Tabla de contenidos para 2026-01-14 en Isolezwe

INDODAKAZI yomsakazi woKhozi FM, uKhathide "Tshatha" Ngobe, ephase u-matric ngo-A ababili, ifakazele isisho esithi ukuhlehla kwenqama akusho ukubaleka kodwa isuke iyolanda amandla kulandela ukubuyela kuGrade 11 kade ingenzanga kahle ngokudlule. UTshatha usakaza yedwa uhlelo iWoza Nabangani Bakho ngo-3 kuya ku-6 ntambama phakathi nesonto. Utshele leli phephandaba ukuthi bayaziqhenya ngendodakazi yakhe u-Amahle Gcabashe, ebiza isibongo sasekhaya konina. Uthe u-Amahle, obefunda ePhambili High, eThekwini, uthole o-A kwiLife Orientation neTourism waphasa ngeBachelor's Pass. "Isijabulisile kakhulu ingane mfowethu," kusho uTshatha ngokukhulu ukuziqhenya. "Empeleni ubesewuphinda ngoba akaphasanga kahle ngokwedlule. Wayeseqala phansi njengoba esesebenza kahle kangaka nje. Siyaziqhenya kakhulu ngokuzimisela kwakhe nangokungadikibali ngenkathi engaphasanga kahle, qede wayoqala phansi kuGrade 11 wayesebuya ngamandla." Uthe usacabanga ukuthi uzomenzelani ukumjabulisa. Omunye usaziwayo, uNonku Williams wodumo lohlelo iReal Housewives of Durban uveze ukuziqhenya kwakhe ngokuphasa kwendodakazi yakhe uNothile. UNothile, uyindodakazi…

ITHI bebesendaweni engafanele ngesikhathi esingafanele, imindeni yabathathu okuthiwa badutshulwe bafa ngabantu abangaziwa oHlange, eNanda, ngoMgqibelo. Kulesi sigameko esenzeke esitolo sendawo, kushone ngesihluku uMnuz Sanele "Tonqo" Shezi (28), Mnuz Malibongwe Jele noMnuz Kwanele Nzuza (20). Kuthiwa badutshulwe amadoda amane, okuthiwa abonakale ethushuka esikhaleni, adedela inhlamvu, ase ebaleka engena emotweni ebiwalinde ebangeni elifishane. Isihlobo soyedwa wababulewe - esicele ukungadalulwa - sithe bezwe ngandlebenye ukuthi umuntu obefunwa ngowesilisa wendawo oshayela izimoto ezikhokhelwa ngebanga ezilihambile, ophume ngembobo yenaliti ngenkathi kudutshulwa. “Yena udubuleke engalweni nasonyaweni kodwa wakwazi ukubaleka ephila. Kuthiwa wuye obefunwa ngabahlaseli,” kusho isihlobo. Sithe bezwe kuthiwa ngale ngokushayela lezi zimoto, lona wesilisa ubebuye azibandakanye ebugebengwini. “Sikholelwa ukuthi bekufunwa yena kahle hle njengoba kusabalale lawo mahlebezi endaweni kanti naye wavele wanyamalala emva kwesigameko,” usho kanje. Isihlobo sikaShezi - naso esicele ukungadalulwa - sithe ubephume…

