Tabla de contenidos para 2026-01-19 en Isolezwe

FUNA ukungenisa nakwamanye amazwe usomahlaya uNomthandazo “Nonto R” Rubushe ozogubha iminyaka ewu-10 ekulo mkhakha ngendumezulu yomcimbi eThekwini, iComedy Meets Gospel: A Decade of Laughter, ngenyanga ezayo. UNonto R odabuka eMandeni, uthe amahlaya yiyonanto ayithandayo nokuwumsebenzi asehlale isikhathi eside kuwo. “Bengingahlali isikhathi eside emsebenzini. Bekuba yiminyaka emine noma emibili, komunye kwaba yinyanga eyodwa. Emahlayeni kodwa sengihlale iminyaka ewu-10 ngoba ngithole into engiyithandayo,” kusho uNonto R. Uthe uke wenza umsebenzi wokuphaqula abantu kwesinye sezitolo wagcina eseculela amakhasimende ngoba uwumuntu okhonze ezobuciko. Uthe usebenze nasenkampaninini edayisa umshwalense wahlala naseGoli izinyanga ezintathu, esebenza emdlalweni womoya emsakazweni. “Noma imali yakhona yayiyinhle kodwa iGoli liyaphithizela, wonke umuntu ujaha imali kanti mina ngiyathanda nokuphola. “Ngakhetha ukubuya eThekwini, ngathola umsebenzi enkampanini eyenza oplastiki boswidi, amalayisi nokunye. Ngangihlale njalo ngithola izexwayiso ngoba ngangingayigcini imithetho ngihambe ngiyodla lapho kungadliwa khona,…

IZINSUKU ezimbili ngalesi sikhathi ngesonto eledlule izwe lonke labe lisemoyeni wokujabula. kuhalaliselwa imiphumela emihle ka-matric nxa zonke. Imiphumela yaba mihle kakhulu ifinyelela ku-88% ngokwezinga lokuphasa, okuthathwa njengobufakazi bokuthuthuka kwezemfundo kuleli. Empeleni le mpumelelo ifanele ukujatshulelwa ngoba kusho ukuthi ikhona inqubekelaphambili kubafundi futhi nemizamo kahulumeni iya ngokuya ithela izithelo ekuphuculeni isimo sezemfundo ezweni. Isinyathelo esilandelayo nokho cishe yileso esingakanakwa ngenxa yokweqiwa yinjabulo yemiphumela. Lesi sinyathelo esithi ukuphasa kahle kakusho ukuthi iyefana nempumelelo yokufinyelela emanyuvesi nakwezinye izikhungo zemfundo ephakeme. Inqwaba yalaba bafundi ngeke iwubone uMnyango walezi zikhungo. Abanye baxakwe yimali yokukhokha emanyuvesi. Abanye baphase kahle kodwa amaphuzu okubangenisa ezikhungweni awenele. Futhi kukhona nabaphase ngamalengiso kodwa imiphumela akuyona eyezifundo ezidingwa yizikhungo zemfundo ephakeme. Nokugcwala kulezi zikhungo kuyisivimbelo. Nalabo asebelungele ukuqala ukubheka amatoho, kumnyama ebusweni benkawu njengoba kugqoza imisebenzi. Uhulumeni uyawenza umehluko ekuletheni…

MHLELI: Ngibhala le ncwadi ngihlahle amehlo ngesenzo esingasalindelekile kulesi sikhathi esiphila kuso. Esinye sezikole zaseShowe esibizwa ngeShowe Junior Primary sicwasa ingane yami, banginika isizathu sokuthi ingane yami ingeyasemakhaya. Ngafaka isicelo ngonyaka owedlule ngenyanga ka-Okthoba, kwaphoqa ukuthi kube yimina obuyela kubona ngibona kushaya uZibandlela ugamanxa ngingatholi mpendulo, ngethemba lokuthi ingane yami izokwamukelwa khona. Angizange ngisifake esinye isicelo kwezinye izikole. Ngizishayile izingcingo, intombazane yebala elimhlophe engaphambili yangitshela ukuthi sekugcwele, ingane yami ayisitholanga isikhala. Ngabuza ukuthi isizathu sokuchithwa kwayo ukuthi ingane yami ingeyasemakhaya? Bathi yebo. Ngacela ukukhuluma lolu daba nothishanhloko, bathi angishaye ucingo ngoLwesihlanu, langomhla ka-16 Januwari 2026, ngibheke ukuthi asivulekile yini isikhala. Ngathi mina ngincamela ukufika mathupha esikoleni ngoba ocingweni bazonginika impendulo engezukungigculisa. Ngafika, basho okufanayo ukuthi ingane ihlala emakhaya futhi ayinabo abantu bakubo abafunda kulesi sikole. Ngabuza ukuthi ingane yami…

