Tabla de contenidos para 2025-10-30 en Isolezwe

BAZOBHEMA bakholwe abathandi bomculo wokholo eNewcastle, njengoba umculi wokholo uGah Ndlela ehlele idili lomculo iWe Lift Him High Gospel Music Experience, ezoba seNewcastle Show Hall, ngoNovemba 22. Kulo mcimbi kuzobe kunandisa izinkakha zabaculi okukhona kuzo uMpumi Mtsweni, Lusanda Beja Ncandweni Christ Ambassadors, Jabu Hlongwane, Nozipho Phiri noSindi Ntombela. UThulani Ndlela odume ngelikaGah ohlela lo mcimbi, uveze ukuthi ukhethe ukwenza umcimbi walolu hlobo kude nedolobha iTheku ngoba kukhona abantu abafisayo ukuhambela imicimbi kepha ibaphuthe ngenxa yebanga. “Ngenxa yomcimbi engiwenza ngePhasika, abantu bakhombise ukuwuthakasela kakhulu ngakho ngabona ukuthi kukhona abantu bakoVryheid, Nquthu, Dundee nakwezinye izindawo abathandayo ukuhambela umcimbi walolu hlobo kodwa akwenzeki ngoba bahlala kude. Ngakho nethimba engisebenza nalo sibone ukuthi sihlele lo mcimbi. Abazowuhambela bazobusiseka njengoba sikhethe abaculi abazobajabulisa babavuselele okholweni. Sithi wonke umuntu oselahle ithemba, obhekene nobunzima banoma yiluphi uhlobo,…

SILO uMisuzulu Sinqobile kaZwelithini sithi asikaxoli 'ngokuqanjelwa amanga' kweNdlovukazi uShiyiwe Mantfombi Dlamini Zulu, ngesikhathi kuqhubeka icala elithinta umbango weSihlalo sobuKhosi bukaZulu. IMbube ithe nakuba isikudlulisile okombango wesihlalo, ithe asikapholi isilonda esadaleka ngokuqanjelwa kwendlovukazi amanga ngesikhathi kuqulwa icala. Ikusho lokhu ngesikhathi ikhuluma emhlanganweni wokubuyisana obusesigodlweni eMashobeni, izolo. Umhlangano ububizelwe ukuzokwazisa iNdlunkulu kaZulu nesizwe ngesinqumo senkantolo esivuna ukuqokwa kweSilo. Ekuqaleni kwenyanga, iNkantolo yamaCala aDlulisiwe yanquma ukuthi uMengameli Cyril Ramaphosa, walandela yonke imigomo ngesikhathi evuma ukuqokwa kweSilo. Ngesikhathi kuqulwa icala, uMntwana uSimakade kaZwelithini waveza ukuthi wafakwa esiswini sendlovukazi, wathi ukufakwa esiswini seNdlovukazi kumenza afanelwe ukuhlala eSihlalweni sobuKhosi bukaZulu. ISilo sibabaze ibhadi, sathi asikaze siyizwe ndawo le nto eyashiwo uMntwana uSimakade. "Kubuhlungu ngoba umama ongizalayo, osazithulela, ku0qanjwe amanga amakhulu ngaye esezithulele, esedlinzeni lapho elele khona. “Yake yenzeka kanjani into enjalo? Uma ubheka kukhulunywa…

