Table of contents for 2025-05-20 in Isolezwe

IQEMBU elizakhele udumo ngezingoma zothando, iMalini, liqala imigubho yeminyaka engu-20 lisemculweni ngokukhipha ingoma entsha ngoLwesihlanu. Leli qembu laseThekwini libunjwe wuMdu Ntombela, noToffo Goge. Bobabili baqala ngokulekelela abanye abaculi okubalwa kubo uRebecca Malope, Ringo Madlingozi, Thandiswa Mazwai, Vuyo Mokoena, Simphiwe Dana, Sipho Makhabane nabanye ngaphambi kokuzimela. Lizakhele udumo ngezingoma okubalwa kuzo iJikelele, Usibali, Nguwe Ovale Ucingo nezinye. NgoLwesihlanu iMalini ikhipha ingoma entsha iSiyo Prepare’ya elisebenze kuyo noZakwethu nomdidiyeli uThe Unknown. UToffo uthe ingoma ngeyothando njengoba behlale benza. Yelama eyangonyaka odlule ethi Uthunyelwe Abadala eyayikwi-top 10 yezingoma okwakukhethwa kuzo ezohlukanisa unyaka kuKhozi FM, lapho kwagcina kunqobe khona iGucci kaMthandeni SK noMawhoo. “Ngicabanga ukuthi ingaphezulu (kunethi Uthunyelwe Abadala) ngoba izinga likhuphuke kakhulu. Uma ugcine ngenothi eliphezulu kumele udlulele noma ulibambe. Thina kulokhu sidlulele,” kusho uToffo. Uthe iyisendlalelo somgubho wabo omkhulu abasematasa nezinhlelo zawo.…

KWEMBULWA kwembeswa kowesifazane okuthiwa ubhokodwe ngommese esiswini, amathumbu aphumela ngaphandle enkabeni yedolobha oThongathi ngoMgqibelo. Owesifazane kuthiwa ugwazwe owesilisa, odinwe wukuthi unqabe ukuthi baye ocansini. Ngokusho kwabenkampani yonogada eqapha ubugebengu, iReaction Unit South Africa (Rusa), umsolwa ungaphandle ngoshwele. Okhulumela iRusa, uMnuz Prem Balram, uthe umsolwa wayeboshelwe icala lokubulala. Elandisa ngesigameko, uPrem uthe umsolwa ufice umgilwa emi yedwa, elinde isoka lakhe ebelisangene kwesinye isitolo. “Kuthiwa ufike wacela ukuthi baye ocansini nomgilwa, kuthe uma enqaba, wavele wakhipha ummese, wamgwaza esiswini, wasishiya sivulekile,” kusho uBalram. Uqhube wathi isoka likamgilwa elimfice eselimele, livele lamqhuba nge-trolley, limphuthumisa emtholampilo oseduzane. Udalule ukuthi unogada wakwaRusa, obehamba ngesithuthuthu, ezulazula emgwaqweni uGopalall Hurbans, eqapha ubugebengu umiswe yisoka likamgilwa, limtshela ukuthi usegwazwe wumuntu ongaziwa. “Ngesikhathi besendleleni beya endaweni yesigameko, isoka likamgilwa libe selimbona umsolwa, lamkhombisa unogada, ongapholisanga maseko, wamjaha,” kusho uBalram.…

EKUFANA nesifo sikawonkewonke ukuthola abantu bekhala ngento efanayo. Lesi sifo abantu abaningi bakhala ngaso wukuthi angithandwa muntu nginesichitho, konke lapho ngihamba khona abantu abangithandi. Komunye kuhambe kuze kufike lapho esethukwa endaweni abantu bethi uyathakatha, emsebenzini ozakwabo bangamnambithisisi kuthi noma kwenzeke into eyiphutha - konke kukhonjwe kuyena. Lokhu kuhamba kuze kufinyelele ekutheni nemali ingahlali usebenze kodwa kungabonakali. Ngokwenzeka kwalokhu abantu bagcina bephuma bengena bezama ukulungisa lokhu bakukhe phezulu. Angithi sesiyazi uma ungathandeki ebantwini noma unyamanambana kuyaye kuthiwe isichitho - gquma uphalaze kukhona laba abakushayayo. Uyokwenza lokho kube nhlanga zimuka nomoya. Omunye waze wathi sengincamela khona ukuthi bahlale bengithuka kulungile. Ekugcineni kuhamba kuze kudlulele ezinganeni zakho uzizala, uzwe umzali ikakhulukazi besifazane sebethi izingane zami azingifuni nalapho ngihambe khona. Lena yomfana ingibiza ngazo zonke izinhlamba ithi ngiyathakathaka. Usukulaphile wadela kodwa akupheli. Uhambile bakunika…

