Tabla de contenidos para 2025-11-11 en Isolezwe

UBONA sekuntwela ezansi ngecala lokubulawa kommeli ngesihluku umndeni njengoba selibheke eNkantolo eNkulu yaseThekwini. Ummeli, uNkk Thandokuhle Sishi (48) waseMontclair, eThekwini, kuthiwa wagwazwa, wabulawa wumyeni wakhe, oyiphoyisa likaMasipala weTheku, uSenior Constable Qiniso Sishi ngasekupheleni kukaJulayi nonyaka. Umsolwa, owasilaxaza isicelo sakhe sebheyili ngesikhathi esanda kuboshwa ngo-Agasti, ubevele eNkantolo yeMantshi yaseThekwini izolo. Imantshi ilihlehlisele uNovemba 27 icala, yathi ngalelo langa liyobe selingena eNkantolo eNkulu yaseThekwini. Uma icala selidluliselwa enkantolo enkulu, kusuke sekuphothulwe lonke uphenyo, icala selikulungele ukuqulwa. Udadewabo kamufi, uNksz Khumbuzile Mkhize utshele Isolezwe ukuthi bagculisekile ngokushesha kwecala. “Sijatshuliswa wukuthi seliya enkantolo enkulu. Lokhu kukhombisa ukuhamba kwalo ngokushesha. Sesilinde ukubona-ke ukuthi khona kuzothiwani,” kusho uNksz Mkhize. Uveze ukuthi bakhathazekile kancane ngemiphumela yendodakazi kamufi, okumanje ibhala izivivinyo zika-matric. “Yamlimaza kakhulu into yokubulawa kukanina. Yena uyingane ehlakaniphile kodwa sinalo uvalo lokuthi isigameko kungenzeka simthikameze ezifundweni…

NAKUBA inkonyane izobe ithuka isisinga kumethuli wohlelo lweMoja Love, iSizok'thola, uXolani Khumalo, kodwa uthe akaboni ezohluleka ukulethela bantu baseKurhuleni intuthuko. UKhumalo, oqokwe njengozongenela isikhundla sobumeya kumasipala, ukhulume kanje emuva kokufungiswa njengelinye lamakhansela kuMasipala waseGauteng, iCity of Ekurhuleni Metropolitan Municipality izolo. Uthe le ngqayizivele yethuba akayitholanga ngokwenzelelwa kodwa kungenxa yamagalelo akhe okusebenzela umphakathi ngokuzikhandla. "Hhayi ngoba ngazi ukuthi umkhandlu usebenza kanjani noma ngazi imigomo ethize kamasipala kodwa uma abanye abantu bekwazi ukwenza lo msebenzi, nami ngingakwazi." Uthe kusho lukhulu kuye ukusebenzela umphakathi waseKurhuleni ngaphansi kwe-ActionSA. UKhumalo uthe uzohamba ezinyathelweni zikaMengameli we-ActionSA, uMnuz Herman Mashaba, owayengenawo amava okusebenzela umkhandlu kodwa waphumelela. "Nabu ubufakazi obuphathekayo bokuthi izinto ziyenzeka, uMashaba, wayegabe ngolwazi noma engenamava ngokusebenza njengemeya yomkhandlu kodwa waphumelela ukwenza umsebenzi." Uthe ukwenza lo msebenzi akufani nokusebenza kwerobhothi okufanele uligxishe ulwazi ukuze lisebenze ngendlela…

SILO uMisuzulu Sinqobile kaZwelithini sithi simthanda noma enezingane uNdlunkulu uNomzamo Myeni Zulu. IMbube ithe kayinendaba laba abagxeka isenzo sayo sokuthatha umuntu onezingane. Ikusho lokhu emcimbini wasebusuku emva komgcagco wayo obusesigodlweni KwaKhangela-mankengane. Udwendwe lweMbube noMaMyeni lukhuphuke ngeSonto. Kusukeka kwavela izindaba zobudlelwano beMbube noMaMyeni ngo-2023, bekulokhu kukhona abakhuza ibhadi, bekhala ngokuthi iMbube ithatha umuntu onezingane. Iphawula okokuqala ngalabo abayigxekayo, iMbube ithe ukuthi umuntu uzele akusho lutho ngoba inhliziyo idla ekuthandayo. “Ngihlezi ngizwa kukhulunywa, kuthiwa uMaMyeni unezingane kukhona lokhu nalokhu. Uma umuntu umthandile, umthandile. Mina ngizolandela eyami inhliziyo.” Ngesikhathi iSilo sisho kanje, kuqhume umkikizo noBayede etendeni ebeligcwele phama. INdlulamithi yamakhosi ithe akukho okuzoyihlukanisa noMaMyeni. “Uma kuwukuthi mhlawumbe oMdolomba (abakwaMyeni) banginikeze iphasela engingalazi ukuthi linjani, uma libheda ngizozilungisela mina. Ngizozilungisela kahle nje futhi.” Bekukuhle kudelile emcimbini wasebusuku obuhanjelwe yizicukuthwane okubalwa kuzo nabaholi bezepolitiki. Esinye…

