Inhaltsverzeichnis für October 2016 in Weg!

Kom hier, my ou honne Die Hwange- nasionale park was die hoogtepunt van ons vakansie in Zimbabwe en Botswana. Ons het gebly in die Sinamatella-ruskamp wat hoog op ’n koppie sit. Van daar af kyk jy hoe leeus, buffels, kameelperde, olifante en ander kleiner wild onder in die vlakte water suip. Die paaie is ook in ’n goeie toestand. Die ruskamp was verlate. Dis hartseer om die geriewe so te sien staan. Die vriendelike personeel doen hulle bes om alles aan die gang te hou. Die nieregeringsorganisasie Painted Dog Conservation is werksaam in die park. Ons het een middag saam met die operasionele bestuurder, David Kuvawoga, en die veearts dr. Ishmael Makamba uitgegaan om ’n wildehond uit ’n strik te bevry. Ishmael het met trane in sy oë verduidelik dat…

In die winter en lente is die Overberg ’n see van groen en geel. Dan blom die kanolalanderye in heldergeel stroke en water stroom by die grysgroen berge af. Dié foto laat jou byna die koel bries teen jou vel voel en die vars lug proe. Hougaard Malan het dit geneem langs ’n grondpad suidwes van Swellendam. Onthou om altyd respek te hê vir die boere en hulle lewensbrood wanneer jy op ’n plaas foto’s neem. Moenie die landerye vertrap nie, en maak die plaashek altyd mooi agter jou toe.…

1-2 Oktober Aarbeifees, George Bring die gesin en kom pluk aarbeie! Of eet sommer net hande vol, of drink aarbeidrankies. Die grootmense kan selfs ’n wyn-en-bessieproe (R50p.p.) doen terwyl die kinders by die groot buitelugpark speel – hier is onder meer opblaasspeelgoed, teikenskiet, ponieritte en miniatuurtreinritte. Jesse Clegg maak musiek en die hele gesin kan deelneem aan ’n pretloop of -draf. Waar? Redberry-plaas, Geelhoutboomweg, Blanco, George Tyd Saterdag: 9vm.-5nm.; Sondag: 9vm.-4nm. Koste Saterdag: R45p.p.; Kinders (3-12 jaar oud) R35; gratis vir kinders jonger as 2. Sondag: R55p.p.; Kinders (3-12 jaar oud) R25; gratis vir kinders jonger as 2 Meer inligting 0448707123; strawberryfestival.co.za 5-10 Oktober Tierlantyn’kies-kuier-en-koopfees, Pretoria Dié fees is in 2010 deur drie vriendinne begin en het al só gegroei dat daar in April vanjaar 14000 besoekers kom…

Hulle is voorwaar een van Afrika se mees geliefde diere. Hulle is die sterre van klassieke Disney-films, die gesig van internasionale veldtogte, die gelukbringers vir selfoonmaatskappye en het selfs ’n werklikheidsprogram waarby nie eens die Kardashians kan kers vashou nie. Maar anders as filmsterre is meerkatte se persoonlikhede in die “regte lewe” net soos op skerm. Hulle kom voor in die droë westelike dele van Suider-Afrika, en die Makgadikgadipanne se wye oop vlaktes en bossieveld is een van die beste plekke om die meerkatfamilie dop te hou. Die grootste aantrekkingskrag van die diertjies is waarskynlik die gemak waarmee jy menslike eienskappe aan hulle kan toedig (antropomorfisme). Hulle lyk soos klein mensies as hulle op hulle agterpote staan, en hulle gesinslewe is baie soos ons s’n. Kom ons begin by die…

Alles wat jy wil weet Wanneer? 1-9 Desember 2017 Hoe lank is die toer? 9 dae, 8 nagte Vertrekpunt Ulundi, KwaZulu-Natal Eindpunt Ithala-wildreservaat Hoeveel kos dit? R17 550p.p. Ons besoek Ulundi, Hluhluwe-Imfolozi-wildreservaat, St. Lucia, iSimangaliso-vleilandpark, Kaap Vidal, Sibayameer, Kosibaai, Banganek, Tembe-olifantpark en die Ithala-wildreservaat…

