Tabla de contenidos para 2025-12-30 en Isolezwe

LWANDISIWE uhla lwabaculi abazonandisa emcimbini iFact Durban Rocks ezoba sePeople’s Park, eMoses Mabhida Stadium ngoLwesithathu ebusuku. Le ndumezulu yokuvala unyaka kuzoba ngeyokugcina ihlelwa wuDJ Tira noChad White abamemezele esitatimendeni emasontweni adlule ukuthi bayayidayisa. UTira uthe njengoba kungeyokugcina abantu bengalindela umcimbi osezingeni eliphezulu lapho bezophatheka kahle khona futhi nomsindo womculo ukhala kamnandi. “Kuzoba nabaculi abazomangaza abantu ngoba kukhona abangekho ohlwini kodwa abathi ngoba ngeyokugcina ngeke bahlale bangabi bikho,” kusho uTira othe umcimbi uzodonsa kuze kuse. Uthe uma ebheka emuva uyaziqhenya ngokuthi iFact Durban Rocks iwona mcimbi okhombise ukuthi iMoses Mabhida Stadium iyakwazi ukusingatha imicimbi yalolu hlobo njengoba sebenze angaphezu kuka-30. “Sinikeze ithuba amaciko amaningi ebesiwanika ithuba lokuthi azotshengisa ithalente lawo. Nalapho imisebenzi eminingi yethuliwe kwiFact Durban Rocks. Ngikhumbula nje kudala sethula iBig Nuz. Eish kubuyisa izikhathi ezimnandi ngoba sisebenzile ngale Fact…

MVULA engakhawuki selokhu kuqale inyanga kaZibandlela iyinkomba yokuthi leli hlobo lizoba ngelenala kwabalimayo. Lezo yizindaba ezinhle uma nje izulu lingezukucekela phansi okuhlwanyelwe. Ngakolunye uhlangothi, abantu kumele bakulungele ukubhekana nesimo sezulu esingaqageleki nesiguquka njalo. Lesi yisexwayiso esesivele sikhishwe abehhovisi lezangoma zezulu abagagule ukuthi kusukela kule nyanga kuze kube uMbasa wonyaka ozayo, izwe lonke kumele lilindele iziwuhlu zemvula kwesinye isikhathi ezohambisana nesankahlu, ukuduma nomoya onamandla. Sibonile muva nje ezindaweni eziningi zesifundazwe iKwaZulu-Natal, kudaleka umonakalo okubalwa kuwo izikhukhula ogwini oluseningizimu. Kulolu shicilelo lwanamuhla sibike ngomonakalo olimaze ingqalasizinda eziFundeni ezifana naMajuba naseMzinyathi, lapho kuphazamiseke kakhulu nezikhungo zezempilo. Kuvele kunesexwayiso ngokuthi izindawo ezifana naseBaqulusini zingase zibhekane nesimo esingesihle kulezi zinsuku. Lezi zimo zilokhu zibonakala nakwezinye izifundazwe njengaseGauteng, lapho imvula ehambisana nokuduma okunamandla nombani kuyimpilo yansuku zonke selokhu kuqale uDisemba. Konke lokhu kumele kube umlayezo wokuthi…

MHLELI: Kukhona umehluko omkhulu engiwubona wenzeka ebholeni lase-Afrika njengoba kuqhubeka lo mqhudelwano we-Africa Cup of Nations (Afcon) eMorocco, kulezi zinsuku. Ngizoncoma kakhulu izinto esezenziwe umengameli we-CAF uPatrice Motsepe ngoba okuhle okwenzeka enkundleni kubukeka kuhambisana nezinguquko afike nazo kule nhlangano. Okokuqala nje; kusukela emiqhudelwaneni yamakilabhu okukhona kuyo i-CAF Champions League ne-CAF Confederations Cup kuze kuzofika kuyo i-Afcon, useqinisekisile ukuthi imali yemihlomulo kwabawinayo iyakhuphuka. Ayikho into ebeyehlisa isithunzi njengokuba ncane kwemali yemiklomelo emaqenjini eqhudelanayo. Eqinisweni ngibona sengathi yilesi simo esasenza abadlali abaningi abadlalela amaqembu ase-Europe nakwamanye amazwe babe madolonzima ukushesha beze uma kuyi-Afcon. Manje sesibona umehluko lapho abadlali bezimisela ngokugcwele uma bemele amazwe abo. Phambilini; ibiba khona le nkinga yokuthi sibone umdlali egila izimanga eqenjini lakhe phesheya kodwa kuthi uma kufika esikimini sezwe lakhe athele umzimba phansi, kungabe kusaba khona lokhuya kulwa…

