Tabla de contenidos para 2026-04-15 en Isolezwe

WENZE ezibukwayo umculi ocula owokholo oyinkakha kule ndima uBishop Benjamin Dube, ngesikhathi ecula ngokuhlanganyela neThe Zulu Kingdom Choir ePlayhouse, eThekwini. Le nkakha ebibabaza ikhono eliyisimanga leThe Zulu Kingdom Choir, bekungokokuqala inandisa ngokuhlanganyela naleli qembu elisungulwe ngo-2020, uSiphiwe Bulose wakwaNyuswa, eThekwini. Le khonsathi ebizwa ngeSongs and Hymns, ibibophele abaculi abanohlonze okubalwa kubo u-Ayanda Ntanzi, Nothando Hlophe, Sindi Ntombela nabanye. UDube ushaye amanoni akhe amadala, kwahlanya abantu ebambisene neThe Zulu Kingdom Choir, baze abantu bacela impinda. UDube ubenesikhathi sonke sokuzilolonga nale khwaya kwaNyuswa ngoLwesihlanu, okuyilapho etshele khona amalungu alo ukuthi ngendlela abenza ngayo baya kude emculweni. "Kuyangijabulisa ukuthi leli khwaya linekhono eliyisimanga kangaka. Empeleni singabaseGoli, siyaziqhenya ngekhono eliseKZN kwezomculo, lesi sifundazwe sibusisekile ngokuba nekhono kule ndima yomculo," kusho uDube.Kuhlanye izihlwele esenandisa nekhwaya ecula izingoma zakhe okubalwa ethi, Ngiyakuthanda, ayishaye abantu bavukwa wumoya.…

BAKHALA ngokugqigqela ubala emahhovisi oMnyango wezaseKhaya oLundi, abathi sekusizwa abantu abayisithupha kuphela ngosuku kulandela ukuphephuka kwamahhovisi oMnyango asesiShayamthetho esidala. Abantu basoLundi bathe kuhlula noma sebelala khona emahhovisi oMnyango kodwa kuba nzima ukuthi bathole usizo. Uphahla esiShayamthetho esidala lwaphephuka ngoFebhuwari, wangonyaka owedlule. UMnyango wezeMisebenzi yoMphakathi wanquma ukuthi akuphephile ukuthi abasebenzi baqhubeke nokusebenzela kulesi sakhiwo. Isikhulu esiphezulu eMnyangweni wezaseKhaya KwaZulu-Natal, uMnuz Cyril Mncwabe, sithe ukuphephuka kophahla kwaphoqa ukuthi basebenzele emalolini oMnyango ngenxa yokuthi uMnyango wezeMisebenzi yoMphakathi ubungakabatholeli enye indawo abazosebenzela kuyo. UMncwabe uthe ukusebenzela emalolini kuphoqe ukuthi banciphise umthamo wabantu ababasizayo. UMncwabe uthe ngosuku basiza abantu abaphakathi kuka-34 no-40 kanti phambilini bebekwazi ukusiza abantu ababalelwa ku-100. "Njengoba sisebenzela emalolini, asikwazi ukubafaka bonke abasebenzi boMnyango emalolini ngenxa yesikhala. Njengoba abasebenzi besebenzela emalolini, kufanele sibheke izinto ezifana nesimo sezulu nezindlu zangasese." UMncwabe uthe bafuna…

MHLELI: Esibhekene nakho sekwedlula ukwenza thina bantu abamnyama yize sesaphathwa wuhulumeni okuthiwa ngowethu. Singonogada abasebenza ngaphansi kwenkampani eseMariannhill eyagunyazwa wuMasipala weTheku ukuthi ihlalise abantu abakhahlanyezwa yizikhukhula zango-Ephreli 2022. Okwethu ukuba siqaphe isakhiwo sabantu abakhahlanyezwa, siqinisekise nokuphepha kwabo. Njengomthetho esanikwa wona, akekho ovumelekile ukungena ngaphakathi esakhiweni ngaphandle kwemvume. Umsebenzi wethu siwenza ngokukhulu ukuzikhandla, sivikela abantu abakhahlanyezwa yizikhukhula kepha kulezi zinyanga ezedlule kasizange sihole okusikhinyabezile kakhulu nemindeni yethu. Yize kunjalo, sisatotobela khona etohweni ngethemba lokuthi singase sibathole ontingintingi njengabo bonke abantu abatohozayo. Umqashi wethu (umphathi wesakhiwo) sihlalile naye sathola ukuthi naye ukhala esifanayo njengathi njengoba ekhala ngoMasipala weTheku osekuphele izinyanga ezine ungamholeli. Emva kokuthi silokhu simbelesela, uze wasitshengisa ezinye zezincwadi lapho encenga khona izikhulu zikamasipala ukuba zimkhokhele njengoba igama lakhe emphakathini lonakala usuku nosuku nabazali bethu bembelesela ngemibuzo nokuthi nathi sihole njengabantu…

