Tabla de contenidos para 2025-03-14 en Isolezwe

BAZAKHELE igama enkundleni yokuxhumana uSipho “Alphi” Mkhwanazi noMbali Nhlapho banyelwe yinyoni esandleni njengoba bezobonakala ezinhlelweni ezehlukene kuMzansi Magic kusuka ngenyanga ezayo. USipho uzokwethula uhlelo oluthi Stina oluzoqala kulesi siteshi ngo-Ephreli 8, ngo-8 ebusuku. Kulolu hlelo uSipho uzohlangana nowesilisa noma owesifazane ozotshela umngani wakhe noma isihlobo sakhe ukuthi uthanda umuntu wakhe. U-Alphi uthe uhlelo oluzoshiya abaningi bebambe ongezansi njengoba abazobonakala kulo bezobe bezovula isifuba ngabakuzwayo. “Abasibizile injongo yabo ukuthi baveze imizwa yabo bese bezitholela uthando kumuntu abazokhuluma naye. Abantu abazogqama abasebenza ndawonye, abazoveza imizwa yabo kozakwabo abahlale benabo emsebenzini, abantu abangabangani noyedwa ozogcina eveza ukuthi uzizwa kanjani ngomngani wakhe noma umakhelwane. “Kodwa okuzokwenza uhlelo lumangaze ukuthi uzothini uphathina kalona ozotshelwa lezi zindaba. Ziningi izimfihlo ezizovela ohlelweni njengoba abantu bezoveza okokuqala indlela abazizwa ngayo,” kuchaza u-Alphi. Uveze ukuthi uyazibonga izinkundla zokuxhumana ngokumvulela…

UYAQHUBEKA nombhidlangano wokufuna ukuvunywa uhulumeni owaboshelwa ukuzenza iSilo. UMnuz Gcina Bethuel Nkosi "Menziwa Wesibili" ufuna ukuthi uMnyango wezokuBusa ngokuBambisana neziNdaba zoMdabu KwaZulu-Natal usheshise uhlelo lokumvuma njengenkosi. Lokhu ukusho esitatimendeni esikhishwe ehhovisi lakhe. UNkosi, oqhamuka esifundeni Amajuba, waboshwa ngonyaka owedlule, waboshelwa ukuzibiza ngeSilo. Wadedelwa ngebheyili emva kokuvela kafishane eNkantolo yeMantshi eDannhauser. Esitatimendeni, uNkosi uthe ngaphansi kobukhosi bakhe kunezizwe zamakhosi ezingu-11. Uthe ngo-2023 wafaka isicelo sokuba uhulumeni uvume lezi zizwe zamakhosi ezingaphansi kwakhe. "Lesi sicelo sasenza ngokuhambisana nomthetho olawula ubuholi bomdabu. UMnyango wokuBusa ngokuBambisana kanye neziNdaba zoMdabu KwaZulu-Natal, iHhovisi likaNdunankulu waKwaZulu-Natal kanye nehhovisi lomnyango esifundeni Amajuba baqinisekisa ukuthi basitholile isicelo sethu." UNkosi uthe umthetho waKwaZulu-Natal wango-2005 olawula ukuqokwa kwamakhosi uyalela ukuba kuqale kuvunywe ubukhona bezizwe kuqala ngaphambi kokuthi kuqokwe amakhosi. Uthe uhulumeni waKwaZulu-Natal awuzange usisukumele isicelo sakhe. "Sazama ukulandelela ukuthi kwenzekani…

