Tabla de contenidos para 2025-10-29 en Isolezwe

INHLANGANO evikela isithunzi namalungelo amabandla kuleli, iSouth African Church Defenders (SACD), seyinqumele abeMultiChoice nabeMoja Love ugwayi katiki ithi akakhonjwe indlela umethuli wohlelo iFake Pastors kwiMoja Love, uSihle Sibisi, bese bebuyekeza nalolu hlelo ngaphambi kokuba ihlohle amakholwa ukuba adube izinhlelo futhi alaxaze iDStv (okuyiyo esingethe iMoja Love). Ngokwencwadi ebhalelwe izikhulu zeMultiChoice futhi ebonwe yiSolezwe, amakholwa abona lolu hlelo njengomkhankaso wokujivaza inkolo nezinceku zeNkosi. Incwadi iyakuveza ukuthi ubudlelwano bukaMbhishobhi ongasekho, uTB Joshua noSihle, kwenza lolu hlelo lubukeke njengenkundla lapho uSihle eziphindiselela kubefundisi emuva kokunukubezwa nguJoshua. "Siyaphoqeleka ukuba sikhulume ngoba okusakazelwa umphakathi kwiMoja Love kuqhubezela ukuhlaselwa kwenkolo yobuKhrestu esidlangaleni." Iqhuba incwadi ithi indlela uhlelo olwethulwa ngayo isidweba sigqame isithombe sokuthi inhloso yalo, akukhona ukwazisa nokuvikela umphakathi kodwa sekuwukuhlekisa ngesonto nokuxabanisa abazalwane. Ithi lolu hlelo alusavezi abefundisi abangombombayi kodwa seluqhamuka nehaba. "Isibonelo nje,…

NKINGA yokugembula ingenye yezinselelo ezilokhu zikhathaza njalo eNingizimu Afrika, okubukeka sengathi ikapakela cishe kuzona zonke izindlela zokugembula kusuka kuma-casino kuze kufinyelele ekugembuleni usebenzisa iselula nama-website. Lokhu kubukeka sekudale enkulu inkinga nenselelo ezweni ikakhulu kwabesifazane ababhekana nengcindezi yokuswela imali, ukucindelwa wukuthi kunabantu abalindele ukuthi baphile noma benze izinto ngendlela ethize emphakathini, okwenza bazizwe becindezelekile emqondweni. Ucwaningo olushicilelwe yisikhungo esicwaninga ngezimo ezahlukene emhlabeni, iFrontiers, ludalule ukuthi abantu besifazane abagembulayo kuvame ukuthi babukwe ngendlela ethize, kube sengathi bona akubafanele ukwenza lokho, babukwe njengokuthi bawomama abangekho qotho. Lolu cwaningo luthi lezo zinkoleloze ngalabo besifazane zandisa umthwalo kulabo asebebishe kule nkinga, kwenze ukuthi bengabe besakwazi ukuphunyuka. Eminyakeni eminingi edlule, inkinga yokugembula kwabesifazane yande kakhulu, njengoba abanye babo bese beyisebenzisa njengendlela yokubhekana nezinkinga zokuswela imali. Umbiko weNational Gambling Board (NGB) uthole ukuthi okunye okudale ukuthi inkinga…