IQEMBU lesizwe laseNingizimu Afrika labaneminyaka engaphansi kwengu-17 selikwenzile ebelikuyele kwiNdebe yoMhlaba eqhubekayo eQatar. Lokhu kushiwo ngumqeqeshi walo, uVela Khumalo, ngesikhathi ekhuluma nabezindaba emuva kokukhala ngaphansi kwi-Italy ngo 3-1 ngeSonto, eDoha. Iqembu lakuleli lidlulele kwi-Last 32 kulandela ukuqeda endaweni yesibili kuGroup A. Amajimbos abhekane nezingqinamba eziningi ngaphambi kokubhekisa amabombo eQatar. Phakathi kwezinkinga ebezibhekene noKhumalo wukugqoza kwemidlalo yokuzicija nezinkinga ngamaphepha abanye abadlali abamqoka. Iqiniso elimsukwa wukuthi leli qembu lesizwe liye kwiNdebe yoMhlaba eQatar, ngaphandle kokuzilungiselela okufanele. “Obekuseqhulwini kithina wukudlula eqoqweni okuyinto esesiyenzile ngakho-ke ngineme, abadlali bajabule kanti naseNingizimu Afrika ngicabanga ukuthi kujatshulwe,” kusho uKhumalo. “Besinezinkinga eziningi ngaphambi komqhudelwano kodwa asikaze sigudluke ekutheni sifisa okungenani ukudlulela emidlalweni yomkhumulajezi. “Kumanje kasinabo abadlali basemuva ngenxa yokulinyalelwa kodwa kawukho uphawini wokucasha ngalokho. Indaba yezitobha ingenye yezinkinga esifike nazo eQatar, ngakho-ke kumqoka ukuqaphela ukuthi kukhulu kangakanani esikwenzile…

UYADLONDLOBALA umkhankaso ogqugquzela abesifazane nabomphakathi we-LGBTQI+ ukuthi bagodle amandla abo ngoLwesihlanu, ukuze kuzobonakala ukubaluleka kwabo emphakathini kuphele nokuhlukunyezwa kwabo. Lo mkhankaso uqalwe yinhlangano iWomen for Change elwela amalungelo abesifazane nawezingane. Ezinkundleni zokuxhumana abantu abawesekayo bakhiphe izithombe zabo bafaka umbala obukhwebezane (purple). Phakathi kosaziwayo asebekhombise ukweseka lo mkhankaso kubalwa kubo uZakes Bantwini, umsakazi uSthandwa Nzuza, Sithelo Shozi nabanye abaningi. Izolo emini, iphethishini - efuna ukuthi ukuhlukunyezwa kwabesifazane nokubulawa kwabo ngenxa yobulili ukuthi kuthathwe njengenhlekelele - ibisisayinwe ngabantu abangaphansi kancane kuka-700 000. Inhlangano ithe eNingizimu Afrika kubulawa abesifazane abalinganiselwa ku-15 ngosuku futhi abangu-117 babika amacala okudlwengula. "NjengeWomen for Change sesibona lesi sihluku usuku nokusuku sibambisana nemindeni ehlukunyezwa ukubulawa kwamalungu ayo futhi sikhulumela nodadewethu abahlukunyezwe kanzima noma badlwengulwa," kusho inhlangano. Ithe sekuyisikhathi sokuthi kubhekwane nalokhu ngoba izigameko eziningi zenziwa ngabantu abagilwa ababaziyo,…

