Tabla de contenidos para 2025-04-03 en Isolezwe

QALA ibhizinisi lezemfashini uNksz Naledi Lukhophe, ubevame ukwenza imidwebo yomsiko wento ayifunayo, bese ewuhambisa kwabakwazi ukusika ingqephu ukumlekelela ngokuthunga ngoba yena engakakwazi, ngaphambi kokuba impahla itholwe yikhasimende elisuke lifake i-oda lempahla ethile ebhizinisini lakhe. Nokho ukuqaphela ukuthi impahla ibuya ingesikho lokho asuke ekufuna, obekumqhatha namakhasimende akhe uma esewadilivela impahla, kwenze wafunda ukuzimela, wazifundisa yena ukuthunga - esebenzisa ulwazi olutholakala kwiYouTube. Uqale kanjalo ukuzimela ngokuphelele ebhizinisini lakhe i-Afri Strings, aliqale ngo-2021 esenza imikhiqizo yezikhindi zangaphansi zabesifazane kuphela ngaleso sikhathi, kwathi ngokuqhubeka kwesikhathi wengeza ngokwenza izimpahla ezehlukene zembokodo kuphela. Elandisa ngohambo lwakhe lwebhizinisi, uNksz Lukhophe wasePort Shepstone, ogwini oluseninizimu yeKwaZulu-Natal, uthe lokhu kwaqala kuyindlela yokuzichithela isizungu kuyena esafunda emazingeni aphakeme, okuthe ngokubona ukuthi sekungenisa imali wanquma ukuqhubeka nakho ukuze azimele abuye aziphilise. “Ngiqale leli bhizinisi sengenza unyaka wami wokuqala we-Information Technology eRosebank…

EYIDLA imbuya ngothi inkakha yomlingisi esihamba ngesihlalo esinamasondo emuva kweminyaka ewu-53 iyibambile insimbi ishisa kule ndima. UNandi (74) uselingise emidlalweni eminingi yethelevishini okubalwa kuyo iGenerations, Muvhango, Yizo Yizo, Izoso Connexion, Jacob's Cross, Soul Buddyz, Hillside, Erfsondes, 4Play: Sex Tips for Girls, Sticks and Stones, Isibaya, Isithunzi, The Road, Ashes To Ashes, Isithembiso, House of Zwide, Icala neminye. Emafilimini kubalwa iThe No.1 Ladies' Detective Agency, Yesterday, Reasonable Man neSaturday Night at the Palace. Lo mlingisi uphumele obala ngesikhathi ezonikelelwa yinhlangano engenzi nzuzo, iRise AbOVE Normal. Uthe usehlale ekwi-wheelchair ngenxa yokuthi uswele imali yokwelashwa. "Ngigulelwe wumfana, wacishe wafa. Ngamyisa esibhedlela. Ngamkhokhela uR88 000 njengoba ubona ngihleli ngingenamali." Uthe okumenza angakwazi ukuba ne-medical aid ukuthi akakwazi ukuyikhokhela zinyanga zonke ngenxa yokuthi akasebenzi. "Uzoyithola kanjani i-medical aid ungenamali. Noma umuntu ubengathola eshibhile kodwa uzoyikhokhela…

ABATHELE othulini abasolwa abayisihlanu amaphoyisa aKwaZulu-Natal, esigamekweni sokudubulana esenzeke eBonela, eThekwini, izolo. Ngokuthola kweSolezwe, abasolwa bebehamba ngemoto iBMW eluhlaza ngesikhathi bemiswa amaphoyisa kule ndawo. Kuthiwa abafunanga ukuma njengomyalelo wamaphoyisa, bakhetha ukuvele bavulele ngenhlamvu bebhekise kuwo. “Nawo abuyisele ngayo inhlamvu, kwase kufa abahlanu,” kusho umthombo. Isolezwe lithole ukuthi bebefunelwa uxhaxha lwamacala okubanjwa kwenkunzi izimoto ezithwala imali. Phakathi kwezigameko abayamaniswa naso, kukhona nesakamumva esenzeke emgwaqweni uM5, ngaKwaMashu. Kuleso sigameko, abasolwa baqhumise imoto yemali, kubuka wonke umuntu, maqede babaleka nesamba semali esingaziwa. Ziqale phansi ziyenyuka izigameko zokubanjwa inkunzi izimoto ezithwala imali njengoba kubonakala izigameko zalolu hlobo isonto nesonto. Okhulumela amaphoyisa KwaZulu-Natal, uColonel Robert Netshiunda, eqinisekisa isigameko uthe: "Abasolwa abahlanu, abasolwa ngecala lokubamba izimoto ezithwala imali inkunzi bafe ujuqu ngesikhathi bedubulana namaphoyisa eBonela." Uthe uKhomishana wamaPhoyisa KwaZulu-Natal usendleleni ebheke endaweni yesigameko emva kokwenzeka kwaso.…