BESOLA umufi ngokuntshontshana nomkakhe umakhelwane ozinikele emaphoyiseni ngoLwesihlanu, ngelokubulala owesilisa waseCoffee Farm, KwaNdengezi, owaduka ngasekupheleni konyaka odlule. Umufi, uMnuz Kholwani Cele (34) waduka ebuya emsebenzini kwaClover, eNorthdene, eQueensburgh, ngasekupheleni kuka-Okthoba nyakenye. Kuthiwa umsolwa, ongumakhelwane, uzinikele emaphoyiseni aseMariannhill, ngoLwesihlanu, wagonyuluka ngokumbulala wase emphonsa emfuleni, uMngeni. Ngokusho kukamfowabo, uMnuz Sbonelo Cele, bashayelwe ucingo umphenyi, ebatshela ngensumansumane kamakhelwane osefike wavuma icala lokubulala uKholwani. “Kuthiwa uthe umbulalele ukuthi uthandana nomkakhe. Kuthiwa uveze nokuthi wayengeyedwa embulala, kukhona abanye besilisa ababili esibaziyo bendawo ayesizana nabo,” kusho uCele. Uthe kubashaqisile lokhu ngoba umsolwa ungumuntu ongubaba ebebezwana naye njengomakhelwane. “Ubefika ekhaya axoxe nathi sonke, ngisho naye uKholwani, bebejwayelene nje impela,” usho kanje. Ushaye amakhala ngezinsolo zikamsolwa, wathi akakholwa ukuthi ziyiqiniso. “Ubafo ubewumuntu ongenazimfihlo. Ubesixoxela singabafowabo ngempilo yakhe yezothando, ngisho ngabe into iyihlazo elinjani. Asikholwa ukuthi uma ibikhona eyokuthandana…

IHHOVISI lomqondisi wezokuShushiswa koMphakathi lisidlulisele ngempumelelo isinqumo eNkantolo okuDluliswa kuyo amaCala sokuthi kudliwe u-R46 120 owawushaqwe kusomatekisi, uMnuz Sithembiso Gcaba, ongowomndeni odumile wakwaGcaba. Lesi sigameko senzeka ngemuva kokuthi amaphoyisa ayebone uGcaba enza izinto ezisolisayo nezingekho emthethweni eduze kwe-ATM egaraji likaphethroli ngoMashi 2021. Ngesikhathi amaphoyisa esemsesha, athola amakhadi angu-69 awolintshi eSocial Security Agency (Sassa), kanye nesikhwama esimnyama nemali engu-R7 640. Kwatholwa enye imali engu-R39 800 emotweni yakhe. Isiyonke imali eyashaqwa ngamaphoyisa ingu-R46 120. Ukwehluleka kukaGcaba ukuchaza ngokugculisayo mayelana namakhadi nemali kwaholela ekuboshweni kwakhe, wabekwa amacala angu-69 okukhwabanisa. Wabe esededelwa ngebheyili ka-R5 000. Uphenyo lwamaphoyisa lwathola ukuthi amakhadi ayekhiqizwe eBloemfontein, kanti kwakufanele ayiswe emahhovisi ehlukene akwaSassa KwaZulu-Natal. Ngaphezu kwalokho, kwatholakala ukuthi u-R118 000 ukhishwe kuma-ATM esifundeni saseThekwini, isikhathi esingamahora amahlanu kusetshenziswa amakhadi angu-62 kwangu-69 atholakale kuGcaba. INkantolo eNkulu yaseThekwini yathola ukuthi abezokushushiswa…

