Indice dei contenuti per 28 November 2024 in Landbouweekblad

Silwer rand om gewaswolke Mielies wat talle boere in die oostelike produksiegebiede begin plant het met die hoop dat goeie reën sal val, het begin opkom, terwyl voorspellings vir die begin van die reënseisoen oor die westelike dele van die somerreëngebied teen middel November nog baie onseker was. By Warden in die Vrystaat het die Zunckels middel November hul gewasse geïnspekteer. Volgens Tyson Zunckel is hulle tevrede met die opkoms van mielies en sojabone (sien bl. 17 vir ’n volledige oorsig). Die ontwikkeling van ’n La Niña-stelsel tydens die 2024-’25-seisoen is volgens talle weermodelle onseker. Slegs een van die weermodelle wat die Australiese buro vir meteorologie nagaan vir die ontwikkeling van ’n El Niñoof La Niña-stelsel, dui op die voorkoms van ’n La Niña-stelsel. Die ander modelle dui neutrale toestande…

André Brink van die plaas Groot Phesantekraal buite Durbanville is onlangs aangewys as Landbouskrywers SA se Boer van die Jaar. Toe hy die plaas in 1996 oorgeneem het, het dit uit 350 ha gewasse, 800 skaapooie en 50 beeste bestaan. Vandag boer hy op 4 650 ha van sy eie grond en 850 ha gehuurde grond. Kleingraan word op 2 500 ha verbou, medics-weiding op 1 500 ha en wingerd op 180 ha. Die wynkelder kan 500 ton druiwe verwerk. Die skaapkudde het gegroei tot 3 500 Dohne Merino-ooie en die beeskudde tot 400 Hereford-koeie. Brink het gesê hy het die diversiteit van die plaas benut en die verskillende bedryfstakke met mekaar “laat praat”. Die takke het sinergie gevorm en groter geraak. “Skaal het ons die voordeel gegee om groter…

Manie Quantum Foods is in ’n hofstryd gewikkel met ’n direkteur wat hy verwyder het (berig op bl. 16), maar in die agtergrond is daar ’n groter stryd om die beheer van die maatskappy. Manie het gaan nalees oor Braemar Trading, wat met ’n belang van sowat 30% een van die twee groot aandeelhouers is wat vanjaar gereeld vir drama gesorg het in die direksiekamer van Suid-Afrika se grootste eierprodusent. Die Rudland-familie wat glo betrokke is by Braemar, was al verskeie kere in die nuus, en dit was nie sommer oor spek en eiers nie. Braemar is skynbaar in Dubai geregistreer en behoort glo aan Adrianne Rudland, die ma van die Zimbabwiese sakelui Simon en Haimish Rudland. Daily Maverick noem Simon “die Zimbabwiese tabakbaron” en berig dat hy die onderneming…

DIE wynbedryf het uitstel van 13 Desember tot einde Februarie gevra om kommentaar op die nasionale tesourie se voorgestelde beleidsverandering oor die belasting op alkoholiese drankies te lewer. Hiervolgens word vier opsies vir die wynbedryf oorweeg, asook die instelling van ’n prysmeganisme, bekend as die minimum-prys-per-alkoholeenheid (MUP). “Ons kyk aandagtig na elk van die vier opsies in die voorgestelde beleid, en ondersoek elkeen se voor- en nadele,” het Rico Basson, uitvoerende hoof van South Africa Wine, gesê. Volgens Christo Conradie, South Africa Wine se bestuurder van belanghebberbetrokkenheid en beleid, is die 30 dae vir kommentaar nie billik nie. “Modellering moet plaasvind sodat ons ’n uitkoms kan bepaal en substansie kan vind om ’n opsie te motiveer of selfs om ’n alternatiewe model en beleidsraamwerk voor te stel.” Gewoonlik word 60…

Sy ervaring wat betref stappe teen besettings het hom geleer dat spoedige optrede, betroubare inligting, die gebruik van die howe en die uitoefening van druk op owerhede, onder meer deur strafregtelike klagte teen amptenare, help om besetters op ’n wettige manier van grond af te kry. Só het Hans-Jurie Moolman gesê op ’n bosberaad wat Sakeliga in Pretoria aangebied het. Moolman is verbonde aan die regsfirma Moolman & Pienaar en spesialiseer in onder meer grondverwante dispute, soos grondeise en wettige uitsettings. Die beraad het gehandel oor alternatiewe oplossings vir versnelde dorpsherstel en is onder andere bygewoon deur verteenwoordigers van sakekamers en die georganiseerde landbou. Grondbesettings vind volgens Moolman om drie redes plaas, elk met sy eie dinamika. Eerstens word grond om politieke redes beset omdat plaaslike owerhede nie meer die…

