Landbouweekblad 29 May 2025의 목차

Stropers laat waai Die stropers loop weer in ’n geelmielieland van Zunckel Farms by Bergville in Kwa-Zulu-Natal, en Tyson Zunckel het vroeër dié maand gesê die son het in die laaste week van April ná die weke lange reën begin skyn. “Die grond het sedertdien baie uitgedroog, maar daar is steeds kolle waar dit só nat is dat die werktuie wil vassit. Ons is so twee weke later met die oes as gewoonlik, maar in die afgelope paar dae het ons goed gevorder. Die sojabone is klaar geoes, en so 50% van die geelmielies is klaar. “Dinge verloop nou baie beter. Al is daar hier en daar ’n paar slegte pitte, is die gehalte van die mielies sover net-net reg vir YM1.” Wandile Sihlobo, hoofekonoom van Agbiz, het onlangs gesê…

Nampo 2025 was een vir die rekordboeke – nie net omdat die meer as 87 000 besoekers en 900 uitstallers die meeste nóg was nie, maar ook omdat dit deur die president, adjunkpresident en twee ministers bygewoon is. Voorwaar geskiedkundig. Op Dinsdag 13 Mei het pres. Cyril Ramaphosa Nampo die eerste keer in 20 jaar bygewoon. Hy het aan een van Manie se kollegas gesê hy is baie beïndruk met die reusegroei wat intussen plaasgevind het en al die tegnologie wat uitgestal is. Hy het vertel hy was daar as ’n boer en dat hy belanggestel het in die trekkers en van die balers en planters. Volgens Graan SA het hy onder meer ’n trekker en baler gekoop terwyl hy daar was. Adj.pres. Paul Mashatile, Dean Macpherson, minister van openbare…

BRASILIË behaal nou uiteindelik die oogmerke van sy stryd van twee dekades teen bek-en-klouseer deurdat sy ministerie van landbou en lewende hawe dié land reeds in Mei verlede jaar as bek-en-klouseervry sonder inenting verklaar het. Indien die wêreldorganisasie vir dieregesondheid (WOAH) internasionale erkenning aan dié status verleen, sal dit die kroon span en deur lande oor die wêreld heen erken word. Verskeie mense met wie Landbouweekblad op die onlangse ExpoZebu 2025 in die Uberaba-distrik van dié Suid-Amerikaanse land gepraat het, was versigtig optimisties dat die WOAH binnekort die amptelike erkenning sal verleen. ’n Brasiliaanse afvaardiging sou later in Mei na die WOAH in Parys, Frankryk, reis om wetenskaplike bewyse voor te lê. Landbouweekblad het die ExpoZebu 2025 as gas van die openbare-private Brasiliaanse internasionale beesprojek bygewoon. Dr. Izabelle Jardim, ’n…

DIE Vaal- en Oranjerivierstelsel was vanjaar sedert die einde van April die tweede keer in vloed nadat swaar reënval in Februarie oor die somerreënstreek begin val het. Volgens die berekeninge sowat twee jaar ná die eerste aangetekende vloed in Februarie 1874 was die hoogtepunt van die vloedwatervlak by Hopetown toe sowat 11 300 kumek, sê Johan van den Berg, onafhanklike landbouweerkundige. Die volgende groot aangetekende vloed was in Februarie 1894 toe talle huise in Vereeniging, Christiana en Warrenton oorstroom is, terwyl hewige oorstromings ook in die Oranjeriviergebied voorgekom het. ’n Eeu gelede, in Maart 1925, het swaar reën ná ’n droë somer oor groot dele van die land uitgesak. In die destydse Natal is sowat 1 000 mm reën binne tien dae in sommige dele van hierdie provinsie aangeteken. “Van…

“AGOA (die wet op groei en geleenthede in Afrika) is dood en dit help nie om daaroor te probeer onderhandel of na die begrafnis te gaan nie. Daar moet gekyk word na alternatiewe – dit is van deurslaggewende belang. China en Amerika is nie die enigste twee ekonomieë in die wêreld nie. Daar is ’n groot wêreld daar buite, en die Midde-Ooste is byvoorbeeld een gebied waarop gekonsentreer kan word.” Dít was die algemene gevoel van die deelnemers aan ’n paneelgesprek op die Nampo-oesdag in ’n Nasie in gesprek-sessie oor Suid-Afrika se internasionale handelsverhoudinge en die pad vorentoe. Die grootste bedreiging is Donald Trump wat weer in die Withuis is. Hy gaan skade aanrig, maar almal moet daarmee saamleef, het JP Landman, politieke en ekonomiese ontleder, gesê. Hy het gesê…

