Tabla de contenidos para 2026-04-09 en Isolezwe

KUZOGQAMA osaziwayo abangaconsi phansi kubalandeli abazobambisana ukwethula uhlelo emcimbini wezindondo waminyaka yonke ama-Metro FM Awards, azoba seNkosi Albert Luthuli International Convention Centre, eThekwini ngoMgqibelo ngo-Ephreli 25. AbeMetro FM baveze ukuthi uhlelo luzophathwa wumsakazi, uLerato Kganyago nomlingisi ongaconsi phansi uLawrence Maleka. Umcimbi uzosakazwa bukhoma kwiSABC 1. ULerato noLawrence, bazolekelelwa wumrepha uNomuzi “Moozlie” Mabena, nomethuli wezinhlelo zethelevishini uSiyabonga “Scoop” Ngwekazi, bona abazogxila kwi-Green Room, okusho ukuthi bazobe bexoxa namaciko aqokwe eminxeni ehlukene nalawo azobe esenqobe izindondo. Isolezwe lithinta uLerato, udalule ukuthi leli thuba lisho lukhulu kuyena njengoba kuzobe kungokwesibili ethula lo mncintiswano. Uthe lokhu kusho ukuthi kukhona okuhle abakubonayo kuyena ngokumethemba ngethuba elihle kangaka. “Ngicabanga ukuthi amava ami kule ndima yiwona enze ukuthi ngithole leli thuba, engicabanga ukuthi akuzukuba nzima kakhulu njengoba ngike ngasebenza futhi noLawrence phambilini." Uthe:“Sengikubheke ngabomvu ukuba yingxenye yalo…

ABALIMI bakamoba sebephumele obala bathi bafuna ukwazi ngekusasa labo enkampanini kashukela, iTongaat Hulett. Lokhu bakusho izolo njengoba bebenesiteleka ngaphandle kwamasango ale nkampani, nabanye babasebenzi abaqashisswe abasebenza ezimobeni. Bathe manje sesifikile isikhathi sokuthi batshelwe ngekusasa labo njengoba konke kumile, kungekho inqubekela phambili ngokuthengwa kwemikhiqizo yabo, okwenza bangakhiphi isivuno sikamoba, futhi kungangeni mali nabasebenzi bangaholi. Omunye wabatshali bakamoba uMnuz Derrick Mkhize, othe uqashe abantu abangu-70 enkampanini yakhe, uthe okubuhlungu wukuthi selokhu kwavela izindaba zokuthi inkampani kashukela kungenzeka ivalwe, abasebenzi bakhe sekuyizinyanga ezimbili bengatholi amaholo aphelele njengoba ingekho imali engenayo. “Lesi simo asithinti thina kuphela singabalimi bakamoba, kodwa miningi imindeni ethintekayo ngaso njengoba ithembele kithina kodwa nathi lokhu okwenzekayo sekungaphezu kwamandla ethu. Abasebenzi asazi ngempela ukuthi yini esizobatshela yona ngalesi simo ngoba nathi akukho okubambekayo esikuzwayo. Uthe “Uma inkampani ivala, konke esikusebenzele kanzima…

LAHLISA ithemba inkulumo yomqeqeshi we-Orlando Pirates, u-Abdeslam Ouaddou, ngokubonakala enkundleni ingakapheli isizini kwezinsika zaleli qembu laseSoweto, ezilimele uSihle Nduli noThapelo Xoki osekunezinyanga zingabonakali ngenxa yokuthinteka okwahlukene. Le nkulumo umqeqeshi uyethule phambi kwesithangami nabezindaba ngoLwesibili ebusuku, kulandela iwini yePirates ka 5-0 kwiLamontville Golden Arrows ngaphansi kweBetway Premiership e-Orlando Amstel Arena, eSoweto. IPirates inethuba lokubuyela esicongweni kwi-log kule mpelasonto njengoba izimbangi zayo iMamelodi Sundowns zinomdlalo weCaf Champions League ekuhambeni. Ngokwenkulumo ka-Ouaddou, mancane amathuba okuthi uNduli noXoki bafake isandla embangweni wesicoco oqhubekayo ngomdlalo weligi neRichards Bay FC kusasa ngo-7.30 ebusuku, eMhlathuze Sports Complex, eRichards Bay. Lo mqeqeshi uphawule ngoNduli noXoki kulandela umphumela omqoka emjahweni wesicoco seligi neSundowns okuyiyona eqhwakele ngamaphuzu angu-56 uma uqhathanisa nawu-54 ePirates emuva kwesibalo semidlalo esifanayo (23). Ngokusho kwakhe, bobabili uNduli noXoki babuya ekulimaleni okubucayi kodwa sebeqalile ukusebenzela enkundleni nokuhlale…

