Inhaltsverzeichnis für Landbouweekblad: Tegnologie 2020 in Landbouweekblad

Elke mens in vandag se wêreld het te doen met “tegnologie”. Die meeste mense dink daaraan as die nuutste slimfoon en -horlosie, TV met Bluetooth en streaming services en die vinnigste fibre-internet by die huis. In die breë landboubedryf behels dié begrip dinge soos presisiewerktuie en -spuite wat saad, kunsmis en besproeiingswater wisselend toedien volgens die behoeftes van die grond en die gewas danksy geografiese inligtingstelsels en satelliete met hoëresolusiekameras, beter planttelingstegnieke, en hommeltuie (drones) wat vir alles van gewasmonitering tot die opsporing van vee- en wilddiewe en plaasaanvallers ingespan kan word. In die veebedryf is daar tegnieke wat dit soveel makliker maak om die grootste moontlike nageslag van waardevolle teeldiere te verkry deur byvoorbeeld die eierselle van jong verse te oes en te laat bevrug nog voor dié diere…

Dit lyk dalk soos ’n maantuig waar die nuwe skandeertoestel sy werk teen ’n stadige pas op die proefplaas van die Landbounavorsingsraad (LNR) se Instituut vir Graangewasse (IGG) in Potchefstroom doen, maar die hipermoderne PhenoSpex Field-Scan weet presies wat hy doen. Hy neem die plante in die proefland uiters akkuraat met sy twee PlantEye F500-skandeerders waar om driedimensionele beelde te neem en afmetings te maak wat wetenskaplikes van nuwe insigte voorsien oor hoe plante op die klimaat reageer en hoe om beter kultivars te teel. Dr. Dirk Swanevelder, senior navorser in genomika aan die LNR se biotegnologiese platform in Pretoria, het die skandeerder vroeër vanjaar op ’n inligtingsdag by die IGG bekend gestel. Hy beskryf dit as ’n digitale plantfenotiperingstoestel wat verskeie gewasse, waaronder mielies, koring, sonneblomme en boongewasse, op…

Britse navorsers wat spesialiseer in die gedrag en welstand van diere het ’n goedkoop, geoutomatiseerde metode ontwikkel waarmee hoenderboere makliker kan agterkom as alles nie pluis is met hul groepe kuikens nie. Britse navorsers aan vier universiteite het as deel van ’n gesamentlike projek klankopnames gemaak van 25 000 kuikens wat saam in 12 groepe geleef het. Só is bevind dat ’n kuiken se noodpiep helder en duidelik uitstaan en identifiseerbaar is bo enige ander kloekof plaasgeluide. In die studie, waarvan die bevindinge in die Journal of the Royal Society Interface verskyn het, is ook bepaal dat dit gebruik kan word om ’n groep kuikens se gedrag te bepaal, volgens dr. Katherine Herborn, hoofskrywer van die artikel en dosent aan die Universiteit van Plymouth. Uit hul navorsing is ’n outomatiese, gerekenariseerde…

Met die erge droogte wat Karoo-veeboere op hul knieë gedwing het, moes mnr. Andrew Jordaan van die plaas Spekboomberg by Cradock in die Karoo kies: Óf hy bly voer koop, óf hy gaan die koste aan om water aan te lê om onbenutte weiding aan te wend. Sy uitgangspunt is dat ’n boer se planne nooit kan opraak nie, veral nie tydens ’n droogte nie. “In die ergste droogte in 200 jaar, volgens wat die ou mense sê, en die ergste wat ons nog op ons grond beleef het, het die water vir mens en vee heeltemal ingegee. Toe moes ons drastiese planne maak om water te kan verskaf,” sê dié opgeleide siviele ingenieur en Voermol se Skaapboer van die Jaar vir 2018, wat saam met sy pa, Andrew sr.,…

