Tabla de contenidos para 2026-04-22 en Isolezwe

INTOKAZI yakuleli eyathatha isicoco sikaMiss SA yaphinde yakhala yemuka nesikaMiss Universe, uZozibini Tunzi, ingomunye wabethuli abasha bohlelo iTop Billing, ekhuza ibuya kwiS3 ekupheleni kwale nyanga. Lolu hlelo obeselunyamalele minyaka, lubuya kulesi siteshi nalapho luzokhombisa khona imizi nemicimbi esezingeni eliphezulu. Le ntokazi egqame kwabaningi ithatha lezi zicoco, ayiyona umafikizolo kwezethelevishini njengoba isike yabonakala ilingisa efilimini yaphesheya kwezilwandle eyaqoshwa kuleli iThe Woman King neBad Influencer eyayikhonjiswa kwiNetflix. UZozi uthe kuye leli yithuba eliyingqayizivele ngoba ukuba kulolu hlelo kusho lukhulu - yinto akade ayilindela. "Kuningi okusha okusazovela ngohlelo. Kusekhona okuningi okuzolandela nokuzohluka endleleni uhlelo obelwaziwa ngayo phambilini," kuchaza yena. Kulolu hlelo kubuya izinkakha ezake zalwethula okukhona kuzo uDkt Michael Mol, Basetsana Kumalo, Jonathan Boynton-Lee, Dkt Fez Mkhize noRyle De Morny. Kubethuli abasha abazoqala ukubonakala kulo kubalwa uBryoni Govender, Arno Greeff noSine Mpulu. Ukubuya…

IPHINDE yagubuzelwa yifu elimnyama iNdlunkulu kaZulu kulandela ukuguqa kukaMntwana Gcinabani Thembisile "Sister Eunice" Zulu (78), waseZibindini. UMntwana uGcinabani ushone ngoMgqibelo, nokuwusuku obekufihlwa ngalo omunye uMntwana waseNdlunkulu kaZulu, uGibizizwe Zulu (67), wasoSuthu. Okhulumela iSilo, uMntwana uThulani kaGqikazi Zulu, uzwakalise ukukhathazeka ngokuguqa ngokulandelana kwabantwana baseNdlunkulu. "Nina beSilo senginamahloni ukuthi ngilokhu ngibika ngezindaba ezibuhlungu nezingehli kahle. INdlunkulu kaZulu isiphinde yehlelwa yifu elimnyama. Egameni leSilo samabandla onke, nasegameni leNdlunkulu nesizwe sonke sithi akwehlanga olungehliyo, nilale ngenxeba nina beSilo." UMntwana uThulani uchaze uMntwana uGcinabani njengomuntu obenenhliziyo emnene futhi ezinikele okholweni. UMntwana uThulani uthe uMntwana uzofihlwa ngoMgqibelo. "Umngcwabo uzokuba seKuthokozeni kweZibindi, eShoba, eFilidi. Sengathi umoya wakhe ungalala ngokuthula." UMntwana uGibizizwe yena ufihlwe ngoMgqibelo, oSuthu. UMntwana uGibizizwe ubeseduze kweSilo uMisuzulu Sinqobile kaZwelithini, futhi uyena owayekhongela iMbube ekhweni layo kwaMyeni. UMntwana uThulani uthe ukushona kwabaNtwana ikakhulukazi labo abangoyise…

UMDLALI wasesiswini weMamelodi Sundowns, uBathusi Aubaas, uvule isifuba ngokumiswa kwabo lubhojozi yizigi ze-Orlando Pirates njengoba ibabangisa isicoco seligi yaseNingizimu Afrika asebekuphendule isiko ukusidla. U-Aubaas obekhuluma nabezindaba muva nje ukuvumile ukuthi nakuba kubasiza ukuthi bakhuphule amasokisi ukuxinwa yiPirates kodwa kubashiya bengenawo uphawini wokulahla amaphuzu. ISundowns inethuba lokubuyela esicongweni se-log yeBetway Premiership ngomdlalo omqoka neStellenbosch FC namuhla ngo-7.30 ebusuku eLoftus Versfeld Stadium, ePitoli. Umdlalo uzoqala kuyiPirates eqhwakele ngamaphuzu angu-58 bese kuba yiSundowns esele ngemidlalo emibili emhlane wayo ngawu-56. ISundowns izama ukusidla okwehlandla lesishiyagalolunye kulandelana isicoco seligi kodwa kulokhu kunomehluko kwazise iPirates idlondlobale ngale ndlela yokuthi namanje akukacaci ukuthi ngubani kulama qembu okuzophela isizini eqhwakele. Kusezandleni zeSundowns nokho ukuthi isicoco siya ngakuphi ngoba iwini kwiStellies (namuhla) ngeke igcine ngokuyibuyisela esicongweni kepha izoyiqinisa nakakhulu le ndawo ngoba izobe isasele ngomdlalo kwiPirates. “IPirates isimise manzonzwane…