I-NFP isifana nenyama yohlobo lwekhethelo emaqenjini abusa ngokubambisana KwaZulu-Natal nakulawo afuna ukuphatha isifundazwe. Ubuholi beNFP buzobamba imihlangano namaqembu amathathu ngoMgqibelo, lapho kuzokhulunywa khona ngekusasa lokuphathwa kwesifundazwe. Amaqembu amabili azohlangana neNFP ngoMgqibelo, akuhulumeni wokubambisana, bese kuthi elinye lona kube yiqembu elifuna ukuphatha isifundazwe. Iqembu lesithathu elicele umhlangano ebuholi beNFP yi-DA. Ubuholi be-DA KwaZulu-Natal bubhalele ubuholi beNFP bucela umhlangano lapho kuzodingidwa khona ezithinta ukuphathwa kwesifundazwe. Incwadi ye-DA ingena nje, ubuholi beNFP busanda kuthola izincwadi eziqhamuka emaqenjini iMKP ne-ANC, nawo anesicelo esifana nese-DA. I-NFP ingababeki benkosi kuhulumeni waKwaZulu-Natal futhi isanda kuthatha isinqumo sokuhoxa kuhulumeni wokubambisana, nokuvulela iMKP intuba yokuba ithathe izintambo zoMbuso. Ubuholi beNFP busole amaqembu aphethe ngokubambisana ngokwehluleka ukubusa isifundazwe, bukhala nangenkohlakalo. Encwadini ebonwe yiSolezwe, ubuholi be-DA KwaZulu-Natal buthe bufisa ukuba ubuholi beNFP buchaze kabanzi ngalezi zikhalazo. USihlalo we-DA KwaZulu-Natal, uMnuz Dean…

AYEDE! Hlangalomhlabathi iNdlulamithi yamakhosi, abaNtwana baseNdlunkulu nabadidiyeli beMpi yeSilo, nina beSilo! Angiqale ngokuzwakalisa amazwi okuthokoza ngokuba uMvelinqangi usiphile isipho sokuphila okuyinto emqoka kakhulu. Siyazi, nina beSilo, ukuthi intwasa kaKhisimusi noNcibijane yintwasa enezinto eziningi. Imigwaqo iyaphithizela, kwehle izingozi ezishiya kweminye imizi kungenanjabulo kepha ngesikhathi abanye begubha lesi sikhathi abanye basuke besemanzini. Siyabababazela labo abebesemanzini ngalesi sikhathi. Ngifisa nokuhalalisela bonke abafundi abaphothule u-matric ngempumelelo futhi sibafisela inqubekelaphambili nezifundo zabo sebeya ezikhungweni zemfundo ephakeme. Sengathi ingqondo yabo ingehungulwe wukubona sengathi sebephumelele bengakayiklami nendima. Ngiyafisa ukugqugquzela abafundi abangaphumelelanga noma abangazuzanga amaphuzu eneleyo awumgomonqangi wokwemukelwa kwabafundi kuleso naleso sikhungo semfundo ukuba bangadikibali kodwa bavuke bayibambe ngoba kakukahlwa mbeleko ngakufelwa. Iqiniso wukuthi baningi asebephumelele kodwa abake bangaliphumelela ibanga elithile kodwa babuye baphumelela. Ngiyabahalalisela othisha nabazali ngokuphumelela kwezingane zabo. Ngifisa ukuqwashisa abafundi abayoqala ukufunda ukuthi bangagajwa yinjabulo…

MHLELI: Ngicela ukuqala ngokuncoma iBafana Bafana yethu ngendlela ekhombise ngayo ukuthi ifuna ukuya kowamanqamu, idlale kahle emqhudelanweni we-African Cup of Nations (Afcon). Nokho igcine iphuma ku-last 16 wamaqembu, sekusele kancane iwelele kuma- quarter final alo mqhudelwano. Inkinga yeBafana wukuthi i-Egypt kuthe zisuka nje yavele yabeka igazi phansi. Kuthe uma ikubona lokhu iBafana, yathi igcagcele esokeni, yazibona ivulela isibhaxu kwezikaFaro. Kanti phinde, icushelwe umgoga ngamaGibhithe alokhu ethe lingawa licoshwe yizinkukhu. Impela kube njalo ngoba iBafana ibigcina ngesiyaluyalu kodwa ihlulwe amagoli. Ngithe ngisakudlinza lokhu okwenziwa ngamaGibhithe kokuthukusela iBafana induku emqubeni, ngamangazwa yisethenjwa sawo uMohamed Salah odlala kwiLiverpool, ngendlela ayengagculisi ngayo enkundleni, ikakhulukazi esiwombeni sokuqala. Naye lo mdlali wayethi lala lulaza ngikwembule kwiBafana. Kulowo mdlalo iBafana yaphinda yahlulwa ngamathuba eyawavulelwa amaGibhithe engaqondile, njengoba ayebeke umoya phansi. Abanye abalandeli baseNingizimu Afrika bakhala…

