Tabla de contenidos para 2025-10-22 en Isolezwe

UPHELILE ukuqagela ngama-18th Crown Gospel Music Awards njengoba sekuqinisekisiwe ukuthi azobanjelwa eNkosi Albert Luthuli ICC, eThekwini, ngoNovemba 23, kusukela ngo-7 ebusuku. Lo mqhudelwano ubuyela kuleli dolobha nje, uke wafudukela eGoli iminyaka emibili. Lezi zindaba ziqinisekiswe ngokhulumela lo mcimbi wezindondo ngokusemthethweni, uMfu Sthembiso Mtshali. Uthe izithameli zizoqala ukunyathela ku-red carpet ngezithuba zabo-4 ntambama. "Sijabule kakhulu ukukhuza ibuya lapho konke kwaqala khona futhi simema umphakathi ukuba ubekise indawo zisasuka amadaka kulo mcimbi wokholo othembisa ukuba yisikhondlakhondla e-Afrika namaphethelo." AmaCrown avamise ukuhanjelwa ngosaziwayo endimeni yomculo wokholo, abaholi bezenkolo abahlukahlukene nabathandi bomculo wokholo abasuke beliqhamukisa kuzozonke izifundazwe. Nakuba kuzobe kumnandi kudelile kodwa kuzobe kungokokuqala amaCrown ebanjelwa kulesi sifundazwe engasekho umsunguli wawo uZanele Mbokazi- Nkambule odlule emhlabeni ngo-Agasti 12, nyakenye. "Kulo nyaka sizobe siwenza njengesikhumbuzo sakhe njengoba sizobe simhlonipha edolobheni adabuka kulo iTheku." UMtshali uthe…

LIBASHONELE abasebenzi bakahulumeni abayizipoki njengoba uMnyango weziSebenzi zikaHulumeni nokuPhatha, ukhiphe umyalelo wokuthi bahlonzwe eminyangweni ehlukene. Lo mnyakazo wamukelwe nayikomiti lasePhalamende, elithe ukukhucululwa kwezipoki kuzosiza ekutheni kwehliswe imali kahulumeni emoshekayo. USihlalo wekomiti, uMnuz Jan de Villiers, uthe bayawamukela umyalelo womnyango wokuthi kubhekwe izipoki kuhulumeni. Uthe lokhu kuzokwenza ukuthi kutholakale ababhubhudla imali kahulumeni kungafanele. "Siyakwamukela ukuthi iminyango inikwe kuze kube uFebhuwari 2026,ukuthi yenze lolu hlelo lokuhlonza izipoki. Wonke umsebenzi uyalelwe ukuthi aye lapho esebenza khona ukuze kubonakale isiqu sakhe ukuthi akasona isipoki." Uthe bonke abasebenzi kusuka kwabasebenzela ukuthola isipiliyoni, abalulekayo eminyangweni, amalungu amabhodi kanjalo nabasebenzi abasebenza isikhashana, kumele babe yingxenye yalolu hlelo. Uveze ukuthi abaqondisi beminyango kumele bahambise umbiko kuMqondisi jikelele emnyangweni weziSebenzi zikaHulumeni, uma selwenziwe lolu hlelo. "Kuzogaselwa eminyangweni lapho kuzobe kuhlonzwe khona izipoki. Kuzobikwa nasemaphoyiseni kuvulwe namacala uma izipoki zitholakala.…

WONKE amaqembu ezombangazwe anenqubomgomo yawo azidayisa ngayo kubantu ukuze avotelwe. Kodwa ngeke kwaphikwa ukuthi eqinisweni izethembiso ezisuke zihlelelwe abavoti zihlobene ngezindlela eziningi ngenxa yokuthi wonke la maqembu afuna ukwesekwa ngabantu abafanayo. Kungakho-ke phakathi kwezinto ebezihamba phambili emaqenjini akuleli kusukela ngo-1994, kubalwa ukuthuthukiswa kwempilo yabantu nokulwa nokunciphisa igebe phakathi kwabaswele nabadla izambane likapondo. Kungenye impikiswano ukuthi kwenzekile noma kuyenzeka yini lokho. Kulezi zethembiso kube sekunamathiselwa imithetho efana nokufukulwa kwabamnyama abebeshiywe ngaphandle komnotho ngezikhathi zengcindezelo ngenxa yebala labo. Lo mthetho usudume kafushane ngele-BEE, nesibuyekezo sawo esithi i-BBBEE. Akukho ukungabaza ukuthi i-BBBEE ibe yithuluzi elihle kwabamnyama yize kunezikhalo ezinkulu mayelana nokusetshenziswa kwalo ukucebisa imindeni yosopolitiki nabaxhumene nabo beqembu ebelisemandleni eminyakeni engu-30 edlule. Futhi lo mgomo usengaqhubeka usebenze ukusheshisa ukukhula kwabamnyama emnothweni uma ulandelwa ngokweqiniso. Kuyishwa-ke ukuthi iqembu elifana ne-DA lishebe ukupolotika kwalo nezimbangi…