UKUHUBELA sakusha ngokusongwa kwesizini ka-2025/26, yeMotsepe Foundation Championship, kukhomba ukuthi imidlalo esele isifana neyamanqamu emaqenjini akulesi sigaba kusukela kwasembangweni weligi navika izembe. Ngakho lokhu kwenza ubhekwe ngabomvu umphumela womdlalo weKruger neCape Town City ozodlalelwa KaNyamazane Stadium, KaNyamazane, namuhla ngo-3 ntambama. IKruger okuyiyona esazihola phambili kwi-log yeMotsepe Championship, iza kulo mdlalo nje isavule igebe lamaphuzu amahlanu njengoba inamaphuzu awu-49, nokungayibeka ethubeni elihle kakhulu lokunqoba isicoco uma ingakwazi ukubuya namaphuzu amathathu emdlalweni wanamuhla. Ngempelasonto, iphinde yakhombisa izinhloso zayo ngesicoco seligi inenebula iMidlands Wanderers ngo 3-0. ICity esendaweni yesibili, neMilford FC neHungry Lions abasendaweni yesithathu neyesine ngokwehlukana, banamaphuzu awu-44 ngokulinganayo. Kanti ukunqoba kweCity nakho kungayinika ithuba lokuvala igebe phakathi kwayo neKruger, kuphinde kuwushubise mawala umbango weligi. ICity iya kulo mdlalo wanamuhla neKruger isefomini enhle njengoba ibuye namaphuzu ayisishiyagalombili emidlalweni emine yakamuva ngokunqoba emibili…

UZOKHULUMA ngezingqinamba abazali ababhekana nazo ngenxa yezingane ezibafaka ezinkingeni ezehlukene umdlalo wamahlaya othi Msebenzi, ozoqala kwiSABC1 ngeSonto ngo-7.30 ebusuku. Kulo mdlalo oqoshelwe eSoweto kulingisa phambili umbhali obuye abe ngumqondisi wemidlalo emikhulu uThomas Gumede. UThomas uzobe elingisa indawo ephambili kaMsebenzi, okungowesilisa oneminyaka engu-30, onolimi olushelelayo, ongenandaba nokuthola umsebenzi oqondile nowenza konke okusemandleni ukubalekela izinkinga anazo zemali. Ekhuluma ngale ndawo uThomas uthe uMsebenzi, usebenzisa izindlela ezingaqondile ukuze athole inkece njengoba enamabhanoyi afake kuwo omakhelwane bakhe abangani nabomndeni wakhe. "UMsebenzi wumuntu nje esingathi akabalaleli abanye. Wenza izinto ngoba azi ukuthi uyakwazi ukubagoqa kalula kodwa lokhu kubuye kususe umsindo ngenxa yokuthi ukwenza ebantwini abazanayo nabasondelene kakhulu bese kuba nemiphumela naye abengayilindele.Yindawo lena ezohambisana nempilo yemindeni eminingi ngenxa yentsha ephila impilo efana nse neyalona wesilisa," kusho uThomas. Kulo mdlalo kuvele ukuthi omunye umlingisi ozogqama uDuduzile…

KuMINZE isangoma, okuthiwa besiyohlambulula abantu edamini laseNanda, endaweni yaseSikebheni, eMzinyathi, ngoMsombuluko. Ngokusho komthombo, umufi ongowesifazane, ubehamba nabanye abantu abambalwa beyogezwa. “Uminze engakabagezi. Bekusewuye kuphela obesangene emanzini,” kusho umthombo. Uveze ukuthi isigameko senzeke kusakhanya, nokho umufi abakwazanga ukumhlenga ebebekhona. “Asazi ukuthi bebesukaphi, kodwa akubona abendawo,” kusho umthombo. Ikhansela lendawo, uMnuz Falakhe Gcabashe, lithintwa yiSolezwe, lithe lisanda kuzwa ngodaba, lathi alikakabi nolwazi olugcwele. “Engikutholile wukuthi umufi nalabo abehamba nabo ababona abantu bendawo. Asikabi nalo ulwazi lokuthi bebesuka kuphi nendawo. Okusho ukuthi bebezokwenza lokho ebebezokwenza bese behamba,” kusho uGcabashe. Okhulumela amaphoyisa KwaZulu-Natal, uSergeant Thenjiswa Ngcobo, uthe amaphoyisa aseNanda avule idokodo lokufa komuntu ukuze liphenywe kulandela ukuminza komuntu edamini laseNanda ngoMsombuluko. “Kusolwa ukuthi owesifazane ubegeza abantu edamini eliseSikebheni ngesikhathi eminza,” kusho uSgt Ngcobo.…