UKHULUME inhlambuluko uNgqongqoshe Enoch Godongwana uma ethi kulula ukugxeka mayelana nokuthi isabelomali singasilungisa kanjani isimo iNingizimu Afrika ebhekene naso sokudodobala komnotho. Ubungozi bale mpendulo abeyibhekise emibuzweni yabezindaba ngemuva kokwethula isabelomali sika-2025/2026, ukuthi simchaya njengesahluleki. Akachazi ukuthi akushilo kuzokukhuthaza ukukhula komnotho. Kunalokho ekwabeni kwakhe ufana nomuntu ophesha izimbobo endlini edilikayo. Kafushane uMnyango kaMgcinimafa uyehluleka ukuletha ushintsho ezweni, yingakho uGodongwana eqhubeka nokusenga isigqala esesiphelelwe ubisi. Kasisihle isithombe esivelayo ngalo hulumeni okuthiwa owabantu. Isabelomali kasicacisi ngokusobala ukuthi ukhumbintethe lwabantu abasha abangasebenzi luzothiwani? Sisezweni lapho abangu-28 million bekhangezwa uhulumeni. Iqiniso lithi ngeke ukwazi ukuphila ngesibonelelo sikahulumeni. Manje-ke sekwenyuswa i-VAT. Ngapha uhulumeni ugogoshele izigidi ngezigidi ezingakwazi ukuvukuza umnotho ukuze abantu basuke ekubeni ondingasithebeni, basebenze, kungene intela ezokhuphula isikhwama sentela. Bayabala abaziyo ukuthi esikhwameni sempesheni i-GEPF kunemali engaphezulu kuka-R2.38 trillion okungahleshulwa kuwo, ubuyiselwe emnothweni okungadala…

MHLELI: Iningi labantu likhungethwe ngukuxakeka okwahlukene okudinga imali. Sizithola sesigembula ngezindlela ezahlukene okubandakanya nokwezinombolo. Okubuhlungu ngabagembuli bezinombolo wukuthi abasoze nanini bayibamba i-jackpot yezinombolo uma bengakaze bazingele ngisho izinyoni lezi. Phela umzingeli okala kahle inyoni ngesihlilingi yilowo oyikala endaweni eyodwa ngaso sonke isikhathi. Akalenzi iphutha uma ekala inyoni. Nangakusasa uma ezingela izinyoni, uyikala endaweni efanayo, okungaba yikhanda noma yisifuba. Lo mzingeli wezinyoni uyaziqeda izinyoni zeNkosi. Akagcaluzi lonke ihlathi, efunana nezinyoni. Hleze ahlangabezane nengozi. Ucutha esikhaleni esisodwa, khona ehlathini. Wazi kahle kamhlophe ukuthi nazi izihlahla namafokozi, nalapho ecuthe khona ziyeza izinyoni. Ngeke elokhu ewuka enyuka nehlathi lonke, ngoba maningi amathuba okubuya elambatha. Uma ungumgembuli ogembula ngezinombolo, ngisho ngabe luhlobo luni lokugembula kwezinombolo, kumele ugembulise okomzingeli wezinyoni. Awukwazi ukuthi namuhla ugembula ngezinombolo ezithize, ikuchithe i-jackpot okanye umshini wezinombolo, bese ngokulandelayo ugembula ngezinye izinombolo…

KUKAFIKI emiqondweni yabo ukuthi balahle ithemba ngokunqoba isicoco seBetway Premiership kule sizini abe-Orlando Pirates, ngokusho komgadli wayo, uTshegofatso Mabasa. Nakuba ezimnyama zisele ngamaphuzu angu-18 eqenjini eliqhwakele, iMamelodi Sundowns, uMabasa ukholwa wukuthi bangasehlisa leso sikweletu uma bengadlala kahle uma la maqembu esebhekene eFNB Stadium ngeSonto ngo-3.30 ntambama. Ukubambana ngo 0-0 neStellenbosch FC koweligi ngoLwesibili kuholele ekutheni ezikaMagebhula zisalele emuva kakhulu njengoba sezinamaphuzu angu-40 emidlalweni engu-18. Okuphinde kwagwaza abalandeli njengomkhonto enhliziyweni wukuthi iSundowns iqhubekile nokuqoqa amaphuzu, iqumba phansi AmaZulu ngo 2-0. AmaBrazilians asesicongweni ngamaphuzu angu-58 emidlalweni engu-22. Njengoba ezikaMagebhula zisalele emuva ngemidlalo emine, ukunqoba iSundowns kungafana nokushaya izinyoni ezimbili ngetshe elilodwa njengoba zingafaka amaphuzu emgodleni wazo bese ziqinisekisa ukuthi iSundowns ima ndawonye. UMabasa uthe nakuba sekukhona asebebhale phansi ukuthi sekuphelile ngeqembu lakhe embangweni weligi, bona basazolwa kuze kube sekugcineni. "Uma uqhudelana neqembu…

