Tabla de contenidos para 2026-04-20 en Isolezwe

UHLATHI noThumeka bayangqubuzana ngokuthi kumele bamqondise kanjani ubugwegwe uYanga. UMawethu ujabulela impumelelo akazi ukuthi kukhona okufufusayo. UNoncebo uphoqeleka ukuthi abhekane neqiniso elibuhlungu ngaye nonina, okungamphathi kahle emoyeni futhi okuba nomthelela emshadweni wakhe. ULazarus uthatha isinqumo esingashintsha konke. Izenzo zikaYanga zishaqisa wonke umuntu emndenini. USydney uthola ithuba ngesikhathi kunezinxushunxushu. USOKA ufika emshadweni efake imvunulo yakwaZulu iphelele, okwenza uMampho ashintshe ekucasukeni kodwa ajabule. U-Isaac uphelezela uMampho. USoka ucishe agonyuluke kuMampho kodwa uqamba amanga, uthi ubeboshelwe ukushayela ephuzile wakhishwa wuSandile ngebheyili. UNeo ubuza uThato ngokuthatha izinqumo kunakufihlile futhi uyavuma ukuthi usezovuleleka. Ithemba labakwaMolapo lokuba nosuku olunokuthula, liyashabalala uma kugcwala abantu emagcekeni. U-Isaac uyahluleka ukumelana nesixakaxaka ngesikhathi uMaria noKeletso beya kuye befuna enze iminyakazo. U-JACK ukubeka kucace okubalulekile kuye kuSwazi noFikile. UNontle uthola ngemfihlo kaMelo ngephutha. UFanyana…

MHLELI: Ngiphawula ngesigwebo esinikwe uMengameli wezimvemvane ezibomvu, uMhlonishwa uJulius Malema, muva nje. Okokuqala; ngiyolokhu ngikhalile ngokuthi emveni kweminyaka engaphezu kwa-30 sathola inkululeko, abaholi bezwe lakithi abakaze beqhamuke nemibono yokubuswa kwezwe lethu ngemithetho nemigomo ehambisa nobu-Afrika bendabuko yethu. Sibuswa yi-Roman Dutch Law. Kuchazani ukuthi umuntu agwetshwe yinkantolo, isho neminyaka emnike yona kodwa abuye ayolala kubo? Anginalwazi lokuthi siba kanjani isigwebo somuntu odlale ngesibhamu budlabha emphakathini. Kodwa ngesingami, bengiyothi uJuju akahlawulise ngenhlawulo nje enkulu agwetshelwe ngaphandle, isigwebo silengiswe iminyaka enqunywe yinkantolo. Hhayi ukuthi aze ayovalelwa ngoba akabulalanga muntu futhi akukho la okukhomba khona ukuthi wayenenhloso yokubulala kumbe wayeshiselwa nje igazi. Kulungile-ke imantshi ibone simfanele isigwebo seminyaka emihlanu kepha yisiphi isidingo sokuthi angalali ezitokisini? Ngiqaphelisile futhi isikhathi esiningi ukuthi ubudedengu ngoba ngisho esemuka namanzi akaboni. Uma kade eyovela kuleli cala ubevele ehlaphaze, inkulumo…

USADIDEKILE ubuholi besikole iMaphephetha High, eMatata, eNanda, kulandela isigameko sokungqongqiswa kwenye ingxenye yaso ngoLwesihlanu. Emlilweni okuthiwa ubonwe omakhelwane ezintatha, kushiswe ihhovisi likathishanhloko, elephini lakhe, amane ama-head of department nekilasi elilodwa elincikene nompheme okungqongqiswe imoto ebisetshenziswa abafundi abenza izifundo zokukhenikha. USihlalo wesigungu sesikole, uMnuz Mzokhona Khumalo, uthe basashayisana ngamakhanda ngokuthi ubani lo obenesifiso sokucekela phansi isikole. “Kusobala ukuthi umlilo uthungelwe umuntu futhi sisola ukuthi ubesebenzisa ibhomu likaphethroli. Okusididayo ukuthi ukwenze lokhu nganhlosoni ngoba azikho izinxushunxushu esikoleni. Othisha bonke bayezwana, iSGB nayo iyezwana. Akukho muntu onanxa nomunye,” kusho uKhumalo. Uthe kuningi okumqoka okubalahlekele ngaphakathi emagunjini ashisiwe. Phakathi kwakho ubale ama-riphothi abafundi abequkethe imiphumela yabo yokuphela kwesigaba sokuqala sonyaka, athe bebezonikwa wona maduze. Uphinde wabala nemishini emithathu yokufothokhopha, amaphepha abalulekile abafundi, izincwadi kanjalo nazo zonke ezinye izinsizakusebenza ezisetshenziswa othisha uma befundisa. “Sife olwembiza…