GEMUVA kokuqoqa amaphuzu angu-30 ngokunqoba imidlalo eyishumi ilandelana, umqeqeshi weMamelodi Sundowns, uMiguel Cardoso, ukubeke kwacaca ukuthi akakaneliseki njengoba esafuna amanye amaphuzu ukuqinisekisa ukuthi leli qembu liyasivikela lesi isicoco seligi yeBetway Premiership. ISundowns eyagcina ukuhlulwa ngoSepthemba, kwiligi iguqiswa yiLamontville Golden Arrows ngo 1-0, inqobe umdlalo wayo weshumi weligi kulandelana ishaya iDurban City ngo 1-0 wegoli likaKatlego Ntsabeleng ngoLwesibili, eChatsworth Stadium, eThekwini. ISundowns okuyiyona esaqhwakele kwi-log yePremiership ngamaphuzu angu-56, ukuhlula kwayo iCity kuyenze yaqhubeka nokuvula igebe lamaphuzu amabili phakathi kwayo ne-Orlando Pirates esendaweni yesibili ngamaphuzu angu-54. “Uma sifuna ukuba ngompetha beligi kusho ukuthi kufuneka selule igebe, siqhubeke nokuqoqa amaphuzu ngoba le ligi inzima,” kusho uCardoso. “Sidinga ukuqhubeka nokunqoba imidlalo. Asikho manje isikhathi samaphutha, kufanele siwine umdlalo nomdlalo.” Ngemuva kokubhaxabula iChippa United ngo 4-1 ngoLwesihlanu olwedlule, lo mqeqeshi ukubeke ngokucacile ukuthi kubalulekile ukunqoba…

ITHELEKILE eThekwini, izolo, iqembu lesizwe lebhola labesifazane, iBanyana Banyana, ukuzolungiselela imidlalo emibili yobungani elizoyidlala ne-Algeria ngesonto elizayo. Yomibili le midlalo izodlalelwa eThekwini, ezinkundleni ezisazoqinisekiswa. Owokuqala uzodlalwa ngoLwesibili, owesibili ube ngoLwesihlanu. Umqeqeshi, uDesiree Ellis, uqoke isikwati sabadlali abangu-24 azosisebenzisa kule midlalo esihlanganise abadlali abazinze kuleli nabadlala phesheya. Le midlalo iyingxenye yamalungiselelo eWomen’s Africa Cup of Nations yanonyaka ezobanjelwa eMorocco, kusukela ngoJulayi 25 kuya ku-Agasti 16. Lo mqhudelwano kwakumele udlalwe ngoMashi kuya ku-Ephreli kodwa wahlehliswa. IBanyana igcine ukudlala iphelele ngoNovemba nyakenye, inqoba iMorocco ngo 2-0 kowobungani owawubanjelwe e-Agadir, eMorocco, ngamagoli kaNonhlanhla Mthandi noNoxolo Cesane. Ngesikhathi idlala kwiCosafa Women’s Championship ngoMashi nonyaka, isebenzise isikwati ebesibunjwe ngabadlali abadlala kuleli futhi iningi labo abangenaso isipiliyoni sokudlalela iqembu lesiwe elikhulu. KwiWafcon yanonyaka iqembu lakuleli lizovula kuGroup B lapho liqhathwe khona ne-Ivory Coast, Burkina Faso neTanzania. U-Ellis…