NOZINTI weNigeria, uStanley Nwabali, uyayichitha eyokuxega kodonga lwasemuva lwezakhe ezidedele amagoli amabili ngemizuzu yokugcina yokuphela komdlalo ziguqisa iTunisia ngo 3-2 kuGroup C we-Africa Cup of Nations ngoMgqibelo, eFez Stadium, eMorocco. Nakuba iNigeria igcine ikwazile ukuzibekisela indawo emzuliswaneni we-Last 16 ngokunqoba iTunisia, okuyenze yahlala phezulu kuGroup C ngamaphuzu ayisithupha kodwa ukudedela kwayo amagoli amabili ngemizuzu yokugcina ihamba phambili ngo 3-0, yikhona okwenze ezinye izingqapheli zebhola zashaya amakhala ngodonga lwasemuva lwaleli qembu. ISuper Eagles izodlala umdlalo wokusonga isigaba samaqoqo ne-Uganda namuhla ngo-6 ntambama, eFez Stadium. “Emqhudelwaneni walolu hlobo akugwemeki ukungenelwa ngamagoli. Ngisho namaqembu amakhulu ahlonishwayo emhlabeni ayangenelwa amagoli "Angicabangi ukuthi sinenkinga odongeni lwethu lwasemuva, kuzofanele siqhubeke siyibambe nasemidlalweni elandelayo. "Ibhola lithuthuke kakhulu manje, awasekho amaqembu okufanele athathwe kalula. Wonke umuntu ufuna ukuwina,” kusho uNwabali ekhuluma nabezindaba. “Siyafisa ngayo yonke indlela ukuthi…

MCULI kamaskandi, uLethukuthula "Umafikizolo" Mhlongo, uyaqhubeka nokuqopha umlando kule ndima. UMafikizolo uyena kuphela umculi kamaskandi onengoma kwezingu-10 eziyizintandokazi zikaNobhala Jikelele we-ANC, uFikile Mbalula. Uyoncengwa Unyoko ukleliswe wuMbalula kunombolo 9. Ekhuluma neSolezwe, uMafikizolo uthe zisezincane lezi zimanga ezisagilwe yileli noni lakhe. "Ngizobonga nje ithuba lokuba ingoma ithole ukuvunywa ngumuntu omkhulu kangaka okunguNobhala Jikelele we-ANC. Lokhu kubonisa ukuthi kusebenzekile kakhulu." Ephawula ekhasini lakhe lika-X, ubhale kanje uMbalula: "Lo nyaka bewusemgangathweni emkhakheni womculo futhi amaciko akhiqize umculo omnandi. Ziningi izingoma engizijabulelile kulo nyaka futhi nginesiqiniseko sokuthi iningi lenze okufanayo. Ngezansi ngiklelise izingoma ezingu-10 kwezingi engizijabulelile. Zijabulele," kushaya ngezinqamulelayo uMbalula, odume ngelikaDJ Mbaweezy uma eseklwebha amapuleti ezindaweni zobumnandi. NgokukaMbalula, ingoma eziqwaqwade emakhanda kulo nyaka ngekaDJ Maphorisa, Xduppy noKabza De Small ethi Abantwana Bakho. Nakunombolo 2 kuhleli ingoma yalezi zinsizwa ethi Dlala Ka Yona. EkaStogie…

SITHWALISE kanzima i-Eskom isimo sezulu esingesihle ngalesi sikhathi samaholidi esenze kwaphazamiseka ukuhlinzekwa kukagesi ngenxa yokulimala kwengqalasizinda. Lokhu kuvezwe okhulumela le nkampani, uNksz Daphne Mokwena, oveze ukuthi kubashaye kakhulu ukulimala kwengqalasizinda yabo ngenxa yesimo sezulu. Uthe babhekene nengwadla ngenxa yokwanda kwezehlakalo zokuphazamiseka kukagesi ngenxa yezulu. "Alukho uhlelo lokucinywa kukagesi oluqhubekayo ezweni manje. Kodwa kwande ukubikwa kwezehlakalo zokuphazamiseka ekuhlinzekeni kukagesi ngenxa yesimo esingesihle sezulu ezifundazweni ezehlukene," usho kanje. Ubale izifundazwe iKwaZulu-Natal, Eastern Cape, Limpopo naseFree State njengezishayeke kakhulu ngenxa yemvula ehambisana neziphepho. "Kulezi zifundazwe kuphazamisekile ukuhlinzekwa kukagesi ngenxa yezulu. Kodwa yinto esiyisukumele phezulu ukuqinisekisa ukuthi ingqalasizinda iyalungiswa ukuze abantu bathole ugesi," usho kanje. Uthe kwezinye izindawo kunzima ukusheshe bafinyelele kuzona ngenxa yezikhukhula nokuthi kusuke kungahambeki kahle. "Kwezinye imigwaqo igugulekile ngakho kuba nzima ukusheshe sifinyelele kuzona ukuze silungise umonakalo. Sixusa umphakathi ukuthi ubekezele…