KUNGENA igamanxe emakethe kweMamelodi Sundowns kuleli windi likaJanuwari lokuhwebelana ngabadlali, kuwuphawu olucacile lokuthi leli qembu lizimisele ukuthi isigamu sesibili sesizini sehluke kunesokuqala. Leli qembu laseMamelodi ebelizihambela lodwa kwiligi yakuleli eminyakeni yakamuva, aliyiqalanga isizini ngendlela ejwayelekile okuholele ekutheni liqinise isikwati. AmaBrazilians asephunyukwe yizindebe ezimbili, iMTN8 neCarling Knockout. KwiBetway Premiership angemuva kwe-Orlando Pirates ngamaphuzu amabili, ekubeni esedlale umdlalo owodwa ngaphezulu. Leli qembu elijwayele ukuthi kube yilona elisuke selihamba phambi kwiligi ngalesi sikhathi, lizithola lisendaweni elingayijwayele futhi kubhekwe ngabomvu ukuthi lizobuya ngaluphi unyawo uma sekuphele ikhefu le-Africa Cup of Nations. AmaSandawana asememezele abadlali abathathu abasha, uMonnapule Saleng, Khulumani Ndamane noBrayan León. Bonke kubukeka bekhethwe ngokucophelela ukuze bazoqinisa iqembu ezindaweni ezahlukene enkundleni. UNdamane (21) ungumdlali wasemuva onekusasa eliqhakazile kodwa usekulungele ukulwela ijezi eqenjini elifana neSundowns kwazise useqalile nokudlalela iqembu lesizwe, iBafana Bafana. Lo mdlali…

IMIDLALO yanamuhla eyandulela owamanqamu we-Africa Cup of Nations (Afcon) ibaluleke ngezindlela ezihlukene emaqenjini, kubadlali nakubaqeqeshi ababheke ukujabulisa izindimbane zabalandeli emazweni abawaqeqeshayo. Senegal v Egypt, eTangier Grand Stadium, namuhla ngo-7pm: Ngaphandle nje kokuhlabahlosa kwemidlalo emibili yanamuhla eyandulela owamanqamu e-Africa Cup of Nations (Afcon), umdlalo weSenegal ne-Egypt ufaniswa nowamagqubu ngezizathu ezahlukene. ISenegal izotholana phezulu ne-Egypt emdlalweni wokuqala owandulela owamanqamu. Zihlangana namuhla nje zazigcine ukuhlangana kowamanqamu e-Afcon ka-2021 eCameroon emdlalweni owanqotshwa yiSenegal iguqisa i-Egypt ngo 4-2 sekukhahlelwa amaphenathi. Ukunqoba kweSenegal kulowo mdlalo wamanqamu kwakusho ukuphela kweshobolo leminyaka laleli qembu elalingakaze lisiphakamise isicoco se-Afcon. Ngakho umdlalo wanamuhla wala maqembu ufana nowamagqubu, ikakhulukazi njengoba ne-The Pharaohs ilwela ukubuyisa isithunzi sayo kulo mqhudelwano eyagcina ukuwunqoba ngo-2010. ILions of Teranga kwi-Afcon yanonyaka iholwa nguPape Thiaw othathe izintambo ku-Aliou Cisse ngoDisemba 2024. UCisse wayehola leli qembu ngesikhathi linqoba…