SEPHOTHULA uhla lwemibuzo yakhe abeyibhekise koyiPhini lokuqala likaNgqongqoshe wamaPhoyisa, uMnuz Cassel Mathale, oyilungu elimele i-ActionSA ekomitini elikhethekile ePhalamende, uNksz Dereleen Elana James, uthe ngokwakhe ubevele efuna kubizwe “ofishi abakhulu” ngoba ubengabheke lutho kumaphini ongqongqoshe, wakugcizelela ukuthi ubufakazi bukaMathale kabusizanga ngalutho ngoba akukho afikele ukuzokusho. Nami ngizibuze ngaziphendula ukuthi yiluphi usizo lwamaphini ongqongqoshe, ngibuka kuphekwa uMathale ngoLwesibili, eKapa. Isikhathi sami engisichithile ngifuna ukuqonda ngokubaluleka kwawo singiqinisekisile ukuthi ngempela kukhuthuzwa abakhokhi bentela ngezindodla ezichithwa kuwona. Sikhuluma ngamaphini amabili eMnyangweni wamaPhoyisa osekuze kwaphela unyaka engakanikwa uhla lokusebenza kwawo. Wake wayizwaphi into enje? Kufane nokuqwala intaba okaMathale ezama ukuchaza ukuthi uvuka ekuseni aye emsebenzini, afike khona “abambe la ebona khona” ngokokusebenza njengoba esalinde uhla lokusebenza kungqongqoshe. Sikhuluma ngoMnyango wamaPhoyisa onongqongqoshe osanikwe ikhefu elikhethekileyo, uMnuz Senzo Mchunu nomunye osabambile, uMnuz Firoz Cachalia, nePhini lesibili uNksz…

USOLWA ukuthi ubengafuni ukwaliwa owesilisa waseCato Manor, eThekwini, okuthiwa udubule, wabulala owesifazane wasePort Shepstone, obeqashe kule ndawo. Kulesi sigameko esenzeke ngeSonto, kubulawe ngesihluku uNksz Nthabiseng Ncanane (34), edutshulwa kaningi obeyisoka lakhe, ekotishini abeqashe kulo. Ngesikhathi Isolezwe lihambele indawo yesigameko izolo, emva kokuzwa ngesigameko lifice umastende, uNkk Makhosi Nkosi, ezinyaziswe amalungu ambalwa omphakathi. Uthe ubekhona kwenzeka isigameko, yize engakuzwanga ukuqhuma kwesibhamu. “Ngithunyelwe umyalezo yisiqashi esihlala ekotishini elisondelene nelikamufi, sithi sizwa umuntu ekhala, kuqhuma nesibhamu,” kusho uNkk Nkosi. Uthe uye kobheka, wangqongqoza kuzo zonke izindlu kodwa kwangasabela muntu. Uthe uze wamthumelela umyalezo umufi kodwa wangawuphendula. “Ngijikele ewindini elingemumva, ngalunguza, nokuyilapho engibone khona uNthabi elele phansi, ingalo igaxeke embhedeni,” usho kanje. Uthe ubize abesilisa ababe nesibindi sokungena babona ukuthi udutshulwe, wafa. Omunye walabo besilisa, uMnuz Sabelo Nzama, uthe bakubona masinyane ukuthi enye…

MDLALI wasesiswini kwiKaizer Chiefs, uSibongiseni “Ox” Mthethwa, ubona kufanele bakhele phezu kwefomu abayikhombise emdlalweni wakamuva weCaf Confederation Cup njengoba bezodudulana neDurban City kusasa koweBetway Premiership. IChiefs izotholana phezulu neDurban City emdlalweni wePremiership eMoses Mabhida Stadium, eThekwini, kusasa ngo-7.30 ebusuku. Amakhosi ahambela phezulu kulandela ukujabulisa abalandeli bawo ngeSonto eledlule, ebhuquzisa i-AS Simba yaseDemocratic Republic of Congo (DRC) ngo 3-1 emdlalweni weCaf Confederation Cup, yazibekisela indawo esigabeni samaqoqo. Emidlalweni emithathu yakamuva yePremiership, iChiefs yehlulekile ukubuya namaphuzu amathathu okubalwa kuyona ewudlale ngokulingana ngo 0-0 neSiwelele FC. Lokhu kushiye abanye balandeli bayo bengeneme. “Lona wumdlalo obaluleke kakhulu kithina, esidinga amaphuzu amathathu kuwona ukuze sikwazi ukubuyisa isithunzi sethu nanokuthi sibambe umgqigqo ebesiqale ngawo isizini. "Wumdlalo okungafanele siwuthathe kancane kodwa siwuthathe njengalona esiwudlale ngempelasonto edlule, sakhele phezu kwale ndlela esidlale ngayo kulo mdlalo esibuya kuwona,”…

