Inhaltsverzeichnis für 7/5/2020 in Rapport

■ ’n Foto wat verlede Sondag by die berig “Leraar hang hom in kerk oor Covid” op bl. 1 gepubliseer is, was nie van die Hervormde kerk in Carletonville nie. Ons vra verskoning vir enige verwarring wat dit veroorsaak het. ■ In die berig “ ‘Verslaafde’ pastoor dobbel R4 m. weg” wat verlede Sondag op bl. 3 verskyn het, het ons Fanie Bolleurs, die pastoor wat erken hy’t die geld met “trading” uitgedobbel, se ouderdom verkeerd gehad. Hy is 52 jaar oud. Ons betreur die fout.…

Old Mutual het die voormalige Bok-losskakel Derick Hougaard (37) uitbetaal vir ’n eis dat hy nie sy gewone dagtake kan uitvoer nie. Sy eis vir “die fisieke besering aan sy voet” is egter afgewys. ’n Hoorbaar mismoedige Hougaard het die afgelope week gesê dit voel hy word nog rondgeskop van die een paal na die ander. Sy prokureur, Francois Slabber, moes intussen sy dienste opskort omdat Hougaard hom nie meer kan betaal nie. Rapport het in November be-rig dat Ou Mutual geweier het om eise teen twee versekeringspolisse uit te betaal. Hougaard sê kort hierna is “50% van die polisse wel uitbetaal”. Die dagtake-polis beloop vol-gens ’n dokument van Old Mutual wat Rapport onder oë gehad het, meer as R1,8 miljoen. Die ander is meer as R1,2 miljoen rand werd.…

Johan Eybers Die inperking het die getal plaasaanvalle en plaasmoorde skerp laat daal, maar noudat mense weer vryelik kan rondbeweeg, is dié misdaad terug na die vlakke waarop dit in 2019 was. Ian Cameron, hoof van gemeenskapsveiligheid by AfriForum, sê toe die inperking na vlak 3 verslap is, was daar ook ’n vinnige toename in veediefstal en diefstal van gewasse op landerye. Dit was duidelik mense is honger en steel kos om te oorleef. Tussen 27 Maart en einde Junie, toe die inperkingsreëls verslap is, was daar 71 plaasaanvalle waarin sewe mense vermoor is teenoor 159 aanvalle en 19 moorde verlede jaar. In April was daar 11 plaasaanvalle, maar in Mei het dit toegeneem tot 18 en in Junie was daar 48. Daar was een plaasmoord in April, ses in…

Niemand kan by Unisa uitgesluit voel deur Afrikaans as onderrigtaal nie, maar duisende bestaande en toekomstige Afrikaanse studente van alle rasse sou benadeel word as hulle nie meer in Afrikaans kon studeer nie. Dis waarom Unisa die afgelope week in die appèlhof bloedneus gekry het. Die hof het Unisa se besluit in 2016 om Engels die enigste taal van onderrig te maak, as onregmatig en ongrondwetlik verklaar. Howe het vroeër beslis dat die universiteite van Stellenbosch (US) en die Vrystaat (UV) wel hul taalbeleid na slegs Engels kan verander. Prof. Elmien du Plessis, grondwetkenner verbonde aan die Noordwes-Universiteit (NWU), sê die Grondwet gee aan elkeen die reg om onderrig te ontvang in die amptelike taal van sy keuse waar dit redelikerwys doenbaar is. Sy sê die vraag is dus of…

Die Voortrekkermonument gaan inderhaas van sy personeel moet aflê omdat die Covid-19-pandemie sy inkomste laat opdroog het. Intussen probeer die monument se bestuur red wat te redde is deur byvoorbeeld die monument stuksgewys en simbolies aan die publiek te verkoop. Die monument se heilige graal, die senotaaf, is deur die Vryheidsfront Plus in Gauteng “gekoop” vir R50 000. Meer as die helfte van die monument se stukke en ornamente is binne ’n week vir meer as R250 000 opgeraap in ruil vir sertifikate wat lui dat die kopers help om die geskiedenis vir die nageslag te bewaar. Onder die stukke wat nog beskikbaar is, is die 27 marmerpanele teen R100 000 elk, die skildery Tog oor Drakensberg op die senotaafvlak teen R50 000 en 16 tapisserieë teen R20 000 elk.…

Die menseregteprokureur Richard Spoor beskuldig Tiger Brands daarvan dat hy die groepsgeding oor listeriose probeer vertraag. Meer as 700 mense wat deur dié uitbreking twee jaar gelede geraak is, is by die geding betrokke. Tiger Brands se Enterprise-aanleg in Polokwane is in 2018 geïdentifiseer as die hoofbron van die listeriose-uitbreking wat deur die Wêreldgesondheidsorganisasie (WGO) as die grootste ter wêreld bestempel is. Meer as 200 mense is dood. Spoor sê Tiger Brands se hofaansoek dat die uitslag van epidemiologiese toetse openbaar gemaak word, is ’n poging om tyd te wen. Die hooggeregshof in Johannesburg het verlede week opdrag gegee dat ander vleisverwerkingsmaatskappye hul roetine-toetsuitslae in die tydperk van die listeriose-uitbreking teen einde Julie verskaf. Dit was op versoek van Tiger Brands. Spoor sê dié versoek is deel van die maatskappy…

Die beloftes om mynwerkers te vergoed vir die longsiektes wat hulle aan diens opgedoen het, is vir die soveelste keer in die wiele gery – dié keer weens Covid-19. Die mynwerkers kon reeds in Junie 2018 by die Tshiamiso-trust vir vergoeding registreer, maar twee jaar later wag hulle steeds vir hul geld. Onder hulle is Chris Coetzee (63) van Klerksdorp wat vir AngloGold Ashanti gewerk het. “Die myne het my opgewerk en soos ’n vrot vel weggegooi,” sê hy. “Ek is heeltemal verarm en daar is niks wat ek daaraan kan doen nie.” Ná ’n 12 jaar lange hofstryd het ses mynhuise in Mei 2018 in ’n skikking ingestem om vergoeding aan mynwerkers te betaal wat tussen 1965 en 2018 silikose of tuberkulose opgedoen het terwyl hulle vir dié maatskappye…

ling van dié foute hom meer as R100 miljard uit verhoogde kragtariewe in die sak sal bring en het die hof reeds vir ’n verhoging van 15% volgende jaar gevra pleks van die 5,22% wat Nersa toegestaan het. Die reguleerder het die afgelope week volgehou die enigste probleem met sy besluit is die prosedure wat hy gevolg het. Volgens Gumede weet hy nie wat in die hof kwytgeraak is nie, maar dít is al toegewing waartoe die Nersa-raad ingestem het. Gumede het gesê daar is te veel klem op die “uitkoms van die (prys-) mo-Die energiereguleerder Nersa het Donderdag erken dat daar probleme is met die manier waarop hy bepaal wat Eskom vir elektrisiteit mag vra. Nhlanhla Gumede, wat in April diens aanvaar het as heeltydse reguleerderlid by Nersa vir…