YAWAPHIKA amacala ebekwe wona indodakazi yowayengumengameli wezwe, uMnuz Jacob Zuma, uNkk Duduzile Zuma-Sambudla (43). Lokhu kwenzeke kuqala ukuqulwa kwecala eNkantolo eNkulu yaseThekwini izolo. UNkk Zuma-Sambudla ubekwe wuMbuso amacala okubhebhethekisa udlame ngesikhathi somtapo ngo-2021. Izibhelu okukhulunywa ngazo zagcina zidlula nemiphefumulo yabantu abangu-345. Ulinganiselwa ku-R50 billion umonakalo owadaleka. UNkk Zuma-Sambudla wayelokhu efaka ekhasini lakhe le-X, izigameko ezazenzeka ngaleso sikhathi ezazihambisana nombhalo owawuthi: ''siyanibona'' bese esho igama lendawo okwenzeka kuyo leso sehlakalo. Ngesikhathi kunesigcawu seKhomishini yamaLungelo Abantu, iSouth African Human Rights Commission (SAHRC) esasiphenya ngezibhelu, omunye owayethula ubufakazi wakhala ngokuthi uNkk Zuma-Sambudla wayekhombisa ukuthi uyakujabulela okwakwenzeka. UMnuz, Jean Roux weForensic Research Lab, wathi imibhalo kaNkk Zuma-Sambudla yayikhombisa ukuthi ukushayela ihlombe ayekubona kwenzeka. Izigameko zokutapa ezitolo zenzeka kakhulu KwaZulu-Natal naseGauteng ngemuva kokuba uyise ekhalelwe ngamasongo kaSigonyela. Ukuqulwa kwaleli cala kulindeleke ukuba kudonse amasonto amabili.…

KUGXEKWE abasebenza ngezingane kuleli okungothisha, abahlengikazi, osonhlalakahle nodokoteka, okubekwe ijoka emahlombe abo ukuthi babikele abezomthetho ukuze kuvulwe amacala uma bethola ukuthi kunezingane ezingaphansi kuka-16, ezikhulelwe. Lezi zingane zithathwa njengezidlwenguliwe ikakhulu uma zikhuleliswe ngumuntu omdala kunazo. Nabazali abangabiki uma kukhulelwe izingane ezingaphansi kwale minyaka, abasalanga ngaphandle njengoba abanye kuvele ukuthi abafuni ukubika ngoba basuke befuna ukukhokhelwa. Lokhu kugqame izolo ngesikhathi ikomiti loMnyango wezabesiFazane, iNtsha nabaPhila nokuKhubazeka ePhalamende, lihlangane nezinhlangano ezehlukene ezibhekele izingane kuleli. Bekubhungwa ngendaba yokudlanga kwesihlava sokudlwengulwa kwezingane ezingaphansi kuka-16, nokuthi ingaqiniswa kanjani imigomo ekhona ukuze kuvalelwe abalala nalezi zingane. Lesi sihlava kuthiwa sandile kuleli njengoba nezibalo zeStats SA ziveza nokuthi kukhulelwa inqwaba yezingane ezinye ezineminyaka engu-10. Izinhlangano ezethule umbiko ePhalamende okubalwa i-Commission for Gender Equality (CGE), South African Human Rights Commission (SAHRC), Lifeline PMB, zisho ngazwi linye ukuthi abasebenzi…

ILAHLISA ithemba inkulumo yomqeqeshi we-Orlando Pirates, u-Abdeslam Ouaddou, ngokubonakala enkundleni kukanozinti weZimnyama, uMelusi Buthelezi, olizwa ngendaba ijezi kule sizini. UButhelezi (27) waseNquthu, wajoyina iPirates esuka kwiTS Galaxy ngo-2023 ekade eyinsika ye-The Rockets futhi eseqala nokubizwa kwiBafana Bafana kaHugo Broos. Nokho izinto zimshintshele kweZimnyama ngaphansi komqeqeshi, uJose Riveiro, owaqoka uSipho Chaine njengonozinti wokuqina weqembu. Ngesizini ka-2023/2024, uButhelezi wadlala imidlalo engu-13 kuyona yonke imiqhudelwano. Lesi sibalo sehlele kweyisihlanu ngeka-2024/2025. Ukufika komqeqeshi omusha, u-Ouaddou, okholelwa ekunikeni ithuba bonke abadlali, kwenyuse ithemba lokuthi uzolithola ithuba noButhelezi oselahlekelwe nayindawo kwiBafana. Nokho lokhu akucaci kwazise u-Ouaddou akayizwa eyokushintsha unozinti nakuba ezishaya isifuba ngokuthi akekho umdlali onendawo yakhe kwiPirates. Selokhu kuqale isizini ka-2025/2026, kwiPirates kuvimba uSipho Chaine obukeka esezibekisele indawo njengonozinti wesibili kwiBafana. UChaine uqokwe njengonozinti ovelele kwiBetway Premiership ngesizini ka-2024/2025. Emidlalweni engu-10 yePremiership, usangenelwe ngamagoli ayisihlanu.…

