Tabla de contenidos para 2026-04-17 en Isolezwe

UKHOZI FM alufani nezinye iziteshi zomsakazo ezithe chithi saka umhlaba wonke. Ngale kokuthokozisa abalaleli balo, Ukhozi luyisikhungo esiyifagugu lesizwe esidumile, uZulu. Lesi siteshi sikhipha ulwazi, sibuye sifundise kodwa sibe siyiwumthombo wokuvikela nokukhulisa ulimi lwesiZulu. Ngamanye amagama, Ukhozi luklama indima enkulu ekuthuthukiseni ulimi nangosiko lwesiZulu njengoba luyisiteshi esibizwa nge-public broadcasting service (PBS) vele. Iziteshi zalolu hlobo zakhelwe ukwazisa, ukufundisa nokujabulisa ngolimi oluthize njengoba sibona Umhlobo Wenene, ogxile olimini isiXhosa. Yingakho-ke izinguquko esiteshini esinje zithinta abaningi ngoba abalaleli baso banezwi, futhi kufanele, ekulawulweni komsakazo. Ukhozi lusanda kushintsha izinhlelo, lwafaka nabasakazi abasha abasebancane. Yinto ejabulisayo lena futhi ekhombisa ukuthi balungiselela ingomuso. Kuyijoka elinzima kubaphathi balesi siteshi ngoba bathi beqinisekisa ukuthi Ukhozi FM luyaqhubeka nokuba yigugu kubalaleli, kodwa futhi kudingeke bakwazi ukuheha abakhangisi ukuze isiteshi sikwazi ukwenza inzuzo okuyiyo ephila ngayo. Nansi-ke inselelo ezivezayo…

KUMEMEZELA ngoLwesithathu, kwePhini leMeya eMkhandlwini weTheku, uNksz Zandile Myeni, ukuthi selumi ngomumo uphiko lwamaphoyisa oluhamba nezinja i-K9, kuletha ithemba ekutheni kuzoyishubela imigulukudu ehlalise izakhamuzi lubhojozi kuleli dolobha. Izigebengu seziwaphuze inyongo amaphoyisa ngakho-ke ukubuya kwe-K9 kwenyuse ithemba ngokuncipha kobugebengu obudla lubi kuleli dolobha eliyigugu ebantwini baseNingizimu Afrika. Side isikhathi silindile ukuthi kube nomnyakazo ozobhekana ngqo nezephulamthetho ezimelene nenhlalakahle yomphakathi. Kunethemba lokuthi i-K9 izokwenza umehluko ngokusebenza ngokwethembeka ekulweni nobugebengu obuhleliwe, hhayi ukushomana nezigelekeqe. Angu-13 amaphoyisa abeviliyela eThekwini, kuleli sonto, emuva kokuqeqeshwa ukuthi abe yingxenye yalolu phiko oseluzoba namalungu angu-20 okuzothenjelwa kuwo ukuthi athumele umyalezo wokuthi aphelile amahlathi ezinswelaboyeni ezimise kabi abantu. ITheku lidalula lezi zindaba nje lokwenyusa izinga kwezokuphepha, kusukela kule nyanga kuyoze kuyothwasa ihlobo kuzobe kuphithizela izicukuthwane ziphuma zingena esikhumulweni sezindiza iKing Shaka International Airport. Ngo-Ephreli 25, iTheku linamaMetro Awards azobe…

MHLELI: Kwelakho lodumo kule ngosi ngithi angibuye ngisike elijikayo. Umlando weLadysmith Black Mambazo ungumlando wamaciko ongeke nongasoze uphele. Siyazi ukuthi ubaba ongasekho ubaba uSolwazi Joseph Shabalala wakha isisekelo wawulwela kakhulu ukuthi ugqame. Kodwa-ke, Mhleli, ngivumele ngithi wayengeke akwenze lokho engenazo izinsika nezingqalabutho eziseduze kwakhe. Ngithi angilobe lapha kwelakho ngizwakalise ukukhala kwami ngokuwa komuthi omkhulu, ubaba uMnumzane Albert Mazibuko. Amagalelo akhe ayabonakala futhi azwakele noma sekwenanela umhlaba wonke ngokushona kwakhe. Nakhu engikufundile kuyena ubaba uMazibuko: intobeko yakhe, ukuhlonipha, ukuzehlisa kwakhe, ukuthanda isiko lesintu nokwazisa omunye umuntu, ubuntu kanye nokungaziphakamisi kwakhe. Ekugcineni, ukuziphatha kwakhe esidlangaleni angahlezi esematheni ngezindaba ezimbi. Ubungeke uthole enekwe abezindaba ngokungaziphathi kahle kwakhe emphakathini, okuyinto ehlula amaciko amaningi. Sithi lala baba wethu, Mnuz Albert Mazibuko. UNkulunkulu kwangathi angaba nomndeni neqembu lonke kanye nesizwe saseNingizimu Afrika, nomhlaba wonke uma kulala…