DIE pryse van vars produkte, veral aartappels en uie, op Suid-Afrikaanse markte het weens ’n groot aanbod skerp gedaal, terwyl die winkelrakke in Maputo ál leër raak. Dít was ’n regstreekse gevolg van die sluiting van die Lebombo-grenspos by Komatipoort nadat gewelddadige betogings oor die herverkiesing van die Frelimo-regering in Mosambiek uitgebreek het. David Nel van Botha Roodt Markagente, wat op die Johannesburgse varsproduktemark sake doen, het gesê hoewel aartappels en uie die produkte is wat in die grootste volumes na Mosambiek uitgevoer word, affekteer die chaos by die grenspos Mosambiekers se hele voedselmandjie. Vars produkte wat vir Mosambiek bestem is, word nou na Suid-Afrika se varsproduktemarkte gestuur en die aanbod dwing die pryse af. Boere het in die week van grenspossluitings gemiddeld R10 per sakkie aartappels minder as die…

In die vorige uitgawe het ons die verskillende kleinhandelgroepe se markkonsentrasie bespreek (“Groter supermarkgroepe oorheers”, LBW, 14 November 2024) en die probleme van Pick n Pay in ’n vroeër aflewering (“Kan Pick n Pay se geldknyp omgekeer word?”, LBW, 17 Oktober 2024). Pick n Pay het daarna bekend gemaak dat sy verliese in die eerste ses maande van die jongste boekjaar tot byna R830 miljoen gestyg het op ’n omset van R56 miljard. Die woelinge in voedselkleinhandel duur voort, met die Mededingingsraad wat ingestem het dat Shoprite (Checkers) die ander kleinhandelaars (Spar en Pick n Pay) se onafhanklike en franchisehouerwinkels kan oorneem. Dit sal glo nie nadelig vir mededinging wees nie … Die Shoprite-groep brei aggressief uit en het in die afgelope jaar 53 nuwe winkels net in Suid-Afrika oopgemaak…

Kortliks DIE swart springbok wat onlangs op ’n gholflandgoed in George gebore is, is toe nie só ongewoon soos wat mense graag wil glo nie. Dr. Peter Oberem, uitvoerende hoof van die dieregesondheidsmaatskappy Afrivet, sê swart springbokke is redelik algemeen. “Hul prys op veilings is nie veel hoër as dié van springbokke met die gewone kleurpatroon nie. Dit wys hulle is nie so skaars nie. “Daar is ook ’n aantal ander kleurvariasies wat natuurlik voorkom, soos wit (nie albino nie) en koffie (wat ’n meer kontrasterende en treffende kleurvariasie van die algemene kleurpatroon is). Daar is selfs variasies met ’n wit gesig, wit kruis en wit kous. Nie een van die kleurvariasies is egter oral so algemeen soos die algemene kleure nie.” Die Kingswood-gholflandgoed het in Oktober die geboorte van…

Soos die meeste bedrywe moet die voertuigfinansieringsektor in Suid-Afrika by ’n veeleisende en vinnig veranderende ekonomiese landskap aanpas. ’n Kombinasie van wisselvallige rentekoerse, volgehoue hoë inflasie, wêreldwye ontwrigting in voorsieningskettings, ’n swakker rand en die behoefte aan meer innoverende en inklusiewe finansiële produkte beïnvloed verbruikersgedrag en uitlenerstrategieë. Hierdie faktore skep struikelblokke, maar ook geleenthede vir verbruikers en leners. Namate die bedryf ontwikkel, kyk alle belanghebbendes toenemend na maniere om ’n balans tussen bekostigbaarheid en finansiële volhoubaarheid te vind. Hoewel afbetalingsooreenkomste steeds die algemeenste vorm van voertuigfinansiering is, moet dit by ekonomiese neigings aanpas. Hoë rentekoerse dwing verbruikers om langer leningstermyne as die tradisionele 60 maande te oorweeg, en hulle kies termyne van 84 maande of selfs 96 maande. Langer leningstermyne bied wel laer maandelikse paaiemente wat eienaarskap op kort termyn…

Kalium kom vry en algemeen in die aardkors voor as deel van kleiminerale en onoplosbare mineraaldeeltjies. Hierdie kalium is gewoonlik ontoeganklik vir ’n plant en moet deur verwering afgebreek word om sodoende plantbeskikbaar te raak. Die kalium in oplossing, asook die kalium op die uitruilkompleks, vorm deel van die poel plantopneembare kalium. Dié kalium, wat op die kleiminerale voorkom, word tydens ’n grondontleding gemeet. Volgens J.J. van Biljon et al. is in 2008 bevind dat uit die 25 000 grondmonsters wat in die Vrystaat geneem is, daar by sowat die helfte ’n tekort aan kalium was. Die studie het bewys dat die drempelwaarde van kalium bo 125 mg/kg moet wees ten opsigte van die ammoniumasetaat- (NH4OAc) ekstraksiemetode. ’n Groot hoeveelheid kalium wat deur ’n gewas opgeneem word, word as graan…

