Tabla de contenidos para 2026-01-15 en Isolezwe

UMLINGISI odlala indawo kaLikamva Mabandla kwiNimba, uTshepiso Jeme, uthi sekunemidlalo emithathu emfunayo kulandela ukushiya kule ntandokazi yakuMzansi Magic. Ukuphuma kukaTshepiso kushiye abaningi babalandeli bakhe bephatheke kabi kwazise bese bemthanda umlingiswa wakhe. Uthe uma ungekho umdlalo akuwo uchitha isikhathi nomkakhe nengane yabo kanjalo nasemfundweni. “Uma ngiba semdlalweni kusuke kunesizathu salokho. Uma ngingekho lapho kuqoshwa khona ngiyazi ukuthi uNkulunkulu kunento angibekele yona,” kusho uTshepiso. Njengoba esethintwe ngabathathu nje, uthe: “Ngiyathobeka ngokuthi abantu bawubonile umsebenzi bakubona ingifanele lena. Konke kusebenza ngesikhathi. Angisabi ngokungabi lapho kuqoshwa khona ngoba angikaze ngeswele ngomusa kaNkulunkulu.” Uthe ufuna ukubuyela esikoleni azithuthukise ikhono ukuze ithuba limfice elilungele. Indawo abeyilingisa ibikhuluma ngobudlelwano bakhe noyise uHlathi Mabandla odlalwa uSisanda Hewana. Ekhuluma ne-IOL uthe ufunde okuningi ngoHlathi. “UHlathi usifundisa ukuthi mhlawumbe kunamaphutha kwesicabanga ukuthi indoda kumele ibe yikho bese ubuka indoda efana…

UBUHOLI be-IFP buphika buma ngentaba ukuthi bathembisa umholi weNFP, uMnuz Ivan Barnes, isikhundla sobumeya kuMasipala waseZululand ngesikhathi kunezingxoxo zokubusa ngokubambisana esifundazweni iKwaZulu-Natal. Okhulumela i-IFP, uMnuz Mkhuleko Hlengwa, uthe kungamampunge ukuthi babambisa uBarnes udonga maqeda bamjikela uma sebethole isifundazwe. Ukusho lokhu ngesikhathi ekhuluma nabezindaba eThekwini, izolo. Ubuholi beNFP busanda kuthatha isinqumo sokuhoxa kuhulumeni waKwaZulu-Natal oholwa yi-IFP. Esinye sezizathu ezibekwa ubuholi beNFP ukuthi ubuholi be-IFP abuzange busigcine isithembiso sokuthi amaqembu azobambisana nakomasipala uma esebambisene esifundazweni. I-NFP yayifuna uBarnes anikezwe esobumeya eZululand. Ngaleso sikhathi yayingekho imeya kulo mkhandlu kulandela ukusula kukaMfu Thulasizwe Buthelezi, awayeseqokelwe kwesikaMphathiswa wezokuBusa ngokuBambisana neziNdaba zoMdabu. UHlengwa uvumile ukuthi abaholi beNFP bayikhuluma eyokubambisana eZululand, kodwa wathi ayikho into okwavunyelwana ngayo noma isethembiso esenziwa abaholi be-IFP. UHlengwa uthe izingxoxo zokuphathwa kukahulumeni waKwaZulu-Natal, zazingahlangene nokuphathwa komasipala. UHlengwa uthe abaholi beNFP baphinde babacela…

