Tabla de contenidos para 2025-12-24 en Isolezwe

SAZIWAYO waseThekwini, uMinenhle "Minnie" Dlamini, uphunyuke olakeni lophiko oluphenya amacala abucayi, olwaziwa ngeSIU, maqede wazitholela itoho. Lesi silomo sesethula amazwibela emidlalo ye-Afcon kwiNetflix. Le ntokazi esibuya kwiMetro FM nakwiSABC1 yethula lolu hlelo ngokubambisana noRobert Marawa kanye noMelissa. Ngokusho kwabeNetflix, lezi zilomo zizokuthatha zikubeke kokwenzeka kule midlalo kuze kushaye uJanuwari 19. UMinnie unyelwa yinyoni esandleni nje, usanda kusinda ngokulambisa kwabeSIU emuva kokuhlomula kungafanele emalini yeNational Lotteries Commission. Isolezwe lithole ukuthi uMinnie ulanyulelwe ukuzivumela ukuthi uzowubuyisa u-R50 000 awuthola ngendlela engafanele enhlanganweni engenzi nzuzo, iMshandukani Foundation eminyakeni eyedlule. Lokhu kuvele emuva kophenyo olunzulu lweSIU, okuyilo eliphenye uMinnie maqede izinqe zahlala obala. Le mali yayiyingxenye yenkece eyayibekelwe uchungechunge lokukhangisa ngomqhudelwano i-2016 Rio Olympic Games. Abaphenyi bathola ukuthi imali yagcina seyifeza ezinye izinhloso. AbeSIU bakuqinisekisile ukuthi uMinnie wayengafanele ukuhlomula kulesi samba. Bathe uvumile ukuthi…

LAKULELI lisale ngaphandle ngesikhathi iMelika inikeza uxhaso lwezigidi zamadola emazweni asezwenikazi i-Afrika. INingizimu Afrika ayitholanga lutho ngesikhathi iMelika isayina izivumelwano zokusebenzisana namazwe ase-Afrika. Lezi zivumelwano zizokwelekelela empini yokulwa nezifo ezithathelanayo e-Afrika. INingizimu Afrika iyona ehamba phambili ngesibalo sabantu abahaqwe yingculaza e-Afrika. IMelika isanda kunqamula uxhaso lwayo lwezinhlelo zokulwa nengculaza eNingizimu Afrika. Uxhaso lwanqanyulwa emva kokufungiswa kukaMengameli Donald Trump. Uxhaso obelutholwa yiNingizimu Afrika ezinhlelweni zokulwa nengculaza lulinganiselwa ku-R400 million ngonyaka. Uhulumeni wakuleli unyamanambana kuhulumeni kaTrump njengoba esola uhulumeni wakuleli ngokuhlukumeza amaBhunu nokuwaphuca umhlaba wawo. Okuphinde kufakele uhulumeni waseNingizimu Afrika isigcwagcwa kuhulumeni kaTrump isinqumo sakuleli sokumangalela elaKwa-Israel ngempi eqhubeka eGaza. Icala elifakwe elakuleli lithethwa eNkantolo yaMacala aMazwe oMhlaba. Mumva nje, uTrump usanda kumemezela ukuthi iNingizimu Afrika ayamukelekile emhlanganweni wamazwe angaphansi kweG20 ozobanjelwa eMelika, ngonyaka ozayo. UTrump akazange alubhade emhlanganweni weG20 owawubanjelwe kuleli.…

