Tabla de contenidos para 2025-12-19 en Isolezwe

-DJ Warras obephethe inkampani yonogada iJT VIP: Elite Guarding & VIP Protection Services kuvela ukuthi ubeyisebenzisa ngokuzimela ukuze ivikele amabhilidi ahlukene, engaqashiwe uhulumeni waseGoli. Inkampani yakhe ibiphinde isebenze ukuqapha imicimbi esezingeni eliphezulu kanye nokugada izakhiwo ezidunwe yizigebengu kanye nezenzo zobugebengu enkabeni yedolobha iGoli. Umndeni wakhe esitatimendeni osikhiphile uveze ukuthi usathukile ngokwenzekile futhi ucela ukubekwa emikhulekweni ukuze ubhekane nalesi simo. Lokhu kuvezwe uDkt Mgcini Tshwaku omele uMnyango wezokuPhepha koMphakathi kuMasipala waseJohannesburg. Uthe ebantwini abahlanu abathathwe ngamaphoyisa kukhona nalona wesifazane obengahlali kuleli bhilidi kodwa obenamagumbi aqashise kuwo. Lona wesifazane uthe ungabanye babahlanu uDJ Warras akade esebenzele izincwadi zokuthi bangasondeli kuye emaphoyiseni, ngenxa yokuthi ubehlala ethola ukusatshiswa. "Okwamanje amaphoyisa abathathe laba abahlanu kuphela, ukuze ayobaphosa imibuzo. Lona wesifazane kuvela ukuthi wake wamsabisa uDJ Warras ngaphambili, njengoba ayejwayele ukufika kuleli bhilidi azobheka ukuthi kwenzakalani…

KUZOCACISA ingqungquthela eyisipesheli yenyunyana yothisha iSadtu ukuthi izoqhubeka nokweseka i-ANC okhethweni lwangonyaka ozayo lohulumeni basekhaya noma isizohamba namaKhomanisi, azongenela ukhetho ngokuzimela. Lezi ngezinye zezinto ezibhungwe emhlanganweni wokugcina wonyaka, wesigungu esiphezulu sale nyunyana muva nje. Isitatimende esikhishwe yile nyunyana, siveze ukuthi ixoxiwe eyesinqumo seSACP sokuzimela okhethweni, ingaseki i-ANC. Sithe lesi sinyathelo sizoba nomthelela kumadlelandawonye ahlanganisa i-ANC, SACP, Cosatu neSanco. "Simile ekutheni sizobiza ingqungquthela eyisipesheli ngo-2026, ngaphambi kokuba kube nengqungquthela yeCosatu, ukuze siphume nomkhombandlela ngesizomeseka okhethweni. Sasivele sishilo ukuthi uma kwenzeka i-SACP ithi izongenela ukhetho, sizobiza le ngqungquthela eyisipesheli." Sithe okwamanje le nyunyana yeseka i-ANC okhethweni, okuyisinqumo esathathwa ezingqungqutheleni zale nyunyana. I-Sadtu ithe ubumbano lwamadlelandawonye lubaluleke kakhulu kanti kumele luqiniswe. "Siyahambisana nombono wokuthi kubizwe umhlangano wawo wonke amadlelandawonye ukuze kubhungwe ngokubhekana ngeziqu zamehlo kwe-ANC ne-SACP. Siyahambisana nombono we-ANC wokuthi kumele buqiniswe ubudlelwano…