LUKHALA ngokudonsa isikhathi eside kwecala lokubulawa kowabe engukaputeni we-Orlando Pirates neBafana Bafana, uSenzo Meyiwa, uPhiko lweNtsha ye-ANC eThekwini. Lolu phiko luzwakalise lesi sikhalo izolo luvakashele unina kaSenzo, uNkk Ntombifuthi Meyiwa, emzini wakhe okwa-K, eMlaza. Iphini likanobhala kulolu phiko, uMnuz Chalie Mzimela, lithe kuyabakhathaza ukubona icala lidonsa isikhathi eside kangaka. "Leli cala selidonse isikhathi eside. Sifuna ukulibona liphela futhi liba nento ephathekayo. Kungakuhle futhi uma kuboshwa abantu abafanele," usho kanjena. Eqhuba uthe abantu baseNingizimu Afrika bayakudinga ukuthola iqiniso ngokwenzeka ngosuku lokubulawa kukaMeyiwa. Unobhala walolu phiko, uNksz Nokulunga Khuzwayo, uthe babone kumqoka ukuba balekelele unina kaSenzo. ''Sibonile ukuthi njengabantu abasha be-ANC masisondele kube khona esikwenzayo. Asiphathekanga kahle sibona i-video kamama isabalala ezinkundleni zokuxhumana kukhona izinto abebalisa ngazo ethi uyazidinga," kuchaza yena. Lolu phiko lwenze isibophezelo sokuthi luzolokhu lungenelela nje lapho lo mndeni…

AYEDE Hlanga lomhlabathi, iNdlulamithi yamakhosi, abaNtwana baseNdlunkulu, amakhosi nabadidiyeli bempi yeSilo namabutho. Ngiyakhuleka kini nina boHlanga. Kunezinto eziwumonakalo eziqala kancane emfaneni osakhulayo, nazo zikhula naye uma ekhula. Uma ingane ikhombisa izimpawu zobubhoklolo isencane kumele umzali noma amalungu omndeni akukhalime lokho umfana esathethiseka. Ububhoklolo enganeni bucaca uma ingane ingakwazi ukudlala nezinye izingane ngaphandle kokuzikhalisa, ukuziphuca okungokwazo noma ukukhuluma okunesankahlu. Lezi yizimpawu zokungakwazi ukwamukelana nokuphilisana nezinye izingane. Umzali noma lowo okhulisa leyo ngane kumele aqinise isandla uma ekhuza ingane. Le nto ibukeka sengathi yamukelekile kodwa iqiniso wukuthi iwumonakalo omncane kodwa onemithelela emibi ekukhuleni kwengane, ikakhulukazi yomfana. Namhlanje sinenkinga entsha okuyisihlava sodlame olubhekiswe kwabesifazane nezingane. Uma uthi uyalandela kahle, umfana ohlukumeza abantu besifazane nezingane waqala ukukhombisa izimpawu zobubhoklolo eseyingane kodwa akekho umuntu owakuthatha njengomthwalo wakhe ukukhalima leso simo ingane isakhula. Ngisho esikoleni imbala,…

MHLELI: Umbhalo wentatheli yakho, uCharles Khuzwayo, ngaphansi kwesihloko esithi UMasipala waKwaHlabisa uwabungaza nini amaqhawe awo? uthinte indaba enkulu. Empeleni cishe bambalwa omasipala abangenawo amaqhawe avelele emikhakheni ethile okumele abungazwe yibo omasipala ngezindondo nangemiklomelo ethile. Iningi lomasipala manje liphethwe yizimeya ezimnyama eziwaqonda kahle amaqhawe endawo. Futhi akumele kugcine lapho, ngisho amadolobha noma imikhandlu yabo omasipala ingashintshwa ibizwe ngawo amaqhawe lawo. Maningi amadolobha asabizwa ngamagama abacindezeli abafike basiphanga umhlaba maqede bakha amadolobha bawetha ngabo okanye ukhokho babo. Siyabonga njengoba abantu baseMnambithi babhidliza uMasipala waseMnambithi nowaseNdaka bahlanganiswa, kwabunjwa uMasipala i-Alfred Duma okungesinye isishoshovu sakuleziya zinkalo esasizalwe ngo-1927.Uma futhi usuka eMnambithi unqamula uza eMpumalanga esizweni seNkosi uMajozi, kunedolobha ebelikade laziwa ngePomeroy. Liqanjwe ngesosha elimhlophe uSir Pomeroy. Namuhla leli dolobha nomasipala sekubizwa ngeSolomoni Linda oyingwazi yomculo wesintu. Kuyoba kuhle ngelinye Ilanga amadolobha onke asesifundazweni agcine…