HOEWEL April tradisioneel ’n stil maand in die makadamiabedryf is, het hierdie jaar se marktoestande ’n dieper gisting onder die oppervlak getoon. Volgens Cobus Kok, besturende direkteur van die aanlyn makadamia-handelsplatform MSM, is die wêreldwye ekonomiese onsekerhede en die veranderende verbruikersvoorkeure besig om nuwe neigings in die bedryf teweeg te bring – met kleiner ongedopte neute wat nou, veral uit China, in aanvraag is. Een van die grootste onsekerhede is die verwagte uitvoertariewe na Amerika, wat na verwagting op 8 Julie in werking gaan tree. “Soos in pres. Donald Trump se vorige termyn het kopers in Amerika vroeër vanjaar hul voorraad in afwagting op die tariewe aangevul.” Dié sogenoemde voorsieningsoptrede het gelei tot ’n toename in makadamia-invoer na Amerika van $18 miljoen (byna R329 miljoen) in Januarie en Februarie, wat…

Die vleisbeesbedryf het die afgelope weke begin kop optel, met klas A-beesvleispryse wat redelik verstewig het vanaf R55/kg tot R65/kg oor die langnaweke in April. Terselfdertyd het speenkalfpryse ook verbeter van R30-R32/kg tot R37-R39/kg. Goeie laatsomerreën oor die grootste deel van die somerreëngebied het weiding drasties verbeter. Ongelukkig bly die ekonomie onder druk en verbruikers se besteebare inkomste groei min. Die vraag is: Wat het verander? Die bonormale reënval in die nasomer in die grootste deel van die beesweidingstreke het tot gevolg gehad dat daar meer weiding is om deur die winter te gaan en noodslagsyfers het verminder. Die slagsyfers wat aangemeld word, het ’n sloertyd en wys nog nie wat in April gebeur het nie. In 2024 is 2,814 miljoen beeste geslag en in 2023 2,649 miljoen. Daar was…

NAVORSING deur wetenskaplikes van die Universiteit van Fort Hare toon dat Nguni’s beter vaar in kommunale boerderystelsels, terwyl Bonsmaras die botoon voer in kommersiële stelsels. Dr. Mhlangabezi Slayi, ’n navorser, en dr. Ishmael Festus Jaja, ’n veearts, wat albei aan die Universiteit van Fort Hare verbonde is, het 80 Nguni- en Bonsmarabeeste oor 12 maande gemonitor om te bepaal hoe hulle wei, voer kies en watter interaksie hulle met die omgewing het. Hulle het die diere se gedrag regstreeks waargeneem, hul bewegingspatrone met GPS gevolg, die diere geweeg en voergehalte oor verskillende seisoene bepaal. Al dié faktore is belangrik vir die produktiwiteit van vee en om die volhoubaarheid van weiveld-ekostelsels te verseker. Die navorsing is in die Oos-Kaap gedoen, op tradisionele kommunale weiding by Alice en by die Bathurst-navorsingstasie wat…

Inligting Distrik: Kenhardt, Noord-Kaap Naam: Nooitgedacht Vertakkings: Dorper-skape Grond: Leiklip, veen, klei en sand Gemiddelde reënval: 170 mm per jaar KORTOM ■ Niks op Charl Saunderson se plaas by Kenhardt word afgejaag nie, en alles wentel daarom om droogtes beter te kan deurstaan. ■ Op Nooitgedacht is veldverbetering ’n 100-jaarwedloop, en oor vyf dekades het dit met 30% verbeter. ■ Grondgesondheid, streng seleksie vir skape wat die beste in hul omgewing presteer, goeie infrastruktuur en roofdierbekamping is die vier sleutelbeginsels wat Charl se bestuur rig. Die plaas Nooitgedacht by Kenhardt is ’n lushof van weiding nadat sowat 170 mm reën vanjaar daar aangeteken is. Reën was egter nie die enigste wenbestanddeel vir die welige veldgroei nie. Charl Saunderson, die vierde geslag met dié naam op Nooitgedacht, sê dat hy sedert…