OLU Lwesibili lokugcina kule nyanga nakulo nyaka, awuyophinde ulubone. Uyozikhohlisa uthi olulandelayo kuseyilona kanti phinde. Kuningi okwenzekile ubukela, okuhle nokubi. Konke bekunabenzi bakho kungekho obekuzenzekela. Kodwa konke kungaphansi kwesandla sikamenzi. Inkinga konke bekuhlukene kabili - okuhle nokubi. Nakuba kwenzekile ungazikhipheli ngaphandle ngoba ubile yingxenye yakho kumbe wangaba yingxenye yakho kodwa kufanele ukuba kukuthintile emphefumulweni nasemoyeni. Unyaka ongeke uthi ubumuhle kumbe umubi ngoba yilowo nalowo unguyena nawe unguwena. Kodwa uma singakhumbula ukuthi sonke sinezinkaba futhi sancela engonweni, akekho ongadlulanga lapho, siyathinteka ngokuthi singasho ngazwi linye sithi ubumubi unyaka, kumbe ube nezahlakalo ezingahlalanga kahle enhliziyweni kumbe ubumuhle. Angiqale ngawe okungafanale ukhombe kude kunesifuba sakho. Okuhle kufanele uziqhenye ngeqiniso uma ukwenzile, hhayi kuwena kodwa komunye ongumakhelwane wakho. Kufanale babekhona abaphakamise igama elithe “siyabonga sengathi iNkosi ingakugcina” ngezenzo ezibe zinhle ozenzile ngenhliziyo emhlophe…

MHLELI: Kwelakho eliwela umfula ugcwele, ngicela ukuncoma onogada baseNsimbini Lifestyle, okuyindawo yokuzipholela eseFolweni. Lapha ngikhuluma ngoMnuz Shozi waseNtabankulu, eMangamazini noMnuz Mkhize wangakwaSabela esitolo eMkhazini. Labo baba bakwazile ukuthembeka njengoba kube khona omunye wabangani bethu olahlekelwe umakhalekhukhwini wemali eshisiwe kodwa bakwazi ukuthi balubambe ucingo bazichaze nokuthi basebenza eNsimbini Lifestyle, angafika ayilande. Abakwenze kumngani wethu bakwenze nakwabanye, izandla zedlula ikhanda. UNkulunkulu aze abagcine nemindeni yabo. Nhlaka Cele EMKHAZINI…

ISITOBHA saseKapa esagxekwa ngokujaha imali saze salahlekelwa yindawo kwiBafana Bafana, uFawaaz Basadien, sifunge sagomela ukuthi kasisoze saliphosa ithawula ekulweleni indawo yaso esikimini seMamelodi Sundowns. UBasadien (29) ufike kwiSundowns ngoJulayi lilikhulu isasasa esuka kwiStellenbosch FC, elandelwe ukuzoqinisa ngokuphindiwe leli qembu laseChloorkop. Nokho kuze kube yimanje izinto kazikahlangani kuBasadien kwazise ulizwa ngendaba ijezi okuyisimo esimlahlekisele ngendawo abeseqala ukuyenza eyakhe emuva kwesokunxele kwiBafana. Maningi amaqembu athathwa njengamakhulu abebangisa iSundowns ngesikhathi esuka kwiStellenbosch kodwa waqoma kuleli qembu likaMiguel Cardoso. Lo mqeqeshi wasePortugal ubukeka engakholelwa komunye umdlali ngaphandle kuka-Aubrey Modiba kule ndawo edlalwa nguBasadien. Ngaphezu kwalokho, kukhona uDevine Lunga waseZimbabwe abanga naye ijezi. Kunezingxenye zabalandeli ezingakufihli ezinkundleni zokuxhumana ukuthi uBasadien akekho esikwatini seBafana esidlala kwi-Africa Cup of Nations (Afcon) eMorocco ngenxa yokulandela kwakhe imali esikhundleni sokuhlala kwiStellies noma ukusayina kwelinye iqembu. Ngesikhathi ekhuluma neMamelodi Sundowns…