UMQEQESHI weTS Galaxy, u-Adnan Beganovic, ukholwa wukuthi umdlali wakhe wasemuva uKhulumani “Mtara” Ndamane, unakho konke okudingwa ngumqeqeshi futhi akangabazi ukuthi uwuhlobo lomdlali iqembu lesizwe iBafana Bafana elingathembela kuyena emqhudelwaneni we-African Cup of Nations (Afcon) osuseMome. Lo mqeqeshi ukusho lokhu ekhuluma nezintatheli ngemuva komdlalo wezakhe neLamontville Golden Arrows wama-quarterfinal eCarling Knockout, ngeSonto, eKing Zwelithini Stadium, eMlaza. IGolden Arrows iguqise iGalaxy ngo 3-1 kulo mdlalo, yazibekisela indawo kweyandulela owamanqamu. UBeganovic usho kanjena nje, kunezinkulumo zokuthi uNdamane usayine inkontileka neMamelodi Sundowns kodwa yambolekisa kwiGalaxy kuze kuphele isizini ka-2025/2026. “Kusukela ekufikeni kwakhe njengabanye abadlali abasebancane abanjengoPuso Dithejane, uKhulumani ukhombisile ukuthi ungumdlali wekhethelo. Uliphasa kahle ibhola. Umandla nasekulingqomfeni ngekhanda emoyeni. Kuseyisizini yakhe yesibili le edlala esigabeni esikhokhelayo, angicabangi ukuthi usefikile emidlalweni engu-40 aseyidlalile. Ngokuqhubeka kwesikhathi uzoya ngokuya eba ngumdlali ongcono kakhulu,” kusho uBeganovic. “Usekulungele ukudlalela…

UMQEQESHI weRichards Bay FC, uRonnie Gabriel, unethemba lokuthi ifomu yaleli qembu emqhudelwaneni weCarling Knockout izodlulela emidlalweni yayo yeligi kwazise ayenzanga kahle emidlalweni yakamuva yeBetway Premiership. IRichards izibekisele indawo kweyandulela owamanqamu eCarling Knockout ngokubhaxabula iDurban City ngo 3-1 kuma-quarterfinal kowabakhaya baKwaZulu-Natal eMhlathuze Sports Complex, ngoMgqibelo. IBay ifinyelele kuma-quarterfinal ngokunenebula iChippa United ngo 4-1 emzuliswaneni we-Last 16 okuyinkomba yokuba sefomini enhle kwaleli qembu kulo mqhudelwano womkhumulajezi. Leli qembu elizodudulana nePolokwane City ekuhambeni kowePremiership ngoMgibelo ngo-6 ntambama e-Old Peter Mokaba Stadium, ePolokwane, ifomu yalo yakamuva emidlalweni yeligi ayifani nelisayikhombise kwiCarling Knockout. Lisawine kathathu emidlalweni engu-10 yeligi elisayidlalile kule sizini. Emidlalweni emibili yakamuva yePremiership, iNatal Rich Boyz ibhaxabulwe yiMamelodi Sundowns ngo 4-1, yashaywa yi-Orbit College ngo 1-0. “Singathanda ukuthola imiphumela efanayo emidlalweni yethu yeligi njengoba senza kahle kweyendebe yomkhumulajezi. Sikwazi ukunqoba imidlalo ngendlela…