Die ANC het die SAUK glo gewaarsku sy besluit om werknemers af te dank gaan die regerende party in die verleentheid stel en kan hom stemme kos in volgende jaar se plaaslike verkiesing. City Press, Rapport se susterkoerant, het uit verskeie bronne betroubaar verneem die bankrot uitsaaier het met die partybase in Luthuli-huis vergader en hulle is uitgevra oor die beplande aflegging van 600 heeltydse werknemers en 1 200 vryskutwerkers. Dit is die tweede keer in net 24 maande dat die SAUK probeer om sy salarisrekening te verlaag en hom dan in politieke weerstand vasloop. Verlede jaar se poging om 981 werknemers af te dank, is laat vaar ná hewige kritiek van die vakbonde en rolspelers in die regerende party. Die SAUK het vroeër vanjaar ’n reddingsboei van die regering…

Die korttermynversekeraar Constantia het onwettig opgetree deur duisende mense se polisse teen sterfte en sekere siektetoestande te kanselleer, het die hooggeregshof in Johannesburg bevind. Constantia het aangevoer hy kan die Prime Living Legacy- en Prime Living CoverGrow-polisse nie meer onderskryf nie kragtens veranderings aan die Versekeringswet, maar die hof het bevind daar is geen regsgrondslag vir sy besluit nie. Rapport het vroeër berig Constantia het sy polishouers in Februarie per SMS laat weet hulle sal nie meer ná 31 Maart gedek wees nie en hul premies sal nie terugbetaal word nie. Die SMS het nogal gelui hulle moet “asseblief nie ontstig wees nie”. Constantia se verduideliking aan polishouers was dat die wetswysiging bepaal lewensdekking en dekking teen gevreesde siektes is langtermynprodukte wat net deur langtermynversekeraars aangebied mag word en dat…

Grobank is daartoe verbind om ondernemings te help waar hulle kan. Om dit te vermag, het die bank ’n depositoveldtog begin waar beleggers ’n rentekoers van 6,5% kan kry op ’n minimum nuwe be-legging van R50 000. Dié waardeproposisie maak Grobank baie aanloklik vir beleggers. “Grobank staan sy plek vol as een van die betroubare finansiële instellings in Suid-Afrika. Mededingende rentekoerse tesame met ’n verskeidenheid voorwaardes op kort en langer termyn het ’n gevoel van veiligheid en betroubaarheid onder beleggers geskep,” sê Bennie van Rooy, uitvoerende hoof van Grobank. Kyk op www.grobank.co.za/business-deposit-account/ vir meer besonderhede.…

Robbie Fleck se voorskriftelikheid het hom laat voel hy’s in ’n boks gedruk om te speel soos sy breier by die Stormers vereis. Dít, sê die Springbok en voormalige Stormers-losvoorspeler Sikhumbuzo Notshe het hom genoop om elders groter vryheid te vind sodat hy weer sy natuurlike spel kon speel. Min het hy kon dink dat hy uit die Kaap, sy “gemaksone”, sou moes trek om die grensdrade af te breek wat Fleck gestel het. Nou, in die kleure van die Haaie, het hy nuwe asem in sy rugbyloopbaan geblaas. Die vryheid wat hy in Durban gekry het om sy natuurlike spel te speel, stel hom in staat om te wys hoe hy teenstanders aan flarde kan hardloop. Skielik is Notshe weer terug op die Springbok-radar. “Die boodskap van bo (die…

Die Protea-witbalkaptein, Quinton de Kock, en Laura Wolvaardt is gisteraand as onderskeidelik die Proteas se Mans- en Vrouespeler van die Jaar bekroon tydens Krieket Suid-Afrika (KSA) se virtuele toekenningsaand. Wat die pryse vir die twee spelers merkwaardig maak, is dat daar tussen hulle ses trofees was, met elkeen wat in twee ander afdelings ook as wenners bekroon is. Wolvaardt (21), wat ’n uitstekende seisoen vir die Proteavroue beleef het, is as Spelers se Speler van die Jaar aangewys en as Eendagspeler van die Jaar. De Kock het hom by ’n uitgelese groep aangesluit deur vir die tweede keer as Suid-Afrika se beste gekroon te word. Hy het in 2017 vir die eerste keer met die gesogte prys weggestap en voeg sy naam by spelers soos Makhaya Ntini (2005 en 2006),…

Suid-Afrika se wêreldklas-sewesopset kan ’n reuse-knou kry as die eerste twee toernooie van Wêreldrugby se 2020-’21-sewes-reeks in Dubai en Kaapstad nie plaasvind nie. Wêreldrugby het dié week die oorblywende vier sewestoernooie van 2020 afgelas weens die Covid-19-pandemie. Onsekerheid heers nou oor of die eerste twee toernooie van die nuwe reeks wel in Desember aangebied sal word. Suid-Afrikaanse rugby maak staat op die Kaapstad-toernooi vir ’n inkomste, terwyl die Springbok-sewesspan hul pad na die Olimpiese Spele op ’n goeie noot sal wil afskop. Vind die eerste twee toernooie nie plaas nie, sal dit nie net finansieel druk op die Blitse plaas nie, maar ook beïnvloed hoe hul seisoen gaan verloop in die opbou tot Tokio. Daar is gebeurlikheidsplanne in plek gestel om die skrap van die laaste vier toernooie te absorbeer,…

Met die deurstap in die Joesoepof-paleis (ook bekend as die Moika-paleis omdat dit aan die Moika-kanaal lê) in St. Petersburg is dit keiserlik stil. Nie onheilspellend stil, soos ’n mens verwag van die plek waar Grigori Jefimowitsj Raspoetin (1869-1916) vermoor is nie. Raspoetin was ’n Russiese lekeprediker en geloofsgeneser (of kwaksalwer, afhangende van jou beskouing) wat in Pokrofskoje, Siberië, gebore is. Sommige verwys na hom as ’n heilige, profeet of siener. Soms word hy ook die “Mal Monnik” genoem, maar hierdie be-naming is misleidend omdat hy nie werklik ’n monnik was nie. Hoewel hy skoolopleiding ontvang het, was Raspoetin in ’n groot mate ongeletterd. Hy is een van die mees kontroversiële karakters in Rusland se geskiedenis. Geneser van die tsarewitsj Raspoetin het bekendheid verwerf as die persoon wat (tsaar) Nikolaas…

Les Blancs deur Lorraine Hansberry. Regisseur: Yaël Farber. National Theatre. Die National Theatre at Home-inisiatief lok weekliks ’n rekordgetal kykers wêreldwyd, en kan by www.nationaltheatre.org.uk gestroom word. Tans word Yaël Farber se hoog aangeskrewe produksie Les Blancs (The Whites) aangebied met ’n Suid-Afrikaanse verbintenis. Farber is ’n Suid-Afrikaanse regisseur wie se werk onder meer ook by die Markteater aangebied is. Sy doen reeds sedert 1996 professionele regie en het talle nasionale en internasionale pryse verower. In die drama huiwer ’n fiktiewe Afrikaland op die rand van ’n burgeroorlog. Inwoners veg teen kolonialisme en streef na onafhanklikheid. Hoe hierdie revolusie op die verhoog aangebied word, is merkwaardig. Tshembe keer uit Brittanje terug na sy tuisland om sy pa se begrafnis by te woon, en raak betrokke by ’n wrede stryd in…