KULESI siphithiphithi esingaka ezindaweni eziningi zokujabula ngoDisemba, sekuyimvama ukuba abantu bashiye kumanaphanapha lapho kade bezipholele khona. Kuwo wonke amadolobha kuthe chithi saka imindeni nabangani bephumuza imiqondo. Okungekuhle ukuthi kuthi omasipala bezihlelile izindawo zokulahla udoti, bese kuba yithi esicakaza isinoma kanjani lapho sijabule khona. Ishwa lamashwa ukuthi yithi futhi esifuna ukufikela ezindaweni ezihlanzekile. Lapho kungahlanzekile kahle, siyashiya siqhubekele kwenye indawo enokuhlanzeka, nalapho kuyoqaleka umonakalo omusha wokunukubeza inhlanzeko ngokulahla udoti, oplastiki size sibulale nababhodlela eziphuzo esizipholisa ngazo. Isibonelo nje; iTheku linodedangendlale nezindawo ezisezingeni eliphezulu njengasosebeni lapho umfula uMngeni ungenela olwandle ngaseDurban North, iBlue Lagoon. Kusuka lapho, ugudla ulwandle lwaseNorth Beach lapho abantu bekwazi ukupaka izimoto, bavule izambulelakazi namatende amancane bepholiswe umoya wolwande. Le ndawo iyintandokazi kubantu. Kulezi zindawo uMasipala weTheku uhlinzeke ngemigqomo kadoti futhi nemithetho yakhona iyaziwa. Uthando lwethu ngalezi zindawo singalukhombisa…

KHUNGATHEKILE umndeni wowesilisa waseXobho, okutholakale isidumbu sakhe sinamanxeba emobeni ngoLwesithathu. Umufi uMnuz Siyanda Ngcongo (34) kuvela ukuthi bese kuphele amasonto amabili edukile. Kuthiwa wayekade ephuma engumuntu oyodlala ibhola nabangani bakhe wangabe esabuya. Udadewabo kamufi, uNksz Nokwanda Ngcongo, uthe bakhungathekile ngalesi sigameko. Uthe bagqemeke engeqiwa ntwala ngokubulawa kukamfowabo, amchaze njengomuntu obemnene futhi ebathanda kakhulu abantu. Uveze ukuthi umufi ubengumuntu obezifela kakhulu ngebhola lezinyawo futhi ehlezi ekhuluma ngalo. ''Bekuthi njalo uma ephuma emsebenzini ntambama, ahambe ayodlala ibhola. Ngelanga alahleke ngalo, waphuma lapha ekhaya ephethe amakhokho eyodlala ibhola. Kwaze kwahlwa engabuyi ekhaya kodwa saqale ukuqaphela ukuthi akabuyi sibona kuyoshaya u-10 ebusuku," usho kanje. Uthe babuza umngani wakhe wakwamakhelwane abejwayele ukudlala naye ibhola ukuthi umgcine nini umufi. Uthe bethuka uma ebaphendula ngokuthi nabo bebemlindele ejimini kodwa akazange afike. ''Wasitshela ukuthi akazange afike ejimini nokuthi…

ZIYAQINA ezokuthi ukhuza ibuya kwiDurban City u-Ernst Midddendorp obengusomaqhinga kuleli qembu alishiyile ezinyangeni ezimbili ezedlule. Ngokomthombo weSolezwe, kulindeleke ukuthi iCity ibuyele ejimini ngoDisemba 27 isishaya ngoMidddendorp ethimbeni labaqeqeshi. Uzobuyela esikhundleni sokuba ngusomaqhinga abekusona kuqala isizini. Kubuya uMiddendorp nje, iCity kusabhekwe ukuthi imemezele umqeqeshi ozovala isikhala sikaGavin Hunt okhonjwe indlela emasontweni adlule. Leli qembu lithembise ukuthi lizosebenzisa ikhefu le-Africa Cup of Nations (Afcon) ukuthungatha umqeqeshi omusha. “UMiddendorp uyabuya kwiDurban City maduze nje. Uzoqala umsebenzi wakhe abevele ewenza kusukela ekuqaleni kwale sizini wokuba yi-technical director. Akazile ukuzoba ngumqeqeshi ngoba iqembu vele lisazomethula maduze umqeqeshi ozolihola ngomzuliswano wesibili wesizini,” kusho umthombo. Ukukhuza ibuya kukaMiddendorp kwesokuba ngusomaqhinga kwiCitizens, sekumkhiphile ohlwini lwabaqeqeshi abayamaniswa nokugaqela isikhundla sokuvala isikhala sikaHunt, njengoba naye ebebalwa nabanye okubalwa kubona noSimo Dladla. UDladla ubehola iCity ngesizini edlule lidla isicoco seligi yeMotsepe…