BAYEDE Hlangalomhlabathi, iNdlulamithi yamaKhosi, abaNtwana baseNdlunkulu, amaKhosi nabadidiyeli beMpi yeSilo namaButho, nina beSilo! Kukhona imizi eyaziwayo futhi enedumela ezintweni eziningi. Le mizi ivame ukuphathwa ngabanumzane abanohlonze nabanegama esizweni. Iqophelo lale mizi libonakala kakhulu uma kukhona umcimbi owenziwayo ekhaya. Kuqale kubonakale ngomquba esibayeni ukuthi umnumzane waleli khaya ukusiphi isigaba. Amadodana noma izinsizwa zakulowo muzi zivame ukuba zikhule zihlangene zibambisene. Uma zisebenzela ezindaweni ezikude, kucacela noma ubani uma zibuyile ngempelasonto ethile noma ngesikhathi samaholidi athile njengoKhisimusi noNcibijane. Isikhathi esiningi kugqama uzinzo nokubambisana phakathi komndeni. Ngisho izintombi eziqome kuleyo mizi zisuke zazi kahle ukuthi ziqome emzini waliphi iqophelo futhi zizigqaja ngalokho. Umbuzo osalayo wukuthi yini efike yone bonke lobu buhle esikhuluma ngabo nxa umnumzane wekhaya engasekho emhlabeni. Kweminye imizi kuthi ngisho umnumzane wekhaya engasekho emhlabeni kodwa luqhubeke uzinzo nesikompilo lomndeni ngenxa yokuthi umnumzane…

ZITHI vu izintokazi ezidumile kuleli ngamahlebezi alokhu evela ngazo kulandela ukuboshwa kwesikhulu sikahulumeni, uKagiso Michael Lerutla, oyimenenja yedolobha kuMasipala waseKurhuleni. UKagiso osamisiwe uboshwe esikhumulweni sezindiza i-OR Tambo kwaphinde kwavela ukuthi ubeyotetemuka nenye yezintokazi asondelene nazo okuthiwa ibiyogubha usuku lwayo lokuzalwa. NgoMsombuluko ube esevela enkantolo noBrigadier Julius Mkhwanazi oyisekela mphathi wamaphoyisa ezemigwaqo Ekurhuleni. UMkhwanazi usamisiwe emsebenzini. Ezinkundleni zokuxhumana abantu baveze ukuthi uKagiso imali kaMasipala ubeyichitha ngokuphilisa kahle izintokazi abethandana nazo. Kulezi zintokazi kubalwa uMawhoo ongumculi, Sithelo Shozi okuvela ukuthi washiya phansi ukuba uDJ ngenxa yokuba sebudlelwaneni noKagiso. Enye yezintokazi ezikhonjwa kuye uCyan Boujee, okuvela ukuthi umuzi asanda kuwusabalalisa ezinkundleni zokuxhumana ubuthengwe uyena uKagiso. Ngemuva kokuboshwa kukaKagiso, uCyan uvele wasusa zonke izithombe abezifake ezinkundleni zokuxhumana, nokuvele ukuthi ucisha ubufakazi ngempilo ayiphilayo. UCyan akakwazanga ukuthula kuvela lezi zindaba wathi yena ukhethe ukususa izithombe…

SOSHA elisolwa ngokudubula libulale umkalo, litshele iNkantolo yesiFunda sasePinetown, izolo ukuthi wazidubula yena, wafa. Lokhu kuza njengoba uMnuz Lwanda Mxolisi Zungu, ethula ubufakazi phambi kwenkantolo ngecala lokufa komkakhe, uNkk Tania Zungu. UNkk Zungu wadutshulwa wafa ekhaya labo elisePinetown, ngoJanuwari 3, 2024. UZungu utshele inkantolo ukuthi ngokusuku lwesigameko, umufi wazidubula ephindelela kwaze kwaba kasishiyagalombili. UZungu ubehlonywa imibuzo umshushisi woMbuso, uMnuz Rowan Souls. Ethula ubufakazi bakhe, uZungu uthe wezwa umkakhe ekhokha isibhamu sakhe, ngesikhathi ematasa ecinga amateki okojima. Uthe ngesikhathi esifanayo, umkakhe washo ngengila, ememeza unina, naye owayekhona endlini, ethi uZungu uyamhlasela. Ngokusho kukaZungu, wagxumela embhedeni ukuzivikela, eqinisekisa ukuthi umbhobho wesibhamu wawungabhekile ngakuye. Uthe umbango wesibhamu wasuka khona embhedeni, kwathi kuso leso sixakaxaka, isibhamu saqhuma. Ugcizelele eyokuthi akazange yena asicindezele lapho esidubula khona isibhamu kodwa wehluleka ukusho ukuthi ubani pho owadubula kasishiyagalombili.…