AQHAKAMBISA kakhulu ukuzinikela kothisha babo abafundi ababili baKwaSanti Secondary, ngasePinetown, abagile izimanga bethola no-A abangu-8 ezifundweni zabo ku-matric. Laba bafundi bathi bakholwa wukuthi othisha babo baklame indima enkulu kakhulu ekuqinisekiseni ukuthi nakanjani liyafezeka iphupho labo lokuthi bathole imiphumela encomekayo. Babethulele isigqoko othisha babo ngokusebenza ngokuzikhandla ngaso sonke isikhathi bangakhathali noma ngabe isimo sinjani. UMlondi Mthembu (17) odabuka khona KwaSanti, uthole o-A kwiMaths Literacy, isiZulu, Geography, Life Sciences, Life Orientation, English, Business Studies neConsumer Studies. Uthe kube yisibusiso esikhulu kubona ukufundiswa wuhlobo lothisha oluwuthandayo umsebenzi walo. Uthe ukusebenza nalolu hlobo lothisha bekwenza izinto zibe lula kakhulu. ''Sithanda ukubonga kakhulu kothisha bethu ngendlela abakhombise ngayo ukuthanda abafundi. Ngaphandle kwabo ngabe nathi asizange senze kahle ngale ndlela esenze ngayo. Bekusinikeza ugqozi olukhulu lokuphumelela nathi ukusebenza nothisha abakhombisayo ukuthi bafisa kangakanani ukuthi siphumelele,''…

INGEPHIKE ukuthi ukugwetshwa udilikajele kusuke kuyisijezo esikhulukazi eNingizimu Afrika, lapho owonile esuke elahlwe yicala elesabekayo futhi kuthunyelwa umyalezo kulabo abasacabanga ukwenza icala elifuze lelo. Okubuhlungu kakhulu wukuthi impilo ivele ikugwebe wona udilika ngakwezomnotho – uhlupheke le nto exakayo ube ungaphandle futhi ungonanga muntu. Lokhu kuba insizi yezinsizi uma ungowesilisa sewuhluleka ngisho ukuzinakekela wena uqobo, ngingayisayiphathi-ke eyokubhekelela abazali bakho neyokondla umndeni wakho. Lokhu ngikwazi kahle njengomunye wesilisa oseke wawudonsa udilikajele ngibe ngingaphandle, ngingadlanga nto yamuntu. Impela ngiyidonsile iminyaka ngingatohozi ndawo nesipaza sami senqaba ukungiphilisa nabasemandleni befuna ukugwazelwa ngakho konke umuntu ayekuzama. Ibuhlungu leyo mpilo, ifana nse nawo udilikajele. Lapho abaphumelelayo ubabongele mihla namalanga kuze kushe lona izwi. Abavunwa yimpilo bona uhlezi ushaya indesheni kubo, ufongqe isigqoko sibaqake ezandleni size singabonakali, uhlonipha isandla esikunika ucezu lwesinkwa, uncenga impilo kubo. Uthandaze kodwa impumelelo…

MHLELI: Ngenkathi iningi lamehlo ezakhamuzi zezwe lakithi kade ethe njo komabonakude ebuka uNgqongqoshe weMfundo eyisiSekelo, uNkz Siviwe Gwarube, ethula imiphumela yebanga leshumi, mina bengibuza iminxa mibili. Bekuyikho ukwethulwa kwemiphumela, kube ubunye, bese kuba yinhlokomo nomoya omnandi obuheleza phakathi kwezinhlanga ezehlukene ebezibuthene ndawonye zikubeke seceleni ubuhlanga nezindawo ezivela kuzo. Ngize ngafisa ukuthi ukuba lowaya moya wozwano nobunye uhlale uheleza kulo lonke izwe. Kodwa umbuzo enginawo futhi uthi ungaheleza kanjani umoya wobunye nozwano ekubeni thina siyindlu emnyama sisahluleka ukuhlalisana sisodwa? UMnuz Nelson Mandela ephuma ejele nabanye ayeboshwe nabo, bakhuthaza umoya wobunye nozwano ezinhlangeni zonke zezwe. Wathi akuthathwe izikhali ziyophoswa olwandle. Wakwenza lokho phezu kokuba amaphumalimi ambhadlisa etilongweni iminyaka. Ngisho eseba uMengameli wokuqala omnyama, wafaka uMnuz Frederick Willem de Klerk, uMnuz Roelf Meyer nabanye abamhlophe kwiKhabhinethi lakhe ukukhombisa ukuphila into ayeyikhuluma ngesizwe esiwuthingo…