MPHATHISWA woMnyango weMfundo KwaZulu-Natal, uMnuz Sipho Hlomuka, utuse iqhaza elabanjwa yintsha eyayilelwa imfundo engcono ezweni ngo-1976, akuchaze ngokuthi kube wusizo kakhulu ezweni, kwalekelela isifundazwe ukwenza kahle - njengoba siqophe umlando siphuma phambili ngokwenza kahle ka-matric wanyakenye, sithola u-90.6%. UHlomuka usho kanjalo ethula inkulumo yakhe yosuku emcimbini wokuklomelisa abafundi ba-matric wanyakenye basezikoleni zaseKZN abenze kahle, obuse-ICC eThekwini, izolo. “Lokhu okuhle okwenzekayo kusikhumbuza emuva lapho esisuka khona nakubo bonke ubunzima izwe lethu elidlule kukho lizabalazela lokhu esikubona manje, ngibala nokulwa kwentsha eyayiphila ngo-1976, enye yayo eyalahlekelwa yimpilo yayo ukuze thina sikhululeke, nosekuphele iminyaka ewu-50 manje kwenzeka lesi sigameko,” usho kanje. Eqhuba uthe kubahlabe umxhwele nokuthi i-KZN ayiphelelanga ekuqwaqwadeni zonke izifundazwe ngokuphasa kuphela kepha futhi yiyo ehambe phambili ngabafundi abaphase ngo-Bachelor - okubabeka ethubeni elihle lokuqhubeka nemfundo ezingeni eliphakeme. Kulokhu bawu-89 161 abaphase…

MHLELI: Bafowethu ake ngithathe leli thuba ngincome uMasipala iMfolozi Municipality ukuze namhla ungasenzi kahle kube lula ukuwugxeka. Bakwethu, yonke into eniyibona emcimbini iNdoni Saliwa kusuke kungamandla alo Masipala. Uyawazisa amaciko endawo, uma bezobeka umcimbi ewadini baqale bathungathe amaciko angakaveleli bawanikeze ithuba. SiyiNdoni Music sicela niqhubeke ngendlela enenza ngayo niwuMasipala, ysenza singesabi ukumemezela kubantu ukuthi siphuma ngaphansi kwenu. Bese ngithi baba u(Mnuz Xolani) Bhengu, iningi inhlonipho esiyithola kubasebenzi bakho uma sivakashele emahhovisi kaMasipala. Sengathi ungaqhubeka njalo lowo moya uheleze niwutshale nakwabasha enizobaqasha kulo nyaka. Ngibuya phansi eMpangeni eDondotha KwesaKwaMthethwa ngaphansi kweMfolozi Municipality. Saliwa…

KUSOLWA ukhwantalala njengomnyombo ogcine sewuholela ekutheni kugcine sekumanela unina kaNkk Faith Ntombela, uNkk Busisiwe Nkosi, uMaMkhize, (68) oshone ngeSonto. Lavela kaningi igama likaMaMkhize ngesikhathi indodakazi yakhe iquliswa ezinkantolo ngecala lokusoconga umyeni wayo, uCaptain Zwelakhe Ntombela, owayesebenzela amaphoyisa kaMasipala weTheku. Ngesikhathi esanda kuqala ukuvela eNkantolo yeMantshi yaseMlaza, uNkk Ntombela kwavela ukuthi ababulala umyeni wakhe basukela emzini wakhe kaMaMkhize okhona eMlaza, beyodubula iphoyisa kwa-S kulo leli lokishi. Lapha kwakukhulunywa ngenkabi, uMnuz Mzo Ntombela, owagcina egonyulukile walahlwa yicala inkantolo yase iyamgweba wase echakida bonke ayekade enabo. Unina kaNkk Ntombela ubevamise ukuba khona njalo enkantolo uma kuvela indodakazi yakhe ezoyeseka. Bekuthi njalo uma sebephuma enkantolo, umphakathi ubachaphe ngezinhlamba ezihlasimulisa umzimba. Ngokuhamba kwesikhathi umufi ugcine engasalubhadi nje nhlobo enkantolo. Kuthe noma icala selidluliselwe eNkantolo eNkulu yaseThekwini, nalapho ubengasabonwa. Umufi wayesolwa ngokuthi ubemdibimunye nendodakazi yakhe, Nkk…