SEBONGE bonke abalandeli bakamaskandi ngokuqhubeka bagqamise umculo kamaskandi, uSenzo "Ntencane" Zondi, okhiphe amangwevu kwi-albhamu yakhe entsha, ayikhiphe ngenyanga edlule ethi, Awuyiphumuze. Emacwecweni akule albhamu kukhona elithi Ukhethe Mina nelithi Engalobolile, angamanye adla lubi ezinkundleni zokuxhumana. Ekuqaleni kwaleli sonto uNtencane uveze ukuthi ingoma ethi Ukhethe Mina, isifinyelele ku-5 million wabantu abayidlalayo. Uthe lokhu akusho nje ukuthi ukhiphe i-albhamu eshisa izikhotha, kodwa kuyaveza ukuthi umculo kamaskandi wenza kahle kulezi zinsuku. "Njengamanje ngihlele ukuthi ngenze imicimbi lapho ngizohambela khona izikhungo zemfundo ephakeme ngiyojabulisa izitshudeni ngomculo wami. Ngizobe ngizibonga ngezingenzela kona ngomculo. Okuvelayo muva nje wukuthi izitshudeni yizona ezilalela kakhulu umculo kamaskandi njengoba usungenisile nakuzo. Lokhu kwenze ukuthi umuntu afinyelele kulezi zibalo akuzo manje," kusho uNtencane. Kule albhamu uthe akwenzile okuhlukile wukuthi abheke ukuthi abalandeli bakhe bafunani ezingomeni zakhe bese eyakusebenzisa. "Angiyishintshanga indlela engicula…

UMHLELI womcimbi Uvukile Gospel Music Festival, uPastor Mjosty useveze ukuthi konke akwenzile emcimbini obungeSonto, enkundleni yezemidlalo i-Sports and Leisure, ePort Shepstone ukwenze ngephakethe lakhe, okwenze ezinye izinto zangaba sezingeni ebelilindelekile. UMjosty ukhulume kanje kulandela ukuthi abanye abantu abebehambele umcimbi, bebhale ezinkundleni zokuxhumana ukuthi isteji nezindawo zokuhlala bekungekho ezingeni elijwayelekile lalo mcimbi. Ekhuluma neSolezwe uMjosty, uthe akazi nokuthi kumele abe nomuzwa onjani njengoba abantu sebemgxeka ngemizamo ayenzile. "Ngimemezele zisuka nje ngalo mcimbi ukuthi uxhaso asilutholanga ngakho konke besikwenza kusuka ephaketheni lethu. Abaculi, abantu abasinike isteji kanye namatende, onogada konke besikunikelelwe abantu esisebudlelwaneni obuhle kakhulu nabo, imali besingenayo. Yingakho izinto bezingekho esimeni esijwayelekile futhi ngalokho sithanda ukuxolisa kakhulu," kusho uMjosty. Uthe ukubonile ukuphawula kwabantu futhi ucela behlise umoya njengoba benza konke ukuthi umcimbi uqhubeke ube khona yize babebhekene nobunzima njengabahleli. "Mina…

GQEMEKE engeqiwa ntwala umndeni kasomabhizinisi waseMgungundlovu, uMnuz Thabiso Thabethe (37), odlule isigubhukane emhlabeni ngemuva kwengozi yesithuthuthu. Umufi ubengumphathi wenkampani yabangcwabi, iNsika Professional Funerals, enamagatsha kuzwelonke. Ubenamanye amabhizinisi ahlukene ezingxenyeni zeKwaZulu-Natal. Le nkampani yabangcwabi ubeyiphethe ngokubambisana nabafowabo. Umkakhe, uNkk Nonhlanhla Thabethe utshele Isolezwe ukuthi umyeni wakhe ulimale engozini yesithuthuthu eyenzeke emajikeni aseXobho ngoLwesibili, njengoba ebekade elibhekise khona eyogubha usuku lokuzalwa kukazakwabo abanaye ezithuthuthwini. ''Ubesendleleni eya emcimbini omkhulu wokugubha usuku olukhulu lokuzalwa komunye wabangani bakhe anaye ezithuthuthwini. Ingozi yenzeke emini esezofika ngalapho eya khona." Eqhuba uthe umfice endaweni yesigameko umufi, bamthatha bamphuthumisa esibhedlela iChrist The King, lapho okufike kwamenela khona. ''Esefikile esibhedlela ukhale kakhulu ngokoma, ngabe sengimnika amanzi washona emuva kwalokho,'' usho kanje. Uveze ukuthi bewumndeni balimele kakhulu ngokudlula kwakhe emhlabeni njengoba emchaza njengowesilisa obengumgogodla omkhulu emndenini. ''Ubewazisa futhi ewuthanda kakhulu umndeni…