ISISEZITHEBENI zePhalamende eyesihlava sokugembula esihlasele entsheni yakuleli, okubalwa izitshudeni nezingane ezisafunda isikole. Amaqembu ahlukene ePhalamende azobhunga ngalesi sihlava ngokuba nenkulumo mpikiswano ngokuthi yikuphi okumele kwenziwe ngenxa yokudlanga kwale nkinga entsheni. Kuthiwa ezinye zezitshudeni sezigembula ngemali yokufunda neyokukhokhela izindawo zokuhlala ezikhungweni zemfundo ekhishwa yisikhwama, iNational Students' Financial Aid Scheme. Ilungu lePhalamende, uMnuz Makashule Gana weRise Mzansi, eliphusha umkhankaso wokulwa nesihlava sokugembula kuleli, okuyilona elifake lesi siphakamiso ePhalamende, lithe sizobhungwa ngoLwesihlanu. UGana uthe kudingeka kube nemigomo ecacile ezolawula imboni yokugembula kuphinde kuvikelwe nabantu bakuleli. Uthe amaqembu ahlukene azobe ephefumula ngalesi sihlava njengoba kuzoba nanengqungquthela yezokugembula. "Ingqungquthela yokugembula kulindeleke ukuthi ibe ngoNovemba 13 no-14, 2025 kanti ibizwe abeSouth African Responsible Gambling Foundation (SARGF), eGoli. “Sifuna kwehliswe izinga okukhangiswa ngalo ukugembula njengoba kwenzeka kwehliswa eyokukhangiswa kotshwala ezweni elifana nelethu. Siyibheke ngabomvu le nkulumo yasePhalamende…

UBUCHWEPHESHE bushintshe indlela okwenziwa ngayo izinto emhlabeni jikelele, kwehlisa isikhathi sokwenza izinto uma kuqhathaniswa naphambilini. Enye yezinto eyenzekile ngukuthi abantu abasadingi ukuya emabhange ukuyothumela imali, sebemane bachofe omakhalekhukhwini, khalakatha imali. Muva nje, kungenise isifo sokugembula kusetshenziswa bona ubuchwepheshe. Phambilini abantu bekudingeka baye ngqo, ema-casino, manje sebekwenza lokhu benoma yikuphi. Muva nje kuqubuke imvunge, kuvela ukuthi umkhuba wokugembula usungenise nasezitshudenini, ezikhungweni zemfundo ephakeme. Izitshudeni kuthiwa zibhubhudla ngokugembula imali yoxhaso lokufunda, eyezincwadi, eyezindawo zokuhlala neyokuphila ephuma esikhwameni iNational Students' Financial Aid Scheme (NSFAS). Udaba lokugembula kwezitshudeni lukhathaza ngisho abasePhalamende, abathi leli chilo kumele likhuzwe ikakhulu ngoba awumuhle umthelela wokugembula kubantu. Abaningi bakhala ngokuthi asisihle isiphetho sokugembula njengoba abanye baze badayise ngisho izimoto zabo, abanye badayisa nemizi ngoba kusuke kungasaphumeki ogibeni lokugembula. Odabeni lwezitshudeni kukhonjwe ngenjumbane iNSFAS ngokuphuza ukudedela imihlomulo yezitshudeni, njengembangela…

MNDENI wowesilisa waKwaWoza, KwaNzimakwe, eMargate, okuthiwa unyamalale ngendlela engaqondakali ngeledlule, usola abangani ayebaphelezele ukuyogeza ngembuzi emfuleni uMzimkhulu. UMnuz Mlondi Jula (23) kuthiwa wagcina ukubonwa ngoLwesithathu olwedlule, ehamba nabangani ababili, omunye wabo ongumakhelwane. Udadewabo walona wesilisa, uNksz Noluthando Thuwe Jula, utshele Isolezwe ukuthi ngosuku ababagcina ngalo, abangani ababili babekade bethenge imbuzi kubo (kwaJula). Uthe babe sebecela uMlondi ukuthi abahambise emfuleni lapho umakhelwane ayeyogeza khona, wathi ngakusasa umshana kaMlondi wathola umyalezo owawuthunyelwe ngeselula yakhe. Uveze ukuthi lo myalezo wawuyalela umshana ukuthi athumele inombolo yakhe kamazisi ukuze uMlondi, owayevule ikhadi lakhe lasebhange esebenzisa imininingwane kamshana, alungise kabusha inombolo eyimfihlo. “Umshana wayithumela inombolo yakhe kamazisi. Akuphelanga sikhathi esingakanani, kwafona umakhelwane, wambuza ukuthi ugcine nini ukukhuluma noMlondi ngoba akamtholi ocingweni,” kusho uNksz Jula. Uthe umakhelwane wabuye wabuza ukuthi umthumele yini inombolo yakhe kamazisi njengoba ebeyifuna…