NTOKAZI yaseThekwini edlalela amaProteas esifazane, uNonkululeko Mlaba noZakithi Nene waseMnambithi ongumsubathi weNingizimu Afrika ebangeni lika-400m, yibona abagoduke nemiklomelo emikhulu emcimbini wamaKZN Sports Awards obungempelasonto, eNkosi Albert Luthuli Convention Centre, eThekwini. UMlaba (27) ugoduke nomunxa weKZN Sportswoman of the Year kwaba nguNene (28) kofanayo kodwa kwabesizlisa (KZN Sportsman of the Year). Zombili lezi zihlabani ezisimele ngobuqotho isifundazwe i-KZN emaqenjini esizwe eseMzansi ngokwahlukana kwemidlalo, zibuyele emakhaya nemoto entsha yohlobo lwe-VW Polo umdlali ngamunye. Komunye umunxa obubhekiwe we-KZN Sports Personality of the Year kukhonye isihlabani seLamontville Golden Arrows uSiyanda “Skhwishi” Ndlovu. UNdlovu ugoduka nalo munxa nje, ubeqhathwe nezilomo obekukhona kuzona uMlaba noNene. Miningi neminye imiklomelo ephumile kulo mcimbi obuhanjelwe yizikhulu zikahulumeni wesifundazwe ngokwahlukana kwazo. Selulonke uhla lwabahlabene eminxeni eyahlukene kwiKZN Sports Awards lumi kanje: Administrator of the Year – Precious Nzimande Coach of…

UMCULI we-jazz, uNduduzo Makhathini, ujatshuliswa ukuphrojusa i-albhamu yakhe entsha ngokuhlanganyela nendodana yakhe, uThingo, akubona kuzoheha nentsha. UNduduzo ophinde abe wuthisha womculo njengoba eneziqu zobudokotela kuwo, ulungiselela ukukhipha i-albhamu, i-The Myth We Choose ngoJuni. Kumanje usekhiphe ingoma eyendlalelayo ethi Kuzodlula. Uthe i-albhamu uyiphrojuse ngokuhlanganyela noThingo Makhathini (18). “Ukusebenzisana noThingo akuyona into eqalayo. Kwi-albhamu yokuqala eyayithi Sketches of Tomorrow (eyaphuma ngo-2014), babekhona abantwana uNailah, uThingo noMoyo becula. Balokhu beqhamuka bevela emsebenzini ngezindlela ezahlukile kodwa useyaqala ukuhlala esihlalweni sokuthi kube wuyena umdidiyeli noma uphrojusa kule albhamu,” kusho uNduduzo ekhuluma naleli phephandaba ese-United States of America (USA), lapho enomjikelezo khona. Uthe izingane zakhe ziyawuthanda umculo ngoba beziwufunda ezikoleni zamabanga aphansi kodwa uThingo uyena obonakala ngathi ufuna ukuwuqhuba. “Ulethe izithako ezintsha ezenza ukuthi lo mculo nabantu abancane ngokweminyaka bazowuthanda kakhulu.” Uthe baningi asebenze nabo…

MASIPALA wesiFunda uMgungundlovu udingisa umshayeli weloli yamanzi obanjwe oqotsheni edayisa amanzi. IMeya, uMnuz Mzi Zuma, ithe abasafuni ukuphinde babone lo msebenzi esebenza ezindaweni ezingaphansi koMgungundlovu. Umsebenzi uqashwe yinkampani ehlinzeka umasipala ngezimoto zamanzi. UZuma uthe utshele izikhulu zomasipala ukuba zitshele inkampani eqashe lo msebenzi ukuthi akasadingakali eMgungundlovu. Lo msebenzi ubanjwe edayisa amanzi eMaqongqo, ngaphansi koMasipala waseMkhambathini. Ngesikhathi ebanjwa edayisa amanzi, bekufanele ngabe uhlinzeka amanzi ezindaweni ezingaphansi koMasipala waseRichmond. IMaqongqo neRichmond ziqhelelene ngebanga elingaphezu kuka-60 KM kanti lezi zindawo zihlukaniswe yizindawo ezingaphansi koMasipala waseMsunduzi. Umshayeli ubanjwe ethela amanzi emzini yabantu ekhethekile. UZuma uthe umuntu uma efuna ukuthelelwa amanzi emzini wakhe, kufanele awathenge amanzi kwamasipala bese umasipala uthumela imoto ezomthelela leso sibalo samanzi asithengile. Uthe imizi ebithelelwa amanzi ilo mshayeli, ibingazange iwathenge amanzi kumasipala. UZuma uthe abashayeli abadayisa amanzi benza ukuthi abantu bagcine…