KUGUQUGUQUKA kwesimo sezulu muva nje, kufanele ngabe sekusenze savuma ukuthi seligaya ngomunye umhlathi, isimo esibhekene naso siphoqa ukuthi sishintshe ukwenza ngokuhlala silungele ubunzima obulethwa yimvelo. Isimo sezulu esibi esasicabanga ukuthi siyogcina ko-Indonesia nako-India, namanye amazwe ayevama ukuhlelwa yizigameko zesimo semvelo, sesifike qathatha kwelenkaba. Esesikubonile kwenzeka eminyakeni eyedlule sibhodloza amabhuloho, abantu bemuka nemihosha nemihoshana eLamontville naseNazaretha, kufanele ngabe asisakhunjuzwa ukuthi akumele sakhe eduze kwizindawo eziyingozi ezizoholela ekutheni kugcine ngemvula yezinyembezi selidume ledlula. Abantu uzwa sebekhala ngamashwa kodwa bebe bezidonsele bona amanzi ngomsele ngoba befuna kudanselwe esabo isiginci, bengafuni ukuthobela umthetho. Kumele ubani nobani azi ukuthi izulu liyahlonishwa. Kwakunjalo nasemandulo. Esikubone ngempelasonto eMgungundlovu naseThekwini, liyidliva kuvunguza umoya onamandla lishaya namatshe, kufanele kusiphaphamise ukuthi lukhulu luyeza luyanyelela. Uma imvula izamazamisa indawo ezihlala omtakabani ezakhiwe njengezinqanawe, uyini wena owakhe eduze komfula noma endaweni eyiwa?…

OMUNYE wabagadli abambalwa ebholeni laseNingizimu Afrika abangazishaya isifuba ngokuhlohlela iKaizer Chiefs ne-Orlando Pirates amagoli ngokwahlukana, uLehlohonolo “Major” Majoro, ubonge kwiMamelodi Sundowns ngokungasithambisi isandla okuphoqe ukuthi abhukule amaqembu athathwa njengamakhulu ebholeni lakuleli. Kule sizini kwehlukile kwazise kwayisishiyagalombili adlule bekushaya lesi sikhathi iSundowns isivule inkebenkebe yegebe futhi kucaca ukuthi sekulindwe usuku lokuba yethweswe umqhele. IPirates esiphelezele iSundowns kaningi kunawo wonke amaqembu kule minyaka ikhonya ibhola laseMzansi ikhombisa izimpawu zokulwa kulokhu okufakazelwa wukuthi namanje akukaziwa ukuthi yiliphi iqembu elizogoduka nenkomishi phakathi kwabo. Ngokubona kukaMajoro oyinxusa lakwaBetway, isivinini okukhula ngaso iligi yaseMzansi sincike ezigidini ezifakwa abaxhasi kodwa nokuqinisa isandla kweSundowns kumasizini adlule kuwaphoqile amaqembu afana nePirates neChiefs ukuba ashintshe ukuqalaza kwazise akwehli kahle kubalandeli ukuba yithofi laleli qembu laseChloorkop. “Luningi futhi lusobala ushintsho olufike nabakwaBetway njengemihlomulo yabalandeli abagqoke kahle kodwa ukukhula kwebhola lakuleli kuncike…

UKUNGENA kweminye imikhakha noma ukuqale wenze izinto ezithile, kwenza ukuthi uvuleke amehlo ngento osuke ungayinakile, uze ubone kufanele ukuqhubeka nayo impilo yakho yonke. Kwaba njalo kuNksz Mashoto Mokgethi, inhloko yophiko olubhekele ukuqhakambisa ezokuvakasha ezweni, ngaphansi kwe-SA Tourism, okuwumsebenzi asewenze iminyaka eyisikhombisa. UNksz Mokgethi (45) ozalelwe e-Atteridgeville, wakhulela eHammanskraal ePitoli, udalule ukuthi manje usenamava eminyaka ewu-17 eyibambile kwezokuvakasha, okuwumsebenzi angena kuwona eqashelwe ukucwaninga nokuthola amacebo okusiza ukuthi imboni yezokuvakasha ifukuleke ezweni. “Ngiyakhumbula ukuthi ngifika eminyakeni engaphezu kuka-17 edlule, umsebenzi wami kwakuwukubheka nokucwaninga ukuthi yikuphi okungahambi kahle nokudinga ukuthi kulungiswe embonini yezokuvakasha ukuze ingafadabali, futhi ithuthuke," kusho uMokgethi. Uthe:“Nokho akuphelanga sikhathi esingakanani, ngangena ngokuphelele kule mboni ngagcina sengiyithanda impela nje ngenxa yemisebenzi ehlukene ebengithola ithuba lokuyenza e-SA Tourism njengoba sengilapho engikhona manje.” Manje uthe inhloso yakhe enkulu wukusebenzisa amava anawo kule ndima,…