KUSASA usuku olukhulu nolumqoka ngezindlela ezahlukene, ikakhulu eBandleni likaKristu, njengoba umhla ka-25 Disemba kuwusuku lokubungaza ukuzalwa kukaJesu. Lona yiwona msuka owamukelwa umhlaba wonke ngobukhona bukaKhisimusi. Nokho lolu suku selwanaba lwaze lwaba yisikhathi lapho izindawo zokusebenza zithatha ikhefu, imindeni nabangani behlangane ngokuthokoza, kwabaningi kuba usuku lokubonana kade bagcinana kanti kwabanye lesi yisikhathi sobumnene nokuphana. Nalapha emndenini wephephandaba Isolezwe, sifisa ukuzwakalisa ukujabula kakhulu kubafundi bethu abasesekayo usuku nosuku befunda izindaba ezikhiqizwa yizintatheli zethu. Kithina abafundi bezinkundla zethu, okukhona kuzo iphephandaba nezinkundla zokuxhumana zobuchwepheshe besimanje, bangumndeni. Singumndeni ngoba abafunda izindaba ezikhiqizwe egameni leSolezwe basethemba njengesikhungo abangathola kuzo okuthinta impilo yabo. Abafundi bethu bakhipha imali zabo bathole izindaba zethu, okuyikhona okusenza sikwazi ukuqhubeka nokusimama njengebhizinisi. Ngakolunye uhlangothi, kunabakhangisi abangumgogodla wokunyakaza kwalo mthombo oyiSolezwe. La mabhizinisi athemba izinkundla namaphephandaba ethu njengenqola abangakwazi ukudlulisa imiyalezo yabo…

MHLELI: Ulimi aluyona nje indlela yokuxhumana, luyingxenye ebalulekile yakho konke esiyikho, isithunzi sethu, isiko nomuzwa wethu wokuba ngamalungu omphakathi. UMthethosisekelo waseNingizimu Afrika uyakuveza lokhu ngokuhlinzeka ukuvikelwa kwamalungelo ezilimi. Nokho umbiko wamaLungelo ezamaSiko, ezeNkolo neziLimi ka-2025 okhishwe yi-FW de Klerk Foundation uveza ukuthi amalungelo ezilimi asengelinye lamalungelo avikelwa kancane. UMthethosisekelo uvikele amalungelo ethu ezilimi ezigabeni ezintathu ezibalulekile: Isigaba 6 samukela izilimi ezisemthethweni futhi sidinga ukuthi uMbuso uziphathe ngokulinganayo, uthathe nezinyathelo ezisebenzayo nezakhayo zokuphakamisa isimo nokusetshenziswa kwezilimi zomdabu. Lesi sigaba siphoqa uhulumeni ukuthi asebenzise izilimi ezisemthethweni ezingaphezulu kolimi olulodwa lapho esebenzisana nomphakathi Isigaba 29 (2) siqhubekela phambili ngokunikeza wonke umuntu ilungelo lokuthola imfundo ngolimi olusemthethweni alukhethayo. Isigaba 30 sigcizelela ilungelo lawo wonke umuntu lokusebenzisa ulimi alukhethayo. Lezi zigaba zihlinzekela ukuqinisekisa ukuthi amalungelo ezilimi awagcini ngokuba yizimfundiso noma izithembiso nje kodwa ayasebenza futhi…

UDUKUZA ebumnyameni umndeni wakwaXulu eNyamazane, KwaMaphumulo, ngemuva kokuba uhlaselwe ngabantu abangaziwa ngoMsombuluko ebusuku. Kulesi sigameko kudutshulwe kwafa uMnuz Mzwamandla Xulu (57) kwalimala kabi nendodana yakhe, uMnuz Mthokozisi Xulu (24) ophuthunyiswe esibhedlela kukubi. UNksz Smangele Xulu oyindodakazi kamufi uthe basadukuza ebumnyameni mayelana nesigameko. Elandisa, uthe bebesegcekeni kushiswa inyama ngesikhathi kuthushuka amadoda amabili avele adubula ephindelela kuyise. "Ubaba uphelele endaweni yesigameko ngoba bamdubule nasekhanda. Badubule nomfowethu kodwa wakwazi ukubaleka. Ngaleso sikhathi mina ngibone konke obekwenzeka ngoba bengizongena esangweni elincane kanti ngizozithela kule nto," echaza. Uthe ababulali bebepake imoto yabo ngaphezulu kwakubo. "Babaleke bayongena emotweni bobabili," echaza. Uthe sebehambile, baphuthumise umfowabo esibhedlela. "Sididekile, asazi ngampela ukuthi ngobani laba abasicabangela into ebuhlungu kangaka," echaza. Uthe uyise abekho abantu abaziyo abexabene nabo, waveza ukuthi uyise wayesembonini yamatekisi kodwa sekuphele iminyaka engu-10 aphuma kuyona. "Ubaba waphuma…