NOBHALA Jikelele we-ANC, uMnuz Fikile Mbalula, usole umndeni wosomabhizinisi abafunelwa amacala kuleli, abakwaGupta, njengongqondongqondo emkhankasweni weMKP wokhetho lwango-2024, owawudla lubi ezinkundleni zokuxhumana. UMbalula uthe abakwaGupta yibona abapheka umkhankaso weMKP, owawushisa kakhulu enkundleni yezokuxhumana i-Tiktok. Ukusho lokhu ngesikhathi ekhuluma kwiLekgotla ye-ANC Youth League, eqhubeka eMangaung, eFree State. AbakwaGupta kusolwa ukuthi babezitamuzela kumathenda kuleli ngesikhathi umholi weMKP, uMnuz Jacob Zuma, engumengameli wezwe. Lo mndeni walifulathela elakuleli emva kokunindeka ezinsolweni ezenziwa kwiKhomishini eyayiphenya izinsolo zokuLawulwa koMbuso yiDlanzana. UMbalula uthe ubheke ukuthi iMKP iphinde ivimbanise kuzo zonke izinkundla zokuxhumana njengoba ukhetho lohulumeni basekhaya seluseMome. "Iqembu likaZuma lalimandla kuTiktok ngoba umkhankaso walo wawuphushwa abakwaGupta. Sebecwilile manje kodwa uzobabona bazobuya njengoba sibheke okhethweni. Uzoze uzibuze ukuthi bavukaphi la bantu? Indlela abanamandla ngayo, benza uze ukhohlwe ukuthi uZuma akuyena owayephethe izwe ngesikhathi kunezinsolo zokulawulwa koMbuso yidlanzana." I-MKP…

BUKEKA usekude ukuphela umdonsiswano kwiNFP, njengoba kulindeleke ukuthi akuphonsele inselelo ukuxoshwa kwakhe kuleli qembu, uMphathiswa wezokuThuthukiswa koMphakathi KwaZulu-Natal, uNksz Mbali Shinga. Umthombo osondelene noNksz Shinga, uthe uzosiphonsela inselelo isinqumo sekomiti esithi akaxoshwe eqenjini. Isinqumo sokuxoshwa kukaNksz Shinga simenyezelwe uNobhala Jikelele weNFP obambile, uMnuz Sunset Xaba, izolo. UNksz Shinga ulahlwe yicala lokushaya indiva umyalelo weqembu wokuba aseke isiphakamiso sokungabethembi ubuholi bukaNdunankulu wesifundazwe, uMnuz Thami Ntuli, esasifakwe yiMKP. UXaba uthe uNksz Shinga unikeziwe ithuba lokuthi azikhalele ukuthi kungani kungafanele anikezwe isigwebo esiqinile kodwa wakhetha ukungalisebenzisi lelo thuba. "Wacela ukuba alulelwe isikhathi sokuthi enze izethulo. Wacela ukuba anikezwe umnqamulajuqu wangoMashi 22. Usihlalo wekomiti wachitha isicelo sakhe kodwa wamlulela kwaze kwaba u-Ephreli 17. Akazange alisebenzise leli thuba anikwa lona." UXaba uthe osekungasindisa uNksz Shinga ukuthi ayozikhalela phambi kwekomiti elibheke ukusebenza kwansuku zonke kwiNFP. Ukoxoshwa…

IKHALE ngokusala nosizi nokhwantalala okungapheli, kulandela ukubulawa ngesihluku kukanina, indodakazi yommeli okuthiwa wagwazwa wabulawa umyeni wakhe, oyiphoyisa likaMasipala weTheku, ngoJulayi nyakenye. Ummeli, uNkk Thandokuhle Sishi (48) kuthiwa wagwazwa wabulawa umyeni wakhe, uSenior Constable Qiniso Thulasizwe Sishi (41), emzini wabo oseWoodhaven, eMontclair, ngoJulayi 25, 2025. Indodakazi kamufi, uNksz Aphiwe Mkhize (19), ikhiphe okusenhliziyweni eNkantolo eNkulu yaseThekwini, ngesikhathi yethula ngomlomo ubufakazi bokuthi ukubulawa kukanina kube nomthelela omubi kangakanani empilweni yayo. USishi walivuma icala lokubulala umkakhe ngoFebhuwari nonyaka, nokuyilapho aveza khona ukuthi wamgwaza amahlandla ayisithupha. UNksz Mkhize uthe yamkhahlameza ngokuphindaphindiwe indaba yokuthi abone isidumbu sikanina ngosuku lwesigameko. Uthe uyazikhumbula engakwazi ukusiza unina, njengoba uSishi wavele wabhoka ngolaka ukuthi asondele kunina ememeza, ecela usizo. “Namanje ngisahlale ngiwucabanga lowo mzuzu empilweni yami,” kusho uNksz Mkhize. Utshele inkantolo ngobuhlungu bokubamba isandla sikanina, emncenga ukuthi avuke. “Akazange…

