Tabla de contenidos para 2025-10-08 en Isolezwe

SIHLABANI somculo wokholo, uThinah Zungu, uqokwe nendodana yakhe, uNdumiso emkhakheni weBest Gospel Duo kuma-1st Gospel Eminence Music Awards. Laba baculi baseNanda, bakhethwe ngengoma abayicula ngokuhlanganyela kwi-albhamu yeSpirit of Praise 10 esihloko sithi UJesu Ungenak'uqala. Lezi zinsizwa zidlana imilala noMmatema ehambisana Mapula Phaho, Takkie & Rofhiwa, Benjamin Dube ehambisana neJoyous Celebration, uBusi Sibiya ehambisana ne-Oncemore Six no-Ayanda Ntanzi ecula ngokuhlanganyela noLebo Sekgobela. Kweminye iminxa kuqhathwe kanje: KwiBest Gospel Producer kutholene phezulu uNqubeko Mbatha, Mncedisi Sibeko, Siyanqoba Mthethwa, Malenas Frans noJoseph Makola. Emkhakheni weBest Itende Artist, kudlana imilala uLondiwe Sphe Nxumalo, Indumiso Yetende, Sihle Khumalo noLelo Simelane kanti kwiBest Itende Song kuboshelwe ingoma ethi Itende Medley - UN LTD, Egalile - Jumbo noMpumi Mtsweni, Ngosuku LwePentecost - Londiwe Sphe Nxumalo, Ngoba Amandla Ayatholwa - Lelo Simelane nethi Joy To The World -…

WAZAKHELA udumo ngokulingisa indawo kaSmangele kuZalo, uSihle Ndaba, ugonyuluke ngokumenza angabi mningi ezinkundleni zokuxhumana kulezi zinsuku. USihle (36) wase-Ermelo, eMpumalanga, uqale ngokuxolisa ngokungakwazi ukutshela abalandeli bakhe iqiniso ngobekwenzeka empilweni yakhe. Ekhuluma ekhasini lakhe elikwiYouTube, uSihle uthe empeleni bekungahambi kahle empilweni yakhe kulezi zinyanga ezedlule ngenxa yezigameko ezimehlele. "Ekuqaleni kwalo nyaka ubudlelwano bami buphelile." Uthe okube buhlungu wukuthi ubudlelwano bakhe bubhidlike kabi engakalindeli futhi engahlelile. "Kodwa kwakufanele buphele." Uthe kuthe engakayetshisi eyokuphela kobudlelwano bakhe, ugogo wakhe wahlatshwa wukugula. "Besinethemba lokuthi kuzoba ngozi makhaza kodwa kwaba zinhlanga zimuka nomoya." Uthe indlela ugogo wakhe ayegula ngayo akakufiseli nanoma wubani ukubona isihlobo noma ilungu lomndeni ligula ngendlela okwakubambeke ngayo ugogo wakhe. USihle uthe ngoJuni, okuyinyanga azalwa ngayo, wabona ukuthi kungokokugcina egubha usuku lwakhe lokuzalwa kusekhona ugogo wakhe. "Emasontweni adlule kugcine kumenele ugogo. Yingakho…

MHLELI: Ukusondela kokhetho lohulumeni basemakhaya amanye amaqembu epolitiki kuwagxabhisa ngezisu okumuntu ophuze imbiza ekhiphanayo. Okwenza amaqembu afinyelele esinqumweni sokwakha ukubambisana okhethweni akakwenzenga ngokucabangela okuhle ngezakhamuzi zezwe lethu kodwa ngibafanisa nomuntu ophuze imbiza ekhiphanayo, le mbiza ewenza axhamazele. Phela abaholi bazi kahle ukuthi lezi zicagogwana zamaqembu abo ngeke alibone elidlalayo. Abakwenzayo akukusha, siwabonile amaqembu amaningj ngesikhathi sibheke okhethweni ngonyaka odlule, ezama ukunqinda amandla e-ANC ngokubopha ifindo lomshado bethembisa ukubusa ngokuhlanganyela. Ngemuva kokhetho kwenzekani? Abanye ababeyingxenye yalowo mshado badabula incwadi yawo maqede bawelela ngaphesheya kukajantshi wesitimela. Kumanje bayingxenye emshadweni we-GNU okudlondlobele kuwo uKhongolose ngokwaphesenti. Umbuzo engizibuze wona ngingeke ngithole impendulo, yiqhaza elizokubanjwa yiqembu eliholwa uMnuz Mmusi Maimane ukuthi yini indaba enganxenxanga umholi weqembu le-ActionSA u(Mnuz) Herman Mashaba ngoba bake basebenzisa besengaphansi kweqembu i-DA? Uma siyifunda ivaliwe kusekutheni akalubalubeli yini ukuba ehlale…