MKHUBA weziphathimandla kuhulumeni wokuma ngenhla ngeziphakamiso zokwenyuswa kwentengo yezidingongqangi kubantu awehlukene nomsengi obelesela isigqala aze asizame nomphehlu ebe azi kahle ukuthi akukho lubisi lwaphuma la. Muva nje, njengoba sibikile oshicilelweni lwayizolo, uMasipala waseThekwini okuyiwo wodwa omkhulu nobizwa nge-metro KwaZulu-Natal, ubeke etafuleni iziphakamiso zokuthi intengo yezidingo ezifana namanzi nogesi yenyuswe ngo-15% no 12.72% ngokulandelana. Kukhona neziphakamiso zokwenyuswa kwentengo yama-rates ahlukene, kodwa sigqamisa lezi kakhulu ngoba yizo eziyisitilobho esifasa kakhulu kubantu. Uma-ke ubheka incazelo ngeziphakamiso zabo aboMkhandlu, ungebasole ngoba nabo bajamelwe yilabo ababaphakela amanzi nabaphehla ugesi - okunguMngeni-uThukela Water nabakwa-Eskom. Futhi, yebo-ke, kulesi sigaba umkhandlu usazokwenza imijikelezo uhambela emiphakathini lapho uchaza kabanzi ngesabelomali sanonyaka, uphinde uthathe imibono yabantu. Sinethemba lokuthi iziphathimandla zizolalela abantu kube nokubonisana ezingxenyeni ezithile, okushiwo abantu kube yingxenye yezinqumo. Ngale kwalokho lezi ziphakamiso ezithinta impilo yabantu zizobathunuka izilonda ezivele…

MHLELI: NgoMashi 21, 1975, kwaqopheka umlando eNingizimu Afrika eyayibuswa ngemithetho kahulumeni wobandlululo wendlanzana labamhlophe. Kufanele kugxile ezingqonddweni zezizukulwane ezintsha ukuthi lelo kwakuyikhasi elisha emuva kokuvalwa ngesihluku umlomo kwezinhlangano ezazibona ukuthi izwe lalingaphethwe ngokuyikho, lapho izinqumo ngokuphathwa kwezwe zazithathwa ngabamhlophe bebodwa, iningi labangemhlophe kufanele lithathelwe nje. Leli khasi elalembuleka libaluleke kakhulu emva kwesikhala emgangeleni wezombusazwe emuva kwalokho ababhala ngezilimi zabamhlophe ababekuhumusha njengeshayamoya kwezombangazwe. phecelezi "political vacuum". Indawo yakwaNzimela ayibanga ncinyana ngalelo langa. Labo abayifunda incwadi kaDkt (Nelson) Mandela ethi Long Walk to Freedom bazokhumbula ukuthi kwafika isikhathi lapho unya lukahulumeni wamaBhunu lwalungasenakubekezeleleka khona. Iminyakazo yemibhikisho yokuthula neyayiphucuzekile, ayizange yabekezelelwa uhulumeni wabamhlophe kanti nabamnyama base bephelelwe yisineke ngendlela umbuso owawuziphethe ngayo. Yingalesi sikhathi lapho ibutho likaVukayibambe, okwakuwuphiko lukaKhongolose lwentsha (ANCYL), lwazibandakanya nomzabalazo ongenakuncenga nokusunguleka kwemibutho emzabalazweni. Ngeke sishiye ngaphandle inhlangano eyahlubuka kuKhongolose…

