Indice dei contenuti per 2025-04-01 in Isolezwe

UZONIKELA ngengxenye yemali emphakathini waseNquthu, lapho eqhamuka khona u-Akhonamathemba Mbhele, odume ngelikaSweet Guluva njengoba ethi leli dolobha lisadinga okukhulu ukuthuthukiswa. Ukusho lokhu ehlangene nabezindaba eBrown Sugar, eMhlanga ngeSonto ntambama. USweet Guluva ukhale wemuka nemali enguR2 million, emncintiswaneni iBig Brother Mzansi. Kulezi zinsuku useThekwini uhambela imisakazo, amaphephandaba nezindawo zobumnandi ukuhlangana nabalandeli bakhe nokuxoxa ngohambo lwakhe esendlini kaBig Brother. Ekhuluma neSolezwe uveze ukuthi usekulinde ngabomvu ukuhlangana nabantu baseNquthu, njengoba kulindeleke ukuthi amukelwe okokuqala edolobheni langakubo selokhu adla umhlanganiso. “Ngimema bonke abantu ukuthi baphelele eNquthu ngalolu suku, sizojabula sonke. Ngiyabonga kuwona wonke umuntu namanje ngisahluleka ukuchaza indlela engizizwa ngayo. “Kodwa engingakusho ukuthi ingxenye yemali kwengizoyithola kukhona engizokwenza ngayo ukubuyisela emphakathini waseNquthu. Idolobha elincane leli engifisa ukuthi lithuthuke kakhulu. Kodwa yize abantu sebengazi mina akukho engingakwenza ukulibeka ezingeni engifisa libe kulo, ukuthi nje…

USIHLALO wekomiti lezoMhlaba nokuThuthukiswa kweziNdawo zaseMakhaya uMnuz Albert Mncwango, uveze ukuthi wathela izithelo umhlangano phakathi kweSilo samaZulu, uMisuzulu kaZwelithini neNgonyama Trust Board. Lo mhlangano owawungoFebhuwari, wawuhlose ukuthola izinselelo nokungaboni ngaso linye phakathi kweMbube, namanye amalungu ebhodi. UMncwango uthe noma besematasa nokuhlanganisa umbiko wekomiti ngabakuthola kodwa waba yimpumelelo. "Saya KwaZulu-Natal siyikomiti lePhalamende, ukuyozitholela ngezinkinga ezikhona phakathi kweMbube nebhodi leNgonyama. Sasingayile ukuyogxeka othile noma ukuvuna othile kodwa ukuthola ngokushuba kwesimo. Noma singeke sikuveze okuningi ngokwavela ngoba kusadingeka sixoxe noNgqongqoshe womnyango, uMnuz Mzwanele Nyhontso, mayelana nombiko. Siyazazi izinselelo nezinkinga ezikhona kanti sizohlangana nongqongqoshe maduzane," usho kanje. Uthe bazohlangana noNyhontso kusasa bamchazele ngabakuthola kulo mhlangano. Mayelana nezindaba ezithinta ibhodi leNgonyama, uthe ngokwazi kwakhe ibhodi lisasebenza. "Sizohlangana nebhodi ngawo uLwesithathu, ngakho lisasebenza. Njengoba noNgqongqoshe ahlangana neSilo ngemuva kokuba sihlangane nathi siyikomiti, sifuna ukuzwa kuyena ukuthi…