NJINI ye-Orlando Pirates, uThalente Mbatha, idalule ukuthi basenegqubu ngokushaywa kwabo emidlalweni emibili yokuqala yeBetway Premiership okuyimiphumela engcolise irekhodi elihle lomqeqeshi, u-Abdeslam Ouaddou. EZimnyama ezivale unyaka ka-2025 zisesicongweni se-log, zivule isizini ngesibhaxu ezisithole kwiSekhukhune United. Emuva kwalokho, zihlulwe yiMarumo Gallants. Bekuqala kusukela ngo-2007, ukuthi iPirates ingatholi lutho emidlalweni yayo yokuqala yeligi kusukela ngo-2007. Kusemqoka nokho ukubalula ukuthi ngesikhathi iPirates ishaywa yiSekhukhune neGallants beyenza kahle kwiMTN8 osekuwumlando ukuthi igcine iyifake ekhabetheni. Kube iyona iMTN8 eyehlise ulaka kubalandeli bePirates abase beqala ukungabaza amandla ka-Ouaddou kwazise ngaleso sikhathi isilonda sokushiywa nguJose Riverio besingakapholi. IPirates izoqala unyaka omusha ngokubhekana neSekhukhune njengoba kusasa ibuya imidlalo yeligi enkulu yaseMzansi. Lo mdlalo ongomunye webhekiwe, uzoba kusasa ngo-7.30 ebusuku ePeter Mokaba Stadium, ePolokwane. UMbatha, obekhuluma nethiba labezindaba lePirates ngesikhathi iqhubeka nokuzicijela umdlalo weSekhukhune, uveze ukuthi abakaze bakudlulise ukushaywa yiBabina…

IMOTSEPE Foundation Championship ibuyela ensimini ngemidlalo ebaluleke ngezindlela ezahlukene emaqenjini adlala kulesi sigaba, kusukela kwaphezulu kuya kwasezansi alwela ukusuka ezembeni. Kuyiwe ekhefini le-Africa Cup of Nations (Afcon) iMilford FC, iCasric Stars neKruger United, bezihola phambili kwi-log yeMotsepe Championship. Njengoba zibuyela ensimini kusukela ngoLwesithathu, kubhekwe ngabomvu ukuthi la maqembu azokwazi yini ukuqhubeka nomgqigqo. IMilford iqhwakele ngamaphuzu angu-27 emidlalweni engu-14. Yehlukaniswe ngamabili neCasric neKruger abasendaweni yesibili neyesithathu ngamaphuzu angu-25 ngokwehlukana. IMilford, eqeqeshwa uXanti Pupuma, ilahle amaphuzu emdlalweni wayo wokugcina ngaphambi kwekhefu le-Afcon iguqiswa yiMidlands Wanderers. Ngalokhu, iyeke ithuba lokuvula igebe esicongweni se-log. Inenselelo yokuvuka izithathe njengoba izovakashela i-University of Pretoria ngoMgqibelo ngo-3.30 ntambama, eTuks Stadium, ePitoli. ICasric eqede unyaka ngesivuthevuthe, idedela isimbambamba sika 4-0 kwiLeicesterford City, izovula unyaka ngowasekhaya neMidlands ngoLwesithathu ngo-3.30 ntambama, eSolomon Mahlangu Stadium, KwaMhlanga. IMidlands ebalwa namaqembu asalwa nokusuka…