1 Junior en grootkampioenbul, JHA 22-76 Jamica Pitbull. Eienaar: Jancko (middel, 082 781 4135) en James Prinsloo (regs), Jamica Simbras, Volksrust. Hanteerder: Sabelo Khumalo. 2 Junior en grootkampioen vroulike dier, RNZ 22-161C. Eienaar: Rayhann Hoosain (073 322 6997), Fasari Simbras, Mahikeng. Hanteerder: Abram Dithebe. 3 Reserwe senior en reserwegrootkampioenbul, GPC 22-24. Gawie Coetzee (072 267 6036), GPC Simbras, Lichtenburg. Hanteerder: Michael Sapa. 4 Senior kampioenkoei, LZ 20-23 Rotswand Caroline. Eienaar: Riaan van Zyl (083 384 1681), Rotswand-stoetery, Winburg. Hanteerder: Frans Letebele. Riaan het ook die reserwe senior kampioenkoei, LZ 17-42, ingeskryf. 5 Senior kampioenbul, JM 19-155 JacMar Jock. Eienaar: Jaco Maré (082 388 4294), JacMar Simbras, Klerksdorp. Hanteerder: Fanie Maré. 6 Kampioen-bulkalf, REG 23-546. Eienaar: Carl Rautenbach (082 456 4991), Reggeraai-stoetery, Vredefort. Hanteerder: Sagaria Porogo. Hy het ook die reserwekampioen-bulkalf,…

Die SA Vleismerino-telersgenootskap het op 27 Augustus sy elfde nasionale jongramveiling in die Hoëveld-veilingsentrum op Standerton aangebied. Die hoogste prys vir ’n ram was R28 000 vir die ram 3066 PR van Willie Geldenhuys van Ventersdorp. Die koper was Udo Beneke van Luneburg. Op die veiling is 21 ramme vir ’n gemiddelde prys van R11 190 verkoop. BKB Standerton het die veiling aangebied en Billy Lyons was die afslaer.…

Vleissentraal het op Dinsdag 27 Augustus ’n baie goeie elfde produksieveiling vir Johan en Juan du Randt se Mountain Shadows-stoeterye (Sussex, Dormer en Suffolk) by die Sun Down Lodge op Aliwal-Noord gehou. Die bul MS220020 (lot 3) is vir die hoogste prys van R160 000 aan Corné Rust en Albert en Deon Kotzé verkoop. Corné is van Izmar Sussex by Moorreesburg en die Kotzés van Acmaija Sussex, Agter-Paarl. Die duurste Dormer-ram (lot 52) is vir R20 000 aan twee boere van Petrusburg verkoop: Willie Esterhuyse van die plaas Middelfontein en Hendrik Strydom van die plaas Swartlaagte. Die afslaer was Jakkie Nel.…

Alexandershoek se 40ste SA Vleismerino-produksieveiling het op 28 Augustus 2024 op die plaas Alexandershoek by Moorreesburg plaasgevind. Suzanne Kotzé se ram 2002 SJ het die hoogste prys op die veiling behaal. Hy is vir R32 000 aan John Morris van die Universiteit Stellenbosch se Mariendahl-proefplaas verkoop. Altesaam 59 ramme is vir ’n gemiddelde prys van R12 576 op die veiling verkoop. Die veiling is aangebied deur BKB Humansdorp onder beskerming van die SAVM-telersgenootskap, met Tjaart Steyn as afslaer. * Lees die volledige berigte op Landbou.com .…

Hoofnuus Maatskappye DIE hooggeregshof in Kaapstad het ’n besluit van die direksie van die landboumaatskappy Quantum Foods om een van sy direkteure uit die direksie te verwyder, tersyde gestel. Dié hofbeslissing op 7 November is die jongste verwikkeling wat met die konflik tussen Quantum en twee van sy groot aandeelhouers verband hou. Quantum, Suid-Afrika se grootste eierprodusent wat ook braaihoenders en voer produseer, het reeds aansoek gedoen om teen die beslissing te appelleer. Luidens die uitspraak spruit die saak uit gebeure op ’n direksievergadering wat op 23 Mei vanjaar gehou is ná herhaaldelike versoeke deur Braemar Trading, ’n groot aandeelhouer, aan die direksie dat ’n spesiale aandeelhouersvergadering gehou word. Op só ’n vergadering wou Braemar voorstel dat André Hanekom, direksievoorsitter, en nog twee direkteure uit die direksie gestem word, en…

’N REKORDPRYS vir die seisoen van R260/kg (vetwol) is onlangs vir Winston Farms se wol met ’n 75,3%-skoonprys van R345/kg vir superfynwol behaal. Boonop het dié boerdery uit een skeersel ’n baal elk deur twee makelaars verkoop en die betrokke wolkoper meen dit is die beste fynwol wat hy nóg in die afgelope drie jaar gesien het. OVK het een baal BFFY van 15,1 mikron en BKB een baal BFFH van 15 mikron aan Standard Wool SA verkoop. Albei makelaars het R260/kg verdien, ’n ligpunt op ’n baie trae mark. Paul Lynch, mede-eienaar van Standard Wool SA, het gesê albei bale was van uitsonderlike gehalte. “Die vetwol het goeie lengte, treksterkte en algehele topgehalte gehad – iets wat ek drie jaar laas gesien het. Die wol sal na ’n kliënt…