KUSHAYA into ecokeme kweKaizer Chiefs ibhaxabula i-AS Simba yaseDemocratic Republic of Congo (DRC) emdlalweni weCaf Confederation Cup ngempelasonto, akungatshazwa ukuthi kuyisikhuthazi ngaphambi komdlalo wayo weligi neDurban City eThekwini. IChiefs idlulele esigabeni samaqoqo kwiConfederation Cup ngokukhipha i-AS Simba ngo 3-1 sekuhlanganiswe imiphumela yomlenze wokuqala nowesibili. Kowokuqala iChiefs ibambane neSimba ngo 0-0 ekuhambeni eLubumbashi, ngaphambi kokuqedela umsebenzi kowomlenze wesibili eDobsonville Stadium, eSoweto, ngeSonto. Izodudulana neDurban City koweBetway Premiership ngoLwesihlanu ngo-7.30 ebusuku, eMoses Mabhida Stadium, eThekwini. Ngenxa yokungenzi kahle kwaMakhosi emidlalweni yawo yakamuva yePremiership, lo mdlalo azowudlala neCity yiwona okubhekwe ukuthi awusebenzisele ukubuyisa ithemba kubalandeli bawo abazwakalise ukungenami ngokulahla amaphuzu kwaleli qembu emidlalweni emine yakamuva. IChiefs idlale ngokulingana emidlalweni emithathu ilandelana, ibambana neMarumo Gallants ngo 0-0, AmaZulu FC ngo 1-1 neSiwelele ngo 0-0. AMakhosi aqale ngonyawo oluhle enqoba imidlalo emine kwemihlanu yokuqala. Nokho…

UZONDIZISA ifulegi lakuleli kwiCaf Champions League uRhulani Mokwena, okunguyena yedwa umqeqeshi waseNingizimu Afrika ozocija iqembu esigabeni samaqoqo kule sizini ka-2025/26. UMokwena uthathe izintambo eqenjini lase-Algeria iMC Alger ngoJulayi, nonyaka, kusaphele izinyanga ehlukane nelaseMorocco, iWydad Athletic. Izinto zisamhambele kahle kwiligi lapho iqembu lakhe selinqobe khona imidlalo emine, ladlala ngokulingana kowodwa. Lingene kwiChampions League ngokuguqisa iFC Fassell yaseLiberia ngo 3-0 emzuliswaneni wokuqala, lakhipha iColombe yaseCameroon emzuliswaneni wesibili. Umlenze wokuqala obuseCameroon uphele zibambene ngo 1-1, owesibili waphela ngo 0-0 e-Algiers, ezikaMokwena zadlula ngenxa yokushaya igoli ekuhambeni. “Ngibone ukulwa nobumbano kubadlali bami. Asizange sivumele izitha ukuthi zisihlukumeze. Besidlala nompetha baseCameroon abangazange badlale phakathi nesonto ngesikhathi sidlala umdlalo onzima neParado,” kusho uMokwena ekhasini leqembu lakhe kwiYouTube. "Sidlale ngaphandle kwabalandeli bethu sibhekene nompetha baseLiberia kanye nabaseCameroon. Lokhu kusho lukhulu eqenjini lethu futhi ngithanda ukuhalalisela bonke abayingxenye…