KWEHLISWA kwezindleko zikahulumeni ngamacala asuke esefakwe kubameli kungasikhubaza kusiqede isikhwama esibhekele ezomthetho eminyangweni, ikakhulu kohulumeni bezindawo. Usho kanje uNgqongqoshe wezobuLungiswa nokuThuthukiswa koMthethosisekelo, uNkk Mmamoloko Kubayi. Ubephawula embuthanweni we-Salga National Municipal Legal Practitioners Forum obungesonto eledlule eTshwane, lapho enxenxe khona ongoti kwezomthetho ukuba beluleke uhulumeni ngezindlela zokunciphisa ukumangalelwa okuwuzaluzile kubhekiswe kuhulumeni. Kukulo mhlangano lapha uNkk Kubayi ehlongoze ezinye izindlela zokuxazululwa kwezimpikiswano kunokugijimela kubameli ukuze kugwemeke izindleko zabameli nezinkantolo. Izwe seliyinkundla yokufakana ezinkantolo njengoba abantu beya ngokufunda kabanzi ngamalungelo abo. Lokhu kushiwo nguye ungqongqoshe. Kodwa mhlawumbe kuwukugeja akuphakamisayo kokuthi kwakhiwe izinhlaka ezingaxazulula lezi zinkinga kunokuthi baye ezinkantolo. Lo mbono ucacisa ukuthi uhulumeni awubhekisisi izindlela zokwenza kangcono ukuze kunciphe ukufakwa ezinkantolo, ikakhulu ezingeni lohulumeni bezindawo. Akwethusi nje uma kuzwakala ukuthi omasipala bahleli nezikweletu ezesabekayo ezidalwa amacala afakwa abanikazi bezimoto abalinyalelwa izinqola zabo emigwaqweni…

QUKETHE izigigaba ezifikisela usizi, ezenzeke empilweni yakhe yangempela, incwadi yombhali, uSphesihle Mtshali, osanda kukhipha incwadi esihloko sithi “Kwase Kungifanele Ukufa”. UMtshali (22) odabuka KwaNoshezi, eMgungundlovu, uyikhiphe ngoFebhuwari kulo nyaka incwadi yakhe, athi uyibhale ngaphansi kwezimo ezinzima. Phakathi kwezigigaba axoxa ngazo, esokugula iminyaka emithathu, opha igazi endaweni yokuzikhulula, emva kokudlwengulwa abesilisa abathathu, abamyenga ngethuba elingekho lokuzilolonga kwiGolden Arrows ngasekupheleni kuku-2021. “Kuphele iminyaka emithathu ngifaka amaqakelo, kuhle kwabantu besifazane. Nabo bangcono ngoba bawafaka izinsuku ezithile enyangeni, mina kwakuyisinkwa sami semihla ngemihla,” kusho uMtshali, othe waze waphenduka inhlekisa endaweni, walahlekelwa nangabangani. Elandisa ngesehlakalo uthe njengomuntu owayephiwe ngasebholeni, wazithela phezu kwesikhangiso, ekhasini leGolden Arrows kwiFacebook, elalibukeka sengathi elangempela, kanti liwumbombayi lisungulwe yizigelekeqe ezagcina zimenzakalisa. Uthe isikhangiso sasithi ofuna ukuzibandakanya ethubeni eliyingqayizivele, lokuhlolwa ikhono kwiGolden Arrows, akafonele inombolo eyayibhaliwe bese elungisa uR500 wokubhekelela izindleko. “Savumelana…

UKUFAKA inkanyezi yesibili ejezini le-Orlando Pirates yikhona kuphela okwamanje okubukeka kungapholisa izinhliziyo zabalandeli baleli qembu njengoba isithandwa sabo somqeqeshi waseSpain, uJose Riveiro, kuvela ukuthi siphindela ekhaya ekupheleni kwesizini. IPirates eyavulela amaqembu aseNingizimu ne-Afrika ngokudla isicoco seCaf Champions League ngo-1995, isethubeni lokwengeza inkanyezi yesibili kulo mqhudelwano ekhombisa ifomu enhle kuwona kwazise kweyamaqoqo ibiqhobozela kwasani. Namuhla ngo-9 ebusuku eStade du 5 Julliet, uRiveiro uzozama ukubuya nomphumela oncomekayo njengoba eyodlala kowomlenze wokuqala neMC Alger yase-Algeria. Ukuvuthwa kwePirates kweyamaqoqo, kuyinike ithuba lokuwuqala ekuhambeni owe-quarterfinal. Umdlalo womlenze wesibili uzoba ngo-Ephreli 9 e-Orlando Stadium, eSoweto. Ukuwina lo mqhudelwano kukaRiveiro kungaba ngenye yezindlela zokupholisa ubuhlungu kubalandeli bePirates abangase bapheshukelwe yilo mqeqeshi engakavuselelwa inkontileka yakhe. Ngaphandle kukaRoger De Sa owayifaka kowamanqamu weChampions League ngo-2013, eminyakeni edlule iPirates ibilokhu ibuka iMamelodi Sundowns ikhula minyaka yonke kulo mqhudelwano ohlonishwayo ebholeni…