UVELA okushaqisayo ngabadayiselana ekhasini leFacebook, iLadies House, usana olugcine lutholakala lushonile ezandleni zomthengi. Abasolwa okungoNksz Nonhlakanipho Mbatha (31) noNksz Anele Mbhele (29) bavele eNkantolo yeMantshi yaseNtuzuma, izolo. Unina wengane, okusolwa ukuthi wayidayisa, uNksz Mbhele, ubhekene necala lokuphula imibandela yomthetho wezokuhushulwa kwezisu. Kuthi uNksz Nonhlakanipho Mbatha (31) osolwa ngokuthenga abe mane amacala abhekene nawo. Kuwona kukhona elokuthumba, elokweba, elokukhwabanisa kanjalo nelokuvimbela ukusebenza kwengalo yomthetho. Imantshi, uMnuz S Cadir, imdedele ngebheyili ka-R500 uNksz Mbhele okuvele ukuthi ngowaseMlaza, yala yaphetha ukumdedela uNksz Mbatha. Ibalule ukuthi kungaba yingozi ecaleni ukumdedela ngebheyili njengoba ingacaci kahle indaba yekheli laseThekwini, ekubeni amacala abhekene nawo emaningi futhi ebucayi. Iqhube yathi ikheli lesibili alinikezele, eliseNkandla nokuyilapho azalwa khona, liqhelile naseThekwini. Yize laba ababili bebezofaka izicelo zebheyili kodwa amacala abo angene ngokwehlukana kwazise baboshwa kanjalo. Kuqale uNksz Mbatha, waveza…

NGALO Mgqibelo abalaleli bazobe belalele uSigiya Ngengoma kuKhozi FM njengoba amabhinca ezobe eshaya indishi bukhoma eSABC M1 Studios phakathi kuka-9 ekuseni no-12 emini. Ngokusho kwesitatimende esifakwe yiziphathimandla zalo msakazo ezinkundleni zokuxhumana, amabhinca azobe eshaya indishi ngenhloso yokuqongelela imali yokuxhasa intombi nto engenawo amandla okwenza umemulo. Siqhuba isitatimende sithe ngalolu suku kuzobuye kumenyezelwe igama laleyo ntombi nto ezobe ishayelwa indishi kuSigiya Ngengoma. Lolu hlelo luzobe lusakazwa bukhoma ngabasakazi bakaSigiya Ngengoma, uBingelela Mpanza noVusizwe Langa. Lesi siteshi sithe inhlosongqangi ngalo mcimbi wukugqugquzela ukuhlala ngentombi kanye nokukhuthaza izingane zamantombazane ukuba zizigqaje ngobuntombi bazo. Indishi wumcimbi owenziwa kakhulu emakhaya uma kunomkhehlo, lapho izinsizwa zikhipha imali yokukhehla leyo ntombi esuke imbeswa futhi eseyizogana. Echaza ngokushaywa kwendishi uSiboniso KaMabaso weZulu Sweg uthe ukushaya indishi akusilo isiko kodwa wumkhuba omuhle owenziwa ngamabhinca akwaZulu. "Khona kusuke kushayelwa…

