Table of contents for 2025-11-26 in Isolezwe

ITHUTHELA eningizimu yeTheku eMgababa iDurban Jazz Festival ezakhele udumo ngokuba seHazelmere Dam ngoDisemba 26. Umcimbi uzobe ugubha iminyaka engu-22 nonyaka selokhu wasungulwa njengoba ngonyaka odlule wahoxiswa ngemizuzu yokugcina. Umhleli wawo uMdu Ngcobo uthe bathuthela eMgababa Coastal Resort ngosuku abaziwa ngalo uDisemba 26. "Inkinga idamu esasenzela kulona lagcwaliswa amanzi kuhamba izikebhe manje. Sizamile ukuya e-ICC sabona ukuthi abantu abayithandi kahle, sithi sicabangela bona ngenxa yemvula eyase isixakile. Kule minyaka emibili ngaphambi kokuya e-ICC lalina usuku lonke. Kuqala lalina ebusuku abantu bengenankinga," kusho uMdu. Uthe bazame ukwenza njengeminye imicimbi emikhulu ye-jazz iCape Town International Jazz Festival neStandard Bank Joy of Jazz ngokuthi bayisingathe endaweni evalekile kodwa abathandi bayo bakhombisa ukungakuthakaseli lokho. Ebuzwa ukuthi akubafikelanga yini ukuyisa ePeople's Park lapho abake bayenzela khona, uthe: "Sifuna abantu bezwe into entsha ngoba yonke imicimbi emikhulu…

ZIKHULU zamaphoyisa kaMasipala weTheku, sezisivileke isenzo salawo abonakale edlula eshushuluza ngemoto esigamekweni sokubanjwa kwenkunzi enxanxatheleni yezitolo ePinetown ngoMsombuluko. Lawa maphoyisa abonakale kwi-video esabalale ezinkundleni zokuxhumana esikhathini esifishane emva kokwenzeka kwesigameko. Okhulumela amaphoyisa kaMasipala weTheku, uColonel Boysie Zungu, uthe isinqumo asithathile sigweme inhlekelele ebingahle yenzeke. “Amaphoyisa azithole engaphansi kwengcindezi ebingaholela ekutheni kube khona abalimalayo noma abafayo singekho isidingo,” kusho uZungu. Le video, ezungeze ezinkundleni zokuxhumana ikhombisa amadoda abehlome eyizingovolo, edlubhe izingubo ezimnyama, ebamba inkunzi imoto emhlophe. Kubonakala abasolwa abangaphezu kwabane bephethe izibhamu ezinkulu, kanti ngemuva kuzwakala umsindo wabantu abamemezayo, abebebuka bebuza ukuthi hlobo luni lokuziphatha kwamaphoyisa lolu, njengoba ebebonakala engenzi lutho. Omunye umsindo ozwakalayo owabashayeli, beshaya amahuthi ezimoto. Akukacaci ukuthi mangaki amaphoyisa abephakathi emotweni yamaphoyisa, ebonakale iqhubeka nokuhamba ngesikhathi kubanjwa inkunzi. Kuyona le video kubuye kubonakale lawa madoda ahlomile, ekhomba ngezibhamu…

UMKHANDLU wesizwe samaNadi, oholwa yiNkosi uVusizwe KaSondelani Zondi, ubambisane nomholi woMkhonto weSizwe Labour and Civil Organization, uMnuz Mlungisi "Mancinza" Zondi kanye nobuholi beMarch and March banqume ukubakhomba indlela abantu abakuleli ngokungemthetho. Laba baholi bomphakathi bebehlangene eNadi, eMgungundlovu, muva nje, ngenhloso yokusebenzisana. Inkosi uZondi ithe babuye babandakanye nezinye izinhlaka ezithintekayo ekuxazululeni izikhalo ngabantu bokufika abangenazo izimvume. "Sikhathazeke kakhulu ngomthelela wezenzo ezingekho emthethweni, ubugebengu nokushushumbiswa kwabantu emphakathini wethu. Ukuba khona kwabantu abangenazo izimvume kusolwa ukuthi kunomthelela ekwandeni kwemikhiqizo engekho emthethweni njengezidakamizwa. Kuhlobene nokwanda kobugebengu, obuhlanganisa ukushushumbiswa kwabantu, ukweba imfuyo nezimoto." Inkosi ithe ngaphezu kwalokho, kuyabashaqisa ukudayiswa kokudla okubolile nokonakele, okubeka amalungu omphakathi kwenkulu ingozi ngokwezempilo. "Sinxusa bonke ababambe iqhaza ukuthi basebenzisane ukubhekana nalezi zinkinga futhi baqinisekise ukuthi umphakathi uphephile futhi uvikelekile. Sicela iziphathimandla ezifanele zithathe izinyathelo ngokushesha kususwe abantu bangaphandle…

