seun vertel van sy eie pa wat ook van plaas tot plaas beweeg het op soek na stukwerk. Hy was later só goed in sy werk dat ’n boer hom vertrou het met ’n klein, rooi 135-Massey Ferguson-trekker om die lande te bewerk. Jare…

Boereplan Om vinnig uit ’n bakkie te kan aanlê, is altyd ’n lastigheid. As die spieëltjie nie in die pad is nie, gly die geweer op die deur, en dan is mis skiet of kwes die skut se voorland. ’n Vernuftige skietstut wat die afgetrede boer Edmund Strauss, van Mariental, ontwerp het, pas stewig oor ’n bakkie se deur sodat die skut met groot selfvertroue na ’n probleemjakkals of ’n wildsbok kan aanlê. Jagters het gou die waarde van Edmund se skietstut raakgesien en die bestellings het begin instroom. Hy het reeds byna 100 skietstutte gebou en verkoop. Een bestelling het 15 stutte beloop. Daar is ook baie belangstelling uit Suid-Afrika. Geluk ná die ongelukke ’n Onderonsie met ’n bees en ’n motorongeluk het Edmund aangespoor tot die ontwerp van…

’N MENS besef eintlik eers hoe besonders dit is om as die topskolespan in Suid-Afrika aangewys te word wanneer jy kyk watter ander eerbewyse die aand oorhandig is – soos aan Manie Libbok, wat as die Nuweling van die Jaar aangewys is, en aan Eben Etzebeth as die Sportman van die Jaar. Só sê Piet Lourens, afrigter van die toutrekspan van die Hoër Landbouskool Oakdale. Piet het die eerbewys saam met sy seun, Thys, ’n voormalige kaptein van die span, in ontvangs geneem. Die span het die eerbewys vanjaar ingepalm nadat hy reeds twee keer vantevore daarvoor benoem is. Volgens Piet is die eerbewys veral besonders omdat daar so baie verskillende skolespanne in Suid-Afrika is. “Dit is lekker om erkenning te kry vir dié sport, wat nie ’n hoë profiel…

SOWAT 80% van boere wat hul plase verloor, beland in dié situasie vanweë swak finansiële bestuur en besluite, en nie vanweë ’n swak landboujaar nie. Volgens Dawie Maree, hoof van inligting en bemarking by FNB, weet die Suid-Afrikaanse boer hoe om ’n swak of moeilike jaar te bestuur, maar nie noodwendig ’n goeie jaar nie. “Jou finansiële besluite in goeie jare bepaal jou lot in swak jare.” Op ’n boeredag by die Voermol Beesboer van die Jaar, Jason Carroll, by Simondium naby Stellenbosch (sien ook bl. 44), het Maree verwys na die landbouvertakkings wat onder toenemende druk verkeer. Veral die lewendehawebedryf loop deur onder biosekerheidskwessies, waarvan bek-en-klouseer die grootste risikofaktor is, gevolg deur Afrika-varkpes en voëlgriep. “ ’n Wedstrydplan is nou nodiger as ooit om produktiwiteit te verhoog en tegnologie…

ALTESAAM 86 474 mense het volgens Graan SA vanjaar se 56ste Nampo-oesdag besoek, teenoor verlede jaar se net minder as 82 000 besoekers. Woensdae is tradisioneel die besigste dag en vanjaar het ongeveer 25 500 mense die skou besoek. Nampopark se lughawe raak gedurende die oesdagweek die besigste lughawe in die Suidelike Halfrond. Woensdagoggend het tot drie vliegtuie binne een minuut ná mekaar geland. Volgens dr. Tobias Doyer, uitvoerende hoof van Graan SA, wat vanjaar sy eerste Nampo aan stuur van Graan SA beleef het, is dit heerlik om te sien dat boere só ’n ongelooflike skou kan aanbied. “Ons is nie professionele skou-organiseerders nie, en ons doen dit elke jaar. Dit is soos ’n partytjie – jy kan almal uitnooi en die vleis en die huis verskaf, maar die…