UKUBUYA kwefomu yeKaizer Chiefs kwakamuva kwiBetway Premiership kunike isibindi omunye wamabamba omqeqeshi, uCedric Kaze, ukuthi abuyisele ngamazwi kulaba abahlekisa ngokuthi akayena umlolongi kepha ungutolika. IChiefs ehambela phezulu kulezi zinsuku kwazise isiwine imidlalo yeligi emine kulandelana, ibuyela enkundleni namuhla ngenhloso yokuzama ukunqoba owesihlanu ebhekene kuwona neMagesi FC namuhla ngo-7.30 ebusuku e-FNB Stadium, eNasrec. Kulo mdlalo iChiefs ibhekwe ukuba iqhubeke nomgqigqo wayo wakamuva okuqinisa indawo yayo kwiCaf Confederation Cup ngesizini ezayo. Ngesikhathi zingahambi kahle izinto kwiChiefs, ezinye izingxenye zabalandeli bayo bezigxeka isinqumo saleli qembu sokugcina uKaze noKhalil Ben Youssef emuva kokuhlukanisa noNasreddine Nabi nyakenye. UKaze waseBurundi noBen Youssef banikwa umsebenzi wokupheka iChiefs kuze kube sekupheleni kwesizini. Ngeshwa labo lokhu kubanjiswa umsebenzi kwaqondana nokuthi iqembu lashaywa imidlalo emine ilandelana, okwalikhalisa ngaphandle embangweni wesicoco seligi, iCAF Confederation Cup nakwiNedbank Cup. Ngenxa yentukuthelo kunezingxenye zabalandeli…

KUVELA igama likaSimo Dladla kubaqeqeshi abagaqele isikhundla sokuqeqesha kwiSekhukhune United esanda kukhomba indlela obeyinhloko yabaqeqeshi, u-Eric Tinkler. Amanye amagama avelayo elika-Ernst Middendorp noJohn Maduka. Phezu kokubuya namaphuzu agcwele kweSekhukhune emdlalweni wayo wakamuva weBetway Premiership, iguqisa iMagesi FC ngo 1-0 ngoMgqibelo kodwa lokho akumhlenganga uTinkler ekukhonjweni indlela kuleli qembu obese kuvele kunamahlebezi okuthi ubesenqunyelwe ugwayi katiki ngenxa yokwehluleka ukufeza umgomo abebekelwe wona kule sizini. UPaulus Masehe no-Andre Arendse abebengamaphini kaTinkler, yibona okulindeleke baqhubeke nokuhola inqola ngenkathi iqembu lisathungatha umqeqeshi ozovala isikhala sakhe. UTinkler ukhonjwa indlela nje, leli qembu belisanda kuqoka uWalter Steenbok kwesokuba yi-Director of Football Strategy, ejoyina uMcDonald Makubedi oyi-Sporting Director kuleli qembu. Lo mqeqeshi othathe izintambo zokuqeqesha iSekhukhune ngoMashi nyakenye, kuLehlohonolo Seema, uthathe leli qembu walibeka endaweni yesine kwi-log yePremiership. Kanti kule sizini ubebekelwe umgomo wokubeka leli qembu endaweni…