MQEQESHI oqede indlala yeminyaka yezinkomishi kwiKaizer Chiefs ngeNedbank Cup, uNasreddine Nabi, ubalwa phambili kwabangase bashayele umkhumbi weTunisia kwiNdebe yoMhlaba ngoJuni, eMexico, Canada nase-United States of America (USA). Emuva kokuthi iTunisia iphume kwi-Last 16 ye-Africa Cup of Nations (Afcon) eqhubeka eMorocco, usoseshini wakhona ukhombe indlela, uSami Trabelsi, obeyiqeqesha kulo mqhudelwano. ITunisia ifike kwi-Afcon ibalwa namazwe angase ahambe nesicoco kwazise ibivutha amalangabi ngesikhathi kuqhubeka imidlalo yokuhlungela lo mqhudelwano neyeNdebe yoMhlaba. Ukuphoxeka kwiTunisian Football Federation (TFF) kubonakale ngokuthi ikhombe indlela uTrabelsi kungapheli ngisho isonto i-Carthage Eagles ikhishwe yiMali sekukhahlelwa amaphenathi. UNabi (60) akakaze alithole iqembu kusukela ehlukane neChiefs kungalindelekile ngo-Okthoba wanyakenye. Lo mqeqeshi uyohlala esezinhliziyweni zabalandeli beChiefs kwazise nguyena oqede isomiso sezindebe seminyaka engu-10 kuleli qembu laseNaturena. Okungangatshazwa wukuthi kwehla kahle kwabeChiefs ngukuthi uNabi ukwenze lokhu ngokunqoba kwi-Orlando Pirates eyizimbangi ezinkulu zayo emdlalweni…

NKOLELO yokuthi umaskandi wumculo wabantu abangancwadile sekuyinto yayizolo. Kulo mculo sekugcwele izifundiswa. Phakathi kwazo kubalwa no-Okuhle "Matshikiza" Ngubane. U-Okuhle (17) waqala ukuzakhela udumo emculweni ngokuba wumaskanda wokuqala ukuqopha ingoma eneminyaka emithathu njengoba esephumelele uGrade 12 ngeBachelor. Lo mculi ubenza u-matric eLinpark High, eMgungundlovu, futhi enza izifundo iTechnical Mathematics, English Home Language, IsiZulu First Additional Language, Engineering Graphics, Mechanical Technology (Fitting and Machine) neTechnical Science. U-Okuhle uthe uhlela ukuyokwenza izifundo zeChemical Fitting Engineering e-Atholl Munday Training Centre eManzimtoti. Uthe usizwe ukuhlaba ikhefu emculweni wagxila kakhulu ezifundweni zakhe zika-matric. Lo maskanda waqala eyimbongi ngaphambi kokungena emculweni ngenxa yokubukela kuMjik'jelwa "Ichalaha LikaShafuza" Ngubane. Wafika kumaskandi wangaconsa phansi kubahleli bemicimbi kangangoba waze waqashwa nawuDJ Tira ukuba anandise kwiFact Durban Rocks eyayisePeople's Park eThekwini, ngoJulayi 2017. Wayeshiyelana inkundla nezingwazi ezinjengoHlegiwe Mhlaba no-AKA ngengoma ayehlonipha ngayo…