UKUKHALA kwesando namuhla uma sekudayiswa esidlangalaleni iRoyal AM kuzosho ukushabalala kweqembu elaqala libukeka linezinhloso ezinhle ebholeni laseNingizimu Afrika. Kusukela ngo-8 ekuseni kuya ku-1 emini, i-AM kuzobe kunqakiswana ngayo ukuze iwele ezandleni zikasozimali ozoqhubeka nayo kwiBetway Premiership. Lona ngumphumela wezinkinga ezithinta ukukweleta intela zomphathi wayo, uShauwn "MaMkhize" Mkhize, okweleta iSouth African Revenue Services (Sars) imali ebalelwa ku-R40 million. Ekuqaleni kwesonto lo mqoqintela ukuqinisekisile ukuthi useqalile ukwamukela izicelo. Ngokwesimemezelo, bonke abafuna ukufaka izicelo sokubanga iqembu kufanele bathumele isigidi samarandi ukuqinisekisa ukuthi bayalifuna. Ngaphezu kwalokho kufanele baveze ubufakazi bokuthi ajule kangakanani amaphakethe abo ngaphansi komthetho, iFinancial Intelligence Centre Act (Fica). Umuntu elizowela kuyena iqembu uzomenyezelwa ngoMsombuluko. Kubantu okuvela ukuthi bacuthele i-AM kukhona nowayekhulumela iSuperSport United osengeke kwezepolitiki, uDavid "Mazolman" Sikhosana, okuthiwa uhambisana nomngani wakhe ongusomabhizinisi onamatekisi. Nokho okubhekwe kakhulu ngokwabantu baseFree State abafuna…

KUMANGALE abalandeli bomdlalo i-Scandal okhonjiswa kwi-e.tv njengoba kuthe kuqala isizini entsha kuleli sonto, kwavela inqwaba yabalingisi abasha. Abakwa-e.tv bebefihle induku emqubeni ngokwenza izinguquko kulo mdlalo njengoba ngisho nabezindaba bebengakaze batshelwe izindaba zokuthi kuza izinguquko kuwo. Kubalingisi abathuliwe kubalwa u-Oweni Sejake, Bongani Gumede, Wright Ngubeni, Botlhale Baitsiwe, Danny De Bruyne, Bongile Matsai, Khutjo Green noRuth Tladi. Izindaba zokuqubuka kukaBongile izona ezike zavela kwabezindaba njengoba kwathiwa indawo kaMthunzi ake ayilingisa phambilini kulo mdlalo iyabuya. Omunye wababhali balo mdlalo uGrace Mahlaba uveze ukuthi uhambo olusha lolu abaluqalile, nabaxolisa kakhulu kubabukeli bomdlalo njengoba bebefuna ukubasusa emhlabeni omdala akade bewubuka manje sebekomusha. “Siyazi ukuthi silethe izinguquko abebengazilindele, kodwa kuzo sithembisa into abangakaze bayibone ngoba umdlalo uphethe izigameko ezizobashiya bebambe ongezansi. Ezinye izinguquko zisezindabeni akade bezilandela emdlalweni futhi nabalingisi bathembisa ukuzinikela kukhona konke abazokwenza. Ukwethula abalingisi…

