Tabla de contenidos para 2026-01-21 en Isolezwe

UQOLOTHAKAMANGO womculi we-kwaito, uThebe, ugubha iminyaka engu-30 esemculweni ngokuhlanganisa iqophamlando elizochaza konke ngempilo yakhe. UThebe uzakhele udumo ngezingoma okubalwa kuzo iGroovers Prayer, Ungawa Kum, Safety Belt nezinye. Muva nje upikwe engomeni ka-Abidoza ethi Bophilo Bo noKabza De Small noScotts Maphuma. Ekhuluma naleli phephandaba, uThebe (53) uthe ukuhlanganisa iminyaka engu-30 ecula yiyona nto enkulu aseke ayizuza. "Uhambo belunezingqinamba, kwehla kuphinde kunyukele. I-kwaito sayiqala phansi kunzima kodwa kube kuhle konke ngoba umuntu ukwazile ukukhulisa izingane waba nomndeni," kusho uThebe. Uthe ababaningi abantu abakwazi ukuhlanganisa le minyaka becula. "Okubalulekile ukuthi uhloniphe umsebenzi ungathathi kancane abalandeli. Kuthathele phezulu noma kuyinto yezokungcebeleka kodwa ihloniphe. Ngike ngibone abamanje bayatefa kakhulu. Uma uya emsebenzini usuke ungayi otshwaleni. Ukunikezwa iziphuzo akumele kube yimpoqo kodwa kusuke enhliziyweni yokuqashile ukuze ukhululeke. Ukuhamba nabantu abaningi ngeke kukubuyisele ngalutho kunalokho badonsela wena…

USHUBILE ezinkundleni zokuxhumana kugadlana inkakha yomculi wamapiano, uLindelihle "Leehleza" Sukazi nophrojusa wodumo uNhlamulo "Nota" Baloyi. Ingxabano yala maciko isuswe yi-video yezingane zasesikoleni samabanga aphansi ebezidansela ingoma yakamuva kaLeehleza noMyztro ethi Tobetsa 3.0. UNota ubize uLeehleza ngombulali wesizwe ngenxa yokuthi izinhlamvu zale ngoma zinomkhuba. Kule ngoma uLeehleza uxwayisa owesilisa ongenatwa ukuthi angatshali imbewu entombazane asuke elele nayo ngoba ngeke ayondle ngalutho ingane. "La bafana bayiyathanda le nto. La bantwana bayayifuna le nto. Nika la bafana ikhekhe labo (ngoba) balambile..." Eziphendulela uLeehleza, utshele uNota ukuthi uma efuna umculo okhuthazayo akalalele izingoma zowayengumkakhe ongumculi we-Afro soul, uGugulethu "Berita" Khumalo, maqede wamchapha ngenhlamba. ULeehleza ubuye wabhekisa kwabancoma uNota, wabathuka. ULeehleza usekujwayele ukucula izingoma ezinolimi oluqosheme nezikhuluma ngocansi. Waduma kakhulu ngengoma enezinhlamvu ezithi "Mina Ngamshov' uMbali Noma Ngabe Unamathanga Amangaka. Noma Ngabe Unezinqe Ezingaka. Noma…

I-DURBAN University of Technology (DUT) ikhiphe isexwayiso ngokuthi kukhona abangasebenzisa igama lesikhungo ukuqola izitshudeni. Lokhu kulandela ukusabalala kwemibiko yokuthi kukhona abebegwazisa abebeshaye ujenga befuna ukubhalisa ekhampasini yaseThekwini izolo. Abebelinde ukubhalisa bathe kunemali okuthiwa iyadingeka ukuze bathole izikhala. Bathe le mali kuthiwa mabangene ngaphakathi sebeyiphethe. Isikhungo sithe abenza lo mkhuba bavamise ukubheka labo bafundi okubonakalayo ukuthi luncane ulwazi abanalo mayelana nohlelo lwesikhungo lokubhalisa. Sithe siyabaxwayisa abafundi ngabantu abangabashayela izingcingo bebatshela ngezikhala ezikhona kulesi sikhungo baze badlulele babatshele ngendaba yenkokhelo. Isolezwe libuye lathola ngengwadla yohlelo olusha lwezobuchwepheshe lokubhalisa olusetshenziswayo kulesi sikhungo okuthiwa lunezinkinga. Abamele izitshudeni bathe luhamba ngonyawo lonwabu futhi luyehluleka ukulekelela ababhalisayo. Mayelana nalokhu iDUT ithe isikhungo sisungule lolu hlelo olusha lokubhalisa ngoba sikholwa wukuthi luyashesha. Sithe kuyinto elindelekile ukuthi vele kube khona ubuhixihixi njengoba kuwuhlelo olusha. Sibe sesinxusa…