MHLELI: Emasontweni edlule, ngibone isithombe lapho bekukhona abakwaMhlongo, lapho kuzalwa khona iLembe elingumbumbi omkhulu wesizwe samaZulu. Bekukhona futhi nosomlando engibahlonipha kakhulu u(Mnuz) Phila Mthethwa ongumzala wami noMnuz Maswidi Mbatha waKwaSanguye, kwesakwaBiyela. Osomlando bayaselekelela kakhulu siyisizwe ekufundiseni inhlonipho, ukuzazi imvelaphi yesizwe nokuthobela amakhosi oselwa neziNgonyama zethu. Ngibe nokukhulu ukudumala ngesikhathi owakithi engimhlonipha kakhulu, uMthiya, ebeka inkulumo yakhe kulo mcimbi, egagula inkosi uSenzangakhona ngegama naso iSilo saKwaDukuza, avese wathi uShaka ngaphandle kokuhlonipha athi iNgonyama uShaka - angaveli ayigagule njengoba enzile. Ngiyethemba ukuthi uNdabezitha mhlawumbe kushelele ulimi, ubengaqondile ukungahloniphi la makhosi akwaZulu. Ngiye ngibone ezinye izizwe, ikakhulu amaNgisi abuhlonipha kakhulu ubukhosi babo. Ngeke ubezwe bethi u-Elizabeth noma u-Edward kodwa njalo bathi Queen noma King uma bebhekise kulowo wasebukhosini bakubo. Ngake ngabona kwelinye iphephandaba lapho uMhlonishwa uBlessed Gwala noMhlonishwa uThulasizwe Buthelezi bekhuza thina sizwe…

ISIPHINDE yahlangabezana nenye imbibizane i-ABC ne-ANC abazama ukuketula ubuholi be-IFP kuMasipala waseMvoti. UMnyango wokuBusa ngokuBambisana neziNdaba zoMdabu uchithe umhlangano okwathathwa kuwo isinqumo sokuketula imeya, uMnuz Zamani Malembe, nephini lemeya, uMnuz Mbongiseni "Bhojasi" Dlamini. Isinqumo sokukhipha uMalembe noDlamini sathathwa emhlanganweni owawungoLwesihlanu. Lo mhlangano wawuhanjelwe amakhansela e-ABC ne-ANC. Amakhansela ayesemhlanganweni aqoka ikhansela le-ABC, uMnuz Mfundo Masondo, njengemeya entsha, kwathi ikhansela le-ANC, uNksz Nomvula Masikane, laqokelwa kwesephini lemeya. Umhlangano wangeledlule ubizwe emva kokubhuntsha komhlangano owawubizwe emasontweni amabili edlule ukuba kuzobhungwa ngesiphakamiso sokungabethembi ubuholi bukaMalembe noDlamini. Umhlangano wabhuntsha ngenxa yokungafiki kwamakhansela ayisibalo esanele ukuba kube nomhlangano. UMphathiswa wokuBusa ngokuBambisana neziNdaba zoMdabu, uMfu Thulasizwe Buthelezi, uthe awukho emthethweni umhlangano wangeledlule. UButhelezi uthe umhlangano kwakungafanele ube khona ngenxa yokuthi nakuwona amakhansela afika ayengesona isibalo esanele ukuba kube noumhlangano. Ukusho lokhu encwadini ayibhalele uSomlomo, uNkk Ntombi Ngubane.…