Spesiale ondersoek Regsake VIER jaar nadat die spesiale ondersoekeenheid (SOE) wanadministrasie by die meester van die hooggeregshof begin ondersoek het, het die departement van justisie vroeër vanjaar as deel van ’n omdraaistrategie 14 hoëvlakamptenare in verskillende kantore geskors, van wie party intussen afgedank is of bedank het. Die tugstappe sal teen einde November afgehandel wees. Die meester van die hooggeregshof het ’n ingrypende impak op die ekonomie vanweë sy wye interaksie met die publiek en regspraktisyns. Na regte moet dié regsinstelling die finansiële belange van mense wie se bates of belange deur ander bestuur word, beskerm. Uit landboukringe, waar boerderye in likwidasiegedinge betrokke is, word verskeie klagtes oor die meester gehoor. Van die bewerings is dat boedels nie korrek bestuur is ingevolge die Maatskappywet (Wet 71 van 2008) en die…

Die bestaande voedselstelsel is ondoeltreffend en onvolhoubaar, en lei tot die vernietiging van habitats en wildbevolkings, het die wêreldnatuurlewefonds (WWF) in sy jongste verslag bevind. Die verslag, 2024 Living Report: A System in Peril, meld dat die gemiddelde grootte van wildbevolkings van 1970 tot 2020 met 73% gekrimp het. Dit is volgens die Living Planet-indeks (LPI), wat 35 000 bevolkingsneigings en 5 495 spesies amfibieë, voëls, visse, soogdiere en reptiele ondersoek. Deur die veranderinge in die grootte van spesiebevolkings dop te hou, dien die LPI as ’n vroeë waarskuwing vir moontlike uitsterwings en ’n aanduider van die gesondheid van ekostelsels. Die WWF het bevind dat varswaterspesiebevolkings met sowat 85% gekrimp het, gevolg deur spesies op land (69%) en seespesies (56%). Die grootste afnames was in Latyns-Amerika en die Karibiese See…

Vroueboere sukkel nie sommer meer nie – hul pa’s is meer geneë om hulle te betrek, medeboere en landboukundiges help graag en daar is ’n magdom tegnologie wat die lewe makliker maak. Hul bydrae is van onskatbare waarde, veral in die manier waarop hulle vrouewerkers tegemoet kom. Een só ’n vroueboer is Ané van Zyl wat saam met haar ouers, Gideon en Vere, op Wilgenhof en hul ander naburige plaas, Bellevue, by Vredendal boer. “Ek was nog altyd lief vir die buitelewe, die natuur, diere en mense. Ek het nooit gedink ek sou kom boer nie, maar die gogga het my gebyt.” Die covid-19-pandemie, met sy inperkings, het haar lewe halfpad deur haar landboustudie aan die Universiteit Stellenbosch omvergewerp en sy het die laaste twee jaar van haar graadkursus in…

Herlewing van die platteland As ’n plattelandse gemeenskap sy kragte saamgooi en sy rug styf maak teen ’n wanfunksionele munisipaliteit, kan hy vir homself bedingingsmag skep om die owerheid te dwing om sy werk te doen. “Die staat het sy vermoë verloor om in munisipaliteite te regeer,” het Peter Wassenaar, prokureur van die regsfirma Kriek Wassenaar en Venter (KWV), die treurige situasie in talle plattelandse gemeenskappe opgesom op ’n onlangse bosberaad van Sakeliga in Pretoria oor die bespoediging van dorpsherstel deur alternatiewe oplossings. Chris Bosch, uitvoerende hoof van Rural Maintenance wat op verskeie dorpe betrokke is om inwoners te help, het gesê die tyd is verby om stil te bly oor swak munisipaliteite. “As basiese dienslewering in Suid-Afrika op koers kom, het ons ’n toekoms. As ons dit net los,…

PromosiePANNAR Vyf jaar gelede het Jeff Hlela die dapper besluit geneem om self ’n boer te word nadat hy nege jaar lank vir ander boere gewerk het. Hy het gekies om sy risiko te versprei deur vars produkte op 30 ha huurgrond by Albert Falls en Mooirivier in KwaZu-lu-Natal te verbou, en mielies en sojabone op 50 ha gehuurde droëlandgrond by Ixopo. Jeff se boerdery, Hangala Farming, het dalk nog nie sy eie landbougrond nie, maar totdat dit gebeur, doen hy ervaring op en slyp sy produksievaardighede. Hy is ook nie te trots om ondersteuning en raad te vra nie. Twee van sy sleuteladviseurs is Eric Wiggle van Graan SA se boere-ontwikkelingsprogram en Andrew du Plessis, verteenwoordiger van Pannar Saad in die suide van KwaZu- lu-Natal. “Ek luister na wat…