UPHOQELEKE ukuthi aliyeke ibhola unozinti waseNingizimu Afrika obenephupho lokuvimbela iKaizer Chiefs, uJethren Barr, oxinwe wukugula. UBarr (30) waseThekwini, uphethe irekhodi likanozinti omncane kunabo bonke abavimbe kwiBetway Premiership njengoba avimbela iBidvest Wits enengu-17 ngesizini ka-2012/2013. Amanye amaqembu adlala kuwona eMzansi yiStellenbosch FC neMaritzburg United ngaphambi kokuwelela phesheya kwezilwandle ngo-2021, eyodlalela iPortadown. UBarr ugcine ukudlala ibhola ngesizini ka-2023/2024, egijima kwiDrogheda United yase-Ireland. Nyakenye utshele leli phephandaba ukuthi usethole ukuthi unesifo esingahle simphoqe ukuthi aliyeke ibhola, iMyalgic Encephalomyelitis/Chronic Fatigue Syndrome (ME/CFS), esidala ukukhathala komzimba okwedlulele, wathi odokotela bamyalele ukuthi angaqhubeki nebhola kodwa ubesafuna ukuza izimvo zabanye kwamanye amazwe.Ngempelasonto, uBarr ubhale ezinkundleni zokuxhumana ukuthi usewaphanyeka emgibeni amagilavu ngenxa yokuxinwa yiso lesi sifo. "Bekuwuhambo olumangalisayo kimina kulo mdlalo kodwa sesifikile isikhathi sokuphanyeka amagilavu emgibeni. Enhliziyweni yami sisheshe ngeminyaka engu-10 kodwa i-ME/CFS ayiwona umdlalo. Ngifuna ukunibonga…

MHLELI: Lukhulu luyeza luyanyelela embonini yezokuthutha eNingizimu Afrika uma abaphathi bezwe benganakile njengoba benza nje. Ezinsukwini ezedlule ngifunde udaba olubuhlungu kabi ngomshayeli wezimoto ezikhokhelwa ngebanga ezilihambayo odukile. Anginasiqiniseko sokuthi namanje akakatholakali yini. Lolu daba oluphume kulo leli phephandaba lesizwe, Isolezwe, luveze ukuthi lo mshayeli ubesebenzela eChesterville, noma udukele ngakhona, angisakhumbuli kahle. Kodwa indaba yami ayimayelana nalo mshayeli kuphela. Ngifisa nje ukuyisebenzisa njengesibonelo sokuthi uma usembonini yezokuthutha umphakathi uyozibonela. Ukuzithambisa kukahulumeni endabeni yokuvimba ubugebengu kuphendula izwe lethu umazitapele kunoma ubani olunywa ukugila imikhuba. Indaba yabashayeli balezi zimoto ibuhlungu kakhulu ngoba eqinisweni bahlale besengozini ubusuku nemini. Njengoba sebethunjwa bedunwa nezimoto nje, inkinga okuyiyona enkulu ukuthi akukho namali abayenzayo ngoba kudla zona izinkampani abazisebenzelayo ekubeni lezi zinkampani zingafaka ngisho isenti kulo msebenzi. Esingakwazi ukuthi ingakanani intela ekhokha yilezi zinkampani ezingena emnothweni wethu wezokuthutha…

MHLELI: Umbiko woMnyango kaNgqongqoshe wezokuThutha awethule ngabashone ezingozini zomgwaqo utshengise ukuthi zehlile kunezango-2024 kwezonyaka u-2025. Uma sikhuluma ngesibalo sonyaka ophelile sikhuluma ngemiphefumulo engaphezu kwenkulungwane eshiye elimagade ahlabayo, lapha asikhulumi ngezibalo sengathi zilwane zasendle. Umbuzo omkhulu esilindele impendulo kwabasiphethe nabaphasisa imithetho ePhalamende, osekutheni uzothatha ziphi izinyathelo ekuqiniseni isitilobho kwabagoxa utshwala maqede bashayele izimoto sebedakiwe? Akugcini lapho, kumele bazibuze ukuthi abashayeli ebebephikilela beshayayela bedakiwe bebebazi kamhlophe ukuthi abezokuphepha bekhankase ngezivimbamigwaqo abagcine beboshwa kuzo, kugabe akukhona yini ukuthi sebedlebeleke ngangokuthi abanandaba ngezimpilo zalabo abawuhloniphayo umthetho abagcina sebephuza umhluzi wenyama abangayidlanga? Ngijabulile ukuzwa uNgqongqoshe ephakamisa ukuthi kusungulwe umthetho wokuthi ozoshayela imoto kuzomela angabuthinti ngisho ukubuthinta kodwa lokhu. Akungagcini lapho, obanjwa eshayela ebudlonyile akuphasiswe nomthetho wenhlawulo ezomuyisa ezikhindini umshayeli, kubekwe umbandela ohambelana nenhlawulo enkulu ngangokuthi umshayeli ndini agcine edayise kwayona imoto ukuze engayi ukuyodonsa ezikhindini.…