ABALELWA ku-465 abantu abakhahlanyezwe yizikhukhula ezigasele ngeSonto eNew Hanover kuMasipala waseMshwathi, ngaseMgungundlovu. Lokhu kuvezwe wuMphathiswa woMnyango wokuBusa ngokuBambisana neziNdaba zoMdabu KwaZulu-Natal, uMfu Thulasizwe Buthelezi, ngesikhathi ehambele le ndawo izolo ekhashwe yiMeya yendawo, uMnuz Mandla Zondi. UButhelezi ubeyohlola umonakalo aphinde anikeze abakhahlamezekile usizo kwesikhashana. Uthe zingu-117 izindlu ezicekeleke phansi. Kuzona kukhona ezingu-50 eziphele nya, bese kuba khona ezingu-67 ezithintekile. “Bangu-79 abasale dengwane. Ngeshwa munye osekuqinisekiswe ukuthi ushonile, kuthi ababili basathathwa njengabasadukile,” kusho uButhelezi. Ubuye waba nomhlangano nethimba labatakuli abasaqhubeka nokubheka abadukile. Siyazwelana nemindeni yabo njengoba ibhekene nesikhathi esinzima sokulahlekelwa yizihlobo,” kusho uButhelezi. Uncome ithimba labatakuli nabezimo eziphuthumayo, wathi banesibindi. “Sikushayela ihlombe ukusebenza kwabo ngokuzikhandla ngalesi sikhathi esinzima futhi sikhulekela ukuthi abadukile batholakale ngokushesha,” kusho uButhelezi. Ubonge izinhlaka ezihlukene ezisondele ngokushesha nosizo kulabo abakhahlamezekile. Kubona ubalule iminyango ehlukene kahulumeni, Red Cross, Themba…

UNYAWO oluhle okuqale ngalo iMamelodi Sundowns kusukela emidlalweni yokuhlungela eyamaqoqo kwiCaf Champions League kufanele lukhuphule ithemba kubalandeli baleli qembu laseChloorkop ngoba lokhu kuvamise ukulandelwa yibanga elide kulo mqhudelwano. Lawa ngamazwi kaSibusiso “Vila” Vilakazi owawina izicoco zeligi ezinhlanu neSundowns, iMTN8 nesisodwa seCaf Super Cup. UVilakazi ubekhuluma kwiqophamlando laleli qembu muva nje kulandela ukunqoba kwalo ngo 3-1 umdlalo wokuvula u-Group C weChampions League kwiSaint Eloi Lupopo yaseDemocratic Republic of Congo (DRC). ISundowns ibuyela enkundleni ngoLwesihlanu lapho izovakashela khona i-MC Alger yase-Algeria ngo-9 ebusuku e-Ali La Pointe Stadium, e-Algiers. Isinongo esisobala salo mdlalo wukuthi iSundowns izobe ibhekene noRulani Mokwena owadla nayo inqwaba yezicoco ngaphambi kokuyishiya ngonyaka odlule. Ngesizini edlule, iSundowns igcine iphelele kowamanqamu weChampions League lapho igotshwe khona yiPyramids FC yase-Egypt. Nakuba kunengxenye yabalandeli beSundowns esakhomba umqeqeshi, uMiguel Cardoso, ngokuyeka ithuba ngesizini edlule…

UMENGAMELI we-SA Rugby, uMark Alexander, uncome abadlali bakuleli abayisithupha abaqokelwe kwi-World Rugby Men’s 15s Dream Team ka-2025. UMalcolm Marx, omenyezelwe njengomdlali ovelele emhlabeni ngoMgqibelo, kanye nozakwabo uPieter-Steph du Toit, Ox Nche, Thomas du Toit, Sacha Feinberg-Mngomezulu noCheslin Kolbe, bonke bangenile kuleli qembu elimenyezelwe yi-World Rugby izolo. Iqembu lakuleli lidlale kahle kulo nyaka njengoba linqobe imidlalo engu-11 kwengu-13 eliyidlalile. Lizosonga isizini ngokubhekana neWales ePrincipality Stadium, eCardiff. ngoMgqibelo. Kulo nyaka iqembu lakuleli livikele izicoco zeRugby Championship, Freedom Cup neNelson Mandela Challenge Plate njengoba lisayinqobe yomine imidlalo eliyidlale neJapan, France, Italy ne-Ireland ohambweni lwaphesheya. "Ngithanda ukuhalalisela uMalcolm, Pieter-Steph, Ox, Thomas, Sacha noCheslin. Ngikhulumela iSA Rugby yonkana. Ukubona amaBhokobhoko angaka eyingxenye yaleli qembu kuyimpumelelo enkulu. Kuwubufakazi bezinga labadlali esinabo eNingizimu Afrika," kusho u-Alexander. "Siyi-SA Rugby siyaziqhenya kakhulu. AmaBhokobhoko awuphawu lwesingakuzuza njengezwe uma sisebenza ngokubambisana.”…