Boereplan Die stewige plastiekhouers waarin vloeibare kunsmis en melasse aangekoop word, is heeltemal te waardevol om net weg te gooi. Só meen Niel du Toit van die plaas Hermanusheuwel by Bredasdorp. Om egter aan te hou om die houers bloot op te gaar, was ook nie meer ’n opsie nie. Met selfvoerders vir skape en lammers wat ’n mens minstens R6 500 uit die sak kan jaag, het hy begin dink aan ’n plan om die reghoekige houers, wat 640 liter vloeistof hou, in selfvoerders te omskep. “Ek het die lang sye aan die onderkant oopgesny, asook aan weerskante tot taamlik ver bo. Toe kon ek die dik plastiek skuins na binne buig om ’n omgekeerde piramide te vorm. Ek het houtbalkies in die vier hoeke vasgesit om die losgesnyde…

FOKUSWIELE Sekere dinge moet ’n mens nie sommer bevraagteken nie. ’n Rolex se tydhouvermoë en die indruk wat dit maak. Handré Pollard se fokus en skopvaardighede. En dat ’n Cruiser koning is. Finish en klaar. Dié lofprysings bring hoë verwagtinge. Die Prado moet dus van hoek tot kant uitmuntend wees – daar is nie ruimte vir middelmatigheid of verskonings nie. En om met die deur in die huis te val: Die Prado se deure voel hol en blikkerig. Dié teleurstelling tref my toe ek die bestuurdersdeur vir die eerste keer toemaak en die venster vir ’n breukdeel van ’n sekonde rammel voor dit tot ruste kom. Dit is ’n gebrek wat moeilik is om oor te sien in ’n ryding in hierdie prysklas, wat nog te sê van ’n splinternuwe…

Wyn Daar was nooit ’n Damaskus-oomblik nie, maar net altyd ’n liefde vir wyn, sê Gerard de Villiers in sy kantoor, waarvan die mure van die dak tot die vloer met geraamde propaganda-plakkate van oor die wêreld heen behang is. Sy ronde swartraambril versterk die indruk van ’n kreatiewe, dog stylvolle persoon. Uit sy potlood – hy het ’n punt daarvan gemaak om nooit op ’n rekenaar te leer teken nie, want “ek hou nie van cut and paste nie, ek sien te veel daarvan” – het die ontwerpe gevloei vir plaaslike en buitelandse kelders soos Babylonstoren, Delaire, L’Ormarins, Chateau Clauzet, The Newt, Jackson Family Vineyards, die Rathfinny-landgoed en Klein Constantia. Hy was al by die ontwerp van meer as 200 kelders en ’n klomp stokerye wêreldwyd betrokke. “Ek was…

Limousin 1 Junior en grootkampioen vroulike dier, DL 21-156 Devlan Kelly. Sy het ook die goue beker vir die opperste kampioen vroulike dier (alle rasse) verower. Eienaars: John (083 454 3095) en Tracey Devonport Devlan-stoetery, Vaaldam. Hanteerder: Anwill Coetzee. 2 Senior en grootkampioenbul, DL 20-35 Devlan Pathfinder. Eienaars: John en Tracey Devonport. Hanteerder: Petrus Mofokeng. 3 Junior kampioenbul, DL 21-132. Eienaars: John en Tracey Devonport. Hanteerder: Joseph Mbatha. 4 Kampioenverskalf, DL 23-03 Take Off. Eienaar: Gert Davis (076 560 9856), Davis Limousin, Delmas. Hanteerder: Abraham Tsimako. Dexter 5 Junior en grootkampioen vroulike dier, MIST 20-203 Natali, met haar bulkalf, Dudley. Eienaar: Gert Davis, Davis Limousin, Delmas. Hanteerder: Abraham Tsimako. 6 Senior en grootkampioenbul, SZJ 20-34 Prospect. Eienaar: Gert Davis. Hanteerder: Abraham Tsimako. Santa Gertrudis 7 Senior en grootkampioenkoei, IGB 19-89.…

Wat is jou agtergrond? Ek is op Witbank, Mpumalanga, gebore en het op Balmoral, tussen Witbank en Bronkhorstspruit, op die plaas Wasbank grootgeword. My pa, Kerneels, het daar ’n klompie beeste aangehou. Ek was in die plaasskooltjie op Balmoral, het hoërskool by HTS Middelburg voltooi en toe is ek Potchefstroom-landboukollege toe. Hoe het jy in die afslaersbedryf beland? Ek het as kind vakansies saam met my pa by Witbank-veilingskrale gewerk waar hy die afslaer was. Toe ek klaar is met kollege het ek vir ’n kort rukkie by hom aangesluit voordat hy oorlede is aan kanker. Daarna het ek sy aandele in Witbank Karoo-Ochse geërf. Dit het my een van vier vennote in die onderneming gemaak. Sowat vier jaar gelede het ek oorgeneem as uitvoerende bestuurder. Ek veil al vir…