UKHALE ngokuthi wayebuye abe nokuthikamezeka ekhanda ngesikhathi okwenzeka ngaso isehlakalo, umzukulu oqula elokushumpula ngesihluku ikhanda likaninakhulu, maqede waligendisa okwebhola. Ummangalelwa, uMnuz Thabo Nzimande (33), ukusho lokhu ngoLwesibili ngesikhathi evele eNkantolo eNkulu yaseThekwini. Uthweswe icala lokubulala uNkk Beatrice de Lange (80), ngoJuni 7, 2024 ekhaya labo elisePinetown, lapho okuthiwa babehlala khona. UNzimande obehlonywa imibuzo, uthe yena akasakhumbuli lutho olwenzeka oluphathelene nokufa kukaninakhulu. Utshele inkantolo ukuthi yena ngosuku lwesigameko, wayephuze amaphilisi amahlanu okulala, waphinde wabhema nensangu, ezama ukuthola ubuthongo. Udalule ukuthi ngokujwayelekile, la maphilisi ayemdaka ingakapheli imizuzu engu-15 ewaphuzile. Nokho waveza ukuthi ngosuku lwesigameko, wawaphuza ngezikhathi ezehlukene, kanti ayengasebenzi. Lokhu kuvele kwashayisana nobufakazi bangesikhathi ehleli esibhedlela sabathikamezeke ngokomqondo, iFort Napier, lapho atshela khona udokotela ukuthi insangu imenza aphaphame futhi ajabule. Umshushisi woMbuso u-Advocate Nadira Moosa, umbuze ngengxabano aba nayo noNkk De Lange…

AMAZWE alwayo, iMelika ne-Iran avumelane ngokubeka phansi izikhali okwesikhashana. La mazwe avumelene ngokumisa impi amasonto amabili ukuze kuqhubeke izingxoxo zokuqeda impi eyaqala ngenyanga edlule. Ukumiswa kwempi kumenyezelwe uMengameli waseMelika, uMnuz Donald Trump, ngoLwesibili ebusuku. UTrump unqume ukumisa impi ngenxa yokuthi i-Iran, ivume ukuvula umzila wemikhumbi, iStrait of Hormuz. I-Iran ibivimbile eStrait of Hormuz obekwenza ukuthi imikhumbi ethwele u-oyela oqhamuka emazweni aseMiddle East, ingakwazi ukudlula. UTrump ubesabise ngokuthi uzoqotha imbokodo nesisekelo e-Iran, uma iqhubeka nokuvimba eStrait of Hormuz. Ubenikeze i-Iran umnqamulajuqu wangoLwesibili ukuba ivulele imikhumbi. UTrump uveze ukuthi unxuswe abaholi basePakistan ukuba angangqongqisi ingqalasizinda kagesi i-Iran. "Ngilimisile ibutho ebese lilungele ukuphuma uma i-Iran ingavumi ukuvula eStrait of Hormuz." UTrump uthe i-Iran imnikeze amaphuzu ayishumi efuna kuvunyelwane ngawo ngaphambi kokuthi ivume ukuqeda impi. "Ngiwabukile la maphuzu, sizoxoxa ngawo." Womabili amazwe akuchaze…

MHLELI: Asazanga ukuthi ngokuthola kwethu inkululeko savotela ukuzifaka emgodini maqede sangcwatshwa siphila ngoba yonke inhlobo yenkohlakalo yavumbuka njengamakhowe emva kokuduma kwezulu. Okuvumbuka kwiKhomishini yeJaji eselathatha umhlalaphansi eNkantolo yoMthethosisekelo, uMbuyiseli Madlanga, ngendlela inkohlakalo esabalele ngayo kusafana nomdlalo wezingane zigenda. Umbuzo omkhulu usekutheni kuthiwani ngenkohlakalo esabalele kuyo yonke iminyango kahulumeni ezifundazweni eziyisishiyagalombili ngoba kubukeka sengathi kuvumbuka eyenzeka esifundazweni iGauteng kuphela, ikakhulukazi ezikhulwini ezinezikhundla eziphezulu eziphethe emahhovisi kuzwelonke? Umuntu osuke engenwe yinkohlakalo yokugwazisa, kuyena kugcina sekufana nomuntu oguliswa yisifo somdlavuza okuyisifo esibonakala sesidale omkhulu umonakalo. Osuke eqhuba inkohlakalo ugcina esephelelwa wunembeza wokuzihlupha ngokuthi akwenzayo sebeyakwazi abantu. Umphathi wamaphoyisa esifundazweni iKwaZulu-Natal, uJenene Nhlanhla Mkhwanazi, ngimfanisa nomuntu obulale inyathi maqede nabebesaba behambela ekudeni kodwa iningi lagcina seliyidikadika beyikhipha izitho kanye namantshontsho. Ake kuvele izikhohlakali ezisemandleni okuphatha kweminye iminyango kahulumeni. Akungenwe kujulwe kuyona yonke iminyango kahulumeni.…