UBUYELE emsebenzini uDJ Chymamusique owalimala kanzima engozini yemoto okwafa kuyo umngani wakhe uDJ Poizen eLimpopo ekupheleni kuka-Agasti. UChymamusique noPoizen babebuya emcimbini wokwethula ama-albhamu abo ngesikhathi behlelwa yingozi. UChyma wakhipha i-albhamu yakhe iMusique Collaborated Vol 1 kwathi uPoizen wadedela iNgiphe enengoma kaMalusi Mbokazi ethi Udondolo ayenza kabusha. Ingozi yenzeka kuthelawayeka u-N1 lapho kwashayisana khona izimoto ezimbili kwafa abahlanu kwalimala ababili. Ngempelasonto uChyma ubonakale okokuqala enandisa eThe Balcony Shisa & Chill eGoli lapho ebeshiyelana khona inkundla nengwazi uVinny Da Vinci. Lo DJ owalimala emilenzeni yomibili ubedlala ehleli phansi njengoba engakapholi kahle. "Ngomusa kaNkulunkulu ngiye emcimbini wami wokuqala ohlelwe emuva kokuzalwa kwami kabusha. Ngiyabonga ngothando, ukungeseka nesihlalo sokuthi ngilokhu ngihlala. Bengigajwe wumunyu kodwa yinto ebengiyidinga futhi ngiyakholwa wukuthi umfowethu (uPoizen) uyaziqhenya eZulwini ukungibona ngilwela ukubuyela entweni eselaphayo okuwumculo. Ngiyabonga ngemithandazo siyaqhubeka nohambo lokululama,"…

I-LAMONTVILLE Golden Arrows okuyiwe ekhefini leFifa isiqalile ukukhombisa umgqigqo omuhle, inenselelo yokuqhubeka nomgqigqo ofanayo njengoba izobhekana neStellenbosch FC emdlalweni weBetway Premiership, e-Athlone Stadium, eKapa, namuhla ngo-7.30 ebusuku. I-Arrows ebingayiqalanga kahle isizini yePremiership, ivuke emaqandeni ngokuguqisa iMamelodi Sundowns ngo 1-0 kungabheke muntu, yalandela ngokuvulela isibhaxu sika 3-0 kwi-Orbit College. Ibe isivulela esinye isibhaxu sika 3-1 kwiSekhukhune United kwiCarling Knockout Cup Last 16, yazibekisela indawo kuma-quarterfinal alo mqhudelwano. Leli qembu eliqeqeshwa uManqoba Mngqithi lisayinise abadlali abayisikhombisa abasebancane abasuka ezigabeni zama-amesha, abangenawo amava okudlala esigabeni esikhokhelayo. Lo mqeqeshi ubelokhu ekugcizelela ukuthi leli qembu alihlanganisayo lisazomangaza abaningi. Ngaphandle kwalabo badlali abasebancane, umgadli osayiniswe yileli qembu ngaphambi kokuqala kwale sizini, uJunior Dion, useqalile ukukhombisa izimpawu zokulithwala uma eqhubeka nokuba sefomini. Lo mgadli odabuka e-Ivory Coast osuka kuMaZulu FC, emidlalweni eyisishiyagalolunye useshayele i-Arrows amagoli amahlanu osekumenze…

UNENGEBHE yokuthi kuzoqubuka izibhelu ezikhungweni zemfundo ephakeme ngonyaka ozayo njengoba kungase kwehliswe isibalo sabaxhaswa yisikhwama iNational Students' Financial Aid Scheme (NSFAS). Lokhu kungenxa yengcindezi ebhekene nalesi sikhwama yokuthi kumele sisebenzise kuphela imali esabelwe yona singaceli ukwengezelwa ethe xaxa. UMnuz Waseem Carrim, isikhulu esiphezulu seNSFAS, utshele amalungu ekomiti lasePhalamende iStanding Commitee on Appropriations, ukuthi bangaphansi kwengcindezi yokuthi basebenzise kuphela imali ababelwe yona. Uthe kulo nyaka zibalelwa ku-618 000 izitshudeni zasemanyuvesi ezixhaswe yiNSFAS. Zingu-231 000 ezixhaswe emakolishi amaTVET. "Ngokwemali esinayo ngonyaka ozayo singakwazi ukuxhasa izitshudeni ezingu-520 000 kuphela zasemanyuvesi. Lokhu kusho ukuthi izitshudeni ezingu-100 000 kungenzeka zingaxhaswa. Lokhu kungasusa izibhelu ezikhungweni zemfundo kube nemibhikisho yezitshudeni ekubeni isimo sivele sishubile," usho kanje. Uthe imigomo ekhona manje ithi wonke umuntu ohlangabezana nemigomo yokuthi axhaswe, kumele axhaswe asikho isikalo esibekiwe sokuthi kuxhaswa isibalo esingaka. "Minyaka…

