Indice dei contenuti per 12/15/2019 in Rapport

Oudpres. Jacob Zuma wat na bewering so ernstig siek is dat hy vir behandeling na ’n “geheime hospitaal” in Kuba moes reis vir behandeling, is blykbaar weer perdfris. Gesond genoeg om môre die jaarlikse JG Zuma-skaaktoernooi in Durban te open. Dudu Myeni, voormalige SAL-hoof en voorsitter van die Jacob Zumastigting, sê advertensies wat aandui dat Zuma die prysuitdeling gaan behartig, is korrek. Dit kom ná berigte dat Zuma verlede week in Kuba deurbring het vir behandeling, skynbaar vir simptome wat hy oorgehou het van ’n vergiftigingspoging in 2014. Die Sunday World het verlede week hieroor berig. Volgens die koerant se bron vertrou hy nie Suid-Afrikaanse dokters nie. Voormalige staatshoofde kry gratis gesondheidsorg in Suid-Afrika, maar moet self betaal vir oorsese behandeling. Onsekerheid heers oor die korrektheid van dié berigte. “Ek…

’n Vrou wat met ’n RAV4-nuts-voertuig rondgery het wat sy glo by haar man present gekry het, het hom hof toe gevat nadat hy dit glo by haar skoolreünie gaan haal het terwyl sy salig onbewus daarvan was. Hy het vir haar ’n Kia Picanto 1.0 Start-motor in die parkeerterrein gelos om mee te ry, maar Chrisna van der Vyver (28) “stel nie belang” in dié motortjie nie, het sy aan die hooggeregshof in Pretoria gesê. Toe sy besef haar geliefde RAV4 is weg, het sy haar vervreemde man, Ettienne (42), in ’n Whats-App gekonfronteer: “Bring asb my Rav terug waar jy hom gesteel het by die skool.” Ettienne het onder meer geantwoord: “Jou boyfriend kan vir jou (’n) kar koop.” Chrisna is twee dae later, op 18 November, dringend…

’n Advertensie waarin ’n Volkswagen Amarok vir die “manne” geadverteer word en vroue met wilde diere vergelyk word, mag nie weer oor die radio uitgesaai word nie. Die Advertensiebeheerraad (ARB) het bevind dit maak nie saak hóé humoristies of oordrewe die advertensie is nie, dit is onaanvaarbaar. “Maak nie saak hóé humoristies of oordrewe die advertensie is nie.” In die advertensie is ’n man besig om na skoene te soek saam met ’n vrou, vermoedelik sy eggenoot. ’n Stem sê dan: “Dis skemer en jy is in onbekende terrein, omring deur roofdiere op soek na vars prooi. En hulle het dit gevind. 50% afslag op alle skoene. Hulle val aan sonder genade. Soos jy die 12 inkopiesakke op-pas, sittende op ’n bankie langs ander mans, kyk jy toe hoe die…

In die rooibont trui van die destydse Transvaal het die kragtige naellopervleuel Jimmy Kotze vrees by sy opponente afgedwing. Die Simmer Express, soos Kotze bekend gestaan het in sy speeldae in die laat 1940’s en -50’s, was ’n bielie van ’n vleuel. Twee dekades later het Transvaal weer so ’n derduiwel op vleuel gehad. Gert Muller het sy teenstanders gekasty met sy gespierde bene en bolyf wat vir niks geskrik het nie. Beserings en die sportboikot het Muller se internasionale loopbaan egter beperk tot slegs 14 toetse (1969-74), waarin hy vier drieë gedruk het. Drie van daardie vier drieë was teen Nieu-Seeland in 1970, en die All Blacks sal erken dat Muller, met sy fenomenale kombinasie van spoed en krag, een van die dodelikste aanvallers van sy tyd was. Deesdae…

Penny Heyns, Suid-Afrika se tweemalige Olimpiese swemkampioen, is gekant teen ’n algehele verbod op die deelname van Russiese atlete. Dit volg nadat Wada, die Wêreldagentskap teen die Gebruik van Verbode Middels, Maandag in Lausanne die Russe vir vier jaar uit alle internasionale sport geskors het oor die gebruik van verbode middels en die toesmeerdery daarvan. Heyns het in 1996 twee goue medaljes op die Olimpiese Spele in Atlanta in die borsslag verower. ’n Atletiekkomitee onder lei-ding van Beckie Scott van Kanada, wat Wada bygestaan het, het nog voordat die skorsing bekend gemaak is, in ’n verklaring gesê as daar nie minstens ’n algehele verbod op die deelname van Russiese atlete geplaas word nie, sal dit die deur vir verdere oortredings ooplaat. Maar Heyns, wat ook gereeld deur Wada geraadpleeg is,…

Die Sunwolves se Suid-Afrikaanse geur raak weekliks sterker voor volgende jaar se Superreeks. Twee Springbokke, JJ Engelbrecht en Rudy Paige, het die afgelope week ’n ooreenkoms met die Japanse Superspan bereik. Conrad van Vuuren, stut van die Bulle, moet ook sy Japannees opskerp voordat hy hom in Tokio by Paige-hulle aansluit. Die drietal se name sal eersdaags saam met die gewese veelsydige agterspeler van die Haaie, Garth April, s’n op die Sunwolves se betaalstate verskyn. Engelbrecht, Paige en Van Vuuren se kontraktering moet nog amptelik aangekondig word, maar April se naam is vroeër in die voorlopige oefengroep van 15 spelers uitgelees. Die 30-jarige Paige en sy tydgenoot Engelbrecht was die afgelope tyd vir die Franse klubspan Clermont beskikbaar en hulle is vir die duur van die Wêreldbekertoernooi deur Clermont betaal.…

Geelkaart vir paal-kullers Die Pro-14-reeks se rugbybase het maatreëls in plek gekry om ’n herhaling van die paaltruuk van die voormalige Bulstut Pierre Schoeman te keer. Schoeman, wat vir Edinburgh in die Pro14-reeks speel, het in die wedstryd teen Munster die paalkussing opgelig om te probeer keer dat Munster die kussing gebruik om ’n drie aan te teken. ’n Dokument wat aan al 14 spanne in die reeks gestuur is, en wat Rapport gesien het, bepaal dat daar in die toekoms streng opgetree sal word teen enige speler wat dit doen. Die rugbybase het hul kommer oor die voorval uitgespreek. In ’n skrywe waarsku hulle spelers dat ’n oortreder voortaan met ’n geelkaart gestraf sal word. Volgens die skrywe sal die oplig van die paal se sponsbedekking nou ’n oortreding…