-ANC isiphumele obala yathi umphakathi wawuzovukela uMbuso ukube uMengameli Cyril Ramaphosa akajubanga ikhomishini ephenya izinsolo ezenziwa nguKhomishana wamaPhoyisa KwaZulu-Natal, uLt-Gen Nhlanhla Mkhwanazi. UNobhala Jikelele we-ANC, uMnuz Fikile Mbalula, uthe uRamaphosa wayengenayo enye indlela ngaphandle kokujuba uphenyo ngezinsolo zokuthi abanye osopolitiki basebenzisana nezigebengu kanti abanye baphazamisa ukusebenza kwengalo yomthetho. "Wayengenayo enye indlela ayengayenza uMatamela. Kwadingeka ajube iKhomishini kaMadlanga, ezibuyela eBrazil. Iyani niyofakaza kuleya khomishini. Makanganisabisi amakhomishini ngoba abalulekile. UMkhwanazi uyiphoyisa elithenjiwe, wavuka wakhuluma nesizwe ngokuthi osopolitiki baphazamisa ukusebenza komthetho. Ukuba akakwenzanga lokhu, abantu babeyovukela uhulumeni bekhala ngokuthi kufuywe izigebengu," kusho uMbalula. Uthe kumele bathathelwe izinyathelo okuzothinteka amagama abo kule khomishini. Ukusho lokhu izolo ekhuluma emhlanganweni wePopcru, inyunyana yamaphoyisa, oqhubeka eBirchwood Hotel, eGoli. UMbalula uthe amalungu ePopcru anomsebenzi omkhulu wokuqapha ukuthi abantu baphephile. Uthe ubabonile otsotsi ngesikhathi esaphethe uMnyango wamaPhoyisa. "Ngibabonile abantu…

ENGIFUNDA le ndaba enohlonze lapha kubangwa ifa nomcebo kaMnuz David “The Cat” Mabuza ongasekho emhlabeni. Udaba seludluliselwe enkantolo. Embangweni wefa lakhe kukhona amakhosikazi akhe nezingane zakhe ezithi ifa likababa kalisoze ladliwa abanye thina siyizingane zakhe singatholi lutho. Lo mbango usazoqhubeka eside isikhathi ngenxa yobude bendlela ehanjwawo uma usufake udaba lwakho enkantolo kodwa ngoba into ebangwawo yinkece abantu bayobekezela kunjalo. Kugujwa inyanga kaMandulo umkhankaso wesonto okuthiwa i-Wills Week, lapho khona kuke kuqwashiswa umphakathi ngokubaluleka kokubhalwa kwama-will ukuze izifiso zabangasekho zigcineke ngendlela. Kodwa kuyathusa ukuthi bangakanani abantu abangazi ngalo mkhankaso futhi noma bazi bayazilalela nje ubuthongo kodwa bezazi kahle ukuthi abashiyanga ncwadi ngokucazwa kwefa labo. Awu ngiyanijaja. Iyini i-will? Lena yincwadi ebhaliwe, ecacisa kahle ukuthi izinto zakho, ozithandawo nozisebenzele kanzima zizoya kubani uma ungasekho, ngasiphi isikhathi futhi ngaphansi kwayiphi imigomo nemibandela. Kumele…

MHLELI: Ukuzikhandla kwezinsizwa ezimbili, uJenene Nhlanhla Mkhwanazi noXolani Khumalo wohlelo iSizok’thola, kwenze zaba yintandokazi kwizakhamuzi zaseNingizimu Afrika. Umfo kaMntungwa simbona evundulula izidleke zemigulukudu ethengisela umphakathi izidakamizwa, ikakhulukazi intsha esiphenduke izibotho. Umbuzo uthi yini indaba umphakathi uphelelwe wuthando lokuncinza amaphoyisa? Impendulo ithi yingoba abantu abasawathembi noma-ke yingoba amanye anukwa ngokusebenzisana nezigebengu. Ngiyabonga kumholi we-ActionSA, uMnuz Herman Mashaba, ngokugadla ngoXolani Khumalo okhethweni esikhundleni sobumeya emkhandlwini Ekurhuleni. Nami ukuba ngiyisakhamuzi sakhona elami ivoti bengizomgixabeza ngalo. Angisayiphathi eyoMkhuzi wamaPhoyisa KwaZulu-Natal, uJenene Nhlanhla Mkhwanazi. Ukuba isikhundla sokuba ngumengameli wezwe siyavotelwa angaphumelela ngamalengiso ngoba angavotelwa yizinhlanga zonke eNingizimu Afrika. Ukhombise ukuba nesibindi ngombayimbayi awuqhumisile mayelana nenkohlakalo egubuzele izinhlaka zonke zoMbuso kanye nokusebenzisana kwezigebengu ezibizwa ngamaMafia nezikhulu eziphezulu. Siyabadinga abantu abafana nalezi zinsizwa. Singelibale ngabayibambe enhlanganweni i-Operation Dudula kanjalo neMarch in March ekukhucululeni imigulukudu yasemazweni angaphandle asezweni…