Toe Lou Potgieter in 1977 op die plaas Sunnyside buite Petrus Steyn in die Vrystaat begin boer het, het hy koring en sonneblomme geplant en ’n melkery bedryf. Pannar Saad se basters was nie deel van sy pakket nie. Inteendeel, hy het nie groot belangstelling getoon in die pogings van Pannar se verteenwoordigers om hom te oortuig om hul saad ’n kans te gee nie. Dit was eers toe sy seun Chris plaas toe gekom het om heeltyds by die familieboerdery aan te sluit, dat hy sy pa oortuig het om Pannar te probeer. “My pa het voorheen hier en daar ’n sakkie van Pannar se saad gekoop, maar toe ek sojabone wou plant, het ek by ander boere in die omgewing gehoor hoe goed Pannar vaar. Ons plant altyd…

DIE nuwe wet, wat pres. Cyril Ramaphosa vroeër vanjaar onderteken het en tans in die hof uitgedaag word, het vir ’n lewendige paneelgesprek op Nampo 2025 by Bothaville gesorg. Macpherson het in die Nasie in Gesprek-reeks gesê sy party stem nie met die huidige wet, wat onder meer die konsep van nulvergoeding in sekere omstandighede insluit, saam nie, maar “as die wet heeltemal geskrap word en ons gaan terug na 1975, weet ek nie wat daarna gaan kom nie. Wat daarna kan kom, kan blootgestel wees aan ’n parlement met ’n baie ander dinamiek, en partye wat ander dinamiek kan hê.” Macpherson het gesê sy departement probeer oplossings vind vir probleme in die wet, soos bepalings oor nulvergoeding en onduidelike definisies of interpretasies in onder meer afdelings 8 en 19.…

MET die gemiddelde klas A2-beeskarkasprys wat lank sowat R54 per kilogram gebly het, was dit ’n welkome verligting vir die bedryf toe die pryse gedurende April tot R67 per kilogram gaan draai het. Die prys was ongeveer 21% hoër as die ooreenstemmende tyd verlede jaar. Hoewel speenkalfpryse nie ewe drasties gestyg het nie, was daar tog ’n oplewing, sê Maré. In vergelyking met verlede jaar se pryse is die speenkalfprys tans sowat 16% hoër en pryse van meer as R37 per kilogram word op die mark waargeneem. Hy skryf die styging in pryse toe aan ’n karkastekort wat om verskeie redes ontstaan het. Eerstens was daar ’n tekort aan diere om te slag nadat meer diere in 2024 geslag is as in die voorafgaande ses tot sewe jaar. ’n Skielike…

STYGENDE energiekoste en die slakkepas waarmee die plaaslike energiemark vryer gemaak word, maak beleggings in hernubare krag ’n voor die hand liggende sakestrategie. Moontlike veranderinge in invoertariewe om as deel van die meesterplan vir hernubare energie plaaslike vervaardiging van sonpanele en verwante komponente te stimuleer, het egter ernstige implikasies vir enige boer of besigheid wat groter energie-onafhanklikheid nastreef. Die voorstel om die rabat af te skaf met die doel om plaaslike vervaardiging van sonpanele aan te moedig, is in April in die Staatskoerant afgekondig. Volgens Anja Visagie, hoof van projekontwerp by Sustainable Power Solutions (SPS), trek slegs sonpanele tans voordeel uit tariefverligting in die vorm van kwytskelding van die 10%-invoertarief wat sedert verlede jaar geld. Omsetters en batterye is nog onderhewig aan invoertariewe. Suid-Afrika het volgens XA Global Trade Advisors…

Die baanbrekerstelsel vir waarneming en opsporing van die trust vir bedreigde natuurlewe (EWT) het 169 aasvoëls in die Krugerwildtuin van vergiftiging gered. Meer as 120 aasvoëls het egter reeds voor die ingryping gevrek. EWT sê dit is die grootste voorval in sy soort wat tot dusver in Suider-Afrika voorgekom het. Die alarmstelsel het op 6 Mei omstreeks 06:05 afgegaan nadat verdagte aktiwiteite in die afgeleë Mahlangeni-gebied van die wildtuin bespeur is. ’n Gesamentlike span van Sanparke en EWT het die toneel om 08:20 bereik, waar hulle afgekom het op honderde aasvoëls wat aan ’n olifantkarkas gevreet het. Stropers het dié karkas vermoedelik met ’n uiters toksiese plaagdoder vergiftig. Met die spanne se aankoms is 116 dooie aasvoëls aangetref. Uiteindelik het 123 aasvoëls op die toneel gevrek. Die meeste van die…