ABADINGEKI abadlali abazithambisayo kowomlenze wesibili weCaf Champions League ophakathi kweMamelodi Sundowns ne-Esperance Sportive de Tunis ngokubona komqeqeshi wamaBrazilians, uMiguel Cardoso, owazi wonke amaqhinga aleli qembu laseTunisia okudina izitha. ISundowns yehlule i-Esperance ngo 1-0 wegoli likaPeter Shalulile emdlalweni womlenze wokuqala we-quarterfinal yeCaf Champions League eLoftus Versfeld Stadium ePitoli, ngoLwesibili. Enkulumeni kaCardoso, osuke kwi-Esperance ewine nayo isicoco seligi, kuhlale obala ukuthi uyalesaba leli qembu alichaze njengelizokwenza konke okusemandlaneni ukuguqula umphumela. ISundowns izobhekana ne-Esperance kowomlenze wesibili ngoLwesibili ngo-9 ebusuku eStade Olympique Hammadi Agrebi, eTunisia. “Ukuwina kwethu umlenze wokuqala kuzokwenza i-Esperance ingabi nawo uphawini wokuhlala emuva njengenjwayelo, ngakho-ke kumele sikulungele ukuthi siya empini,” kuqhuba uCardoso. “Kunezikhathi lapho lingeke lidlalwe khona ibhola ngakho-ke akufanele sihambe nabafana kulo mdlalo womlenze wesibili. Kumele siye kuwona nezinsizwa. “Izinga esikulona kwiChampions League alisayidingi iminqolo, ngakho-ke sidinga ukhakhayi oluqinile kubadlali…

“UMSEBENZI esiwenzayo muhle ngokuthi ugqugquzela ukunakekela amehlo okusiza ukugwema izinkinga ezeyamene nalokho. Ezivame ukuvela kwabanye abantu umonakalo usumkhulu ngokweqile futhi sekungaselula ukuwulungisa ngokushesha.” Usho kanjalo uNksz Nomthandazo Sibiya, ngenkathi elandisa ngomsebenzi abawenza e-Optomly, inkampani yakhe eyenza imisebenzi yezamehlo eqale nyakenye. Isiza ngokuhlola bese yelapha abantu abanezinkinga futhi idayise nemikhiqizo ebasiza ekutheni bazelaphe. UNksz Sibiya, waseMbongolwane, eShowe, enyakatho yeKwaZulu-Natal, osezinze eThekwini ngomsebenzi webhizinisi, uthe enye yezinto ezamdobela kulo msebenzi wukuthi ungumuntu okhonze ukusiza abantu. Kwathi ngokusebenza ezinkampanini ezehlukene ezenza lo msebenzi, wabona ukuthi baningi abantu abanezinkinga ezahlukene emehlweni. “Thina sikhonela lokho ukuthi sibe wusizo sihlole abantu abanenkinga yamehlo nabangenankinga nje ukusiza ukuqinisekisa ukuthi kusahamba kahle yini emehlweni abo. Kuthi labo esithola ukuthi banenkinga ethile - sibasize ngokuthi sibacebise ngohlobo lwezibuko ezilungele amehlo abo nesilinganiso senkinga esuke isemehlweni abo. Okunye futhi esingenisa…

SICHITHWA nxa zonke isiphakamiso sikaMasipala weTheku sokusebenzisa uR2.8 million, kushintshwa uphawu olusetshenziswa yilo mkhandlu ezintweni zawo. Lolu phawu olwaqala ukusebenza ekuqaleni kuka-2000 ngemuva kokuhlanganiswa komasipala abehlukene befakwa kuMasipala waseThekwini, kuhlelwe ukuthi lushintshwe ukuze luhehe luphinde luhambisane nezinhlelo zangomuso zomkhandlu. Ekhuluma neNewzroom Afrika umengameli wenhlangano iThekwini Ratepayers and Residents Association, uMnuz Ish Prahladh, uzichithile lezi zinhlelo zomkhandlu wathi le mali ingenza izinto eziningi. Uthe imali ingafakwa ezinhlelweni zokuthuthukisa ingqalasizinda yamanzi kanjalo nezinye izingqinamba ezibhekene nomkhandlu. "Imali ayifakwe ezinhlelweni zokusiza umphakathi ngoba ukushintsha uphawu ngeke kuziqede lezi zinkinga. Kunemigodi engavaliwe emigwaqweni, abantu banezikweletu zezinsiza ngakho le mali ingenza izidingo ezibalulekile," usho kanje. Ikhansela le-DA uMnuz Thabani Mthethwa, lichithe lolu hlelo lathi imali ingasebenza ezinhlelweni zokusiza umphakathi. UMthethwa uthe iTheku lisanda kuhlaselwa yizinhlekelele ngakho imali ingasiza kulezo zinhlelo, kanjalo nakwezinye. "Kunenkinga yamanzi ngakho…