MHLELI: Ngingumlandeli omkhulu woKhozi FM futhi ngiyaluthanda kakhulu ngoba luyasakha ezintweni eziningi. Iyodwa nje inkinga engikhathazayo zonke izinsuku - isohlelweni lwasekuseni ngabo-6.20, lapho kuthiwa khona phuz'uphume bese abantu beshaya ucingo. Into engangiphathi kahle ukuthi kuthiwe umuntu ushaywa ngemvubu noma athelwe ngamanzi ngabasakazi balolu hlelo - uSipho Mbatha noMroza Buthlezi. Lokhu kubi kakhulu ngoba ukushaya umuntu kuyicala eNingizimu Afrika, abanye baze baxoshwe ngisho emsebenzini ngalo icala lokushaya. Luningi udlame lokushaya nokuhlukumeza ezweni usuku nosuku ngezindlela eziningi nje engingeke ngizibale, ikakhulu olubhekene nabesifazane nezingane. Okufike kungiphathe kabuhlungu ukuthi kuleso sikhathi nezingane zisuke sezithumele amaVoice Note (VN) zisuke zilalele ngakho-ke lokhu kungabonakala kuwumdlalo kodwa kugqugquzela udlame emiphakathini evele inodlame lokushaya nokunye, ezinganeni nakubantu abadala. Ezikoleni izingane zinokuhlukumezeka kwezingane eziningi ezinye zigcine ziyeka ngisho isikole imbala kodwa nathi ngapha sithi aluye phambili impela nje,…

USIHLALO weDurban City, uFarook Kadodia, usephonsele inselelo iziphathimandla ezibhekene nomsebenzi wokuqulwa kwamacala nokuqondiswa ubugwegwe kwamaqembu kwiPremier Soccer League (PSL) ukuthi ziyifakele izibuko indaba yokumangalelana kwamaqembu isizini isiyophela. UKadodia usho kanjena nje, namuhla kubhekwe ngabomvu isinqumo somshushisi wePSL ngecala elimayelana nomdlali weqembu lakhe, uSaziso Magawana. Leli cala lifakwe yi-JDR Stars imangalela iCity iyisola ngokudlallisa lo mdlalo engabhalisiwe ngokufanele esuka kwiMarumo Gallants ngaphambi kokuqala kwale sizini. Uma iCity ilahlwa yicala, ingagawulwa yizembe kwazise uMagawana ongumdlali omqoka kuleli qembu udlale imidlalo engu-27 yeligi. Ukulindwa kwalesi sinqumo kuholele ekutheni iCity inganikwa indebe yoMotsepe Foundation Championship ngeSonto, ngemuva kokuguqisa kwayo iCape Town Spurs ngo 1-0, e-Athlone Stadium, eKapa. ISpurs egawulwe yizembe ngokushaywa kwayo yiCity, idlale lo mdlalo isifake icala elihambisana nelisezithebeni zePSL elimayelana naye uMagawana obeboshelwe yiqembu likaKadodia. “Siphoxeke kakhulu ngalesi simo, abadlali bebelindele ukunikwa…