UKHUNGATHEKILE umndeni wowesifazane wasoPhongolo okuthiwa ubulawe evakashele umngani wakhe abengamathe nolimi naye. Isolezwe lithole ukuthi umufi, uNksz Zabanguni Mnguni (34) ubulawe ngoMsombuluko emini kade evakashele umngani wakhe. Isihlobo sikamufi, uMnuz Zamani Mnguni sitshele Isolezwe ukuthi umufi ubesuke kubo eyovakashela umngani wakhe njengenjwayelo. Uveze ukuthi imizi yale mindeni ayiqhelelene kangako kangangoba akupheli nemizuzu emihlanu uma omunye eya komunye. Echaza uthe bathole ukuthi umufi ube nengxabano eshunqa phansi nomunye wesilisa, naye obevakashele kulo muzi. ''Kuthiwa bahilizisane kakhulu asazi kodwa ukuthi yini lena abebephikisana ngayo. Kodwa sithole ukuthi owesilisa ucikwe wukuthi umufi ubemphendula noma yikanjani kanti uzocasuka bese eyamgwaza amanxeba amathathu kubuka bonke abantu ebebekhona ngaphakathi endlini,'' usho kanjena. Uthe bona babizwe sekuthiwa mabaphuthume kumele aphuthunyiswe esibhedlela udadewabo, ngeshwa bafike esethule. ''Mhlawumbe ubezosinda kodwa inkinga kusuke kwaba wukuthi ubemgwaze endaweni embi kakhulu njengoba…

AKUBA kukhona abanganeme ngesinqumo se-Orlando Pirates sokudayisa uMbekezeli “TLB” Mbokazi eqenjini lase-United States of America (USA) kodwa bukhona ubufakazi obuphathekayo bokuthi iMajor Soccer League (MLS) ingaba yisitebhisi kulo mdlali waseHluhluwe. Ngaphambi kokusongwa konyaka odlule, iPirates imemezele ukuthi isivumelene neChicago Fire FC mayelana nokudayiselana uMbokazi obesadlale izinyanga ezimbalwa esikimini sayo esikhulu. Sekuwumlando ukuthi leli qembu lase-USA liphinde lathatha uPuso Dithejane weTS Galaxy. Esikhundleni senhlokomo ngokuthola amadlelo aluhlaza kukaMbokazi, kukhona abezwakalise ukungenami ngenxa yezinga leligi ayodlala kuyona. Omunye wabaphumele obala ngumqeqeshi weBafana Bafana, uHugo Broos, okholwa wukuthi iPirates bekumele ilinde amaqembu avela kumaligi ahlonishwayo emhlabeni. “Yini eyokwenziwa nguMbokazi kwi-MLS ngaphandle kokuthi imenenja yakhe ecabanga ukuthi yazi ibhola imphonse kuleli qembu elingabalwa ngisho kwamakhulu?” kusho uBroos ekuqaleni kukaDisemba. “Okusobala wukuthi imenenja yakhe ibone imali ezoza kuyona yakhohlwa ngekusasa nokukhula kukaMbokazi. Akulona iqembu elifanele…

ASEMANCANE amathemba okuthi iDurban’s Super Giants isengadlulela esigabeni somkhumulajezi kwiBetway SA20 ngemuva kokuthelwa othulini yiPaarl Royals ngoLwesibili ebusuku. ISuper Giants inqotshwe ngamawikhethi ayisithupha eBoland Park, ePaarl, okusho ukuthi isizothembela kwamanye amaqembu ukuze idlulele esigabeni esilandelayo. Leli qembu eliphekwa nguLance Klusener, lisendaweni yesihlanu kwi-log ngamaphuzu angu-14 emidlalweni eyisishiyagalolunye. Lidinga ukunqoba umdlalo walo wokugcina neRoyals ozoqala ngo-1 emini eKingsmead Stadium, eThekwini, ngoMgqibelo, kodwa lowo mdlalo ungafika sekubhedile uma eminye imiphumela yemidlalo yanamuhla neyakusasa ingalivunanga. UKlusener uthe zincane izinto eziphazamise iqembu lakhe kulo mqhudelwano, okuhlanganisa nemvula ebhuntshise imidlalo emithathu obekufanele liyidlale neMI Cape Town, Pretoria Capitals neSunrisers Eastern Cape. “Senze amaphutha amancane kodwa kuleli zinga yilawo maphutha aholela ekutheni nilahlekelwe yimidlalo,” kusho uKlusener. "Kunemidlalo emithathu esingakwazanga ukuyidlala. Kusilimazile lokho kodwa futhi asifuni ukubeka izaba. Besingenza kangcono emidlalweni esiyidlalile." UKlusener uncome u-Aiden Markram, oshaye…