ULINDELEKE ukuthi kube nezinguquko ezinqala emdlalweni iSkeem Saam, njengoba izolo bememezele umlingisi osezakhele igama ekulingiseni, uNhlanhla Kunene, ozobonakala kuwo lo mdlalo kusuka ngo-Ephreli 20. Uzobe elingisa indawo ka-Amandla Dubazane, okungowesilisa ohloniphekile, ogqoka kahle njengoba ehlale egqoke amasudi futhi uma ehamba unokuzethemba. Ekhuluma ngale ndawo uNhlanhla, uthe u-Amandla ungowesilisa obonakala sengathi uphumelele, uphethe futhi uyabukeka, okwenza ukubukeka kwakhe kulethe isithombe esingelona iqiniso ngaye. "Ngemuva kwalawo masudi abonakala ewagqokile lona wesilisa, uyathanda ukulawula abantu futhi uyazethemba ngakho konke akwenzayo. Akanawo umsindo uma efuna kwenziwe into noma ukuzikhukhumeza, kodwa ukufika kwakhe yonke indawo lapho eya khona, abantu bayashesha ukumbona ukuthi usekhona. Kukhona lesi sithunzi nje anaso, esikwenza ulokhu umbuka uzibuza ukuthi ungubani.Nami njengomlingisi ngikujabulele ukulingisa indawo efana nale, njengoba iveza amanye amakhono enginawo omuntu engingeyena," kusho uNhlanhla. Uthe le ndawo izovula amehlo abantu…

IYAZISOLA inkabi, uMzo Ntombela, eyadubula yabulala iphoyisa loMkhandlu weTheku, uCaptain Zwelakhe Thomas Ntombela, esigamekweni esenzeka kwa-S, eMlaza, ngoMeyi 3, 2024. Kuzokhumbuleka ukuthi umufi wadutshulwa esemzini wakhe waphuthunyiswa eSiphingo Medical Towers, okuyilapho okwafike kwamenela khona. Ngemuva kwalokho, amaphoyisa athola umkhondo agcina ebophe uNtombela (Mzo), obethula ubufakazi izolo. Eseboshiwe, uNtombela (Mzo), icala lakhe alizange liqulwe ngoba walivuma, wase echakida abanye ayenabo ngesikhathi setulo. Wagwetshwa iminyaka engu-20 ngaleli cala kanti wathusa abaningi ngesikhathi edalula ukuthi kuleli tulo kwakukhona nenkosikazi kamufi, uNkk Faith Ntombela, odonsa esikadilikajele ngaleli cala, uthishanhloko waseMpumulwane Primary KwaMaphumulo, uMnuz Sithembiso Khumalo nenkabi eyesatshwayo KwaZulu-Natal kodwa evele idonsa isigwebo sikadilikajele ngelinye icala, uKhulani Cele. Ngaphambi kokuba uNtombela athule ubufakazi njengoba bekuvela uKhumalo noCele, inkantolo ibafundele amacala abo. UKhumalo uwaphikile wonke amacala okungelokuhlela ukubulala nelezibhamu kanti ungaphandle ngebheyili kwathi uCele walivuma elokuhlela…

MHLELI: Emva kokhetho lukazwelonke nolwezifundazwe olwabe lungoMeyi 2024, imiphumela yakhombisa ukuthi alikho iqembu lepolitiki eNingizimu Afrika elizokwazi ukuhola noma ukubusa uhulumeni, libe yiqembu elibusa lodwa. Ngaleyo ndlela umengameli we-ANC, nowabe engumengameli weqembu elabe lihola uhulumeni ngaphambi kokhetho, uMnuz Cyril Ramaphosa, ngokukhulu ubuhlakani obasusa ubumnyama ezweni njengoba sasizididekele sonke sidlinza ngokuqalwa phansi kokhetho, umengameli waqoka ukuhlanganisa amaqembu kwakhiwe uhulumeni wokubambisana esiwubiza ngeGovernment of National Unity, noma i-GNU, ukuze kuqhubeke umsebenzi wokuhola izwe. Ngisakhumbula ukuthi umengameli wahlanganisa amaqembu nangenhloso yokuqeda umsindo owawufufusa, amanye amaqembu engafuni ukuba yingxenye ye-GNU. Emaqenjini asala ngaphandle kwe-GNU kukhona i-ATM, Action SA, ne-EFF. I-MK Party yona ngikhumbula ukuthi yayisalokhu ibalisa ngokuphanjaniselwa imiphumela yokhetho, yasala ngaphandle kwe-GNU. Angikhumbuli ikhala ngokuba ngaphandle kwe-GNU kuzwelonke, kodwa yancamela ukuba yiqembu elikhulu eliphikisayo ngokusemthethweni. Sizokhumbula-ke ukuthi njengoba amaqembu i-Action SA ne-EFF…