Die Suid-Afrikaanse Reserwebank (SARB) se ergste vooruitskatting dat beurtkrag die ekonomie 1,1 persentasiepunte se groei en tot 125 000 werksgeleenthede kan kos, begin nou waar word. Die SARB se jongste vooruitskatting is dat die ekonomie 0,4 persentasiepunte in BBP-groei sal inboet as Eskom se beskikbaarheidsfaktor vir ’n paar maande afneem tot 65%. Dié situasie vererger tot 1,1 persentasiepunte indien die beskikbaarheid van die land se kragstasie-vloot afneem tot 60%. Eskom kon teen verlede week net 63% van sy geïnstalleerde vermoë lewer. Die afgelope week, wat ’n historiese laagtepunt van fase 6-beurtkrag ingesluit het, se beskikbaarheidsfaktor is nog nie bekend nie, maar was na verwagting veel laer as 63%. Eskom se regrukplan bepaal die kragverskaffer moes nou reeds bo 70% draai. Maarten Ackerman, hoofekonoom van Citadel, sê toe die SARB dié…

Suid-Afrikaanse banke het in die afgelope week ’n ooreenkoms met die Finansiële Intelligensiesentrum (FIS) gesluit om geldwassers met hul eie hulpbronne en geld uit te snuffel. Die FIS het ingevolge wetgewing reeds die mandaat om ’n onafhanklike eenheid te wees waarby rolspelers soos banke oor sekere transaksies verslag doen sodat die FIS patrone en finansiële misdade kan identifiseer. Maar nou is die Suid-Afrikaanse geïntegreerde taakspan teen geldwassery (Samlit) saamgestel om die opsporing van finansiële misdaad te verbeter. Die banke gee die versekering dat hulle nie die perke sal oorskry om onpartydig transaksies aan te meld én skeidsregter oor hul kliënte te wees nie. Die banke onderneem spesifiek dat hulle nie op hul kliënte sal spioeneer of onnodige bankbesonderhede sal deel nie. Die FIS erken ruiterlik dat die regering nie in…

Louise Basson, ’n honde-afrigter van Kaapstad en skrywer van Shaping Your Dog: The Positive Way (Strategic Book Publishing, 2012) en Winter Dogs: Living with Huskies as Pet Dogs (Strategic Book Publishing, 2010) gee dié wenke om jou hond veilig en gemaklik by jul bestemming te kry: ■ Voordat jy ’n rit van 12 uur lank van Johannesburg na Kaapstad aanpak, moet jy eers jou honde gewoond maak aan motorritte. Neem hulle gereeld op uitstappies, soos na die park toe, sodat hulle leer ’n kar is nie net iets wat hulle altyd veearts toe vat nie. ■ Oor die algemeen moet julle minstens elke twee uur stilhou om bene te rek en sodat jou hond kan water drink. ■ Hou die lugverkoeler die heelpad aan of hou die vensters oop –…

Jumanji: The Next Level met Dwayne Johnson en Jack Black. Regisseur: Jake Kasdan As die regisseur van hierdie hoogskop-vervolg se naam bekend klink, hy het ook die vorige treffer, Jumanji: Welcome to the Jungle, gemaak, dus ken hy die resep. En ’n resep is waaroor dit hier gaan: Resepmatigheid wat met ’n gereelde klokslag herhaal word, amper soos daardie koekoekvoëltjie wat elke uur uitspring. Maar Kasdan is ook die seun van Lawrence Kasdan, wat onder meer die draaiboek van Raiders of the Lost Ark help skryf het, en dit lyk of die talent deur die familie loop. Die Kasdans ken ’n suksesresep as hulle dit sien en ry dit voos! As die storie vir jou saak maak: ’n Klomp vriende vind dat hul beste pel verdwyn het. Hulle raak deel…

Ek het onlangs die eerste keer tuisgemaakte gradvalax geëet en ek moet sê dié Nordiese salmgereg het my kossiel oorrompel. Ek is verlief op dié luukse visgereg en ek gaan dit vir skoonma Marie maak om haar te beïndruk. En dit vat baie, hoor! Wat is gradvalax? Om dit in plein en propperse Afrikaans te stel: Gradvalax is vars salm wat met sout en suiker ryp gemaak (cured) is. Jy verweef die sout-en-suikermengsel met vars geurmiddels soos byvoorbeeld dille, lemoen, suurlemoen of beet en ná ’n paar uur en min moeite het jy ’n salmgereg wat die gaste om jou tafel se kosharte gaan laat bokspring van die lekkerte. Die soutmengsel trek van die vog uit die vis en die salm word wasagtig sodat jy dit maklik in papierdun skyfies…

Nes Grace Kelly! Die matriekeksamen is al verby en die matriekafskeidaand al amper vergete. Ons plaas nou die laaste paar foto’s, wat matrieks of hul trotse familie en vriende aan ons gestuur het, om te wys hoe beeldskoon almal gelyk het. ‘ ’n Styl wat by ons pas’ Die matriekeksamen is al verby en die matriekafskeidaande amper vergete. Ons plaas nou die laaste paar foto’s wat matrieks of hul trotse families en vriende aan ons gestuur het om te wys hoe beeldskoon almal gelyk het. Kontak ons gerus: Beleef-redakteur: Alet Wichmann – alet@media24.com; kosblad: Anél Potgieter – anelpot@gmail.com; flieks: Leon van Nierop – marno@artslink.co.za; motors: Egmont Sippel – esippel@mweb.co.za.…

■ Miemie Smal, voorheen skoolhoof van die Hoër Meisieskool Paarl, is in die ouderdom van 94 oorlede. Sy was tussen 1970 en 1984 skoolhoof. Die huidige skoolhoof, Mariana van Zyl, sê sy was ’n leier met visie wat vele projekte geïnisieer het. “Ons eer haar nagedagtenis.” Voor haar amp by die HMS Paarl het sy wiskunde en biologie aan die Hoërskool Jan van Riebeeck gegee. Vele oudleerlinge onthou haar perfeksionisme, verfyndheid en ruim algemene kennis. ■ Die sangeres Marie Fredriksson van die Sweedse popgroep Roxette is op 61-jarige leeftyd oorlede aan breinkanker nadat sy die afgelope 17 jaar in remissie was. Fredriksson was ook ’n talentvolle liedjieskrywer, pianis en skilder. In 1987 het dié popgroep internasionale roem verwerf met die liedjie “It Must Have Been Love”, wat ook later die…