IZE uJames "God'olulala amankankane" Mthembu abengawazi umubombo kathisha kodwa ubebalwa nezinyanga ezikhomba ngophakathi. UGod'olulala amankankane (61) wasesigodini sasePhelandaba, eManguzi, KwaMhlabuyalingana, uhambe emhlabeni ngoLwesihlanu ebusuku, emuva kokuthelwa ngoyaba lwezinhlamvu kade ezithokozisa nomndeni wakhe. Umufi waqala ukuzakhela ugazi emphakathini ngesikhathi ebophisa intombazane eyayizama ukumdayisela ingane ephila nebala elimhlophe eneminyaka ewu-11 ngo-2016. Lo wesifazane, owagwetshwa iminyaka ewu-20 ebhadla ejele, wabuye wafuna ukudayisela umufi izingane ezintathu eziphila nebala elimhlophe ngo-R100 000. UGod'olulala amankankane yinyanga ebizishaya isifuba ngokuthwalisa abantu ukuze bagwilike futhi eziqhenya ngokuthi ubekwazi ukugqihisa umuntu angadubuleki ngaphandle kokusebenzisa izicubu zabantu. Ubengakholelwa ukuthi kunomuthi wenhlanhla ongakhandwa ngezicubu zomuntu. Umlando omfishane kaGod'olulala amankankane Umufi uzalelwe esigodini saKwaMamshudu, ngaphansi kweNkosi uMabhudu Tembe. Ubeyingane yesibili ebantwaneni abawu-11 kunina noyise, okungamantombazane amathathu nabafana abawu-8. Ushona nje umufi, ubese esele nabafowabo ababili kuphela emhlabeni. Ngesikhathi ontangayakhe befunda esikoleni, umufi…

IZOHLONISHWA ngezindondo zekhethelo izingwazi zakuleli ezigqame emikhakheni eyahlukene emcimbini ohlelwe ngu-Arthur Mafokate eGoli, ngoMgqibelo. U-Arthur oyinkakha ye-kwaito ehlonishwayo, uhlele umcimbi i-A Night With Legends ozoba seVodacom World, eMidrand. Umcimbi uhambisana nezindondo zokuhlonipha izinkakha. Ezizohlonishwa kulo nyaka ngowayenguMvikeli woMphakathi, uThuli Madonsela, umculi ongumlingisi uThembi Seete, owayengumdlali weBafana Bafana uDoctor Khumalo, usomabhizinisi uJohanna Makgalemele, umxoxi wezinganekwane uGcina Mhlophe, umculi uYvonne Chaka Chaka, yiciko uPitika Ntuli, umsiki wengqephu uDavid Tlale nomlingisi uLeleti Khumalo. U-Arthur utshele leli phephandaba ukuthi lezi zingwazi bazikhethe ngemuva kohlelo olunzulu obeluholwa ngamathimba abo. "Abheke umthelela ezweni nesandla asifake kwezobuciko, amasiko, ezemidlalo, amabhizinisi nokuthuthukisa umphakathi emuva kwesicelo sokuthi kuthunyelwe iziphakamiso. Besifuna ukuhlonipha abantu amagalelo abo asaqhubeka nokugqugquzela izizukuwane, abantu abakhe iNingizimu Afrika ekhaya nangaphandle," kusho u-Arthur. Uthe izingwazi zizothola indondo yekhethelo bese kuvezwa nezinto ezigqamisa amagalelo azo. U-Arthur uveze injabulo…

MHLELI: Ngicela ukufisela abantwana bakamatikuletsheni ka-2025, ukubhala okuhle nokubaluleka ukuba baqonde ukuthi konke kuncike kuMdali. Ngalokhu ngichaza ukuthi kungakuhle baqonde ukuthi usuke ungesona isilima uma ungumfundi uqala ukufunda uqala ngokukhuleka kuMdali noma usuqeda ubonge futhi ngokukunika ithuba lokufunda. Khumbula ukuthi baningi abebefisa ukubhala umatikuletsheni kodwa alubaficanga usuku. Akungoba bebeyizilima noma ngabe yini kodwa yingoba ubesebathatha uMdali wethu. Ngicela ukubagqamisela ukuthi konke kuncike koyedwa la emhlabeni esiphila kuwo, ngisho nangale kwamathuna ethu incike koyedwa vo, uMdali wethu uJesu Kristu. Mfundi, usuke ungumfundi ozoba nempumelelo enkulu, okokuqala uma ube nenhlanhla yokukhulela ezandleni zabazali abakukhulisa ngegiya lezeluleko zikaJesu nabaqinisekayo ukuthi bakukhulisa ngenkolo yobuKristu. Vuka ekuseni kukugqamele ukuthi akungoba usile noma uhlakaniphile kodwa yingoba kuthanda yena uMdali. Uyahamba uya esikoleni, uyafika uphinda uyafunda, kuyafundeka yingoba kuthanda yena uMdali. Uphinda ntambama ubuyela ekhaya…