Jou beste wintervakansie ooit! Elke wildreservaat is spesiaal, maar ’n handjie vol staan bo die ander uit. Dié wat met die jare ’n byna legendariese status verwerf het. Dis die soort plekke wat ’n mens minstens een keer in jou leeftyd met jou eie oë wil aanskou. En as jy reeds daar was, droom jy oor die volgende keer. Plekke soos die Kruger, die Namib, die Serengeti… en Etosha. Ek kan nie mooi raakvat wat hom so uitsonderlik maak nie. Hier waar ek nou by die Renostervlei-watergat in die weste van die park sit, lyk die vlakte omheen maar bra uitgewas. Net die mopaniebome se laaste vlinderblaartjies klou nog in verset teen die winter vas. Verder lyk die veld maar nerfaf. Tog voel ek tevrede om nou hier te kan…

WAAR SLAAP EK? Die Thendele-kamp met sy onverbeterlike uitsig oor die Amfiteater is prima eiendom in dié geweste. Dit het ’n onderste en boonste (die nuwer) oord. Elkeen het selfsorgchalets met ’n kaggel en braaiplek, en slaapplek vir 2 tot 6 mense. Die luukser Thendele Lodge is ook selfsorg, met slaapplek vir 6. Koste Onderste oord tot einde Oktober 2016: R1 000 p.n. vir ’n chalet met slaapplek vir 2 en R1 750 vir 4 mense. Vanaf November 2016 kos dit R1 280 en R2 520 p.n. onderskeidelik. Boonste kamp tot einde Oktober 2016: R1 120 p.n. vir ’n chalet met slaapplek vir 2 en R1 960 p.n. vir 4 mense. Vanaf November 2016 kos dit R1 440 en R2 520 p.n. onderskeidelik. Verblyf in die Thendele Lodge kos vanaf…

LESER VERTEL CHRISSIE NAUDÉ-FOURIE Tuisstad Centurion Beroep Afgetredene Elke jaar in die Nederlandse lente – wanneer die tulpe en rhododendrons vol in blom staan – gaan kuier ons in dié Europese land. My seun Jaco Naudé, skoondogter Marieke de Ridder en drie kleindogters woon op die dorpie Roosteren in die suide, op die grens met België. (Hulle ry dikwels met hulle fietse oor die Maasrivier om in België te gaan uiteet.) Elke jaar beplan Marieke vir ons ’n propvol toer in haar tuisland. Vanjaar was die noorde van Nederland aan die beurt: Dis van die mooiste dele van die land, soortgelyk aan Venesië met kanale wat rondom die huise en landerye vloei. Sy het dié sewe dae lange toer vir ons beplan. Dankie, Marieke! DAG 1 Edam Ons verken die…

Krokodil en seekoei wat baklei, luiperd wat visvang, twee aasvoëls wat in vlug stoei, ’n jagluiperdfamiliefoto... As jy van wildlewefoto’s hou, sorg dat jy voor 25 September uitkom by die Iziko- Suid-Afrikaanse museum ( iziko.org.za) in Kaapstad. Die beste van die Nature’s Best Photography Africa-kompetisie word dan hier ten toon gestel, en ons vasteland sit haar heel mooiste voetjie voor! Daar was dié jaar 14 kategorieë en meer as 9 000 inskrywings van amateur- en professionele fotograwe wat almal een van die pryse wou wen (onder meer ’n reis na die Maasai Mara-reservaat in Kenia of die Serengeti- nasionale park in Tanzanië). Ons wys hier ’n paar van die pragfoto’s. ’n Keur van die wenfoto’s en -finaliste gaan ook deel wees van die jaarlikse Nature’s Best Photography-uitstalling in die Smithsonian…