UKUNGENA emakethe kweMamelodi Sundowns kuleli windi likaJanuwari lokuhwebelana nokubhaliswa kwabadlali, kuzibeka obala izinhloso zokuvikela isicoco seligi yeBetway Premiership nokwenza kangcono kwiCaf Champions League. Phezu kokuba leli qembu lasePitoli, belivele liqale isizini linesikwati esibanzi esinabadali abanohloze kodwa liphinde lasiqinisa ngabadlali abathathu okunguBryan Leon odabuka eColombia, Monnapule Saleng osuka kwi-Orbit College ebimboleke kwi-Orlando Pirates, nomdlali wasemuva uKhulumani Ndamane osuka kwi-TS Galaxy. Likhulule uMosa Lebusa ongumdlali wasemuva maphakathi nendawo okuyindawo edlalwa nguNdamane azoyibanga noKeanu Cupido, Grant Kekana, Malibongwe Mdletshe noMothobi Mvala. ULebusa kuvela ukuthi usezitholele ikhaya elisha kwiStellenbosch FC. Akungatshazwa ukuthi amava kaSaleng okudlala kwiChampions League, kanjalo noNdamane ongumdlali wasemuva osemncane obeseqenjini lesizwe iBafana Bafana kwi-Africa Cup of Nations (Afcon), ayadingeka kuleli qembu ngalesi sikhathi sesizini. ULeon kulindeleke engeze ebukhalini bamafolosi kuleli qembu elivele ligqishe ngoPeter Shalulile, Iqraam Rayners, Lebo Mothiba no-Arthur Sales.…

-KAIZER Chiefs inike i-Orlando Pirates intuba yokuphefumula ivulela isibhaxu kwiMamelodi Sundowns ehlezi ezithendeni zeZimnyama kwi-log yeDStv Diski Challenge. IChiefs yehlule iSundowns ngo 2-0 wamagoli kaNaledi Hlongwane noKamogelo Malefo KaNyamazane Stadium, eMpumalanga, izolo. Lo mphumela usize Amakhosi aqoqa amaphuzu kodwa awenyukanga kwi-log kwazise amaqembu angaphezu kwawo endaweni yesithathu neyesine okuyiSiwelele, Stellenbosch ayiwinile imidlalo yawo. Nokho uhlomulise iPirates esicongweni se-log kwazise uholele ekutheni ivule igebe lamaphuzu phakathi kwayo neSundowns esendaweni yesibili. EZimnyama zinamaphuzu angu-37 emuva kwemidlalo engu-15. ISundowns inangu-30 ngemuva kwemidlalo engu-15. IPirates iqoqe amaphuzu amathathu ngemuva kokuvulela isibhaxu sika 2-0 kwiMarumo Gallants KaNyamazane ngoMgqibelo. Lokhu kuholele ekutheni iSundowns ibhekane neChiefs isinengcindezi yokugcina igebe lingamaphuzu amane phakathi kwayo nePirates. Ukushosholoza kweZimnyama ngaphansi komqeqeshi uRoscoe Krieling, akubuzwa ukuthi kwenyusa ithemba kubalandeli ngokuphela kweshobolo leminyaka lokwehluleka ukuwina iligi yeDiski. Kujwayelekile ukuthi iPirates izihole phambili…

