Tabla de contenidos para 2026-01-08 en Isolezwe

BALANDELI kumele bayibheke into abayisho kosaziwayo ngoba kuyezwela kubo. Lokhu kushiwo wuNgcebo Mdima okhulumela osaziwayo futhi ophinde abe nguDJ kulandela ukuhluthuka kukaNkosazana Daughter, wathuka abantu ngokumnaka ngomzimba wakhe. UNkosazana Daughter oyisilomo samapiano, uqophe i-video wayifaka kwiTik Tok kulandela ukuhlale njalo abantu bephawula ngokwehla kwakhe emzimbeni. Ohlelweni iPiano Pulse olungaphansi kwesiteshi sikaMacG kwiYoutube, owayengumphathi wabaculi osephawula ngemboni, uNota Baloyi, umncomile wathi ubukeka kahle. Ube esethi usebenzisa iphilisi elidumile okuthiwa liyehlisana emzimbeni. UNkosazana obengomunye wabapikwe engomeni eshise izikhotha ngonyaka odlule, ethi Abantwana Bakho kaDJ Maphorisa, Xduppy noKabza De Small, uthe usekhathele ngabantu abaphawula ngomzimba wakhe. “Bathi awu usekhuluphele manje, awu usenciphile manje. Njalo ngihlale ngibukeka kahle kodwa,” kusho uNkosazana ogcizelele ukuthi ungumama. Ugcine ethuka inhlamba ethi abamshiye phansi. “Sengikhathele sesizwile. U-2026 khulumani ngenye into. Gxekani izinwele zami. Ngitsheleni ukuthi ngishintshe izinwele. Yenzani…

UHLEHLE isigcawu sokuqondisa ubugwegwe uMphathiswa wezokuThuthukiswa koMphakathi KwaZulu-Natal, uNksz Mbali Shinga, oshushiselwa ukushaya indiva umyalelo weqembu wokuba aseke isiphakamiso sokungabethembi ubuholi bukaNdunankulu waKwaZulu-Natal, uMnuz Thami Ntuli. Isigcawu sokuqondisa uNksz Shinga obekufanele siqale izolo, sihlehliswe emva kokuba abameli bakhe becele ukuhlinzekwa ngamanye amadokodo. Isigcawu sizoqhubeka namhlanje, eThekwini. UNobhala weNFP obambile, uMnuz Sunset Xaba, uthe abameli bakaNksz Shinga bebefuna ukuthi isigcawu sihlehliselwe isonto elizayo. "Bebecele ukuthi sihlehliselwe uJanuwari 15, kodwa ummeli wethu wanqaba. Usihlalo wesigcawu ube esenquma ukuthi isigcawu siqhubeke kusasa (namhlanje)." UXaba uthe usole abameli bakaNksz Shinga ngokuzama ukubambezela ukuhlala kwesigcawu. "Ummeli wethu wayekade ebabuzile ukuthi abezukuwadinga yini la madokodo, bathi angeke bawadinge. Simangalile uma sebefika phambi kwesigcawu sebethi bafuna ukunikezwa wona." UXaba uthe bazobiza isithangami sabezindaba uma sekuphothulwe isigcawu, lapho bezomemezela isinqumo sabo. UNksz Shinga ubizelwe phambi kwesigcawu sokuqondiswa ubugwegwe…

OSOMABHIZINISI enhlokodolobha yesifundazwe, iPietermaritzburg, babhoka bayakhahlela bathi akungenelele uhulumeni wesifundazwe esimweni esingesihle sedolobha esikhinyabeza ukutshalwa kwemali. Eqhulwini lokukhathazeka kwabo, kubalwa ukuxathuka kwedolobha, ingqalasizinda ewohlokayo ngokunjalo nokungaphephi edolobheni. Lokhu kuvele engxoxweni yakamuva yephephandaba iMercury esesitebeleni esisodwa neSolezwe noMphathiswa wezokuThuthukiswa koMnotho, uMfundisi Musa Zondi, othe uthintwe wosomabhizinisi abakhulu becela usizo. Ngonyaka odlule, uMphathiswa umemezele uhlelo lokuthuthukisa amadolobha amancane ngenhloso yokuthi angabi yizibukeli kwezomnotho, bese izinto zigcina zenzeka emadolobheni amakhulu kuphela. Sekunesikhathi kukhalwa ngokuxathuka koMgungundlovu njengoba izindawo eziningi zigwamandwe abantu abangenamakhaya abagxumeka imikhukhu phakathi edolobheni. Lesi simo senze izitolo ezinkulu zibaleke enkabeni yedolobha ngenxa yokungaphephi. UZondi uthe: “Kusezandleni zethu njengohulumeni ukuba singenelele esimweni sedolobha. Lokhu sesike sakubona kwenziwa wuNdunakulu uNtuli engenelela eThekwini, eba nezinhlelo zokuxazulula izinkinga ebezixake khona.” Ugcizelele ukubaluleka kokubambisana ukuze kubuyiswe abatshalimali. "Idolobha kumele lihlanzeke, uma kungenjalo, kunzima kakhulu kubatshalimali ukuthi…