Dis kwart voor twaalf by Eskom. Eskom, die regering en die land het nog tyd om die waarheid oor die probleme in die oë te kyk oor wat verkeerd is, maar daardie tyd loop vinnig uit. Die waarheid oor Eskom is polities heeltemal inkorrek: dat blindelingse transformasie die eens trotse elektrisiteitsreus op sy knieë gedwing het. Maar die ANC en die regering sal dit nooit erken nie. Net om dit te sê, stel jou bloot aan beskuldigings van rassisme en selfs haatspraak. Moenie twyfel oor wat die afgelope week gebeur het nie: Die kragtekorte wat beurtkrag noodsaak, word met spronge groter, pleks van kleiner. In die eerste helfte van vanjaar is 249 eenhede afgeskakel weens foute, teenoor 159 verlede jaar. Fase 6-beurtkrag het Maandag vir die eerste keer toegeslaan ondanks…

Regeringsbeleid is dalk besig “om na regs te skuif”, het afgevaardigdes na die Suid-Afrikaanse Kommunisteparty (SAKP) se spesiale nasionale kongres die afgelope week sy lede gewaarsku. Die vier dae lange kongres in Kempton Park het Donderdag ten einde geloop. Dit is oorheers deur vrae oor of die regering besig is om sekere “neoliberale” hervormings te implementeer wat tot groter winste vir die rykes ten koste van die armes sou lei, pleks daarvan dat gehou word by die ANC se links-georiënteerde verkiesingsmanifes en kongresresolusies. Pres. Cyril Ramaphosa se kritici binne die ANC gebruik graag die netelige kwessie van bestaande ANC-resolusies om sy leierskap te bevraagteken. “Wat ons doen moet ten alle tye gerig word deur besluite van die beleidskongres.”— Ace Magashule Dr. Blade Nzimande, hoofsekretaris van die SAKP, het die kongres…

Hoewel fase 6-beurtkrag vir eers iets van die verlede is, vat voos Suid-Afrikaners geen kanse nie en koop ons kerse dat dit klap. Veral wit, lang kerse vlieg van die rak by Spar, Pick n Pay en winkels in die Shoprite-groep, soos Shoprite, Checkers en OK. “Daar is beslis ’n groter aanvraag vir alternatiewe bronne van energie. Daarom het ons die verskeidenheid produkte wat beskikbaar is asook die hoeveelhede wat bestel word, vir al die winkels aangepas. Dit sluit braaitoerusting in en dit lyk asof Suid-Afrikaners nou meer as ooit die geleentheid aangryp om te braai wanneer daar nie krag is om kos te maak nie,” het die Shoprite-groep in ’n verklaring gesê. “Die aanvraag na al-le kerse – gewone huishoudelike kerse en meer luukse kerse – het ook drasties…

’n Voormalige werknemer van die oud-Grey-onderwyser en sakeman Willem Breytenbach beweer sy werkplek was ’n “toksiese omgewing” waar werknemers geboelie en gereeld op onwelvoeglike wyse deur die baas betas is. Die man, wat kragtens ’n hofbevel nie geïdentifiseer mag word nie, is een van twee mans wat klagte van onsedelike aanranding teen Breytenbach ingedien het. Breytenbach, ’n voormalige senior bestuurder van Media24, is verlede maand in ’n potgooi deur die advertensie-kopieskrywer Deon Wiggett daarvan beskuldig dat hy oor dekades heen kinders, jong mans en werknemers molesteer het. Breytenbach was vroeër ook ’n onderwyser by hoërskole op Willow-more en Riversdal. Hoewel Wiggett beweer dat Breytenbach gedurende sy jare as onderwyser verskeie seuns gemolesteer het, hou geen van die klagte wat teen hom ingedien is verband met enige dade met minderjarige skoolseuns…

Twee jaar ná die moord in 2017 op die Oos-Vrystaatse boer Barry Baars (55) het drie verdagtes uiteindelik in verband met dié moord in die landdroshof in Ficksburg verskyn. Baars het op sy dag in ’n spesiale eenheid in die polisie gedien en het glo ook in ’n stadium vir Executive Outcomes as ’n “huursoldaat” gewerk. Plaaswerkers het in Oktober 2017 op hom afgekom waar hy dood in sy bed gelê het op sy plaas Daskop, sowat 25 km buite Ficksburg. ’n Vrou wat glo sy huiswerker was, Nthabiseng Ledwaba, is kort daarna in hegtenis geneem, maar volgens Phaladi Shuping, Vrystaatse woordvoerder van die nasionale vervolgingsgesag, is die saak destyds teen haar teruggetrek. “Dit is teruggetrek vir verdere ondersoek, maar die ondersoekbeampte, wat sedertdien afgetree het, het nooit voortgegaan met…

Die Witzenberg-munisipaliteit in die Wes-Kaap moet skadevergoeding van R630 780 betaal weens die verkragting van ’n verstandelik gestremde 18-jarige Bulgaarse meisie by die Dennebos-kampeerterrein in Ceres, het die appèlhof bevind. Die meisie is op 20 Januarie 2009 deur twee seuns op die oord se muurbalbaan verkrag terwyl sy, haar aanneemouers en dié se biologiese dogter die oord besoek het. Haar aanneemouers is Suid-Afrikaanse sendelinge wat in Bulgarye werk. Hulle het haar in 1998, erg verwaarloos en totaal passief, by ’n weeshuis gered en oor maande met mediese hulp en terapie gehelp totdat sy kon loop, tussen mense funksioneer en selfs in ’n goeie sokkerspeler ontwikkel het. Hulle het gereeld Suid-Afrika besoek. Ten tyde van die verkragting het sy die lees- en numeriese vaardigheid van iemand in gr. 1 en die…

Staatsouditeure wat miljoene rande se bedrog in die Nelson Mandelabaai metroraad ondersoek, het hul goed gevat en geloop omdat hulle glo doodsdreigemente kry. Hulle werk nou al ses weke in Oos-Londen. Die span van die ouditeur-generaal (OG) se kantoor het ’n geseëlde koevert ontvang met koerantuitknipsels daarin oor 18 politieke sluipmoorde wat in die gebied gepleeg is sedert die toekenning in Desember 2018 van ’n dreinskoonmaaktender van R21 miljoen aan verskeie klein ondernemings. Die oudburgemeester van die UDM, Mongameli Bobani, word by die tender betrek. “Ons interpreteer dit as ’n bedreiging vir ons span en het besluit om hulle vir hul veiligheid te onttrek, en om die leierskap van die munisipaliteit in te lig van die toestande wat die werk van die ouditeure beïnvloed,” het Africa Boso, woordvoerder van die…