Daar is teenstrydige idiome oor dinge mis. Aan die een kant: uit die oog, uit die hart. Die Rooinekke, weer, praat van “absence makes the heart grow fonder”. Elkeen het seker sy plek, maar ek vind myself meer in laasgenoemde se kamp tydens grendeltyd. Daar is dinge wat jy eers werklik mis wanneer dit nie meer daar is nie, hoe tydelik ook al. Byvoorbeeld: skool vir my kinders. Dis heerlik dat hulle heeltyd tuis is, maar so nou en dan verlang ek daarna om hulle bloot vir ’n uur of wat in iemand anders se sorg te laat. Daai nou en dan’s sluit in: om nie te moet arbiter speel oor wie van my twee telge se beurt dit met die wit Legoperdjie is nie, terwyl ek eintlik besig is…

■ Marian Kimmel (80), een van die land se mees gerespekteerde tjelliste, het aan natuurlike oorsake gesterf. Sy het in Mouillepunt met haar man Harold gewoon. Hulle was vir 55 jaar getroud. Sy het vir 75 jaar die tjello gespeel. Kimmel het tydens haar loopbaan ook as mentor en onderwyser opgetree. Haar filosofie was: Speel die instrument soos jy vóél, moet dit nie oordink nie. ■ Die oudredakteur van Die Transvaler, Hermie Hendriks, is in die ouderdom van 95 oorlede. Daar was verskeie huldeblyke op Perskor se blog, K’rant. Volgens Hanlie Vornberg was sy een van die joernaliste wat destyds in 1970 die Afrikaanse Pers se eerste joernalisteskool bygewoon het en die eer gehad het om by Hendriks opleiding te ontvang. Hendriks het ook ’n boek geskryf, Berg van die…

Dit word gereeld gesê dat Suid-Afrikaners in hul hart plattelanders is. Daar steek natuurlik waarheid in. Die oorgrote meerderheid van stedelinge se wortels lê in die platteland – óf omdat hulle daar gebore is óf omdat hulle steeds grootouers, ’n oom of tante het wat êrens op die wye, uitgestrekte vlaktes ver van die stadsgewoel bly. So, waarom, as die meeste van ons in so ’n intieme verhouding met die platteland staan, word ons klein dorpe en landelike gebiede so afgeskeep? Waarom word daar so argeloos omgegaan met die behoeftes en vrese van plattelanders? Waarom moet landelike gemeenskappe vir dekades al smeek dat iets gedoen word aan landelike veiligheid? En waarom, waarom doen die nasionale regering niks om die agteruitgang van plaaslike munisipaliteite te stuit nie? Die jongste verslag deur…

Die departement van justisie sleep reeds nege maande lank sy voete met versoeke om regshulp van Botswana se vervolgingsgesag in die opspraakwekkende saak van geldwassery en diefstal teen ’n vennoot van pres. Cyril Ramaphosa se skoonsuster. Dit kan lei tot uitgerekte hofsake in Suid-Afrika wat vir albei lande groot verleentheid kan veroorsaak, skryf adv. Gerrie Nel, hoof van AfriForum se private vervolgingseenheid, in ’n brief namens Botswana se direkteur van openbare vervolging, adv. Stephen Tiroyakgosi. Wilhelmina Mphoeng Maswabi – volgens die hofstukke ’n vennoot van Bridgette Motsepe-Radebe – word in die saak aangekla van geldwassery en diefstal van 2,2 miljard pula (sowat R3,4 miljard). Hofstukke lui die geld is in opdrag van oudpres. Ian Khama uit die sentrale bank na verskeie geheime bankrekeninge oorgeplaas en uiteindelik landuit geneem. Die staat…

Saans as sy ná haar skof as huiswerker tuiskom, het sy die impak van die inperking op haar buurt met ’n beklemming om haar hart gadegeslaan – die honger kinders, bejaardes en werkloses. Lauren (Lolla) Juries van Ottery in Kaapstad sê dít en ’n biduur wat vir ’n verjaardag gehou is, het haar genoop om ’n plan te beraam om te help. “Die maaltyd vir die 13 mense daardie verjaardag was ’n three piece-hoenderdis. Die gesin het regtig nood gehad.” In die blokke woon vier tot 12 mense in klein woonstelle. Juries het besluit om ’n opname te maak van mense wat erge voedselnood ervaar en so is haar Ottery Canprojek gebore. Juries het by Tracy Gander, haar werkgewer, om hulp aangeklop en dié het ’n internetsoektog gedoen. Gander het…

Miljoene mense wat weens die Covid-19-ramp geen inkomste verdien nie, wag maande vir beloofde staatshulp. Die werkgewersorganisasie Neasa het bevind een uit vyf werkgewers wag nog vir April-uitbetalings deur die Werkloosheidsversekeringsfonds (WVF) se tydelike verligtingskema (Ters), terwyl twee uit vyf nog wag vir Mei se geld. Aansoeke vir Junie is nog nie oop nie, omdat ’n tegniese fout veroorsaak het dat aansoekers die bankbesonderhede, salarisse en ID-nommers van ander werkgewers op die regering se webblad kon sien en selfs verander. ’n Werkgewer van Johannesburg wat die afgelope week Junie-betalings van Ters vir nege werkers wou eis, het aan Rapport gesê sy was geskok toe sy op die profiel van ’n genoteerde maatskappy beland, al het sy haar eie aanmeldbesonderhede gebruik. Sy kon selfs van die inligting verander. Sy het so…

Dis nie regverdig dat net 50 mense in ’n sentrum met 1 300 sitplekke by ’n konsert mag sit terwyl casino’s 50% vol mag wees nie. Dit “lui die doodsklok vir die uitvoerende kunste in Suid-Afrika”, sê ’n groep kunstenaars in ’n brief aan pres. Cyril Ramaphosa. Hulle neem deel aan die Afri-Duetfees wat die Gereformeerde kerk Andeon in Pretoria in samewerking met die FAK en Pretoria FM aanbied. Dit word gewoonlik in Oktober gehou, maar is weens die Covid-19-inperking tot Desember uitgestel. “Met net 50 mense se kaartjiegeld gaan ons amper nie eers die karwagte se fooi kan betaal nie, wat nog van die tegnici, kunstenaars, venue en almal anders betrokke by ’n vertoning,” sê ds. Cassie Aucamp, voormalige parlementslid en deesdae leraar van die Andeon-gemeente. Die brief is…

Die ANC is die tweede keer in ses maande laat met die beta-ling van 600 werknemers in sy hoofkantoor in Luthuli-huis en in sy provinsiale kantore. Febe Potgieter-Gqubule, bestuurder van die party in Luthuli-huis, het personeel op 23 Junie ingelig hul salaris, wat gewoonlik op die 25ste van elke maand betaal word, gaan laat wees en hulle moet reëlings met hul bank tref vir die laat betaling van enige debietorders. Die rede vir die ontwrigting is dat die ma van Paul Mashatile, tesourier-generaal, dood is en hy moet dringend aan familiesake aandag gee, het sy gesê. Dinsdag verlede week het Potgieter-Gqubule die personeel weer in ’n landwye brief ingelig hulle gaan eers later – na verwagting môre – betaal word. “Tref asseblief reëlings daarvoor met banke en ander krediteure. Dis…