MHLELI: Miningi imigoqo eyabekelwa abantu abamnyama njengezinyoni ukuze bengabi nanqubekelaphambili Umqogo wokuqala yinkolo. Abantu ekukholweni kwabo banunuselwa ngezimfundiso ezibathembisa ngekusasa elihle elingabaholela ukungena ezulwini mhla befayo. Bazilungisela indlela eya ekhaya ezulwini kuNkulunkulu. Baningi-ke asebafudekela okholweni futhi nanamuhla basathutheleka khona. IBhayibheli (ngokukaMatewu 7:21) lithi: "Akusibona bonke abashoyo kimi ukuthi Nkosi, Nkosi, abayongena embusweni wezulu, kuphela owenza intando kaBaba osezulwini". Liphinde futhi iBhayibheli lithi (ekaJobe 2:10) "Ngokuba ogcina wonke umthetho kepha ekhubeka kowodwa, unecala kuyo yonke". Njengoba nje engabi bikho osake wabuya ezulwini nempendulo nenzuzo ekukholweni, okusho ukuthi bonke basonile phambi kukaNkulunkulu". Kungagcono amakholwa aqale ngokulungisa izwe elonakele ngaphambi kokuba akhulume ngendaba yokuya ezulwini. Lowo mvuzo sebengawuthola ezulwini ngoba phela izwe ngelikaNkulunkulu, bona bangabantwana bakaNkulunkulu. Umgoqo wesibili yimfundo okuhlale kufundekelwa ngokuthi iyisikhali sanamuhla. Sekuze kwaba nemfundo yamahhala exhase ngesikhwama se-NSFAS ukuze bonke…

LIZOPHUMA namuhla ibutho likaZulu eliyokhempa entabeni iSandlwana, eNquthu, lapho kuzokuba nomkhosi wokukhumbula ingqophamlando yempi yango-1879, lapho uZulu anqoba amaNgisi. ISilo uMisuzulu Sinqobile kaZwelithini sizokhipha ibutho elizolibangisa eSandlwana, namhlanje, oLundi. Lesi isigaba esibalulekile emalungiselelweni omkhosi njengoba kusuke kuphindwa okwenziwa yiSilo uCetshwayo ngesikhathi sikhipha ibutho elanqoba amaNgisi. UMkhosi waseSandlwana uzokuba ngoLwesine. Okhulumela iSilo, uMntwana uThulani kaGqikazi Zulu, uthe ibutho elizokhishwa yiSilo namhlanje liqhamuke esifundeni iZululand, wathi lizofike lihlangane namabutho aqhamuka kwezinye izindawo eSandlwana. "Kunzima njengamanje ukusho isibalo sebutho elizophuma kusasa (namhlanje) ngoba kukhona abazokube besuka khona eNquthu, abazofike bahlangane nebutho elizokube lisuka eZululand. Ibutho lizofike likhempe khona eSandlwana njengoba kuqhubeka imicimbi eyandulela uMkhosi waseSandlwana. Kuningi okuzokwenzeka khona eSandlwana kulo leli sonto ngaphambi kokuthi kufike umkhosi. NgoLwesithathu sizokube siseShiyane, ngoba nakhona siyazi ukuthi kunomlando okhona. Sizokube siyokhumbula loyo mlando." UMntwana uThulani uthe iSilo…

AKUBA abalandeli beKaizer Chiefs belindele ukuthi iqembu labo lingene emakethe yabadlali njengoba kwenza izimbangi zalo kwiBetway Premiership kodwa ngokwezinkulumo ezivela eNaturena, kubukeka leli qembu lingazimisele ngalokho. IChiefs izobuyela enkundleni ngokwamukela iLamontville Golden Arrows kusasa emdlalweni weligi ngo-7.30 ebusuku, e-FNB Stadium, eNasrec. Kusukela kuvuleke iwindi lokushintshana ngabadlali, i-Orlando Pirates, Mamelodi Sundowns neSekhukhune United - abangaphambili kweChiefs kwi-log - baqinisa ngapha nangapha ezikwatini zabo. Nakuba kunjalo kodwa iChiefs ingelinye lamaqembu ayiqale kahle isizini okufakazelwa wukuhlala kwayo endaweni yesine ngaphambi kwamaholidi kaKhisimusi. Amakhosi asele ngamaphuzu amane kwiPirates esesicongweni. Emidlalweni yeligi engu-13, leli qembu laseNaturena seliphumelele ukuqoqa amaphuzu angu-24. Ukusayinisa abadlali kwePirates neSundowns kwenze abalandeli beChiefs babona sengathi iqembu labo kalizimisele ngokulwela izococo kule sizini. Lokhu sekuze kwenza abalandeli beChiefs inhlekisa ezinkundleni zokuxhumana. Nokho ngokwezinkulumo ezivela eNaturena, abaphathi babona leli qembu liqine ngokwanele ukumelana…