MHLELI: Kunento eyenzeka enkantolo yaKwaNobamba eyenziwa uMasipala wasoLundi. Lo masipala kawufuni nakuwubona umuzi waseNdlunkulu KwaNobamba, uthatha indawo yeSilo uyinikeze abezizwe. Selokhu sazalwa lapha KwaNobamba ayikaze ibekwe inkosi. Kunalokho, iSilo siyazikhethela umuntu ozobheka indawo kaBayede. Kodwa uMasipala wasoLundi uphikisana noBayede. Izwe laKwaNobamba ngeleNdlulamithi, akekho omunye ongathi ngelakhe. Kodwa uMasipala wasoLundi ufuna ukulidayesela abangani bezikhulu zawo. Laphaya nje ngasegaraji, uma ungena Ondini, kwafakwa isithombe esithi "Siyakwamukela Olundi" okwakufanele sifakwe eduze komfula iMfolozi. Siyambuka umasipala into asenza yona KwaNobamba kodwa noma ungafunda kangakanani, ngeke uwuphendule umlando owashiywa ngokhokho beSilo uwenze ube yisibongo esithandwa nguwe. Uma uMasipala wasoLundi ufisa ukwazi ngomlando waKwaNobamba awufike enkantolo eholwa Yiso leSilo, uButhelezi, ukuze bazi ukuthi uNobamba uyini, usuka kuphi futhi uphela kuphi. Nakhona lapha KwaNobamba, ngicela uphenyo ngezinduna eziphethe izitifiketi ezisayinwe nguMasipala wasoLundi, ukuthi unawo yini amandla…

IYAQONGA ingcindezi yokuthi babhekisiswe bonke abasebenza nezingane ikakhulu ezikoleni ukuthi abakaze balahlwe amacala okuhlukumeza izingane phambilini. Lokhu kwenze neqembu i-Build One South Africa (Bosa), labhalela uNgqongqoshe wezeMfundo eyisiSekelo, uNksz Siviwe Gwarube, ukuthi kuhlolwe bonke abasebenza nezingane ukuthi abakaze bagwetshelwe amacala afuze lawa. Leli qembu lithe lifuna bonke abasezikoleni, babhekwe ukuthi abekho yini emqulwini obhalisa abantu asebeke balahlwa amacala ukuze abafundi baphephe. Likusho lokhu kulandela ukucasuka komphakathi wakuleli, omashe emadolobheni ehlukene ufuna kwenziwe ubulungiswa ngokudlwengulwa komfundi oneminyaka engu-7, ofunda eBergview College, eMatatiele, e-Eastern Cape, nyakenye kodwa namanje okungakaboshwa muntu. UMnuz Roger Solomons weBosa, uthe othisha nabasebenza nezingane ababhekwa ukuthi abekho yini ohlwini lwabantu asebake balahlwa amacala okuhlukumeza izingane okwenza kube negebe. Uthe izikole kumele ziphephe kungabi indawo lapho kungagilwa khona abafundi. "Kunamacala okubalwa nelakamuva likaCwecwe, enzeka ezikoleni. Yingakho simile ekutheni aluvezelwe…

LINDELE umdlalo onzima kodwa ohlukile uma sebebhekene ne-MC Alger emlenzeni wesibili we-quarterfinal yeCaf Champions League, umqeqeshi we-Orlando Pirates, uJose Riveiro. Ezimnyama zinqobe ngo 1-0 eStade du 5 Juillet, e-Algeria. Igoli lishaywe nguMohau Nkota maphakathi nesiwombe sesibili. Iqembu likaRiveiro yilona lodwa elinqobe ekuhambeni kule milenze yokuqala yama-quarterfinal eCaf Champions League. Kweminye imidlalo, iMamelodi Sundowns iwine ngo 1-0 kwi-Esperance ekhaya, i-Al Ahly yaguqisa i-Al Hilal ngo 1-0, kwathi iPyramids yaxebula i-AS FAR ngo 4-1 ekhaya. “Besazi ukuthi sizothwala kanzima nokuthi besingeke sidlale ngendlela esijwayele ukudlala ngayo uma siphethe ibhola. IChampions League ihlukile, ikakhulukazi uma usekuhambeni. Besibulindele bonke ubunzima," kusho uRiveiro. Lo mqeqeshi uthe nakuba kubajabulisile ukubuya e-Algeria negoli elimqoka lasekuhambeni, basanenselelo yokuphinde badlale kahle ekhaya ukuze badlulele kowandulela owamanqamu. EzikaMagebhula zinerekhodi elihle kuyona yonke imiqhudelwano uma zidlalela ekhaya kule sizini. Azikaze zishayelwe…