SEKUQALWE uphenyo ngezikole zakuleli ezikhethela abafundi izifundo okumele bazenze ukuze zithole imiphumela emihle kwa-matric. Lolu phenyo luqalwe emva kwezikhalo ngokuthi ezinye izikole ziphoqa abafundi ukuthi balaxaze i-Maths, benze i-Maths Literacy ukuze leso sikole sithole imiphumela emihle kwa-matric. UNgqongqoshe weMfundo eyisiSekelo, uNksz Siviwe Gwarube, uthe kufikile ezindlebeni zabo ukuthi kunalo mkhuba owenziwa yizikole, wokukhethisa abafundi izifundo ngoba zingafuni ukwehlelwa yizinga lokuphasa kwa-matric. "Ngikhulumile nabaphathiswa beminyango ezifundazweni mayelana nokuthi kuphenywe ngalo mkhuba owenziwa ngezinye izikole. Okuzotholakala ukuthi benza lokhu bazothathelwa izinyathelo ezinqala ngoba akuvumelekile ukuthi kukhethiswe umfundi izifundo okumele azenze ukuze isikole sithole imiphumela emihle," usho kanje. Ubephufumula kanje izolo ngesikhathi ephendula imibuzo yamalungu eNdlu oMkhandlu weziFundazwe ePhalamende, abembuze ukuthi ikuphi akwenzayo ngalo mkhuba wezikole. Uveze ukuthi ukube kugxilwa esisekelweni semfundo, okuyi-ECD, ngabe le nkinga ayikho. "Kuze kukhethiswe abafundi izifundo nje yingoba…

MHLELI: Ukuba kuya ngami ngabe uMasipala uMngeni uzohlala uhlezi kuleli qembu oliphethe. Ngendlela eselihlanzeke ngayo leli dolobha, liyagculisa. Kusobala ukuthi kuyasetshenzwa kuleliya dolobha. Ubona ngabantu abasebenzayo befake izimpahla ezibomvu behlanza imigwaqo. IMpophoma lena ekhona isivikeleke kakhulu ngoba isibiyiwe futhi kunenkampani egadayo khona. Awasekho la maphara ayegcwala khona phambilini. Nabavakashi sebephephile ngokuphindiwe. Siyabonga kakhulu kubaphathi boMkhandlu uMngeni. Into enhle iyanconywa. Nize ningapheli amandla. Siyababongela abahlali baseMngeni ngokuba nomasipala obakhathalelayo abantu. Siyabonga Zondi EBULWER…

BUSEHLI ubuthongo emndenini wase-Adams Mission, eThekwini, emva kokuthola izindaba zokuthi indodakazi yawo (16) esiligodlile igama layo ukuyivikela, ibihlukunyezwa nguyise (48) ngokocansi okusolwa ukuthi lokhu sekuneminyaka emine kwenzeka. Kuthiwa ubeyishaya waze wayikhiphisa isisu emva kokuyikhulelisa. Elandisa Isolezwe ngalolu daba, unina wale ntombazane uthe bathole ngoMsombuluko ngenkathi bebizelwe esikoleni okufunda kuso indodakazi yakhe ngusonhlalakahle wesikole, lapho ingane kuthiwa igeqe amagula ngokuyehlele ngoba isikhathele ukufela ngaphakathi ngobuhlungu ebihlale ibuzwiswa nguyise. Yilapho abafike khona bashaqeka kwaphela nasozwaneni kwase kubikwa udaba emaphoyiseni ngoLwesibili, umsolwa wakhalelwa ngamasongo kaSigonyela. Uvele eNkantolo yeMantshi eMbumbulu ngoLwesibili, icala lahlehliselwa uLwesine oluzayo ukuze umsolwa afake isicelo sebheyili. “Kuvele ukuthi u..(emgagula ngegama) waqala ukuhlukumeza ingane iseneminyaka ewu-12, kwathi isina-13 ifunda uGrade 7 yakhulelwa - okwathi esethole lokho wayiphoqa ukuthi ihushule isisu, wagqiba umzanyana wengane lapho okwazi yena yedwa khona. Konke lokhu kuthathe…