Wanneer produksiekoste ter sprake is, sug boere hardop oor bespuitingsprogramme. As ’n produk uit die grond kom, gaan dit heel waarskynlik chemiese behandeling benodig – of dit graan, groente of vrugte is. Die swak rand maak dit boonop nie maklik vir Suid-Afrikaanse boere wat lande wil skoon hou en gewasse wil beskerm nie. Dit maak dus meer sin om te verseker dat jou spuittoerusting in topkondisie bly. Vir mnr. Voltan Senekal, bestuurder van bemarking en ondersteuning by die oesbeskermingsmaatskappy Villa Crop Protection, is nuwe tegnologie, veral wanneer dit by die korrekte spuitstukke kom, van groot belang. Sy ervaring is dat ondoeltreffende spuitstukke die boer letterlik duisende rande kan kos. KIES SPUITPUNT MET SORG Kies die regte spuitpunt vir die spoed, druk en volume wat vir die betrokke gewas en middel…

Om die lewensvatbaarheid van sy tegnologie by sitrus in Suid-Afrika te beproef, het SupPlant met Nulandis in vennootskap getree en dit op Boplaas se Marlenique-boerdery by Franschhoek beproef. Nulandis het SupPlant se metingstoestelle in 2018 in ’n driejarige blok Eureka-suurlemoene aangebring. Die blok is die eerste maand op die tradisionele manier met behulp van grondvogdata en ’n hervullyn besproei. Daarna is die SupPlant-programmatuur gebruik om die besproeiing te behartig. Die verskil in die groeitempo van die stam is duidelik in die GRAFIEK hieronder sigbaar. Mnr. Dene Zondagh skryf die verskil toe aan die vermoë van die SupPlantprogrammatuur om vroegtydige besproeiingsbesluite te neem en abiotiese stres weens versuipingsof verdrogingstoestande by die boom en vrug te beperk. Die blok suurlemoene onder SupPlant-besproeiing het ’n opbrengstoename van 42% getoon van die derde na…

Boordvestiging in Limpopo en die Laeveld van Mpumalanga, waar hoëwaardegewasse, soos avokado’s en makadamias, verbou word, is nie meer raaiwerk nie. Danksy hommeltuie en GPS-tegnologie is dit nou ’n presisieboerderypraktyk wat boere selfs in staat stel om berghange in vrugteboorde te omskep en op dié manier produksie uit te brei. Mnr. Lourens Jooste van Tzaneen boer saam met sy skoonpa, dr. Gidion Coertzen, en werk saam met sy swaer, die ekoloog mnr. Llewellyn Coertzen, in hul konsultasie-onderneming Node Ecology. Hulle het dit ten doel om boere te help om hul grond op ’n verantwoordelike manier voor te berei sodat hulle erosie voorkom en terselfdertyd die meeste van die natuurlike afvloei tydens reënbuie en storms opvang en opberg, veral waar daar teen hellings geboer word. Tydens Tegnologie se besoek was hulle…

Aerobotics het in 2014 ontstaan. Die onderneming se eerste proefneming by ’n boer is in dieselfde jaar voltooi. “In 2015 het ons die eerste werknemers aangestel en die eerste weergawe van Aeroview (die maatskappy se webplatform) ontwikkel. Die volgende jaar kon ons uit die motorhuis waar ons gewerk het, na ons eerste kantoor in Woodstock trek,” sê mnr. Benji Meltzer. Dit was ook in 2016 dat hul klem heeltemal na boomgewasse geskuif het. “In 2017 is Aerobotics deur die InsurTech Startup Bootcamp-program in Londen, Brittanje, aanvaar. Ons het stigtingskapitaal van sowat $650 000 (nou sowat R11,18 miljoen) van 4Di Capital en die Savannah-fonds bekom.” Aerobotics is in 2018 deur Google aangewys as een van die 24 topmaatskappye in opkomende markte. Dit het aan hom ’n uitnodiging besorg om aan die…