I-HOLLYWOODBETS Sharks ithembe abadlali abasebancane ukuthi bavale isikhala esizovuleka uma sekuhambe ukaputeni wamaBhokobhoko, uSiya Kolisi. Leli qembu liqinisekisile ngesonto eledlule ukuthi lo mdlali uzolishiya ekupheleleni kwesizini, abuyele eqenjini laseKapa, iDH Stormers. Isikhulu esiphezulu seSharks, uShaun Bryans, sithe ukuhamba kwakhe kuzovulela ithuba lokuzibonakalisa ezingeni eliphezulu abadlali okubalwa kubona uNick Hatton noMatt Romao. “Indima ekhathulwe nguSiya eqenjini ingaphezulu kwalokhu abekwenza enkundleni. Ulethe ubuholi, ukuzithoba nokuhlonipha umdlalo okukapakele kozakwabo. Yize kungekho lula ukuhlukana nomdlali okuleli zinga kodwa siyasihlonipha isinqumo sakhe sokubeka umndeni wakhe phambili,” kusho uBryans. “USiya uzoshiya izimfundiso ezizohlala eqenjini ngisho engasekho futhi leli yithuba lokuthi kuqhamuke abanye abaholi. Sinabadlali abanekhono asebekulungele ukunyukela kwelinye izinga. Abadlali abafana noNick Hatton, Matt Romao nabanye bathole ithuba lokufunda komunye wabadlali abahamba phambili emhlabeni futhi sibheke bona ukuthi bakhule, babe yikusasa leqembu.” UHatton (22) useqalile ukudlala…

IBASHIYE behlukene phakathi abalaleli beGagasi FM isinqumo salesi siteshi sokuncisha umbhobho isilomo somsakazi, uFelix Hlophe, esisematheni kulandela ukusabalala kwama-video siqophisana ngamazwi nomkaso, uTracy Smith-Hlophe. Izolo ekuseni abalaleli basale bebuzana ngokungazwakali kukaFelix ohlelweni lwakhe iThe Uprising alusakaza noMinnie Ntuli. IGagasi FM likhiphe isitatimende lathi lo msakazi unikwe ikhefu lamasonto amabili. “Lokhu kuzovumela isiteshi ukuthi sihlole kahle isimo okubikwa ngaso ezinkundleni zokuxhumana nasemazikweni ahlukene nokunika uFelix ithuba lokuthi abhekane nezindaba zakhe ezidinga ukuthi azinake,” kusho isitatimende. Sithe uyoze abuyele emoyeni ngoJanuwari 19. Esikhaleni sakhe kwiThe Uprising kubanjiswe uHeazy ozoqhubeka noMinnie. Ibinkulu injabulo kubalandeli bakhe bekubheke ngabomvu ukumuzwa esakaza noLinda “Mr Magic” Sibiya noSelbeyonce kusasa ebusuku ohlelweni lokuwelisa abalaleli ku-2026. Lolu hlelo oluzongena ngo-9 ebusuku seluzobanjwa wuMr Magic noSelbeyonce kuphela. Kube kuningi ukuphawula ekhasini leGagasi kwiFacebook ngalezi zimemezelo. USiyacela Nzuza ushayele isiteshi ihlombe…

UJATSHULISWA ukuthi kuze kwafika isikhathi sokuthi athathe umhlalaphansi esadla anhlamvana umasiteshi waKwaMashu, obevaleliswa ehhotela i-Octavia, eNanda, ngeSonto. UBrigadier Richard Zakhele Nzama (60) usezibeke phansi izintambo emaphoyiseni, kulandela ukuyibamba iminyaka engu-38. Ekhuluma neSolezwe, uthe uzibala namaphoyisa anenhlanhla, eficwa yisikhathi sempesheni esaphila. “Abaningi ozakwethu ebengibazi, ngibajwayele behlelwa umshophi wokubulawa besemsebenzini. Ngithe uma ngibuka ubude bendlela, ngificwa yilesi sikhathi ngisaphila, ngazizwa ngifikelwa ukubonga,” kusho uNzama. Uthe amaphoyisa abhekene nengwadla yokuthi ngesikhathi enza konke okusemandleni ukuqapha ubugebengu, nezigebengu ziphuma inqina, ziwasoconge, wathi eminyakeni ayisebenzile emaphoyiseni kusuka ejoyina umbutho ngo-1988, ufunde ukuthi ukukwazi ukusebenzisana nabantu, inhlonipho nokuthobeka kuyamsebenzela umnikazi. “Ngisebenzise khona kakhulu ngo-2006 ngesikhathi ngiyoba umasiteshi KwaDabeka. Leya ndawo yayinenkinga enkulu yezepolitiki. Owayephethe ngaphambi kwami akahlalanga kahle ngenxa yayo ipolitiki, kwaphoqa ukuthi ahambe. Mina ngakwazi ukuthi ngihlale iminyaka embalwa ngaphambi kokuthi ngiyojoyina esaKwaMashu ngo-2011,” usho…