UNDUNANKULU waKwaZulu-Natal, uMnuz Thami Ntuli, uphumele obala wezwakalisa ukukhathazeka ngengwadla yokuphepha ezikoleni zakulesi sifundazwe. UNtuli ubekade ekhuluma e-ICC eThekwini, izolo, emcimbini wokuklonyeliswa kwabafundi ebenze kahle ku-matric ka-2025, eKZN. UNtuli uqale ngokuncoma uMphathiswa wezeMfundo KwaZulu-Natal, uMnuz Sipho Hlomuka, ngemiphumela emihle nathe ushiye umsizilo ngayo. Noma kunjalo kodwa uthe kukhulu ukukhathazeka anakho okumayelana nenkinga yokuphepha ezikoleni. ''Iqiniso lithi inkinga yobugebengu iyakuthikameza kakhulu ukufunda. Lokhu kudala nokuthi abafundi nothisha bagcine bezizwe bengasaphephile nje nhlobo uma bengaphakathi emagcekeni ezikole okuyinto okungamele ingabe iyenzeka,'' usho kanjena. Uthe kumele kube khona okwenziwayo ukuze kuqinisekiswe ukuthi ezemfundo ziyaqhubeka ngaphandle kokuthikanyezwa yizinkinga zezokuphepha, wathi yingakho manje bematasa nohlelo lokuba kufakwe amakhamera emagcekeni ezikole. Lokhu uthe bayethemba ukuthi kuzowuletha umehluko. Uthe ngaphandle kwenkinga yezokuphepha bayazi ngezinye izinselelo ezibhekene nezeMfundo KwaZulu-Natal. Ezinye zazo ubalule inkinga yengqalasizinda athe bazi kahle kamhlophe…

HEZU kokuba izikhulu zoMnyango weMfundo eyisiSekelo ziyichitha eyokuthi kuphaswa ngo-30% ka-matric kodwa amaqembu ezepolitiki okuyiBuild One South Africa (BOSA) ne-ActionSA athi kumele iphele eyokuphasa ngaleli maki. Umholi weBOSA, uDkt Mmusi Maimane, uthe ukuphasa ngo-30% ka-matric kubeka engcupheni ikusasa labafundi yingakho befuna kunyuswe izinga, kuphaswe ngo-50%. Uthe lokhu kwenza laba bafundi bangakwazi ukungena ezikhungweni zemfundo ephakeme. "Abaqasheki abantu abaphase ngo-30%. Yingakho sisaqhubeka nekhwelo lokuthi kunyuswe izinga lokuphasa liye ku-50%. Linyukile izinga labaphase u-matric kodwa iningi labo ligcina lingaqasheki ngenxa yokuthi liphase ngo-30%," usho kanje. Ne-ActionSA ithe ayikuhlonizi ukuthi kumele kuqedwe eyokuphasa ngo-30% ka-matric. Kumenyezelwa imiphumela ka-matric, uNgqongqoshe weMfundo eyisiSekelo, uNksz Siviwe Gwarube nomqondisi jikelele kulo Mnyango, uMnuz Mathanzima Mweli, bachithe eyokuphasa u-matric ngo-30%. UMweli uthe akukho ziqu eziphaswa ngo-30% kuleli. "Izifundo okubalwa ulimi lwasekhaya nezinye ezisemqoka ziphaswa ngo-40%. U-30% owezinye izifundo…

IKwaZulu-Natal ivame ukuba sezindabeni ngokungekuhle okwenzeka kuyo. Kungaba yizinto ezenziwa abantu bakhona, noma okwenzeka ngokwemvelo njengesimo sezulu. Kusukela eminyakeni eyandulela ukufika kombuso wentando yabantu iKwaZulu-Natal ikhungathwe wudlame lwezepolitiki olwalwenzeka kakhulu phakathi kwabalandeli beNkatha Freedom Party ne-African National Congress. Kwabhubha abantu abangaphezulu kuka-20 000. Kwale noma sekuphelile ukubanga phakathi kwala maqembu, kodwa ukuchitheka kwegazi kwalokhu kuqhamuka ngezindlela ezahlukene nokusenzeka nanamuhla. Kuke kwaba neziqubu zokubulawa kwamakhansela nabagaqele izikhundla ngaphakathi kwi-ANC, kwaba nesimo esifuze leso phakathi kwe-IFP ne-NFP njengoba sekukhona ukufakana iminwe esweni phakathi kwe-ANC ne-MKP namuhla. Muva nje kunesihlava esenyanyekayo sokusocongwa kwabaholi bomdabu. Yiso lesi sifundazwe esibatshazwa ngokuba yisiphethu sababulali asebaduma ngokuthi yizinkabi. Nangezibalo zokuhlukumezeka kwabesifazane esandleni sabesilisa kuningi okwenzeka kwelikaMthaniya. Enye yezinkinga ezintsha eyokuba uqhibukhowe kwamathimba emigulukudu ahlalise lubhojozi imiphakathi. Konke lokhu kuveza ubunzima obumelene nenhlalakahle kulesi sifundazwe. Ngakho-ke ukuphumelela…