MHLELI: Izolo ngibhale ngohla lwezinto esizilindele ezweni lakithi kulo nyaka esingene kuwo u-2026. Ngiqhubeka lapho bengigcine khona. Izinga lebhola kwelakithi liyokhuphuka mhla ezikoleni nasemazingeni aphansi kwaba nezinhlelo zokuthuthukisa ibhola njengasebholeni lombhoxo. Kuzofanele silixhase iqembu lethu eliyodlala emqhudelwaneni webhola lomhlaba noma singadlalanga kahle kwi-Afcon. Asilixhase njengoba sisuke sixhasa abebhola lombhoxo. Kulo nyaka sigubha iminyaka engamashumi amahlanu kwaba nesibhicongo saseSoweto. Lesi sibhicongo senza umzabalazo wethu ukuthi uqine kuzo zonke izinhlaka njengomzabalazo wabantu ngaphakathi - owezikhali nowokukhipha ubandlululo inyumbazane emhlabeni wonke. Ngabe sesihambe kangakanani nokuletha imfundo engcono njengoba kusho uMqulu Wenkululeko, i-Freedom Charter, ukuthi "iminyango yezemfundo iyovuleka". Abathi akukahanjwa gxathu yingoba kabafundisekile kodwa umsebebenzi usemkhulu. Kulo nyaka ake sixoxe ngohambo esesiluhambile njengoba sigubha iminyaka engu-50 senzeka lesi sibhicongo. Kuzofanele siqondise amanga aluhlaza cwe athi kwathiwa "inkululeko kuqala, imfundo kamumva". Kulo nyaka kufanele sixoxe…

UYATHIMULA umndeni wowesifazane waseMandeni, otholakale eseshonile otshanini kade ephume nabangani kukuhle kuyiwa emcimbini obungeSonto. Umndeni kamufi, uNksz Ayanda Ndlovu (32), usola abangani bakhe ababili ngokufa kwakhe. Owomndeni kamufi, uNksz Zama Ndlovu, utshele Isolezwe ukuthi kukhona okushaya amanzi ngokufa kukadadewabo. Ulandise wathi udadewabo ulandwe ngabangani bakhe ababili kade ehlezi kubo, wathi bakujwayele vele ukufika bazomlanda ekhaya. "Nakulokhu kube yinto efanayo, bafikile bamlanda bahamba naye. Nathi lapha ekhaya asibaxwayi ngoba bajwayele vele ukuthi bamlande. Kulokhu bashilo ukuthi baya emcimbini womunye wesifazane abamjwayele obebungaza usuku lwakhe lokuzalwa," usho kanjena. Uthe baphume bobathathu egcekeni kumnandi kuqhuma nohleko phezulu, belimisa ngesihloko elokuthi bayozicika ngeziphuzo ezidakayo, wathi kuze kwasa ngakusasa, lutho ukubuya umufi okuyinto athe ibamangazile kakhulu. "Lokhu kusixakile kakhulu ekhaya ngoba siyamazi ukuthi noma ethanda ukuhamba kodwa njalo wenza isiqiniseko sokuthi ulala ekhaya ngoba uthanda…