USAGXILE ekugijimeni ku-200m njengoba esanda kuqala isizini yakhe umsubathi wakuleli, uWayde van Niekerk. UVan Niekerk (32) ulale isithathu emjahweni ka-200m kuma-Atlanta City Games, e-United States, ngoMgqibelo, ngesikhathi esingu-20.03. Lo mjaho unqotshwe nguZharnel Hughes waseGreat Britain ngo-19.55, indawo yesibili yathathwa nguJereem Richards waseTrinidad and Tobago ngo-19.63. Lona bekuwumjaho wokuqala ka-Van Niekerk kulo nyaka futhi kungowokuqala selokhu aphuma kwi-semifinal yomjaho ka-200m kuma-Olympics ayeseParis, ngo-Agasti, nyakenye. Waduma kakhulu ngokugijima ibanga lika-400m, wathola indondo yesiliva ku-200m kuma-World Championships ka-2017. Walandelisa ngokugijima isikhathi sakhe esihamba phambili emjahweni ka-200m ngo-2017, enza u-19.84 emqhudelwaneni owawuseJamaica. Usakhunjulwa kakhulu ngokunqoba igolide emjahweni ka-400m kuma-Olympic ayeseRio, eBrazil, ngo-2016, lapho ashaya khona isikhathi esingu-43.03, esisayirekhodi lomhlaba. "Kuyisibusiso esikhulu ukuqeda umjaho. Bekunzima kakhulu kule minyaka emibili edlule ukuthi ngiqede umdlalo ngisesimweni esihle ngakho-ke kuyisibusiso ukuthi ngikwazile ukudlula entanjeni. Ukukwazi ukuwuqeda kuyisibusiso…

BUBHEKWE ngabomvu ubufakazi obuzothulwa yikhansela le-DA, eNkantolo yeMantshi yaseMnambithi namhlanje mayelana nokungqongqa kwamalungu omndeni walo. Ikhansela le-DA eBergville, uMnuz Michael Indlela-ibuzwakwabaphambili Buthelezi, lithweswe wumbuso amacala okufa kwamalungu omndeni.walo Umbuso usola ikhansela ngokuba wungqondongqondo ekubulaweni kwamalungu alo ngomlilo. Kulesi sehlakalo kwashona unkosikazi kaButhelezi nezingane zakhe ezintathu. Ngemuva kwesigameko uButhelezi wafonela umngani wakhe ohlala buqamama naye, emtshela ukuthi makazomlekelela ngoba kukhona abashisa umndeni wakhe. Ngokuhamba kwesikhathi leli khansela lakhalelwa ngamasongo kaSigonyela, lisolwa ngokubulala umndeni walo. Sekuze kwaba amahlandla amabili uButhelezi ekhala ngokugula uma sekufanele athule ubufakazi. Ngokobufakazi obusenkantolo obethulwa ngomunye wodokotela, kwavela ukuthi abafi babulawa wumlilo. Waveza nokuthi ngaphambi kokuba abulawe wumlilo, umkakhe wayegwazwe ngento ecijile ekhanda walimala kabi wase equleka. Kwavela nokuthi kwaba nokuhilizisana phakathi kwaleli khansela nomkalo, okusolwa ukuthi yikhona kanye okwaholela ekutheni lishise umuzi unamalungu omndeni. Namhlanje kulindeleke ukuthi…

ULE nyanga ephezulu ngifikelwe abaningi abagula ngenhliziyo esilahle umkhondo isigida ndawonye, isiyehluleka ukududula igazi elanele elizokwazi ukuphumela emzimbeni ngokwanele. Isimo lesi esivele sibeke impilo engcupheni enkulu ngoba umzimba ngeke ukwazi ukuqhubeka nempilo uma igazi lingasatshalaliswa ezindaweni zonke ngendlela eyiyo nefanele ngaso sonke isikhathi. Isiguli engisanda kusibona kulolu hla lokugula ngenhliziyo eyenza kanjena ngumama osuka ngapha eNyakatho eJozini indawo. Ufike lapha akusahambeki, imilenze iyaqhaqhazela iyaphambana, akumeki, akuhambeki. Siye samhlola sathola khona ukuqhaqhazela kwayo; okunye abesekumhlupha isiyezi, ikhanda, ukukhohlwa, uphupha kabi, umzimba uhlala ukhathele. Njengoba kulindelekile, isimo esinjena sikhomba ubungozi obudlula ukucabanga. Lesi ezinye zalezi zimo lapho umuntu afike ephefumula ehamba ngezinyawo zombili, kuyaba useyawa kuyaphela ngaye. Kuba buhlungu uma abomndeni sebethi ufike kwadokotela ezihambela, exoxa nawo wonke umuntu, kuyaba usephuma eseshonile usethwelwe ngebhokisi. Udokotela okanye isibhedlela sekubekeka esithombeni esibi kokunye kugcine…