LUHLALE obala uqhekeko eqenjini elingababeki benkosi kuhulumeni waKwaZulu-Natal, iNFP, amalungu eqembu angahambisani nesinqumo sokuhoxa kuhulumeni echapha ngenhlamba ephinde futhi efuna ukubamba ngezandla umholi weqembu, uMnuz Ivan Barnes. Lokhu kuhambisane nokuthi abanye abaholi beNFP baphumele obala batshela abezindaba ukuthi abahambisani nesinqumo sokuhoxa kuhulumeni wesifundazwe. Bucishe bachitheka bugayiwe eThekwini, izolo, kusuka isixakaxaka phakathi kwabaholi beqembu namalungu alo abezokweseka uMphathiswa wezokuThuthukiswa koMphakathi KwaZulu-Natal, uNksz Mbali Shinga, obizelwe phambi kwesigcawu sokuqondisa ubugwegwe. Kulanyulwe kukubi amalungu eqembu egibela uBarnes ngezinhlamba, emthembisa noswazi. Abeseka uNksz Shinga bebebambe umbhikisho eThekwini, ngaphandle kwalapho obekubanjelwe khona isigcawu sokuqondisa ubugwegwe. La malungu abecula izingoma ezithi awayifuni iMKP. Amalungu athe awasabuthembi ubuholi bukaBarnes. Ubuholi beNFP kuzwelonke bufuna iqembu libambisane neMKP kuhulumeni waKwaZulu-Natal. Emva kwesixakaxaka, kube sekulandela isithangami nabezindaba ebesibizwe abaholi beqembu abangahambisani nesinqumo sokuhoxa kuhulumeni wesifundazwe. Obehola isithangami uSihlalo weNFP kuzwelonke,…

UNGQONGQOSHE weMfundo ePhakeme, uMnuz Buti Manamela, usenxuse abangazitholi izikhala zokufunda emanyuvesi ukuthi babheke kwezinye izikhungo kunokuthi bamane balahle ithemba badube nokufunda. UManamela ubagqugquzele ukuthi babheke nasemakolishi amakhono amaTVET nama-Community Education and Training Colleges, kuma-bridging course kanjalo nakuma-learnerships. "Ngeke zanele izikhala zokufunda emanyuvesi ngenxa yokuthi baningi abaphase u-matric. Yingakho sithi abangathathwanga abangalilahli ithemba kodwa babheke nakwezinye izinhlelo," usho kanje. Usho lokhu nje, ngesikhathi kuhleli iPhalamende ngoLwesibili ebusuku, ilungu le-EFF uMnuz Sihle Lonzi, libuze uManamela ukuthi izikhungo zizokwazi ukwamukela bonke abafuna izikhala. "Bebebhiyoza abaqede u-matric bejabulela ukuphasa bethi bayoqhuba izifundo zabo. Kungaba yihlazo ukuthi bagcine bonke bengasathathwa ezikhungweni zemfundo ngoba lokho kuyosho ukuthi bekuyizeleze ukujabula kwabo. Ngabe bazokwamukelwa bonke yini abaphase u-matric njengoba ababalelwa ku-130 000 bengeke babe nendawo yokufunda?" UManamela uthe noma bethanda ukubamukela bonke kodwa ngeke kwenzeke. Unxuse labo abafuna…