Die vierde Jakaranda-veiling (Ile de France en Suffolk) op 17 Augustus by die Fire and Wine-arena buite Pretoria was weer ’n merkwaardige gebeurtenis op die veekalender. Soos verwag, was daar ’n sterk teenwoordigheid van kopers en telers. Hoewel geen uitskietpryse behaal is nie, was die veiling ’n groot sukses en al die diere is verkoop. Die twee duurste Ile de France-stoetramme is teen R35 000 elk verkoop. Lot 33 van Jancor Ile de France, Amersfoort, is aan Pieter Janse van Rensburg van die Springbokvlakte verkoop, en lot 31 van Hageland Ile de France, Klerksdorp, aan Zakariya Chiboo van Roodepoort. Die duurste stoetooi, lot 13, is vir R24 000 aan FJ Broers-boerdery, Belfast, verkoop. Die teler was Jancor Ile de France. Johny Forbes van Vredesig Dormers en Suffolk by Darling het…

Die Noord-Vrystaatse SA Vleismerino-klub het op 28 Augustus 2024 ’n suksesvolle veiling op die Hoërskool Trio se landbouterrein op Kroonstad aangebied. Rowlen von Gericke van Marquard het die duurste ram op die veiling verkoop. Poena Meintjies van Bultfontein het dié ram, 3128 RVG, vir R16 000 gekoop. Altesaam 27 ramme is vir ’n gemiddelde prys van R10 370 verkoop. OVK Ladybrand het die veiling aangebied en Gareth Hughes was die afslaer.…

Die 19de jaarlikse veiling van die Frontier Bonsmaras-telersgroep is op 21 Augustus op Makhanda (Grahamstad) gehou, waar die ongelooflike 100%-verkope van bulle vir die 19de jaar agtereenvolgens gehandhaaf is. Die veiling is baie goed bygewoon en 143 kopers van oor Suid-Afrika heen het geregistreer om te bie. SwiftVee het die aanlyn deel van die veiling behartig. Al 358 diere is verkoop. Altesaam 74 Bonsmara-bulle is vir gemiddeld R77 837 verkoop. Die duurste bul, wat vir R170 000 verkoop is, was lot 28, DAJ 22 070, geteel deur Justin Stirk en gekoop deur Waldo en Marette Dreyer (WM Dreyer Bonsmaras) van Kenton-on-Sea. Altesaam 12 van die bulle is vir R100 000 tot R170 000 verkoop. Die afslaer, Brandon Leer, het gesê die veiling was fantasties en dat uitsonderlike beeste deur ’n…

DIE internasionale graanraad (IGC) skets ’n rooskleurige prentjie vir die produksie van graan en oliesade wêreldwyd in die 2024-’25-produksieseisoen. In sy jongste skatting raam die IGC die wêreldproduksie van graan en oliesade op 2,3 miljard ton, effens hoër as die vorige seisoen. Die vooruitsigte vir sojabone lyk goed en ’n toename van 6% tot 415 miljoen ton word verwag. Die vooruitsig vir koring en mielies lyk minder gunstig, met koring se raming wat op 798 miljoen ton ietwat laer is as in die vorige seisoen. Vir mielies is die raming van 1,2 miljard ton op ’n jaargrondslag 0,2% laer. Wandile Sihlobo, hoofekonoom van Agbiz, waarsku dat dit nog vroeg in die seisoen is, veral vir die Suidelike Halfrond, en dat baie nog in die komende maande kan gebeur. “As die…

WENBRIEF Dinge wat jou laat goed voel Met die uitpak van Kersversierings kry ek ’n heimwee na toentertyd. Amper asof my hart troos soek in my kleintyd se stories. Die lekkerste geure van varsgebak uit ons plaaskombuis, die mooiste gehekelde komberse van Ouma en die bekende plaaspaadjies met ek soos ’n soldaat in my pa se spore. Sommer net die mooi van gister. Natuurlik was die “goeie ou dae” nie altyd nét goed nie. Maar in die onstuimige wêreld waarin ek my tans bevind, met sterftes ál nader aan die huis, hoë petrolpryse en sommige kruideniersware wat skielik onbekostigbaar duur word, is dit beter om my te omring met die bekende tye. Die goedgaantye, want as kind het ons van niks anders geweet nie. Verseker nie van hoë petrolpryse of…

Namibië BOUWERK vorder fluks aan die gebouekompleks waar Namibiese beesboere eersdaags 50 000 beeste per jaar wil slag, ontbeen en uitvoer in hul strewe om beheer van hul eie boerderywaardeketting te neem. Só wil hulle gunstiger vleispryse beding tot voordeel van die boer, sonder enige staatsbeheer of ander private aanlegte. Mecki Schneider, voorsitter van die Beef Value Chain Forum (BVCF) en Savanna Beef Operations (SBO), ’n produsente-organisasie wat gestig is om die projek te bestuur, sê die fondasies vir die abattoir, aanleg vir vleisverwerking en hoofkantoor op die plaas Teuffelsschlucht neffens die snelweg tussen Windhoek en Okahandja, is afgehandel. Die gebouestrukture en dakke is opgerig. Hulle is reeds besig om toerusting te bestel. Die kerngeriewe wat die slag-, verkoelings-, ontbenings- en versendingsafdelings insluit, sal na raming R352 miljoen kos. Die…