MDLALI weqembu lesizwe labesilisa lekhilikithi, uGeorge Linde, uthi kukhona abakufundile endleleni amaBhokobhoko anyuse ngayo isibalo sabadlali abakulungele ukudlala ezingeni eliphezulu. Iqembu lamaProteas ebelinabadlali abambalwa abanamava linqobe iPakistan ngama-run angu-55 emdlalweni wokuqala wochungechunge lwe-T20 eRawalpindi, ngoLwesibili. Likwenze lokhu ngaphandle kwabadlali okubalwa kubona u-Aiden Markram, Kagiso Rabada, Anrich Nortje, Keshav Maharaj nabanye. Abanye babo ababuya ekulimaleni kanti abanye baphunyuziwe ngaphambi kokubhekana ne-India emdlalweni we-Test. Iqembu lakuleli lihlanganise ama-run angu-194 kuma-over awo angu-20, sekuphume abadlali abayisishiyagalolunye. UReeza Hendricks uhambe phambili ngama-run angu-60 emabholeni angu-40. Liyikhiphe yonke iPakistan kwi-over ka-19 isishaye ama-run angu-139. Umshwibi osheshayo, uCorbin Bosch, uthole amawikhethi amane kwathi uLinde wathatha amathathu eshwiba i-spin. ULinde, oshaye ama-run angu-36 ngesikhathi ebhetha, uqokwe njengomdlali ovelele kulo mdlalo. Uthe indlela iqembu elidlale ngayo likhombise ukuthi iNingizimu Afrika icebe kangakanani uma kukhulunywa ngabadlali abalungele ukudlala ezingeni…

I-SOUTH African Social Security Agency (Sassa) ikhathazekile ngemibiko engelona iqiniso yokuthi bazoyiphinda kabili imali abahola izibonelelo. Le nhlangano ithe le mibiko ingamampunge njengoba kungekho simemezelo esenziwe sokuthi kuzoholwa kabili. Okhulumela iSassa, uMnuz Paseka Letsatsi, unxuse abantu ukuthi bangathumeli imibiko engelona iqiniso ngoba idukisa abantu. Unxuse abahola izibonelelo ukuthi bathembele olwazini oluphuma kwaSassa kuphela. "Sinxusa abantu ukuthi ngaphambi kokuba bathumele ulwazi abalubona ezinkundleni zokuxhumana, ukuqinisekisa ubuqiniso balolo lwazi. Ulwazi olungelona iqiniso lufaka ukhwantalala kwabahola izibonelelo," usho kanje. Uthe ulwazi olungu-ngqo baluthumela emakhasini abo asezinkundleni zokuxhumana. "Bangu-19 million abantu abahola izibonelelo kuleli ngakho ukuthumela ulwazi olungamampunge, kwenza izigidi zabaholayo bathuke," usho kanje. Uxwayise nabantu ukuthi bayibhekisise into abayibona ezinkundleni zokuxhumana. Le nhlangano ihlale iphunga izindaba ezingelona iqiniso ezisuke zisatshalaliswe emphakathini kusetshenziswa izinkundla zokuxhumana. ULetsatsi uthe abafuna ukuthola ulwazi ngokuthile bangabashayela ukuze bathole…