UNGASE ube muhle unyaka ozayo kubathengi njengoba irandi lakuleli livale unyaka likhombisa ukudlondlobala ngendlela eyagcina ukubonwa eminyakeni engaphezu kwengu-10 eyedlule uma liqhathaniswa nedola laseMelika. Ongoti bezomnotho balindele ukuthi kuvalwe unyaka irandi libuyelwe amandla lize lifike ezingeni elagcina ukuba kulo eminyakeni engu-16 eyedlule. Ongoti bathe ukufadabala kwedola laseMelika, uzinzo kwezepolitiki eNingizimu Afrika, kanye nokutshalwa kwemali kuleli ikhona okwenze ukuthi irandi libuyelwe amandla. Kulo nyaka irandi lakuleli likhule ngo-13% uma liqhathaniswa nedola. Kulezi zinsuku irandi lidlalela ngaphansi kuka-R17 uma liqhathaniswa nedola laseMelika nokuyinto ekade yagcina ukubonwa. Irandi lagcina ukuba namandla kangaka ngo-2009, ngehlandla lokuqala likaMengameli Jacob Zuma. Ngehlandla lesibili lokuphatha kukaZuma irandi lehlelwa kakhulu amandla. Ngesikhathi kungena uMengameli Cyril Ramaphosa, irandi lake lathi ukubuyelwa amandla kodwa kwabuye kwanhlanga zimuka nomoya. Ngonyaka owedlule kungene uhulumeni wokubambisana owakhiwe amaqembu ayishumi. Ungoti waseWells Fargo Securities,…

MHLELI: Mkhulu umonakalo owadaleka ngokushintsha kwezinto sijabulela ukuthi singena kuhulumeni wentando yeningi, asazanga ukuthi sizifaka kudukathole welimnyama ihlathi leli. Ezweni kumapeketwane, umvuzo wokushintsha koMbuso uwela ezandleni zabohlanga lwethu kusilethele lonke uhlobo lwenkohlakalo eyenziwa ngabaphethe abagcina besimemela abantu abakwi-Afrika yonkana abanenkohlakalo edida ngisho uSathane. Ezweni lethu kukhona yonke inhlobo yobugebengu. Lokhu sekwenza ukuba sihambe siqaphe eqolo ngenxa yemigulukudu yasemazweni ahlukene engena ngokunyelela kuleli. Lapha ngibala eyaseZimbambwe, Mozambique, Nigeria, Malawi ngisho amaBangladeshi, ama-Pakistan nama-China imbala. Amacala amaningi abandakanya ukubulala, ukubamba inkuzi izimoto ezisabalalisa imali nezidakamizwa abahamba phambili kuwo abokufika. Isinyokotho sezimoto ebeziphuma emngceleni iLebombo, izakhamuzi ezikuleli ziwubufakazi bokuthi siphilani ezweni elihlezi phezu kwebhomu elingase liqhume noma yinini. Okunye okushayisa ngovalo ukuthi amanye kula mazwe, okuyiNigeria neMozambique, anenkinga yamavukelambuso. Okwenzeka eNigeria sekuze kwadonsa usikhuni-phambana-nobhoko, uMnuz Donald Trump, wathumela umbutho wezempi wahlasela…