KUXWAYISWE abezindaba ngobungozi bokubika budlabha ngabadlali abasesikwatini saMajita esikwiNdebe yoMhlaba eqhubeka eChile namathuba abo okuthola indawo kwiBafana Bafana kaHugo Broos ezodlala kwi-Africa Cup of Nations (Afcon) eMorocco, ngoDisemba. UBroos osekhempini neBafana elungisela iZimbabwe neRwanda emidlalweni ka-Group C yokuhlungela iNdebe yoMhlaba yangonyaka ozayo, nguyena okhalime abezindaba ngesikhathi bembuza ngamathuba kanozinti waMajita, uFletcher Smythe-Lowe kwi-Afcon. Amajita anomdlalo onzima nomqoka we-Last 16 yeNdebe yoMhlaba neColombia engelinye lamazwe athwelwe ngeqoma ukudla isicoco namuhla ngo-9.30 ebusuku e-Estadio Fiscal de Talca, eChile. Leli qembu eliphekwa nguRaymond Mdaka, lizifake kwi-Last 16 ngokuwina imidlalo emibili eqoqweni obekuboshelwe kulona iFrance, United States of Amaerica (USA) neNew Caledonia. Baningi abadlali abahle kuMajita futhi okusobala ukuthi banekusasa kwiBafana kodwa iqiniso wukuthi basenalo ithuba lokudlulela kuyona (iBafana) kwazise basavunwa yiminyaka. UBroos akathandi ukuthi abezindaba bafake lo mqondo kubadlali baMajita ngoba lokhu kungase…

IKOMITI lasePhalamende elibhekelele ukusebenza koMnyango wezokuBusa ngokuBambisana neziNdaba zoMdabu, linxuse iNdlunkulu kaZulu yonkana ukuba yamukele isinqumo senkantolo esiqinisekisa ukuthi kwalandelwa yonke imigomo ngesikhathi kuqokwa iSilo uMisuzulu Sinqobile kaZwelithini. Usihlalo wekomiti, uDkt Zweli Mkhize, uthe isinqumo seNkantolo yamaCala aDlulisiwe esivuma ukuqokwa kweSilo siqeda nya umbango weSihlalo sobuKhosi bukaZulu obusudonse iminyaka. INkantolo yamaCala aDlulisiwe ichithe isinqumo seNkantolo eNkulu ePitoli, esivuna abaphikisa ukuqokwa kweSilo. INkantolo eNkulu ePitoli yayikade ichithe isinqumo sikaMengameli Cyril Ramaphosa, sokuvuma ukuqokwa kweSilo. UMkhize unxuse ukuba kube nokubuyisana eNdlunkulu kaZulu. "Siyasamukela isinqumo senkantolo njengoba siqeda umbango obukhathaza abantu abaningi. Lo mbango ubudala uqhekeko eNdlunkulu kaZulu. Sikholelwa ukuthi leli yithuba lokuba indlunkulu ikhumelane umlotha, iphinde ibe imbumba. Yisikhathi sokusebenzela isizwe. Siyanxusa ukuba indlunkulu, abaholi bomdabu nesizwe nje sonke ukuba samukele isinqumo senkantolo. Kujwayelekile ukuba kwehlukane imibono uma kunemibango yesihlalo kodwa kuhamba…

