Inhaltsverzeichnis für Feb/Mar 2024 in Weg! Ry & Sleep

NUWE RYGOED Die Ranger Tremor gebruik dieselfde 2 ℓ-dubbelturbodieselenjin wat 154 kW en 500 Nm uitskop saam met voltydse allewielaandrywing en die Trail Turn Assist-funksie van die Wildtrak X – wat dié bakkie in staat stel om skerp draaie te maak. Later meer hieroor. Boonop spog die Tremor met Pro Trailer Backup Assist, wat jou help wanneer jy moet terugstoot met ’n sleepwa op die haak. Dié elektroniese hulpmiddel is standaard op die Tremor en Wildtrak X, en ook op die komende Ranger Platinum en Ranger Raptor. “Die nuwe Ranger het die lat gelig wat betref gerief, werkverrigting en veiligheid, en ons verhoog sy vermoë selfs verder met die toevoeging van die Ranger Tremor,” sê Doreen Mashinini, hoofbestuurder vir bemarking by Ford Suid-Afrika. “Die Tremor is gemik op mense wat…

Die Nooitgedacht Troutlodge lê in die berge van die Mount Andersonwateropvangsgebied, ’n private reservaat van 200 km2 wat in 1989 op die been gebring is. Nooitgedacht se boskamp is een van die besbewaarde kampgeheime in die land. Buiten ’n Facebookblad is daar nie veel meer inligting op die internet te kry nie – selfs die lodge se webwerf maak nie melding van die kamp nie. Van die afdraai af by die Finbury-padpredikant op die R36 (S25.034209 E30.481168) is dit 16 km grondpad (waarvan 10 km in die reservaat is) tot by Nooitgedacht. Jy maak die reservaat se hek (S25.052269 E30.524963) oop met die kode wat Arabel Hunter, Nooitgedacht se bestuurder, vir jou stuur. Vir die volgende 10 km loop die pad oor heuwels en deur valleie tot by Nooitgedacht se…

In ons land is daar net te veel mooi plekke om by die huis te sit en kla, meen die Van Stadens. Ja, ongelukkig is daar altyd kommer oor jou veiligheid wanneer jy in die pad val, maar as jy beplan en jou kop gebruik, kan jy steeds heerlik reis, sê hulle. Dié twee pensioentrekkers het die afgelope tyd heelwat gereis, by verskeie plekke gekamp en op baie gehawende paaie gery. Hulle het egter nooit regtig onveilig, bedreig of gestrand gevoel nie. Hulle ry kort afstande per dag en reis gewoonlik buite die vakansieseisoen. Hulle maak wel vooraf ’n paar oproepe, maar selfs sonder voorafbesprekings het hulle nooit probleme ervaar om geskikte kampplekke te kry nie. Hulle pas dikwels hulle reisplan aan soos hulle vorder, en ná sowat 20 000…

Soos ons in die Oktober-November 2023-uitgawe geskryf het, het Leefek alle woonwavervaardiging gestaak. Dit raak modelle soos die Exclusive, Classique, Penta, Splash, Sprint, Swing en verskeie Tourer- en XT- en sleepwamodelle. Leefek het wel onderneem om sy verantwoordelikheid na te kom met waarborge. Ons het met die meeste van die Leefek-handelaars gesels (sien die lys op bl. 93). Een goeie voorbeeld was Eben Grobler, die eienaar van Eastern Cape Caravans & Safari Centre, wat vertel het hoe hy pas herstelwerk voltooi het op ’n woonwa wat nog onder waarborg was. Die wa het ingekom vir sy sesmaandediens en ’n onderdeel moes herstel word. Hulle is sonder pyne deur Leefek bygestaan. Met die skryf van hierdie artikel was daar nog enkele nuwe Leefekvoorraad by omtrent die helfte van die handelaars. Nie…