Dit was die bok se skuld Ons het langs die Transportdam in die Krugerwildtuin na jagluiperds sit en kyk. ’n Rooibok het meteens uit die bos gestorm en reg in ons voertuig vasgehardloop. Hy moet sy nek gebreek het, want hy het net bly lê. Die jagluiperd het stilgestaan en om die beurt vir die bok en vir ons gekyk en toe die bok bespring. Ná ’n ruk het Ta die rooibok bos-in gesleep en sy maters het saam feesgevier. Soos ’n besoeker uit ’n ander kar tereg gesê het: “Ek’s jammer oor die skade, maar vrek, dit was opwindend!” HELENA GILFILLAN, Nigel Brandwag staan sy man Dié bobbejaanmannetjie moet in ’n ernstige geveg betrokke gewees het. Ons het hom naby die Olifantsruskamp in die Kruger dopgehou. Hy het onder…

Kaapse blommeskou Is jou tuin se petunias jaar op jaar die mooiste? Of wens jy jou beddings het soos iets uit ’n tuinboutydskrif gelyk? Hier’s ’n saamtrek vir elke soort tuinier. Die jaarlikse Kaapse Blommeskou word in Oktober in die Kasteel de Goede Hoop gehou. Kom kyk na van die land se beste landskapargitekte en -ontwerpers se skoutuine en kry ’n wenk of twee, woon slypskole by of wys jou slag in die MasterFlorist-kompetisie. Jy kan ook tuinmaakgereedskap en saad van ’n wye verskeidenheid winkels en kwekerye koop. Hier is ook kosstalletjies en baie drankies om van te kies – tee en koffie, boetiekbier, jenewer, vonkelwyn... Datum 27-30 Oktober Waar? Kasteel, Darlingstraat, Kaapstad Tyd Donderdag-Saterdag:10 vm.-9 nm.; Sondag: 10 vm.-5 nm. Koste R180 per volwassene; R90 per kind tussen 10…

‘In your hands and those of your children lie the power and freedom won; you must not merely maintain but increase the sacred gift. Be merciful towards the weak, the down-trodden, the stranger. Do not open your gates to those worst foes of freedom – tyranny and selfishness.’ – Emily Hobhouse by die inwyding van die Vrouemonument, 13 Desember 1913 Wat was jou eerste kennismaking met Emily Hobhouse? Al wat ek op skool geweet het, was die verhaal van Emily in die konsentrasiekampe en so ’n bietjie van haar spin- en weefskole. Van haar ongelooflike intellek, skryftalent, die feit dat sy sewe tale magtig was, pasifisme en dat sy eintlik ’n vegter vir menseregte was, het ek niks geweet nie. Waarom het jy die boek aangepak? Ek het gelees hoe…

Waar kom jou liefde vir die natuur vandaan? Ek het meestal op suikerrietplase in KwaZulu-Natal grootgeword. Baie van my skoolpêlle het op die dorp gewoon; ek het dus baie tyd op my eie deurgebring en meestal alleen visgevang of goed met ’n windbuks geskiet. Dit het ’n groot liefde en waardering vir die natuur by my gekweek. Waaroor gaan jou doktorsgraad? Ek kyk hoe ons luiperds op ’n provinsiale en nasionale vlak bestuur – en hoe ons dit nog beter kan doen om hulle te bewaar. Ek kyk onder meer of dit wel moontlik is om trofeejag volhoubaar te doen, hoe dinge soos wildreservate vrylopende wild beïnvloed, en tot hoe ’n mate verskillende luiperdbevolkings se habitats met mekaar verbind is. Hoe lyk jou werkdag? Dit wissel tussen veld- en rekenaarwerk.…