ZINGANE ziyisibusiso yingakho phela o-bundle of joy bethu sibathanda kangaka futhi sifuna behlale bephephile ngaso sonke isikhathi. Ngalesi sikhathi sonyaka abanye baqala isikole okokuqala, abanye baya amabangeni angaphezulu ezikoleni ezintsha. Abafundi abaningi baqhelile ngokuhlala kunalapho befunda khona ngakho badinga izithuthi ukuze zibayise esikoleni. Kulapho-ke omalume bekhathula khona indima ebalulekile yokuthutha izingane zethu ziye esikoleni imihla namalanga. Sithembela kubona ukuthi izithandwa zethu zizofika futhi zibuye ziphephile ezikoleni. Izindaba zengozi enyantisa igazi lapho kulimale kwadlula emhlabeni izingane ebeziya esikoleni zithuse abaningi. Akekho noyedwa umzali ofisa ukuthola ucingo oluthi ingane yakhe ilimele. Kuvele kuphithane ikhanda. Ingozi eyenzeke eVaal, eGauteng, ingenze ngazibuza ukuthi yimiphi imithetho nemigomo elawula ukuthuthwa kwezingane, ngathola ukuthi cha ikhona ukuthi kayilandelwa futhi kubuye kube khona ubudedengu nokunganaki. UMthethosisekelo wethu ubeka ijoka lokuvikelwa kwezingane kuhulumeni nakubazali. Kunemithetho ekhona evikela ukuphepha…

MHLELI: Emicimbini kahulumeni bayaba khona abaholi bomdabu, noma kuyizingqungquthela zamaqembu ombusazwe ngokuhlukana kwawo. Baba khona ngoba nabo bangamalungu ezinhlangano zabo. Kodwa bagcina ngokuthula, banganikwa ithuba lokukhuluma bazwakalise usizi nenhlupheko yabantu babo, kokunye imicimbi kahulumeni isuke isize ezindaweni zabo. Manje ngisho kunemikhosi yesizwe engahlangene nezombusazwe, la okusuke kumele kube yibo abasina bededelana, kugxambukela bona osombusazwe abanye baze baxoshiswe ngeziklabhu ezithengwe ngemali yabakhokhi bentela abahlwempu. Kuleli viki, uZulu ubuthene eSandlwana ukuyogubha ukunqoba kokhokho abalwa bebhekene neNkomo kaHaga eyayihlome iyizingovolo, ifuna ukuzoqeda nya ngoZulu. Bekuyisifiso sami ukuthi kulo nyaka eSandlwana, ngaphambi kokuba kukhulume isekela Ndunankulu, uNdunankulu weSizwe neSilo saMabandla, kukhulume amakhosi amane noma amahlanu ngokwezifunda. Awakhulume emele amakhosi aseZululand, eMkhanyakude, eKing Cetshwayo, njalonjalo. Angazi-ke noma kuyomukeleka yini ukuthi nawangale koThukela amelwe ngoba amanye awo eSandlwana, ayesengakubeNgwadi. Isifiso sami bekuyileso, Mhleli. Akudedelwe amakhosi kuphela…

OMUNYE wabaqeqeshi ababambile kwiKaizer Chiefs, uCedric Kaze, akahambisani nababona sengathi leli qembu laseNaturena lisonge izandla emakethe yabadlali. Ngesikhathi amanye amaqembu eBetway Premiership eqinisa izikwati zawo kwazise isizini isingena kuvuthondaba, iChiefs ibibukeka ingazihluphi. Izolo ntambama, kuvele ukuthi isiboleke umdlali osemncane, uMxhosa Manyana, kwiCape Town City ngesivumelwano sokuthi uzodlala eNaturena kuze kuphele isizini. IMamelodi Sundowns eqhwakele kwi-log, iqinise ngoMonnapule Saleng obesemabhukwini e-Orlando Pirates, Khulumani Ndamane obedlalela i-TS Galaxy noBrayan Leon emthole eqenjini laseColombia i-Independiente Medellin. IPirates egudluzwe yiSundowns esicongweni ngokuwina kwi-Orbit College ngoMsombuluko ebusuku, nayo isiqinisile isikwati sayo ngo-Andre de Jong obedlalela iStellenbosch FC, Mpho Chabatsane noDaniel Msendami bobabili abebesemabhukwini eMarumo Gallants. Kusobala ukuthi umbango wesicoco uzoshuba phakathi kweSundowns nePirates kodwa iChiefs kayikho kude kunalama qembu. Ukuthula kwaMakhosi emakethe yabadlali kubukeka kulahlisa ithemba kubalandeli bayo. Ngesikhathi ekhuluma nabezindaba ngoMsombuluko, uKaze obanjiswe isihlalo…