Die ontleding van grondhervorming sedert die demokratiese oorgang in 1994 toon dat 19 533 971 ha kommersiële landbougrond getransformeer is. Dit is 84% van die regeringsdoelwit van 30% (oftewel 23 248 703 ha) van die grond van wit kommersiële boere. Sien ook die artikel “Onteieningsdebat kyk vordering mis” (Landbouweekblad, 20 Maart 2025). Hierdie prestasie is saamgestel uit 2,9 miljoen ha of 14,9% (grond deur die staat aangekoop vir die landbou en ander doeleindes); 3,1 miljoen ha (16,1% grond as restitusie deur finansiële vergoeding van grondeise); restitusie van landbougrond aan mense van kleur (4,5 miljoen ha of 23% van die totaal); 2,4 miljoen ha (of 19,5%) kommersiële landbougrond deur individue van kleur sonder staatshulp aangekoop. Verder is 33,8% (6,6 miljoen ha) landbougrond deur Suid-Afrikaners van kleur aangekoop met staatshulp (LRAD, oftewel…

Inligting Ligging: Dundee, KwaZulu-Natal KORTOM ■ Volgens dieregesondheidskenners is streng biosekerheidsmaatreëls op ’n plaas die beste raad om diere teen siektes soos beken-klouseer te beskerm. ■ Veeboere moet hulself en hul werkers opvoed oor die noodsaaklikheid om sulke maatreëls in te stel en toe te pas. ■ Dit is raadsaam om sogenoemde vuil areas, wat ’n hoër risiko vir siektes inhou, en skoon areas met ’n laer risiko op ’n veeplaas te vestig. ■ Werkers moet verskillende stelle klere en toerusting vir die onderskeie areas hê om potensiële kruisoordrag van siektes te voorkom. Anders as die dodelike bek-en-klouseerstamme in dele van Europa is die stamme van dié siekte wat in Suid-Afrika voorkom, selde dodelik vir die vee wat besmet raak. Besmettings kan egter steeds erge pyn en nood veroorsaak. Die…

Inligting Ligging: Hartswater, Noord-Kaap KORTOM ■ Grondboonkultivars reageer verskillend op bestuurspraktyke soos vogbestuur, aalwurmbekamping en onkruiddodertoedienings, en klimaatsfaktore. ■ Die jongste proewe toon wat die nadelige uitwerking van onkruiddoders op grondbone kan wees. ■ Boere kan nou hul risiko’s verminder deur ag te slaan op hierdie resultate. Onkruiddoders speel ’n belangrike rol in gewasverbouing en dit is feitlik ondenkbaar om daarsonder te kan boer, want onkruide wedywer vir dieselfde sonlig, grondvog en plantvoedingstowwe as die gewas waaruit die boer sy bestaan maak. Wet 36 van 1947 vereis dat onkruiddoders streng volgens die etiketvoorskrifte op die verpakking toegedien moet word. Die verkoopsagent se aanbevelings is aan dieselfde wetgewing onderhewig. Onkruiddoders word egter nie slegs deur die onkruide opgeneem nie, maar ook deur die gewasse, en dit moet uiteraard in ’n wisselende…

Op die dorpie Ugie, te midde van ’n golwende, groen landskap met die skouspelagtige berge van Lesotho in die verte en eindelose mielie- en sojaboonlande, is die plek waar oom Bob Kaschula van 1962 af ou trekkers gerestoureer het. Dit was die jaar toe hy ’n nuwe trekker wou koop en die handelaar hom byna niks vir sy ou trekker wou aanbied nie. Net daar het hy besluit: “Basta daarmee, dan restoureer ek sommer self my ou trekker!” En só is ’n lewenslange passie gekweek by oom Bob, wat in 2008 oorlede is. Hy was die oupa van Dwayne Kaschula, verlede jaar se nasionale Jongboer van die Jaar. Vandag staan daar amper 90 gerestoureerde trekkers in die skuur van die Bob Kaschula-trekkermuseum in Presidentstraat op Ugie, terwyl daar buite nog…