Embryo Plus se grootste deurbrake in die afgelope kwarteeu is: ▪ 1994: Die eerste geslagsbepaling van embrio’s in Afrika. ▪ 1995: Die eerste verdeling van skaapen bokembrio’s op die vasteland. ▪ 1998: Die eerste Arabier-embriovul word gebore. ▪ 2003: Die geboorte van Futhi, die eerste gekloonde bees en dier in Afrika. ▪ 2010: Die eerste swartwitpensembriokalwers ter wêreld word gebore. ▪ 2013: Behaal die eerste dragtigheid met embrio-oorplasing ter wêreld by Kaapse buffelkoeie. ▪ 2015: Teel die eerste Zambiese swartwitpens-embriokalwers uit suidelike swartwitpens-surrogate (interspesiekalwers). ▪ 2016: Die wêreld se eerste Kaapse buffelkalf word deur middel van in vitro-bevrug-ting gebore. ▪ 2017: Versamel die eerste oösiete van die suidelike witrenoster in Afrika met behulp van aspirering (uitsuiging). ▪ 2018: Aangewys om teelmateriaal van die laaste noordelike witrenosterbul ter wêreld te versamel…

Die waarde van digitale virtuele of afstandsveilings word al hoe groter, aangesien dit die nodigheid vir ’n fisieke byeenkoms onnodig maak, terwyl die energie en opgewondenheid van ’n regstreekse veiling behou word. Mnr. Louis Eksteen, uitvoerende hoof van Altum Systems, die maatskappy wat die WildlifePro-toepassing ontwikkel en vroeër vanjaar suksesvol op die direkte veiling van mnr. Dries Visser van Thabazimbi gebruik het, sê die tegnologie is gepas vir enige veiling, hetsy direk of virtueel deur net die toepassing te gebruik. “Daar is twee metodes vir digitale afstandveilings. Tydens ’n virtuele veiling neem die afslaer soos gewoonlik deel en die opgewondenheid bly behoue deur middel van intydse stroming. Dit is asof kopers in die saal sit, maar hulle kyk en bie van elders. ‘‘Só ’n veiling duur min of meer dieselfde…

ClickOn Communications van Pretoria het ’n lisensieskandeerder ontwerp waarmee motorlisensies geskandeer kan word. Die toestel maak dit moontlik om inligting van alle besoekers en voertuie by ’n toegangspunt te bekom. Die toestel kan die besonderhede van die motorbestuurder, asook ’n foto, bêre. Voorsiening word gemaak vir die voertuigbesonderhede, soos die registrasienommer, model, fabrikaat en kleur van die motor. PRYS: Op aanvraag. NAVRAE: Web: www.clickon.co.za…

Die Raptor, ’n radiobeheerde helikopterhommeltuig, is ’n nuwe toevoeging tot die benadering om hommeltuie as veiligheidstoerusting in te span. Dit het nagsigtoerusting en kan in stikdonkerte gebruik word om die omgewing te bespied. Die hommeltuig kan ten volle outonoom opstyg en ’n voorafbepaalde vlugroete volg. Die operateur kan met die nagsigtoerusting en hittegevoelige sig indringers of diere in die donker op ’n skerm sien en die vlugroete onderbreek om ondersoek in te stel. Dit kan ook as ’n reaksie-e enheid gebruik word. Drie modelle met verskillende energiebronne is beskikbaar. PRYS: R55 000 vir die Raptor ELC, R70 000 vir die Raptor NC en R110 000 vir die ULP-model. NAVRAE: Mnr. Gerhard Visagie, e-pos: info@securityss.co.za, 074 030 2646.…

MNR. EDREAN ERNST Mnr. Edrean Ernst is die vierde geslag Ernst-boer op Allesbeste naby Tzaneen. Hy is die dryfkrag agter die skryf van hul eie toepassings en ander tegnologiese ontwikkelings. Bl. 12 MNR. HANS SMIT Mnr. Hans Smit is ’n onafhanklike risikoontleder en private konsultant van Johannesburg met wye ervaring in veral die graanbedryf. Bl. 32 JEAN DU PREEZ Jean du Preez is vryskutjoernalis en ’n vorige redakteur van Landbouweekblad. Hy boer ook op hul familieplaas buite Riversdal. Bl. 16 DR. IDA WILSON Dr. Ida Wilson is ’n plantpatoloog en konsultant by Agrimotion Consulting op Somerset-Wes. Haar spesialisveld is gewasbeskerming. Bl. 44…