IMIPHUMELA yangempelasonto yeSafa KwaZulu-Natal ABC Motsepe League iphinde yacacisa ukuthi umbango wesicoco kuStream A wakulesi sigaba uzonqunywa yimidlalo emibili yokusonga isizini. IMidlands Wanderers esaqhwakele kuStream A, ibuye namanye amaphuzu ngempelasonto ishaya uMkhumbane Classic ngo 2-1, ngenkathi uMvoti uvulela isibhaxu sika 1-0 kuLundi United. INjampela FC ilahle amaphuzu ibambana ngo 2-2 neDurban Pioneers. IWanderers, uMvoti neNjampela yiwona amaqembu abanga ukuqeda eqhulwini kuStream A. Ukunqoba kweMidlands noMvoti kuqhubekile nokushubisa umbango. INjampela, esendaweni yesithathu ngamaphuzu angu-28, izenzele phansi ngokwehluleka ukuwina kwiPioneers. Isisele emuva ngamaphuzu amahlanu kwiMidlands eqhwakele ngangu-33. Ilandelwa wuMvoti ngangu-30. Njengoba umbango wesicoco kuStream A uphakathi kwala maqembu womathathu, sekukhomba ukuthi imidlalo emibili ewasalele ukusonga le sizini, iyona esizocacisa ngeqembu elizogcina lidlale umdlalo wokuhlunga umpetha wesifundazwe noMkhambathi FC ozidlele amahlangu kuStream B ingakasongwa isizini. Umdlalo obhekwe ngabomvu kule mpelasonto ngophakathi kweNjampela noMvoti…

PHELELWE ngamandla wachiphiza izinyembezi uSphamandla Dhlomo (27) ngesikhathi iNkantolo eNkulu yaseThekwini izolo imgweba odilikajele abangu-7 neminyaka engu-15 nengu-10, yeleka nengu-5 ngaphezulu ngamacala okubulala eMlaza. UDhlomo ulahlwe amacala ngenxa yesehlakalo sokubulawa kwabangu angu-9 esenzeka ngo-Agasti 11, 2023, kwaQ eMlaza. Ubekade ethwesewe uMbuso amacala awu-13; kuwona okukhona ukubulala abantu abayisishiyagalolunye, amabili okuzama ukubulala, elokugqekeza nelokutholakala nesibhamu esingekho emthethweni. Utheswe amacala okubulala okuhleliwe oMlungisi Zuma, Phakamani Sibusiso Dlamini, Maxwell Sibisi, Regional Bongimpilo Ngema, Thabani Ngcobo, Mhlengi Khathi, Ayabongwa Mbayise, Sifundo Sibusiso Dlamini noSifiso Cele. IJaji u-Esther Johanna Steyn lithe limgweba odilikajele abangu-7 ngesenzo sakhe esithe saba nonya olukhulu sokubulala. Lamnikeza eminye engu-15 ngelokufa kodwa elithe kwakungahleliwe. Lamgixabeze ngeminyaka angu-10 ngecala lokuzama ukusoconga uMnuz Phiwayinkosi Sibisi nentombi yakhe uNksz Mbali Shangase. Lileke ngeminyaka engu-5 ngaphezulu ngecala lokugqekeza ezindlini zabafi. Ngemuva kwalesi sigwebo uDhlomo…

OWAYENGUMENGAMELI wezwe uMnuz Thabo Mbeki, usephumele obala wathi okwenziwe yiMelika, inqamula uxhaso ezinhlelweni ezehlukene ebezisiza elakuleli kumele kube yisifundo sokuthi elakuleli, livuke lizithathe. UMbeki uthe elakuleli kumele lamukele ukuthi izinto zigaya ngomunye umhlathi manje. Ekhuluma esifundweni ngesishoshovu uMnuz Aziz Pahad, uMbeki uthe lo mholi ubezothuka ngamanga afafazwa ngelakuleli eMelika, ngoba wayehlale ezama ukuchaza okuzokwenziwa yi-ANC uma isemandleni. "Njengoba uPahad wayenamava kwezithinta ezobudlelwano namazwe omhlaba, wayezothuka uma iMelika eyizwe elinamandla kangaka, likholwa ngukuthi amabhunu ahlaliswe lubhojozi kuleli, futhi kunezinhlelo zokuthi kudliwe ngenkani umhlaba wawo, njengoba ebulawa. Wachitha isikhathi esiningi ezama ukuchaza izinto ezenziwa yi-ANC njengoba isemandleni," kusho uMbeki. Uthe lo mholi wayengahambisani nemfundisoze namanga afafazwa ngezwe. "Okwenziwe nguhulumeni kaTrump (Donald Trump, uMengameli waseMelika), kuyinto okumele i-Afrika iyibheke ngokuthi izinto zishintshile. Kudingeka i-Afrika ihambisane nalezi zinguquko," kusho uMbeki. Ubeke emahlombe oMnyango wezobuDlelwano…