MHLELI: Angibingelele onyakeni omusha kuMhleli, izintatheli nabo bonke abafundi baleli phephanda lesizwe. Sikhalele futhi labo ababhujelwe yizihlobo zabo namalungu emindeni yabo ngenyanga efile nangalena ethwese njengoba sekukhona abafelwe nje. Ziningi izivuvaba ezehlele isizwe ngenyanga edlule, ngingezibale. Kodwa okungithokozisile kwangihlaba umxhwele ngenyanga efile okwenziwe yiNkosi V. Zondi yaseNadi, iNkosi Z. Gumede yakwaMakhasa eHluhluwe neNkosi PVN Ntombela eBabanango. Nakuba ngingeke ngisachaza ukuthi kwakwenzekani esizweni senkosi ngayinye, kodwa imigidingo eyayenzeka kulezi zizwe zamakhosi - kwakuvunulwe kuconswa, kunuka injobo kukuhle kunjeya. Izingcwayi nezinsizwa zazivunule ziconsa kubonakala ukuthi kuhle kudelile, intaka ibekelwe amazolo, kusindwe ngobethole kwaMthaniya akuphuthe ngobo ehawini. Uma njalo izizwe zamakhosi zizokwenza kanjeya, iziNgonyama esezalala, amakhosi nomoya kaMvelingqangi uzosondela kulesi sizwe esidlana sodwa usuku nosuku singenazimuzimu. Ngiwethulela isigqoko la makhosi ahlangene nabantu bawo kwazothokozwa ndawonye kwavunulwa ukukhombisa ezinye izinhlanga kuthi kwakuba njani kwaMthaniya…

EKUQUBUKE ukukhathazeka ezinhlanganweni zabashayeli bezimoto ezikhokhelwa ngebanga ezilihambile ukwanda kwezigameko zokuhlaselwa kwabo eChesterville, eThekwini. Abashayeli sebesola ukuthi abarikhwestayo sebekwenza ngezinhloso zokuqhuba ubugebengu. Ivuso kubashayeli lelama isigameko sokunyamalala komunye wabo ngesonto eledlule. UMnuz Vumani Mtolo (23) ongowokudabuka eKranskop kodwa ohlala eChesterville, kuthiwa udunwe nemoto ngabantu abangaziwa ngoLwesihlanu. Kuvela ukuthi nakuba yena engakatholakali, imoto abehamba ngayo ewuhlobo lwe-7-seater Toyota emhlophe, itholakale isicwiyiwe eLamontville. Ngokusho kukaMnuz Mzo Ngcobo weKZN E-hailing Association, cishe ngesesine isigameko sokuhlaselwa komshayeli kuleli lokishi elidume ngokuthi kuseBhlekese, esikhathini esingangenyanga. “NgoDisemba, sibikelwe ngezigameko ezintathu ezehlukene lapho okuhlaselwe khona abashayeli bezimoto ezikhokhelwa ngebanga ezilihambile. Kuzona, babili abalahlekelwe yimpilo yabo, kwathi owesithathu walinyazwa,” kusho uNgcobo. Uthe okukhathazayo ukuthi zonke zenzeka ngezikhathi zasebusuku, lapho abashayeli beqhuba umsebenzi wabo wokuhambisa abantu lapho abasuke befake izicelo zokuya khona. Ukhale ngokuthi abashayeli bahambela kude nososeshini babashayeli,…