MHLELI: Kwelakho lodumo, ngifisa lingithathe lingibeke ngawengqondo eNgilandi, lapho kwakuthathwa izinqumo ezinqala zokudla imihlaba, umcebo wamazwe kanye nabantu ababephila kuwo. AmaNgisi akwenza ngempumelelo emazweni ababefika kuwona. Ngingabala i-Afrika, India, South America, Australia, namanye amaningi. Amanye ala mazwe afika ekugcineni kodwa agcina enqotshiwe. Lapho singabala amaShayina abhujiswa ngenuzi kwaze kwasha okubalulekile kuwo ngoba engafuni ukugobela amaNgisi neNdlovukazi yawo. Kulawo mazwe amaNgisi ayengena ngokuhweba bese elandelisa ngenkolo ukuze lezo zizwe zishintshe usikompilo lwazo zinakashele olwabelumbi. Imbewu ayitshala ngaleso sikhathi yamila kusuka lapho kuze kube yinamuhla isamila nezithelo zayo siyazibona. KwelikaMthaniya sithola uNodumehlezi kaMenzi eqanganisa abanewabo ngokuthi ngeke balibuse kodwa liyokubuswa izinyoni zezulu. Lawo mazwi lokhu aba umthinyane omhlophe ehlungwini, afana nombhalo osodongeni ukuze wonke umuntu awufunde futhi awetshise. Iqiniso lithi kuze kube namuhla kuyabanjwa kuyayekwa, izwe alibuseki futhi engekho owakithi ofuna ukulalela…

UMAKADEBONA kaDJ, uMbusi “DJ Sox” Sokhela uthi ukuxinwa ngeminye yemisebenzi kumenze washaywa yisikhathi ekukhipheni umculo omusha. USox ogqame kakhulu esadlala ngokuhlanganyela noDJ Tira bezibiza ngeDurban’s Finest, uthe uchithe isikhathi esiningi e-studio kulo nyaka. “Nginazo izingoma ziningi ngoba ngisishaye kakhulu i-studio kulo nyaka. Inkinga ukuthi ngixakwe ngamanye amabhizinisi nokuphinde ngibe sebhodini lezokuvakasha laseMhlanga. Lokho kungenze ngangakwazi ukuqeda kahle amalungiselelo okukhipha ngase ngihlehlisela unyaka ozayo,” kusho uSox. Uthe nokho kunengoma apikwe kuyo uDJ Sobz esanda kuphuma ethi Indlela, wathi iyona nezinye izingoma azobe ezizwisa abantu emcimbini wakhe waminyaka yonke, iDurban Underground, ozoba seVirginia Airport ngoDisemba 25. “Ngizobe ngizwisa abantu umculo wami omusha ngilalele nezincomo ukuze uma kukhona lapho okumele ngilungise khona ngishintshe. Ngale kwalokho, ngingumuntu othanda kakhulu ukweseka amaciko, ikakhulukazi aKwaZulu-Natal. Ngiyathanda ukudlala umculo umusha ngoba angifuni ukuphinda izingoma ezizodwa ngathi i-dukebox,”…

IHAMBELA phezulu i-IFP emva kokuzidlela amahlanga okhethweni lokuchibiyela obelukuMasipala waseMfolozi kungakapholi maseko iphunyuke emizamweni yokuyiketula kuhulumeni waKwaZulu-Natal. I-IFP ichomele izimbangi zayo kwezepolitiki emva kokunqoba ngamalengiso ukhetho lokuchibiyela obelukuWard 17. I-IFP inqobe ukhetho lwangoLwesithathu, ngamavoti angu-1 464, yashiya kude izimbangi iMK ne-ANC abathole amavoti angu-503 no-378. I-IFP inqoba ukhetho lwangoLwesithathu nje, ngoMsombuluko kuchithwe isiphakamiso sokungabethembi ubuholi bukaNdunankulu waKwaZulu-Natal onguSihlalo weqembu esifundazweni, uMnuz Thami Ntuli. Isiphakamiso sokungabethembi ubuholi bukaNtuli sasifakwe yiMK. IPhini likaSihlalo we-IFP KwaZulu-Natal, Inkosi Ntandoyenkosi Shabalala, lithe ukunqoba kwabo ngamalengiso kuzothumela umyalezo oshubile kulabo abacabanga ukuthi sekuphelile nge-IFP. "Lona ngumyalezo ocacile kulabo abalukho bezama ngokuphindelela ukuqeda nge-IFP. Iqembu liyaqhubeka nokukhula, lijoyinwa amalungu amasha futhi liyaqhubeka nokwenza kahle KwaZulu-Natal." I-ward ibikade ivele iphethwe yi-IFP ngaphambili. Inkosi ithe okubajabulisa kakhulu ukuthi bathole amavoti angaphezu kwalowo abawathola ngesikhathi benqoba i-ward okhethweni lohulumeni basekhaya…