NDODA ebizama ukuthanjiselwa isigwebo seminyaka engu-10 ngokushaya ingoduso ngesipanela samasondo emoto ngoba ithi seyaxolisa "yayigeza" ngembuzi, ichithiwe yiNkantolo eNkulu yaseMgungundlovu. UMnuz Philani Mcebo Zondi ubeye enkantolo ekhala ngokuthi kuqiniswe kakhulu isandla uma enikwa iminyaka engu-10 ebhadla ejele ekubeni esageza umgilwa ngembuzi. Ngo-2023, uZondi wapaka imoto eceleni komgwaqo kade etetemuka nengoduso yakhe. Kuthiwa wazunywa yisithongwana waphaphama umuntu wakhe engasabonwa emotweni. Kuvela ukuthi wanikela kwakhe, wamlamela ehla kwiToyota Quantum eyayishayelwa umlisa owayeyisoka lakudala lengoduso. Kuthiwa uZondi akabuzanga lutho, wahosha isipanela semoto wangenela ngaso owayeyisoka lomuntu wakhe kwancane indawo. Owayeyisoka wacela empunzini, uZondi wase edumisa iQuantum walisusa maqede wehla lihamba - laye layobhajwa esihluthu, lalimala kabi. Emva kwalokho, uZondi wajikela ingoduso, wayihudula phansi eyikhwelele ngesipanela - yagcina ilimele kanzima. NgoSepthemba 7, 2022, ingoduso yayikade ithole incwadi yesivikelo yokuba uZondi angayishayi, angayisabisi futhi angayihlukumezi.…

UNOBUFAKAZI obethusayo ngezinhloso zosombangazwe bakuleli ekubusweni kwezwe kulandela izindaba zokuthi kunamaqembu edolobheni eGoli asefuna kukhishwe iMeya ekhona njengamanje, uMnuz Dada Morero. Kwayena uMorero uhleli esikhundleni nje usebuya isibili ngemuva kokuba kuso izinsuku ezingu-25 kuphela ngaphambi kokuba akhishwe ngo-2022. Ekungeneni kwakhe uMorero kokuqala wabe ethatha izintambo kuDkt Mpho Phalatse owayeqhoqhobele izintambo ngemuva kokhetho lomasipala luka-2021. Kwabuya yena futhi uPhalatse ngemuva kokuyolwela ngempumelelo isihlalo enkantolo. Awumanga lapho lo gingqigongqo kabhandemtshelekwana wesikhundla sobumeya eGoli njengoba ngoJanuwari 2023 kwangena uMnuz Thapelo Amad owahlala izinyanga ezintathu eketangweni lobuMeya, kwabe sekungena uMnuz Kabelo Gwamanda. Kuqhubekile ukuphekwa kuthululwa okuphethe ngokubuyiselwa kwakhe futhi umfo kaMorero ngo-Agasti wonyaka odlule njengoba sekuphinda kuvela izinkulumo zokuthi kunetulo lokumketula impinda. Kungelona iGoli kuphela njengoba nakomakhelwane walo eTshwane amaqembu aseluxove udaka lombangazwe kwaze kwabhajwa kwasani emayelana nokulethwa kwezidingo emphakathini. Bekunjalo naseKurhuleni, manje nanku…

MHLELI: Kwelakho eliwela imifula nemifudlana, nami ngithi ake ngiveze owami umbono ngalolu daba lokugembula oselusimi emiphinjeni njengesizwe. Thina bantu sicishe sifane nentshe, inyonikazi eyaye ithathe ikhanda layo ilithi shi esihlabathi bese ithi icashile kepha isibhumbulu somzimba wayo sibe sisele siwugabagaba ngaphandle. Lokhu ngikusho ngoba ezindaweni esizakhele, kungaba selokishini noma ezindaweni zasemakhaya, imishini yokugembula ingangamanzi okuphala izikhumba. Izitolo ezincane (tuckshops) yizona zizinda lapho okuqala khona inkinga ngoba abantwana esibathuma khona bafike bafake imali kuyo le mishini bagembule. Siyizakhamuzi sithula sithi du singazikhalimi nezingane zethu ngalo mkhuba. Engicabanga ukuthi njengamanje siyavuna noma-ke isivuno sethu sibaba okwesibhaha. Inkinga sesiyisizwe esingakwazi ukungenelela sikhuze imikhuba ezindaweni zethu. Lo hulumeni okukhalwa ngaye kuthiwa uyaphuza ukukhokha imali ye-NSFAS, yingakho izitshudeni zigembula ngayo uma seziyithola. Sidlala ngohulumeni, sibalekela iqiniso. Sifana nentshe nekhanda elingene shi esihlabathini, sizikhohlisa thina ngengozi…