MHLELI: Sinenkinga enkulu thina mphakathi waseNgedlaneni, eMpangisweni. Kwaphuma umhlaba wethu onamahlathi namapulazi, wathathwa umuntu osatshwayo noyisiqhwaga endaweni. Kumanje lo muntu usephuce ilungelo lethu lokusebenza, sivune kula mahlathi siwumphakathi. Okhulumayo umphonsa ejele eVryheid, aboshwe kungafuneki nabheyili, icala libe lilokhu lihlehlile njalo. Singumphakathi siya eNkantolo mhla wecala, kuvele kuthiwe lihlehlile. Lo oboshiweyo ungowomndeni wakwaMadide, okuyiwona mndeni ongabanikazi bempela balo mhlaba namahlathi atshalwa umlungu. Manje adliwa ngumuntu osatshwayo kakhulu. Sisola sengathi nabo abomthetho akabazi nokuthi bayini, uvele athi abangani bakhe. Yena uma eboshiwe kafakwa ejele nabanye, uboshwa yedwa, ijele kuye yisekhaya. Lo muntu uyaqhubeka nokufaka abanye ama-protection order la emphakathini - labo ababona bezomphazamisa esantshontsha amahlathi. Usevuna amahlathi omphakathi ososizini lokuswela umsebenzi. Uyapikla, aqhoshe ngokuthi bonke abaphikisana naye uzobabopha kungabi bikho bheyili. ENkantolo uhlasele izinduna, ezifuna imali ngenkani, athi azikhokhele amasekela azo, okusho…

UKHALA ezimathonsi ngocingo lukagesi lwepulazi eMcaki, eNdwedwe, okuthiwa selukhiphe isidumbu, umndeni wowesifazane otholwe ebambeke kulo ezintatha zayizolo. UNksz Sibongile Mdanda (60) utholwe esethule, ewele ocingweni, okuthiwa lusondele kakhulu eduze kwendlela ehamba amalungu omphakathi. Udadewabo kamufi, uNksz khanyisile Mdanda, uthe umufi ubeye komunye umuzi osendaweni, lapho ajwayele ukuyobona khona omunye wabangani bakhe. “Sisola ukuthi uwele kulona ucingo, lwamushokha washona. Ngenxa yokuhlala kwesidumbu sakhe ubusuku bonke kulona, kunezindawo lapho sidleke khona kakhulu,” kusho uNksz Mdanda. Uthe umbiko bawuthole ngomunye umakhelwane ozithele kusona, eya emsebenzini, wathi ubehlala yedwa umufi ekhaya, nokwenze kwangasheshe kwaqapheleka ukungabuyi kwakhe ekhaya ngeSonto ntambama. Uthe bayakhala ngalolu cingo ngoba ukube belungekho eduze kwendlela, ubengeke ashone kabuhlungu kanje udadewabo. “Ngesikhathi bebiya abelungu, bathi alubulali lolu cingo. Bakuphindile lokho nanamuhla (esho izilo) ngesikhathi sekulele isidumbu phansi. Sizibuza ukuthi, pho uma lungabulali,…