Om sterker en heel anderkant elke droogte uit te kom, is op die plaas Urusis ’n saak van erns vir Ernst Erni en sy seun, Sigi. Hulle boer net met vee wat in die oortreffende trap by die uiterste toestande aangepas is, en soos die wild die skrapse veld doeltreffend kan benut. Hulle het ook ver gevorder om hul droom te bewaarheid om uiteindelik al die vee en wild self in hul eie slaghuis te verwerk, en doen binnekort die laaste stap hiervoor. Op Urusis, wes van Maltahöhe in die weste van Namibië waar rooikop Persie-skape en Dexter-beeste floreer, is die wild ook gaandeweg besig om aan te teel nadat die droogte sy tol geëis het. Die meeste buitelandse trofeejagters wat by hulle jag, neem net hul trofeë huis toe…

Die Van Greunen-boerdery by George is sedert die middel 1980’s ’n lojale kliënt van Valley Irrigation. Die Van Greunen is die trotse eienaars van 57 Valley®-spilpunte en het die waarde wat dié spilpunte en Valley® se tegnologie tot hul boerderybedrywighede toegevoeg het, eerstehands ervaar. Hulle gebruik hul spilpunte hoofsaaklik om weiding vir hul melkkoeie te kweek, en verbou ook mielies, aartappels, bloubessies en avokado’s. Nelius van Greunen, besturende direkteur van die Van Greunen-boerdery, is een van vier broers wat vierdegeslagboere op die plaas is. Hy sê hul pa, Ben, het hul eerste Valley®-spilpunt in 1985 gekoop. “Die spilpunte het grootliks bygedra tot ons produktiwiteit. Dit help ons om water akkuraat op ons landerye toe te dien sodat ons optimale groei kan kry uit die beperkte beskikbare waterhulpbron.” Die huidige geslag…

Die doel met tegnologie is nie om boere met ’n magdom snuisterye sonder bewese nut toe te rus nie, maar om met oplossings vorendag te kom vir die probleme wat spesifiek tot hul plaas is. Só het Vikar Shupersad, streekskliënte-ondersteuningsbestuurder van John Deere, gesê op ’n tegnologiedag wat deur dié maatskappy aangebied is. Die maatskappy konsentreer nie daarop om ’n kitsoplossing vir almal na boere te bring nie, maar op ’n volledige benadering wat daarop gemik is om spesifieke kwessies op ’n plaas aan te pak, het hy gesê. “Ons lê klem op ’n wye reeks tegnologieë – van klein tot groot werktuie – wat die regte oplossing vir elke boer se spesifieke vereistes bied.” Die verdere voordeel van John Deere se produk- en tegnologie-oplossings is dat dit alles intyds…

Enkelkajuit vir ’n boer 5 Die Foton Tunland G7-enkelkajuitbakkie het in meer as een opsig teen die groot manne meegeding tydens Landbouweekblad se Enkelkajuit vir ’n boer-dag by die Sandwani-wildplaas buite Pretoria. Dié bakkie is ’n relatiewe nuweling op die mark vergeleke met ander handelsmerke wat al diep spore op Suid-Afrikaanse plase getrap het. Die Tunland was ook die enigste 4x2 op die dag wat met die oog op 4x4-bakkies beplan is. Ten spyte hiervan het die Foton meer as sy man gestaan. “Die bakkie het uitstekend presteer. Jy kon voel sy gat is ’n bietjie losser op die baan omdat dit ’n 4x2 is en hy nie traksiekontrole het nie, maar toe ek op die reguit stuk pad kom en hom vet gee, het hy vinnig spoed opgetel. Ek het…

FOKUSGEWASSE Kanolaverbouing buite die tradisionele Suid-Afrikaanse produksiegebied – die Wes-Kaap – word al hoe aanlokliker vir boere in die noordelike provinsies wat na nuwe opsies soek om ekonomiese druk te verlig. Op ’n onlangse kanola-boeredag by Lydenburg, Mpumalanga, het Heleen Viljoen, markekonoom van Graan SA, oor die markkwessies en -geleenthede vir kanola gepraat. Hoewel kanola ’n belowende nuwe kommoditeit in die noorde is, is daar steeds verskeie faktore wat die prys, vraag en langtermynvolhoubaarheid beinvloed, het sy gesê. Markdinamika van kanola Tradisioneel is kanolaproduksie en -bemarking in Suid-Afrika tot die Wes-Kaap beperk. Daar is egter nuwe markgeleenthede wat in die noordelike provinsies ontgin kan word. Die kwessie is om ’n stabiele en lewensvatbare plaaslike mark vir kanola in dié gebiede te ontwikkel, wat kanolaproduksie in Suid-Afrika ondersteun. Heleen het op…