EMINYAKENI eyevile ku-30, iNingizimu Afrika yaholwa uhulumeni wentando yabantu, besingakaze kusifikele ukuthi kusengaba nebandla elingakhipha ngoshova intatheli eyihlo lomphakathi. Okwenzeke ngempelasonto ebandleli likaTimothy Omotoso eliseBallito, kube yisiwombe ebesingasilindele kodwa sisale sesigwinya itshe ngoba nesisho sesiZulu siyasho ukuthi kusa kusa. Kodwa lokho akusho ukuthi kuzosithena amandla noma kusifake amanzi emadolweni okuthi siqhubeke senze umsebenzi wethu ngendlela engalimazi sithunzi samuntu. Endaweni yobuKristu nesikholwa wukuthi yakhelwe ezimpandeni zokubhebhethekisa iqiniso, inhlonipho nobumnene, besilindele ukuthi samukelwe ngemfudumalo, hhayi ukubukwa njengesitha. Umsebenzi wethu owokukhanyisela isizwe, hhayi ukusishiya ebumnyameni. Enkonzweni awulindele ukuthi uhlangane nabantu abambethe ulaka nabasabuka izintatheli njengabantu abaqhelelene neqiniso. Usuke unethemba lokuthi uzobuyela ekhaya ubaphathele umyalezo ophilisayo, hhayi ozokwenza ugcina usungayingeni eyokuzihlanganisa nenkolo. Emlandweni wakuleli asikhumbuli amasonto engo-alibhadwa kodwa sazi amukela wonke umuntu ngoba awamelene neqiniso okuyinto engumsebenzi wamaphephandaba. Umsebenzi wobuntatheli awakhelwe ekuhlanezekeleni iqiniso noma…

UME nse ukufunda esikoleni esidume ngemiphumela emihle ka-matric eNkandla, iBizimali High, abafundi bebhikishela ukuphepha emakotishi abaqashe kuwo, bekhala ngokudlwengulwa kozakwabo. Ngokuthola kweSolezwe, zibalelwa kwezinhlanu izigameko zokudlwengulwa kwabafundi balesi sikole ezenzeke ukusuka emasontweni ambalwa edlule. Lezi zehlakalo zisukumise noNdunankulu waKwaZulu-Natal, uMnuz Thami Ntuli, oyalele amaphoyisa ukuthi abophe abasoleka kulezi zehlakalo. Ikhansela lendawo, uMnuz Philani Ngubane, lithe kulezi zigameko ezibikwayo, lona likhumbula ezimbili. “Esakamumva senzeke phakathi nesonto eledlule, lapho umfundi oqashe komunye wemizi eyakhele isikole, ephume waya ethoyilethi elingaphandle entathakusa ngabo-4, ekhishwa yisisu. Kuthe esephuma kulo, esebuyela ekotishi lakhe, wathola umsolwa esemlinde ngaphandle, wamdlwengula,” kusho uNgubane. Uthe kwesinye esandulela leso, kube ngesabafundi ababili, abangenelwe wumsolwa ekotishi labo, wabaqhuba ebayisa ehlathini. “Lo osindile, agcine engakwazanga ukumdlwengula, ukwazile ukulwa naye, waphunyuka, wabaleka namanxeba okulinyazwa. Lo ongakwazanga ukuphunyuka,udlwenguliwe,” kusho uNgubane. Uthe kuzo zonke izigameko ezibikwayo,…