NDLUNKULU kaZulu ibheke ukuqhamuka nesu lokulanda abaphikisa ukuqokwa kweSilo uMisuzulu Sinqobile kaZwelithini. Itulo lokulanda abaphikisa ukuqokwa kweMbube lizothungwa emhlanganweni ozokuba sesigodlweni eMashobeni namhlanje. Umhlangano ubizelwe ukuzoxoxa ngesinqumo seNkantolo yamaCala aDlulisiwe esivuna ukuqokwa kweSilo. Inkantolo yanquma ukuthi uMengameli Cyril Ramaphosa, walandela yonke imigomo ngesikhathi evuma ukuqokwa kweSilo ngo-2022. Okhulumela iSilo, uMntwana uThulani kaGqikazi Zulu, uthe umhlangano wanamhlanje uzonikeza iNdlunkulu ithuba lokuba ibuyisane. "Njengoba sonke sazi ukuthi ngo-Okthoba 6 kwaphuma isinqumo senkantolo esivuna iNgonyama esesihlalweni, alikaze libe khona ithuba lokuthi iNgonyama ihlangane nabantu, ihlangane nabaNtwana, kuzokhulunywa ngendlela eya phambili. Noma ngabe kukhona ukuthi iNgonyama yaphumelela, thina njengeNdlunkulu ayikho into esijabulisayo lapho ngoba sihlukene phakathi. INdlunkulu ayibumbene." UMntwana uThulani uthe uqhekeko olukhona eNdlunkulu aluluhle neze. "Kufanele ukuba kuzothungwa itulo lokuthi singenzenjani ukuthi namhlanje sibe nokuzwana nobunye. Akumnandi esizweni uma kukhona abaNtwana okubukeka bengaphesheya.…

UMQEQESHI weStellenbosch FC, uSteve Barker, ukhiphe ingonyuluka ngokwenza afise ukuqhathwa neKaizer Chiefs eqoqweni leCaf Confederation Cup kulandela ukuthi womabili la maqembu amele iPremier Soccer League (PSL) edlulele esigabeni esilandelayo salo mqhudelwano. NgoMsombuluko ozayo eGoli, iCaf izoqhatha amaqembu angu-16 azibekisele indawo esigabeni samaqoqo kwiConfederation Cup. Azohlukaniswa amaqoqo amane. IChiefs neStellies bazifake esigqokweni samaqoqo ngokunqoba kwi-AS Simba yaseDemocratic Republic of Congo (DRC) ne-15 de Augosto yase-Equatorial Guinea ngokwahlukana. Ngenxa yokukleliswa yiCaf nokwenza kahle kukasoseshini waseNingizimu Afrika kwiConfederation Cup kumasizini amahlanu adlule, iStellenbosch ingase ifakwe ku-pot 2 okukhulisa amathuba okuthi ibhekane neChiefs kwazise yona inamathuba okungena ku-pot 3 noma ku-pot 4. Ku-pot 1 kulindeleke ukuthi kuboshelwe iZamalek, Waydad AC, USM Alger neCR Belouizdad. UBarker uvulele abezindaba isifuba ngokuthi ngeke kube yinto eyinkinga kangako uma betonyulwa eqoqweni elilodwa naleli qembu asebhekane nalo amahlandla amabili…