Bad lekker warm in jou agterplaas Die winter is hier en Plaasdam, ’n vervaardiger van sinkdamme wat mooi genoeg is vir ’n stadstuin, weet jy wil eerder in warm water week as om in die koue te bibber. Daarom bied hy ’n snoesige nuwe produk vir jou agterplaas, die Fire Donkey-warmwaterbad. “Dit is nie sommer enige warmwaterbad nie. Dit is ’n houtvuurverhitte, omgewingsvriendelike, warm weekmasjien wat jou laat ontspan, selfs wanneer die temperatuur daal of as daar geen elektrisiteit beskikbaar is nie,” sê Shay Jooste van Plaasdam-produkte. Die stelsel bestaan uit ’n sinkbad wat met ’n beskermende poeierlaag binne afgewerk is, ’n houtvuurbrander van vlekvrye staal, ’n bak wat die as opvang en koppelstukke vir maklike montering. Die bad word in drie groottes as ’n selfdoenstelsel aangebied. Die grootste een…

Ongunstige weerstoestande knou sojaboonuitvoer ONDANKS ’n drastiese daling in die produksie van sojabone in die 2024-’25-bemarkingsjaar kon Suid-Afrika steeds sowat 334 552 ton sojabone en -produkte na buurlande soos Zimbabwe en Mosambiek uitvoer. Die Suid-Afrikaanse graanen-oliesadehandelsvereniging (Sacota) sê in sy nuusbrief die produksie was in 2024-’25 weens slegte weersomstandighede sowat 930 000 ton (34%) laer as in die vorige bemarkingsjaar en het op 1,84 miljoen ton te staan gekom. Die eindvoorraad van slegs 141 000 ton was ook aansienlik minder as die 320 000 ton wat in die vorige bemarkingsjaar oorgedra is. Ondanks die beperkte voorraad is 150 238 ton sojabone uitgevoer, waarvan 105 950 ton na Zimbabwe gegaan het. Die uitvoer het ook ’n skeepsvrag sojabone van die vorige bemarkingsjaar ingesluit, wat aan die begin van die 2024-’25-bemarkingsjaar na…

WENBRIEF Die plaas se hartklop Boerdery is nie net ’n werk nie. Dit is ’n roeping – ’n manier van lewe wat die bloed dikker, die siel sterker en die hart sagter maak. Dit is om elke dag op te staan met hoop, al is die hemel blou en sonder ’n wolkie, en om elke aand te gaan slaap met geloof, al is die damme leeg en die pryse laag. Ons boer nie net om geld te maak nie. Ons boer omdat daar iets in ons is — iets ouer as ons self — wat ons aanspoor om aan te hou. Iets wat die eerste keer gekom het toe ons oupas met beeste oor die vlaktes getrek het en toe hulle in geloof ’n ploeg deur klipharde grond gesleep het.…

TOE die bande op hul plase aankom, deels danksy druk wat Landbouweekblad en Graan SA uitgeoefen het, het Pieter van Zyl en ’n medeboer g’n tyd verspil nie. Hulle het dadelik hul stropers se konvensionele aandryfwiele met die ingevoerde Soucy-rusperbande vervang sodat hulle kon terugkeer na die modderige landerye om uiteindelik hul sojabone, wat lankal oesgereed is, te stroop. Landbouweekblad se webwerf Landbou.com het vroeër in Mei berig oor die vertragings wat Van Zyl, wat in die Vrede-distrik boer, en ’n medeboer van die Bethlehem-distrik ondervind omdat die Suid-Afrikaanse Inkomstediens (SAID) se doeanekantoor drie pare broodnodige rusperbande om ’n onverklaarbaar rede op die lughawe terughou. “Dit was ’n nagmerrie en baie frustrerend om by die SAID te probeer vasstel hoekom die stelle bande nie vrygestel word nie en hoekom ’n…

IN ’n skrywe aan Lebogang Matlala van dié departement beskryf Fritz Bekker, uitvoerende direkteur van Gariep Watch, hierdie stap as ’n eensydige opoffering van die Noord-Kaap se enigste grootskaalse watervoorsieningsbron om vir Gauteng se wanbestuur van sy waterbronne te vergoed. Volgens Bekker sal die voorgestelde afgradering ernstige gevolge hê vir besproeiing, ekologiese volhoubaarheid en die lewensbestaan van alle gemeenskappe wat van die Oranjerivier afhanklik is. Hy beklemtoon dat Gauteng bykans 50% van sy water vermors weens swak munisipale bestuur en dat pogings om hierdie verliese die hoof te bied, waaronder waterbewaring, die herwinning van suur mynwater en die bekamping van onwettige watergebruik, grotendeels onsuksesvol is. “Ons beswaar berus op die beginsel dat waterverbruik in Gauteng eers geoptimaliseer moet word voordat ’n voorsieningsverlies in die Noord-Kaap toegestaan word,” skryf hy. Bekker…