NAVORSERS aan die Universiteit van Pretoria (UP) sê die selfoontoepassing wat beskikbare data van satellietbeelde en plaaslike weerstasies met plaaslike toestande kalibreer, kan eenvoudige aanwysers gee van presies hoeveel besproeiing op ’n spesifieke dag in die Wes-Vrystaat nodig is. As die tegnologie ten volle aan aartappelboere daar beskikbaar is, behoort dit taamlik maklik te wees om die toepassing ook vir ander gewasse, soos mielies en uie, en vir ander boerderystreke aan te pas. “Boere sal regstreeks bevoordeel word, asook die navorsers en landboukundiges wat hulle ondersteun,” sê Alex Mukiibi, ’n doktorale student in die departement plant- en grondkunde aan die UP. Mukiibi en sy studieleier, prof. Martin Steyn, asook prof. Angelinus Franke van die Universiteit van die Vrystaat, het ’n artikel oor hul bevindings in Remote Sensing, ’n wetenskaplike joernaal,…

AktueelWild Daar heers ’n tekort aan trofeediere. Dit is bevestig deur ’n gemsbokbul met ’n horinglengte van 46” wat op 20 April vir R950 000 op Signature Wildlife se jaarlikse veiling by die Kwandwe-private wildreservaat noord van Makhanda verkoop is en ’n dragtige buffelkoei met ’n stel horings van 39” wyd wat ’n maand tevore vir R3 miljoen tydens die Bathurst-skou opgeveil is. “Toe Boesman op die skerm kom, was die telefone omtrent aan die gang,” vertel Piet du Toit van Piet du Toit Wildbedryf, die verkoper van dié besonderse gemsbokbul. Sowat 20 inbellers het op Boesman gebie. “Die reaksie op dié veiling was beslis ’n aanduiding dat daar nie meer ’n ooraanbod van jagdiere op die mark is nie.” Dit was dieselfde met Woody Cape se veiling by die…

Uitvoerprotokol Die eerste uitvoerprotokol sal na verwagting met Rusland aangegaan word. Dit kan ’n domino-uitwerking tot gevolg hê wanneer verdrae met ander uitvoerlande volg. Die Russiese protokol sloer reeds 12 maande, tot groot frustrasie van die Russiese ambassade in Suid-Afrika. Attie Westraad, voorsitter van die federasie van alle kleinveetelersgenootskappe en rasdirekteur van die Dorperskaaptelersgenootskap, sê hy beraadslaag weekliks met Alexander Mosalenko, Russiese landbou-attaché in Suid-Afrika, wat gereeld kommunikeer met dr. Mpho Maja van die direktoraat dieregesondheid van die departement van landbou, grondhervorming en landelike ontwikkeling. Buitelandse besoekers Die landbouskou in Bloemfontein lok gereeld buitelandse besoekers, maar die pas afgelope Dorper-kampioenskapskou het ’n waarlik internasionale kleur gehad met die besoek van telers uit Rusland, Brasilië, Amerika, Paraguay, Argentinië, Australië en Suider-Afrikaanse buurlande. Volgens Attie beywer die Suid-Afrikaanse bedryf hom al jare…

Rosyntjieboerdery Hoë insetkoste en boerderyrisiko’s kan enige soort boerdery wurg in sy strewe om wins te maak. Daarom moet ’n boer voortdurend nuwe planne maak om vooruit te boer. ’n Boer maak immers ’n plan. Rosyntjieboere langs die Oranjerivier wat die ideale droë klimaat vir songedroogde rosyne het, ontkom ook nie aan die aanslae nie, veral weens swaar reën wat hulle soms onkant betrap, ten spyte daarvan dat dié omgewing meer droë as baie nat tye ervaar. Hul planne is ’n kombinasie van organiese rosyne, wat hulle 20-30% meer geld in die sak bring, en om die druiwetrosse aan die stokke te laat droog word. Twee van die voorlopers met dié konsep in Suid-Afrika is die broers Johan en Francois Slabber wat saam in die Crescendo-trust by Grootdrink met rosyntjie-…

Boereplan Hy het nog altyd gedink dit is ’n “simpel” praktyk om ou trekkeren vragmotorbande as voer- en lekbakke vir vee te gebruik, sê Pieter du Toit van die plaas Grashoek in die Strandveld-gebied by Bredasdorp. “Want buiten dat hulle oop aan die onderkant is, reën die voer en lek nat en baie daarvan word só vermors en gaan tot niet. “Dit is moontlik ’n goedkoop tipe ‘voerbak’, maar die verlies aan voer en lek wat daarmee saamgaan, is waarskynlik veel groter as wat besef word. Dit is beslis nie die ideale voerbak nie,” meen Pieter. Boonop moet voer en lek daagliks na elk van hierdie ou band-trôe aangery word om dit aan te vul, wat tydrowend en duur is omdat daar letterlik na elke kamp gery moet word om…