IMEYA yaseMfolozi, uMnuz Xolani Bhengu, inxuse abazali bezingane ezibhala u-matric ukuthi baziphelezele uma ziyofunda ebusuku. UBhengu uthe kubalulekile ukuthi abafundi bavikelwe, abazali babasize ngokuthi babakhaphe ukuze baphephe. "Abafundi bakwenze konke, ingcabha ikithina ke bazali ukuthi sibaphelezele uma beyofunda. Abafundi bafunda ebusuku, baphume entathakusa ngakho asibaphelezele ukuze baphephe." Uthe zikhona izinhlelo abazenzile njengomkhandlu ukufaka isandla ezikoleni ezidinga usizo njengoba kiubhalwa. "Ukukhulisa umntwana okwethu sonke eMfolozi. Othisha bawenzile umsebenzi wabo oncomekayo unyaka wonke befundisa izingane." Uthe bafake ogesi abakhanyisa kuthi bha esikoleni iWelabasha High, ukuze kube lula kwabafunda ebusuku. "Kube nezinhlelo ezehlukene sibambisene noMasipala iKing Cetshwayo kulabo abafundayo ukuze bathole ukudla. Sizoqhubeka nakwezinye izindawo ukuthi sifake labo gesi abakhanya kakhulu ukuze izingane ezibhalayo ziphephe," kusho uBhengu. Uveze ukuthi balindele imiphumela emihle ezikoleni ezakhele uMasipala waseMfolozi uma isikhishwa ngonyaka ozayo.…

MHLELI: Siphethwe wuhulumeni wokubambisana KwaZulu-Natal nasezweni lethu emva kokhetho. Kuzokhumbuleka ukuthi akekho owawina ukhetho ngamalengiso. Lokho kwaholela ekutheni kube nabangafuni ukuphuma emandleni yize babengenamandla okulawula ukuthi isifundazwe kumele siphathwe kanjani. I-ANC yaqoka ukusebenzisana namaqembu ayethole amavoti amancane kodwa manje kubukeka sengathi kukhala esayo isicathulo. Ngike ngabheka ukuphatha kukaNdunankulu uThami Ntuli njengenhloko yesifundazwe, uyalawulwa yize sasithembile ukuthi i-IFP yaziwa njengeqembu elingazwani nenkohlakalo. Okusikhalisayo wukuthi ngesikhathi kusolwa inkohlakalo eMnyangweni wezeMpilo akazithathanga izinqumoezifanele. Kwaphinda kwasolwa inkohlakalo eMnyangweni wezeMfundo wenza okufanayo. Ngisho ingane esakhasa iyabona ukuthi lona wuhulumeni olawulwa abathile abamshayela umthetho uNdunankulu. Yingakho ngithi isifundazwe simehlulile futhi kudingeka ashenxe. Empeleni lo hulumeni wokubambisana uhlomulisa abathile. Kumele uNtuli azi ukuthi akuthina sonke esingabalandeli be-IFP, ANC, DA kepha siyizakhamuzi zaKwaZulu-Natal ezikhathazekile nezithanda isifundazwe. Kumele uNtuli akumele ukuba ngubaba wesifundazwe. Khabazela KB Mzimela…