UQHAKAMBISA ukuzithoba athi uyakholelwa kukho ngoba kumvulele iminyango uNksz Nandisa Khuboni (26) njengoba ngasekupheleni kwenyanga ezayo ezobhekisa amabombo eSeychelles, emcimbini wemfashini eyokhangisa ngemisiko ehlukene. UNksz Khuboni, waseSikhaleni, eMpangeni, uthi ukusebenza nabasiki bengqephu emcimbini iDurban Fashion Fair (DFF) yalo nyaka wawina nomklomelo wokuba yinxusa lawo kumvulele amathuba okuthi aphume kuleli aye kwamanye amazwe. Ekhuluma neSolezwe uveze ukuthi ukuthobeka yikhona okumbeke lapho ekhona ngoba uma ehlangana nabantu wenza isiqiniseko sokuthi uqhuba intobeko phambili. "Bengigxile ekungeneleni imicimbi yozime kakhulu, njengoba ngonyaka odlule kuze kube manje kuyimina engiphethe isicoco sikaMiss Icora. Ukubonakala kwami emakhasini abo ezokuxhumana kwenza abantu abaningi nezinhlangano ezizimele bafuna ukuthi sisebenzisane. Ngibheke eSeychelles nje kungenxa yabantu ababone umsebenzi wami, kodwa okungijabulisile wukuwina kwiDFF ngaba yinxusa lalo mcimbi okwenze amathuba ami avukela nakakhulu," usho kanje. Uthe kwiDFF ubesebenza nabasiki bengqephu…

MCULI kamaskandi odume ngokugijima ngenqina esteji, uVela "Sgwebo Sentambo" Khoza, usethi khumu emculweni. Le nsizwa ezakhele udumo ngokugila izimanga esteji, imemezele kwiBhanyazile TV2 ukuthi seyihosha imfe emculweni ngenxa yokuthi akusahambi ngendlela. Ithe abaculi abasakwazi ukwenza imali ngomculo njengakuqala ngenxa yokuthi sekusebenza kakhulu ubuchwepheshe bamanje. "Nabaculi sebebaningi kakhulu. Abaculi abafikayo sebeyasidlula thina futhi sebethandwa kakhulu kunathi." USgwebo uthe njengoba eseshiya emculweni, usezozama okunye azokondla ngakho umndeni wakhe. Uthe ubethathe isinqumo sokuvele anyamalale emculweni kodwa wanxenxwa ngamagoso nezinye izinsizwa azana nazo ukuba akhiphe i-albhamu yokugcina esihloko sithi UBab'uKuphonsakwenyathi. Uthe okwenze aqambe leli cwecwe ngalesi sihloko yingoba efuna ukuthulela isigqoko uyise kaMthandeni SK ngokuzala iqhawe. Echaza ngale albhamu, uthe igxile kakhulu kushameni noma kwisiChunu. USgwebo waKwesakwaBiyela, eMpangeni, uzalwa ekhaya lomculo kamaskandi. Umalume wakhe nguSipho "Thwalofu" Ngcobo kanti umzala wakhe uBhekisisa "Ihhashi Elimhlophe" Ngcobo.…