Handwerk Dit was ’n see van rosette wat op die mooiste handwerk gepryk het: kwilte, breiwerk, handgemaakte messe, inmaakvrugte en kolwyntjies wat te mooi gelyk het om te eet. Daar was selfs ’n uitstalling oor die kuns van kloskant, een van die handwerkkunsvorms wat Emily Hobhouse ná die Anglo-Boereoorlog gebruik het om vroue op te hef, saam met weef- en spinwerk. Vanjaar was daar meer as 2 500 inskrywings en handwerkdemonstrasies is ook aangebied. Sonia van Zyl, voorsitter van die Bloemskou se afdeling vir kreatiewe handwerk, sê haar grootste passie is die beoordeling van handwerk. Landbouweekblad het haar ’n paar vrae gevra oor dié afdeling, wat sedert die skou se ontstaan 141 jaar gelede ’n groot rol gespeel het. Hoekom is dit steeds belangrik vir ’n skou soos die Bloemskou…

ANDRÉ du Toit, ook bekend as Boois onder sy vriende, was baie betrokke by die boeregemeenskap. “Hy was onder meer ’n direksielid van die Tulbagh-wynkelder en Tulbagh-wynvereniging, bestuurslid van die Tulbaghskouvereniging en betrokke by die destydse Klein-Bergrivier-besproeiingskema,” sê sy seun, AJ. André was die afgelope drie maande in die hoësorgeenheid van ’n Kaapstadse hospitaal ná ’n beroerte en ’n tweede aanval daarna. Hy het op die familieplaas, La Rhone, by Tulbagh grootgeword. Ná skool was hy onder meer betrokke by ’n perdeteelplaas van die weermag en daarna het hy hom by die familieboerdery aangesluit, waar destyds hoofsaaklik inmaakperskes en wyndruiwe geproduseer is. Vrugte en Limousins Nadat hy die boerdery by sy pa, AJ, oorgeneem het, het hy oorgeskakel na die verbouing van vrugte vir die vars mark. André het in…

Besoek landbou.com/veilings vir die jongste veilingsnuus. Die Bovelder-beesstudiegroep se nasionale elite-versveiling van oop verse op 1 Mei op die Höerskool Vrede se skoolterrein was ’n reusesukses, met ’n totale uitverkoping van ál die diere onder die afslaershamer van Jan Mostert van BKB. Dr. At Viljoen, een van die stigterslede van die studiegroep, het oudergewoonte ook die veiling en die galadinee die vorige aand bygewoon. Die aanbod van 25 lotte diere van tien verse elk was uitgesoekte diere van 25 top-Bovelder-telers, baie van hulle uit die Bovelder-beesras se klipharde suurveld-hartland om Memel, Vrede en Harrismith in die Vrystaat. Die seleksie van die diere wat vir die veiling beskikbaar gestel is, is op unieke wyse nie deur die telers self gedoen nie, maar deur ’n onafhanklike paneel studiegroeplede en medeboere. “Vir ’n…

Uitstekende beeste en teelmateriaal is op die algehele uitverkopingsveiling van Kyksim Simmentalers van Berrie Botha aangebied. Die veiling is op 13 April in die Outeniqua-veilingskompleks in George. Altesaam 115 diere is aangebied. Die hoogste prys vir ’n dragtige koei met ’n verskalf (KS2319) is betaal vir lot 6, Kyksim Massie KS174, wat vir R50 000 aan HJ Louwrens van Reddersburg verkoop is. Die hoogste prys vir ’n bul was R30 000, gekoop deur Jannie Meyer & Seuns Boerdery van Rietvlei, Mosselbaai. Die hoogste prys vir ’n koei was R20 000. Bulle is vir gemiddeld R23 125 verkoop, koeie vir R20 000, koeie met kalwers vir R25 000, 3-in-1’s vir R31 472, dragtige koeie vir R24 800, dragtige verse vir R22 714 en verse vir R17 000. Theuns Visser was die…