UMCULI kamaskandi uMandla Zuma odume ngelikaMgqilazi, useveze ukuthi ukudlula emhlabeni komphathi wakhe owalimala embonini yamatekisi uMenziwa Biyela waKwaMaphumulo yikhona okwenze wama emculweni njengoba samlimaza lesi sehlakalo. UMgqilazi waseHluhluwe, eZibayeni, ngo-Ephreli 11 uzokhipha i-albhamu yakhe ethi Anilwi Ngani. Manje usephethwe uMthokozisi Zuma weLugaju Entertainment. Uthe ngale albhamu ukhuza udlame oluthe chithi saka emahostela, ematekisini nasezindaweni zasemakhaya. Echaza ngomsebenzi wakhe uthe uyathemba ukuthi ngeke esanyamalala njengoba enzile kubalandeli bakhe. “Ngalimala kakhulu kudlula umphathi wami emhlabeni. Umsebenzi wami ngabona sengathi ngeke usahamba ngendlela engifisa ngayo. Kodwa ngabona kungcono ngime kancane emculweni. I-albhamu yami yokugcina ethi Crush Yami iyona engagcina ngayo futhi yangenza kahle ngakho ukuphazanyiswa izinto ezenzeka,” kuchaza uMgqilazi. Uveze ukuthi ubuyile futhi kule albhamu entsha umyalezo awudlulisayo uyathemba ukuthi uzowenza umehluko. “Yize singabaculi kodwa sinesandla emkhakheni wamatekisi futhi nasemahostela iningi lethu lihlala…

UBE nenhlokomo kwaduma nehlombe, kwashaywa isiqubulo esithi abahambe abahambayo izolo ePhalamende kuphasiswa isabelomali esinyusa intela efakwa uma kuthengwa impahla, iVAT ebesichithwa yi-DA namanye amaqembu. Lokhu kwenze sashuba isimo kwi-DA njengoba ikhula ingcindezi yokuthi kuhlukane izindlela kuhulumeni wokubambisana kwamaqembu kuleli owaziwa nge-GNUemva kokuba i-DA ichithe eyokuphasisa isabelomali. Angu-194 amalungu ePhalamende avotele ukuphasisa isabelomali kwathi angu-182 asichitha. Leli qembu liyalelwe ukuthi likhethe phakathi kokuba yiqembu eliphikisayo, noma liqhubeke nokuba yingxenye kahulumeni. Enkulumeni eputshukile kaMengameli Cyril Ramaphosa, kuzwakale ethi utshele umholi we-DA uMnuz John Steenhuisen, onguNgqongqoshe wezoLimo kwiKhabhinethi, ukuthi sekulele kubona ngabazokwenza mayelana nokuvotela isabelomali. Kule nkulumo uRamaphosa uzwakala ethi i-DA ayikwazi ukuba kuhulumeni iphinde ibe yiqembu eliphikisayo, ngakho kumele ikhethe okukodwa. Izolo kuvele imibiko yokuthi isigungu esiphezulu se-DA sizohlangana, sinqume ngekusasa laleli qembu kwi-GNU. Ngesikhathi amaqembu ahlukene ekhuluma ngesikhathi kunenkulumo mpikiswano ePhalamende…