BABILI abasolwa abasale enkundleni ngesikhathi idudulana namaphoyisa ehostela laseGlebelands, eMlaza, izolo. Okhulumela amaphoyisa KwaZulu-Natal, uLieutenant Colonel Paul Magwaza, uthe abasolwa baneminyaka engu-27 no-30. Elandisa ngesigameko, uthe amaphoyisa abethungatha umsolwa mayelana necala lokudunwa kwemoto. “Icala lenzeka eHarding, ngoSepthemba 19, nonyaka, lapho imoto eyiveni yadunwa amadoda amahlanu ayehlome ngezibhamu,” kusho uMagwaza. Uthe omunye umsolwa waboshwa ngecala lokuduna imoto, kanti amaphoyisa abelokhu ethungatha laba abanye abasagcwele amathafa. “Amaphoyisa athole umkhondo ngomunye wabasolwa ukuthi ucashe kuphi. Kube sekuvela ukuthi ucashe ehostela laseGlebelands eMlaza,” kusho uMagwaza. Uthe amaphoyisa abe esehlela ukulandela umkhondo ngoMsombuluko ebusuku, maqede anikela khona ehostela laseGlebelands. “Ngesikhathi etheleka khona, engqongqoza emnyango wegumbi elithize, esho nokuthi esefikile, ebebephakathi bavele baphendula ngenhlamvu, bedubula bebhekise emaphoyiseni,” kusho uMagwaza. Uthe kusuke esinamathambo, amaphoyisa nawo ebuyisela ngayo inganono, maqede kwafa ababili. Uveze ukuthi amaphoyisa athole izibhamu…

IZINYANGA eziyisishiyagalombili ezisele ngaphambi kokuqala kweNdebe yoMhlaba yaseMexico, Canada nase-United States of America (USA), zingezokugcina ukuthi bawakhuphule kakhulu amasokisi abadlali akade beyingxenye yeBafana Bafana kodwa basala endleleni ngenxa yokwahlukana kwezizathu. Ngaphandle kokulimala okuhlasele ngesikhathi esisodwa uThemba Zwane, Mothobi Mvala noGrant Kekana beMamelodi Sundowns, kukhona abadlali abazitshwa nguBroos ngezizathu ezaziwa nguyena okubalwa kubona uPercy Tau, Mihlali Mayambela noBongokuhle Hlongwane. Bonke laba badlali basuke naye phansi uBroos kusukela efika kuleli ngo-2021, kodwa sekunesikhathi ebaziba uma ehlanganisa izikwati zakhe okwenza amfimfe amathuba abo okungena endizeni ebheke kweyoMhlaba. Njengoba isaqhubeka imibhiyozo yokuzibekisela kweBafana indawo kwiNdebe yoMhlaba, abanye balaba badlali kubukeka bezoyikhomba indiza ebheke ‘ezweni lesethembiso’ ngoJulayi. Nakuba uZwane ekhona kulolu luhla kodwa indaba yakhe ibukeka izoshintsha uma engabuyela enkundleni kusenesikhathi. Zinhle ezokubuya kukaZwane kodwa njengoba uSipho Mbule ekhombisa izimpawu zokulibamba ngazo zombili ithuba, maningi…

KUNGENZEKA ukhetho lweNetball South Africa (NSA) lwenzeke kunezinkulumo njengoba kungakacaci ngesimo sikamengameli osamisiwe, uCecilia Molokwane. UMolokwane osehole iNetball SA amahlandla amabili, umemezele ukuthi uzobuyela esikhundleni sakhe ngokushesha phezu kokuba iWorld Netball nale nhlangano yasekhaya isamile ekutheni usamisiwe. Lo mbango uqhubeka nje, kuhlelwe ingqungquthela yokukhetha ubuholi obusha ngempelasonto. UMolokwane wamiswa yi-World Netball ngo-Ephreli nonyaka ngezinsolo zokuphambana neminye yemithetho yale nhlangano. Ngesonto elidlule, ubize isithangami nabezindaba ePolokwane lapho edalule khona ukuthi akasakushayi ndiva ukumiswa yiWorld Netball, nokuthi usesishiyile isikhundla sakhe ebhodini lale nhlangano eyengamele i-netball emhlabeni. “Ngizobuyela emsebenzini wami ngokushesha. Sengisulile kwi-World Netball futhi angisalawulwa iyona. Ngavotelwa ukuthi ngibe ngumengameli weNetball SA, ngakho-ke iyona enegunya lokungisusa kulesi sikhundla,” usho kanje uMolokwane. “Sengimiswe izinyanga eziyisithupha. Lena akuyona inqubo yophenyo kodwa yisijeziso. Ngisho nangemva kokuba umengameli weSascoc ethe lolu daba luzophothulwa emasontweni ayisikhombisa,…