In Sentraal- en Suid-Amerika is die groenoog-monsters op volle galop nadat Zozibini Tunzi verlede naweek as Mej. Heelal gekroon is. Veral aanhangers van Brasilië, Venezuela, Puerto Rico en Mexiko se skoonhede is vies dat dié streke weer nie die Mej. Heelalpaal gehaal het nie. Talle voorspellingslyste op die internet het Júlia Horta van Brasilië as die gunsteling beskou, maar sy het nie eens die toptien gehaal nie. Thalía Olvino van Venezuela het ook nét die top-20 gehaal en toe uitgeval. Saam met Tunzi in die topdrie was Mexiko se Sofía Aragón, wat uiteindelik as tweede prinses gekroon is, en Madison Anderson van Puerto Rico, wat die naaswenner was. Op Instagram het iemand woedend uitgevaar: “EK AANVAAR DIT NIE! Die kroon moes gegaan het aan ’n Latino-vrou, of Mexiko of Puerto…

Krieket EERSTE TOETS (Rawalpindi, Pakistan) Dag 4 Pakistan t. Sri Lanka Sri Lanka, 1ste beurt 282/6 (Dhananjaya de Silva 87, Dimuth Karunaratne 59, Oshada Fernando 40; Shaheen Shah Afridi 2/58, Naseem Shah 2/83). ■ Spel weens reën opgeskort. EERSTE TOETS (Perth, Australië) Australië, 1ste beurt .............................. 416 Nieu-Seeland, 1ste beurt J. Raval b Hazlewood ................................. 1 T. Latham v & b Starc.................................0 K. Williamson v Smith b Starc................34 R. Taylor v Smith b Lyon..........................80 H. Nicholls v Paine b Starc.........................7 N. Wagner b Starc......................................0 BJ. Watling b Cummins..............................8 C. de Grandhomme v Smith b Starc........23 M. Santner b Labuschagne ........................ 2 T. Southee v Neser b Lyon.........................8 L. Ferguson nie uit nie................................0 Ekstras (1ll, 2ll)..........................................3 TOTAAL (almal uit 55.2 bbe.)................166 Val van paaltjies: 1-1, 2-1, 3-77, 4-97, 5-97, 6-120, 7-147,…

“Gert Muller was ’n derduiwel om te keer.” Dis die mening van sir Bryan Williams, oftewel “Bee-gee”, soos sy aanhangers die All Black-ster geken het. Williams het in 38 toetse (1970-78) ’n rekord-10 drieë gedruk. “Dit was vreesaanjaend om teen Gert te speel aangesien hy so groot, blitsig en ontwykend was. ’n Mens kon eenvoudig nie bekostig om hom enige ruimte te gee nie. Die drieë wat hy in 1970 teen ons gedruk het, was van die boonste rak . . .” Williams (69), wat verlede jaar in Wêreldrugby se heldesaal ingehuldig is, het uit Auckland met Rapport oor Muller as teenstander gesels. Hoewel hy al ’n knie- en drie heupvervangings ondergaan het, speel hy nog gholf.…

Sy goue medalje as Wêreldbekerwenner is vir die Springbok-held Cheslin Kolbe ’n kosbaarheid. Maar, sê die vetgesmeerde blits van die Springbokke, ’n Olimpiese goue sal darem alte spoggerig langs die een van die Wêreldbeker lyk. En daarom hunker hy terug Japan toe. Na Tokio, waar die Blitsbokke volgende jaar by die Olimpiese Spele in aksie sal wees en hy hoop om deel van die aksie te wees. Al het Kolbe in 2019 ’n droomjaar beleef met ’n Wêreldbekergoue en ’n tros pryse in Frankryk se Top 14-reeks, is hy nog lank nie klaar gedroom nie. Een van sy pryse is as Top 14 se Speler van die Jaar, ’n prys wat Kolbe sê hom verras het. “Ek is vir drie pryse benoem. Ek het dalk een verwag, maar nooit al…

Daar is nog een wedstryd om voor hul tuisskare te speel en Paul Delport, afrigter van die Springbok-vrouesewesspan, wil sien dat sy span dit op ’n hoogtepunt afsluit. “Ons het 12de in die toernooi gekom en ons wou nie 12de eindig nie,” het Delport gister ná sy span se derde wedstryd teen Fidji gesê. Sy troepe kan vandag nog negende eindig al het hulle al hul groepwedstryde tydens die Kaapstad-sewestoernooi verloor. “Ons het nie gepraat oor wen of uitslae nie, maar oor die prosesse waardeur ons moet gaan. “Dit is wat teleurstellend is vir my, dat ons in drie wedstryde ons plan nie eenkeer uitgevoer nie. “Dis iets waarna ek weer sal moet kyk en sien of ek die plan reg oordra, of ek dit eenvoudig genoeg maak en of…

17 Oktober 1997: Mark Boucher maak sy buiging teen Pakistan in die eerste van sy 267 toetse. Sy laaste toets was in 2012 teen Sri Lanka. November 1999: Boucher teken 125 teen Zimbabwe aan, die meeste nog deur ’n SA naguiltjie. Hy het 5 515 lopies in 147 toetse aangeteken teen ’n gemiddeld van 30,30. In 295 eendagwedstryde het hy 4 686 lopies gemoker teen 28.57. 20 September 2006: Boucher behaal sy eerste eendaghonderdtal teen Zimbabwe. Sy 100-tal is van net 44 balle gemoker en 147 lopies het net 68 balle geduur. 16 Maart 2007: Boucher teken die vinnigste 50-tal van net 21 balle af aan (dit is later verbeter) in ’n Wêreldbekerwedstryd teen Nederland. Sy beurt van 75* sluit nege viere en vier sesse in. 3 Oktober 2007: Boucher…

R4,59 miljard Die waarde van inkomste uit die kos- en drankbedryf in Oktober is 2,2% laer as die R4,69 miljard wat in Oktober 2018 gegenereer is, wys syfers wat Statistieke Suid-Afrika (SSA) Maandag bekend gemaak het. Gemeet in reële terme en teen konstante 2015-pryse was kosverkope 2,4% laer as ’n jaar gelede. Inkomste van Januarie tot Oktober was wel 2,8% hoër as in die eerste tien maande van 2018, sê SSA. Wat verskillende soorte ondernemings betref, was die totale inkomste uit restaurante en koffiewinkels in Oktober 3,1% laer op ’n jaargrondslag, by wegneemete- en kitskosrestaurante was inkomste 0,5% laer en spysenieringsdienste se inkomste was 2,8% laer op ’n jaargrondslag. – Riana de Lange 4% Dít is hoeveel Suid-Afrika se landbou-uitvoer laer kan wees as in 2018 weens die droogte en…