UMCULI wama-piano ne-house ongomunye wabangaconsi phansi kule ndima, uZee Nxumalo, usedalule ukuthi ukuqonda nokuqaphela izinselelo nokuhlukumezeka abantu ababhekana nakho ebudlelwaneni bothando bumkhuthaze ukukhipha ingoma ekhuza kona. UZee usho njalo exoxa neSolezwe, malungana nengoma yakhe noDJ Lag esematheni kulezi zinsuku ethi Ngiyasindelwa, abayenze nophrojusa uK.C Driller, ejabulisa abantu ezindaweni zobumnandi futhi enomyalezo semqoka okhuza ukuhlukumezana othandweni. Uthe umyalezo wale ngoma, ekwi-albhamu kaDJ Lag esihloko sithi Southside Mixtape, ephume ngoNovemba 14, ukhuza ukuhlukumezana kwabathandanayo, ikakhulu uma kucaca ukuthi lowo muntu okuhlukumezayo akawuboni umthelela walokho kuwena. “Kube yingoma okube lula kakhulu ukuyenza ngoba ikhuluma ngesimo esaziwa cishe yiwona wonke umuntu emphakathini, nengikhuza ngayo lesi simo engisibona senzeka ebantwini abaningi abathandanayo, engihlose ukukhuza lowo mkhuba ngayo,” usho kanje. Eqhuba, udalule ukuthi lo nyaka ube muhle kakhulu kuyena ngokomculo njengoba okuningi akwenzayo ngawo kuthele izithelo…

IZINSOLO zenkohlakalo zimlandela egodini umlingisi, uPresley Chweneyagae, njengoba iSpecial Investigating Unit (SIU) ithole igunya lokugcina umuzi wakhe okuthiwa wawuthenga ngemali yeNational Lotteries Commission (NLC) ngokungemthetho. UPresley, wodumo lwefilimu iTsotsi, washona ngoMeyi, nonyaka. Ngesikhathi eshona, iSIU yase iqale uphenyo ngoxhaso olwatholwa yinhlangano engenzi inzuzo iSouthern African Youth Movement. Le nhlangano emelwe ngu-Alfred Muzwakhe Sigudla, yathola uxhaso luka-R15 million kwiNLC lokwenza izinhlelo zabantu abasha zezobuciko. Imali yagcina ingena enkampanini kaPresley, iDomestic Baboon (Pty) Ltd kaPresley. Kusolwa ukuthi wathenga ngayo umuzi ePitoli, ngemali elinganiselwa ku-R889 000. Ngokwencwadi etholwe yiSIU kwiSpecial Tribunal, iJaji uM Victor, liyalele umfelokazi kaPresley, uCharlaine Christinah Chweneyagae, ukuthi angawudayisi noma aqashise ngalo muzi kuze kuba kusongwa uhlelo lokubuyisa imali ezinsukwini ezingu-60. Uzakwabo owayelingisa indawo ephambili, uTerry Phetho, wadlelwa umuzi eBryanston, iSIU eyathi wathenga umhlaba wase eyakha ngemali eyatholwa inhlangano engenzi…