AKUBA kuyiZamalek SC yase-Egypt enomlando omude ebholeni lase-Afrika kodwa iKaizer Chiefs ibukeka ingase ithwale kanzima kwi-Al Masry yakuleliya lizwe emidlalweni ka-Group D weCaf Confederation Cup eqala ekupheleni kwenyanga. AMakhosi agcina ukuba semidlalweni yamaqoqo emiqhudelwaneni yeCaf ngo-2021, aqhathwe kuleli qoqo namaqembu amabili ase-Egypt neZESCO United yaseZambia. Ngonyaka okwagcina ngawo iChiefs ukudlala e-Afrika, yaguqa emdlalweni wamanqamu weChampions League ngo 3-0 ishaywa yi-Al Ahly yase-Egypt, eyayiholwa ngumqeqeshi waseNingizimu Afrika, uPitso “Jingles” Mosimane. Kunomuzwa wethemba kwiChiefs kusukela iqembu liwele ezandleni zamabamba abaqeqeshi okunguCedric Kaze noKhalil Ben Youssef. Laba banikwe umsebenzi wokushayela umkhumbi weChiefs kuze kuphele isizini kulandela ukuhlukanisa isigubhukane kukaNasredine Nabi waseTunisia, naleli qembu laseNaturena. Ngaphandle kokufaka iChiefs kweyamaqoqo kwiCaf, laba baqeqeshi bakhombisa izimpawu zokuwubamba kahle umsebenzi nakwiBetway Premiership lapho leli qembu lihleli khona endaweni yesithathu kwi-log. Umdlalo wokuqala ka-Group D weChiefs usekuhambeni ne-Al…

UBHEKWE ukuthi atakule iminyango kahulumeni edonsa kanzima ngasemalininuNgqongqoshe wezeziMali, uMnuz Enoch Godongwana, uma esethula isabelomali esibuyekeziwe ePhalamende kusasa.Iminyango okubalwa oweMfundo eyisiSekelo nowezeMpilo, iyona ehlale ikhala ngezinselelo zemali. Umfelandawonye wezinyunyana zabasebenzi, iCosatu, uveze ukuthi ubheke lukhulu esabelweni sikaGodongwana. UMnuz Matthew Parks weCosatu, uthe balindele ukuthi kumenyezelwe izinhlelo ezingeke zigxile ekunqamuleni isabelomali seminyango kahulumeni ngoba ivele idonsa kanzima. Uthe balindele ukuthi isabelomali sikhulume ngezithinta ukukhuliswa komnotho, ukuqinisa iSARS ukuze ikwazi ukuqoqa intela eyenele ezosiza ezweni kanjalo nezinye izinto. "Kumele kukhuliswe umnotho njengoba linyuka nezinga labangasebenzi kuleli eseliku-42.9%. Akugxilwe ekulweni nobubha, ubugebengu kanjalo nenkohlakalo edlangile ezweni." Uthe kumele kuvalwe nezikhala ezivulekile zodokotela, abahlengikazi, othisha, amaphoyisa kanjalo nezabanye abasebenzi abenza imisebenzi ebalulekile ezweni. "Sifuna kuqiniswe nokusebenza komasipala futhi kuliwe nemikhandlu ehluleka ukukhokhela abasebenzi ngesikhathi. Akuqiniswe ukuhanjiswa kwezidingo emphakathini." Ubalule nokuthi kumele kuqiniswe ukusebenza koPhiko…