BADLALI abagqame kwiTelkom Netball League yangonyaka odlule bedlalela iqembu laKwaZulu-Natal, iKingdom Stars, uThulisile Maduna noNozipho Ntshangase, bafakiwe eqenjini lesizwe elizobhekana ne-England, ochungechungeni lwemidlalo emithathu. UMaduna ukhethwe njengomdlali ovelele esigabeni sesibili kwiTNL nyakenye, uNtshangase waqokwa njengomdlali wasemuva ovelele besiza iStars ukuthi ikhushulelwe esigabeni esiphezulu. Umqeqeshi wamaProteas, uJenny van Dyk, umemezele isikwati sabadlali abangu-15 abazomela uMzansi kulo mqhudelwano owaziwa ngeSPAR Challenge ozodlalelwa eGoli, kusukela ngoMsombuluko. Iqembu belihlangene ekhempini kusukela ngoLwesihlanu, ngaphambi kokuthi uVan Dyk aqoke isikwati sokugcina. “Sisezinhlelweni zokwakha iqembu elizoqhudelana eNdebeni yoMhlaba, yilapho sibheke khona. Ngakho-ke kubalulekile kithi ukwandisa isibalo sabadlali esingakhetha kubona. Akulula neze ukukhetha isikwati ngoba bonke abadlali basuke bezimisele,” usho kanje uVan Dyk. “Ngithanda ukubonga ithimba engibambisene nalo ngokungilekelela ukuthi ngiqoke abadlali nokungeseka ngazo zonke izindlela. Ngikholwa wukuthi sikhethe abadlali abangu-15 abahamba phambili abawulungele lo mqhudelwano.” Ngesikhathi iqembu…

KWALE kancane ukuthi iqembu laseThekwini, iDurban’s Super Giants, lingene ngopotsho esigabeni somkhumulajezi kwiBetway SA20, kodwa laphikwa yizinto emdlalweni wokugcina wamaqoqo obuzocacisa ukuthi yimaphi amaqembu adlulayo. ISuper Giants isonge imidlalo yayo yamaqoqo ngoMgqibelo inqoba iPaarl Royals eThekwini, yazibeka endaweni yesine kwi-log ngamaphuzu angu-19. Nokho, igcine yehlela endaweni yesihlanu ngoMsombuluko ebusuku ngesikhathi iJoburg Super Kings iguqisa iRoyals ngama-run angu-44. Leli qembu laseGoli libe seligudluza iDSG, kwaba yilona eliqeda endaweni yesine ngamaphuzu angu-22. Ukaputeni weDSG, u-Aiden Markram obeqala ukudlalela leli qembu kule sizini, uthe kube yishwa ukuthi imidlalo yabo emithathu ibhuntshiswe yimvula, wathi kodwa nabo bazenzele phansi kweminye imidlalo. “Inhlanhla iyadingeka kodwa futhi kufanele nizakhele ngokwenu inhlanhla. Kunemidlalo emithathu esihlulwe kuyona kancane esingathi uma siyihlaziya sibone ukuthi besingayinqoba,” kusho uMarkram. “Inhlanhla niyazakhela yona ngokubamba umgqigqo, nizame ukuba sezingeni eliphezulu kuyona yonke imidlalo. Akukho…