HLOSE ukuthi bangasaleli emuva kwezobuchwepheshe abafundi abafunda ezikoleni zikahulumeni owesifazane waseHluhluwe, esungula umncintiswano werobhothi eliwuthisha owethulwe eMhlanga, izolo. UNksz Thando Gumede waseMnqobokazi, unguchwepheshe kwezeCoding and Robotics, kulandela ukukhala emuke nesicoco sikaMiss Tech Universe eThailand, nyakenye, eqwaqwada abanye ompetha bamazwe avile ku-50. Leli robhothi - elidume ngelika-Iris - ulethule ebantwini ngo-Agasti nonyaka, kanti likwazi ukufundisa izifundo zasezikoleni zamabanga aphansi, athe thuthu kanjano nasezikhungweni zemfundo ephakeme. U-Iris usebenza njengothisha, uyalekelela ngokufundisa, ukumaka nokucubungula ulwazi. UNksz Gumede uthe emuva kokubona ukuthi u-Iris uthengwa kakhulu yizikole ezizimele, ubone kukuhle ukuthi enze umncintiswano wokuthi nezikahulumeni izikole zihlomule ngaye. “Kulo mncintiswano, abantu bazoqoka izikole abafisa zihlomule bese ziyavotelwa, ezizothola amavoti amaningi, yizo, ezizokhala zemuke no-Iris bazo,” kusho uNksz Gumede. Uthe ngaphandle kokuthi izikole zivotelwe, kuvuleke nohlelo lokuthi labo abathanda ukuxhasa ngemali ekutheni izikole abazoziqoka, zihlomule, kuzoba…

MHLELI: Akusekude ukuthi izakhamuzi zakuleli zwe lethu zidinge ukukhokhelwa ngokuvota kwazo. Phela uhulumeni wakhiwe ngamavoti abantu okhethweni. Ivoti nevoti libalulekile ekwakhiweni kukahulumeni ozoletha izidingo kubantu abavotayo. Eqinisweni ivotu lifana nse nempahla yokwakha uhulumeni wabantu, yingakho abantu baye banxenxwe ukuba baye ngobuningi ukuyovota ezikhungweni zokwenza lokhu. Abantu banindwa ngodaka emehlweni, kuthiwe bayovotela uhulumeni wabo, kanti empeleni basuke bevotela uhulumeni walabo abazoba sezikhundleni zikahulumeni. Uhulumeni bawuphendula imboni yabo, kudle bona bodwa nabangani babo kuphela. Abavotayo basala dengwane bekhamise imilomo uma sekufanele kufezwe izethembiso-mbumbulu ezisuke zenziwe abacela ukufakwa ekuphatheni uhulumeni. Lokhu kudalwa wukuthi ivoti limahhala, abantu abakhokhelwa lutho ngokuvota kwabo. Into yamahhala ayikaze ibe nemiphumela emihle. Sekufanele ivoti lomuntu likhokhelwe ukuze sithole inkululeko ephelele. Lapha eNingizimu Afrika kunezinketho ezintathu. Ukhetho lokuqala olukahulumeni kazwelonke nolwezifundazwe. Olwesibili olukahulumeni wasekhaya, omasipala, bese kuthi olwesithathu kube olokuchibiyela…

MHLELI: Unyaka nonyaka liya liya likhuphuka izinga lomculo kamaskandi. Uthi usamangazwe uMenzi Mabizela nenoni lakhe elithi "We Skhinkily", kuqhamuke amanye amaciko azodedela ubisi lwezingoma. Ingoma kaMphathi Wohlelo MC, ft Shenge WaseHlalankosi, Intaba ZoKhahlamba, ingenye yezingoma ethakaselwe futhi engeke ilibaleke onyakeni ka-2025. Njengobani ongeke ajabule uma ubuhle bakhe bufaniswa nelanga liphuma ezintabeni zoKhahlamba? Okunye okwenza umculo kamaskandi uthakaselwe ukuthi bacula ngezinto ezithinta uquqaba, yingakho-ke bengeke bangahlanyi omtase. Ngibezwe becikoza ngenye ingoma bethi, "Saqala sakudlala, awu sakudlala, sikhohlisana ngamagama, ngamagama, uthando lwamila, awu lwamila, sengimthanda ngempela, awu ngempela, uLavoo". Kanjalo nengoma kaFeza esihloko sithi Umaqondana, ingenye yezingoma engeke isale ngaphandle ezingomeni ezithakaselwe kakhulu ngezinhlamvu ezithi "Ngavele ngabona la kulolu thando lwethu ukuthi kuqondene umaqondana, ngilawulwa yindalo neZinyandezulu, luyayitholela indlela lolu thando, luyazenzakalela". Ngeke asale ngaphandle uMzukulu ft Zamambo Mkhize & Mfana WeKhansela…