1 Senior en grootkampioenkoei, OL 18-287 Mamma Mia. Eienaar: Christiaan de Jager (082 569 3359), O-La-La Chianina-stoetery, eManzana. Hanteerder: Nash Mubaiwa. 2 Junior en grootkampioenbul, OL 22-416 Bulldog. Eienaar: Christiaan de Jager (links). Hanteerder: Bernard Ngope. Regs is die beoordelaar, Jan Kloppers. 3 Senior en reserwegrootkampioenbul, OL18-233 Jerusalem. Eienaar: Christiaan de Jager. Hanteerder: Piet Mogale. Christiaan het ook die kampioenbulkalf, OL 23-470, ingeskryf. 4 Reserwe junior kampioen vroulike dier, LMB 23-14. Eienaar: Louis Botha (071 020 4118), LMB Chianina-stoetery, Nigel. Hanteerder: Gerald Mosanje. 5 Reserwe senior kampioenkoei, OL 385. Eienaar: Christiaan de Jager. Hanteerder: Bernard Ngope. 6 Kampioen-verskalf, LMB 23-17. Eienaar: Louis Botha. Hanteerder: Gerald Mosanje. 7 Reserwekampioen-verskalf, OL 24-516. Eienaar: Christiaan de Jager. Hanteerder: Nash Mubaiwa. 8 Junior kampioen vroulike dier, OL 22-411. Eienaar: Christiaan de Jager. Hanteerder: Nash…

Veilings TWEE NUWE rasrekordpryse is op die Namibiese nasionale Boran-veiling op 29 Oktober opgestel. Dit is geen geringe prestasie in die lig van die droogte wat tans in Namibië heers. Die hoogste prys van N$270 000 (N$1 = R1) is betaal vir 21-0009KG (lot 27), die eerste Canon CI 11-90-seun wat in Namibië te koop aangebied is. Hierdie bul word beskryf as ’n jong poenskopbul wat struktureel gesond is met uitstekende lengte en diepte, en goeie kapasiteit. Die verkopers was Kaspar en Stefanie Günzel van KG Boran by Grootfontein. Die tweede rasrekordprys is betaal vir TLN 21-158 Zadie, ’n dragtige vers van Louis Neethling van Borealis Borans, wat boerderybelange in Namibië en Suid-Afrika het. Volgens Louis is dié vers se ma een van die superster-teelkoeie op hul plaas. Sy is…

BKB Lewendehawe & Afslaers het op Woensdag 21 Augustus ’n uitstekende produksieveiling vir die Dohne-Merino-stoetery FEM van Frans en Andries Marx, vanjaar se nasionale Skaapboer van die Jaar, op hul plaas, Sewefontein, by Burgersdorp aangebied. Die duurste ram op die veiling was lot 30. Hy is vir R21 000 aan Coenraad Meyer van die plaas Vaalbank by Philippolis verkoop. Ramme het gemiddeld R10 428 behaal. JP Marais was die afslaer.…

Die soeke na ’n skaapras wat lae onderhou verg, het kopers op 24 Augustus na die Bosvelder-studiegroep se eliteveiling by die Warmbad Veemark, Bela-Bela, gelok. Theo Hoffman van Middelburg (Mpumalanga), voorsitter van dié groep van 45 lede, sê hulle ondervind ’n ongekende vraag na Bosvelders, ’n ras wat in 2013 ontwikkel is. Slegs een van die aanbod van 159 is nie verkoop nie. Die duurste ram was een van Theo wat vir R25 000 aan Johan Niemandt van Thaba Nyala-wildtelers, Mokopane, verkoop is. Nog ’n stoetram van Theo is vir R19 000 aan Hiland Bosvelders van Polokwane verkoop. Die duurste Bosvelder-ooi met drie lammers is deur Dirk Rosema van die Marken-stoetery in die Waterberg-distriksmunisipaliteit vir R20 000 verkoop aan M.A. Mogaladi van Sekhukhune, Burgersfort, wat aanlyn gebie het. Vleissentraal Bosveld…

Lesch Boerdery van Lood en Ida Lesch se algehele-uitverkopingsveiling het op Saterdag 24 Augustus 2024 op die plaas Elandsvalley, Bronkhorstspruit, plaasgevind. Die duurste bul was LJL1753 (lot 10), wat vir R62 000 aan Frans Mlalelincube van Linmeyer, Johannesburg, verkoop is. Die duurste koei, LJL1831 (lot 40), is vir R30 000 verkoop aan I.A. Peer van GMA Peer-familietrust van Dundee, KwaZulu-Natal. LJL236 was die duurste koei met ’n kalf op die veiling. Sy is vir R40 000 verkoop aan Pieter Meiring van Groblersdal. Die duurste vers, LJL198 (lot 17), is vir R28 000 aan Gert Davis van Delmas verkoop is. Benewens die Brahmane is plase en werktuie ook opgeveil. Die veiling is aangebied deur Clive Gardner Afslaers en die afslaer was Hendrik Nel.…