EKUQUBUKE umsindo ngendawo entsha okuthiwa izovulwa wuDJ Bongz ngakubo KwaNdengezi, ePinetown, ngoJanuwari 31, iGwara Lifestyle. Igama lale ndawo lisuselwe emdansweni owaqhamuka nalo DJ iGwaragwara. UBongz ubebonakala nakuma-video asesabalele ezinkundleni zokuxhumana ekule ndawo, ehla enyuka. Yize abanye beyithakasela indawo kodwa kunabakhala ngokungaholelwa kwabebesebenzela indawo yokucima ukoma kaDJ Bongz eseThekwini, iThe Views Night Club. Babuza ukuthi uBongz engayivula kanjani enye indawo ekubeni esakweleta imiholo yabanye? Isolezwe libone isimemezelo sokuthi le ndawo izovulwa KwaNdengezi Shopping Centre, ngoJanuwari 31. Kulo mcimbi kuzobe kunandisa uDJ Bongz, Skillz, Goldmax, Fisherman, Inn, Captain, Sosha, Bullistic, DJ Tempo, Indaro, Lion & Melz DJs, Rama, DJ Electronic, Ringmasters, Priddy DJ, DJ Unique noDJ Bharman. Imizamo yokuthola ukuphawula kukaDJ Bongz ayiphumelelanga kwaze kwashaya isikhathi sokushicilela. Kwenzeka lokhu nje, abasebenzi baseThe Views Night Club bebesanda kukhala ngokuthi babe noKhisimusi noNcibijane…

WAYEYISIKHULU sophiko oluqaphe ukusebenza kwamaphoyisa, i-Ipid, uMnuz Robert McBride, usenemibuzo eminingi ngokungayi emngcwabeni kukaKhomishana wamaPhoyisa KwaZulu-Natal, uLieutenant General Nhlanhla Mkhwanazi, emngcwabeni womphenyi we-Ipid owayengumngani wakhe. UMcBride uthe namanje usazibuza ukuthi kungani uMkhwanazi engazange aye emngcwabeni kaMnuz Mandlakayise Mahlangu, owabulawa ngo-2020? Ukusho lokhu ngesikhathi evele phambi kwekomiti lasePhalamende eliphenya izinsolo ezenziwa uMkhwanazi. UMcBride uthe uMahlangu wayengumngani omkhulu kaMkhwanazi, wabulawa ngesikhathi ephenya izinsolo zenkohlakalo ekuthengweni kwamavesti amaphoyisa avikela izinhlamvu nezinsolo zenkohlakalo ezazibhekiswe kowayebambe kwesikaKhomishana wamaPhoyisa, uLieutenant General Khomotso Phahlane. UMcBride uthe uMkhwanazi waba umuntu wokuqala ukufika lapho okwadutshulelwa khona uMahlangu. "Okuxakayo ukuthi uMkhwanazi wayengeyena umphenyi ngaleso sikhathi, wayesebenza ophikweni lokuqashwa kwabantu khona emaphoyiseni. Okungithusayo ke ukuthi uMkhwanazi akazange aye emngcwabeni. Kungani engayanga emngcwabeni womuntu owumngani wakhe?" UMcBride uvele wangena ezintangeni ngesikhathi amalungu ekomiti embuza ukuthi ngabe uzama ukuveza ukuthi uMkhwanazi waba nesandla…

UHLELA ukulivuma ngaphansi kwemibandela ethize icala owesilisa owayeyimenenja kwenye yama-call centre eMhlanga, eThekwini, osolwa ngokubulala ngesihluku owesifazane okusolwa ukuthi wayenobudlelwane obufihliwe naye. Lokhu kuhlaluke eNkantolo eNkulu yaseThekwini izolo ngesikhathi kuvela ummangalelwa uMnuz Mfanafuthi Kunene (38). UKunene usolwa ngokubulala uNksz Ayabonga Mjilo (23), maqede wamgqiba ethuneni elingashoni emva kwendlu yakubo eMaotana, eNanda, ngoKhisimusi ngo-2024. Ngalesi sigameko uKunene ubekwe icala lokubulala nelokuthumba. Izolo bekulindeleke ukuthi kuqale ukuqulwa kwecala nokho kwavela ukuthi abameli bakammangalelwa baxoxa nabashushisi boMbuso ngenhloso yokulivuma icala. Umthombo okukhulunywe nawo uveze ukuthi abameli bakaKunene bathi uzimisele ngokulivuma icala kodwa ufuna ukuthi liqale liguqulwe ekubeni elokubulala, libe elokubulala ngokungenhloso.…