“Terwyl die meeste Gautengse munisipaliteite op vele terreine moet verbeter, word Midvaal goed bestuur en gekenmerk deur bevredigende dienslewering.” Só bestempel die ouditeurgeneraal, Kimi Makwetu, die geldsake van die enigste DAbeheerde munisipaliteit in Gauteng. Midvaal, suid van Johannesburg, het sy sesde agtereenvolgende “skoon” oudit ontvang. Ook dienslewering is betreklik goed. “Byvoorbeeld, die paaie is in die algemeen in ’n goeie toestand en ontspanningsgeriewe soos parke en gemeenskaplike swembaddens word goed versorg. “Die munisipale kultuur, gedryf deur politieke én administratiewe leierskap, word gekenmerk deur zero verdraagsaamheid vir oortredings en deur persoonlike verantwoordelikheid te aanvaar vir goeie geldpraktyke en volgehoue skoonoudit-uitkomste.” Slegs 24% van Midvaal se inkomste van R1,16 miljard word aan salarisse bestee. Dit beteken meer geld kan aan kapitaalprojekte soos infrastruktuur bestee word, sê Makwetu. “In skerp kontras met die…

Talle binnelandse boere – veral in Noordwes en Limpopo – sit met die hande in die hare oor die voortslepende dieseltekort wat hul oesbedrywighede in die wiele ry. “Boere wat nou produkte soos mielies, sitrus en ander gewasse oes, word ernstig benadeel deur die beperkte hoeveelheid diesel in sekere provinsies,” sê Christo van der Rheede, uitvoerende adjunkdirekteur van Agri SA. Die Suid-Afrikaanse Petroleumbedryfvereniging (Sapia) het die afgelope week in ’n verklaring gesê voorvalle van diefstal en vandalisme aan Trans-net se pypleiding van Durban na Johannesburg belemmer voorsiening van brandstof aan die binneland. “Dit veroorsaak vertragings in brandstofaflewering en tekorte in sekere gebiede,” lui Sapia se verklaring. Die vereniging hou egter vol dat daar genoeg voorraad is om in die huidige vraag te voorsien. Intussen het ’n ongeluk by die Astron-raffinadery…

Die landbousektor het in die eerste kwartaal van die jaar met 27,8% op ’n kwartaalgrondslag gegroei en 0,5 persentasiepunte tot die bruto binnelandse produk (BBP) bygedra. Landbou, bosbou en visserye was een van enkele sektore wat gegroei het, terwyl die ekonomie in geheel met 2% gekrimp het. Paul Makube, senior landbou-ekonoom by FNB Agri-Business, sê dit is danksy die goeie vertoning deur oesgewasse en die vrugtebedryf, asook die verrassende bydrae van diereprodukte ondanks die uitbreking van bek-en-klouseer in November 2019 en vroeg in Januarie wat handel en veilings ontwrig het. Dit kom nadat die nasionale oesskattingskomitee verlede week gesê het hy verwag ook vanjaar ’n stewige kommersiële mielieoes van 15,51 miljoen ton. Hoewel dié jongste raming 0,48% laer is as Mei se raming van 15,589 miljoen ton, is dit steeds…

Die internasionale vakbondfederasie IndustriALL Global Union, wat veral op mynbou en die vervaardigingsektore fokus, het die afgelope week ’n aanlyn werksessie van Genève aangebied waaraan 132 vakbondleiers van 40 mynboulande deelgeneem het. Wat uitstaan, is hoe mynbousektore wêreldwyd as die werkplek-episentrum van die pandemie beskou word. Glen Mpufane, IndustriALL se direkteur van mynbou, het veral die terugkeer van mynwerkers in Suid-Afrika as “lammers ter slagting” uitgesonder. Hierdie stelling is te kras, want hoewel die Covid-19-getalle in mynbou hoog is, is dit ’n teken van die doeltreffende toetsing wat plaasvind en die sterftes is heelwat laer in verhouding tot die positiewe gevalle in verhouding tot nasionale statistieke. Wat wel ’n kommerwekkende deel van ons mynboustatistieke is, is die nagenoeg 74% van positiewe gevalle waarin die draer asimptomaties is. Dan word die…

Bulle • Jan-Hendrik Wessels (Clermont) • Marcel van der Merwe (Toulon) • Wiehahn Herbst (Ulster) • Jason Jenkins (Toyota Verblitz, net vir Curriebeker) • Juandré Kruger (Toulon) • Josh Strauss (Sale Sharks, sedertdien vrygestel) • Arno Botha (Munster) • Nizaam Carr (Wasps) • Duane Vermeulen (Kubota) • Morné Steyn (Stade Français) • Gio Aplon (Toyota Verblitz) • Travis Ismaiel (Harlequins) • Jan Uys (Brive) Leeus • Jannie du Plessis (Montpellier) • Willem Alberts (Stade Français) • Jaco Kriel (Gloucester) Stormers • Tim Swiel (Newcastle Falcons) • Kade Wolhuter (Montpellier, junior kontrak) Cheetahs • Carl Wegner (Toyota Verblitz) • Reniel Hugo (Toyota Verblitz) • Ruan Pienaar (Ulster) • Frans Steyn (Montpellier) • Lesley Botha (Montpellier, junior) • George Cronjé (Clermont, junior) • Marcell Muller (Clermont, junior) • Clayton Blommetjies (Scarlets) Kings…

Vir ’n slot was De Villiers Visser effe aan die kort kant. Om dan ook nog op 20-jarige ouderdom die hardebaard-wêreld van Curriebeker-rugby te betree, sit nie in elke speler se broek nie. Oor hoe hy as melkbaard tussen die hardebaarde van destyds moes oorleef, onthou Visser goed hoe hy deur die WP se spandokter, dr. Augie Cohen, voor sy debuut ontbied is. “Ek het ’n ligte borsbesering gehad en toe ek by Dok Cohen kom, sê hy: ‘I have to give you a shot; apparently you need to play for Province against Northern Transvaal this Saturday . . .’ “Ek was heeltemal stomgeslaan. Skielik moes ek met geharde Springbokke soos Moaner van Heerden en Louis Moolman meeding, en, met die afskop, wie’s eerste onder die hangende bal? Kiepie, natuurlik.…

Carling Black Label is die nu-we hoofborg van vanjaar se Curriebeker. Die plaaslike bier met sy 5,5% skop uit SAB se stal vervang DirectAxis as die Premier-liga se borg nadat Direct-Axis se borgskap nie verlede jaar hernieu is nie. DirextAxis het in 2016 ’n kontrak van vier jaar met SA Rugby gesluit om saam met Nashua die Curriebeker te borg. Nashua se kontrak het in 2018 verstryk. DirectAxis was verlede jaar die alleenborg vir die reeks. Carling Black Label se toetrede tot plaaslike rugby kan onder meer aan die Springbokke se suksesvolle veldtog tydens verlede jaar se Wêreldbekertoernooi in Japan toegeskryf word. Die bier is ook lank reeds een van die gewildste verkopers tydens plaaslike rugbywedstryde. Die Curriebeker is, onderworpe aan die goedkeuring van die regering, veronderstel om op 29…