KUHLE ukuba inxeba likhonjwe uNdunankulu wesifundazwe KwaZulu-Natal ngoba sikholelwa ekutheni, njengomunye wabaholi abagunyazwe wuMthethosisekelo ukuba benze imizamo yokuhlangabezana nezinselelo zomphakathi, uzolibangula leli va elihlabe ezemfundo. Ephawula emcimbini obuseNkosi Albert Luthuli ICC, eThekwini, ngoLwesibili, uNdunankulu uMnuz Thami Ntuli, ukhale ngokubugebengu obumise kabi izikhungo zemfundo, ikakhulu izikole. Kulo mcimbi isifundazwe besiklomelisa abafundi abenze kahle ekuhlolweni kuka-matric ka-2025 KwaZulu-Natal. Uzwakalise ukukhathazeka kakhulu mayelana nokuphepha ezikoleni, wathi lesi simo sithikameza imfundo. Njengobaba wesifundazwe, le nkulumo ibe ngefanele impela ukuba iphume kuMphemba ngoba nomsebenzi wokubhekela ezokuphepha esifundazweni usehhovisi lakhe Ngalesi sizathu sikholelwa ekutheni uNdunankulu uzokubeka emahlombe akhe ukuthi le nkinga yeminyaka kubhekwana nayo ngqo ukuze abafundi nothisha benze umsebenzi wabo ngokukhululeka. Ukhulume ngohlelo lokufakwa kwamakhamera ezakhiweni zezikole ukuqapha isimo kodwa cishe kuzodingeka okungaphezulu kwalokhu esingabala kukho nokubuyisa imiphakathi ukuba ikwazi ukuba yiso ezintweni eziwusizo…

MHLELI: Bengicela ukubuyisa uzakwethu okholelwa ngukuthi uShembe angasakhela izitolo nezinkampani, ngokuthi kuyiphupho lakhe nje elingasoze lafezeka okanye elingafezeka ngenye indlela. UShembe akathunywanga nguNkulunkulu umsebenzi wokwakha izitolo kanye nezinkampani ukuze izinkumbi zamaNazaretha zithole amathuba emisebenzi. UNkulunkulu wathumela uShembe emhlabeni ukuzokwenza lokhu okulandelayo phakathi kokunye; ukuzodambisa izinhliziyo ezigaya izibozi zabanye abantu, nalabo bantu ababelwa izimpi bevukelwa ngamaqunga, uShembe abayekise ukuphatha amahawu nemikhonto okuyizikhali zokulwa izimpi, abaphathise amahawu nezimboko kokudumisa uNkulunkulu. UShembe wehliselwa emhlabeni ukuzoqhuba ngevangeli lapho kwakugcine khona iSilo samaZulu, iLembe, umsebenzi wokubumba isizwe samaZulu. Lesi sizwe, uShembe usibumba ngevangeli likaNkulunkulu. Akanaso isikhathi sokwakha izinkampani nezitolo. UShembe wehlela emhlabeni ukuzokhombisa abantu indlela eqonda kuNkulunkulu nokuyindlela ethatha imiphefumulo yalabo asebedlulile emhlabeni ibafake emzini oyingcwele okhazimulayo wasezulwini. UShembe wehlela emhlabeni ukuzokwamukela izicelo zalabo asebadlula emhlabeni kodwa abayimihambima. Ngokucelelwa yizihlobo zabo abafikela kuzo ukuze bacelelwe…