Die braaivuur het nou al twee keer doodgewaai. Maar ek kan nie my oë op die vlamme hou nie, nie met die Amfiteater wat my gesigsveld van kant tot wal vul nie. Dié rotsformasie is die kroon van die Drakensberg. Nie een van die indrukwekkende bergpieke kan hierby kers vashou nie. Selfs Tafelberg lyk soos ’n tuinmuurtjie in vergelyking. My verstand sukkel om dié basaltkrans se omvang in te neem – van daar waar g’n varing of kiepersol se wortels meer kon vastrapplek kry nie, skiet die reeds intimiderende berg nóg 500 m die lug in en maak sy skouers breed oor sowat 5 km. Dis ’n ongelooflike gesig teen sonsondergang hier van die Thendele-kamp se chalets af. Buite elke huisie staan die mense net en staar – aandete vergete.…

Verken die Drakensberg te perd By die Rugged Glen-kampterrein (genoem na een van die plase wat later jare by die reservaat ingelyf is) is stalle waar jy vir begeleide ritte van 30 minute tot ’n namiddag lank kan aanmeld. Beginners is welkom. Die roetes kronkel deur ’n groot deel van die reservaat en dis ’n heerlike manier om die gebied uit verskeie hoeke te bespied. As jy rustig aanpiekel, kan jy ook goeie foto’s uit die saal neem. Waar? Die pad na Rugged Glen draai net buite die reservaathek af – volg die aanwysings vir sowat 2 km. Koste Vanaf R120 p.p. (halfuur) tot R490 p.p. (halfdag) Bespreek vooraf by 076 180 6176 Kyk rotskuns Die Drakensberg is ryk aan rotskuns, en hier in die Sigubudu-vallei is ’n hele paar…

Ons is gestrand. Iewers op ’n grondpad ’n paar kilometer noord van Loeriesfontein, diep in die Boesmanland. In die pad voor ons – ek en my vriend Pieter – storm ’n rivier van sowat 30m breed verby en maak bruin golfies bo-oor plaasdrade. Die kaartboek het ’n ompad aangedui ’n ent terug. Daar gekom, het ’n verwilderde boer met oë so groot soos dorperskaap s’n deur sy bakkie se oop ruit geskreeu: “Julle moet hier wegkom, die vlei stoot toe!” En toe deur ’n stuk water geduikboot en teen ’n bult uitgejaag. Nou sit ons weer voor ons rivier en wag… Teen laatmiddag hou dit op reën, die donker wolke breek effe oop en strale son kom oor die vlaktes na ons toe. Ons steek net daar ’n vuur aan…

JAN FOURIE Nikon D7000 Sigma 150-500 mm-lens TOAST SÊ: Al die foto’s in vandeesmaand se “Mense se lense” is vroeër vanjaar op een van Weg se Botswana-fototoere geneem. Een van die hoogtepunte op só ’n toer is die Choberivier. ’n Sonsondergangvaart op hierdie wilde Afrikarivier bring jou na aan die diere, of dit nou kleurvolle voëltjies soos visvangers of byvreters is, of groot soogdiere soos seekoeie, buffels en olifante. Die diere is gewoond aan al die toeristebote. Dit beteken hulle hol nie weg nie en gaan grotendeels aan met hulle dinge asof jy nie bestaan nie. Hierdie twee jong olifante was lus vir stoei, en Jan se aksiefoto vang die energie goed vas. Sy sluiterspoed van 1/640ste van ’n sekonde was net vinnig genoeg om die beweging van die diere…

H et jy geweet hier staan nog een van die oorspronklike peerbome in die Kompanjiestuin in die Kaapse middestad? Ja, van dié wat Jan van Riebeeck se mense in 1652 geplant het! Kom kyk na dié ou boom, en leer ook van ’n norring ander plantspesies. Of besoek die nabygeleë Suid-Afrikaanse Museum, Nasionale Galery en Planetarium. ’n Mens kan ook deur die hekke loer hoe lyk Tuynhuys, die president se kantoor in Kaapstad. Nóg ’n goeie rede om die Kompanjiestuin te besoek is The Company’s Garden-restaurant. Dis die soort plek waar jy heeldag saam met vriende om borde stylvolle peuselkos en goeie wyn kan kuier, of sommer net vir ’n Marmite-broodjie en ’n potjie tee inval voordat jy weer die tuin of omliggende museums en galerye verder verken. Van tee…