MHLELI: Kuyishwa leNingizimu Afrika ukuthi uMengameli waseMelika, uMnuz Donald Trump, usaqhubeka nokukhombisa ukudlala ipolitiki ehambisana nenzondo engenasidingo ngezwe lethu. Muva nje, uTrump akabonakalanga nangokhalo emhlanganweni wamazwe aziwa nge-G20 obubanjelwe eNasrec, eGoli. INingizimu Afrika iyazazi izizathu ezingabambeki zokuzondwa kwayo yilo mholi waseMelika, okufaka phakathi ukumangala kwalo imangalela umngani weMelika, i-Israel, kwi-International Court of Justice (ICJ), njengoba yabe ibhubhisa abantu basePalestine. Sizokhumbula futhi isizathu esingabambeki sikaTrump asivezayo emva kokuzwa ngalabo abafafaza amanga okubhujiswa kwabantu abamhlophe eNingizimu Afrika. Inkinga enkulu engiyibonayo ngoTrump, nokuyinkinga ake ayiveza ngaphambilini ukwengeza ezizathwini zokuzonda iNingizimu Afrika, yileyo yokuzonda i-ANC okanye abanye abaholi bayo. Impela uTrump akabaphiwe abaholi be-ANC, yingakho esethola nethuba lokukhombisa inzondo engekho ngeNingizimu Afrika. Sizokhumbula-ke futhi ukuthi akusiye uTrump yedwa odlala ipolitiki yenzondo nge-ANC. Nabanye abalandeli bayo eNingizimu Afrika sebeyayilaxaza i-ANC kulezi zinsuku ngezizathu ezahlukene njengoba…

MHLELI: INingizimu Afrika ibonakala yehlelwa yisithunzi minyaka yonke ngesikubona kwenziwa ngabantu abalindeleke ukuba yisibonelo kithina emazingeni aphansi. Lokhu sikubone kwenziwa ngamalungu ePhalamende lesifundazwe eMgungundlovu, evukuza uthuli lwezichwe, ehluleka ukwamukela ukuthi bazingele lapho ingalele khona ngokusungula ivoti lokungabuthembi ubuholi bukaNdunankulu Thami Ntuli, ukuhola isifundazwe. Esikubone sisemakhaya komabonakude ubudlova obenziwe ngabantu ababizwa ngokuthi bangamalungu esiShayamthetho bephenduka ophumasilwe abagcine bekhohliwe ukuthi bathatha izifungo zokuzibophezela ngokuziphatha. Akugcinanga lapho, kuqopheke umlando ngokuthi iculo lemihla esishunyayezwa ngalo kule mihla elibizwa nge-GBV - elikhuza ubudlova obenziwa ngabaselisa kwabesifazane - yiculo nje. Kuvuleke ikhasi elisha sibona izindlamvini zabesifazane abacashe ngamalungelo okuba sesiShayamthetho beshaya amaphoyisa abelawula ukudambisa isimo. Empilweni bengiqala ukubona owesifazane obenamandla sengathi uphethwe yimimoya emibi ngendlela obehlasela ngayo amaphoyisa, okuyizinkomba zokuthi owesilisa athandana naye uyolitheza phezulu ngamhla baxana. Nomunye welinye iqembu obegqame okukanogwaja omhlophe ehlungwini - egqoke…