Groot verskaffers van wolkgebaseerde oplossings, soos Amazon Web Services (AWS) en Microsoft, kry ’n al hoe groter fisieke teenwoordigheid in Suid-Afrika. In die lig van die sogenoemde wolkoorlog tussen hulle moet die landbousektor in Suid-Afrika toenemend tegnologie soos kunsmatige intelligensie (AI) en masjienleer benut om digitaal-geïntegreerde plaasbestuur te verseker, reken mnr. Rudie Raath, digitale hoofbeampte van Datacentrix. In ’n verklaring deur Datacentrix sê hy die plaaslike landbousektor kan nie meer die verskoning gebruik dat iets net elders ter wêreld beskikbaar is of dat Suid-Afrikaanse data nie die land mag verlaat nie. Danksy groot maatskappye soos AWS en Microsoft is daar deesdae plaaslik via sogenoemde wolktegnologie data beskikbaar waaroor voorheen net gedroom kon word. Raath sê albei verskaffers ding mee om die sterkste moontlike posisie in Suid-Afrika te kry. Die grootste…

Navorsers aan die Massachusetts-instituut vir Tegnologie (MIT) in Amerika het ’n nuwe sensor ontwikkel wat etalien teen ’n uiters lae konsentrasie kan waarneem. Etalien is ’n kleurlose, soet planthormoon wat as ’n gas vrygestel word wanneer blomme begin blom en vrugte ryp word. Dr. Darryl Fong, ’n nadoktorale navorser in die groep van die chemikus prof. Timothy Swager, het die nuwe sensor ontwikkel. Dit kan so min as 15 dele etalien per miljard opspoor. “Die sensor kan gebruik word om blomme, vrugte en groente wat verskeep of opgeberg word, te monitor. Sodoende help dit om voedselverliese te bekamp,” sê Swager in ’n verklaring deur MIT.…

SONKRAG WEK ENERGIE OP MET ‘BLOMME’ Die Smartflower is ’n toestel wat uit verskeie sonpanele bestaan wat kan oop- en toevou en op ’n ankerpaal gemonteer is. Die Smartflower is toegerus met sensors wat die toestel laat oopvou sodra die son soggens opkom, die son heeldag volg en dan teen sononder laat toevou. Wanneer dit oopgevou is, is die Smartflower 5 m hoog en beslaan ’n oppervlakte van 15 m2. Die stelsel het ’n opwekkingsvermoë van 2,5 kW. PRYS: Op aanvraag. NAVRAE: Mnr. Ashley Kutukwa, e-pos: ashnumen@gmail.com, 073 337 8839. OMSKAKELAAR SUKKELVRYE GROENKRAG Die hart van byna enige hernubareenergiestelsel is ’n omskakelaar wat son-, wind- of batterykrag omskakel, reguleer en bruikbaar maak vir elektriese toestelle. Me. Jenine Coetzer, eienaar van Switch to Green, sê ’n mens het in die verlede…

Die Liebig-wet van die minimum, soms net Liebig se wet genoem, is ’n beginsel in die landbouwetenskap wat deur die Duitse tuinboukundige Carl Sprengel ontwikkel en later deur die Duitse wetenskaplike Justus von Liebig bekend gemaak is. Die beginsel stel dit dat groei nie bepaal word deur die totale hoeveelheid hulpbronne wat beskikbaar is nie, maar deur die skaarsste hulpbron as ’n beperkende faktor. Die beginsel is aanvanklik op plant- of gewasgroei toegepas, asook op ekostelselmodelle vir faktore soos sonlig en minerale voedingstowwe. Daar is bevind dat die hoeveelheid volop voedingstowwe nie die groei van plante verhoog het nie. Die groei van ’n plant of gewas is slegs verbeter deur die hoeveelheid beperkende voedingstowwe (die skaarsste in verhouding tot die behoefte) te verhoog. Anders gestel, die beskikbaarheid van die volopste…