’n Leser vra dié week of ek dink staatseffekte is ’n goeie belegging. Dis ’n goeie vraag – nie altyd ’n goeie belegging nie. Kom ons kyk ’n bietjie breër as staatseffekte, anders beperk ons onsself. Wat is ’n effek (Engels: bond)? Dit is ’n kapitaalmark-skuldinstrument. Die regering sal byvoorbeeld geld (by jou) leen vir ’n bepaalde termyn en ’n vaste rentekoers, en waarborg dan sowel die rente as die kapitaal. Ander rolspelers in die kapitaalmark is openbare korporasies, soos Eskom, plaaslike owerhede, en openbare-sektor-leners, soos universiteite. ’n Belegging in die kapitaalmark is niks anders nie as ’n lening wat jy maak aan die betrokke instansie met die waarborg van rente-inkomste en kapitaal. Staatseffekte word beskou as die minste riskant omdat regerings gewoonlik hul waarborge gestand kan doen deur eenvoudig…

’n Versameling van kuns, meubels, juweliersware en versamelaarsartikels uit die boedel van Nancy Sinatra sr. word Dinsdag deur Julien’s Auctions in Beverly Hills opgeveil. Dié matriarg van die Sinatra-familie het die meeste van die artikels oor haar lang leeftyd bymekaargemaak. Sy is in 2014 in die ouderdom van 101 oorlede. Sinatra was die legendariese sanger Frank Sinatra se eerste vrou en hoewel die huwelik in ’n egskeiding geeindig het, het hulle vriende gebly tot en met Frank se dood in 1998 in die ouderdom van 82. Die veiling sluit ook kuns en meubels in wat die egpaar saam bymekaargemaak het, onder meer ’n Steinway & Sons-vleuelklavier. Die klavier is in 1949 aangekoop en oor die jare bespeel deur bekendes soos Nat King Cole en George Burns. Dit gaan na verwagting…

‘Miljoene jong Suid-Afrikaners het nou skoolvakansie en dus baie vrye tyd om te geniet. ’n Skerm van een of ander grootte is dikwels hul eerste keuse wanneer dit kom by vermaak. Onlangse navorsing deur die Onafhanklike Kommunikasieowerheid van Suid-Afrika (Okosa) het gewys dat daar meer as een slimtoestel in baie Suid-Afrikaanse huishoudings is,” sê André van der Walt van die Internetdiensverskaffersvereniging (Ispa). Marene Jooste, ’n geregistreerde kinderkinetikus van Johannesburg, sê uit ’n bewegingsoogpunt is skermtyd sleg vir kinders omdat dit ’n onaktiewe tydverdryf is. “Ons kry baie keer kinders wat tot agt uur agter skerms deurbring. Hulle kyk voor skool TV, hulle kyk ná skool TV, hulle eet voor die TV en dan kyk hulle TV voordat hulle gaan slaap ook.” Die blou lig en impulse wat skerms uitstraal, het…

Peter Pan on Ice; Met die Imperial Ice Stars Regisseur: Tony Mercer Hierdie jaagduiwel van ’n produksie is ’n belewenis. Dit vertel J.M. Barrie se klassieke verhaal van ’n verlore seuntjie wat kon vlieg, maar deur die onderduimse kaptein Hook bedrieg is, op so ’n manier dat jou wildste verbeeldingsvlugte nie daarop kan verbeter nie. Die meester-skaatsers uit Rusland voer gewaagde bewegings uit wat die gehoor na hul asems laat snak. Sommige van die toertjies is so ingewikkeld, daar is nog nie terminologie daarvoor uitgedink nie! Lof moet ook gaan aan die stelontwerper, Nadine Minnaar. Haar stelle is skitterend en smelt saam met die aksie sonder dat dit die aandag aftrek. Maar dit is die tuimeltogte deur die lug, die wyse waarop Peter Pan oor Londen en Neverland sweef, en…

Hoe kry jy die perfekte bikinilyf? Sit bloot jou lyf in ’n bikini! Dis maar net een van die liggaamspositiewe mantras wat die afgelope tyd wyd op sosiale media gedeel is. As deel van dié neiging val die klem hierdie somer dus minder op wat jou liggaamsvorm kwansuis sou dikteer jy moet dra, en meer op wat gemaklik en bekostigbaar is – en natuurlik steeds in voeling met die mode van die dag. Anja van der Spuy, stylkenner van die blog Glitz & Grammar (www.glitzandgrammar.co.za), sê wanneer jy ’n swembroek se styl en prysklas oorweeg, moet jy gaan dink waar en wanneer jy dit die meeste gaan dra. “As jy byvoorbeeld op ’n strandvakansie gaan, moet jy seker maak jy’t ’n stewige kostuum wat die branders kan trotseer. Jy wil…

Jan Tuisbly van Tarkastad skryf: Eskom announced on Tuesday evening that rotational load shedding had been downgraded from stage 4 to stage 3 at 20:00. – News 24 Shukhov felt pleased with his life as he went to sleep. A lot of good things had happened that day. He hadn’t been thrown in the hole. The gang hadn’t been dragged off to Sotsgorodok. He’d swiped the extra gruel at dinner-time. The foreman had got a good rate for the job. He’d enjoyed working on the wall. He hadn’t been caught with the blade at the search-point. He’d earned a bit from Tsezar that evening. And he’d bought his tobacco. The end of an unclouded day. Almost a happy one. – Alexander Solzjenitsin, One Day in the Life of Ivan Denisovich…

Wat het Washington D.C. in die VSA en Wellington in die Wes-Kaap gemeen? Hoe kan Upington, ’n dorp in die Noord-Kaap, en die internasionale saamry-maatskappy Uber in dieselfde asem genoem word? En waarom is sellotape, sjampanje en Stellenbosch familie? Reg geraai, alliterasie. Maar dis nie die enigste gemene deler nie. Al die woorde – Washington, Wellington, Upington, Uber, sellotape, sjampanje en Stellenbosch – is eponieme. “E-poe-wat?” Moenie dink jy’s dom as jy nie weet nie. Onlangs klets ek en die skrywer Eben Venter oor WhatsApp. Hy sê hy het pas die huis in Lismore, Australië, gehoover. Hy sê nie stofsuig nie. Wat noem mens dié taalverskynsel, vra ons mekaar min of meer gelyk. ’n Paar minute later, danksy Google, het ons dit. Hoover is, soos die meeste van die eiename…