MLINGISI wodumo kwiShaka Ilembe neSibaya, uNomzamo Mbatha, usaqhubeka nokufukula, ukukhuthaza nokubungaza abantu besifazane ababambe iqhaza emkhakheni wamabhizinisi. Lokhu uNomzamo waKwaMashu, ukwenza ngokugqugquzela umqhudelwano wezindondo obizwa nge-EmpoweringHER Seminar & Business Awards. Lo mncintiswano wenziwa ngokubambisana phakathi kwenhlangano engenzi nzuzo kaNomzamo, iNomzamo Lighthouse Foundation neHollywood Foundation. Ngokusho kwesitatimende esithunyelelwe imithombo yezindaba, lo mqhudelwano, ozobe sewenziwa okwesihlanu, uzobanjelwa e-Inanda Club, eGoli, ngoNovemba 15, phakathi kuka-9 ekuseni no-5 ntambama. UNomzamo, ongumgqugquzeli walo mqhudelwano, uthe lo nyaka usemqoka kakhulu njengoba sebefinyelele esicongweni, iThe Power of 50. "Selokhu saqala ukuhlangana, sesihloniphe abantu besifazane abangamavulandlela abangu-40. Ngo-2025, samukela abanye abanwu-10 kule ngqophamlando, okwenza isibalo sifinyelele kwabahlanu abantu besifazane abaguqula isimo sezwe lethu nomhlaba." Ongumxhumanisi weHollywood Foundation, uVuyisile Ngobese, uthe bayaziqhenya kakhulu ukufinyelela kule minyaka asebeyihambile nalo mqhudelwano selokhu baba yingxenye yawo. Uthe isiqubulo sabo esithi Power of…

IKHALA ngengwadla yokushoda kwezindawo zokungcwaba inhlangano yabangcwabi, iSouth African Funeral Parlour Association (Safpa). Le nhlangano ithi ziyaphela nya izindawo zokungcwaba abantu kuleli zwe. Iqhuba ithi inxusa ukuthi kube khona okwenziwayo ngokushesha ngenhloso yokuthi kutholakale isixazululo kule nkinga. Le nhlangano inxusa ukuthi kube khona ukungenelela okuphuthumayo kukahulumeni kulolu daba olubucayi. Le nhlangano ithe le ngwadla idla lubi kakhulu ikakhulukazi ezindaweni ezisemadolobheni. USihlalo wale nhlangano, uDkt Nomfundo Mcoyi-Zondo uthe le nkinga isithanda ukuba ngaphezulu kwabo ngoba iyakhula kunokuba inciphe. “Asifuni ukulinda kuze kufike isikhathi lapho uthola ukuthi imindeni ijikiswa seyifikile emathuneni kuthiwe ayikho indawo yokungcwaba,'' kusho uDkt Mcoiyi-Zondo. Eqhuba uthe ukungcwaba ngenye yezinto ezimqoka kakhulu wathi kodwa uma sekunesimo esifuze lesi kumele kusukunyelwe phezulu. Uthe uma kungenjalo kumele kuqale kuqhanyukwe nezinye izindlela zokubhekana nale nkinga okubandakanya ukulothiswa kwabantu. Eqhuba uthe emindenini eminingi…

NAMUHLA ngithinta isihloko somshado ngemuva kokuphuma kwesinqumo senkantolo esithinta isehlukaniso somshado sabanye osaziwayo, owesilisa usendimeni yomculo kanti owesifazane usendimeni yabalingisi. Amagama abo ngizowagodla. Bekubatshazwa izizumbulu ezizotholwa owesifazane kanye nokondliwa kwakhe isikhathi eside, bebodwa abathi awu waze wahlomula kodwa abanye bekhala bethi bukuphi ubulingiswa lapha uma izinto zenzeka kanje umuntu ethola itshe lemali ngokuhlukanisa nje. Iningi labantu alinalo ulwazi lokuthi izenzo zabo zasothandweni zinomthelela onjani nongakanani ngokomthetho empilweni yabo, ikakhulukazi uma sekuza engcebweni yabo. Ngeke ngibashiye ngaphandle osopolotiki bethu ngoba esiShayamthetho yibona abaphasisa le mithetho ebuye ngesinye isikhathi ingahambisani namasiko, usikompilo kanye nezidingo zethu futhi ilethe ubunzima obenza abantu bangawuthembi umthetho. Kulula ukulungisa le nkinga. Akubuyekezwe nje umthetho olawula imishado. Kade isiShayamthetho saluqala lolu daba kodwa sengathi kuhamba ngonyawo lonwabu. Imithetho yemishado: ENingizimu Afrika sinemithetho emithathu ongashada ngaphansi kwayo. Ayihlanganiswa le…