UMNYANGO wezeMpilo KwaZulu-Natal uchitha izinsolo zokuthi uvimba esinye seziguli ezisesibhedlela iCathrene Booth, esaziwa ngokuthi yiSalvesh, eMatigulu, enyakatho yesifundazwe - ukuthi sidedelwe emva kokuphothula uhlelo lokusinquma unyawo. Lokhu kusukela ekutheni uMnuz Sibonelo Ngema naye wakhona eMatigulu, ethinte Isolezwe ebika ukukhathazeka ngoninalume uMnuz Thinta Ngema (83) ongase adlele uKhisimusi esibhedlela njengoba sekuphele inyanga egcinwe khona. UNgema uthe uninalume wangena kulesi sibhedlela ekuqaleni kwenyanga edlule ehlushwa wunyawo obeluvuvukele, lungalapheki okwathi esesibhedlela kwatholakala ukuthi unesifo sikashukela, okuphoqe ukuthi anqunywe unyawo ukuze impilo yakhe iqhubeke. “Kuthe sengiyomlanda ngesonto eledlule, ngaba nenkinga yokuthi akakwazi ukuphuma ngoba esibhedlela bethi abanazo izinduku zokuthi aqhugele. baze bathi kuzophoqa ukuthi sizithengele thina noma siziboleke kwabanazo ukuthi azisebenzise,” kusho uNgema. Eqhuba, uthe kuyamkhathaza ukuthi umalume wakhe akakwazi ukuphuma esibhedlela andukuba kutholakale lezi zinduku, abona kumele kube wumsebenzi wesibhedlela ukuqikelela ukuthi…

NJENGOBA unyaka usuya emaphethwelweni, abantu abaningi basebenzisa lesi sikhathi ukucabanga ukuthi yini abafuna ukuyenza, ukuyishintsha nokuyifeza onyakeni omusha ozayo. Nokho ngaphambi kwalokho kusemqoka ukuqale ume kancane, uzibuze ukuthi lokho ofuna ukukwenza nokukufeza kuyahambisana yini nohlobo lwempilo ofuna ukuyiphila uma kuqala unyaka omusha. Lokho kushiwo wumqondisi wophiko lakwandaba zabantu lwenkampani yezokuxhumana iPenguin, uNksz Annemie Burger, ecebisa abantu ngezinto okumele baziqaphele njengoba kwazeka ukuthi baningi abakholelwa ekuhleleni abazokwenza ngonyaka olandelayo. “Siphila esikhathini lapho abantu bekholelwa ekutheni kumele basebenze kanzima ukusiza ukuthi bafeze abakufunayo nabakufisayo ngempilo yabo, kodwa lokho akwenzeki kuphela ngalokho kepha kudinga ukuthi uzibuze imibuzo efanele, nezokuba wumhlahlandlela wozokwenza,” kucebisa uNksz Burger. Unikezele ngale mibuzo abona ingaba wumhlandlandlela osizayo: 1. Yini engiyifunde kulo nyaka ophelayo? Ngaphambi kokubheka phambili kokufunayo, qala ngokubheka emuva ucabange okuningi odlule kukho, wokufundile ngakho, nokuthi yikuphi ongafisa…