4X4-BESTEMMING Die V8 onder die enjinikap van Nico Stockhoff se Hilux brul só lekker, die mense in Fouriesburg kan hom sekerlik hoor. Daar is niks in hierdie wêreld waarby die mens se liggaam en siel nie met ’n bietjie tyd kan aanpas nie, het ’n slim ou eens op ’n tyd geskryf. Maar dié slimkop het duidelik te veel tyd in sy studeerkamer deurgebring en nooit die Letelepas in Lesotho aangedurf nie. Die pas is maar 6 km lank, en eintlik net ’n algemene rigting waarin mens, dier en voertuig deur die kloof beur en dan bergop mik. Toeka se dae het die pas blykbaar na die Letele-goudmyn toe geloop, en selfs op sy beste was dit maar rof. Sedertien het die myn ’n nuwe grondpad gebou, aan die ander…

ROETES WAT ROEP Terwyl jy kyk hoe rooibokke en waterbokke senuagtig die krokodille probeer omseil om by die watergate van die Shingwedzirivieroewer in die Krugerwildtuin uit te kom, wonder jy straks waar die skouspelagtige Shingwedzi-kranse is waarvan jy al gehoor het... en waar langs die rivierbedding jy dit sal vind. ’n Vinnige soektog op die kaart wys jou die kranse is sowat 40 km suidoos soos die kraai vlieg, nagenoeg 20 km anderkant die Mosambiekse grens. Ook dat die kampterrein in die wildernis weer oop is vir die publiek nadat die ruskampe in die Limpopo- nasionale park gedurende die Covid-19-pandemie gesluit was. Die Shingwedzi-kranse is bereikbaar met ’n 4x4-roete van 30 km, wat jou sowat 2½ uur sal besig hou as jy van die Giriyondo-grenspos met Mosambiek af kom. Jy…

RY-INDRUK Die kortgat-driedeur-Suzuki Jimny het deur die jare ’n kultusstatus opgebou as ’n kanniedood-veldryer wat nie ’n fortuin kos nie. Sy kort asafstand, AllGrip-4x4-stelsel met ’n laestrekratkas én ’n leerraamonderstel wat alles saam skaars ’n ton weeg, het die karretjie se eienaars nogal ’n wintie houding gegee wanneer dit by veldry kom. Ek weet, want ek het self ’n olyfgroen ene in my garage. Met die Jimny se ougatgeit skort niks nie, maar die motor het sy tekortkominge. Die 1,5 ℓ-enjin laat jou hard en lank beplan as jy op die N1 tussen Beaufort-Wes en Laingsburg ’n trein van vragmotors wil verbysteek. In ’n stormsterk suidooster voel dit jy is die skipper op ’n seiljag eerder as iemand wat ’n motor bestuur. En sy ruimte is knap. Die agterste sitplekkies…

LEON VERTEL As kinders het ons ons ouers blindelings geglo: As jy te veel koffie drink, gaan jy vlooie in jou maag kry; as jy kougom insluk, gaan jou derms knoop; en, ja, as jy met vuur speel, gaan jy jou bed natmaak. Vandag weet ons dit was sommer net bangmaakstories, hoewel ons maar alte goed besef jy moet inderdaad nié met vuur speel nie. Maar dit bly ’n aangename ding wanneer hy brand... veral in die kampplek. ’n Mens kan die kampvuur as die hoeksteen van die kampwêreld beskou – en dit geld vir oud en jonk. Watter kind het nog nie gevra om die vuur in die kampplek aan te steek nie? Hier sit ek vandag, dekades later, en het al meer kampvure aangesteek as die aantal somers…

NUUS LYLIUS Lylius moet een van die Sederberg se besbewaarde geheime wees, ’n plek waar enige kampeerder ’n draai móét kom maak. As jy al in die Sederberg was, is die kans goed dat jy by Algeria gekamp het. Dit beteken jy het tien teen een op die voorstoep van Lylius verbygery. Dis geleë tussen Citrusdal en Clanwilliam, net 4,7 km van die N7 af. Die plaas van 1 700 ha heet Krieberg en hier boer Corné en Lydia van der Westhuizen met rooibos en boegoe. Die Forest-kamp is eenkant en net geskik vir tente, terwyl Taaibos op hoër grond lê en oor die res van die staanplekke uitkyk. Hierdie “onderste” staanplekke word gesamentlik Grassfields genoem en bestaan uit vier afsonderlike staanplekke. Forest is in 2019 voltooi en die res…