UBHEKE ukuthi izethulo zocwaningo alwenzile ziphonsele uhulumeni inselelo yokuphuthumisa uhlelo lokuphucula ingqalasizinda yasemalokishini, ukuze abantu bakhona ikakhulukazi osomabhizinisi abasafufusa bathole ithuba lokuchuma, benze nomehluko emiphakathini. Lowo wuDkt Kholekile Ntsobi, osanda kuphothula ucwaningo lwakhe lwezifundo zobudokotela olusihloko sithi Developing An Intervention Framework, To Accelerate Key Programs For Economic Growth In South African Townships: A Study of Hammarsdale, aluphothule eDa Vince Insitute, eGoli nyakenye. Elandisa ngalokhu, uDkt Ntsobi odabuka eDutywa, e-Eastern Cape, kodwa osezinze eThekwini, uthe umcabango walolu cwaningo wamfikela ngo-2019 esanda kuthenga umhlaba ayefuna ukwakha kuwona elokishini iHammarsdale, entshonalanga yeTheku, lapho afike wavuleka amehlo khona ngezinselelo ezibhekene nabantu elokishini. “Ngafika khona kwahlaluka ngokuphelele ukuthi enye yezinto ezenza abantu basemalokishini bame ndawonye empilweni wukuswela izinsizakusebenza nengqalasizinda efanele ukuze bakwazi ukwenza izinto abafuna ukuchuma ngazo empilweni, okwenza kube lula ukuthi balahle…

UNGQONGQOSHE wezeMidlalo, ezobuCiko namaSiko eNingizimu Afrika, uGayton McKenzie, uyayichitha eyabafuna kuxoshwe umqeqeshi weBafana Bafana, uHugo Broos, kulandela ukuphuma kwayo kwi-Last 16 ye-Africa Cup of Nations (Afcon) eqhubekayo eMorocco. UMcKenzie obephelezele iBafana eMorocco, ubekhuluma nabezindaba izolo, esikhumulweni sezindiza i-OR Thambo International Airport, eGoli, ngenkathi kwemukelwa leli qembu. IBafana iphume emzuliswaneni we-Last 16 we-Afcon iguqiswa yiCameroon ngo 2-1. Lokhu kukhombisa ukushona phansi uma kuqhathaniswa ne-Afcon kweka-2023, lapho yathola khona indondo yethusi e-Ivory Coast. Kunabalandeli abalimisa ngesihloko ezinkundleni zokuxhumana elokuthi kumele akhonjwe indlela uBroos, iBafana ithole omunye umqeqeshi ozoyihola kwiNdebe yoMhlaba ezoba ngoJuni. “Leli qembu lidlale kahle. Ngeke sithi ngoba behlulwe emzuliswaneni wokuqala (esigabeni samaqoqo) bese sithi bayizahluleki, cha. "Sidlale kahle kodwa-ke saba nalawo maphutha okuyiwona enze sahlulwa. Uma ubuyela emuva eminyakeni embalwa edlule iBafana ibingenzi kahle, uBroos wafika wayivusa kodwa manje futhi…

UMDLALI wasesiswini, uMiguel Timm, akaboni sekuphelile ngaye esigabeni esikhulu sebhola eMzansi, iBetway Premiership, njengoba esejoyine iCape Town City edlala kwiMotsepe Foundation Championship. UTimm (33) usayiniswa yiCity nje, ubesaqede izinyanga eziyisithupha kuphela esemabhukwini eSekhukhune United abeyijoyine ngaphambi kokuqala kwale sizini esuka kwi-Orlando Pirates adlale kuyona amasizini amathathu. Lo mdlali wasesiswini ungomunye wabadlali abanegama abasanda kusayiniswa yileli qembu laseKapa, elilokhu liqhubeka nokuqinisa isikwati salo ngabadlali abanohlonze kuleli windi likaJanuwari, lokubhalisa nokuhwebelana ngabadlali. Bekungakapholi maseko isayinise umgadli onohlonze waseBosnia, uDzenan Zajmovic, ogqame kwi-TS Galaxy ngesizini edlule eyishayela amagoli amqoka iqeda endaweni yesihlanu kwi-log yePremiership. Ngaphandle kukaTimm noZajmovic, leli qembu laseKapa eliqeqeshwa nguJan Vreman waseNetherlands, ligqishe ngabanye abadlali abanegama okubalwa kubona uKeagan Dolly noNjabulo Ngcobo bodumo kwiKaizer Chiefs. “Ngiyakuqonda ukuthi isho ukuthini ibheji yaleli jezi kubalandeli,” kusho uTim kwi-website yeCape Town City. “Ngiyazi ukuthi…