SITOBHA seKaizer Chiefs, u-Edmilson Dove, sikhuthaze ozakwabo ngokubaluleka kokufaka umfutho njengoba kusobala ukuthi iqembu lidinga abadlali abazokukhombisa ngezenzo enkundleni ukuthi bakulungele ukufela Amakhosi. Kusukela uDove ebuyile esikimini seChiefs ngasekuqaleni kukaMashi, ungomunye wabadlali abakhombisa impilo kuleli qembu elibanjelwe ekhaya iCape Town City ngo 0-0 emdlalweni weBetway Premiership ngoLwesithathu e-FNB Stadium, eNasrec. Lo mphumela ubuqinisekisa ukuthi ngokwezibalo, iChiefs ngeke isasidla isicoco seligi kule sizini. Lesi sitobha saseMozambique esihlale izinyanga eziyisikhombisa singalithinti ibhola ngenxa yokulimala, siqokwe njengomdlali ovelele yize iChiefs iyeke ithuba lokuqinisa indawo yayo kwi-Top 8. Ngesikhathi uDove osanda kunconywa umqeqeshi weChiefs, uNasreddine Nabi, ekhuluma nabezindaba, uzwakalise ukungeneliseki ngendlela abenza ngayo kulezi zinsuku. “Kucacele noma ubani ukuthi izinto azisihambeli ngendlela esifisa ngayo kule sizini kodwa lokhu akusiniki igunya kumbe ithuba lokucasha ngesithupha,” kusho uDove. Kwethuse abaningi ukubonakala kukaDove emdlalweni weChiefs lapho beyibhekene…

YIZE eyibona izoba yingozi i-TS Galaxy abazobhekana nayo, kodwa umdlali wasophondweni lwesokudla kuMaZulu FC, uNkosikhona Radebe, ukholwa wukuthi kufanele nakanjani bakulwele ukunqoba ukuze babuyise isithunzi phambi kwabalandeli babo. AmaZulu abuya esibhaxwini sika 2-0 asithole ngoLwesibili ekuhambeni kwiMamelodi Sundowns, abuyela ensimini ngomunye umdlalo omqoka wasekhaya weBetway Premiership neGalaxy eKing Zwelithini Stadium, eMlaza, namuhla ngo-7.30 ebusuku. Umgqigqo omuhle waMaZulu wokungehlulwa emidlalweni emithathu ilandelana, uphazanyiswe yiSundowns. Lokhu kusho ukuthi kufanele avuke azithathe koweGalaxy. I-The Rockets ishayela phezulu ngenxa yomgqigqo omuhle wokungehlulwa emidlalweni emithathu yakamuva. NgoLwesibili ivulele isibhaxu sika 3-1 kwiSuperSport United. IGalaxy eyavulela isibhaxu sika 1-0 kuMaZulu emzuliswaneni wokuqala wesizini, isendaweni yesihlanu kwi-log yePremiership. “Lo mdlalo ubaluleke kakhulu kithina, ikakhulukazi njengoba sizodlala nabantu abasendaweni ethe ukuba ngaphezulu kwethu kwi-log nathi esifuna ukuba kuyona. Njengoba kuyithina esidlalela ekhaya, kufanele nakanjani sikusebenzise ukudlalela kwethu ekhaya.…