MDLALI weSekhukhune United osanda kubizelwa kwiBafana Bafana, uKeletso Makgalwa, ubonge uPitso “Jingles” Mosimane ngokumqinisa ukhakhayi okusaqhubeka nokuthela izithelo njengoba sekuze kwavuleka ithuba lokuziveza kwiBafana Bafana. UMakgalwa (28) angase abonakale okokuqala kwiBafana eqeqeshwa nguHugo Broos ezozwana amandla neZambia emdlaweni wobungani ngoMgqibelo eNelson Mandela Bay Stadium, eGqeberha. Lo mdlali obevutha kwiBetway Premiership ngesizini edlule, waze waqokelwa umklomelo we-PSL Footballer of the Season, ungomunye wabasha esikwatini sikaBroos sabangu-23 esiqokelwe umdlalo neZambia wokulungiselela i-Africa Cup of Nations (Afcon) ezoqala ngenyanga ezayo eMorocco. UBroos usekucacisile ukuthi sekusele kancane ukuthi isikwati sakhe sihlangane kodwa ufuna ukubabukela eduze uMakgalwa noMasindi Nemtajela we-Orlando Pirates ngaphambi kokuthatha isinqumo ngazoya nabo kwi-Afcon. UMakgalwa wawina izicoco neSundowns esemncane eqeqeshwa uMosimane ngaphambi kokubolekiswa, wagcina ngokudedelwa. Ukhulume nabezindaba ekhempini yeBafana izolo eGoli lapho eveze khona akwenzelwe nguMosimane ekucijeleni leli thuba elibekwe phambi kwakhe.…

NGEMUVA kokukhishwa yiMarumo Gallants kowandulela owamanqamu eCarling Knockout, umqeqeshi weLamontville Golden Arrows, uManqoba Mngqithi, uphumele obala ngokuthi akezukukhwela adilike kubadlali bakhe ngokwehluleka kwabo ukufinyelelisa iqembu kowamanqamu. I-Arrows iguqiswe yiGallants ngo 4-2 sekukhahlelwa amaphenathi kowandulela owamanqamu ngeSonto eKing Zwelithini Stadium, eMlaza. Ihlulwa kulo mdlalo nje iyona ethole inqwaba yamathuba okushaya amagoli kulo mdlalo kodwa yahluleka ukuwasebenzisa zagcina ziye kumaphenathi zibambene ngo 2-2. Ukuphuma kwaBafana Bes’thende neRichards Bay FC kwiCarling Knockout kusho ukushabalala kwamathemba abathandi bebhola baKwaZulu-Natal ngokuba neqembu lakulesi sifundazwe kowamanqamu ozodlalwa ngoDisemba 6 ePeter Mokaba Stadium, ePolokwane, phakathi kwePirates neGallants. “Iqiniso wukuthi kufanele ngingabagxeki laba bafana ngoba ngenkathi kuqala isizini bebengaziboni bedlala kowandulela owamanqamu weCarling Knockout. Ngokwami ukufinyelela kwabo kulesi sigaba somqhudelwano kufanele bakuthathe njengegxathu eliya phambili ngoba kwamina bengingayilindele inqubekela phambili ngokushesha okungaka kuleli qembu. Uhlelo ebenginalo bekungelokuthi leli…

YIZE iMamelodi Sundowns Ladies isalokhu iqhubekile nokukhonya kwi-log yeHollywoodbets Super League kodwa ukwenza kahle kweTS Galaxy Queens ne-JVW FC kule sizini kukhombisa ukuthi sekuseduze livaleke igebe phakathi phakathi kwayo namanye amaqembu kule ligi. ISundowns yiyona esahlezi phezulu kwi-log yeSuper League ngamaphuzu angu-65, ilandelwa yiGalaxy Queens neJVW endaweni yesibili neyesithathu ngokwehlukana ngamaphuzu angu-60 iqembu ngalinye. Womabili la maqembu ahlukaniswe ngamaphuzu amahlanu neSundowns yize isidlale imidlalo engu-25. ISundowns isele ngomdlalo ezimbangini zayo okuyiQueens neJVW asebedlale imidlalo engu-26 nengu-27 ngokwehlukana. Kumasizini amathathu edlule, i-University of Western Cape (UWC) iyimise kabi iSundowns embangweni wesicoco seligi, yize leli qembu lasePitoli beligcina ngokusinqoba ngegebe elikhulu lamaphuzu. Nokho, kule sizini leli qembu laseKapa eliqeqeshwa uThinasonke Mbuli lehlelwe yifomu njengoba lingabalwa nhlobo emaqenjini amathathu aphezulu kwi-log njengoba bekwenzeka kumasizini edlule. Imidlalo emihlanu esalele iSundowns, eqeqeshwa uGodfrey “Godfather” Sapula,…