Indice dei contenuti per Sarie Woon/Décor 2024 in SARIE

Twintig jaar en meer pendel ek tussen Johannesburg en Kaapstad, die een stad so anders as die ander. Die Goudstad vul my met energie, inspireer my, maar in die Kaap kom ek tot ruste. Is dit die oseaan se veraf gedreun, die geur van die proteas in my pot? Of dalk, die swier van die stad se strate en geboue. Tafelberg wat ’n ogie hou oor oud en nuut. Sê kan ek nie. Maar dít weet ek, hier in die mooie Kaap onthou ek wié ek is MICHÉLLE VAN BREDA, SARIE-REDAKTEUR Stylvol soos die leser, en immer ’n viering van die land en van Kaapstad, SARIE se plek van oorsprong. Toe ons as bloedjong vroue in Kaapstad begin werk het, was dit asof ’n nuwe wêreld oopgeblom het. Skielik het…

Het jy ook al verskeie kere verby ’n huis in jou buurt gery wat jou hartsnare roer en jy bly wonder: “Wie woon hier?” Dis presies wat interieurontwerper Charlotte Collins (@charlottecollinsdesignstudio) gedink het elke keer as sy verby dié ou huis ry. Haar hande het gejeuk om hier in te spring. Sy kon uiteindelik die eienaar oortuig om die erg verwaarloosde huis aan haar te verkoop. Pluspunte was dat die huis ’n fantastiese ligging het, met ’n uitsig van 360 grade op ikoniese bakens soos Tafelberg, Leeukop, Vlaeberg en die hawe. Dis ook een van die oudste huise in Kaapstad en geleë oorkant Leeuwenhof, nou die Wes-Kaapse premierswoning. Ongelukkig was die binnekant van die huis in ’n haglike toestand. Die swembad-huisie op die erf moes eers baie vinnig gerestoureer word…

In Vredenburgstraat in Kaapstad staan ’n vrolike blok woonstelle, heel gepas Uxolo gedoop, wat vrede of welwillendheid in Xhosa beteken. Dalk is die eerste gedagte nie vrede as jy die woonstelblok sien nie, die ontwerp lyk eerder na ’n kleurvolle tapisserie. Die interessante plek is ontwerp deur die argitek Theo Kruger en sy vennoot, André Krige, van Two Five Five Architects. Die buitekant van die gebou is ingeklee met vier verskillende materiale: twee teenstellende kleure siersteen met glasbakstene tussenin en afgerond met pienk vlekvryestaal-Juliet-balkonne. Kleur en patroon en sorgsame beplanning vloei eweneens na die binnekant van die gebou. Daar is ’n concierge-toonbank, toesluitplek vir fietse en ’n koffiewinkel. Ook hier is gebruik gemaak van interessante kleure soos vlootblou, rooi en seegroen. In die eenhede wat wissel in groottes van 24…

Sowat tien jaar gelede gaan kuier Justin en Angela Gomes by vriende op hul plaas vir ’n salige middag onder die koeltebome. En dis net hier waar hulle besef het wat hulle eintlik uit die lewe wil hê: Hulle wil nader aan die natuur leef. Justin, eienaar van ’n suksesvolle advertensie-agentskap, is een van daardie mense wat sorg dat drome waar word. Hy en Angela het dadelik begin beplan aan ’n selfonderhoudende lewe op ’n mooi lappie grond iewers, maar dit moes naby skole wees vir hul drie kinders. Die soeke het hulle gelei na ’n eiendom in Noordhoek. Die huis was ’n tipiese siersteenhuis uit die tagtigerjare, daar was stalle en die stuk grond was vol perdekampies. Die egpaar wou so gou moontlik ’n kostuin vestig en aangesien die…

Dit is ’n seldsame vonds om op ’n Arts and Crafts-plek af te kom in die gesogte Groenpunt, ’n buurt naby die middestad van Kaapstad. Die huis het die beste van twee wêrelde: die oseaan ’n klipgooi ver met die mooie stad ’n kilometer of twee weg. Maar so maklik was dit ook nie. Nina van Reenen en Sascha Berolsky het dringend na ’n huis gesoek met hul gesin wat vinnig aan die uitbrei was. Heel toevallig was hierdie verwaarloosde huis met sy oorgroeide tuin te koop in hul buurt. Hulle het ’n aanbod gemaak en die koop is beklink. Gelukkig het die twee leeuemoed en kreatiewe visie. Sascha se Royale Eatery en Junior is gewilde restaurante in die middestad en hy is goed vertroud met die herontwerp van en…