ININGIZIMU Afrika iyizwe elivuke lingumlotha laphenduka isibani kwabaningi emhlabeni ngemuva kokubusa kobandlululo nengcindezelo eyabe yehlukanisa abantu ngebala labo, ubuzwe nangokobulili. Lokhu kusho ukuthi kunezingxenye eziningi zomphakathi ezaziphiliswa kanzima ngesikhathi salo mbuso wabacindezeli. Kusho ukuthi kukhona amasiko, izinkolelo, nemikhuba eminingi okwakunzima ukuba yenziwe abaniniyo ngenxa yabacindezeli. Yingakho-ke kwathi nxa kwakhiwa uMthethosisekelo omusha ozomukeleka ngaphansi kwenqubo yentando yabantu, kwabe sekugxiliswa kakhulu endabeni yamalungelo abantu ngokobuzwe babo, ngebala, ngamasiko, ngokwenkolo, ubulili nokunye okuningi okuyisisekelo sokuthi umuntu ukhululekile. UMthethosisekelo-ke ungubaba wayo yonke imithetho yezwe, akukho mthetho ongashaywa kodwa bese kutholakala ukuthi uphambana noma uphikisana noMthethosisekelo. Uma kuvela isimo esinjalo - lapho umthetho obekiwe kodwa ungqubuzana nobaba wemithetho yonke - iNkantolo eNkulu yoMthethosisekelo iyalela ukuba ubuyiselwe ePhalamende, kuchitshiyelwe lowo monakalo owenza uphambane nokuzwa. Ukusebenza komthetho-ke akube kusaphikiswa noma ngabe uyakuthanda lokho okushoyo noma awukuthandi. Kunobungozi-ke…

MHLELI: AmaKrestu amele iningi eNingizimu Afrika, njengaseMelika. Kodwa-ke kubalulekile ukuvuma ukuthi naphezu kwaleli qiniso lezibalo zabantu, izwi lobuKristu liye lathuliswa ngendlela ehlelekile embusweni wethu wentando yabantu. Ubushoshovu bobuKristu obaba yisisekelo somzabalazo, bubekwe eceleni, bugubuzelwe wuMthethosisekelo osebenza njengelinye iBhayibheli lamaqiniso akude. AmaKrestu aseNingizimu Afrika awatshelwa ukuthi ingqikithi yentando yabantu nenkululeko lapha isukela ekwahlulelweni kwezimiso zeTestamente Elisha. Lezo zimiso ziqanjwe kabusha zabizwa ngamalungelo. Leli su livumele uhulumeni wentando yabantu ukuthi alulaze izimiso zokuziphatha kweningi lethu esingamaKrestu. Ukubheka umlando kanye nomsebenzi weKhomishini yamaSiko, iNkolo neziLimi kuveza inhloso yayo yangempela okungukuvula indlela yokugxambukela kukahulumeni ezindabeni zezenkolo. Isizathu esiyisisekelo sisobala: Inqubo yentando yabantu yaseNingizimu Afrika ivame ukuvuna imibono ephikisana nezimiso zikaNkulunkulu. Sonke lesi sikhathi isizwe sikhombisa ukuziqhenya ngoMthethosisekelo waso omuhle kunayo yonke. Lo mqulu yiwona mlweli wamalungelo abantu enkundleni yamazwe ngamazwe. Ngaphezu kwalokho, amasonto asemthethweni…

UKHULULWE wukuthi iqembu likwazile ukudlulisa indumalo yokuhlulwa emdlalweni walo wokuqala weNdebe yoMhlaba, ladlala kangcono kowesibili umdlali weqembu lesizwe lekhilikithi labesifazane, uTazmin Brits. AmaProteas axetshulwe yi-England ngamawikhethi angu-10 kowokuvula weNdebe yoMhlaba ye-One Day International ngoLwesihlanu. Kulo mdlalo azenzele phansi ngokushaya udaka ngesikhathi ebhetha, akhishwa wonke esahlanganise ama-run angu-69 kuphela. Nokho akwazile ukuvuka emdlalweni wesibili ngoMsombuluko, anqoba iNew Zealand ngamawikhethi ayisithupha. Umshwibi we-spin, uNonkululeko Mlaba, uthathe amawikhethi amane kulo mdlalo, waba nesandla kwi-run-out, iNew Zealand yaphuma yonke isenze ama-run angu-231 kuma-over angu-47.5. AmaProteas abe eseshaya ama-run angu-234 kuma-over angu-40.5 kusaphume abadlali abane. Ogqame kakhulu nguBrits ngokuthola ama-run angu-101 emabholeni angu-89. "Indlela esihlulwe ngayo sibhekene ne-England ayizange ingiphathe kahle neze. Akwehlanga nokudla ngalelo langa ngoba ngilokhu ngicabanga ngokwenzekile. Kodwa-ke ngemuva kwalokho kudingeke ukuthi siwushiye ngemuva lowo mdlalo, sigxile kolandelayo," kusho uBrits. "Akukho okuningi…