SITOBHA seMamelodi Sundowns, u-Aubrey Modiba sihlohle ozakwabo ngokuthi bangabinalo uzwelo uma sebebhekene ne-Esperance de Tunis yaseTunisia kowomlenze wokuqala we-quarterfinal yeCaf Champions League. ISundowns izokwamukela i-Esperance emdlalweni othathwa njengowamagqubu namuhla ngo 3 ntambama, eLoftus Versveld, ePitoli. Ziningi izinongo ezenza ukuthi lo mdlalo ophakathi kwalezi zikunzi zebhola lase-Afrika ulindelwe ngabomvu. ISundowns ayikaze iyishaye i-Esperance emlandweni yize sebehlangane amahlandla amane kweyeCaf. Yilona futhi leli qembu laseTunisia elikhiphe ompetha baseMzansi kowandulela owamanqamu ngesizini edlule okulandelwe wukuphela komsebenzi kuRhulani Mokwena. Ngesikhathi i-Esperance ikhahlelela iSundowns ngaphandle ngonyaka odlule, ibiqeqeshwa nguMiguel Cardoso osekungumlando ukuthi uyena osepheka kuleli qembu laseChloorkop. Kungenxa yalo mlando ophakathi kwalama maqembu uModiba ebadonse ngendlebe ozakwabo ngokuqinisa isandla kulo mdlalo womlenze wokuqala. “Akekho kithina odinga ukutshelwa ukuthi lo mdlalo uzoba lukhuni kangakanani nokuthi unemilenze embili yingakho kumqoka ukuwudlala kusibusa emqondweni lokho,” kusho uModiba obekhuluma…

BENEZINYANGA eziyisishiyagalombili ekhulelwe owesifazane waseLindelani, eMzinto, okuthiwa ubulawe kanye nodadewabo, bedutshulwa uyise wezingane zakhe ngeSonto. Umsolwa, uMnuz Nkanyiso Shezi, ogcine ngokuzingqokloza naye, uphinde wadubula nomunye umakhelwane, okumanje kuthiwa usesimeni esibucayi esibhedlela. Isidumbu sikaNksz Nandipha Lifana (33), esikadadewabo omncane uNksz Nangamso Lifana (29) nesikaShezi zitholwe zidindilize ndawonye emjondolo obuhlala laba besifazane. Kuvela ukuthi uShezi, obeyinkunzi yohlobo, wenza lesi sehlakalo nje, endlini yakhe kubo, ushiye owesifazane, naye obekhulewe ingane yakhe. Udadewabo wabesifazane, uNksz Nozuko Dlabom utshele Isolezwe ukuthi basola ukuthi umsolwa ubulale uNandipha edinwa ukuthi ngesikhathi emala, emva kwesikhashana emkhulelise ingane yesine, (uNandipha) wavele wangamlwisa. “UNandipha wayedinwa ukuthi owesifazane amalela yena, umngani wakhe omkhulu, wakhona endaweni. Okusho ukuthi wayelindele ukuthi uzolwa, wavele wakhetha ukuzithulela,” kusho uNksz Dlabom. Uqhube wathi njengoba ebesemkhulelise eyesine, kukhona ezinye ezimbili eziphilayo, eneminyaka engu-15 neneminyaka engu-10, kuthi ebingumagcino,…

I-ANC neMK bazophinde bazwane amandla kolunye ukhetho lokuchibiyela olubhekwe ngabomvu. Ushisa phansi umbango we-ANC neMK wokunqoba ukhetho lokuchibiyela oluzoba kuMasipala waKwaDukuza, kusasa. Ukhetho lokuchibiyela luzoba ku-ward 28 wakulo mkhandlu ophethwe i-ANC. Le ward ibiphethwe i-ANC, isikhala sivuleke emva kokushiya kukaMnuz Doeshniee Govender, omele iMK okhethweni lwakusasa. Wmabili amaqembu asho kugcwale umlomo ukuthi azodla umhlanganiso. Ngempelasonto i-ANC neMK bashayelele isipikili sokugcina, lapho bethumele khona osondonzima ukuba bayokhankasa okokugcina. I-ANC ithumele ilungu lesigungu esiphezulu, uMnuz Senzo Mchunu, ukuba ayonxenxa abantu ukuthi babuyisele i-ANC kule ward. I-ANC ibinomcimbi omkhulu obizwa ngeSiyanqoba, ngeSonto. UMchunu uthe bazolunqoba ngamalengiso ukhetho lwakusasa, wathi bazophoxeka abazitshela ukuthi sekuphelile nge-ANC. "Iya phambili le nhlangano, ayiyi emumva. Izinto ebeziyinkinga, ziyizihibe, sesiziqedile. Lena yinhlangano engakhiwanga izolo. Isuka kude. Akuyona inhlangano eqhamuka emva kwendlu, eyakhiwe ngoba nakhu sekukhona ukucasuka kwabanye base beyosungula…