UDJ wodumo lwengoma ethi Thina Sobabili nethi Sobuye Sibonane, uBongani "Bongz" Dlamini, usobishini ngenxa "yokuvela ngentamo ezikweletini" kangangoba abasebenzi basendaweni yakhe yobumnandi iViews Night Club babe noKhisimusi noNcibijane omnyama. Isolezwe lithole ukuthi abanye babasebenzi baze baphoqeleka ukuba babeke phansi amathuluzi becikwa wukusebenzela amahhala amasonto ambalwa. Leli phephandaba libuye lahabula nokuthi omunye wabasebenzi obesesikhundleni esiphezulu unqwahe neselula yebhizinisi. Eziphendulela uDJ Bongz, okungakapheli nonyaka ethenge le ndawo ebiyaziwa ngokuthi yiViews At 25 eThekwini, uvumile ukuthi kusenenkinga yemali ebhizinisini lakhe. Uthe kungamanga ukuthi banqwahe ngamabomu nemiholo yabasebenzi kodwa uthe kungaphezu kwamandla abo. Esitatimendeni asisabalalise ezinkundleni zokuxhumana uDJ Bongz uthe izivuvaba eThe Views Night Club zidalwe abasebenzi abathize abangogalakajana abebethatha ngozwane imali nesitokwe. Uthe ukhuluma nje kunabathize abavulelwe amacala futhi asebeqalile ukuphenywa yingalo yomthetho. Nakuba ibhizinisi lisakhungethwe yizinkinga zemali, uDJ Bongz uthe beyiziphathimandla bazamile…

BAGIXABEZWE ngodilikajele abane umuntu emunye, abalisa ababili abalahlwe amacala okubulala abane okukhona kubo namaphoyisa omgwaqo amabili. UNjabulo Mazibuko (33), Xolani Mlotshwa (32) noSiphelele Gwala (25) bagwetshwe yiNkantolo eNkulu yaseThekwini emva kokubathola benecala. Okhulumela oKlebe KwaZulu-Natal uLieutenant Colonel Simphiwe Mhlongo uthe abasolwa babulala abafi ezigamekweni ezintathu ezehlukene. Uthe esigamekweni esenzeka ngo-Agasti 26, 2022, bagasela egaraji laseSikhaleni, eMpangeni bahlasela onogada ababili. "Badubula bebhekise konogada, babulala uMnuz Lucky Ntimbana (41) kwathi uzakwabo walimala, waphuthunyiswa esibhedlela," kusho uMhlongo, othe bobabili abagilwa baphucwa izibhamu zabo zomsebenzi. Uthe kwabe sekuvulwa icala lokubulala nelokuzama ukubulala esiteshini samaphoyisa eSikhaleni. Kwesesibili esenzeka ngo-Agasti 27, 2021 ePort Dunford, laba ababili badubula, babulala uConstable Nkosinathi Ngcobo (41) ngesikhathi esendleleni eyolanda uzakwabo. "Naye bamphuca isibhamu somsebenzi nomagazini ababili, ivest le-bullet proof, iselula, nejakhethi yamaphoyisa, base bebaleka endaweni yesigameko," kusho uMhlongo. Uthe uNgcobo…

IBE seqhulwini inkinga yamanzi nogesi ngesikhathi osondonzima be-ANC bephume umkhankaso wokuyolalela izinkinga zabantu. Abaholi be-ANC batshelwe ngenkinga yamanzi nogesi ngesikhathi bephume umkhankaso wokuyolalela izinkinga zabantu, izolo. Abaholi be-ANC abahlukene okubalwa kubo noMengameli Cyril Ramaphosa, bahambele izindawo ezahlukene esifundazweni iNorth West lapho bebe nemihlangano yomphakathi. Le mihlangano iyingxenye yomkhankaso we-ANC wokunxenxa abantu ukuba bahambele umcimbi wokugubha iminyaka engu-114 kwasungulwa inhlangano ozokuba sesifundazweni iNorth West, ngempelasonto. Abantu abahambele imihlangano yomphakathi bazwakalise ukungenami kwabo ngokwehluleka komasipala ukuhambisa izidingo ezifana namanzi nogesi. Abantu bathe bayawahluphekela amanzi, bathi nogesi uyahlupha. Abaholi be-ANC bathe bayazi ngalezi zinkinga, bathembisa ukuzilungisa. URamaphosa uthe izolunga maduze inkinga yamanzi. "Ngisizwile isikhalo senu. Angithi nikhala ngokuthi aninawo amanzi? Izinkinga zenu zizoxazululeka ngokushesha. Bangitshele ukuthi kunepayipi lamanzi eliqhumile. Bathe bayalilungisa leli payipi. Bathembise ukuthi ipayipi lizolunga ngoLwesihlanu. Engifuna ukukwazi wukuthi belingalungiswa…