UTHIWA uzithintele ngokuthi athi "abahambe babuyele emazweni abo ngoba sebebaningi kakhulu kuleli" owesilisa okuthiwa ugwazwe, wabulawa owokufika eSydenham, eThekwini, ngeledlule. UMnuz Lwazi Sithole (24) ongowokudabuka ePhelandaba, KwaMhlabuyalingana, kuthiwa ugwazwe nge-screwdriver ngoMsombuluko odlule, ngowokufika okusolwa ukuthi ungumakhi wezindlu. Ngokusho kukamzala kamufi, uMnuz Ntandoyenkosi Gumede, umufi wehlelwe umshophi ehamba nabangani bakhe abathathu komunye wemigwaqo yaseSydenham. Uthe babelubangise esiteshini samaphoyisa saseSydenham, bekhaphe umufi owayeyolungisa izinto eziphathelene nezincwadi zokushayela amaloli. "Abangani bathi bahlangana nabokufika besilisa ababili, ababephambana nabo emgwaqweni. Bathi washo sakudlala ukuthi sebebaningi kakhulu kuleli, kufanele bahambe babuyele emazweni abo. Kuthiwa oyedwa wokufika wavele wabhoka ngolaka, bahilizisana kancane ngamazwi, wavele wakhipha i-screwdriver, wamgwaza kanye esibeleni,” kusho uGumede. Uthe abangani bazama ukubajaha laba abokufika, abavele baphela emehlweni. Uthe ngokuzama ukuhlenga impilo kamufi, abazange bazinike isikhathi esanele ukujaha laba besilisa, bavele babuya baphuthuma emtholampilo wendawo…

MHLELI: Yize usemningi umsebenzi osasalele iKhomishini kaMadlanga kodwa kuningi esikufundile ngezinto ezenzekayo ezweni lethu futhi ngeke siphike ukuthi okunye kwakho kusishiya sibambe ongezansi. Yingakho kunesidingo sokuthi kungagcini ngale Khomishini kodwa abuye ebe khona amanye ukuze izwe lethu libuyelwe yisithunzi. Okunye okushayisa ngovalo emva kokuzwa ngamanyala wukuthi kuyishwa ukuthi kunindeke abaholi abasuke bephethe iminyango ebaluleke kakhulu ekuphepheni kwezwe. Okunye okufikisela ngamahloni wukuthi akwandele bani ukuthi ube yilungu lePhalamende, baningi abaholi esiyaye sibone uJehova ebanika iphalishi ukuze badle okuyothi ekugcineni lelo phalishi balifake inhlabathi ngenxa yokunganeliseki ngalokho okusuke kubekwe etafuleni. Baningi abaholi bethu abasemajele, abanye abasagqigqa ezinkantolo ngenxa yokunganeliseki ngalokho abasuke bebusiswe ngakho. Siyethemba ukuthi lingacishe libuye ithemba kubatshali mali futhi nezwe lethu libuyelwe yisithunzi uma iKhomishini isiwuphothulile umsebenzi wayo. Kodwa-ke ngeke siphike ukuthi kuyofana nokuthela amanzi emhlane wedada uma abaholi bethu…

MHLELI: Kwelakho eliwela umfula ugcwele, ngivumele ngisho uvo lami nokungaphakathi kwenhliziyo yami. Lokhu osekwenzeka kwezinye izikhathi ezweni lakithi kuliveza lintekenteke ekugcinweni komthetho. Ukulimala kwezingane zomfowethu uMnuz Khaya Dlamini, abantwana bakhe abangamawele u-Aphile Dlamini no-Aphelele, kufikisela izinyembezi nomunyu. Ukushonelwa umntwana ngalolu hlobo ngenxa yabantu abanganaki kubuhlungu. Lokhu kuveza okukuqala ukuthi nokuphepha kwaleli bhilidi ezingeni lonogada kubucayi kangakanani. Kubuye kuveze nokuthi abanikazi balezi zindawo bagade kuphela imali engenayo kunokuphepha kwabantu abangabaqashi. Abanikazi bebhilidi lakwaHomii kuJoe Slovo Street kumele baphendule ngalokhu ngoba umndeni nathi siwumphakathi siyazidinga izimpendulo ngalesi sehlakalo. Lokhu kuzodinga ukuba abezokuphepha kumasipala benze izinhlelo ezisheshayo zokuphenya nokuthi kuvinjwe okunye ukwenzeka kwezigameko ezifuze lezi. Kwenzeka lokhu nje, akuqali njengoba ngo-2023, kwashona u-Andiswa Mantshongo, nakhona kwanyathelwa nje kwangathi akuhambanga muntu emhlabeni. Siwumphakathi wakuMasipala waseMngeni namaphethelo noMgungundlovu wonke, sithi sidinga ubulungiswa emndenini wakwaDlamini. Uma…