BLOCK & CHISEL 011 442 0809, 010 593 9308, 021 712 5193, blockandchisel.co.za BLUM 087 352 4232, 011 444 8118, 021 555 2282, 031 579 2620, 041 581 0219, blum.com CAESARSTONE 083 608 5810, 011 822 1350 (hoofkantoor), caesarstone.co.za CIELO 086 110 7108, cielo.co.za EASYLIFE KITCHENS 0861 327 9543, easylifekitchens.co.za EUROLUX 021 528 8400, 011 608 2970, eurolux.co.za INCANDA FURNITURE 021 863 1965, incanda.co.za JEEVES HEATED TOWEL RAILS 0861 JEEVES (533 837), jeeves.co.za K. LIGHT 021 552 4370, klight.co.za LEROY MERLIN 010 493 8000, leroymerlin.co.za RADIANT LIGHTING 011 386 0000, 021 521 2500, radiant.co.za ROOM SERVICE HOMEWARE 060 537 5086, 021 933 9866, roomservicehomeware.co.za SLOOM 087 073 6676, sloom.co.za STILES 044 871 3222, stiles.co.za WOODOC 0800 411 200, woodoc.com…

Dit is sekerlik geen verrassing nie dat jy hopeloos verlief sou raak op hierdie besonderse eiendom wat tussen berg en see lê. Dat die plek dringend restourasie en vernuwing nodig gehad het, het nie die eienaars afgeskrik toe hulle die huis in 2009 op die ingewing van die oomblik gekoop het nie. Wat hul hart gesteel het, was die wonderlike see-uitsig en die panoramiese uitsig op die berg. Nadat hulle vir vier jaar in die ongerestoureerde huis gewoon het, was hulle reg om met die bouproses te begin. Hulle wou die oorspronklike voetspoor van die huis behou sodat die natuur nie verder versteur word nie. Die twee wou nog altyd hul eie huis ontwerp en met die hulp van bouer Arnold Meiring van Arnold Meiring Builders and Renovators is die…

Toe die huidige eienaar die huis vir die eerste keer gesien het, was hy louwarm oor die vaal 1960’s-styl huis met min natuurlike lig en ’n swak beplande uitleg. Maar wel versot op die see-uitsig en die omringende landskap met sy reusagtige rotse en interessante plantegroei. Aanvanklik het hy gedink om die huis te sloop en van voor af te begin, maar om praktiese en ekonomiese redes was dit nie ’n opsie nie. Gaandeweg het hy meer gemaklik geraak met die koddige sjarme en siel van die huis en besluit om te werk met wat hy het. Die hulp van die Kaapse argitek Antonio Zaninovic en Tara Bean, sy vriendin van kindsbeen af en ’n internasionale binneontwerper, is ingeroep. Saam het hulle planne beraam om die vloei te verbeter en…

Met die instap by die besonderse huis van die egpaar Philip en Nicky Tyers, kan jy maklik dink jy is in ’n kunsgalery. Reeds op die gewelfde voorstoep wag indrukwekkende kuns jou in. Dit word gereeld vervang en geroteer met werke uit Philip se ontwerpateljee en galery, Villa Africa. As jy oor die drumpel tree, het die hedendaagse skilderye en ander kunswerke ’n formidabele teenwoordigheid. Tog is daar oral in die huis ook tradisionele en erfenis-elemente, gepas vir ’n huis wat in 1939 as ’n skool gebou is en ’n voorbeeld van die destydse Kaapse volksargitektuur is. Die dubbelvolume-voorportaal word geanker deur ’n Kaaps-Hollandse ruitjiesvenster en van hier lei ’n trap met ’n reling van Birmaanse rooshout na die slaapkamers op die boonste vloer. Die ruim vertrekke, hoë plafonne, houtvloere…

1 NATALIE BORUVKA Die mede-eienaar van die foto-agentskap Vignette Agency (vignette.agency) het geglo sy is deur en deur ’n Johannesburger totdat sy Kaap toe getrek het agter haar geliefde aan. Gou het Natalie besef dis haar stad dié. As haar lewensmaat gaan branderry in Muizenberg, gaan sy saam en stap die pad tussen die treinspoor en die oseaan na St. James. Vir die grootste en lekkerste palmiers gaan sy na die Olympia Café in Kalkbaai en as sy die dag gelukkig is, speel een van die bakkers die klavier wat in die middel van die bakkery staan. Sy kan nie by enige vintagewinkel verbyloop nie en bring menige Saterdag by die Milnertonse vlooimark deur. 2 MARGUERITE VAN WYK Marguerite, ’n SARIE-joernalis wat in die stad woon, besoek die Labia-filmteater gereeld…