IQHAWE leBafana Bafana emdlalweni wokuqala ka-Group B we-Africa Cup of Nations (Afcon), uLyle Foster, lijabulele kakhulu ukuqala ngamaphuzu amathathu kunokuqokwa njengomdlali ovelele. IBafana iphume namaphuzu amathathu kwi-Angola emdlalweni ewunqobe ngo 2-1 ngoMsombuluko, eMarrakech Stadium, eMorocco. Amagoli eNingizimu Africa ashaywe ngu-Oswin Appollis noFoster ngokwahlukana kweziwombe. Ele-Angola libhekwe enethini ngiManuell Show. Igoli lika-Appollis lakhiwe nguyena lo mgadli weBurnley yase-England, ngaphambi kokuvalela enethini elesibili ngomzuzu ka-79 elibe yisipikili sokugcina kwi-Angola ebingazibekile phansi. Ngalokhu, uFoster uqokwe njengomdlali odlale kahle kunabo bonke osukwini. “Mhlawumbe ngelinye ilanga ngiyobuka emuva ngizishayele ihlombe kodwa okwamanje ngisagxile ekufakeni isandla ngamagoli ukusiza iBafana ukuthi ihambe ibanga elide kulo mqhudelwano,” kusho uFoster emuva komdlalo. Lo mgadli wacela ukuhoxa kwi-Afcon yase-Ivory Coast, nyakenye, ekhala ngezinkinga ezibhekene naye ezithinta nesimo sakhe somqondo. Kusukela uFoster ebuyile kwiBafana, kuhlukene imibono ngaye kwazise uBroos akamshiyi…

UFIKELE ebantwini abawudinga ngempela uKhisimusi wezihlalo ezihamba ngamasondo kanjalo namabhakede egilosa, okunikelwe yinhlangano engenzi nzuzo KwaMashu, izolo. Inhlangano engenzi nzuzo, iRenew Home Foundation, eyasungulwa yiphoyisa lasesiteshini saseNtuzuma, uSergeant Slindile Njilo nowakwakhe, uKhumbuzile Njilo, inikele ngezihlalo eziyisithupha kwabaphila nokukhubazeka nangamabhakede angu-20 emindenini ehlwempu. USgt Njilo uthe benze lo mnikelo ngoba bahlale bekujabulela ukwelula isandla wabasuke bedinga. “Usizo engilwedlulisele emphakathini ngiluthole emva kokuhambe ngingqongqoza eminyangweni ehlukene, ngilucela, kwaba khona othintekayo, welula isandla,” kusho uSgt Njilo. Uthe umnikelo wezihlalo ezihamba ngamasondo uwuqale ngoLwesine, ngesikhathi enikelela uMnuz Mvelo Shangase (24) wakwa-F, kwathi ayisihlanu wawadlulisela ekhanseleni lakwa-C ukuze linike abasohlwini lwabawudingayo ewadini. “Ayikho into emnandi njengokuba wusizo emphakathini. Siye sifikelwe inqwaba yabantu bezofuna usizo enhlanganweni yethu. Siyaselula isandla lapho esikwazi ukufinyelela khona. Kulokhu nje siyajabula ukuthi esibanikelele bazoba noKhisimuzi omuhle,” kusho uSgt Njilo. Uthe ukhule…

MHLELI: Ngicela ungiphe isikhala ngexwayise abaholi bethu ngoba ngiyabona bayizintibane, bayakhohlwa ukuthi sihamba phezu kwezidumbu zobudedengu nomhobholo wabo. Anginakho nokuncane ukungabaza ukuthi uthuthuva olusanda kusuka ezindlini zeSishayamthetho saKwaZulu-Natal, eMgungundlovu, sizobona ziyinsakavukela uma sekuvulwa iPhalamende ngonyaka ozayo. Ukwehluleka kwe-MK Party ukukhipha uNdunankulu uThami Ntuli kwakuvele kufana nokuthatha amashansi bebe bazi ukuthi umuntu abathembele kuyena oweqembu i-NFP elivele linezalo izinkinga ngaphakathi. Ngaleyo ndlela ukuqhubeka kwabo nokufaka isiphakamiso sokungabethembi ubuholi bukaNtuli kwakufana nokufayela imbewu esigangeni ube nethemba lokuthi izomila ithele izithelo. Kwaphinde futhi noma sebengaphakathi kwacaca ukuthi izifiso zabo azenzeki, futhi kusolisa ukuthi babengakulungiselele ngokwanele ukuthi uma kwenzeka nje bazoqhamuka naliphi elinye isu. Yingakho kwagcina sekubonakala sengathi bawela ekususeni uthuthuva oseludale olunye uthuthuva kwazise noSomlomo uNontembeko Boyce esememezela ukuthi uyabamisa emsebenzini wesiShayamthetho isikhashana. Yilokhu kunqakisana-ke osekuqalile asebeyoze bangene nakho nasemikhankasweni yokhetho lohulumeni basekhaya…