UBALISA ngokumiswa komntwana wakhe esikoleni unina womfundi waseMtapo High okuthiwa wadlwengulwa nguthisha waze wamkhulelisa. Lo mfundi kwavela ngaphambilini ukuthi wayekade eyintombi esahlolwa. Umsolwa kuleli cala, uMnuz Nhlakanipho Zulu, ubekade evele eNkantolo yeMantshi yaseNtuzuma, izolo, icala lahlehliselwa uNovemba 12, njengoba kusakhona ubufakazi obusaqoqwa. Ekhuluma neSolezwe ngaphandle kwenkantolo, unina womgilwa uthe kuze kwadingeka ukuba umntwana wakhe - owenza uGrade 10 - amiswe esikoleni. Uthe lokhu kubangelwe ukuthi kukhona abafundi ebebemgcona ngesimo esamehlela sokudlwengulwa aze agcine esekhulelwa. ''Kuze kwathiwa umntwana wami makame kancane ukuza esikoleni kuze kudlule lesi simo. Lokhu kungiphathe kabi njengomzali wakhe. Ngiyazibuza ngiyaziphendula nje ukuthi ngempela kwenzekani ngempilo yomntwana wami?" kanjena. Uthe uzamile nokuthi axhumane noMnyango wezeMfundo KwaZulu-Natal kodwa akukho asizakale ngakho, wathi okumthunuka kakhhulu amanxeba ukwazi ukuthi umntwana wakhe wadlwengulwa izikhawu eziningi. Ukhale ngokuthi abaphephile abantwana abakulesi sikole uma…

MUNYE wabalingisi abagqamile emdlalweni wakuMzansi Wethu othi Homecoming, okhonjiswa ngoMsombuluko kuya kuLwesithathu ngo-6.30 ntambama, usedalule ukuthi ubuqiniso nobunjalo besimo esibhekana namadoda asikhombisa ngendawo ayilingisa kuwona senza akujabulele ukubeka obala ubunjalo bezimo ezibhekana nabesilisa. Lowo nguSabelo Radebe, olingisa indawo kaNgarage Hlongwane kulo mdlalo okhiqizwe yiTshedza Pictures, okuthe usanda kuqala kwagqama izinselelo abhekana nazo zokuthi azame ukuziphilisa kepha impilo yakhe ingachumi ngendlela afisa ngayo, okuze kudale ukuthi azizwe ecindezelekile ikakhulu njengoba kwenzeka angahlonipheki. "Ngilijabulele kakhulu leli thuba ngoba liveza ubunjalo bezimo ezenzekayo empilweni ukuthi udlale ngamathuba ekukhuleni kwakho. Lokho kwenza ukuthi ezinye izinto zingahambi kahle empilweni ngoba ungawatholi amathuba amaningi namahle njengabanye abantu ngenxa yokuthi awufundile futhi awunalutho olutheni lokuphila," usho kanje. "Ngale kwalokho, ngiyibona kuyindawo ezoba nezimfundiso ezinhle nezimqoka futhi ezizokwenza ukuthi abantu besilisa bafunde ukubekezela ezimeni ezinzima ababhekana nazo empilweni,…