Emeritusaartsbiskop Desmond Tutu sterk tuis aan nadat hy pas weer in die hospitaal opgeneem is vir ’n hardnekkige infeksie. En elke keer dat hy ongesteld is, word op sosiale media versoeke geplaas vir gebede vir hom – én word voortydig oor sy dood bespiegel. Dit was laas ook so met oudpres. Nelson Mandela se siekte: Gereeld was daar onbevestigde verslae dat hy reeds afgesterf het. In Tutu se geval moes hy byvoorbeeld in April verlede jaar vure doodslaan toe daar oor sy “dood” berig is op ’n valse The New York Times-webwerf en in 2016 moes sy dogter Mpho dieselfde doen. Die belangrikste raakpunt met Madiba se laaste dae op aarde is dat ons skynbaar ook sukkel om te aanvaar dat Tutu reeds ’n hoë ouderdom (88) bereik het en…

Vir elke nuwe krisis soek ons dringend ’n plan. Maar wat as die krisis van ons tyd is dat ons te veel wil doen? Dit is dié tyd van die jaar wanneer ons vir ’n paar weke tot stilstand kom en as ons gelukkig is, báie gelukkig, iewers stil oor die see kan staar en die jaar in oënskou neem. Met die jaarlikse afstandneming van ons daaglikse lewe, lyk ons alledaagse bedoeninkies opnuut soos ’n gejaag na wind. Plegtig onderneem ons om dinge volgende jaar anders te doen, net om einde Februarie se kant te wonder hoe ons ooit turend oor die see ernstig kon dink ons sal dinge dié jaar anders doen . . . En so, om D.J. Opperman effens anders te lees, gaan kringend om jou, en…

Erika Ochse, Queenswood, skryf: Ek verwys na die berig “Geskop, want sy het wit houding” in verlede week se koerant. ’n Wit houding ry na ’n veilige plek as sy van die pad afgetrek word, en ’n swart houding skop die vrou daaroor. Houding bly dit! Kies net wit of swart, of hoe? Kymie du Toit was reg: Hierdie beamptes was dalk tereg nie te vertrou nie. Hierdie voorval is een van twee dinge: Óf die hoog opgee oor geweld teen vroue en kinders geld nie vir vroue en kinders van een deel van die bevolking nie óf die betrokke beamptes moet glad nie ’n geval van geweld teen vroue en kinders hanteer nie – maak nie saak aan watter bevolkingsgroep die slagoffers behoort nie. Die beamptes se optrede is…

James Young, Pretoria, skryf: Ten aanskoue van fase 6-beurtkrag wonder ’n mens onwillekeurig hoe dinge oor die afgelope 25 jaar so skeef kon loop. Entiteite soos die SAL en Prasa het die eindstreep bereik of is in sakeredding, waarskynlik tien jaar te laat. Eskom word egter steeds toegelaat om voort te ploeter. Waarom het die regering toegelaat dat alles ten gronde gaan? Sekerlik moes hulle dit sien kom het – of was hul hande te diep in die koekieblik? Pres. Cyril Ramaphosa is van mening dat staatsondernemings reggeruk kan word. Wat hy nalaat, is om te sê hóé. Ons kan eenvoudig nie langer op leë beloftes staatmaak nie. Die president moet begin deur die-gene wat die land tot op sy knieë gedwing het, onverskrokke te vervolg. Ook diegene wat hy…

Caster Semenya, Suid-Afrika se Olimpiese ystervrou, het weens aanranding op ’n 20-jarige man in die hof verskyn. Sunday Sun, Rapport se susterskoerant, berig vandag dat Semenya verlede week vir die eerste keer in die gemeenskapshof in Hatfield, Pretoria, verskyn het. Die staat beweer die 800 m-wêreldkampioen het Thebe Lebese (20) ’n taai klap deur sy gesig gegee. Volgens die polisie het Semenya en haar vrou, Violet Raseboya, op 25 Julie die Atterbury Value Martwinkelsentrum besoek. Lebese was op pad om bloed te skenk by dieselfde sentrum toe hy die atletiekster en haar vrou by die PostNet-winkel gewaar. “Hy het (by PostNet) ingegaan en het foto’s en video’s begin neem. Caster se vrou het hom aangetree en gesê hy moet onmiddellik ophou,” sê ’n polisiewoordvoerder. “(Lebese) beweer hy het dadelik opgehou.…

Eskom het teenoor Rapport erken dat hy eenvoudig nie geld het vir die grootskaalse roetine-instandhoudingswerk wat sy kragstasies benodig nie. Dít is die rede “vir die afname in beskikbaarheid en betroubaarheid van die aanlegte”. 11 kragopwekkingseenhede by die Grootvlei-, Hendrina- en Komati-kragstasies is uit diens gestel omdat dit onekonomies geraak het om hulle te bedryf en daar nie geld is vir grootskaalse vernuwingswerk om hulle weer bruikbaar te maak nie. Dit, tesame met Duvha-eenheid 3 wat weens tegniese redes nie beskikbaar is nie, verteenwoordig ’n verlies van 2 140 MW. As dit Maandag beskikbaar was, sou dit onnodig gewees het om fase 6-beurtkrag in te stel. Ouer as 30 jaar Eskom het 15 steenkoolkragstasies, waarvan nege ouer as 30 jaar is. Die oorblywende ses sluit in Medupi en Kusile wat…

’n Bekende plaaslike politikus van Loeriesfontein in die Boesmanland het glo sy eie baba met ’n mes doodgesteek nadat sy vervreemde vrou die polisie gestuur het om die kind by hom te gaan haal. Die 43-jarige David Ockhuys is in die hospitaal opgeneem en sal in die hof verskyn sodra hy ontslaan is. Ockhuys is ’n bekende plaaslike politikus wat voorheen in die kantoor van die Noord-Kaapse premier gewerk het. In 2016 het hy in die munisipale verkiesing vir die Khoisan Revolusie gestaan, maar vanjaar by die ANC aangesluit. Sy vervreemde vrou, Andrietta Ockhuys (29), is ’n oud-Matie en maatskaplike werker by die Suid-Afrikaanse Nasionale Raad vir Alkoholisme en Dwelmafhanklikheid (Sanra). Die hof het vroeër die egpaar se twee kinders – ’n agt maande oue seuntjie, en ’n tweejarige kleuter…

Staatsdiensvakbonde en die staat gaan erg koppe stamp tydens onderhandelinge oor die moontlike bevriesing van salarisse. Senzo Mchunu, minister vir die staatsdiens en administrasie, het met die bekendstelling van die nuwe ministeriële handboek, Gids vir lede van die uitvoerende bestuur, gesê die probleem is nie die grootte van die staatsdiens nie, maar die vergoeding. In 2006-’7 was die staat se salarisrekening vir net meer as 1,1 miljoen amptenare sowat R200 miljard, en nou beloop dit meer as R500 miljard vir 1,2 miljoen amptenare. ’n Ondersoek word gedoen om vas te stel of daar te veel senior poste is. Mchunu wil die kwessie by die staatsdiens se koördinerende bedingingsraad (PSCBC) verder voer. Hy wou nie uitwei oor gesprekke met vakbonde nie. Hulle sê hulle gaan baklei vir amptenare wat sukkel om…