Ryan eerste in ‘Tour-skof’ Die Suid-Afrikaanse fietsryer Ryan Gibbons het gister die eerste skof van die eerste virtuele Tour de France gewen. Gibbons, wat vir die NTTspan ry, het die skof oor 36,4 km, wat in die virtuele wêreld van Nice af beslis is, in 45 minute en 17 sekondes afgelê. Weens die uitbreek van die Covid-19-pandemie het dit vir die wêreld se voorste fietsryers iets alledaags geword om te oefen op binnenshuise toerusting, met ’n TV- of rekenaarskerm wat aan Zwift gekoppel is, en deel te neem aan renne. Dié tegnologie laat ryers toe om in ’n virtuele omgewing steeds as’t ware saam met en teen ander ryers te ry. Die 25-jarige Gibbons was vroeër vanjaar die SA padkampioen. – Sportredaksie Rooi Duiwels ryg 5 doele in Manchester United…

Vyf van die ses spanne in die Eerste Liga van vanjaar se Curriebekerreeks kan weens ’n geldtekort nie in dié reeks speel nie. Die vyf unies het SA Rugby ingelig dat hulle nie die geld het om in die Eerste Liga te speel nie nadat SA Rugby weens die geldelike impak van Covid-19 toedelings aan unies moes besnoei. Die Luiperds is die enigste van die sogenaamde kleiner unies wat in dié stadium vir deelname aan vanjaar se Eerste Liga gerat is. Die Boland, Grens, Griffons, SWD-Arende en Valke is die ander spanne wat veronderstel is om van 29 Augustus aan die Eerste Liga deel te neem. Die eindstryd sou volgens die voorlopige beplanning, afhangende van die regering se goedkeuring, op 12 Oktober plaasvind. ’n Span soos Grens het onder meer…

Voor die eeuwisseling het die gerekende reisskrywer Colin Thubron in sy boek In Siberia beskryf hoe hy in Raspoetin se geboortedorp, Pokrofskoje, na een van die Rus se familielede gaan soek het. Daar aangekom, het inwoners hom na die huis van ene Wiktor gestuur. Wiktor het uitgestrompel gekom. Hy was die ewebeeld van Grigori Raspoetin! Sy hare was wild, hy was ongewas en sy oë het ’n stille geslepenheid weerspieël. Aanvanklik het hy gesê dat hy nie aan Raspoetin verwant is nie, maar dat sy oumagrootjie in Raspoetin se huis gewerk het. ’n Ruk later het hy beweer dat Raspoetin “sonde met sy oumagrootjie gepleeg het” en dit is hoekom hulle op ’n haar na mekaar lyk. Soos soveel oor Raspoetin sal dit maar ’n raaisel bly.…

Indien jy ná die reis inperkings vir die 76ste herdenking in 2021 hierdie lande wil besoek, sal jy ’n Schengenvisum benodig om Duitsland te besoek. Op die oomblik het jy geen visum nodig om Rusland te besoek met ’n Suid-Afrikaanse paspoort nie. Kyk dan vooruit vir straatparades of gedenkvieringe, sodat jy voorbereid daarop kan wees en sentrale verblyf in die stede vroegtydig kan reël. Nasionale Oorwinningsdagvieringe: 8 Mei: Frankryk, Duitsland, Pole, Tsjeggiese Republiek, Slowakye, Noorweë, Litaue, Letland, Estland en die res van die Europese Unie. 9 Mei: Rusland, Belarus, Serwië, Oekraïne, Oezbekistan, Moldawië, Kirgistan, Kazachstan, Israel, Georgië, Bosnië, Azerbeidjan, Armenië, Nieu-Seeland.…

365 Days. Met Michele Morrone en Anna Maria Sieklucka. Regisseurs: Barbara Biolowas en Tomasz Mandes. Hierdie produksie kook op al die verkeerde plekke oor! Sensitiewe lesers moet onthou: Daar is eksplisiete seks- en liefdestonele (niemand onder 16), want dit is ’n romantiese drama wat eintlik “sagte” pornografie is. Praat van uitgestelde begeerte! Hier word kookwaterromanse uitgestel totdat die ketel ’n vulkaan word; met bedenklike gevolge, nes die regisseur se motiewe! Dit gaan oor ’n mafialid wat ’n vrou ontvoer. Sy kry 365 dae om op hom verlief te raak. Netflix was nog nooit warmer of moedswilliger nie. ■ Op Netflix. Rango. Met die stemme van Johnny Depp. Regisseur: Gore Verbinski. Jy en die kinders kan met die een oog op die skerm en die ander op ’n pakkie slaptjips na…

Daar is nie wetenskaplike bewyse dat rate soos kamilletee, ’n warm glas melk en laventelolie jou beter gaan laat slaap nie, sê Dale. “Maar daar is bewyse dat ’n ontspannende roetine saans beslis help. “En as dit vir jou ’n warm glas melk of ’n spuitjie laventel op jou kussing beteken, doen dit, want dit kan jou slaapgehalte verbeter.” Slaappille en kalmeermiddels soos Rescue Remedy is ook ’n pleister vir ’n groter probleem, sê sy. “As jy voel jy het ’n slaappil of kalmeermiddel nodig om te kan slaap, is dit belangrik om uit te werk wat jou eintlik uit die slaap hou. Los daardie probleem op en slaap sal volg.”…

Dr. Jani skryf: So. Wat sou die inhoud wees? En die vorm? Sou die rubriek een wees wat doodonskuldig begin by die besoek aan ’n winkel ná die ergste inperking – en dan gaan draai by die Anglo-Boereoorlog, Jan Smuts en herinneringe aan dinge wat regtig – of nie eintlik regtig nie – gebeur het? Of sou jy liewer probeer om die geringste beweging op ’n klein Vrystaatse dorpie te ekstrapoleer tot ’n groter gesprek oor Suid-Afrika en die wêreld? Of sou dit liefs besprinkel wees met aanhalings uit popkultuur, rolprente en TV? Soos die karakter in ’n reeks oor die Tweede Wêreldoorlog wat gesê het: “You have to accept that you’re dead already. That way you’ll be able to function as a soldier.” Sou dít nou uit plek klink?…

Vyf jaar nadat #RhodesMust-Fall die Suid-Afrikaanse jagseisoen op standbeelde ingelui het, is ’n nuwe een op ons – dié keer internasionaal. #BlackLivesMatter het die aanslag op die VSA se Konfederasie-beelde begin; in Engeland het ’n 17de-eeuse slawehandelaar getuimel en in Antwerpen is ’n beeld van die Belgiese koning Leopold II aan die brand gesteek. Die woede jeens voormalige “helde” kring uit. Soos in die beeldoproer in België is die Suid-Afrikaanse aanval op die spook-idole ’n kitsmediavriendelike, hoogs visuele vorm van protes teen die neerslag van kolonialisme. In ons geval word dit verder vertroebel deur die Afrikanernasionalistiese nalatenskap. Daar is reeds weer protespraatjies om die Louis Botha-ruiter-op-’n-perd voor die parlement in Kaapstad – selfs geselsies onder diegene wat beter behoort te weet as om dié dinge aan te moedig. Verlede naweek…