ZIYIFANISE nokunqoba kwesifundazwe empini yobugebengu obubucayi, eyokuvulwa kweForensic Science Laboratory (FSL), eMayville, eThekwini, ngoLwesihlanu. Izinhlaka ezilwa nobugebengu emphakathini, zithe le laboratory enikezelwe nguNgqongqoshe wemiSebenzi yoMphakathi kuzwelonke, uMnuz Dean Mcpherson kwibamba likaNgqongqoshe wamaPhoyisa kuzwelonke, uSolwazi Firoz Cachalia, ibuyisa ithemba empini yokulwa nobugebengu esifundazweni. Phakathi kokunye okuningi okuyamaniswa nophenyo lwamacala, izoba yisikhungo esizohlola amasampula olibofuzo oluqondene namacala okudlwengula enzeka esifundazweni. Kuzokhumbuleka ukuthi phambilini, amasampula alolu hlobo abethunyelwa esikhungweni esenza umsebenzi ofanayo esisePitoli. Lokhu bekuholela ekutheni kube khona izikhalo ngamacala abucayi afana nawokudlwengula njengoba bekuhlale kuvela ukuthi uyaphela nonyaka imiphumela yolibofuzo ingabuyile. Lokhu kuthiwa bekudalwa ukuthi lesi sikhungo senza umsebenzi osuke ulethwe nangezinye izifundazwe. Umsunguli weThekwini Neighbourwood Watch, eqapha ubugebengu emalokishini ehlukene eThekwini, uMnuz Andile Jali, uthe ukuvulwa kwesikhungo kuwukunqoba eyobugebengu esifundazweni. “Lokhu kusho ukuthi uphenyo olumaqondana nokuhlolwa kolibofuzo emacaleni okudlwengula, seluzoyeka ukushaya…

SIZOVELA enkantolo nozakwabo isikhulu samaPhoyisa kuMasipala waseKurhuleni esimisiwe, uBrigadier Julius Mkhwanazi. UMkhwanazi oboshwe ngempelasonto, uzovela eNkantolo yeMantshi eBoksburg, namhlanje. UMkhwanazi usolwa ngokusondelana nosomabhizinisi obhekene noxhaxha lwamacala, uMnuz Vusumuzi "Cat" Matlala. Kusolwa ukuthi uMkhwanazi wagunyaza ukuthi izimoto zikaMatlala zifakwe amalambu aluhlaza futhi kwavela kwiKhomishini eholwa yiJaji Mbuyiseli Madlanga, ukuthi uMkhwanazi kunemali ayeyithola kuMatlala. Ngaphandle kwalokho, uMkhwanazi uphinde abhekane nezinsolo okubalwa kuzo nezokufihla ubufakazi ecaleni lokufa komuntu. UMkhwanazi ushaqwe ngamaphoyisa kungakapheli izinsuku ezingaki eqede ukwethula ubufakazi phambi kweKhomishini kaMadlanga, lapho ebephekwe khona ngebhodwe elincane. Okhulumela amaphoyisa, uBrigadier Athlenda Mathe, uthe uMkhwanazi uboshwe yithimba eliphenya amacala asuka kwiKhomishini kaMadlanga. UMkhwanazi ubhekene necala lenkohlakalo nelokuphazamisa ukusebenza kwengalo yomthetho. UBrigadier Mathe uthe ukuboshwa kukaMkhwanazi akuhlangene nobufakazi obethulwe kwiKhomishini kaMadlanga, wathi futhi akuhlangene nophenyo obeluqhutshwa uphiko olugade ukusebenza kwamaphoyisa, i-Ipid. Uphenyo lwe-Ipid lwaphakamisa ukuthi amaphoyisa…