MFUNDI ka-Grade 9 eCrossmoor Secondary, uZama Bhengu, uzomela iKwaZulu-Natal kuMiss Pre-Teen Universe SA, ngoMashi 21 kuya ku-23, eSun Meropa Casino, ePolokwane Le ntokazi (13) engumagcino ezinganeni ezine, ezintathu okungabafana, idabuka eMariannridge, ePinetown. "Ngaqala uhambo lwami lokumodela ngo-2022 futhi senginqobe izicoco ezimbalwa. Ngisesikoleni esifundisa ngokukhangisa ngengqephu eThekwini, i-United Modeling Academy (UMA)," kusho lo nobuhle osekhuliswa wuyise emuva kokushiwa emhlabeni ngunina ngo-2020. UZama ekhuluma, uthe ungenele uMiss Teen Universe South Africa ngonyaka owedlule ngoba efuna umqhudelwano kazwelonke owaziwayo nogxile ekuthuthukisweni kwezingane zamantombazane. Uthe uhambo lwakhe luqale emzuliswaneni owandulela owamanqamu, njengoba manje esekowamanqamu. "Kulolu hambo nginikele ngezicathulo zesikole kubafundi abaswele endaweni yangakithi eMariannridge. Ngike ngavakashela ikhaya labantwana abaswele, ngaphinde nganikela khona ngezicathulo zesikole nezingubo zokugqoka. Ngibuye ngaxhasa inhlangano esiza abantulayo nabantu abangenamakhaya kanye nabafuna umsebenzi." Uthe ubesebenzisa imali azongela yona nabeyiqoqa emphakathini. "Ngohambo…

MHLELI: Yize ngingesiye umuntu oyaye agxeke ngoba nakhu abanye begxeka kodwa ngithe angivumelane noSipho Mpungose ngokungcola kwamadolobha nezindawo esihlala kuzo. Futhi kubukeka ingekho imizamo noma ukusebenzisana kwezinhlaka ukuze kuqhanyukwe nesisombululo. Engikubone emgwaqweni uWiggins, eMayville, eThekwini, kungishiye ngibambe ongezansi ngenxa yezigqibha zodoti ongaqoqwa yize usuke usukulungele ukuthi ungathathwa amaloli kaMasipala. Nasemgwaqweni u-Blinkbonnie, ngaseBonela, kunemfucuza obonayo ukuthi kunesikhathi ingathuthwa. Uzophinde uyibone le nto engikhuluma ngayo uma uchezuka emgwaqweni onguthelawayeka u-N3, uyojoyina u-N2, ubheke ngaku-Edwin Swales, lapho kuhlale kunezigqibha zodoti olahlwa ngabantu abakhele leya ndawo. Ngabe konakelephi Zulu omuhle? Kunini lapho siyoziqhenya khona ngezwe lethu emva kweminyaka engu-30 sathola inkululeko? Kwezinye izindawo kuqhuma izitamkoko, kuvimbanise iphunga lendle kube kuncane indawo. Okubuhlungu kakhulu ukuthi izikhulu ziyaye zibike imbiba, zibike ibuzi uma sekumele zilungise umonakalo. Mhlawumbe yingoba kujeziswa abahlali basemjondolo ngoba nakhu bengawakhokhi ama-rates?…

IZINTABA nemifula yase-Valley of Thousand Hills KwaZulu-Natal, ezizukulwaneni ngezizukulwane, ziheha abantu abafuna “umlinganiselelo wenduduzo” phakathi kwezihlahla zikamango nezikakwatapheya. Bekunjalo ngoZamaweza ‘Zulu Glamour’ Mthalane, ophile amashumi eminyaka kulesi sifundazwe osanda kushona eneminyaka engu-35. Yize izimo ezithinta ukuwohloka ngokushesha kwempilo yakhe zizothatha isikhathi ukuthi zizike ezingqondweni nasezinhliziyweni zabaningi, ngemuva kokuhlushwa yikhanda elihlobene ne-meningitis cishe amasonto amabili ngaphambi kokushona kwakhe esibhedlela i-Dr Pixley Ka Isaka Seme Memorial, eThekwini, ngiyethemba ukuthi ifa likaZulu Glamour ngeke linciphe uma ekugcineni kwemukelwa. Lokhu kugenxa yothando lwakhe lomculo kamaskandi. Uthe ekubona kushayisana ukuphila kahle njengomuntu ohlonishwayo emphakathini, wagcizelela ukuthi kungumsebenzi wakhe ukuveza isithombe esinezifiso. Kodwa-ke, abantu bajabulela ukwehlisa imisebenzi nempumelelo yabanye. UZulu Glamour ubengumdondoshiya phakathi kwesizukulwane sezingqalabutho zamasiko aseNingizimu Afrika. Uthando lwakhe nesiphiwo sakhe sithinte inqwaba yabalandeli ezweni lonke. Ububanzi bakhe bebumangalisa kakhulu: umsebenzi wakhe emsakazweni Ukhozi FM,…