Die feit dat Marthinus Theunis Steyn verlede naweek byna ongemerk van sy voetstuk op die kampus van die Universiteit van die Vrystaat verwyder is, is seker een van die groot ironieë van die Suid-Afrikaanse geskiedenis. Want dit is moeilik om aan enigeen meer onbeweeglik beginselvas as dié ou Vrystaatse president te dink. Die historikus Hermann Giliomee beskou hom as een van slegs ’n handjievol werklik groot Afrikanerleiers. Ook Steyn se grootste vyand, die Britse krygsheer Horatio Kitchener, het gemeen Steyn troon kop en skouers bo sy eweknieë uit. Steyn, wat sy regsgraad in Londen verwerf het, is slegs vier jaar voor die uitbreek van die Anglo-Boereoorlog tot Vrystaatse president verkies. Sy presidentskap is gekenmerk deur sy aandrang op die individuele vryhede en regte van Vrystaatse burgers en hy het homself…

Dr. J.C. van der Walt, Richardsbaai, skryf: Die brief van Marthinus van Bart verlede week verwys waarin hy die feit dat die Boere kinderslawe aangehou het in twyfel trek. Franse, Duitse en Britse sendelinge was beslis nie agente van die Britse regering nie. Hulle maandverslae dui aan dat hulle opregte Christene was wat deurgaans die waarheid oor kinderslawerny gepubliseer het. In die Transvaal is sedert 1841 ruim 4 000 swart kinders gevang, gekoop en verhandel totdat die Britse regering hierdie slawerny in 1877 stopgesit het. Afskrifte van argiefdokumente wat ek in die Verenigde Koninkryk en in Suid-Afrika oor ’n tydperk van 40 jaar versamel het, bewys onteenseglik dat Andries Pretorius, ZAR-presidente, veldkornette en kommandant-generaals aktief aan kinderslawerny deelgeneem het.…

Izak Bergh, Marchand, skryf: Jul nuwe rubriekskrywer Mpiyakhe Dhlamini se kop is reg aangeskroef. Hy skryf altyd interessant en staaf sy aannames met feite. Verlede week se rubriek “Plaas dat Tito en kie bloot net ophou inmeng” verduidelik waar die ANC-regering in die verlede nie voldoende groei en ontwikkeling kon laat slaag nie. Ek stem volkome saam dat die staat se resep vir ekonomiese groei net weer en weer sal misluk. Die groot probleem is dat die staat met sy oorregulering dit feitlik onmoontlik maak vir entrepreneurs om suksesvol sake te doen. Die staat se belegging in groot infrastruktuurprojekte het nie voorheen groei bewerkstellig nie en sal dit ook nie nou doen nie. Die sogenaamde informele sektor se hande moet losgemaak word – dan sal hulle vir hulself sorg sonder…

Hennie Gerber, Paarl, skryf: Ek verwys na Leon Schuster se onlangse uitspraak dat hy geskok is om te verneem dat hy beskuldig word van rassisme in films wat hy byna 20 jaar gelede gemaak het en dat hy nie weet of hy sal kan voortgaan met ’n film waaraan hy reeds die afgelope jaar en drie maande werk nie. Dié feit moet waarlik soos ’n donker wolk bo hom hang. Daarom hoop ek dat sy liedjie “Gerrie ‘Seer Handjies’ Coetzee” ingesluit word in die film wat tans gemaak word oor die legendariese Suid-Afrikaanse bokser Gerrie Coetzee. Dit sal immers weer vir Schuster iets gee om oor te glimlag – ’n silwer randjie rondom daardie donker wolk wat nou bo sy kop hang. Daardie liedjie is een van twee trefferliedjies van…

Teken in: 087 353 1300. SMS “Rapport” na 31069. Intekenare-navrae: 087 353 1300. (Maandag tot Vrydag: 07:00-16:30. Saterdae, Sondae en openbare vakansiedae: 07:00-11:00.) SMS “diens” na 31069. E-pos: intekenare@media24.com WhatsApp: 087 353 1333 Waar kry ek Rapport? 087 741 3137 Nuuswenke: 011 713 9633 of 021 406 3228 E-pos: nuus@rapport.co.za Klagtes oor stories: Alet Wichmann 011 713 9682.alet@media24.com Redakteur: Waldimar Pelser 011 713 9633 of 021 406 3228 waldimar.pelser@rapport.co.za Nuus- en sakeredakteur: Erika de Beer 011 713 9633 of nuus@rapport.co.za Sportredakteur: Albert Weideman 011 713 9671 of albert.weideman@rapport.co.za Beleef: Alet Wichmann 011 713 9682 of alet@media24.com Weekliks en briewe: Pieter Malan 021 406 3514 of pmalan@rapport.co.za…

Adj.pres. David Mabuza verseg om dr. Nkosazana Dlamini-Zuma te dissiplineer oor haar minagtende hantering van parlementslede se skriftelike vrae. Mabuza is as hoof van regeringsake daarvoor verantwoordelik om toe te sien dat ministers parlementslede se vrae beantwoord. Hy ontken dat enige klagtes oor Dlamini-Zuma se hantering van parlementêre vrae ontvang is – ’n week nadat George Michalakis, ’n DA-parlementslid, ’n brief aan sy kantoorhoof, Thamsanqa Ngwenya, geskryf het waarin hy juis daaroor kla. Dlamini-Zuma het vanjaar reeds 47 keer dieselfde niksseggende antwoord verskaf op 55 vrae wat aan haar gerig is: “Die inligting wat gevra word, is nie nou beskikbaar nie.” Dit was ’n week gelede ook haar antwoord op ’n strikvraag van Michalakis, wat wou weet in watter munisipaliteit Suid-Afrika se hoofstad is. In Dlamini-Zuma se kantoor is ’n…

Soos haar huis en haar werk is Elsa Joubert se keurig gechoreografeerde huldigingsgeleentheid van 105 minute gistermiddag gekenmerk deur tradisies soos Handel se “Lux Aeterna” op orrel uit Kaapstad se Groote Kerk en tydlose Puccini en Saint-Saëns op viool en kitaar sonder ’n sinsnede soetlikheid, lastige trane of eieek-oomblikke. Dit was ook geen “oppervlakkige geestelike gedoe”, soos dit waarin sy ’n renons gehad het, nie. Sy sou, glo ek, tevrede wees met dié virtuele vaarwel na ’n volgende avontuur anderkant Leeukop, die Limietberge en verder oor Afrika. Soos dit uit gesprekke en haar laaste outobiografie van drie blyk, het sy in die laaste jare ’n intense verlange na die onsienlike gehad, wetend “U is daar”. As sy sterf, het sy gesê, sal sy dieper inglip in dié krag, wat kom…

Agri SA gaan help om appèl aan te teken teen ’n hofuitspraak wat teen die verkoop van waterregte beslis het. Die Suid-Afrikaanse Vereniging van Waterverbruikersverenigings, sowel as die Doornkraal- en die De Kalk-besigheidstrust het in 2019 drie afsonderlike hofaansoeke ingedien waarin hulle die howe versoek het om uitsluitsel te gee oor die verkoop en oordrag van watergebruiksregte. Hulle wou spesifiek hê dat die ho-we ’n verklarende bevel uitreik oor hoe dié kwessie, wat vervat is in art. 25 in die Waterwet, vertolk moes word. Die oordrag en verkoop van watergebruiksregte van een persoon na ’n ander was tot 2017 algemene praktyk. Dit word nie in die Waterwet verbied nie. In Januarie 2018 het die departement van water en sanitasie egter in ’n omsendbrief aangekondig die verkoop en oordrag van waterregte…