KUNGAKAPHELI zinsuku ezingaki kuphothulwe umhlangano wamazwe ayingxenye yeG20 obukuleli, ikomiti lasePhalamende selibhalele uNgqongqoshe wezeziMali, uMnuz Enoch Godongwana, lifuna ukwazi ngemali echithwe ngalo mcimbi. Usihlalo wekomiti elibhekele ukwabiwa kwemali ePhalamende, uDkt Mmusi Maimane, uthe babhalele uGodongwana, befuna incazelo ngokuthi malini esebenzile? UMaimane ubeke wawubuza lo mbuzo kuqhubeka lo mhlangano kodwa uGodongwana, nabanye ezinkundleni zokuxhumana, bathi akunganakwa ukuthi kusebenze malini ngoba kuzongena imali enkulu ngokubanjwa kwalo mhlangano okokuqala kuleli. Ekhuluma kwiSAFM izolo, uMaimane, uthe banesibophezelo esiseMthethwenisisekelo, sokuthi babheke indlela kusebenza ngayo imali. "Kumele sazi ukuthi imali isebenze ngendlela ngoba kuleli kunomkhuba wokuthi kunyuswe amanani ezinto uma kunemicimbi emikhulu. Yingakho sifuna ukwazi ukuthi kugcine kusetshenziswe malini?" usho kanje. Uthe ekuqaleni konyaka kwavezwa ukuthi kubekwe phakathi kuka-R500 million kuya ku-R600 million, ozosetshenziswa ukusingatha lo mhlangano. "Sifuna ukwazi ukuthi ngabe izwe likwazile ukusebenzisa isikalo ebesibekiwe.…

I-ROAD Traffic Management Corporation (RTMC) isihlabe ikhwelo kubanikazi bezimoto abazohlukanisa imali yezitokofela nabazothola amabhonasi emiholweni yabo ukuthi bayisebenzisele ukuthelela nokulungisa izimoto ngaphambi kwamaholidi kaDisemba. I-RTMC ithe ngokwamabhuku ayo, zingu-1 060 382 izimoto ezinezimvume zokuba semgwaqweni ezizophelelwa yisikhathi ngoNovemba. Ithe iningi lazo liseGoli lapho zingu-416 828 khona kulandele iWestern Cape ngezingu-197 797 neKwaZulu-Natal ngo-143 293. EMpumalanga okumele zithelelwe zingu-66 446, e-Eastern Cape zingu-63 263, eLimpopo zingu-58 551, eFree State zingu-47 572, eNorth West zingu-44 871 kuthi eNorthern Cape zibe ngu-21 763. “Ukushayela ne-disc ephelewe yisikhathi eNingizimu Afrika kuba nesijeziso esihlanganisa inhlawulo ka-10% yemali yokuvuselela efakwa njalo ngenyanga oweqe ngayo ukuvuselela i-disc. Ungahlawula nemali efika kuR1 000 uma ubanjwa amaphoyisa nokuthi imoto yakho ishaqwe,” kusho iRTMC. I-RTMC ithe njengoba sekusondela amaholidi futhi abaningi bephothula izinhlelo zabo, kubalulekile ukuqinisekisa ukuthi imoto isesimeni esifanele…