KUNENHLANSI yethemba ngempi ebhekiswe kwi-HIV eNingizimu Afrika, njengoba sekufike umjovo ozosiza ukuvikela abangakasuleleki ngaleli gciwane. Lo mjovo, i-Lenacapavir, uzosiza ngokuvikela abangakahaqwa yigciwane ukuthi lingabe lisabangena. Abangakasuleleki bazojovwa kabili ngonyaka. UMnyango wezeMpilo umemezele ukuthi ifikile imijovo engu-37 920 ye-Lenacapavir kuleli. Okhulumela uMnyango, uMnuz Foster Mohale, uthe abantu bazojova kabili ngonyaka. "Umuntu uzojova kanye ezinyangeni eziyisithupha, aphinde ajove ezinyangeni eziyisithupha ezilandelayo ukuze angasulelekile nge-HIV. Inhloso ukwehlisa abantu abahaqwa yileli gciwane." Uthe bahlose ukuvikela izingane ezincane zamantombazane, abesifazane abasebancane kanjalo nabesilisa abalala nabanye besilisa. "Sihlose nokuvikela nabadayisa ngomzimba nabanye. Sifuna ukukucacisa ukuthi lo mjovo uzovikela abangakahaqeki, awulona ikhambi lokulapha ingculazi." Uthe maduzane bazowethula emphakathini lo mjovo kanti kulindeleke uthulwe ngumengameli wezwe. I-DA ikwamukele ukufika kwawo, yathi uzosiza kakhulu empini yeHIV kuleli. Ithe abangakahaqeki bazovikeleka ekutheni bangasuleleki ngaleli gciwane. "Elakuleli linesibalo esiphezulu sabantu abane-HIV…

NAKUBA umbango wesicoco seligi yeBetway Premiership usuphakathi kweMamelodi Sundowns ne-Orlando Pirates kodwa kubukeka kuzodingeka izikhukhula ezizohlasela eChloorkop nase-Orlando ukuze iKaizer Chiefs idunge umcimbi embangweni weligi. ISundowns esinqobe imidlalo eyishumi yePremiership ilandelana, yiyona njengamanje esazihola phambili ngamaphuzu angu-56 emidlalweni engu-23, ilandelwa yiPirates ngamaphuzu angu-54 emidlalweni elinganayo. Lokhu okusho ukuthi kule midlalo eyisikhombisa esalele la maqembu kuzocaca maduze ukuthi isicoco sePremiership siya ePitoli noma eSoweto. ISundowns enenebule iChippa United ngo 4-1 ngeledlule, yalandela ngokushaya iDurban City ngo 1-0 ngoLwesibili, kule mpelasonto izothi gozololo kweyePremiership, igxile emqhudelwaneni weChampions League. AmaSandawana azobhekisa amabombo eTunisia ukuyobhekana ne-Esperance Tunis, ngeSonto ngo-9 ebusuku, eStade Olympique Hammadi Agrebi, eRades, eTunisia. Lokhu kuzonika eZimnyama ithuba lokuvala igebe esicongweni se-log njengoba zizotholana phezulu neRichards Bay FC kusasa ngo-7.30 ebusuku, eMhlathuze Sports Complex, eRichards Bay. EZimnyama ziya kwiNatal Rich Boys nje,…