KHALA ngesibhedlela iMontebello esiwuzwise ubuhlungu phezu kobunye umndeni waseMission, eNdwedwe, kulandela ukuphanjaniswa kwezidumbu emakhazeni ngeledlule. Ngokusho kwesihlobo, uNkk Nelisiwe Bhungu, oshonile uNksz Nokuthula Zungu ongumakoti wakwakhe, ushonele esibhedlela ngoDisemba 4. Uthe yize kunjalo, umndeni uze wathola ucingo lwesibhedlela sibazisa ngokushona kwakhe ngoDisemba 12. "Batshele umndeni ukuthi awuze esibhedlela ngoMsombuluko (Disemba 15) nomazisi kamufi ukuze uzokhipha isidumbu emakhazeni esibhedlela. Umndeni uthe usufika uzithele phezu kwensumansumane yokuthi isidumbu asibonwa," kusho uNkk Bhengu. Uthe batshelwe ukuthi ngokwamarekhodi abhalwe phansi, kuvela ukuthi sinikwe umndeni wakwaNzama eNsuze, ngoDisemba 11. "Okusho ukuthi ngesikhathi umndeni ufonelwa ngoDisemba 12, isidumbu bese sivele singasekho, sesinikwe omunye umndeni," kusho yena. Uthe lokhu kukodwa kubashiya nemibuzo yokuthi nakuba bekungenzeka ukuthi umndeni ungabonisisi kahle, uzitshele ukuthi yisihlobo sawo nawo kodwa isibhedlela sisidedele kanjani amagama nezinombolo zikamazisi kungafani? "Ngoba phela kucaca ukuthi umndeni…

MA kuya ngamagama omqeqeshi weBafana Bafana, uHugo Broos, umdlali wasemuva uKhulumani “Mtara” Ndamane, akayile nje ukuyogcwalisa isikhala eqenjini leBafana elizoyibamba kwi-Africa Cup of Nations (Afcon), eMorocco. IBafana izovula ne-Angola emdlalweni ka-Group B eMarrakech Stadium ngoMsombuluko ngo-7 ebusuku. UNdamane udlale kahle ngesikhathi iBafana iguqisa iGhana ngo 1-0 emdlalweni wobungani ngoLwesibili, eDobsonville Stadium, eSoweto, obesekungumdlalo wokugcina weqembu lesizwe lakuleli ngaphambi kokubhekisa amabombo eMorocco. Kulo mdlalo obekubukeka uBroos ezwa amanzi ngobhoko ngawo ngaphambi komdlalo wezakhe wokuvula we-Afcon, ubophele uNdamane noNkosinathi Sibisi odongeni lwasemuva maphakathi nendawo. Yize uNdamane (21) engakabi yisethenjwa odongeni lwasemuva lweBafana njengoMbekezeli Mbokazi kodwa ukudlala kwakhe ngonyawo lwesokunxele kumbeka ethubeni lokuthola isikimu kwi-Afcon. UBroos akamthathi uNdamane njengomdlali ozogcwalisa isibalo kodwa uthembele kuyena ukuthi angangena ayibambe uma kwenzeka ejutshwa. “Okokuqala; ngicabanga ukuthi kubalulekile ahambe neBafana (uNdamane) ukuya kwi-Afcon. Okwesibili; nginelisekile ngendlela asadlale…