ISIKHWAMA esisiza abaphelelwa wumsebenzi i-Unemployment Insurance Fund (UIF), sizofaka ngaphezu kukaR381 million, ezinhlelweni zokutakula abasebenzi baseposini abangu-6 000. Lokhu kuvezwe nguNgqongqoshe wezabaSebenzi uNksz Nomakhosazana Meth, emuva kwesivumelwano esisayinwe yiSouth African Post Office ne-UIF. Uthe le mali izosiza abasebenzi abangu-5 956, ukuze iposi likwazi ukuba nohlelo lokuzivuselela kabusha. Le mali izofakwa ngaphansi kohlelo i-Temporary Employer-Employee Relief Scheme (TERS).nIzofakwa isikhathi esiyizinyanga eziyisithupha. "Isinyathelo esibalulekile esizosiza abasebenzi baseposini ukuze lesi sikhungo sibuyelwe wukwethenjwa emphakathini. Uhlelo lweTERS akulona nje olokufukula abasebenzi ngemali kodwa olokuqinisekisa ukuthi akekho osala ngaphandle ngoba nesikhungo siyavuselelwa." Uthe le mali izobhekwa ngelokhozi ukuthi isebenza ezinhlelweni ezifanele. "Izofakwa njalo ngenyanga kanti iposi kumele lilethe umbiko wokuthi lizilungisa kanjani izinto. Ngaleyo ndlela imali kuzobonakala ukuthi yenza okufanele." Uveze ukuthi ikomiti leTERS lihlanganisa izinhlaka neminyango ehlukene kuleli. Lineminyango ehlukene okubalwa owezamaBhizinisi amaNcane, oweMfundo…

MUNYE wabagadli beMamelodi Sundowns abebegqamile kule sizini esongwayo, u-Iqraam Rayners, udalule ukuthi bekuvele kuwuhlelo lwaleli qembu laseChloorkop ukuthi isicathulo segolide sigoduke noLucas Ribeiro kwazise ngesizini edlule uphazanyiswe wukulimala esethubeni lokusizuza. Lokhu uRayners ukutshele abezindaba ngemuva kokusiza uRibeiro avalele enethini igoli lakhe lika-16 leligi benqoba ngo 2-0 kwiMagesi FC koweBetway Premiership ngoMgqibelo, eLoftus Versfeld, ePitoli. ISundowns iwine isicoco sayo sehlandla lika-15 kusukela kwasungulwa i-Premier Soccer League (PSL) ngo-1996. Bekungesesishiyagalombili kulandelana. Abengu-65 amagoli ashaywe yiSundowns kule sizini. URibeiro uvalela 16 nje, emhlane wakhe kuhleli uRayners ngawu-14 no-Arthur Sales ngayisishiyagalombili. Emasontweni adlule, ziqalile izinkulumo ngabadlali abazogoduka nemiklomelo yePremiership lapho ebelivela khona njalo amagama kaRibeiro noRayners. Obekwenza lokhu kuqapheleke wukuthi laba badlali bebengakhombisi ukuthi basemjahweni weLesley Manyathela Golden Boot kwazise bebephakelana ngokukhululeka ibhola. Igoli likaRibeiro lokuqala kwiMagesi ulakhelwe nguRayners ekubeni elibeke lo mgadli waseKapa…

PHEZU kokuphikwa yimiphumela emidlalweni yakamuva, kodwa umqeqeshi weLamontville Golden Arrows, uManqoba Mngqithi, akaziboni ezakhe zidliwa yizembe ekupheleni kwesizini yeBetway Premiership esisongwa. I-Arrows esendaweni ka-13 kwi-log yePremiership okuyindawo engaphephile ezembeni, ilahle amanye amaphuzu ngempelasonto idlala ngokulingana ngo 0-0 neRichards Bay FC, kowePremiership, eKing Zwelithini Stadium, eMlaza. Ibuya nephuzu kwiRichards Bay nje, ibisishaywe imidlalo emine ilandelana. Ihlulwe naMaZulu FC, Stellenbosch FC ne-Orlando Pirates kabili. Yehlukaniswe ngamaphuzu amathathu neSupersport United neCape Town City abasendaweni ka-14 no-15 ngokulandelana. Isalelwe yimidlalo emibili ezoyidlala neSekhukhune United ekhaya neSupersport ekuhambeni ukulwela ukuthola amaphuzu azoyisusa esishozini okudlalela kusona izembe. “I-Arrows ngeke idliwe yizembe, kumele ukwazi lokho. Uma kwenzeka okunye ngiyobe ngikhona ukuphendula ukuthi kwenzeke kanjani,” usho kanje uMngqithi. Ngenxa yokuxoshwa kweRoyal AM, iPremiership isisalelwe ngamaqembu angu-15. Lokhu kusho ukuthi iqembu elizoqeda endaweni ka-15 yilona elizodlala namabili eMotsepe Foundation…