KUSABALALA kwezindaba zokuhamba kwesitobha se-Orlando Pirates, uMbekezeli “TLB” Mbokazi, kuliveze obala ivangeli elihlala lishunyayelwa ngumqeqeshi waleli qembu laseSoweto, u-Abdeslam Ouaddou, ngokubaluleka kokuhlala belungile abadlali abangajwayele ukuqala imidlalo. La mazwi uphinde wawakhipha u-Ouaddou ngaphambi kokubhekana neChippa United abayiphuce amaphuzu kwiBetway Premiership izolo ebusuku e-Orlando Stadium, eSoweto. Esikimini sePirates uqalise uLebone Seema-ojwayele ukudlala noMbokazi noNkosinathi Sibisi maphakathi emuva kwiPirates. USeema uqale endaweni kaMbokazi kodwa obekufakazela okuhlale kushiwo ngu-Ouaddou wukubonakala kuka-Olisa Ndah ebhentshini. IPirates ezisondeze nesicongo se-log ngalo mphumela inqobe ngamagoli ka-Evidence Makgopa no-Oswin Appollis abebesanda kungena. Lo mphumela ulinganise ngamaphuzu (25) iPirates neMamelodi Sundowns eqhwakele. Ezimnandi kwiPirates ngezithi isasele ngomdlalo kwiSundowns ematasa nemidlalo yeCaf Champions League. “Kusukela ngafika kwiPirates ngihlale ngikubalula ukuthi mabahlale belungile abadlali abangajwayele ukuqala imidlalo,” kusho u-Ouaddou kwiSuperSport. UMbokazi (19) okhonjwa kwiChicago Fire FC edlala kwiMajor Soccer League (MLS)…

KUHLANGANA kweKaizer Chiefs neZamalek yase-Egypt emdlalweni weCaf Confederation Cup kule mpelasonto kusho ukuvuka kukapelepele ogqokweni njengoba la maqembu ayegcine ukuhlangana eminyakeni engu-32 edlule. IChiefs izotholana neZamalek emdlalweni wesibili wesigaba samaqoqo kwiCaf Confederation Cup ngoMgqibelo ngo-3 ntambama, ePeter Mokaba Stadium, ePolokwane. La maqembu azophinda ekuhambeni e-Egypt ngoFebhuwari 15. Amakhosi eza kulo mdlalo esazikhotha amanxeba kulandela ukuguqiswa ngelinye iqembu lase-Egypt, i-Al Masry, ngeSonto eSuez Canal Stadium, e-Egypt. Ukubhekana kwawo neZamalek ngoMgqibelo kuzokwenza abalandeli bakhumbule okwenzeka eminyakeni edlule ngesikhathi la maqembu ebhekene eMzansi okokuqala ngo-1993. Sekuwumlando ukuthi Amakhosi ayeqala ukudlala emqhudelwaneni weConfederation of African Football (Caf), eqhathwa nalezi zinkunzi zase-Egypt emzuliswaneni wesibili seChampions League. Anqoba ngo 2-1 kowomlenze wokuqala owawudlalelwa eFNB Stadium, eNasrec, ngamagoli kaLucas Radebe no-Eric September. Nokho kwashabalala konke kowomlenze wesibili eNasser Stadium (esibizwa ngeCairo International Stadium), eCairo, ekhala ngaphansi ngo…

ZIFUNA ukuhlinzekwa ngolwazi olumayelana nokubuyiselwa kwazo kuleli zisuka kwelaseSwatini izelamani ezimbili zakwaNdimande ezisanda kubuya, ezibhekene necala lokubulala umrepha uKiernan “AKA” Forbes nomngani wakhe uTebello “Tibz” Motsoane. Lokhu kuvele izolo ngesikhathi uMnuz Siyabonga Gezani Ndimande noMnuz Malusi Dave Ndimande bevela okwesibili eNkantolo yeMantshi yaseThekwini. Ngo-Okthoba nonyaka lezi zelamani zayeka imizamo yazo yokuthi ziqhubeke zihlale eSwatini ngokungemthetho. Lokhu kwenzeke ngesikhathi zikhetha ukulaxaza isicelo sazo sokuphikisa isinqumo seNkantolo yaseManzini, eSwatini, esasithi zikuleliya zwe ngokungemthetho ngakho kufanele zibuyiselwe kuleli. Emva kokuba zinqume ukusilaxaza leso sicelo, zabe sezibuyiselwa kuleli, kwathi zithi cababa esikhumulweni sezindiza iKing Shaka International Airport, zabekwa uxhaxha lwamacala ayamaniswa nesigameko. Laba ababili baboshwa ngonyaka odlule beboshwa yiRoyal Eswatini Police Service kulandela ukubhadanywa kwabo komunye umuzi ababerenta futhi bebhace kuwo eMbabane. Ngesikhathi zivela izelamani enkantolo, ummeli wazo, u-Advocate Simphiwe Mlotshwa, wazise inkantolo…