MHLELI: Asibonge kakhulu ngemiphumela emihle etholwe ngabafundi bebanga leshumi, ikilasi lika-2025, ikakhulukazi esifundazeni sethu, iKwaZulu-Natal, esiphume phambili saqopha umlando. Ukuzimisela kothisha, abazali nabafundi kuthele izithelo ezinhle. Sezadlula izinsuku lapho iphepha lalibhala ngamagama amakhulu lithi Kubhujiwe eKZN ebangeni leshumi. Sengathi bangaqhubeka benze okuhle yize zikhona izingqinamba ababhekana nazo. Lokhu kusebenza kothisha ngokuzimisela kungikhumbuza incwadi kaNhlumayo noMhlongo ethi Umhlahlandlela Wamathwasa eyayikubeka kucace ukuthi uma uzoqala kule ndima yobuthishela kufanele ube ngumuntu obizelwe kubo. Akufanele ube umuntu obheke inzuzo ofisa ukuyihlomula. Lokhu kufakazelwa ukuzikhandla kwabo besebenza ngezimpelasonto - bengena ekuseni bephuma kuhwalele - kungekho lutho abazokuthola. Kubafundi sibonga kakhulu ngokuzimisela kwabo yize bebebhekene nezimo ezinzima kwaba neCovid19, izikhukhula nezibhelu zikaJulayi 2021, okwabaphazamisa kodwa bakushaya indiva baphikelela phambili. Okuhle kakhulu ukuthi izikole eziphume phambili yilezi zasemakhaya, okuqinisekisa ukuthi nalapho kungenaqhude khona kuyasa. Sibafisela…

UFONGQE isigqoko waxolisa omunye wabethuli bohlelo lweYouTube, iPiano Pulse, "ngokugxeka" umculi wamapiano uThatohatsi ngomzimba wakhe. USfiso uxolise esiqeshini sakamuva sePiano Pulse, eyingxenye yesiteshi sikaMacG kwiYouTube. Ngesonto eledlule uThatohatsi, ongumculi wamapiano, ufake ividiyo ezinkundleni zokuxhumana ebukeka engaphathekile kahle. Kuyona bekuzwakala amaphimbo kaNota noSfiso bekhulma kwiPiano Pulse, eyingxenye yesiteshi sikaMacG kwiYouTube. Kuzwakala uNota ethi uThatohatsi akanawo umzimba omuhle. Uncoma okaZee Nxumalo. "UThatohatsi ngingamthatha ngimvalele ngimphuzise amafutha usuku lonke ngeke aze akhuluphale. Unjalo nje," kusho uSfiso. Esiqeshini sakamuva uSfiso uthe ukhathazekile ngoThatohatsi futhi wayengaqondile ukumphatha kabi. “Akusoze kwenzeke ukuthi ngingavuka ekuseni ngikhethe ukuzwisa umuntu ofana nawe ubuhlungu. Ngikukhathalele kakhulu. Ngiyaxolisa ngeqhaza lami kulesi siqephu sevidiyo esisematheni,” kusho uSfiso. Uthe akumfanele ukuthi azizwe ngendlela azizwa ngayo ngoba ungumuntu wesifazane omuhle. “Ufana ncimishi nendodakazi yami futhi ngikuthanda ngendlela oyiyo. Ngithanda ukuxolisa kuwe. Ngithanda ukuxolisa emndenini…

UMPHATHISWA wezokuThuthukiswa koMphakathi KwaZulu-Natal olengelwe yizembe, uNksz Mbali Shinga, uzobuyela phambi kwesigcawu esiqondisa ubugwegwe namhlanje. Isigcawu sokuqondisa uNksz Shinga ubugwegwe sizoqhubeka namhlanje emva kokuguqa ngeledlule, kanti kuhlelwe ukuthi sidonse kuze kube uLwesihlanu. Akucaci ukuthi isigcawu sisazoqhubeka eThekwini yini ngenxa yokwesabela udlame. Kwasuka ingxabano ngesikhathi kuqhubeka isigcawu ngeledlule, kwaze kwasiza ukungenelela kwamaphoyisa. Amalungu eNFP achapha ngenhlamba aphinde asabisa ngokuthela uswazi umholi weqembu, uMnuz Ivan Barnes. Amalungu eqembu azwelana noNksz Shinga ayebhikisha ngaphandle kwehotela okwakubanjelwe kulo isigcawu. Umthombo osondelene nodaba, uthe indawo okuzobanjelwa kuyo isigcawu ifihliwe. "Bazama ngayo yonke indlela ukufihla ngoba besabela ukuthi kungase kuphinde esengasonto eledlule. Ngicabanga ukuthi kuzoze kuzwakale kahle kusasa (namhlanje) ukuthi sizobanjelwa kuphi isigcawu." Imizamo yokuthola ukuphawula kukaNobhala Jikelele weNFP obambile, uMnuz Sunset Xaba, ayizange iphumelele njengoba ucingo lwakhe belukhala lungabanjwa. UNksz Shinga ushushiselwa ukushaya indiva umyalelo…