NOZINTI osephenduke isithandwa sabalandeli bakanobhutshuzwayo waseNingizimu Afrika ngenxa yokugila izimanga ngesikhathi Amajita edla isicoco se-Africa Cup of Nations (Afcon) kubafana abaneminyaka engaphansi kwengu-20, uFletcher Smythe-Lowe, akaziboni njengeqhawe. Amajita abuye nesicoco sase-Afrika ku-U/20 okokuqala ngqa emlandweni ngokunqoba ngo 1-0 kwiMorocco kowamanqamu obungeSonto ebusuku, e-30 June Stadium, e-Egypt. Leli qembu eliphekwa nguRaymond Mdaka belibunjwe ngabadlali abathembisayo kodwa kubona uLowe ugqame cishe ukubedlula bonke okufakazelwa ukubuya kwakhe nomklomelo we-Golden Glove onikwa unozinti ovelele. Ngemuva kokuqokwa, lo nozinti weqembu lika-U/19 weGD Estoril Praia yasePortugal, utuse ozakwabo ngokuqinisekisa ukuthi umsebenzi wakhe ubalula. “Ngaphandle kozakwethu ngabe izitha ziyazigelezela okusho ukuthi lo mklomelo ngabe nawo awukho,” kusho uLowe kwi-cafonline.com ngemuva komdlalo. “Siyiqembu elingeke lisebenze uma kukhona ongekho. Okwami wukwamukela umklomelo kodwa enhliziyweni ngiyazi ukuthi akuwona owami ngedwa. “Angiziboni njengeqhawe kepha ngibona iqembu lonke - okuhlanganisa nethimba labaqeqeshi…

UBUHLUNGU obungajwayelekile nobungabekezeleki emajoyintini omzimba womuntu, yisimo esivamayo ngalesi sikhathi sasebusika, okungenza abanye abantu okubaphathayo bangakunaki futhi bangakusukumeli ngoba bezitshela ukuthi yinto yesikhashana nje eyedlulayo. Lokho kushiwo ngabesikhungo sezempilo esizimele i-Affinity Health, abaxwayisa ngalesi simo abathi ukuvama kwaso ikakhulu manje njengoba sekungena ubusika, kusuke kungesikho nje ukuqondana kwezinto kepha kusuke kunezizathu ezeyamene nezempilo. Bathe ukushintsha komoya okudalwa ngamakhaza ashubisa umnkantsha ngalesi sikhathi nendlela umzimba womuntu owenza ngayo ukuzwela kulesi simo, kungenza ukuthi ubuhlungu bamajoyinti bube bubi kakhulu kunokwejwalekile, yingakho kumqoka ukuthi abantu babe nolwazi lwezizathu ezenza lesi simo ngaleso sikhathi. Kungani amajoyinti omzimba eba buhlungu ngalesi sikhathi? Lokho kungenxa yokubanda okuba khona ngalesi sikhathi sasebusika okwenza ukuthi izihlakala nemisipha zomzimba kuqine kakhulu bese kwenza kuthi amajoyinti asongelane futhi angakwazi ukunyakaza ngendlela efanele nejwayelejile. Okunye futhi okuba yinkinga enkulu wukuthi…