KAMPBESTEMMING Dis nie aldag dat jy ’n kampplek in die KwaZulu-Natalse Suidkus ontdek wat jy die eerste keer kan besoek nie. Dis veral in ons geval waar, want Ry & Sleep het oor die jare heen omtrent by elkeen van die magdom oorde aan hierdie gewilde kusstrook ingeloer. Dit was dus ’n onverwagse ervaring om kamp op te slaan by Mtwalumi en River Valley. Nie net is dit ons eerste keer by die twee oorde nie; dis werklik plekke wat ons met vrymoedigheid kan aanbeveel. Mtwalumi is in die buurt Mtwalume, ongeveer 90 km suid van Durban, en deel sy naam met die rivier wat aan sy noordekant in die see uitmond. Die kampplek is op ’n koppie, 450 m van die riviermonding af soos die kraai vlieg. Boonop is…

Mobi Lodge Manufacturing, wat die gewilde Continental-vlagskipmodel en X-intreevlakmodel vervaardig, het nou ook die Mobi XL bekend gestel. Dié wa pas netjies tussen eersgenoemde twee; ’n mens kan amper sê hy is ’n X wat opkikkers ingejaag is. Die Mobi XL is langer as sy kleinboet, is ruimer binne met meer plek om te beweeg, en hy het meer pakplek – daar’s selfs ’n eethoekie. Opslaantyd Met opslaantyd moet jy eers die agterste hoekstutte afswaai voordat jy die kas uittrek. As jy dit nié doen nie, sal die gewig van die kas en noodwiel agter veroorsaak dat die wa se stert afdruk grond toe. Die wa het net hoekstutte agter, maar staan nietemin stewig. Die neuswiel se skagarm is aan die wa vas. Die wiel sak eers af en dan…

KRY DIE PRODUKTE HIER Outdoor Warehouse, Camp & Climb, Tentco, Falkson, Seagull Industries, Adendorf, CJ Aircons, MacLaren Air LK’S-VONKELWYNGLASE Op ’n heerlike vakansie! Staal is ’n goeie geleier van hitte, en die tweede wet van termodinamika lui dat hitte spontaan vanuit ’n warm medium (jou hand) na ’n koue een (jou drankie) vloei. Dié glas, wat van vlekvrye staal gemaak word, moes dus volgens die wetenskap ’n swak idee gewees het, maar LK’s was slim en het die glas ’n dubbele wand gegee. Tussen die buitenste en binneste wand is daar net lug – ’n swak geleier van hitte – sodat jou vonkelwyn langer yskoud bly, veral as jy boonop ’n ysbol ingooi (sien onder). (Cyril, jy moet ophou om ys in jou bubbles te gooi. – Red.) Die glas…

Die Duitse voertuigvervaardiger Electric-Brands het in 2022 aangekondig hy gaan ’n kompakte elektriese bussie bou. Dié voertuig is nou uiteindelik aan die publiek beskikbaar gestel, en teen die tyd dat jy hier lees, ry daar al ’n klomp van hulle in Europa rond. Daar is nege variante van die Xbus, waaronder die kampbussie wat jy hier sien en ’n enkel- en dubbelkajuitbakkie. Al vier wiele word deur elektriese motors aangedryf en die 15 kWh-battery sorg vir ’n reikafstand van 200 km. Daar is egter voorsiening gemaak vir drie batterye, wat beteken jy het ’n totaal van 45 kWh wat jou 600 km ver kry op een lading. Die Xbus se afmetings is 3 945 x 1 633 mm en hy staan 1 970 mm hoog. Sy grondvryhoogte is ’n indrukwekkende…