“EK is baie verlig.” Dít was die eerste woorde van Anthony Dicey, voorsitter van die Ashton Vrugteprodusente-koöperatief en ’n inmaakvrugteboer van Wolseley, toe Landbouweekblad hom oor die nuus rakende die verkoop van LAF vra. “Dit het vyf lang jare gekos om hier te kom,” het hy gesê oor die ooreenkoms ingevolge waarvan Tiger Brands LAF vir R1 as ’n lopende saak sal verkoop. As deel van die transaksie sal Tiger Brands R150 miljoen bewillig aan ’n gemeenskapstrust, wat ’n 10%-aandeelhouding in die nuwe eienaarskapstruktuur sal hê. Die koöperatief, ’n konsortium van sowat 140 inmaakvrugteboere van Robertson, Ceres, die Breederiviervallei en die Klein-Karoo, sal saam met ’n Noorweegse beleggingsfonds vir ontwikkelende lande die grootste aandeelhouers in LAF wees. Hulle moes etlike miljoene rande se bedryfskapitaal bymekaarskraap. Hoewel die Mededingingskommissie nog die…

VOORTDURENDE vernuwing wat binne die landbousektor plaasvind, sowel as die groeiende vraag na vakmanne en tegnici is die dryfveer agter die totstandkoming van Nampo-Tech, ’n geakkrediteerde opleidingsakademie vir die landbousektor. Dr. Dirk Strydom, besturende direkteur van Nampo, het in ’n Nasie in Gesprek-sessie op die Nampo-oesdag gesê Graan SA het tydens Nampo onder meer met belanghebbendes in die bedryf gesels oor hul moontlike betrokkenheid by Nampo-Tech, asook oor die tegniese en vakmanvaardighede wat die landbousektor nodig het. “Nampo-Tech sal ’n bedryfsgeïntegreerde opleidingsakademie wees wat die landbousektor sal ondersteun deur studente toe te rus met die tegniese en beroepsvaardighede wat nodig is om in die vinnig ontwikkelende wêreld van graanproduksie en die gepaardgaande waardekettings te floreer,” lui ’n inligtingsdokument. “Die akademie sal daarop konsentreer om die winsgewendheid, mededingendheid en volhoubaarheid van…

BOERE wat gereeld in die veld loop, weet hoe miere, termiete en erdvarke se aktiwiteite die omgewing kan verander. Nou is navorsing gepubliseer wat toon daar is 603 dier-, visen insekspesies, asook -genusse of -families, wat soos ware argitekte en ingenieurs die aarde se oppervlak op verskillende maniere transformeer. Diere, insekte en visse se skeppings en bousels sluit in “reuse-termiethope wat uit die ruimte sigbaar is . . . die dreineringstelsels wat seekoeie grawe, die vleilande wat bewers skep, en die manier waarop salms rivierbeddings verander”. Luidens navorsing deur wetenskaplikes van Britse en Amerikaanse universiteite wat in Proceedings of the National Academy of Sciences gepubliseer is, is die energie wat die diere se aksies tot die vorming van die aarde se oppervlak bydra, vergelykbaar met honderde duisende groot vloede. Die…

Inligting Distrik: Middelburg, Mpumalanga Naam: C&J Boerdery Eienaarskap: Vennootskap Vertakkings: Sojabone, mielies, skape en beeste Grondtipe: Hutton, Avalon, Clovelly en Mispa (14-22% klei) Veldtipe: Suurveld Gemiddelde reënval: 680 mm, maar vanjaar meer as 1 000 mm KORTOM ■ Die Opperman-broers moes 30-40 ha sojabone met die hand oes omdat die landerye só nat is dat ’n stroper nie daar kan inkom nie. ■ Die sojabone is met ’n lemsnyer en bossiekappers afgesny en op ’n seil agteraan ’n trekker uitgesleep tot waar dit gedors kon word. ■ Die oeskoste was effens hoër as met die Case-stroper, maar daardie deel se oes sou verlore gegaan het as dit nie vir dié vindingryke boereplan was nie. Droog of nat, ’n boer maak ’n plan as die nood druk. Die somer van 2024-’25…