MHLELI: Kuyangikhathaza ukuthi izwe lakithi liphenduke ujombigazi kodwa kuthuleke cwaka kusukela kubaphathi bezwe kuze kuyoshaya emiphakathini. ISilo saMabandla siyakukhuza ukubulawa kwabantu kodwa bese sikuphushela kuNdunankulu wesifundazwe nasezikhulwini zamaphoyisa, angisizwa isisombululo sakhe ngqo omdala ukuthi uthini ngalolu laka olusigqolozele. NgoSepthemba, onyakeni ofile, watshela amakhosi esibayeni KwaKhangela ukuthi uzobiza imbizo kaZulu kuzoxoxwa ngezithinta isizwe. Emasontweni ambalwa edlule, uMntwana uVulindlela ubeseThekwini nabanye beSilo, waluthinta udaba lokufa kwabantu, wakhombisa ukukhathazeka ngalo. Kodwa oweSilo akaqhamukanga nokuthi yena uthi kunqandwa kanjani ukugobhoza kwegazi kwelikaMthaniya. Yebo, uNdunankulu uThami Ntuli uzungeza isifundazwe ekhuza lokhu kubulalana. Kodwa uthi efulathela ebheke lena kube konakala ngemuva. Asikuvume ukuthi kuke kwafa abantu abaningi kakhulu esizweni kuyiwa okhethweni lokuqala ngo-1994. Lapho abantu babengalawuleki. Ngibona sengathi kubuye leso simo manje. Umehluko ukuthi akuseyizo izinhlangano zombusazwe, kukhona umoya ongene abantu. Izehlakalo ezimbalwa nje; esikoleni iMdingi…

KHOLWA ukuthi uthishanhloko, angasazwani naye, wasebenzisa umfundi "owuhlupho" ukumxoshisa emsebenzini kungafanele, owesilisa obenguthisha esikoleni iMasakhaneni High, KwaMakhutha, eThekwini. UMnuz Siphelele Ngcobo, uthe wanikwa incwadi emxosha emsebenzini ngo-Okthoba nyakenye, emva kokulahlwa yicala lokudlwengula umfundi obefunda uGrade 11 nyakenye. UNgcobo uthe ngesikhathi etshelwa uthishanhloko ngo-Ephreli 22, nyakenye, wathi usolwa ngecala lokudlwengula umfundi, embona KwaMakhutha, kuwuMgqibelo ngo-Ephreli 10. Lokhu kuyavela kwamanye amaphepha anikwa wona maqondana naleli cala. Okudidayo ukuthi incwadi yokumumisa isikhashana emsebenzini, ayinikwa ngoMeyi nyakenye, yayiveza ukuthi isehlo senzeka esikoleni. UNgcobo uthe akakaze alenze leli cala, wathi ukhala nangendlela isikole nesifunda okulusingathe ngayo udaba. “Ngiyakhala ngendlela okwenziwe ngayo izinto. Kuningi okungahanjiswanga ngendlela kwaze kwaba ukuthi ngiyaxoshwa,” kusho uNgcobo. Uthe esebizelwa esigcawini sokuthi izinhlangothi ezithintekayo, zibhunge ngodaba, umfundi othintekayo nomngani wakhe, okuthiwa wuye ufakazi, abafikanga. Uthe ngesikhathi sekufanele kuqalwe, wabuza umbuzo wokuthi ngabe…

-ARTHUR Zwane ongumqeqeshi waMaZulu, usebanqumele ugwayi katiki abadlali baleli qembu ngokulikhipha obhukwini akholwa wukuthi banesanda ekulifakeni kulo. UZwane ubekhuluma izolo ngesikhathi leli qembu lizicijela ukubhekana neRichards Bay FC emdlalweni weBetway Premiership ozoba seKing Zwelithini Stadium eMlaza, kusasa ngo-7.30 ebusuku. USuthu alwenzi kahle kwiligi kulezi zinsuku okufakazelwa ukungayazi kwalo iwini emidlalweni emine edlule. Ludlale ngokulingana kowodwa, lwakhala ngaphansi kwemithathu. Yize kunjalo, kodwa iqembu likaZwane lisabambelele endaweni yesikhombisa kwi-log yePremiership ngamaphuzu angu-30 emidlalweni yeligi engu-24. “Ngaphandle kokuthi lona wumdlalo wesigaba esikhulu sebhola laseNingizimu Afrika, sibhekene nabakhaya abazofika kithina benelukuluku kwazise nabo basuka endukwini,” kusho uZwane. “Awumkhulu kangako umsebenzi wami ngaphandle kokukhumbuza abadlali ukuthi imiphumela yakamuva siyithole kukhona bona enkundleni, ngakho-ke kuzoba yibona futhi abakhipha iqembu obhukwini elibhukuda kulona. Lokhu kuzoqala ngomdlalo weBay. “Amaphutha ambalwa adaleka kubadlali abathile basemuva yiwona agcina esebehlisela nangokuzethemba.…