BEKUNGAYINQABA uma kungabanga khona nselelo ngesinqumo sikaMengameli wezwe sokuqoka u-Advocate Andy Mothibi njengenhloko entsha esikhundleni sikaMqondisi kaZwelonke wezokuShushiswa koMphakathi (NDPP). Lesi sikhundla kade kuhleli kuso u-Advocate Shamilla Batohi, oshiya nje usevele uphenduke intothoviyane kwabaningi. Izolo silale nezithi inkampani yabameli i-B Xulu and Partners Incorporated (BXI) isifake isicelo sokumisa lokhu kuqokwa ngoba inuka indlela okwenzeke ngayo sengathi inenswebu yokungabi nalo iqiniso. Ngakolunye uhlangothi vele kukhona ukushaya amakhala emaqenjini aphikisayo. UMothibi, obeyinhloko yoPhiko oluyisipesheli lwezokuphenya i-Special Investigating Unit (SIU), umenyezelwe yiHhovisi likaMengameli kusihlwa ngoLwesibili ukuthi uzothatha izintambo kuBatohi. Lesi kube yisimemezelo ebesingabhekiwe njengoba bekulindelwe ukuthi kuqokwe kwabayisithupha abahlolwa yithimba kubuka izwe lonke. Izindaba zithi ithimba liwachithile amagama elabavivinya, libona sengathi kabakulungele ukuthatha isikhundla. Sengathi yilokhu okuvulele uMnuz Cyril Ramaphosa uphawini wokuzijubela ngokwakhe. Sekuthe-ke ngqoklo ukuphawula, abancomayo nabashaya amakhala, ngoMothibi. Okwenzekayo akumele kwethuse…

MHLELI: Ngicela ukusika kwelijikayo mayelana nesiko esikhule singalazi lokugcagcisa omkhulu sebelele. Kunesiko engizothi lisha ngoba ngikhule lingekho kodwa manje seliqala ukujwayeleka. Kukhona enye insizwa yakwaXhosa engake ngasebenza nayo, iyawathanda impela amasiko esintu kodwa elokugcagciswa kukakhokho kwayishiya ilila. Ithi yalobola le eMnambithi, kwathi nxa sekumele igcagcelwe kwathiwa ngeke kulunge ngoba umukhwe nomkhwekazi wayo bashona kudala, ngeshwa bengashadile. Kwakumele ilinde kuqale kushadiswe bona. Yahamba iminyaka kuthiwa kusaqoqwa, ayilinde. Angazi kwaphelelaphi. Manje sekwandile ukubona umgcagco omkhulu nje impela, uthi uma ubuza ukuthi ubani ogcagcelwayo, kuthiwe umakoti nomkhwenyana umkhulu nogogo asebalala kobandayo kudala manje udwendwe olwabo okumele lwenziwe ukuze umzukulu noma indodana ikwazi ukugcagcelwa. Nasi isimo esibhekene naso-ke, bayanda futhi basazokwanda abazolishiya elimagade ahlabayo bengalobolile, bengashadile futhi kungekho mbondo. Iyazi yini-ke le ntsha yamanje ukuthi isazogudluza izintaba ezingaka ezimi phambi komshado wazo? Uzoshadisa ogogo…