-LIEUTENANT General Puleng Dimpane, oyiChief Financial Officer yeSAPS, udalule ukuthi ithimba iPolitical Killings Task Team (PKTT) selixhaswe ngemali engu-R435 million kusuka lasungulwa. Lesi sikhulu samaphoyisa besifakaza ekomitini lesikhashana lasePhalamende eliphenya izinsolo zokugxambukela kosopolitiki nokusebenzisana kwamaphoyisa nezigebengu. Ikomiti elilalela ubufakazi lisungulwe emva kwezinsolo ezenziwa nguKhomishana wamaPhoyisa KwaZulu-Natal, uLieutenant General Nhlanhla Mkhwanazi, ngoJulayi 6. UMkhwanazi wasola uNgqongqoshe wezamaPhoyisa omisiswe, uMnuz Senzo Mchunu, ngokuhlakaza iPKTT ngoDisemba 31, 2024, ngoba evikela imigulukudu engobhululu bosopolitki namaphoyisa. Ethula ubufakazi bakhe izolo uLieutenant General Dimpane uthe njengamanje amaphoyisa anamathimba ayisipesheli angu-11 okubalwa nePKTT. Ecelwa umholi wobufakazi u-Advocate Lerato Zikalala ukuthi anikeze incazelo yokuthi imali ye-PKTT isetshenziswe kanjani eminyakeni eyehlukene edlule, uLieutenant General Dimpane uthe: "Izinto ezisetshenziswayo ezirekhodiwe ngamathimba ajutshiwe zikhomba izindleko eziqondile, ezilawulekayo esizikhiphela imali. Kusukela onyakenimali u-2018/19 kuze kube uSepthemba walo nyaka, izindleko ezinkulu ePKTT…

UMQEQESHI weBafana Bafana, uHugo Broos, kumfanele ukuthi anikwe ithuba lokuqedela umsebenzi awuqala ngesikhathi enikwa izintambo ngo-2021. Lo mqeqeshi odabuka eBelgium useguqule iqembu lesizwe lakuleli laba yiqembu eliziphethe kahle, elincintisanayo namanye ahamba phambili kuleli zwekazi futhi elizethembayo. Uma eselishiya ngemuva kweNdebe yoMhlaba ngonyaka ozayo, lizobe selibalwa namanye ahlonishwayo emhlabeni. Lesi akusona isikhathi sokufaka izinongo angazidingi esitshulwini sakhe esekuneminyaka aqala ukusipheka, kodwa esokubheka ukuthi kuzophumani uma esephaka okokugcina. UBroos ususe umsindo ezinkundleni zokuxhumana ngoMsombuluko ngesikhathi ekhipha uhla lwabadlali abangu-54 azokhetha kubona isikwati esizoya kodlala i-Africa Cup of Nations ezoqala ngoDisemba 21 eMorocco. Yize bekhona abadlali okuvunyelwane ngabo ukuthi bekubafanele ukukhethwa noma ukusala ngaphandle, bakhona futhi nabasuse impikiswano. Into edale izinkulumo eziningi kube ukushiywa komdlali weWydad Casablanca, uThembinkosi Lorch, owenza kahle eqenjini lakhe kule sizini. Okunye okushayise amakhala kubantu abaningi ukufakwa komdlali wasesiswini…

KUPHELA kwekhefu lemidlalo yamazwe ngamazwe emdlalweni wombhoxo kusho ukuthi isizoqhubeka imiqhudelwano yamaqembu lapho iHollywoodbets Sharks izoba namasonto amahlanu amqoka ngaphambi kokuthi kusongwe unyaka. Ngemuva kokuyivula ngebatha isizini kwi-United Rugby Championship, leli qembu elizinze eThekwini lizithola lisondele ngasemsileni we-log futhi lidinga ukushintsha ukwenza ukuze libalwe nayisikhombisa azodlulela kweyomkhumulajezi ekupheleni kwesigaba samaqoqo. ISharks ingashintsha isizini yayo ka-2025/26 ngokuthola imiphumela emihle emidlalweni ezayo emihlanu ezobe ihlanganise eye-URC neye-European Champions Cup. Kwi-URC, leli qembu elizinze eThekwini lizobuya ngohambo olunzima lwase-Ireland lapho lizodlala khona neConnacht eDexcom Stadium, eGalway, ngoMgqibelo ngo-9.45 ebusuku. ISharks isendaweni engeyinhle kwi-log njengoba ihlezi kweka-13 ngamaphuzu ayisishiyagalombili emidlalweni emihlanu. Inqobe umdlalo owodwa, yadlala ngokulingana kowodwa, yahlulwa kathathu. Izobe isigxila emidlalweni emibili yamaqoqo yomunye umqhudelwano, i-European Champions Cup, lapho izodudulana khona neToulouse ekuhambeni ngoDisemba 7 ngaphambi kokwamukela iSaracens ekhaya ngoDisemba 13. Izosonga unyaka…