Lus om ook in die Chobe te gaan draai? Ons Botswanagids is nou op die rak. Of bestel jou eksemplaar vir R55 by winkel.weg.co.za…

JOHN HARTMANN van Pretoria vra: Dit lyk asof die skoenlapper ’n kop van voor en ’n kop van agter het? Is dit om ander diere of insekte te flous? Die insekkenner DUNCAN MACFADYEN antwoord: Hierdie is die appelkoosspelertjie (Deudorix dinochares). Hulle is pierewaaiers, altyd op soek na ’n maat. John is reg: Die vals kop is ’n oorlewingsmeganisme – en ’n baie slim een. Ek het al skoenlappers sonder die vals deel gesien. Iewers het ’n teleurgestelde voël die verkeerde “kop” gekies en was sy maaltyd kwyt. INGRID PASSIER van Roodepoort vra: Saalbekooievaars is ’n bedreigde spesie, en ons was gelukkig om ’n wyfie en ’n mannetjie te sien in ’n droë rivierbedding by die Ingwelalanatuurreservaat langs die Timbavati- private natuurreservaat. Die wyfies se oë is geel en die mannetjies…

Duik saam met krokke?! Haaihokduik is só uit die mode... Danksy die maatskappy African Croc Dive kan jy nou by die Le Bonheur-krokodilplaas naby die Paarl saam met krokodille swem. Goed, nie sáám met hulle nie... jy is veilig in ’n hok. Twintig van die plaas se grootste krokodille word spesiaal vir dié doel in ’n afsonderlike kamp met ’n dam (wat meer soos ’n swembad lyk) gehou. Dis nogal ’n ervaring om dié reptiel onder die water te sien. Die hok het perspex-“vensters”, jy kry ’n duikbril en die water in die dam is helder. En as jy dapper is, sal Hennie Bosman, die medestiger en -eienaar, vir jou sê wanneer jy aan daai growwe vel kan vat... Maar ek wil nie nat word nie... African Croc Dive het…

‘Julle kýk vir mekaar, kopknik in ’n amperse groet, en wonder: Waarvandaan en waarheen is dié mens op pad?’ Die spits by die ingang tot die Krokodilpoort oos van Nelspruit móét tog ’n naam hê, dink ek terwyl dit al nader opdoem en neem my vir die hoeveelste keer voor om daaroor op te lees. Of om ’n kaart in die hande te kry wat iedere kontoer, heuwelrug en kruin se naam gee. Ek het lankal ophou tel hoeveel keer ek dié pad van my tuisdorp, Kaapsehoop, af gery het vir skoolsport of werksake, ’n middagete in Maputo of ’n welverdiende seevakansie. As jy die Verenigde Nasies van voertuie wil beleef, kom ry die Maputo-korridor. Hier is skedonke en stasiewaens met ma’s wat “net gou” iets vat wat ’n Nelspruit-koshuiskind…

’n Mens kan maklik dink die reservaat se naam het te make met die majestueuse berge wat soos klipkastele hier rondom jou staan. Maar dis nie éintlik waar die “Koninklik” vandaan kom nie. Die Thendele-kamp is nie die reservaat se oorspronklike blyplek nie. Tussen die foreldam en die Mahai-kampterrein staan die ruïne van ’n eens aanskoulike klipgebou, nou byna deur varings en onkruid verbloem – die hotel waar niemand anders nie as koningin Elizabeth oorgeslaap het. Ene Walter Coventry het die plaas Goodoo in 1903 gekoop, met die hoop om besoekers na hierdie hoek van die Drakensberg te lok. Die eerste (primitiewe!) blyplek is in 1913 gebou –’n klein herberg waarheen besoekers van die Ladysmith-spoorwegstasie af met ’n ossewa aangery is. Nog ’n paar plase is bygekoop en op 19…