MHLELI: Okwenzeka manje kwenza ngikhumbule kudala kusabuswa kwelikaPhunga noMageba abantu besakhuthele okwakuthi ehlobo kulinywe odukathole bamasimu, kulinywe wena mmbila, bhontshisi, zindlubu nembumba imbala. Kwakuphinde kulinywe odedangendlale bamasimu amabele, ngingasawaphathi amabhece, amathanga, obhatata kuze kulinywe imfe phakathi emmbileni. Kwakufuywe imihlambi, kungemasi kuyiziphihli okwakukhanywa umlaza emaguleni owawuhlula izinja. Nezinkomo emini libade sezibuya kuzosengwa seyiqhanse imibele ubisi luzivuzela. Odukathole bamasimu amabele ayebiza iqulu lezinyoni ezazilindwa ngabafana bephethe izindwayimane. Khona phakathi kwamasimu kwakugcinwa sekuphathwa amabhodwe kuphekwe wena sinambathi ngisho nefutho imbala. Lalihloba izwe ngoba kwakuba khona lonke uhlobo lwezinyoni okubalwa kuzo izimpangele, izinswempe, ngisho nezintaka imbala. Amadoda amaningi ayezihlalela emakhaya uma kudliwa ebusuku kuthiwe akumele kuphakwe kome amabhodwe ngoba kuyokwedlula isihambi sifele ekhaya ngenxa yendlala. Lokho kudla phela kwakufudunyezwa ekuseni kudliwe khona maqede kugezwe amabhodwe kuphekwe awasemini ngokunjalo nokwasebusuku. Isikhathi esesiphila kusona kule…

KUBA mnandi uma kuhlangene imindeni, izihlobo nabangani kudliwa izibiliboco, kugeleza neziphuzo. Sikuphathele imicimbi ehlukene exoxwa ngezithombe. Uma ufisa ukuthi izithombe zomcimbi wakho zishicilelwe kuleli khasi, zithumele nge-email ethi: isolezwe@inl.co.za. Bhala kafushane ukuthi bekuwumcimbi kabani, umayelana nani futhi ukuphi. Uma esithombeni kukhona abayisihlanu kuya phansi, sicela nibhale amagama nezibongo zomuntu ngamunye. Izithombe zemicimbi sezishicilelwa njalo ngoLwesibili.…

IKAIZER Chiefs ishayele isipikili sokugcina ngamathuba okufaka ekhabetheni okokuqala isicoco seDStv Diski Challenge (DDC) ngesikhathi ibhubhudla iSuperSport United ngo 4-0 ngoMgqibelo e-FNB Stadium, eNasrec. Ukuwina kweChiefs ngale ndlela kubukeka kuwumyalezo ocacile ngokuzimisela kwayo ngeligi yeDiski kule sizini. ISuperSport ibhubhudlwa nje, ingelinye lamaqembu obekubhekwe ukuba abhincisele nxanye iChiefs njengoba umbango wesicoco usuya ngokushuba nemidlalo incipha. Elinye iqembu ebelibalwa neChiefs neSuperSport embangweni, yi-Orlando Pirates kodwa ukukhala kwayo ngaphansi kuMaZulu FC ekhaya kuyenzele phansi. Izivivinyo zaMakhosi ziyaqhubeka njengoba kolandelayo ezovakashela iqembu eliwahleli emhlane, iStellenbosch FC, elivikela isicoco. Emidlalweni yeligi engu-22, iChiefs ikhombisa ifomu yompetha kwazise isinqobe engu-17, yadlala ngokulingana kwemithathu, yahlulwa kwemibili. Kusukela iDiski yasungulwa iChiefs ayikaze iyinqobe. Yagcina ngendebe iDiski Shield ngo-2018 nango-2022 iguqisa iStellies eMpumalanga Stadium, eHammarsdale. NgoMgqibelo, iChiefs izovakashela iStellies e-Idas Valley emdlalweni ongase ucacise okuningi ngombango wesococo seligi. Izolo…