Benewens tegnologiese vooruitgang val die kollig al hoe meer op omgewingsvriendelike landboupraktyke en -tegnologie om te voorsien in die verbruiker se groeiende vraag na meer landbouprodukte wat eties geproduseer is. Só het mnr. Hubertus Mühlhäuser, hoofbestuurder van die landboumaatskappy CNH Industrial, op Agritechnica 2019 in Hannover, Duitsland, gesê. Volgens hom is die ontwikkeling en gebruik van beter en meer gesofistikeerde tegnologie, spesifiek ten opsigte van saad en meganisasie, die enigste oplossing vir dié probleem. “Tans is daar drie hoofneigings in die landbou. Eerstens is daar die strewe na groter digitalisering en beter skakeling tussen masjinerie op plase, en om die groot hoeveelheid inligting wat daagliks versamel word, sinvol aan te wend om die boer doeltreffender te maak. Tweedens is daar ’n groeiende neiging na outomatisering waar minder mense nodig gaan…

Warmer en droër klimaatstoestande word reg oor die wêreld waargeneem. Gevolglik neem die druk toe om besproeiingsmeganismes te ontwikkel wat water doeltreffender en met groter presisie kan toedien. Dr. Klaus Spohrer van die instituut vir landbou-ingenieurswese aan die Hohenheim-universiteit in Duitsland sê boere reg oor die wêreld moet reeds watertekorte die hoof bied. “Saam met verhoogde waterbehoeftes word die doeltreffende gebruik van water in besproeiing dus ál belangriker om ’n verlaging in opbrengs en gehalte te vermy. “Ontwikkelings en vernuwings in besproeiing is al hoe meer daarop gerig om dié struikelblokke te oorkom. Die neiging is om waterverbruik te bly verminder, terwyl produksie verhoog moet word.” Spohrer sê besproeiingsdoeltreffendheid word op twee maniere bereik. Dit is eerstens deur die stelsel só te ontwerp dat sy doeltreffendheid tot sy volle reg…

Met water wat al hoe skaarser raak, is vrugteboere in die Wes- en Oos-Kaap al goed gekonfyt om elke liter water so ver moontlik te rek deur fyn bestuur. Grondvogmeters is ’n onmisbare toestel wat boere gebruik om hul besproeiingsdoeltreffendheid deurlopend te verbeter, maar dit beteken hulle besproei volgens die voginhoud van die grond pleks van die werklike vogbehoefte van die vrug en die boom. Hoewel sommige appel- en peerboere daardeur tot so min as 5 500 m3 water per ha toedien om 100 ton vrugte per ha te oes, is daar steeds tye wanneer die grond té nat gemaak word en ander kere wanneer dit te veel uitdroog. SupPlant-tegnologie uit Israel maak dit nou moontlik om besproeiing volgens die behoefte van die vrug- en boomgroei te bepaal. Dit blyk…

Doen Aerobotics baanbrekerswerk, of volg die onderneming wêreldwye modelle? Die grootste deel van ons werk is heeltemal nuut. Wêreldwyd was ons omtrent eerste in ons veld. Hommeltuie het net begin kop uitsteek as dataversamelingsplatform, maar is nog nie in die landbou gebruik nie. Daar was duidelik potensiaal vir hommeltuie en digitale beeldvorming in die bedryf. Die spesifieke waardeproposisie wat plaag- en siektebekamping betref, en die identifisering van probleme boom vir boom, was destyds uniek. Deesdae is daar heelwat mededinging, veral internasionaal, maar ek meen dit bevestig ons doen die regte ding. As jy eerste op die mark is, moet jy aanvaar ander sal volg en hulself goed van hul taak kwyt. Aerobotics ding nou mee met mense van Silicon Valley in Amerika en Israel, maar ons probeer heeltyd aan die…