MHLELI: Ngithi angibongele iNkosi yaseMacambini, uMthokozisi Mathaba, obegcagcelwa uMaZungu wasesizweni sakwaMadlebe, eMpangeni. Yize ngihlale ngingenaso isikhathi kodwa ngingakusho kugcwale umlomo ukuthi kube yizindaba ezinhle ukuthi iNkosi ithathe koGwabini, abaziwa njengamazalankosi. Konke lokhu sikubonile ngenkathi uNdlunkulu uNozinja, okaGwabini ezala uZulu oQwabe abangamadodana kaMalandela. Sibonile futhi okaMbondi kaTshana ezala iSilo uCetshwayo onguyise weSilo uDinuzulu (uMamonga). Okunye okungijabulisile ukuthi bengivamile ukubona iNkosi uKhayelihle Mathaba uma ivakashele eThekwini. Ngiyakhumbula komunye unyaka sificana eLa Lucia, eThekwini. Okunye engakuphawula ngayo ukuthi kwakuyinkosi ezehlisile futhi ingenakho ukuthi ngoba nakhu iyinkosi sekumele izikhukhumeze. Ngangibuye ngibabaze ubuhle bezwe laMacambi, elikukhanga uzihambela emgwaqeni uN2. Ngabamba ongezansi ngenkathi ngikhuluma nowayengumdidiyeli wamabutho, uMgilija Nhleko, owakubalula ukuthi ziphuma ngobuningi izinsizwa zakhona uma kunemicimbi yesizwe futhi kumele uzibambe ziqinie uma uyobhekana nazo ngoba azigayelwa mphako. Isizulu sithi uma isihlahla sithela awusiboni uma useduze, yingakho-ke…

NXUSE iqembu ukuthi lidlale ngaphandle kokwesaba emlenzeni wokuqala womqhudelwano iHSBC SVNS World Championship, umdlali weqembu lebhola lombhoxo labesifazane iSevens, uZintle Mpupha. Imbokodo izobamba iqhaza kulo mqhudelwano ozodlalelwa eHong Kong kusukela ngoLwesihlanu kuze kube yiSonto. UMpupha ungomunye wabadlali ababili abanamava ababuyile, ehambisana no-Eloise Webb, njengoba umqeqeshi uCecil Afrika kuphoqeleke ukuthi alishintshe eladlala emqhudelwaneni wokugcina weHSBC SVNS 2 eBrazil ngenxa yokulimala kwabadlali. Eqenjini elizoya eHong Kong kubizwe nabazobe beqala ukudlala kwelesizwe, uJané Mulder no-Owami Mohuli. UShanidiné Bezuidenhout noMaceala Samboya bazobe bedlala okokuqala esigabeni esiphezulu. IMbokodo izovula eqoqweni elinzima lapho izobhekana khona ne-Australia, Canada neGreat Britain kuPool B. Nokho, uMpupha ukholwa wukuthi iqembu selihlangene futhi elidlule kukhona esigabeni sesibili kuzolenza lifike selivuthiwe kulo mqhudelwano omkhulu. “Inhloso yethu kule sizini bekuwukuzibona kulo mqhudelwano. Ngeshwa kunabadlali abebengathanda ukuba yingxenye yalesi sigaba sokugcina abangeke badlale ngenxa…