Karoopasse en -poorte Ervaar albei kante van die Swartbergpas, die golwende heuwels van die Klein-Karoo en die vlaktes van die Groot-Karoo, sowel as die Montagupas. TOERINLIGTING  Datums15-19 November 2016; 2-6 Maart 2017 Hoe lank is die toer? 5 dae, 4 nagte Gemiddelde daaglikse afstande 30-50 km Vertrekpunt Queen’s Hotel, Oudtshoorn Blyplek Hotelle, gastehuise en private kampterreine Tariewe R7 950 p.p. wat deel; R3 975 per kind jonger as 12 wat deel; R10 335 enkeltarief REISSKEDULE  Die toer sluit in mooi en unieke fietsroetes, waarvan baie ontoeganklik is vir private ryers. Dit sluit in die Surval Olive Estate, Red Stone Hills, Swartbergpas, Prins Albert en die Montagupas. Ingesluit is ekstras in soos ’n olyf- en wynproe en middagetes op spesiale plekke. Garden Route Ramble Volg ou olifantroetes langs die kontoere van…

Sedert die bekendstelling in 2012 het die NC750X immergewild in Europa geword as ’n mini-avontuurmotorfiets. Die 2016-model het verskeie opgraderings gekry wat sy toervaardighede opgeskerp het: Die windskerm is met 7 cm verleng en die bêreplek bo die enjin is vergroot na 22 liter sodat jy nou ’n bonkige avontuur-valhelm met ’n sonskerm kan wegpak. Die deksel van dié bagasieholte het nou ook relings wat dit maklik maak om ’n tenksak veilig vas te gespe. Hoe ry hy? Die outomatiese ratkas (Dual Clutch Transmission, oftewel DCT) is aansienlik verbeter sedert die oorspronlike NC750X. Die ruk-en-pluk versnelling is iets van die verlede en drie rymodusse is aangebring sodat jy die ratkas by jou rystyl en die padtoestande kan aanpas. Wat selfs meer beïndruk, is die agterste enkelskokbreker wat nou verstelbaar is…

Dis ’n minuut voor sewe op ’n Woensdagoggend in Mei. Ek sit op ’n rots op St. Francisbaai se hoofstrand. Die see is kalm, die water diepblou. Die son beur geduldig deur ’n laag wolke en dan ontplof die horison in rooi en oranje. Die hele strand word in goud gebaai. “Dit lyk asof iemand die lug geverf het,” sê Arné Theunissen, ’n Gautenger op vakansie saam met sy gesin. Hy korrel met sy slimfoon om die oomblik vas te vang. ’n Entjie weg stap ’n man met drie honde. Verder sien jy net spier-wit sand, rotse en begroeide duine wat al om die baai se ronding strek. ’n Entjie noord lê die monding van die Krommerivier en die bekende kanalewoonbuurt, en suid die Port St. Francis-hawe met sy fênsie…

1 Olive Grove, Beaufort-Wes Olive Grove is ’n spoggerige plek. Dis vir mense wat daai plaasgevoel soek, maar nie sonder die geriefies van DStv, Wi-Fi en ’n restaurant wil klaarkom nie. Hier is twee verblyfopsies: Vir ’n gesin is die selfsorgchalets met slaapplek vir tot ses mense goed ingerig, met ’n uitsig oor die olyfboord en ’n private braaiplekkie agter die huis. Vir paartjies of mense wat net een nag wil oorbly, is hier en suite-dubbelkamers (met ’n stort). Elke kamer het ’n yskassie, koffiestasie en televisie. Die plaasdam is sowat 10 minute se stap weg – volg die Ystervarkstaproete tot by die voëlskuiling op die damwal, of reël by ontvangs vir ’n kano as jy wil roei. Hier’s ook heelwat paaie om op jou bergfiets te verken, en op…