’n Leerling van die spogskool Kimberley Boys’ High is dood nadat hy glo op die skoolterrein geboelie is. Lt.kol. Dimakatso Mooi, Noord-Kaapse polisiewoordvoerder, het bevestig dat hulle ’n dossier geopen het na aanleiding van die dood van Mxolisi Nelson Qwele Hulle het hom net keelseerpille gegee. (15) en binnekort die saak na die nasionale vervolgingsgesag gaan verwys om ’n besluit te neem oor moontlike vervolging. Die polisie is ingeroep omdat dit vir die dokters nie duidelik was of sy dood onnatuurlik was nie. Sy longe het onder meer platgeval, maar daar was glo bloeding in sy keel en sy brein was geswel. Qwele is vier dae voor hy in ’n koma verval het glo op die skoolterrein deur ’n medeleerling gewurg en het aanvanklik net gekla oor ’n seer keel,…

‘Ek weet julle is verskriklik kwaad vir ons. Julle behoort te wees. Ons is die remskoen wat keer dat die land vooruitgaan. Wie de ongeluk sal hier wil kom belê met fase 6-beurtkrag?” As daar nou een mens is wat ná die afgelope week weet hoe keelvol Suid-Afrikaners vir Eskom is, is dit Jan Oberholzer, hierdie prins van duisternis. In die swartste week nog vir Eskom (daar is nie eens ses fases van rou nie!, twiet iemand), was dié Eskom-bedryfshoof die gesig van die krisis. Die man wat moes keer vir die klappe. “Alles wat kon het Maandag by Eskom skeefgeloop. Dit was ’n perfekte storm. Maar dis nie wat die wêreld hoor nie, al wat vassteek is: beurtkrag fase 6. Mense vergeet 340 dae van die jaar was daar…

GHOLF Reed se joggie kry trekpas Die omstrede Amerikaanse gholfspeler Patrick Reed se joggie, Kessler Karain, is uit die Presidentebekertoernooi geskop nadat hy gister ’n toeskouer by die Royal Melbourne-klub in Australië gestamp het. Die voorval het gebeur nadat Reed en sy spanmaat Webb Simpson in die oggend se beterbal-sessie met 5 en 3 deur CT Pan en Hideki Matsuyama afgeransel is. Die toeskouer het Reed gevloek terwyl hy en Karain, wat ook Reed se swaer is, met hul gholfkarretjie op pad terug was na die klubhuis. ’n Woedende Karain het hom toe gekonfronteer en in die proses gestamp. Volgens Karain het die toeskouer gesê: “Jy f****n suig.” – Reuters en Sportredaksie RUGBY Weir deur die BBC vereer Die Skotse slot Doddie Weir (foto), gaan met die gesogte Helen Rollason-prys…

Die legendariese Nieu-Seelandse middelafstand-atleet Peter Snell is Donderdag in die ouderdom van 80 in Dallas, VSA, dood. Snell het in die 1960’s beroemdheid verwerf toe hy drie Olimpiese goue medaljes verower het. Suid-Afrikaners sal hom egter veral onthou vir sy sege oor die Matie-droommylsensasie De Villiers Lamprecht in die Groenpunt-stadion in 1964. Snell het Suid-Afrika besoek drie maande voor sy triomfantlike goue medaljes in die 800 m en 1 500 m op die Olimpiese Spele in Tokio. Dié Kiwi-atleet het in Durban die eerste droommyl op Afrikabodem afgelê met ’n tyd van 3 minute en 59.2 sekondes. Hy het op sy besoek aan die land ook in Port Elizabeth deelgeneem. Snell het sy eerste Spele-goud in die 800 m-wedloop by die Olimpiese Spele in Rome in 1960 gewen. Hy het…

Die voormalige All Black-afrigter sir Graham Henry het ’n paar houe ingekry teen Nieu-Seeland Rugby met die nuwe era wat hulle betree. Hy was een van vyf lede in die paneel wat Ian Foster as nuwe All Black-breier gekies het in die plek van Steve Hansen. Foster het die Crusaders se breier, Scott Robertson, om die pos uitgestof. In ’n onderhoud met Radio Sport Breakfast het Henry gesê hy was ongelukkig oor die hoeveelheid aansoeke, berig die New Zealand Herald. “Ons moes meer gehad het om billik te wees, meer aansoeke, en ek dink Nieu-Seeland Rugby het daaruit geleer.” Twee voornemende kandidate, die voormalige Chiefs-afrigter Dave Rennie en Japan se breier, Jamie Joseph, het voor die tyd kontrakte met onderskeidelik Australië en Japan gesluit. Foster se aanstelling het heelwat kritiek…

Die Boland Rugbyunie se president, Ivan Pekeur, volhard met ontkennings dat hy die soustrein ry en ondanks die geldkrisis wat Boland-rugby in ’n wurggreep het, sowat R80 000 per maand as president verdien. Hy lê ook al die redes vir Bo-land se enorme geldelike gemors voor die deur van Cassie Carstens, wat deur Pekeur-hulle in die pad gesteek is “omdat hy nie sy beloftes nagekom het nie”. Pekeur ontken dat die Bolandunie feitlik bankrot is en sê die media verkondig onwaarhede oor hom en die unie. Hy verweer hom ook teen Piet Heymans, uitvoerende hoof van die werknemersvakbond Sport Employees Unite (SEU), se aantygings dat die Boland se president leuens in skrywes verkondig. Oor die kritiek op hom sê Pekeur gistermiddag in ’n Whats-App-boodskap aan Rapport: “Mense wat simpatie by…

Rolspelers in die bedryf vir mediese versekering doen aanvoorwerk vir hofgevegte ná die skokbesluit dat hospitaal-kontantplanne en ander versekeringsprodukte verbied gaan word. Neil Kirby, ’n direkteur by Werksmans, sê sekere rolspelers wat deur die besluit geraak word, win regsadvies in omdat hulle meen die Raad op Mediese Skemas (RMS) se eensydige besluit skend Suid-Afrikaners se grondwetlike regte. Rapport het verlede week berig die RMS het uit die bloute aangekondig dat alle hospitaal-kontantpolisse teen Maart 2021 onwettig gaan wees. Dit lewer honderdduisende mense uit aan staatshospitale. Boonop het die RMS in nóg ’n skokwending sy dekade lange planne van ’n laekoste-opsie vir mediesefondsdekking in die asblik gegooi. Dit sou miljoene mense die geleentheid gebied het om private gesondheidsorg te kry. Dit alles is oënskynlik gedoen ter voorbereiding van die regering se…