Mnr. Nick Serfontein het ná 27 jaar as raadgewende ingenieur en 21 jaar as deeltydse boer in 2009 heeltyds begin boer. Hy het in 2012 ná ’n tyd in Mahikeng, Pretoria en Tzaneen na Liebenbergstroom getrek om nader aan sy belange te wees. Mettertyd het die boerdery vanaf sy eerste 30 Bonsmaraverse op 251 ha grond in 1983 tot die huidige, omvangryke boerdery en onderneming gegroei. Die ekonomiese impak van die groep se bedrywighede op die ekonomie is R2,37 miljard per jaar. Die Sernick-groep bestaan uit die volgende: ▪ Plase wat oor 12 000 ha strek ná aankope die afgelope maande. ▪ ’n Bonsmarastoetery met 800 koeie. ▪ ’n Voerkraal met plek vir tot 20 000 beeste nadat hy grond met ’n voerkraal op aangekoop het. ▪ ’n Veevoerfabriek wat…

In reaksie op die groot druk wat die landboubedryf beleef weens droogtes, bek-en-klouseer, die Covid-19-pandemie, die swak ekonomie en stygende insetkoste, bied Embryo Plus nou embrio’s van ’n wye verskeidenheid rasse teen lae pryse, en in party gevalle selfs gratis, tot Julie 2021 aan. Die Stimulus-genetikapromosie is die maatskappy se poging om kommersiële boere se teelprogramme weer te stimuleer en aan nuwe en opkomende boere die kans te bied om goeie teelmateriaal te bekom. “Verskeie van ons vriende vat ons hand en het onderneem om van hul diere se embrio’s teen ’n afslag van tot 90% beskikbaar te stel. Van hierdie embrio’s was nog nooit voorheen vir verkope beskikbaar nie,” sê dr. Robert Treadwell (foto), een van die direkteure van die maatskappy. Embrio’s van die Afrikaner, Angus, Ayrshire, Bonsmara, Boran,…

Een van die grootste probleme met tegnologie is dat internetverbindings op die Suid-Afrikaanse platteland soms nog ontoereikend is. Die Israeliese kommunikasiemaatskappy hiSky het egter ’n goedkoper oplossing om data tussen datapunte en die rekenaarstelsel op kantoor oor te dra. Mnr. Zeef Stainlauf, visevoorsitter van internasionale verkope by die maatskappy, het gesê hul unieke tegnologie maak dit moontlik om bestaande satelliete wat vir breëbandinternet gebruik word, vir die internet-van-dinge te gebruik, maar teen laer datakoste. “Die koste beloop ietwat meer as selfoontariewe.” Volgens Stainlauf het die maatskappy drie tipes dienste vir die landbou. Die Smartellite Dynamic is ’n terminaal wat geskik is vir kommunikasie waar beweging ter sprake is. Trekkers of oeswerktuie wat oor die plaas beweeg en inligting versamel, kan met dié terminaal data, soos brandstofverbruik en plantvolumes, aan die…

Plegium Smart Pepper Spray is die eerste pepersproei ter wêreld wat by slimfoontegnologie inskakel en ’n presiese liggingswaarskuwing aan jou noodkontakte stuur. Ál die sintuie van jou aanvaller word met dié toestel geplettervat. Die omhulsel bevat ’n sirene, drie kragtige LED-ligte en ’n sterk pepersproeiformule. Die pepersproeihouer word deur middel van ’n Bluetooth-verbinding met ’n toepassing aan jou slimfoon gekoppel. Sodra jy die pepersproei gebruik, stuur dit ’n SMS-boodskap van jou ligging aan jou noodkontakte. PRYS: R950 (aflewering ingesluit). NAVRAE: E-pos: mail@smartpepperspray.co.za; web: www.smartpepperspray.co.za…

Die monitor van vee is ’n belangrike deel van boerderybestuur waardeur boere ’n wakende oog oor hul kosbare besittings kan hou. Allflex SA se produk Sense-Hub is ’n modulêre oplossing wat ’n algoritme gebruik om praktiese, nuttige inligting oor reproduksie, gesondheid, voeding en algemene welstand van individuele koeie en kuddes te versamel. Dit kan in ’n nekhalsband of oorplaatjie aangebring word. Só kan ’n boer ’n waaksame oog oor sy vee se gesondheid hou, selfs al is hy nie op die plaas nie. Die tegnologie verbeter ook reproduksiebestuur deur uiters akkurate hittewaarneming 24 uur per dag. PRYS: Op aanvraag. NAVRAE: Mnr. Steffan Coetzee, e-pos: steffan@allflexsa.com, 066 485 1779.…