Die behandelingsopsies vir Suid-Afrikaners met Covid-19 sal ’n reuse-hupstoot kry met die eerste be-sending Ebola-medisyne wat voor einde Julie in die land aankom. Boonop begin die Suid-Afrikaanse Nasionale Bloeddiens (SANBD) in Augustus met plaaslike kliniese toetse met post-herstel-plasma, ’n behandelingsprotokol wat suksesvol teen die Spaanse griep in 1918 sowel as die behandeling van ander koronavirusse, Mers en Sars, gebruik is. Remdesivir, wat teen Ebola ontwikkel is, maar nie daarvoor doeltreffend was nie, is die afgelope week in die nuus weens ’n uiters omstrede ooreenkoms tussen die Amerikaanse gesondheidsowerheid en die Amerikaanse vervaardiger van remdesivir, Gilead Sciences. Pres. Donald Trump se regering het meer as 500 000 dosisse opgekoop – alle voorraad vir Julie en 90% van sy voorraad vir Augustus, berig The Guardian. Die stap is skerp veroordeel omdat owerhede…

Mag jy in jou eie provinsie vir jou plesier in ’n gastehuis of hotel oornag of mag jy nie? Nee, sê Mmamoloko Kubayi-Ngubane, minister van toerisme. Ja, sê die Toerismesakeraad van Suid-Afrika. Met die aankondiging van die vlak 3-regu-lasies vir toerisme het die minister gesê “ontspanningstoerisme en -reise” word nog nie toegelaat nie en mens mag slegs in ’n hotel of gastehuis oornag as jy vir sakedoeleindes reis. Die Toerismesakeraad het egter dié week in ’n brief aan haar gesê volgens sy regsadvies is “ontspanningstoerisme” en “oornagverblyf ” toelaatbaar, mits dit in die provinsie gedoen word waar jy woon. “Sover ons die regulasies verstaan wat gepromulgeer is, word reis vir toerisme toegelaat binne ’n provinsie,” het Tshifhiwa Tshivhengwa, die raad se uitvoerende hoof, in ’n verklaring gesê. “Jy kan in…

Die seun is 16. Hy sit in sy oom se huis in Nairobi, Kenia. Twee jaar reeds is hy weg van sy ma in Djoeba, Suid-Soedan. Regeringsoldate het hom gevang en in die berugte White House-tronk gegooi. Om die martelsessies te ontkom, het hy ingestem om ’n Moslem te word. Sy naam is verander in Nazir. Hy is in ’n vragvliegtuig Khartoem toe. Ná ’n ruk kon hy uit die Islamskool ontsnap Eritrea toe. Vele ontberings later, lang tye in tronke, is hy deur Ethiopië tot hier in Kenia. En nou sit hy in sy oom se huis. “Wat is jou plan, waarheen gaan jy?” vra sy oom. Die seun kyk af na die botteltjie Coke in sy hand en lees die woorde Made in South Africa. Hy kyk op…

Geen lugdiens kan ’n diens verskaf en staande bly met die huidige reisbeperkings in Suid-Afrika nie, sê die vervoerekonoom Joachim Vermooten. Elmar Conradie, uitvoerende hoof van FlySafair, beaam dit. Dié redery se bedrywighede is tans nog maar sowat ’n vyfde van wat dit voor die Covid-19-inperkings was. Vlugte tussen Johannesburg, Kaapstad en Durban het verlede maand hervat, maar met streng beperkings. Reëls soos dat mense net vir sakedoeleindes mag reis en dokumente ter stawing daarvan moet hê, skrik passasiers af, sê Vermooten. Volgens Conradie het FlySafair aanvanklik weggespring met twee vlugte per dag in elke rigting tussen Kaapstad en die O.R. Tambo-lughawe in Johannesburg, maar moes dit halveer weens die flou aanvraag. Die getal passasiers op dié vlugte wissel nog, maar dis nou darem al nader aan 80% vol en…

Verbruikers kan nou siviele eise instel as hulle skade ly omdat ’n maatskappy of organisasie hul persoonlike inligting misbruik of hulle nie behoorlik teen kuberkrakers beskerm het nie. Dis ingevolge die Wet op die Beskerming van Persoonlike Inligting (Popia), wat uiteindelik op 1 Julie in werking getree het. Instansies het wel 12 maande grasie om alles reg te kry om aan die wetsvereistes te voldoen. Dr. Danie Strachan, ’n vennoot by die regsfirma Adams & Adams, sê dis ’n vreemde situasie, want al sal verbruikers by die Inligtingsreguleerder (IR) kan kla en sake aanhangig maak, beteken dit oortreders sal waarskynlik vir die volgende jaar net op die vingers getik kan word. Oortreders kan administratiewe boetes van tot R10 miljoen, maksimum tronkstraf van tien jaar of ’n boete plus tronkstraf kry.…

Jou bank of jou werkgewer mag jou agterstallige belastinggeld nou nie meer aan Jan Taks gee sonder dat jy behoorlik daarvan ingelig is nie. Die hooggeregshof in Pretoria het beslis ’n belastingbetaler is geregtig op ’n geldige kennisgewing van die Suid-Afrikaanse Inkomstediens (SAID) voordat ’n derde party aangestel word om uitstaande belasting namens die SAID in te samel. Dit is goeie nuus vir die regte van alle belastingbetalers – individue en maatskappye, sê Althea Soobyah, direkteur van belastingadvies by Mazars. Die uitspraak was in die guns van die konstruksiefirma SIP Project Managers teen die SAID-kommissaris. Die hof het beslis die kommissaris het nie die regte prosedure gevolg om die belastingbetaler in te lig oor die SAID-op-drag aan die derde party (in dié geval die onderneming se bank) nie, daarom is…

Carter ploeg weer terug Die legendariese All Black-losskakel Dan Carter het gister teruggekeer na waar hy wortelgeskiet en sy rugbyloopbaan begin het. Carter (38) het vir die onbesonge Southbridge-klub in Canterbury in die Colemanskild-reeks gespeel en 12 punte vir sy klubspan aangeteken, wat West Melton met 54-14 geklop het. Carter het hom in Junie by die Blues aangesluit nadat hy sy verpligtinge by die Kobelco Steelers in Japan afgehandel het. Carter, wat 112 keer vir die All Blacks gespeel en 1 598 punte aangeteken het, hoop om in Nieu-Seeland se Aotearoa-Superreeks te speel. “Ek weet nie of ek nou al reg is om Superrugby te speel nie,” het die beskeie Carter gesê voordat hy ’n paar biere saam met sy klubmaats in die klein klubhuis gaan geniet het. – stuff.co.nz…

Die Brumbies het hul veld-tog in Australië se Super-rugby-reeks gister met ’n oorwinning van 31-23 oor die Melbourne Rebels afgeskop, maar moes teen die einde ’n verbete terugvegpoging afweer. Die Brumbies het teen rustyd met 19-6 voorgeloop, maar die Rebels wou net nie bes gee nie en twee drieë in die tweede helfte het hulle terug in die wedstryd gekry. Joe Powell, die Brumbies se skrumskakel, het goeie spel agter ’n oorheersende pak gelewer en een van sy span se vyf drieë gedruk. Vrydagaand in Brisbane het die Reds vir ’n opskudding gesorg toe hulle die Waratahs met 32-26 geklop het.…