UVUKE amanxeba abevele engakapholi emindenini yabafundi abashona engozini yemoto befunda u-matric nyakenye, kungena imiyalezo yezikhungo zemfundo ephakeme, zibabiza ukuthi beze nganeno. Kule ngozi okuthiwa yenzeka ngaseYMCA eMgungundlovu, maphakathi nonyaka odlule, kwashona uSphelele Mbanjwa (19) wase-Oribi nabanye abafundi ababili. Ngesikhathi sengozi uSphelele wayefunda u-matric esikoleni i-Alexandra Secondary. Kuthiwa babehamba ngemoto yowesilisa wendawo, beyohlangabeza omunye wabafi owayephuma kwi-matric dance. Udadewabo kaSphelele ongomunye wabafundi abashona, uNksz Gugu Khumalo uthe siqale phansi sabhibha isilonda sokudlula kwakhe emhlabeni ngokuzuma emndenini, kungena imiyalezo yamanyuvesi. “Kungene imiyalezo ivela emanyuvesi ehlukene lapho ayefake khona izicelo, ithi uzitholile izikhala, akeze namaphepha akhe. “Lokhu kuqale phansi kwasikhalisa, sicabanga ukuthi nathi ngabe siyabhiyoza njengeminye imindeni,” kusho uNksz Khumalo, othe isimo sibi kakhulu kunina kamufi. Uthe nakuba adlula maphakathi nonyaka, bona nesikole abangabazi ukuthi wayezokwenza kahle emiphumeleni yakhe ka-matric ukube lelo thuba…

NDUKU entsha ye-Orlando Pirates, u-Andre De Jong, ihehwe yithuba lokuba semlandweni wokubalwa nabadlali abazosiza leli qembu laseSoweto, liqede indlala yeminyaka yesicoco seligi yeBetway Premiership. Lo mdlali waseNew Zealand oneminyaka engu-29 ubudala okwazi ukuvala isikhala eziningi enkundleni, umenyezelwe yiPirates njengomunye eqinise ngabo esuka kwiStellenbosch ahlale kuyona amasizini amathathu. Kusukela kuqale isizini, kunomuzwa wokuthi kulokhu iPirates inethuba lokugudluza iMamelodi Sundowns esicongweni sebhola laseNingizimu Afrika esihlale kusona iminyaka. Leli qembu laseChloorkop seliwine isicoco seligi yePremiership amahlandla ayisishiyagalombili kulandelana. Indlela iPirates esayinise ngayo abadlali ngaphambi kokuqala kwesizini namanje njengoba kuvuleke iwindi lokushintshana ngabo, ikhomba ukuthi leli qembu laseSoweto likhathele wukuphelezela iSundowns embangweni wesicoco. Kubadlali iPirates eqinise ngabo kukhona uDe Jong okubeke kwacaca ukuthi ithuba layo (iPirates) lokudla isicoco seligi kulokhu lingenye yezinto ezimenze wayiqoma. “Akekho ongawazi umlando wePirates wezinkomishi ngakho-ke isinqumo sami sokuyijoyina besingenzima…

UKUNGENA shi emakethe ngewindi likaJanuwari kwamaqembu asembangweni weligi, i-Orlando Pirates neMamelodi Sundowns, akubuzwa ukuthi sekudale isasasa kubalandeli asebemagange ngokubuya kwemidlalo yeBetway Premiership ezoqala ngesonto elizayo. Womabili la maqembu azoba nemidlalo emqoka yePremiership emasontweni amahlanu azayo njengoba kuzophela ikhefu le-Africa Cup of Nations (Afcon). IPirates izihola phambili kwi-log yePremiership ngamaphuzu angu-28 emidlalweni engu-12, Ilandelwa yiSundowns endaweni yesibili ngawu-26 emidlalweni engu-13. ISundowns ilandelwa eduze yiSekhukhune United esendaweni yesithathu ngamaphuzu angu-25 emidlalweni engu-13. ISundowns isanda kusayinisa abadlali abane okubalwa kubona uMonnapule Saleng osuka kwiPirates, uBrayan Leon osuka kwi-Independiete Medellin yaseColombia noKhulumani Ndamane osuka kwi-TS Galaxy. IPirates yona isanda kusayinisa u-Andre de Jong osuka kwiStellenbosch FC, uDaniel Msendami noMpho Chabatsane abasuka kwiMarumo Gallants. AmaSandawana azovula unyaka ngokudlala ne-Orbit College ngoMsombuluko ngo-7.30 ebusuku eLucas Moripe Stadium, e-Atteridgeville. EZimnyama zizovula neSekhukhune ngoJanuwari 24 ePeter Mokaba…