Die Puma-reeks het drie nuwe modelle om in verskillende boerderybehoeftes te voorsien, naamlik die Puma 185, die Puma 200 en die Puma 220, wat na hul kraggradering in perdekrag verwys. Met Case IH se beproefde kragstuurtegnologie, wat gedurende hidrouliese kragaftakker- of vervoertoepassings in werking tree, is die maksimum beskikbare kraglewering onderskeidelik 165 kW, 180 kW en net onder 191 kW. Dit beteken meer krag met minder insette en moeite. “Dit is alles te danke aan die ontwerp van die komponente binne die onderneming en hul versoenbaarheid met die trekker se sessilinder-FPT-enjin van 6,7 liter,” sê André Olwagen, hoof van taktiese bemarking. ’n Kragtige enjin benodig ’n ewe sterk transmissiestelsel om die opgewekte krag in werkverrigting om te skakel. Na gelang van die boer se behoeftes kan die Puma met óf…

KORTOM ■ Navorsing op die Langgewens-navorsingsplaas toon dat ’n stelsel van wisselbewerking, waarin een jaar van ’n vlakbeitelploegbewerking deur drie jaar van geenbewerking opgevolg word, die gebruik van onkruiddoder kan verminder. ■ Dieselfde proef het bewys dat die toediening van biostimulante die gebruik van plaagdoders kan verminder. Dit is moontlik om die hoeveelheid sintetiese landbouchemiese middels wat in koring- en kanolaverbouing toegedien word, te verminder sonder om die opbrengs en gehalte van die oeste te benadeel. Onlangse navorsing op die Langgewens-navorsingsplaas van die Wes-Kaapse departement van landbou by Moorreesburg toon ook dat minder onkruiddoders gebruik kan word deur gereelde nie-intensiewe bewerking in ’n geenbewerkingstelsel in te stel, terwyl ander sintetiese landbouchemiese middels, soos insek- en swamdoders, verminder kan word deur dit met biostimulante te vervang. Die potensiaal van wisselbewerking en…

Wanneer die wêreld se derde grootste swaardienstoerustingmaatskappy ’n toetrede tot ’n mark maak, kan jy maar weet dit gaan ’n opskudding veroorsaak. En dit is presies wat SANY met sy BHL95 op Landbouweekblad se TLB vir ’n boer-dag reggekry het. Hy het gewys waarom hy as die grootste vervaardiger van grondverskuiwingstoerusting in China besig is om groot opgang elders ter wêreld te maak. Veeldoelige werktuig “Die SANY BHL95 TLB is ’n duursame, gebruikersvriendelike werktuig wat vir maksimum doeltreffendheid met laai- of graafwerk ontwerp is,” sê Hennie Louw, bemarkingsbestuurder van SANY in Suid-Afrika. Hoewel SANY reeds van 1989 af werktuie vir grondverskuiwing, die mynbedryf en hawens, asook olieboortoerusting vervaardig, is die maatskappy ’n betreklike nuweling op die Suid-Afrikaanse mark. Die BHL95 is sy jongste toevoeging. “Ons is redelik nuut op die…

Gevolglik het dié wynlandgoed drie jaar gelede begin om sy infrastruktuur vir hierdie doel te ontwikkel en te verander. La Motte het ’n ryk geskiedenis wat van 1695 dateer toe ’n stuk grond in die vallei aan Hans Hendrik Hattingh, ’n Duitse immigrant, toegeken is. Pierre Joubert het La Motte in 1709 gekoop en die grond se eerste Franse Hugenote-eienaar geword. Die naam La Motte het sy oorsprong van ’n dorpie in Provence in Frankryk, naamlik La Motte d’Aigues. Wingerd is die eerste keer in 1752 op La Motte gevestig toe Gabriël du Toit, ’n afstammeling van die Franse Hugenote, 4 000 wingerdstokke aangeplant het. Die hoofplaashuis, wat vandag nog in gebruik is, dateer van 1751. Die sakeman dr. Anton Rupert het die plaas in 1970 gekoop. Hannelie Rupert-Koegelenberg, sy…