SEKUYINTO ejwayelekile ukuthi esifundazweni iKwaZulu-Natal sihlale sibabaza izehlo ezishaqisayo zokubulawa kwabesifazane kodwa kwimpelasonto esiphuma kuyo ligaye ngomunye umhlathi. Njengenjwayelo ayizange isishiye sephuke izinhliziyo kodwa isenze safikelwa yizinyembezi zenjabulo uma izintokazi ezidabuka esifundazweni ziphindela emakhaya zihlabene ngemiklomelo econsisa amathe. Ukuhlabana kwezintokazi ezidabuka eKZN emkhakheni eyehlukene yezemidlalo ngempelasonto kube yingqophamlando eyenze sangaba nongabazane lokuthi iyohlale ikhunjulwa. Iyobongwa namaqhawe. Ezikwenzile akwandele bani, kuwumphumela wokuzimisela nokuzikhandla nokushalazela izinto zalo mhlaba ezigcina ziyisithiyo sendlela ebheke emadlelweni aluhlaza. UNonkululelo Mlaba waseLindelani ongumdlali amaProteas, ukhale wemuka neSports Woman of The Year kumaKZN Sports Awards. Lokho kuholele ekutheni athole ubutsetse beVW Polo Vivo. Besekungesithathu le ntokazi elaziyo usizi ithola lo mklomelo kulandelana. UJenet Mbhele ogijimela uMzikhulu Strides noseke wangena ohlwini lwabayishumi kwiComrades Marathon, ukhale wemuka no-R100 000 ngemuva kokudla umhlanganiso kwiZululand Ultra Marathon. Nakuba luselude ukhalo kodwa sinethemba…

UYATHUTHUMELA owesifazane wakwa-H, eMlaza, othi ubhacile njengoba esaba ukuthi umyeni wakhe kungenzeka aphinde amenze isilo sengubo njengoba ezame ukumdubula kodwa wamshweba waphinda wamgxokogxa ngesikele esithweni sakhe sangasese. UNkz Wendy Zondi (36) wakwa-H, eMlaza, uvele ahlengezele izinyembezi uma echaza ngokulimala kwakhe athi kwenzeke ezinyangeni ezedlule. Uthe umyeni wakhe, wafika endlini ntambama baba nokuhilizisana nakhona athi akaqondi ukuthi kahle hle kwakubangelwa yini, wathi umyeni wakhe wafika ekhaya "edle amponjwana" wakhala ngokuthi akakuthandi ukujwayelwa kabi umuntu omganile. UNkz Zondi uthe kuthe uma embuza ukuthi kwenzekani kodwa engaphenduli, kunalokho ebelesela amazwi awodwa wokuthi akakuthandi ukujwayelwa kabi. Eqhuba, uthe umyeni wakhe ube eseqonda kuyena ehlezi kusofa wamqala ngempama, wathi esababaza lokho wamane wadonsa isibhamu sakhe wamshaya ngesidunu emhlane nasekhanda.. Uthe waqhubeka wamshaya waze wadubula kodwa engamphenduli uma embuza ukuthi kwenzenjani futhi woneni ukuze axolise, wathi…

MDLALI wasesiswini weStellenbosch FC, uGenino Palace, uthi bazokwenza konke okusemandleni abo ukuphazamisa umgqigqo weMamelodi Sundowns njengoba bezotholana phezulu koweBetway Premiership kusihlwa. IStellies izovakashela amaBrazilians eLoftus Versfeld Stadium, ePitoli, ngo-7.30 ebusuku. AmaSandawana asembangweni wesicoco oshubile ne-Orlando Pirates, futhi adinga amaphuzu agcwele kulo mdlalo ukuze abuyele esicongweni. IStellies isendaweni yesishiyagalolunye ngamaphuzu angu-31 emidlalweni engu-24. Uma iqoqa amaphuzu aphelele ekuhambeni ingazifaka kwiTop 8 kulesi sikhathi esimqoka sesizini. Leli qembu eliphekwa nguGavin Hunt liqumbe phansi iSekhukhune United ngo 3-1 emdlalweni walo wakamuva weligi. “Besilwela ukuhlanganisa amaphuzu angu-30 ukuze sinciphise amathuba okugawulwa yizembe. Njengoba sesikwenzile lokho sesibheke ukubalwa namaqembu ayisishiyagalombili aphezulu kwi-log,” kusho uPalace kwi-website yeStellies. “Ububalulekile lo mphumela esiwuthole sidlala neSekhukhune kodwa okumqoka wukuthi lo mgqigqo siwubambe kule midlalo yokugcina yesizini. Sisagxile emdlalweni ngamunye kodwa into esiyibheke kakhulu futhi esizoyilwela ukungena kwiTop 8.” ISundowns…