KULICHILO elinuka phu uma inhlangano yebhola, iFifa, iziba ubungozi beMelika ekubeni sekusele izinyanga kuqale umqhudelwano omkhulukazi weNdebe yoMhlaba. Simanzonzo isimo ezifundeni eningi zakuleliya zwe. Uma ubheka okuqhubeka eMinneapolis, okuyidolobha eliseMinnesota, lapho uphiko olwelusa imingcele olwaziwa nge-ICE lungezwa mshini khona, kuyacaca ukuthi isivakashi singazithola sesigxavulwa ngamawashingi noma yilabo qonda abaphakwe wuMengameli Donald Trump. Nakwezinye izifunda, ikakhulu lezo eziphethwe ababusi bama-Democrats balindele noma yini ngoba umfo kaTrump udeze ezikluluza ngeso lenzondo. Iqiniso lithi ukuqina kwesandla kubantu abanukwa ngokuthi ababona abokudabuka eMelika kukwelinye izinga eMelika. Lokhu kuze kweqele nakuzo izakhamizi zezwe ezinakho konke okufanele kodwa eziphathiswa okwemilutha eyingaza ezitaladini nokumele ichaze ukuthi yenzani lapho. Kuyamangaza ukuba madolonzima kweFifa kulolu daba ekubeni iMelika ilindele ukwemukela izivakashi ezize egameni leFifa kuzokwenziwa imidlalo yokwakha ubuhlobo phakathi kwamazwe. Njengamanje iMelika isempini yokubandlulula noma ubani ongeyena owokudabuka khona.…

MHLELI: Kwelakho eliwela umfula ugcwele, ngicela ukuphawula ngendlala yemisebenzi, okuyisimo uhulumeni asephenduke wafana nesibukeli kuso ekubeni kunguye ohlale ethembisa ukulungisa umnotho wezwe. Lihlabe lephukela kubantu abamnyama uma bejikelwa wumholi oyisethenjwa esingaka enhlanganweni esibuse izwe iminyaka engu-30. Lapha ngikhuluma ngenhlamba uMnuz Gwede Mantashe achaphe ngayo abantu bakuleli, ikakhulu intsha, ebabiza ngamavila ahlale elindele ukukhangezwa imisebenzi. Ngemuva kokuzwa lo mbono kababa uMantashe asezama ukuwuphika manje, ngisale ngidangele ngoba sengavota kwaze kwafutha iminwe ngivotela iqembu elalikhombise ukuba nohlelo olungatakula umuntu omnyama enhluphekweni, i-ANC. Namuhla isisijikela ibiza izingane zethu ngamavila angafuni kwenza lutho nangafuni ukucabanga. Ngikholelwa ekutheni lowo umlayezo oqinile okumele siwukhumbule noma sesiya evotini. Ngaso njalo lesi sikhathi asho ngaso lokhu uMantashe, kunabantu abangaphezulu kuka-200 okulindeleke ukuba balahlekelwe yimisebenzi embonini kagwayi esemthethweni kuleli. Inkampani ezovalwa ekhiqiza ugwayi iseMpumalanga, kuzwakala ukuthi iyona kuphela ebisasele…