KUQEDA isizini endaweni yesithathu akuyona into okufanele ithathwe njengempumelo eqenjini elikhulu njengeKaizer Chiefs ngokusho komunye wamabamba abaqeqeshi kuleli qembu, uKhalil Ben Youssef. Lo mqeqeshi ocija Amakhosi ngokubambisana noCedric Kaze uthe uwafuna emgodleni wonke amaphuzu emidlalo yeBetway Premiership esele bese bebona ukuthi baqeda bekuphi kwi-log. IChiefs, esefomini emangalisayo kulezi zinsuku, inqobe umdlalo wayo weligi wesihlanu kulandelana ngokuxebula iMagesi FC ngo 4-1 ngoLwesithathu ePeter Mokaba Stadium, ePolokwane. Le wini yamagoli kaFlavio Da Silva, Wandile Duba, Mduduzi Shabalala noKhanyisa Mayo igcine indawo yeChiefs emva kwe-Orlando Pirates ngamaphuzu angu-45 emidlalweni engu-23. Emuva komdlalo uBen Youssef utshele abezindaba ukuthi ubheke amaphuzu agcwele kuyona yonke le midlalo eyisikhombisa esalele iqembu lakhe . “Indawo yesithathu akuyona into okufanele ibhiyozelwe eqenjini elikhulu njengeChiefs yingakho kusafanele sifake umfutho ongaphezulu kule midlalo esele. Sinejoka lokuyinqoba yonke imidlalo esisalele bese sihlala…

NTOKAZI esibonakala emidlalweni eminingi kuleli okubalwa kuyo i-Skeem Saam, Law, Love and Betrayal, uBuntu Petse, ithi kuzozwakala ukufika kwayo emdlalweni Inimba, la izolingisa khona indawo kaPortia Khiswa. Kulo mdlalo okhonjiswa phakathi nezinsuku ngo-8.30 ebusuku, iqale ukubonakala kuwo kuleli sonto, lapho idlala indawo yentokazi engomunye wonjiniyela abahamba phambili edolobheni langakubo. UBuntu uthe uPortia yintokazi ecabanga ngokushesha uma kuziwa emsebenzini futhi iyayazi into eyenzayo. "Kuyajabulisa ukuzolingisa indawo ezokwenza ababukeli bakubuke ngelinye iso. Kulo mkhakha esikuwo, njalo sifuna ukuthi uma sithola indawo ikhule kunalena esiyijwayele noma esisuka kuyo, bese sithola ezokwenza sithuthuke kunesisuka kuyo. Ngakho nami ngijabule ngokuthola indawo efana nalena njengoba uPortia engomunye wabaphathi kule nkampani futhi ewazi umsebenzi wakhe. Ufuna ukushintsha ikusasa emkhakheni wezobunjiniyela futhi akakholelwa ekutheni elokhu elandela abantu ukuze umsebenzi uqhubeke," kusho uBuntu. Uthe ufika kulo mdlalo vele kukhona…