IVULWE ngebatha ezinye zezikole KwaZulu-Natal izolo njengoba uMnyango wezeMfundo ungayifakanga imali yama-norms and standards, kushoda othisha kwezinye izikole, kanti nabaphakela izikole basakweletwa imali yangonyaka odlule. Abaphakela izikole kuthiwa kudingeke ukuthi baye komashonisa bayoboleka imali ukuze bakwazi ukuthenga ukudla abazokuyisa ezikoleni. Ezinye zezikole yima bezithola i-stationery kulezo ezithengelwa nguhulumeni lezi zinsiza ngenxa yokuthi umnyango waphuza ukusithenga nyakenye. Ezinye zezikole ezaphephuka nyakenye, okubalwa eziseMgungundlovu, kuthiwa azikalungiswa ngenxa yokuthi imali ayikho. Okhulumela i-DA kwezemfundo esifundazweni, uMnuz Sakhile Mngadi, ukhale ngokuthi izikole zivulwe ngaphandle kwemali efakwa ngumnyango eyaziwa ngama-norms and standards. Uthe ne-stationery asifikile kwezinye zezikole ngoba ezinye izikole ziyazithengela, kanti nalezo ezithengelwa nguhulumeni, akuzona zonke ezisasitholile. "Umnyango uhluleke wukukhokhela abaphakela izikole. Siyakuchitha ukuthi izinkinga zomnyango zenziwa wukuthi uMnyango kaMgcinimafa, uhlulekile ukufaka imali. Le nkinga eyeminyaka emnyangweni wezemfundo njengoba ubuwenza izinkontileka ekubeni imali ingekho,…

OBENGUKHOMISHANA wamaPhoyisa kuzwelonke, uGeneral Khomotso Phahlane ukuphikile ukuthi waxoshwa ngenxa yenkohlakalo. Utshele iKomiti lasePhalamende ukuthi ukumiswa kwakhe wuMnuz Fikile Mbalula owayengungqongqoshe wamaphoyisa ngaleso sikhathi kwakungafanele futhi kungenasizathu esiphathekayo. UPhahlane usho lokhu izolo ethula ubufakazi phambi kwaleli komiti eliphenya ngezinsolo zenkohlakalo emaphoyiseni. Uthe umbono osabalele yonke indawo wokuthi waxoshwa ngalezi zinsolo awulona iqiniso futhi udukisa abantu. Udwebe isithombe sokuthi isinqumo sokuxoshwa kwakhe sathathwa uMbalula ephuthuma, senziwa ngendlela engahlelekile futhi engekho emthethweni kulandela imibiko yabezindaba eyayidicilela phansi igama lakhe. Utshele ikomiti ukuthi wabizelwa ehhovisi likaMbalula eKapa ngo-2017. Uthe asikho isizathu salo mhlangano asinikezwa, waveza ukuthi walinda uMbalula isikhathi esingaphezu kwamahora amathathu. Uthe wabe esehanjiswa ehhovisi lapho abamba khona umhlangano noMbalula ongazange uthathe ngisho imizuzu emihlanu. NgokukaPhahlane, uMbalula akazange abeke uhla lwamacala akhe noma aveze umyalelo obhalwe phansi, kunalokho,…