Transformasie misluk. Die stelsel misluk. En vir swart rugbyspelers is dit ’n nagmerrie. Só glo Chiliboy Ralepelle, ’n voormalige Springbok-haker wat die afgelope week vir agt jaar geskors is nadat hy vir die derde keer positief getoets is vir die gebruik van verbode middels. Ralepelle hou vol dat hy onskuldig is, en dat daar met sy bloedmonsters gepeuter is. “Ek argumenteer nie oor wat hulle in my bloed gevind het nie. As dit is wat hulle gekry het, is dit so. Hulle het dit in albei die monsters gevind. My verweer is dat as ek nie beskerming het van die oomblik dat ek die monster gegee het totdat dit by die laboratorium ontvang word nie, hoe weet ek daar is nie met die monsters gepeuter nie?” In ’n openhartige gesprek…

Muurkuns is onlosmaaklik deel van enige stad se pols. Kyk maar op Instagram onder die hutsmerke #lockdownart of #streetartcities. Groot name soos @banksy of @kobrastreetart gebruik hul kenmerkende styl en aanslag om ’n arsenaal van visuele boodskappe in dié tyd uit te stuur. Die inperkingstyd in Suid-Afrika het kunstenaars met kannetjie, kwas of pen gedwing om ’n muur of seildoek in hul erf of teen hul informele huisie in ’n kunswerk te omskep. Die beskikbaarheid van ’n muur of selfs die verkryging van spuitkannetjies of verf was vir sommige ’n probleem. Daar was ook tye nie te lank gelede nie waar jy dit nie buite kon waag nie, of die polisie was op jou. Volgens Alexandre Tilmans, medestigter van Baz-Art, ’n organisasie sonder winsbejag wat openbare ruimtes deur middel van…

■ Die Joesoepof-paleismuseum het sy deure op 1 Junie 2020 heropen. ■ Die paleismuseum is elke dag van die week van 10:30 tot 17:00 oop. Kaartjies kan aanlyn (aanbevole) of by die kaartjiekantoor gekoop word. ’n Afsonderlike kaartjie word benodig om die keldervertrek waar Raspoetin sy laaste ure deurgebring het, te besigtig. Die kelder kan net op begeleide toe-re – meestal in Russies – besigtig word. Die toere word op vaste tye aangebied maar soms, só voel dit, na willekeur verander. Die getal besoekers per dag word ook beperk. Bespreek vooraf vir die keldertoer en spesifiseer dat dit in Engels moet wees. ■ Vir nog inligting besoek Yusupov-palace.ru/en.…

The Search (Historia de un Crimen: La Busqueda) met Dario Yazbek Bernal en Diana Bovio. Regisseur: Catalina Aguilar Mastretta Jy gaan óf dol wees hieroor en dit in een sitting vraatkyk (daar is ses episodes), óf jy gaan skuinsweg in jou grendelgreepmou daarvoor lag. Nie dat die tragiese dood van ’n vierjarige dogtertjie iets is om oor te lag nie (die reeks is op ’n ware gebeurtenis gegrond), maar ’n sepie-styl verander dit gedeeltelik in ’n swart komedie. Dit is verstommend om deur jou wildste drome te dwaal en jou te verbeel: Hierdie histrioniese gebeure het tog ’n groot stuk waarheid in, alhoewel die vermoede bestaan dat sekere elemente mildelik met melodrama besprinkel is om sensasie te wek. Vergelyk dit met die dokumentêr oor die verdwyning van Madeleine McCann, en…

Spaghetti ubriachi, oftewel rooiwynpasta of ‘dronk pasta’ My Ier het gedog ek het ’n glas of twee te veel wyn in toe ek hom vertel dat rooiwynpasta op ons spyskaart is. Maar nadat hy sy eerste happie gevat het, het al sy wyn-vraagtekens oor sy vrou verdwyn. Spaghetti ubriachi, pasta alla chiantigiana, rooiwynpasta oftewel “dronk pasta”, word van rooiwyn, uie, spek en parmesaankaas gemaak. Dit het ’n subtiele rooiwynsmaak en met die spek daarby maak dit die dis regtig besonders. Die groot geheim is die parmesaan en botter wat jy moet inroer – dit versag die smaak en gee ’n intense umami-romerigheid aan die gereg. Vir ’n vegetariese opsie, maak dit sonder spek – dis net so lekker. Spaghetti alla puttanesca (pasta met tamaties, olywe, kappertjiesaad en ansjovis) Jy moet…

Marthinus Steyn, Jan Smuts en Cecil John Rhodes bevind hulle nie naastenby alleen in die visier van standbeeldbestormers nie en dit is pikant om dop te hou hoe die de-bat elders verloop. In New York is die beeld van J. Marion Sims, wat sedert 1890 in Central Park gestaan het, met ’n vurkhyser van sy voetstuk verwyder ná ’n vurige debat. Sims, die “vader van moderne ginekologie”, se mediese deurbrake het gepaardgegaan met ondenkbaar pynlike eksperimente op vroueslawe in ’n agterstraathospitaal in Alabama – sonder narkose. Een van hierdie vroue, wat spesiaal vir dié doel aangekoop is, moes 30 van sy operasies deurstaan. Soms is ander dokters genooi om te kom kyk terwyl hy op die vroue “oefen”. Die oorlog oor sy standbeeld is geveg in die gebruiklike loopgrawe van…

Ons is so oorval deur die koronaviruspandemie dat ons nie besef dat daar eintlik drié monsters is wat die mensdom vandag op hierdie klein planeet aarde bedreig nie. Die eerste monster is die genoemde viruspandemie. Hierdie pandemie kan ons le-wens dalk vir altyd verander. Ons gesprekke, ons besoeke, ons kuiers, ons winkelbesoeke, ons sport, ons kommunikasie, ons werksomstandighede, ons kerkgang, ja, haas elke faset van ons lewe is aangetas en het verander. Kenners voorspel dat die lewe hierna nooit weer “normaal” sal wees nie en dat ons sal moet leer om “anders te lewe”. Vanselfsprekend het die mense nuwe maniere van kontak – die internet – ontwikkel soos nog nooit tevore nie, maar die persoonlike aanraking het verdwyn of is verander. Dit is ’n goeie teken dat mense nog graag…

Tarentaal, Pretoria, skryf: Ek verwys na die jongste debatte rondom die kerk en geloof – en veral die sluiting van kerke tydens die inperking. Die sluiting van kerke laat die vraag ontstaan of die kerk nog relevant is? Wat doen die kerk nog wat nie deur iemand anders gedoen kan word nie? In preke hoor mens selde iets wat jy nie alreeds weet nie. Ná die diens koek die klieks om die teetafel saam en as jy nie een van hulle is nie, is jy niks. En die bedienaars van die Woord is voortdurend in onderlinge twiste, hofsake (met kerkgeld) en skeurings betrokke. ’n Groot ophef word gemaak oor Jesus se opstanding terwyl duisende ander ook uit die dood uit opgestaan het: die Romeinse keisers, die Farao’s, Lasarus, Moses, Henog…