BAKHALA ngokuqinisa isandla kwenkantolo ngesigwebo esigixabeze umholi we-EFF uMnuz Julius Malema izolo, enkantolo KuGompo. Ugwetshwe iminyaka emihlanu ebhadla ejele ecaleni lokuqhumisa isibhamu. Okwamanje uyasidlulisa isigwebo anikwe sona. Unobhala jikelele we-ANC, uMnuz Fikile Mbalula, uthe inkantolo iqinise kakhulu isandla. "Ngesikhathi ngeseka uMalema ukuba abe umholi we-ANCYL, ngangazi ukuthi kuzoba nzima ukulwela ukuba abantu abamnyama bathole inkululeko kwezomnotho. Lesi sigwebo sikhulu kakhulu. Ngiyazwelana noMalema." Unobhala jikelele weSaftu, uMnuz Zwelinzima Vavi, uthe kumthusile ukugwetshwa kukaMalema. "Ngiyazi ukuthi sonke siyalingana phambi kwamehlo omthetho. Lokhu kufanele kwenziwe kuwo wonke umuntu. Ngililalelile icala kulezi zinsuku ezimbili ezedlule. Nginomuzwa wokuthi isigwebo asihambisani nezigwebo ezitholwe abanye abenza amacala afanayo." Umholi wePA, uMnuz Gayton McKenzie, uthe ngeke agiye ngokwehlele uMalema. "Ngizomthandazela yena nomndeni wakhe. Ijele linzima. “Angisoze ngajabulela izinto ezimbi ezehlela izitha zami." Umholi weDA, uMnuz Geordin Hill-Lewis, uthe…

INHLANGANO ekhokha izibonelelo zikahulumeni i-South African Social Security Agency (Sassa), isigxeke ukwanda kwesihlava sokudayiswa kwezikhala, kukhokhiswa abasuke bebambe ulayini emahhovisi ale nhlangano. Isikhulu esiphezulu seSassa, uMnuz Themba Matlou, sithe babikelwa mihla namalanga ngokukhokhiswa kwabantu abasuke bekolayini ukuze basheshe bangene bathole usizo. Lokhu uthe akwamukelekile. "Siyakugxeka kakhulu ukuthi kudayiswa izikhala kulabo abasuke bezofuna usizo emahhovisi ethu. “Le nto ibikwa ezweni lonke kanti abenza lokhu ngeke sibabekezelele," usho kanje. Uthe abenza lokhu baxhaphaza abantu abathembele emalini yesibonelelo sikahulumeni. "Baxhaphaza abantu abadala nabaphila nokukhubazeka abasuke bevuke ngovivi bazofuna usizo. Lokhu kwenziwa abantu abangenanembeza kanti sizomthathela izinyathelo ezinqala esizomthola egila lo mkhuba." UMatlou uthe njengoba lokhu kwenzeka emahhovisi abo, kwakha isithombe sokuthi le nto iyagqugquzelwa ukuthi yenziwe. "Siqinise izinhlelo zethu sisebenzisana nabezomthetho ukunqanda lesi sihlava. Siyazi ngezinselelo ezikhona emahhovisi ethu okudalwa nawuhlelo esilusebenzisayo." Uthe…

MHLELI: UJenene wamaphoyisa KwaZulu-Natal, uNhlanhla (Nkwali Yenkosi) Mkhwanazi, waqopha umlando ngesibindi, nokuzidela ngesikhathi ebiza isithangami nabezindaba enekela izwe lonke ngamanyala enkohlakalo akhungethe elakuleli ngomhla ka-6 Julayi 2025. Wathi usekhathele ukuthula ebuka lolu titi lwenkohlakalo oluhlanganisa izinhlaka eziphezulu zomthetho kusukela kubashushisi, izimantshi ngisho namaJaji. Izikhulu eziphezulu zamaphoyisa, kuhlanganisa nosopolitiki, kuye kongqongqoshe abaphehla inkohlakalo bedizelwa ngezigidigidi zemali amaqembu emigulukudu eyaziwayo. Sekungumlando ukuthi lezi zinsolo ezinyanyekayo zinyakazise lonke izwe. Lokhu kuholele ekutheni uMengameli wezwe uMnuz Cyril Ramaphosa asungule ngokushesha iKhomishini ukuze kuphenywe ngalezi zinsolo. IJaji eselathatha umhlalaphansi, uMjabuliseni Madlanga, elihola lolu phenyo nelibambisene nabo abathi nsi. Siyambonga uJenene uMkhwanazi ngesibindi nokuzidela, akuyona into encane ukubhekana ngqo nemigulukudu engosozigidi nedume ngamacala amabi okubulala kwasani oluma endleleni yawo kungabi ndaba zalutho. Sibonge futhi nakuMengameli uMatamela ukuthi asukumele lolu daba okokuqala ngokwandisela uJenene Mkhwanazi abaqaphi abasezingeni…