MUNYE wabadlali ababenuka iqaqa kwabanye abalandeli beKaizer Chiefs, uSiyabonga Ngezana, uzwakalise ukuthi akanaso isiqiniseko sokuthi uzibuyela eqenjini anenkontileka nalo, iFCSB yaseRomania, emuva kwe-Africa Cup of Nations (Afcon). UNgezana usekhempini yeBafana Bafana eMorocco, njengoba izoqala i-Afcon ngoMsombuluko, ne-Angola eMarakkech. Usehlale amasizini amathathu kwiFCSB asayine kuyona esuka kwiChiefs ekuqaleni kwesizini ka-2023/2024. Ngaphandle kokuvotelwa njengesitobha esivelele kwezingewona umsinsi wokuzimilela eRomania, uNgezana useqokwe njengomdlali wasemuva ovelele kwi-FCSB kuwona womabili amasizini adlule. Ngenxa yalokhu kugqama ngesikhathi esincane efikile e-Europe, kunamahlebezi amkhomba endleleni ephumayo kuleli qembu laseRomania. Ngaphambi kokufulathela iRomania, uNgezana ukhulume ne-website yezemidlalo, i-fanatic.com, lapho eveze khona ukuthi yize wonke umqondo wakhe ugxile ekusizeni iBafana kwi-Afcon kodwa akazi noma uzobe esewumdlali weFCSB uma sekuphele i-Afcon. Nakuba lo mdlali owahamba kwiChiefs esolwa ngamaphutha okwakuthiwa ashovela phansi Amakhosi, esize i-FCSB yadla isicoco seligi neseRomanian Super Cup amahlandla…

MAKHEHLA’ anomlando omude wokudla isicoco namaqembu ahlukene kwiPremier Soccer League (PSL) kulindeleke ukuba akhathule indima ebonakalayo emazweni awo njengoba kuqala i-Africa Cup of Nations (Afcon) ngeSonto, eMorocco. Umdlali waseMozambique owake wawina umklomelo wePSL Footballer of The Season, u-Elias Domingues Pelembe (42), nguyena omdala kunabo bonke ngokweminyaka kulo mqhudelwano ovulwa yiMorocco neComoros ngeSonto. Ngaphandle kukaPelembe ohlale iminyaka kwi-PSL, kulo mqhudelwano kukhona nonozinti we-Uganda uDenis Onyango (40) noweZimbabwe, uWashington Arubi (40). UPelembe osedlalela i-UD Songo eMozambique, uhlanganise iminyaka engu-42 ngenyanga edlule. Usesikwatini seMozambique okubhekwe ukuthi senze kangcono kwi-Afcon yanonyaka. Lokhu kumbeka ethubeni lokusuka endaweni yesithathu ahlale kweyesibili, alingane noMohamed Lawal waseNigeria kwabadlale i-Afcon seludlulile usuku lwabo lokuzalwa lwehlandla lika-42. UPelembe noLawal balandela uqweqwe lukanozinti wase-Egypt, u-Essam El Hadary, olwadlala kwi-Afcon yokugcina ngo-2017, seluneminyaka engu-44 ubudala. Kalidingi ukuchazwa igama likaPelembe kubathandi bakanobhutshuzwayo waseNingizimu…

AKUBA amazwe azoba yingxenye ye-Africa Cup of Nations yanonyaka ezoqala ngeSonto, eMorocco, ezobe ehlome ngenqwaba yabadlali abadumile abadlala kumaligi amakhulu emhlabeni futhi asebenomlando kulo mqhudelwano, baningi nabasebancane okubhekwe ukuthi benze umehluko kuwona. Abaqeqeshi bamaqembu sebekhombise ukubathemba abadlali abasebasha, nokuyinto esidlulele nakubaqeqeshi bamaqembu esizwe. Lokhu kufakazela ukuthi uma unekhono iminyaka ngeke ikuvimbe ekutheni umele izwe lakho emiqhudelwaneni emikhulu. Naba abadlali abaneminyaka engu-21 noma ngaphansi okulindeleke ukuthi basize amazwe abo kwi-Afcon yanonyaka. Mbekezeli Mbokazi (Ningizimu Afrika) Lo mdlali (20) odlala maphakathi emuva uqale ukudlala esigabeni esiphezulu eqenjini abekulona, i-Orlando Pirates ngoMashi nonyaka, kodwa washeshe wazinza kulona. Kuphele isizini ka-2024/25, sekucacile ukuthi ungomunye wezethenjwa zeqembu. Isizini ka-2025/26, uyiqale ngendlela efanayo kanti ubesenqobe izicoco ezimbili nePirates ngaphambi kokuthi athengwe yiqembu lase-United States, iChicago Fire, azoqala ukubonakala kulona ngonyaka ozayo. Akagcini ngokumaka kahle nokusebenzisa amandla…