MHLELI: Ngibhala ngokukhulu ukudabuka ngebandla laseBuhleni elibizwa ngeThembezinhle ngendlela elincipha ngayo ngaphansi komholi uPhinda "Ukukhanyakwelanga" Shembe. Ibandla ngendlela elincipha ngayo kuyaphoxa. Muva nje, kuhambe amalungu amaningi okubalwa kuwo uMfundisi Nduli, uMvangeli uNduli, uMshumayeli Nduli nenhlalisuthi eningi. NoMfundisi uNzama usahlala ekhaya. Inkosi Ukukhanyakwelanga ungumnikazi nomholi wobuNazaretha umhlaba wonke ngokusemthethweni nokushiywa yiMisebe. Ngifisa iyibukisise le nto, ngiyacela eNkosini ukuthi noma ngabe singaba insali kodwa ukuhlubuka kwamakholwa akulona uphawu oluhle emehlweni omphakathi. Nezidingo zesonto azigcineke ngesikhathi okumele zigcineke ngazo ngenxa yomthamo weminikelo eqhamuka emakholweni amancane ngoba isonto akumele lincike kumuntu oyedwa noma emndenini owodwa. Isonto ligcina lithumbeka noma lilawuleka ngendlela uNkulunkulu angalimisanga ngayo. Inkosi ibusise enikuzwile. UMnuz Jones KWAZULU-NATAL…

UZOGCINWA ngencwadi nangeqophamlando, umlando wengwazi yeLadysmith Black Mambazo, u-Albert Mazibuko, eshone emasontweni amabili adlule, emuva kokugula isikhashana. UMazibuko (77) ushonele esibhedlela eThekwini, lapho ehlinzwe khona. Udlule emhlabeni esethathe umhlalaphansi ekunandiseni neqembu, ubeseba khona kuphela uma lizilolonga. NgoMgqibelo ekuseni, ufihlelwe emathuneni asekhaya eMtshezi, kwase kuqhubeka inkonzo enkundleni yemidlalo eMtshezi High. Lokhu kuye ngokwesifiso sakhe nokuthi endaweni kungcwatshwa engakashayi u-11 ekuseni, ngokusho kwemenenja yeMambazo, uXolani Majozi. UMajozi uthe uMazibuko bazomkhumbula ngokukhipha incwadi ekhuluma ngomlando wakhe. “Kuningi esikuqophile esaphila, kuzokwazi ukuthi kube nomthelela omuhle ekuhlanganiseni iqophamlando esizolenza,” kusho uMajozi. Ubonge nohulumeni wesifundazwe nokazwelonke ngokufaka isandla ezindlekweni zomngcwabo. “Uma umngcwabo kungowomndeni nomakhelwane, kuye kungabi nzima ukuwuthwala kodwa uma sekuzofika abantu abaningi, ngoba abantu abebesemngcwabeni bebalelwa ku-2 000, kuye kube nengcindezi emndenini ngezindleko. Uhulumeni waKwaZulu-Natal oholwa ubaba u(Thami) Ntuli ukwazile ukuthi usondele ubheke ukuthi umndeni…

UKULIMALA kwesilomo seHollywoodbets Sharks, u-Ethan Hooker, kufane nokungena kukasawoti esilondeni saleli qembu laseThekwini, ebesivele sibhibha ngenxa yomphumela obuqeda amathuba alo okuba yingxenye yemidlalo yomkhumulajezi we-United Rugby Championship (URC) eliwuthole ngempelasonto. Lokhu kushiwo ngumqeqeshi weSharks, u-JP Pietersen, ekutshela abezindaba kulandela ukuguqa kwezakhe ngo 21-17 kwi-Ospreys yaseWales, ekuhambeni ngoMgqibelo. Ukuguqa kweSharks kuwaqeda nya amathuba ayo okudlulela emidlalweni yomkhumulajezi kwazise igebe elikhona phakathi kwayo neqembu lokugcina (kwazoqhubeka iVodacom Bulls) likhulu ekubeni nemidlalo esele isimbalwa (3). Bekusobala kulo mdlalo ukuthi iSharks ibe nebhadi okufakazelwa wukuthola kwayo ama-try amathathu njenge-Ospreys kodwa yahlulwa ama-conversion. Iqiniso ukuthi leli qembu laseThekwini, lizenzele phansi. Ama-try amabili eSharks ashaywe nguPhepsi Buthelezi neyodwa kaHooker kodwa lo mdlali wamaBhokobhoko akazange awuqede umdlalo. Lokhu kunanelwe yinkulumo kaPietersen kwabezindaba lapho ekhale khona ngamaphutha nokulimala kukaHooker. “Nakulokhu siphinde sazenzela phansi emdlalweni obungekho lukhuni kangako ukuthi…