NGUMDLALI wasesiswini nokaputeni weCasric Stars, uDecide Chauke, uyavuma ukuthi ukuhamba ibanga kwiNedbank Cup kube nomthelela ekulahlekeni komgqigqo emidlalweni yabo yakamuva yeMotsepe Foundation Championship. Sekungumlando ukuthi iCasric yamangaza abaningi iguqisa i-Orlando Pirates ngo 4-3 kumaphenathi emzuliswaneni weLast 16 yeNedbank, yalandela ngokuwashisa ijezi AmaZulu FC ngo 2-1 kuma-quarterfinal, yabe isikhishwa yiDurban City ngo 1-0 kweyandulela owamanqamu. Ngemuva kokuphuma kwiNedbank, iCasric ilahle amaphuzu emidlalweni emibili yakamuva kwiligi ibambana ngo 1-1 neMilford FC - nayo ejike kweyandulela owamanqamu eNedbank - yabe isibambana ngo 3-3 neMidlands Wanderers ngeledlule. Izodlalela ekhaya neBlack Leopards eSolomon Mahlangu Stadium, KwaMhlanga, namuhla ngo-3 ntambama. “Besivele sikuqonda ukuthi ukuhamba kwethu ibanga kwiNedbank Cup kungaba nomthelela emidlalweni yethu yeligi, okubalwa ukukhathala ngenxa yokudlala imidlalo eminingi ilandelana, nanokuthi-ke amanye amaqembu azolinyusa kakhulu izinga uma esebhekene nathi," kusho uChauke. "Ukushaya kwethu nje iPirates kwenze…

ZESULIWE izinyembezi zomthandi webhola, uMama Joy Chauke, njengoba ethole uxhaso lokuyobuka bukhoma iNdebe yoMhlaba yeFifa ezoqala ngoJuni 11, eMexico, Canada nase-United States of America. Ezinsukwini ezedlule, uMama Joy ube sematheni kulandela ukukhala kwakhe ethi uNgqongqoshe wezemiDlalo, ubuCiko namaSiko kuzwelonke, uMnuz Gayton McKenzie, unqaba ukumkhokhela ukuthi ayokweseka bukhoma iBafana Bafana. “Asithandazele ukuthi uMengameli asinikeze uNgqongqoshe omusha wezemiDlalo ozothanda abalandeli,” kubhala uMama Joy ekhasini lakhe le-X. Wabhalela nomengameli weFifa, uMnuz Gianni Infantino, ethi engathanda ukuyobuka iBafana Bafana, wacela noma wubani ozomsiza ngoba uMcKenzie akafuni ukubakhokhela. UMcKenzie, waphendula ngokuthi uMama Joy akacele umyeni wakhe, owaziwa ngoPapa Joy ukuthi amkhokhele. “Akube wuye okhokhela isithandwa sakhe, i-Euro linamandla. Amadoda angamaFrench, aziwa ngokutotosa izithandwa zawo, myekele akhokhe Sista Joy,” kusho uMcKenzie. UMama Joy uveze ku-X ukuthi uyaya emidlalweni wabonga owayengungqongqoshe wokuThuthukiswa koMphakathi, uNksz Lindiwe Zulu nosomabhizinisi…

IDIMONI lokungalandelwa kwemigomo yokusetshenziswa kwemali yomphakathi komasipala baKwaZulu-Natal, lilokhu liqhubeke njalo. Umbiko woMcwaningi Mabhuku Jikelele, uNksz Tsakani Maluleke, uveze ukuthi omasipala abaningi basesifundazweni baphinda amaphutha afanayo okwenza ukuthi bangayitholi imibiko engenagcobho uma kubhekwa amabhuku okusetshenziswa kwemali. UNksz Maluleke wethule umbiko wakhe esiShayamthetho saKwaZulu-Natal, izolo. Bane oMasipala okuwuMhlathuze, Richmond, uMlalazi neKing Cetshwayo abathole imibiko emihle. Iningi lomasipala baKwaZulu-Natal, abangu-42, bathole imibiko eveza ukuthi abayilandeli imigomo yokuphathwa kwezimali. UNksz Maluleke uthe leli qoqo lomasipala lisaphaze u-R7.8 billion ngonyaka wezimali odlule. Le mali isetshenziswe ngaphandle kokulandela imigomo. Labo masipala ibona abaphethe ingxenye enkulu yesabelomali esitholwa omasipala baKwaZulu-Natal, njengoba bethola u-88% ku-R125.1 billion otholwa omasipala. UNksz Maluleke uveze ukuthi kuleli qoqo kukhona umkhandlu omkhulu okuyiTheku, omasipala bezifunda nomasipala abayizizinda zomnotho wesifundazwe. "Uma kuleli qoqo kukhona omasipala abakhulu ngale ndlela, lokho kukutshela ukuthi abantu abaningi…