Nuwe wetgewing om oliebesoedeling in Suid-Afrikaanse seewaters te bekamp, word binnekort in die parlement voorgelê. Die departement van vervoer het die wetsontwerp op mariene oliebesoedeling in die Staatskoerant gepubliseer, waarmee die regering sy regulasies in ooreenstemming kan bring met die internasionale konvensie oor oliebesoedeling-gereedheid, -reaksie en samewerking (OPRC). Die wetgewing sal maritieme owerhede die mag gee om voorkomend op te tree waar die gevaar van oliebesoedeling bestaan en om oortreders vas te vat. Oorlogskepe is gevrywaar van wetgewing wat met oliebesoedeling verband hou – meerendeels omdat hulle bedrywighede onder ander wetgewing val. Daar is egter kommer oor of die Suid-Afrikaanse Maritieme Veiligheidsowerheid (Samsa), wat reeds onder onvoldoende geld en personeel gebuk gaan, die vermoë sal hê om die nodige patrolleerwerk vir die voorkoming van oliebesoedeling te doen. Malcolm Hartwell, prokureur…

Carien Grobler (ma van twee seuns, vyf en tien): “Ons het ’n app. As hul skermtyd verby is, disable ons alles. Ons straf ook met skermtyd: As hulle nie hulle werkies doen nie, vat ons dit weg. Joah se juffrou vat ook skermtyd en laat weet my net wat is oor! Dis ’n nuttige hulpmiddel.” Michiel Snyman (pa van ’n dogtertjie van vier en ’n half): “Ons stel geen limiet op ons kind se skermtyd nie. Sy kan kyk soveel sy wil. Snaaks genoeg is die uitkoms dat sy waarskynlik so twee uur per dag kyk. Ek dink omdat dit vrylik beskikbaar is, is dit nie ’n kwessie nie. Verder verkies sy om buite te speel. Ons siening is, watter wêreld gaan ons kind in wees oor tien of 20…

Official Secrets Dié ware verhaal, wat Gavin Hood soos ’n speurverhaal vertel, verras, selfs al weet jy wat gebeur het. Dit gaan oor ’n gewone meisie (’n puik Keira Knightley) wat destyds die waarheid oor die Amerikaanse inval in Irak (gesteun deur Brittanje) aan die media uitgelap het. Sy ontmasker die regeringsgekonkel en manipulasie tussen leiers. Moenie ’n suwwe opeenstapeling van feite verwag nie. Die fliek boei, selfs in die stiller oomblikke wanneer Katharine Gun, die fluitjieblaser, besef wat die gevolge van haar dade is. Maar lojaliteit teenoor haarself en die waarheid is die belangrikste. Hood se navorsing was deeglik en hy word stewig deur sy akteurs ondersteun om ’n verstommende verhaal oortuigend te vertel. Gaan kyk! Haunt Hoeveel keer moet ons nog hierdeur worstel? Tieners beland in ’n gruwelhuis…

Dit is die soort ding waarvoor daar skielik tyd is wanneer die krag oor die feestyd afklik en ’n beskuldigende stilte oor jou deurmekaar kasarm neerdaal: Die Groot Skoonmaak, die ruk-en-rol-regpak en die wild-enwakker uitsorteerdery van alles wat slonserig is. Genugtig, wánneer laas was iemand in hierdie kaste, raas en blaas jy terwyl jy begin oopgooi en uitgooi. Die vergeelde koerante waarmee die rakke gevoer is, verklap dat daar inderdaad ’n hele aantal jare verstryk het sedert die laaste Operasie Orden. Die koerante dateer uit Februarie en Maart 2016. Daar is talle berigte oor beurtkrag, want Suid-Afrikaners was toe al uitgekuier met die voortslepende probleme waarmee ons sedert die eerste instorting van steenkoolsilo’s in November 2014 te kampe gehad het. Daar het konsensus geheers dat die land nie verdere onderbrekings…

Die konstitusionele hof se uitspraak in die taalhofsaak van Gelyke Kanse teen die Universiteit Stellenbosch (US) is deurspek met simpatie en hoop, maar verteenwoordig ’n voorspelbare aanvaarding van lae standaarde en gebrekkige argumente wat heeltemal teenstrydig met studente se werklikhede in die praktyk is. Dit is teleurstellend, want die konstitusionele hof was die laaste vangnet vir die taalregte van studente in Suid-Afrika – veral op Stellenbosch – wat nie Engels as huistaal het nie. Is dit onvanpas om ’n uitspraak van die konstitusionele hof te kritiseer? Ek glo nie dit is onvanpas nie – veral omdat dit al in die verlede gedoen is waar die onhoudbare praktiese gevolge van uitsprake eenvoudig nie daar gelaat kon word nie. U, regter Mogoeng, het self onlangs ’n beroep op die publiek gedoen om…

U ken dalk die sêding dat die ligte brand, maar niemand is tuis nie? In die geval van ons president is dit andersom: Cyril Ramaphosa is terug by die huis uit Egipte, maar die ligte is nie aan nie. En hy het geen idee waarom nie. Bog: Óf hy lieg óf hy luister nie wanneer met hom gepraat word nie. Want dit was Ramaphosa self wat vyf jaar gelede deur oudpres. Jacob Zuma opdrag gegee is om beheer oor te neem oor die regruk van Eskom (asook die Suid-Afrikaanse Lugdiens en die Poskantoor). Hy moes hom van elke stoomketel en ingenieur vergewis sodat “beurtkrag” – die paaiwoord wat sielkundiges sê ons vir kragonderbrekings moet gebruik sodat dit klink na blote goeie maniere en sodat ons nie so depressief raak nie…

Pieter de Jager (emerituspredikant), Reddersburg, skryf: Ek verwys na Anton van die Paarl se brief verlede week na aanleiding van die artikel oor die jong man “Jannie” wat homself om die lewe gebring het omdat hy verwerping gevrees het omdat hy gay was. Anton skryf dat Jannie, soos baie ander, “in die steek gelaat is . . . en nie toegelaat is om uit die kas te klim gedurende daardie moeilike jare (1980’s) nie”. Vandag se wankelende sedes maak dit makliker vir gays om uit die kas te klim. Steeds kan hulle voortgaan met hul homoseksuele praktyke, maar nou gewetenloos en sonder skaamte. Jesus, as mensgeworde Woord, sou nooit die gruwels van homoseksualiteit goedgekeur het nie. Daarvoor was sy he-le prediking fundamenteel gerig op die Ou Testament, waar dit fel…