Die gebruik van digitale prosesse en tegnologie gee presisieboerdery by diereproduksie ’n groot hupstoot. Dit verbeter onder meer die gebruik van hulpbronne en die monitering van siektes, en maak naspeurbaarheid en deursigtigheid makliker. China, Amerika en die Europese Unie word as wêreldleiers beskou wat die gebruik van digitale prosesse en tegnologie in die dierebedryf betref. Dit vat ook gaandeweg in Suid-Afrika pos, veral in die melk-, pluimvee- en varkbedryf. Mnr. Franz Waxenecker, besturende direkteur van Biomin, het op Afma 2020, ’n internasionale simposium van die vereniging van veevoervervaardigers by Sun City, gesê die digitale revolusie gaan in die toekoms ’n nóg groter impak op landbouproduksie en die gehalte van produkte hê. Hy het die vordering van presisieboerdery in melkproduksie met studie op universiteit vergelyk. Plaas 1.0 was die dae toe…

’n Mobiele platform wat boere in staat stel om landboukundige inligting van die grond af tot by die mark vas te vang, kan hul lewe heelwat makliker maak. Die MyFarmWeb Mobile is ’n wolkgebaseerde platform wat bykans ál die data wat boere voorheen op papier moes versamel, in ’n enkele stelsel saamsnoer en verwerk. Só kan boere in ’n oogwink ingeligte besluite neem om hul wins op te stoot – met net ’n slimfoon in die hand. Luidens ’n mediaverklaring het Agri Technovation reeds in 2015 die visie gehad om boere se papiergebaseerde benadering tot landboupraktyke te vervang met ’n digitale oplossing genaamd MyFarmWeb. Die platform en gepaardgaande slimfoontoepassing is saam met Laeveld Agrochem, Vodacom en Mezzanine ontwikkel. Volgens mnr. Jacques de Vos, uitvoerende hoof van Mezzanine, help MyFarmWeb boere…

Dit is moeilik om te voorspel waarheen tegnologie in die landbou op pad is. Die grootste waarde kan lê in die bekendstelling van nuwe tegnologie waarmee weerstandige insekte bestry kan word, asook nuwe onkruiddoderweerstandige kultivars om dié te vervang waar weerstand teen bestaande tegnologie opgebou het. Só sê mnr. Andrew Bennett, voormalige bestuurder van tegnologie-ontwikkeling by Bayer. Hy sê die grootste potensiaal vir die bestryding van weerstandigheid is in die aanwending van Crispr (clustered regularly interspaced short palindromic repeats), ’n natuurlike beskermingsmeganisme wat in ’n wye verskeidenheid bakterieë voorkom. Ook deel van die beskermingsmeganisme is ’n stel ensieme genaamd Cas (Crispr-geassosieerde ensieme). Hierdie meganismes stel wetenskaplikes in staat om gene te gebruik om byvoorbeeld onkruid te bekamp. Crispr kan regulerende vereistes vergemaklik omdat sommige toepassings daarvan ’n geen afskakel pleks van…

Mnr. Frans van der Merwe, (REGS), bestuurder van die Marlenique-boerdery buite Franschhoek, is optimisties oor die SupPlant-stelsel wat in ’n blok Eurekasuurlemoene van 1,74 ha (nou sowat vyf jaar oud) getoets word. “Die toetsblok se bome toon ooglopend meer groei as die kontroleblok langsaan wat dieselfde ouderdom en kultivar is. Dit kan 100% daaraan toegeskryf word dat die bome in die toetsblok, waar die besproeiing beheer is, minder stres ervaar. “Die hindernis is om die besproeiingskedulering reg te kry volgens waterbeperkings en beurtkrag, asook die koste daarvan. “Die koste van R10 050 per hektaar per jaar klink hoog — dit is gegrond op dieselfde beginsel as ’n selfoonkontrak — maar namate waterbestuur al hoe belangriker in Suid-Afrika word, meen ek die belegging in hierdie of soortgelyke tegnologie sal die moeite…