BAKHALA ngothishanhloko abamsola ngokuba nenhliziyo eyitshe abazali babafundi baka-matric abakweleta imali yesikole eHillgrove Secondary, eNewlands West, bebanjelwa izitatimende zemiphumela. Laba bazali bathi izingane zabo ebezeqiwe yinjabulo ngoLwesibili ngenxa yokuphasa u-matric, zibuye esikoleni zidangele, zingazitholanga izitatimende zemiphumela yazo. Bathi zithe uthishanhloko uzitshele ukuthi ngeke zizinuke izitatimende, zingayikhokhile imali yesikole eziyikweletayo. Omunye wabazali, uNksz Nozipho Hlongwa, uthe ujanyelwe yingqondo njengoba ebuka ikusasa lendodakazi yakhe u-Olwami Hlongwane lilimala ngenxa yale nkinga. “Ngiyazi ukuthi nginecala lokuthi ngikweleta imali yesikole kodwa ngiphatheka kabi uma ingane yami ingeke isakwazi ukuphuthumisa imiphumela yayo enyuvesi ukuze ithathwe ngenxa yokuthi mina angikwazanga ukukhokha imali yesikole,” kusho uNksz Hlongwa. Uthe okubuhlungu ukuthi ngoSepthemba nyakenye uthishanhloko uthathe uhla lwabazali abangakhokhile, waluyisa enkampanini eqoqa izikweletu ukuze imbaselele imali yesikole abangayikhokhile. “Nsuku zonke abale nkampani bayasifonela bafuna imali yesikole. Uthishanhloko wasitshela ukuthi ngalokhu…

MHLELI: Yize esephelile amaholidi abantu sebeqala ukubuyela ezindaweni zabo emva kokuchitha amaholidi ezindaweni eziningi ezigudle ulwandle, ngithi angiveze ilaka lami. Libe likhulu isasasa kubantu uma uqhathanisa neminye iminyaka ngenxa yesibalo esikhulu sabavakashi ebebetheleke ngezinkani kwelikaBhanana (eThekwini). Kwakugcwele kuchichima ezindaweni ezakhele i-Blue Lagoon, Sunkist, Suncoast, Mini Town, UShaka Marine World neSouth Beach okungenye yezindawo eziheha inqwaba yabavakashi. Kwakukhona ngisho abasuka emazweni angaphandle ngenxa yokuba namahhotela aseqophelweni eliphezulu. Okunye esengivame ukukuphawula wukuthi iSunkist ingenye yezindawo ezithandwa abantu abakhonze ubumnandi, iningi labo lisuke lizosela inyama, bese lehlisa ngeziphuzo ngenkathi lijabulela umoya waseGagasini. Asibuye sethulele isigqoko namaphoyisa kaMasipala weTheku obuwafica kuzo zonke izindawo eqaphe isimo. Ukulawula izimoto kuyaye kwenze omkhulu umehluko kwezinye izindawo, yingakho-ke nawo siwachoma uphaphe lwegwalagwala ngenxa yokubeka iTheku ebalazweni lomhlaba. Z.Ntombela E-DURBAN NORTH…

SEKHUKHUNE United esemhlane weMamelodi Sundowns ne-Orlando Pirates esicongweni se-log yeBetway Premiership, iphinde yakhombisa ukuthi izimisele ngokuphosela inselelo lezi zinkunzi embangweni wesicoco kulandela ukusayinisa uLebohang Phiri, Bradley Mojela ekubeni kubuye u-Andy Boyeli obebolekisiwe. Kusukela kuqale isizini, iBabina Noko idlalela ngasesicongweni kanti iholwa njengelambu nguBradley Grobler ongomunye wabagadli ababalwa nabaphambili kwiligi kusukela kuqale isizini ka-2025/2026. Leli qembu eliphekwa ngu-Eric Tinkler liqede unyaka odlule lilele isithathu kwi-log lapho lisele khona ngamaphuzu amathathu kuphela kwiPirates eqhwakele yize leli qembu laseSoweto lisele ngomdlalo. ISekhukhune isele ngephuzu kwiSundowns emise kabi iBucs, emuva kwemidlalo yeligi engu-13 amaqembu womabili. Ngasekuqaleni kwesonto, iSekhukhune imemezele uPhiri njengomdlali wayo omusha osuka kwiParis FC yaseFrance. Lo mdlali oneminyaka engu-31 ubudala oseke wadlala kwiBafana ngaphansi kuka-Ephraim “Shakes” Mashaba, ufike bhusende kwiBabina Noko kwazise uhlale izinyanga eziyisithupha engenalo iqembu kusukela ehlukane neParis yaseFrance, ngoJuni…