IBHEKENE nengwadla yenkinga yamanzi isibhedlela sesifunda, iChurch of Scotland, esiseMsinga, okuthiwa sesidonse isikhathi eside kakhulu kungaphumi ngisho iconsi kompompi. Okhulumela uMnyango wezeMpilo KwaZulu-Natal, uMnuz Ntokozo Maphisa, uthe bayalwazi udaba lwenkinga yamanzi kulesi sibhedlela. Echaza ngalokhu uthe: “Kuliqiniso ukuthi amanzi endaweni sekunesikhashana engekho nokuwudaba olusetshenzwa ngumasipala wendawo. Nathi lokhu ukungabi bikho kwamanzi endaweni kuyasithinta kakhulu. Kodwa umnyango wenza konke okusemandleni ukuqinisekisa ukuthi kunamanzi esibhedlela.’’ Eqhuba uthe zikhona ezinye izindlela abazenzayo ngenhloso yokubhekana ngqo nale nkinga ekhinyabeza ukusebenza kwesibhedlela. ‘’Sikhuluma nje, sinalo ipitsi elisebenzayo bese kuthi amanye amane sisohlelweni lokuwalungisa ukuze nawo akwazi ukunezelela ngamanzi. Kuphinde kube khona amathangi amanzi umasipala ofaka kuwo amanzi uma ekhona,’’ usho kanjena. Uveze ukuthi banayo nemoto ethwala amanzi yomnyango okuyiyona elekelelayo uma sekukubi kakhulu, wathi angeke bakushaya indiva ukuthi inkulu kakhulu inkinga yamanzi kulesiya sifunda sikaMasipala…

KUBHIYOZA kwabadlali beZimbabwe ngesikhathi becishe bephazamisa iBafana Bafana kwiNdebe yoMhlaba, kwashiya isilonda enhliziyweni yomqeqeshi weBafana Bafana uHugo Broos ozibuyise zishisa izinduku emdlalweni ka-Group B we-Africa Cup of Nations (Afcon). IBafana kayizange igcine ngokubhodlisa umqeqeshi wayo kepha izibekisele indawo kwi-Last 16 kulandela ukunqoba kwiZimbabwe izolo ebusuku, eMarrakech Stadium, eMorocco. Amagoli angene elandelana esiwombeni sokuqala eshaywa ngoTsepang Moremi eleBafana noTawanda Maswanhise eleZimbabwe ngomzuzu wesikhombisa nangoka-19 ngokwahlukana, kwagcina kuyiwe ngawo ekhefini. Nakuba uBroos ebefihlile sonke lesi sikhathi, ugcine ebhodlile ngaphambi komdlalo ukuthi akayithandanga indlela abadlali beZimbabwe abajabula ngayo ngesikhathi becishe bephazamisa iqembu lakhe endleleni ebheke eMexico, Canada nase-United States of America (USA) ngonyaka ozayo. IBafana neZimbabwe bebeseqoqweni elilodwa emidlalweni yokuhlungela iNdebe yoMhlaba. Ngesikhathi la maqembu egcina ukubhekana eMoses Mabhida Stadium, eThekwini, yacishe yawona umcimbi ngenxa yokwehluleka kweBafana ukuthola amaphuzu amathathu. Sekuwumlando ukuthi iBafana…

KUSHAYWA kwamagoli emqhudelwaneni we-Africa Cup of Nations (Afcon) oqhubekayo eMorocco, kubukeka kusahamba njengoba bekulindelekile kubalandeli nabathandi bebhola kwazise abadlali abasazihola phambili ngamagoli yilabo abebebhekiwe ngenxa yezinga labo namaligi abadlala kuwona e-Europe. Phakathi kwabadlali abasahamba phambili ngamagoli kulo mqhudelwano we-Afcon osungene esontweni lesibili, kubalwa kubo uRiyad Mahrez we-Algeria, u-Ademola Lookman weNigeria, uLassine Sinayoko weMali, u-Amad Diallo we-Ivory Coast, uBrahim Diaz weMorocco, u-Elias Achouri weTunisia, noNicolas Jackson weSenegal. Kwi-Afcon ka-2023 eyayise-Ivory Coast, umhlanganiso wadliwa ngu-Emilio Nsue we-Equatorial Guinea ngamagoli amahlanu. RIYAD Mahrez (Algeria): Ngaphambi kwemidlalo yayizolo, nguyena obezihola phambili ngamagoli amathathu. Ungomunye wabadlali abanegama nababhekiwe kulo mqhudelwano we-Afcon ngokwezinga namagalelo abo. UMahrez (34) ozakhele igama kwiManchester City kumasizini edlule, usegijima kwi-Al-Ahli SFC yaseSaudi Arabia. Ngomunye wabadlali abenze kahle kwi-Afcon kule minyaka embalwa edlule nokwenza abalwe nababhekiwe ekuqhubekeni nomgqigqo wokudla isicoco sokushaya amagoli…