UQALE ngebatha ubuholi obusha be-ANC KwaZulu-Natal bubhabhadiswa okhethweni lokuqala olwenzeke sekuphethe bona. I-ANC iphunyukwe i-ward ekuMasipala waseRichmond, okhethweni lokuchibiyela obelungoLwesithathu. Kulolu khetho obeluku-ward 2, kunqobe i-MK. I-ANC ihlele kabusha ubuholi bayo baKwaZulu-Natal ngenyanga eyedlule, kwaqokwa izingwevu ezikhundleni ezibalulekile. Isizathu esenza ukuthi kuhlelwe kabusha ubuholi be-ANC KwaZulu-Natal ukuthi iqembu lashaya udaka kulesi sifundazwe ngesikhathi kunokhetho lwangonyaka owedlule. Ubuholi be-ANC obusha KwaZulu-Natal bufaka izingwevu ezifana noMnuz Jeff Radebe, Mike Mabuyakhulu, Sibusiso Ndebele noNkk Nomusa Dube-Ncube. Enye yezinto eyakhalisa i-ANC ngobuholi obudala ukuthi babungasondelene nemiphakathi. Okhulumela i-ANC KwaZulu-Natal, uMnuz Fanele Sibisi, uthe bazoqhubeka nemizamo yabo yokuzisondeza emiphakathini. "Uma singenela ukhetho sisuke sifuna ukunqoba ngoba sifuna ukuphatha uhulumeni. Abaholi beqembu bazoqhubeka nokuhambela imiphakathi, baxazulule izinkinga ezibhekene nabantu." USibisi uthe nakuba benganqobanga eRichmond abakubongayo ukuthi ukhetho belukhululekile. "Abantu baseRichmond baphume ngobuningi babo, bayovota. Ukuvota kuyilungelo…

UMQEQESHI weBafana Bafana, uHugo Broos, ukuchaze njengobu-amesha ukuthi kunabadlali abasesigabeni esikhulu sebhola laseNingizimu Afrika abaphuthwa yingqayizivele yethuba lokudlalela iqembu lesizwe ngoba bengenawo amaphepha abagunyaza ukuwela umngcele baphume eNingizimu Afrika. UBroos ukusho lokhu ngesikhathi ekhuluma ngesimo sikaKhulumani Ndamane weTS Galaxy aphoqelekile ukumshiya ngaphandle ngoba i-passport uyenze ngoba esevele ebizelwe kwiBafana. NgokukaBroos uNdamane waseSahlumbe, KwaKwaZulu Natal, okhombisa izimpawu zokuvuthwa yize eneminyaka engu-20, bese emfakile esikwatini kodwa zajika izinto ngoba sekutholakala ukuthi akanayo i-passport. IBafana ilungiselela imidlalo emibili emqoka yokuhlungela iNdebe yoMhlaba ka-2026 ezoyidlala neLesotho ekhaya ngoMashi 21, ilandelise ngoweBenin ozodlalelwa e-Ivory Coast ngoMashi 25. EzikaBroos zihleli endaweni yesibili kuGroup C ngamaphuzu ayisikhombisa okuyisibalo esifanayo neseRwanda eqhwakele neBenin ekweyesithathu. ILesotho abazoqala nayo ePeter Mokaba Stadium, ePolokwane, isendaweni yesine ngamaphuzu amahlanu. Iphambili ngamabili kwiNigeria eyibambe kweyesine. UBroos akaqali ukubhekana nenkinga yomdlali ongenayo i-passport. Eminyakeni…