SATHUTHUMELA umndeni wetshitshi laseMbabane, eMsinga, okuthiwa libulawe yisihlobo ngeSonto, lilungiselela ukungena emgonqweni womemulo. Kulesi sigameko kudutshulwe ngesihluku uSamantha "Sammy" Dlamini (24) ngaphandle kwesango lakubo. Ngokusho kukadadewabo, uNkk Lebo Ngubane, uSammy ubulawe ngabo-7.30 ebusuku, ngesikhathi yena nezimpelesi zakhe bephumele ngaphandle kwesango. Uthe bebenza isiko lokugcotshwa kwebomvu, ukuze bangene ngaphakathi ekhaya eseyohlala emgonqweni. “Umemulo wakhe ubuzoba ngeSonto (Disemba 28). Bese kuthengwe yonke into, ngisho imvunulo abezoyigqoka, inkomo ebizohlatshwa ngomemulo wakhe, konke bese kukhokhelwe,” kusho uNkk Ngubane. Uthe isigameko senzeka nje, ngisho nezimbuzi ezihlatshwa uma itshitshi lizongena emgonqweni, bese zize zaphekwa, sekusele ukuthi zidliwe. Elandisa ngokwenzekile, uthe umsolwa ongeke adalulwe kuze kuba uvela enkantolo, uqhamuke ngeveni, ehamba nomngani wakhe obephethe isibhamu. Uthe emva kokumisa imoto khona lapho ngasesangweni, umsolwa ubonakale ethatha isibhamu somngani wakhe, elokhu esishwiba emoyeni. “Abantu bamkhuzile, bembuza ukuthi uhlolani, eviliyela…

IMINDENI eminingi isebenzisa lesi sikhathi samaholidi okuphela konyaka ukushaywa wumoya nokungcebeleka ezindaweni ezihlukene, okusuke kudinga ukuthi umuntu nomuntu ahlele futhi aqinisekise ukuthi konke azokudinga ohambweni lwakhe kukhona. Kodwa umbuzo omkhulu ngothi wenzanjani uma wehlelwa yisimo obungasilindele ohambweni lwakho? Wenzanjani uma kwenzeka uba nenkinga usehlane, endaweni okungelula neze ukuthi uthole usizo ngokushesha kuyona? Umqondisi weSouth African Motor Repairers Association (SAMBRA), uMnuz Juan Hanekom, uxwayise ngokuthi nakuba kusemqoka ukuqinisekisa ukuthi imoto yakho isesimweni esifanele uma uthabatha uhambo kepha kusemqoka nokuhlomela izimo zongakulindele okungenzeka kwenzeke. Unikezele ngala mathiphu kokunye abona kungasiza kwabahambayo: 1. Phatha i-power bank eshajiwe: Lokhu ukwenzela ukuthi umakhalekhukhwini wakho uhlale usebenza, ungaphelelwa yi-battery ngoba uzodinga ukusebenzisa wona uma kwenzeka kuba nesimo esiphuthumayo kuwena ngakho kuhle ukugwema ukucishelwa yiwona ngoba kungaba nzima ukuthola usizo uma ucishile. 2. Phatha izingubo zokumbatha: Noma…