MHLELI: Ake ngisike elijikayo ephephandabeni lesizwe. Siyayizwa imvunge yemyezane izitshudeni zethweswa kwangqondo ebanzi. Kulesi sikhathi sonyaka, siye sizwe inhlokomo emanyuvesi sifunda emaphephandabeni, sibuke nasezinkundleni zokuxhumana izitshudeni zithweswa iziqu zokuphothula izifundo zazo. Sibone nje kubazali injabulo ichichima ebusweni. Lapho bebuyelwa yithemba lokwethuleka imithwalo yeminyaka emva kokudla imbuya ngothi. Siyabonga siyanconcoza kubo bonke abayibambe ishisa, basebenza ngokuzikhandla nangokuzimisela. Okubuhlungu nje ukuthi izibalo zabantu abangasebenzi zenyukile njengokombiko okhishwe yisikhungo iStatistics South Africa. Lokhu kusho ukuthi nalabo abaphuma ezikhungweni bazofika bazokwandisa isibalo ngamajazi abo. Kuseyinselelo enkulu ezweni lethu iNingizimu Afrika ukulwa nokwentuleka kwemisebenzi. Kuhlale kushunyayelwa ivangeli lemfundo kodwa abantwana bahlala emakhaya imnyaka bengaqashwa sebefundile. Yekela sisakhula sinamaphupho, kuthiwa imfundo yisihluthulelo sempilo ebheke empumelelweni. Ongalazi usizi uyobe esekutshela ukuthi kumele uqale ibhizinisi. Bese uzibuza ukuthi kwalelo bhizinisi uyobe uliqala ngani ungenayo imali yokulisungula? Ngaleyo mali…

THOLE ukwesekwa endaweni ebingalindelekile umqeqeshi weKaizer Chiefs, uNasreddine Nabi, okubhekwe ngabomvu ukuthi uzophumelela kumbe uzohluleka yini ukufaka leli qembu laseNaturena kwazobanga isicoco seMTN 8 ngasekuqaleni kwesizini ezayo. U-Eric Tinkler opheka iSekhukhune United, okuyiqembu eligcine ukubhekana naMakhosi kwiBetway Premiership, utuse uNabi ngomsebenzi asewenzile kusukela efikile eNingizimu Afrika ngonyaka odlule. IChiefs neSekhukhune kaTinkler bacazelane ngamaphuzu ngempelasonto edlule bebambana kwabo ngo 1-1 koweligi ePeter Mokaba Stadium, ePolokwane. NgokukaTinkler, indawo okuhleli kuyona iChiefs kwi-log iqhelelene nendlela leli qembu elidlala ngayo kusukela kufike lo mqeqeshi waseTunisia. Nakuba sekuphele imidlalo eyisishiyagalombili iChiefs ingayazi iwini kwiligi kodwa uTinkler uzwakalise ukuzwelana noNabi oseqala ukuzizwa izigi zabalandeli njengoba imiphumela igqoza. Kunezinkulumo ezithi uNabi usindiswe wukuqeda indlala yezindebe ngokudla iNedbank Cup nge-Orlando Pirates muva nje eThekwini. Nokho ikusasa lakhe alikacaci eNaturena. Ngokubona kukaTinkler, isicoco seNedbank sisodwa kufanele sikhombise abaphathi beChiefs…

XWAYISE iqembu lakhe ukuthi likhuphule izinga emdlalweni olandelayo uma lihlose ukudlulela phambili kweyomkhumulajezi kwi-United Rugby Championship umqeqeshi weHollywoodbets Sharks, uJohn Plumtree. ISharks inqobe iScarlets yaseWales ngo 12-3 emdlalweni wokugcina wamaqoqo obuseHollywoodbets Kings Park ngoMgqibelo ebusuku, yaqeda isithathu kwi-log. Womabili la maqembu enze inqwaba yamaphutha kulo mdlalo, ahluleka ukushaya ama-try. Amaphuzu eSharks aqhamuke ngephenathi kaSiya Masuku namanye amathathhu abekwe phakathi ngu-Aphelele Fassi, iScarlets yaphendula nge-dropgoal ka-Sam Costelow. "Bekungewona umdlalo omuhle wombhoxo, uma sikhuluma iqiniso. Kufanele sibe ngcono kunalokhu. Abadlali nabo bakhungathekile. Bekunezinkinga ezimbalwa ngendlela esihlasela ngayo," kusho uPlumtree. "Kimina bekubukeka sengathi besizama kakhulu kodwa siqhubeka nokwenza amaphutha. Sisazowuhlaziya umdlalo bese siyabona ukuthi ukuthi kufanele sithuthuke kanjani.” ISharks isizobhekana neMunster yase-Ireland kwi-quarterfinal ezodlalelwa eKings Park ngoMeyi 31. UPlumtree uthe abadlali bayazi ukuthi kufanele bakhuphule izinga ukuze badlulele kowandulela owamanqamu alo mqhudelwano okokuqala…