UBUHOLI bukaMasipala waseMfolozi, sebunxenxe abafundi abaphase u-matric ukuthi bafake izicelo zokuxhaswa ngemali yokubhalisa ezikhungweni zemfundo ephakeme. Lokhu kushiwo yiMeya yaseMfolozi, uMnuz Xolani Bhengu izolo, ngesikhathi enabafundi baseKhanyiselisizwe High KwaMendu, ngaphansi kwalo mkhandlu. UBhengu ubanxuse ukuthi baqhubeke nokwenza kahle njengoba lesi sikole sikwezithole u-100% ku-matric wanyakenye. UBhengu namakhansela okubalwa nemenenja kaMasipala, uMnuz Fred Mazibuko, bahambele kulesi sikole beyokwethula umkhankaso wokweseka izikole njengoba sewuqalile umshikashika wokufunda nokufundisa kulo nyaka. “Siyohlale sizeseka izikole zaseMfolozi sifake isandla lapho kudingeka khona usizo. Sihalalisela uthishanhloko, othisha nesigungu esilawula isikole ngale miphumela emihle,” usho kanje. Uthe bewumasipala imfundo ngenye yezinto abazibeke phambili. “Abaphasile abaya ezikhungweni zemfundo ephakeme, abafake izicelo zokuxhaswa ngemali yokubhalisa kulezo zikhungo. Ukubhalisa kuvalwa ngoLwesihlanu ngakho abafundi mabangapholisi maseko kodwa basheshe bazifake izicelo,” kusho uBhengu. Ubuholi bukamasipala bebuphathele lesi sikole izinsizafunda kanti uBhengu uthembise…

KAIZER Chiefs inciphise igebe lamaphuzu phakathi kwayo namaqembu aphezulu kwi-log yeBetway Premiership inyukela endaweni yesithathu ngokuguqisa iLamontville Golden Arrows emdlalweni obuse-FNB Stadium, eGoli, izolo ebusuku. Amakhosi agudluze iSekhukhune United ebihlezi endaweni yesibili kwi-log ngemuva kokushaywa kwayo ngo 1-0 yiStellenbosch FC izolo, ePeter Mokaba Stadium, ePolokwane. Igoli eliqinisekise ukuthi iChiefs ibuya nawo womathathu amaphuzu livalelwe phakathi ngu-Aden McCarthy ngesiwombe sokuqala. IChiefs ebisonge unyaka ngokudlala ngokulingana imidlalo emibili ilandelana ngaphandle kokushaya amagoli, ibidinga ukuvula unyaka ngokunqoba okuyinto eyayigcine ukuyenza ngesizini ka-2016/17, ukuze izoqhubeka nokuba semshungwini wamaqembu amane aphezulu kwi-log yePremiership. Ngakolunye uhlangothi, i-Arrows ibidinga ukubuyisa isithunzi nokuzethemba kubadlali bayo kulandela ukushaywa kwayo imidlalo emithathu ilandelana ngaphambi kowayizolo neChiefs. Womabili la maqembu eze kulo mdlalo ngaphandle kwezethenjwa zayo. IChiefs idlale ngaphandle kwenjini yasesiswini uSbongiseni “Ox” Mthethwa elimele. Indawo yakhe ethathwe nguLebohang Maboe obeyibambe…

BALUBALUBELA ukubona izinga eliphezulu lomjaho abahleli beRichards Bay Minerals Marathon webanga lika-42km abawuhlanganisa nokugubha iminyaka engu-50 kwasungulwa inkampani yezokumbiwa phansi oqanjwe ngayo. IRichards Bay Minerals Marathon ezogijinywa ngoFebhuwari 14, ingaphansi kwenkampani yezokumbiwa phansi, iRichards Bay Minerals (RBM) eseRichards Bay. Lo mjaho ohlanganisa u-21km, u-10km ne-fun run ka-5km, uqale ukugijinywa nyakenye. Usungene ohlwini lwemijaho yaKwaZulu-Natal, okuhloswe ngayo ukunika abagijimi basezingxenyeni ezahlukene zesifundazwe ithuba lokwenza izikhathi zokuzibekisela indawo emijahweni okubalwa kuyo i-Two Oceans Marathon yebanga lika-56 ogijijnywa ngo-Ephreli, neComrades Marathon yebanga lika-87km ngoJuni. Nyakenye ku-42km, umhlanganiso udliwe nguSihle Khumalo we-NRB Harriers Athletics Club ngesikhathi esingu-2:29:33, kwabesifazane kwanqoba u-Unathi Mngcwengi weHollywood Athletics Club ngesikhathi esingu-3:09:32. “Kulo nyaka sigubha iminyaka engu-50 inkampani yethu, iRichards Bay Minerals, yasungulwa kusukela ngo-1976. Ngakho isifiso sethu njengabahleli balo mjaho wukubona izinga lawo liba phezulu kunangonyaka odlule. Ngonyaka…