KUSULE amalungu ebhodi lebhange elikhungethwe izinkinga Ithala, kungakapheli sikhathi esingakanani uhulumeni waKwaZulu-Natal, umemezele uphenyo ngezinsolo zokungaphathi kahle. Ukusula kwamalungu ebhodi leThala kumenyezelwe uNdunankulu waKwaZulu-Natal, uMnuz Thami Ntuli, izolo. UNtuli uthe amalungu ebhodi afake isicelo sokwesula emhlanganweni weThala. Akazange aziveze izizathu ezibekwe amalungu ebhodi ngesikhathi esula kanye kanye. Esitatimendeni, uNtuli uthe ukusula kwamalungu ebhodi kukhombisa ngokusobala ukuthi ziyezwakala izigi zikahulumeni wesifundazwe, osembhidlangweni wokubuyisela Ithala esimweni. "Ukusula kwamalungu ebhodi kumele kuqondwe ngokuthi izinyathelo eziqinile ezithathwa uhulumeni wesifundazwe zokudala uzinzo nokubuyisela Ithala esimweni sokuba yisikhungo sezimali esithembekile nesisebenzela futhi esithuthukisa abantu baKwaZulu-Natal." Ngeledlule, uNtuli wamemezela ukuthi bazophenya ngezinsolo zokungalandelwa kwemithetho eThala. Ngaphandle kophenyo lukahulumeni wesifundazwe, kukhona nophenyo oluqhutshwa uphiko oluphenya amacala enkohlakalo, i-Special Investigating Unit (SIU). UNtuli uthe bafuna ukuthola isisombululo. "Siyaziqonda izinselelo ezibhekene neThala, okuyizinkinga ezifana nokuphatha nokungaqikeleli imithetho yezokuphathwa kwezimali. Okwamanje…

UMA umuntu enze into enhle kumele anconywe kunganyanyalatwa kube sengathi akenzanga lutho. Baningi abantu esiphila nabo ngaphansi komthunzi welanga abahlale befuna ukuthophwa noma ukukhothanyelwa kodwa bengenzi lutho olubambekayo emphakathini abawakhele. UMnuz Ayanda Msweli, odume oKhozini FM ngokusithatha asibeke ngokwenzeka emigwaqweni eyakhele isifundazwe iKwaZulu-Natal, kumele achonywe uphaphe lwegwalagwala. Okwenziwe wuMsweli esiza umndeni woshonelwe yilungu lawo elishayiswe yimoto kuM41 ngaseGateway,eThekwini kukhombise ukukhula nokuba nothando lwabantu. Okumangazile nobekudumaza wukuthi isidumbu silandwe sekuphele amahora angu-12 sidindilize emgwaqweni obekungagcina sekudala isiphihli sengozi. Umufi kuthiwa ushayiswe yimoto washonela khona lapho ngo-7.30 ekuseni, kodwa waze walandwa ngo-7 ebusuku. Okwenzekile kuyichilo nje emaphoyiseni akhele iTheku, sithemba ukuthi ngeke kuphinde kwenzeke. Kuphelisa ithemba. Asazi ukuthi ukudicileka phansi kwesithunzi ayokwazi kanjani ukukulungisa kubantu nasemndenini oshonelwe yilungu lawo obulithanda. Ayizwakali eyokuthi okuholele ekutheni isidumbu sihlale isikhathi eside kangaka kube wukuthi amaphoyisa…

UTHOLWE esebanda emotweni elaxazwe esigangeni eduzane nomfula, omunye wabasolwa abebeyingxenye yokubanjwa kwemoto ethwala imali, eKranskop, ngoMsombuluko. Amaphoyisa athe kukholakala ukuthi umufi uzilimaze ngesikhathi elungisa iziqhumane, ebezisetshenziswa ukuqhumisa le moto. Okhulumela amaphoyisa, uColonel Robert Netshiunda, uthe le moto itholwe eduzane nomfula uThukela, uma kubhekwe ngaseNkandla izolo. Uthe imoto yemali ibanjwe ngoMsombuluko, eKranskop kanti kuthathwe isamba semali esingadalulwanga. "Onogada abathathu baphucwe izibhamu, kanti zine izimoto eziduniwe. Lezi zimoto zisetshenziswe ukwenza lobu bugebengu," usho kanje. Uthe abasolwa badubule bebhekise emaphoyiseni ngesikhathi kuqhubeka ukubanjwa kwenkunzi kwale moto. "Alikho iphoyisa elilimale ngesikhathi kubanjwa inkunzi. Amaphoyisa asezithendeni zabasolwa okukholakala ukuthi bebengu-12. “Sinxusa abangaba nolwazi ukuthi basibikele ngomkhondo ongaholela ekuboshweni kwabasola. Bangabika esiteshini samaphoyisa esisuduzane, noma babike enombolweni yamahhala ethi: 08600 10111 noma ku:MySAPS App. Kuma-video asabalele ezinkundleni zokuxhumana zokubanjwa kwale moto, omunye wabasolwa uqhumise isibhamu esibhekise…