MELWE yingqondo umndeni wowesifazane othandana nabantu abanobulili obufana nobakhe kulandela ukutholwa kwesidumbu sakhe sesonakele ekotishi lowesilisa osagcwele amathafa eZakhiweni, ePort Shepstone. UNksz Asithande Mkhuba (18) waseMkholombe, khona ePort Shepstone, utholwe ngeSonto ebulewe, wambozwa ngengubo yokulala ekotishi. Ngokusho kukanina, uNksz Nomfundo Mkhuba, babegcine ukumbona ephila ngoLwesine, ethi usaya kubangani bakhe. Kuphele izinsuku engabuyi, kwaze kwaba bathola ucingo ngoMsombuluko, luthi abaphuthume emakhazeni bayobheka ngoba kutholwe isidumbu sowesifazane okusolakala ukuthi yindodakazi yakhe. “Sifike saqinisekisa ukuthi wuye. Sisola ukuthi uqale wadlwengulwa ngaphambi kokuba abulawe ngoba ibhulukwe lakhe nesikhindi sangaphansi bekusezinyaweni,” kusho uNksz Mkhuba. Uthe babuzwile ubuhlungu ngokubulawa kwendodakazi yakhe ngesihluku. “Bayibulale ngesihluku ingane yami. Bayishiya kanjalo. Itholwe isiphuma izilwane. Kubuhlungu. Ngimelwe yingqondo,” usho kanje. Uthe bazwile ukuthi kukhona othathwe amaphoyisa, wathi bafuna alihlanze lonke iqiniso, akhiphe nabanye uma indodakazi yakhe bayibulala bebaningi. Umholi wohlaka…

IYAKHULA isibalo sabadlali abamqoka kwi-Orlando Pirates okunamahe-muhemu okuthi bangase bangayiqedi isizini yeBetway Premiership ka-2025/2026, kuleli qembu laseSoweto, kulandela ukubuya kwezindaba ezithi u-Evidence Makgopa ucathanyelwa ngamaqembu adlala kumaligi aphambili e-Europe. UMakgopa (25) ongomunye wabadlali ababizwa kuqala esikimini somqeqeshi, u-Abdeslam Ouaddou, ungene kukubi washaya igoli ngesikhathi iBafana Bafana ithwele kanzima kwiCameroon emdlalweni we-Last 16 ye-Africa Cup of Nations (Afcon) eMorocco, ngeSonto. Njengoba iBafana isibuyele eNingizimu Afrika, aqala phansi amahlebezi akhomba emadlelweni aluhlaza lo mgadli owafika kwiPirates esuka kwiBaroka FC ngo-2022. Imibiko esabalele ikhomba ukuthi uMakgopa ufunwa yiBristol City yase-England edlala kwiChampionship. Nokho uPaul Mitchell weSiyavuma Sports Group ophethe izindaba zakhe akazange aphumele obala kwiSolezwe ngalokhu. “Akufihliwe ukuthi uMakgopa wayevele efunwa ngamaqembu ase-Europe ngesikhathi esuka kwiBaroka kodwa amaqembu naye bangavumelana, wagcina kwiPirates,” kusho uMitchell. “Njengoba kuvuleke iwindi lokushintshana ngabadlali kufanele kulindelwe ukuthi…

KUFINYELELA esigabeni sama-quarterfinal e-Africa Cup of Nations (Afcon) kwamaqembu esizwe athathwa njengezingqungqulu ebholeni lase-Afrika, sekudale isasasa kubathandi bebhola bakuleli zwekazi ngokuthi yiliphi eliyogcina likhale lemuka nalesi sicoco ngoJanuwari 18. Phakathi kwala maqembu, kubalwa iSenegal, iCameroon, iNigeria, i-Egypt ne-Ivory Coast engompetha abavikela lesi sicoco se-Afcon esinqobe ngo-2024. Ama-quarterfinal e-Afcon eqhubekayo eMorocco, azodlalwa kusasa nangoMgqibelo ezinkundleni ezahlukahlukene. Mali v Senegal (Kusasa ngo-6pm, e-Tangier Grand Stadium): ISenegal eyadla umhlanganiso kwi-Afcon ka-2021 eCameroon, ihlulekile ukuvikela isicoco kweyango-2024 e-Ivory Coast, iphuma kwi-Last 16. Nokho isikhombisile kusukela uqalile umqhudelwano wanonyaka ukuthi ibuye ngolunye unyawo, futhi ishabashekela ukubuyisa isithunzi sayo kulo mqhudelwano oseMorocco. Ukunqoba yonke imidlalo esigabeni samaqoqo kuGroup D kwe-The Lions of Teranga kuthumele umlayezo oshubile ezimbangini zayo, yaphinda yavulela isibhaxu sika 3-1 kwiSudan emzuliswaneni we-Last 16 izibekisela indawo kuma-quarterfinal. Ngakho kwenza umdlalo wayo wakusasa ube…