MHLELI: IsiZulu sithi ukuwa kwenye indlu wukuvuka kwenye. Sonke sadabuka sizwa ezindabeni ukuthi eLimpopo kugingqike ibhasi ebelinabantu baseZimbabwe naseMalawi maqede kwafa abangu-42. Kodwa-ke uma sikhonjiswa lapho yehle khona ingozi kusethusile ukubona imithi isakazeke kuleyo ndawo. Umbuzo esiwubuza singezokuthola mpendulo usekutheni ibithathwephi le mithi ngoba phela ezibhedlela nasemitholampilo ihlale ingekho imithi yokwelapha iziguli? Kuze kushode neyalabo abagunyazwe ukuyisebenzisa impilo yabo yonke ngenxa yezifo ezingajwayelekanga okubalwa nokukhubazeka ngezindlela ezahlukene. Akwenzekanga yini ukuthi mithi ndini iphume ndlelamnyama ezibhedlela nasemitholampilo kwazise ukuthi ezinye izisebenzi eminyangweni kahulumeni zikhohlakale? Kuze kwedlulele nasezikhulwini eziphethe iminyango lokhu kukhohlakala. Asikalibali wukuthi sekuze kwasunguleka inhlangano ebizwa nge-Operation Dudula ekhala ngokugcwala kwabasemazweni angaphandle ezibhedlela nasemitholampilo okuvela ukuthi ukwelashwa kwabo eNingizimu Afrika kuqeda imithi okungabe kwelashwa ngayo abakuleli. Lokhu sekwenze bagxekwa yinhlangano elwela amalungelo abantu. Siyafisa ukuthi isazise ukuthi obhululu…

SADIDEKILE umndeni wakwaCebekhulu, eMadlankala, eMpangeni, ngemuva kwesigameko sokudutshulwa kwamalungu amathathu akhona ngoMsombuluko ebusuku. UMnuz Mjiphazeni Cebekhulu (68), unkosikazi wakhe uNksz Ntombeyiningi Khanyile (63), nomzukulu wabo womfana u-Uminathi Vilakazi (7) bashonele ekhaya, kwathi owesifazane obesiza ekhaya walimala kabi waphuthunyiswa esibhedlela. Indodana yalaba ebikhona kwenzeka isigameko, uMnuz Sandile Cebekhulu, iveze ukuthi akukho ngxabano ebiyazi ebingaholela ekutheni kwehle isiga esinje. “Nami bengikwelinye igumbi ngesikhathi ngizwa kukhuluma ubaba ebuza ukuthi bangobani laba balisa, ophendulile uvele wamthuka wase eqala emdubula. Kula ngikwazile ukuphuma ngomunye umnyango, basale baqhubeka nokudubula laba abanye akade bengaphakathi endlini. Kwanami angikwazanga ukubona ukuthi bangobani kodwa engingakusho ukuthi bebebaningi, abanye besele ngaphandle kwegceke,” kusho uCebekhulu. Uthe kubuhlungu okubehlele njengoba kukhona nengane eyenza u-matric, okumele ibhale esinde ngokulambisa. “Intombazane lena eyenza u-matric isizobhala kanjani nje? Nayo isinde kulesi sigameko ngoba ibingekho ekhaya, ibihambile…