UMQEQESHI weqembu lesizwe labesifazane lekhilikithi, uMandla Mashimbyi, uzibonile izinto abadinga ukuzilungisa emidlalweni ezayo kulandela ukukhala ngaphansi ohambweni lwaseNew Zealand olusongwe ngempelasonto. AmaProteas anqotshwe yiNew Zealand ngo 4-1 ochungechungeni lweT20, aphinde ahlulwa ngo 2-1 kolwe-One Day International (ODI). Iqembu lakuleli selibheke ukulungisa amaphutha emidlalweni emihlanu elizoyidlala ne-India kusukela ngoLwesihlanu oluzayo. Le midlalo izobe iyingxenye yamalungiselelo eNdebe yoMhlaba yeT20 ezoqala ngoJuni iphele ngoJulayi, e-England naseWales. “Kufanele siqinisekise ukuthi ngisho singanqotshwa ochungechungeni kodwa lokho kungasenzi sibe yiqembu elibi. Izinto ezisasiphazamisa wukungagxili emdlalweni ngokuphelele, ikakhulukazi ezikhathini ezibucayi zomdlalo,” kusho uMashimbyi. “Yilokho okwenzeke kule midlalo ebesiyidlala eNew Zealand futhi yikhona esidinga ukukulungisa ukuze singene kwesizoyidlala ne-India sesithuthukile.” Ezinye izinto uMashimbyi akhale ngazo ukungabi namabashwibi abanele abathatha amawikhethi, nokuhluleka kwabadlali ababhethayo ukuhlanganisa isibalo esikhulu sama-run. ENew Zealand iqembu lakuleli belithembele kakhulu ku-Ayabonga Khaka ekuthatheni amawikhethi njengoba…

UMQEQESHI weLamontville Golden Arrows, uManqoba “TV” Mngqithi, ushaywe yi-Orlando Pirates ngembudlu emdlalweni weBetway Premiership wasala nezifiso zokuthi okungenani kubekhona okufundwe ngabadlali bakhe kulo mphumela ophoxayo abawuthole ngoLwesibili, e-Orlando Amstel Arena, eSoweto. I-Arrows eye emdlalweni wePirates ibalwa namaqembu asefomini, ihlangane nezimbila zithutha lapho ititinywe khona ngo 5-0 oyibuyisele kwamhlaba. Yize lo mphumela uliphoxa leli qembu likaMngqithi kodwa linethuba lokubhodlela kubakhaya balo iDurban City ezobavakashela ngoMgqibelo ngo-3 ntambama emdlalweni weligi eKing Zwelithini Stadium, eMlaza. Ubengenawo amaningi emuva komdlalo uMngqithi ngesikhathi ekhuluma nabezindaba ngaphandle kokuncoma iPirates, ukwamukela induku nesifiso sakhe ngokuthi abadlali bakhe bangagcini ngokudikibaliswa yilo mphumela kepha kumele ubakhulise ngokomqondo. “Akukho okuhambe ngendlela ebesihlele ngayo kulo mdlalo kodwa futhi lokhu kuxhumeke ekutheni iPirates kayizange isinike ngisho ithuba elincane lokukuqala lokhu ebesifisa ukukwenza,” kusho uMngqithi. “Iyakhula iPirates kodwa okusobala ngayo ukuthi liyasetshenziswa ijubane…

UMQEQESHI weDurban City, uPitso Dladla, uphumele obala watusa abadlali bakhe ababili basemuva maphakathi nendawo, uMfanafuthi Mkhize noSiphamandla Ncanana, akholwa wukuthi basezingeni elifanayo nalabo abayibambe eqenjini lesizwe iBafana Bafana. UDladla ukusho lokhu ngemuva komdlalo wezakhe weBetway Premiership eziguqiswe kuwo ngo 1-0 yiMamelodi Sundowns ngoLwesibili eChatsworth Stadium, eThekwini. Phezu kokwehlulwa kweCity kulo mdlalo, kodwa uNcanana ongukaputeni waleli qembu ushaye into ecokeme odongeni lwasemuva waqokwa njengomdlali ovelele - Man of the Match. Nokho, uMkhize odlala ngokuzwana noNcanana odongeni lwasemuva maphakathi nendawo, akadlalanga kowangoLwesibili neSundonws ngenxa yokulimala ngoMgqibelo bedlala neCasric Stars kowandulela owamanqamu eNedbank Cup. Ukulimala kukaMkhize kuphoqe izinguquko odongeni lwasemuva lweCity, uLiam De Kock wayibamba noNcanana phakathi nendawo, uFezile Gcaba ovame ukudlala kwesokudla wayibamba kwesokunxele. “UMfanafuthi ungumdlali osezingeni eliphezulu. Empeleni, yena noNcanana bakubadlali basemuva maphakathi nendawo abasezingeni eliphezulu eNingizimu Afrika. Ngikholwa wukuthi basezingeni…