MQEQESHI weBafana Bafana, uHugo Broos, ubalule ukuba phansi kwezinga lePremier Soccer League (PSL) njengesinye sezizathu eziholele ekutheni leli qembu likhishwe ekuseni kwi-Africa Cup of Nations (Afcon) eqhubekayo eMorocco. IBafana ikhishwe yiCameroon ngo 2-1 kwi-Last 16 ngeSonto. Lokhu kushiye abaningi bedumele eMzansi kwazise bekunethemba lokuthi lokuthi leli qembu lizokwenza kangcono kunange-Afcon ka-2023, lapho labuya khona nendondo yethusi. IBafana itheleke eMzansi izolo, lapho ibihlangatshezwe khona yiqeqebana labalandeli esikhumulweni sezindiza, i-OR Tambo International Airport, eGoli. UBroos ukhale ngokuthi kade bebhekene nabadlali abadlala kumaligi amakhulu emhlabeni ekubeni bona beshaya ngabadlali abadlala kwiPSL. Esikwatini sakhe ubebophele abadlali abaningi abadlala kwiBetway Premiership. NguLyle Foster odlala e-England noSphephelo Sithole ogijima ePortugal, abadlali abadlala kumaligi uBroos angenankinga nawo. "Kunamaqembu kwiCup of Nations anabadlali abadlala e-Europe. Thina asinabo futhi lokho kuyibeka ngemuva iNingizimu Afrika," kusho uBroos. "ICameroon iyiqembu elisha.…

MHLELI: Kwesinye isikhathi uhulumeni uke ayekele inkinga ikhula kuze kube ibonwa abantu bese kuthiwa bazithathela umthetho ngezandla zabo. Le ndaba yabantu abakuleli ngokungemthetho sekuneminyaka abayizakhamuzi eMzansi beshaya amakhala ngayo. Ngikhumbula kahle eminyakeni edlule lapho neSilo esesebuza, uMdlokombane, sasizwakalisa ukungeneliseki ngayo, sikhuza ukuzithela ngabandayo kweziphathimandla. Ngaleyo minyaka kwakungesikhathi lapho iZimbabwe isaqala ukubhekana nonswinyo lwamazwe aseNtshonalanga. Kwakubhoke uMengameli wakhona uMnuz Robert Mugabe owabe engafuni lutho oluphikisayo ezweni lakhe, amaphoyisa namasosha akhe evulela isibhaxu kwabangahambisani neqembu lakhe i-ZanuPF. UMengameli wakuleli ngaleso sikhathi kwabe kunguMnuz Thabo Mbeki esimaziyo ngokuthi wayenakho ukuzwelana nesimo saseZimbabwe, ngaleyo ndlela izwe lethu lemukela isinoma kanjani abantu abathi babalekela isimo esingenalo uzinzo eZimbabwe. Futhi nanamuhla akakufihli lokhu uMnuz Mbeki, iyaziwa imibono yakhe ngalolu daba. Ukuwa komnotho waseZimbabwe kwaba yinkinga yeNingizimu Afrika njengoba kwakuvele kuxwayisiwe. Abantu abaningi bakuleliya zwe bathuthuleka lapha…