MHLELI: Ngike ngezwa uMntwana uThulani kaGqikazi kaSolomon, uMntwana waseZibindini zamadoda, azisa isizwe ngokudlula emhlabeni koMntwana uGibizizwe kaNqudulwana kaSolomon wasoSuthu. UMageba ubesesimeni somunyu nosizi ekhipha lesi sitatimende sokuguqa kwelinye lamawundlu esizwe. UMageba ukhale nangokukhothama kwabaNtwana abaningi neziNgonyama bebancane. Angazi noma iNdlunkulu yalulungisa yalushweleza yini udaba lwesiqalekiso esisindayo seBhubesi lakwaNodwengu, liqalekisa iNkosi uCetshwayo eyayingakabusi ngomyalelo wokuthi akuyolandwa uNdlunkulu okaSigulana,uNomantuli wasemaBheleni, lona lafike lambulala phambi kwayo iNgonyama. Kwala noma esekotele emahlombe eSilo, bamthatha ngendlakadla wayobulawa. Ibhubesi lakwaNodwengu lathi: "UDlamvuzo ungiphuca umkami okunguyena obesengenzela umdokwe" lase lehlisa isiqalekiso leso. Ibutho elaliholwa uBhejane kaNomageji aligcinanga lapho, lajaha inkosazane yaseMdumezulu, uMntwana Poyiyana wakwabo kukamNtwana uMthonga waseNgudwini bobabili ababezalwa okaSigulana. Inkosazane yabulawa ngaseSangoyana esiseMahlabathini, hhayi esiKwaMthethwa. Nalokho kwaliphatha kabi kakhulu Ibhubesi lakwaNodwengu. Labeka iminyaka emihlanu ekubuseni kwenkosi uCetshwayo, nebala yathi iphela kwasuka uthuthuva lwempi…

SEKUDE ukuphela impi yokungathengwa kwezinsiza kufundisa ezikoleni zaKwaZulu-Natal, njengoba inyunyana yothisha iSadtu, ifake amaphepha eNkantolo eNkulu eMgungundlovu, ifuna kuphoqwe uMnyango wezeMfundo esifundazweni, ukuthi uthenge lezi zinsiza. Le nyunyana ifake amaphepha anesicelo esiphuthumayo sokuthi inkantolo iphoqe uMnyango ukuthi uhlinzeke izikole ngezinsiza kufundisa okuyizincwadi ne-stationery. La maphepha afakwe nguNobhala weSadtu eKZN, uNksz Nomarashiya Caluza, njengoba efuna uMnyango ukhokhele izikole imali yazo, eyaziwa ngama-norms and standards. "Othisha abangamalungu ethu bathwele kanzima ngenxa yokungafiki kwezinsiza kufundisa. Lokhu kunqinda ukufunda nokufundisa, abafundi basenkingeni yokungatholi okuyilungelo labo. Sifuna inkantolo inqume ukuthi uma uMnyango uhluleka ukuhlinzeka lezi zinsiza, uthathwe njengojivaza ilungelo labafundi," kusho amaphepha. ISadtu ifuna inkantolo iyalele uMnyango ukuthi ube usuthenge izinsiza kufundisa ezikoleni ezingakazitholi ngo-Ephreli 30, 2026. "Sifuna uMnyango ufake imali yezikole ezingazithenganga izinsiza ungakashayi u-Ephreli 30, 2026. Sifuna uMnyango kaMgcinimafa ukhokhele zonke izikole imali…