UMCULI we-kwaito oneminyaka eyibambile, uProfessor, uthi uma engasebenzanga namuntu engomeni akukhona ukuthi usuke engafuni kodwa kusuke kuyimpakamo yafuna ukubambisana naye noma inkampani yakhe. UProfessor, ozakhele udumo eqenjini iT'zozo n Professor, uthe ukholelwa kakhulu ekusebenzeni nabanye. "Uma ngigcine ngisebenze ngedwa ngisuke ngingathandi kodwa kusuke kuyimpakamo emacikweni noma ezinkampanini zawo," kusho uProfessor. Ukusho lokhu echaza ngengoma yakhe entsha i-Order ayenze ngokuhlanganyela nophrojusa uLarny. Uthe uLarny ngumdidiyeli osemncane waseThekwini asemthathe wahlala naye eGoli. Uthe ngomusa kaNkulunkulu uyakwazi ukusebenza nabasebasha njengoba enza noHeavy K, bese beyavelela. "Ingoma iyimi njengomuntu ohlale eqhamuka nento entsha. Ngenza kwiWoz'eDurban neJezebel. Ngiwumuntu onjalo baningi asebezolandela bethi benza lokhu okuwukuhlanganisa i-gqom, three step ne-kwaito. Kungimangazile ukuthi ngikwazile ukugibela phezu kwalesi sigqi ngoba ezinye izinhlobo ziyacindezela ungakwazi ukukhipha ikhono. Uzobona abaningi engibahloniphayo nabancane sebelandela. Kuza abanegama e-studio bezosebenza naye (uLarny) kusazomangala…

KHANYISA Mayo ongumgadli weKaizer Chiefs uhlose ukusebenzisa iphutha alenze emasontweni adlule ethinta ibhola kungafanele ukubeka leli qembu laseNaturena endaweni eliyifanele ebholeni laseNingizimu Afrika. UMayo ojoyine iChiefs njengoba bekuvuleke iwindi lokuhwebelana ngabadlali ngokubolekiswa yiCR Belouizdad yase-Algeria, usanda kuba sematheni ngokuthinta kungafanele ibhola likaPule Mmodi selibheke enethini. Lokhu kwenze ukuthi liphikwe igoli okulandelwe yintukuthelo esobala kuMmodi. IChiefs igcine idlale ngokulingana ngo 1-1 naMaZulu kulo mdlalo weBetway Premiership. Emuva kwalokho, uMayo uphenduke inhlekisa ezinkundleni zokuxhumana, abanye abalandeli bemsola ngokuba nomona. UMmodi noMayo bahlale phambi kwabezindaba ngasekuqaleni kwesonto, bavula izifuba ngokuxolelana kwabo nokuthi yini abahlele ukuyenza ukugwema isimo esifanayo ngokuzayo. “Iphutha laba kimina ngokunganaki ukuthi ngikuphi nokuthi kufanele noma akufanele yini ngilithinte ibhola,” kusho uMayo esithangamini nabezindaba. “Ngaxolisa ngaso leso sikhathi kuMmodi kwazise yimina owayesephutheni ngokumonela igoli lakhe. Ngaphandle kukaMmodi, leli phutha laphuca iChiefs…

NHLANGANO eyengamele ibhola kuleli, iSouth African Football Association (Safa) ingase iphinde ifake elinye iqembu lakuleli lesizwe engcupheni yokungalubhadi eNdebeni yoMhlaba ngenxa yendlela engajwayelekile eyenza ngayo izinto. Akukapholi maseko le nhlangano isinde ehlazweni ngesikhathi iqembu lesizwe labesilisa, iBafana Bafana, lizibekisela indawo eNdebeni yoMhlaba ezodlalelwa e-United States, Canada naseMexico ngonyaka ozayo. IBafana iqede iqhwakele eqoqweni layo uGroup C, kweyokuhlungela lo mqhudelwano yize yayisiphucwe amaphuzu amathathu eyawathola inqoba iLesotho ngo 2-0 ngoMashi, nonyaka. Sekuwumlando ukuthi iqembu lakuleli lenza iphutha ladlalisa uTeboho Mokoena enamakhadi aphuzi amabili kulo mdlalo. Uma kwenzeka lokho, inhlangano esuke iqashe abantu okufanele baqinisekise ukuthi izinto ezinjalo azenzeki iyona ebekwa icala. Kungaba kubi ukuthi le nhlangano ibe nesandla ekutheni iqembu lesizwe lebhola labesifazane, iBanyana Banyana, ligcine lingangenanga eNdebeni yoMhlaba, noma lingene kanzima. Indlela yeBanyana ebheke kweyoMhlaba IBanyana Banyana izoqala umzuliswano wokugcina…