HLELI: Ngibhala le ncwadi ukuqondisa nokwazisa abafundi baleli phephandaba ngodaba olwaphuma kwiSolezwe langomhla ka-29 Disemba 2025. Labhalwa lakhishwa ephephandabeni engosini yemibono yabafundi. Lwalukhuluma ngezinto ezine. Likhuluma ngokubuswa nokuphathwa kwendawo yaseMbazwana Emandleni Community Trust. Lwaphinde lwathinta indaba yeMbazwana TMM3. Okwesithathu kwaba yiMbazwana Crossing. Okwesine kwaba AmaNgwane Lodge. Thina njengamanye ama-trustees amane axoxa akhulume ngodaba oluthinta i-Emandleni Community Trust, siyaziqhelelanisa naloya mbhalo owakhishwa yiSolezwe ngomhla ka-29 Disemba 2025. Thina njengamalungu amane Emandleni Community Trust asikaze sibhalele iphephandaba njengoba ezinye izakhamuzi nabahlebayo besola thina ngokubhaliwe. Mina njengesakhamuzi esakhele ubukhosi bakwaZikhali ngibuswa yiNkosi uZikhali endaweni yaseMbazwana, ngiyabuhlonipha ubukhosi nabaholi besizwe sakithi. Kungizwisa ubuhlungu nxa iphephandaba elidume izwe lonke lizoshicilela likhiphe udaba olunezinsolo ezibucayi ngalolu hlobo kodwa umbhali wodaba angazivezi ukuthi ungubani. Mina u-Edmund Zikhali ngabe ngiyingxenye yomhlangano owawubizwe yinkosi yesizwe kanye namalungu ebhodi le-Trust…

LITHI alinawo amandla okulungisa inkinga kagesi ikhansela laseWhite City, e-Utrecht, ngaseVryheid. Lokhu kulandela ukuthi umphakathi wakule ndawo ukhale ngokuhlala ebumnyameni kusukela ngoDisemba 26, ugesi uhanjiswa yimvula enamandla eyagasela kule ndawo. Ngokuthola kweSolezwe, ibalelwa ku-30 imizi esebumnyameni ngenxa yale nkinga. Ikhansela lendawo, uMnuz Inus Dekker, lithe umasipala wabo, iMadlangeni, awunawo amandla okumelana nomonakalo odalwe yizikhukhula. Lithe nalo lizamile ukufaka isandla ekutheni kubuye ugesi ezindaweni lapho obekuvuma khona. “Ngiyavuma ukuthi mina nomasipala siyahluleka wukulungisa lo monakalo,” uDekker ubuye wathi okunye okubuye kube yinkinga wukuthi ingqalasizinda kagesi isindala kanti ibingasekho esimeni esikahle, nezikhukhula zafika zenza yaba sesimeni esibi kakhulu kunakuqala. Uthe uma ebuka izinga lomonakalo, kungathatha izinyanga ezintathu ukuthi ulungiswe njengoba emunye umuntu olungisa ugesi nakhona ingekho i-crane, iloli kanjalo nezigxobo. “Okubi wukuthi isifundazwe kanjalo nomasipala, baphuthumisa usizo lwamaphasela okudla, izingubo zokulala…

AKUBA elokhu ebhebhetheke njalo amahlebezi okuthi uPitso “Jingles” Mosimane usendleleni ebuyela kwiMamelodi Sundowns kodwa kunzima ukuziba impi eqhubeka enkantolo phakathi kwababhekele izindaba zalo mqeqeshi obalwa nabaphambili eNingizimu Afrika naleli qembu laseChloorkop. Indaba kaMosimane yokubuyela kwiSundowns iqiniswa wukungashabalali kwamahlebezi akhomba ukuthi uMiguel Cardoso uzokhonjwa indlela maduze. Akukho nokho osekushiwo yiSundowns ngoCardoso. Kuma-vidiyo aqoshwe ejimini ngesikhathi leli qembu libuya emaholidini, uCardoso uyabonakala eqhubeka nomsebenzi wakhe njengenjwayelo. UMosimane ongenalo iqembu aliqeqeshayo okwamanje, washiya kwiSundowns eminyakeni eyisithupha edlule esehlale kuyona eyisishiyagalombili lapho aqoqa khona cishe zonke izicoco okuhlanganisa nezinhlanu zeligi. Lo mqeqeshi owasuka kwiSundowns waya kwi-Al Ahly yase-Egypt, akagcinanga ngokudla isicoco eMzansi neSundowns kodwa wayiphendula isikhondlakhondla sebhola lase-Afrika ngokuyiwinisa iCaf Champions League ngo-2016. Kwavela ukuthi ushiye kwiSundowns sekumuncu phakathi kwakhe nabaphathi bayo. Lokhu kwalandelwa wukufakwa kwakhe enkantolo nenkampani ephethe izindaba zakhe, i-MT Sports eholwa…