Revolute Systems bied die opsie om hoëresolusie-plaasbeelde op ’n spesifieke dag te laat neem. “Ons sal op daardie dag ’n satellietstasie versoek om ’n kommersiële, internasionale satelliet oor te stuur,” sê mnr. Jacobus Els. Dié satelliet neem dan ’n eenmalige foto met ’n resolusie van 80 cm by 80 cm uit die ruimte. “Die gewone satellietbeelde se resolusie is 10 m x 10 m. Met die hoëresolusiebeeld kan jy letterlik die wingerdrye sien.” Dit is baie nuttig om byvoorbeeld presisiestrooierkaarte op te trek. “Ons het onlangs ’n plaas laat afneem waarvan die afstand tussen die noordelike en suidelike punt 7,5 km was. As jy ’n hommeltuig gebruik om dit te doen, gaan dit ’n hele paar uur duur. Namate die dag aanstap, verander die hoogte van die son en die…

Aerobotics is ’n tegnologiemaatskappy van Kaapstad wat spesialiseer in boordbestuur, die opsporing van vrugtebome met probleme, plaagen siektebekamping en nou ook opbrengsbestuur. Die maatskappy gee vroeë waarskuwings oor potensiële gewasbedreigings en lei boere om daarteen op te tree. Daarom is sy leuse “die beskermer van die boom-oes”. Die onderneming se tegnologie voeg gevorderde kunsmatige intelligensie en hoëresolusie-lugfoto’s saam. Met hommeltuie en NDVI-beelde maak die maatskappy presisieboerdery in die vrugtebedryf moontlik. Nie net boorde met probleme kan uitgewys word nie, maar selfs individuele bome binne die boord. Om die waarheid te sê, die tegnologie kan siektes soos blaaspootjies op ’n blaar uitwys — sonder dat elke boom met die menslike oog gefynkam hoef te word. Sodoende kan boere hul aandag en behandeling spesifiek rig op waar dit nodig is.…

As die “vader” van Futhi, die eerste gekloonde dier in Afrika, het dr. Morné de la Rey nie juis bekendstelling nodig nie. Hy het ook talle ander deurbrake in moderne teeltegnieke gemaak en werk kliphard agter die skerms aan nóg ideale waarby die diereryk baat sal vind. Selfs pres. Cyril Ramaphosa is een van sy kliënte en vertrou sy Ankolebeeste aan hom toe. De la Rey is saam met dr. Robert Treadwell die vennote en direkteure van Embryo Plus, ’n sentrum vir embriowerk, kunsmatige inseminasie (KI) en kwarantyn op Brits, wat in 1980 deur De la Rey se ouers, dr. Ronnie en Helena, begin is. Daar doen hulle onder meer KI, embrioversameling, in vitro-bevrugting, embrio-oorplasing na ontvangerdiere en kriogeniese bewaring. Treadwell is ook ’n veearts. Hy het hom in 1998…

Die afslaer en wolmakelaar BKB kon verlede jaar sy honderdjarige bestaan vier danksy die vertroue wat hy in dié tyd by sy kliënte ingeboesem het. Dit moet egter ’n stap verder geneem word. “Die ‘kyk-in-die-oë-en-skud-hand-vertroue’ wat die maatskappy die afgelope 100 jaar geskep het, moet nou gedigitaliseer word. Ons begin toenemend aan die internasionale mark deelneem, en as ons dit nie het nie, gaan ons nie ’n besigheid in die toekoms hê nie,” sê mnr. Jaco Maass, hoofbestuurder van BKB se onafhanklike tegnologiefiliaal, Shift DX. Markneigings en tegnologie is twee aspekte wat die landboubedryf en enige vertakking se toekoms kan ontwrig óf as geleenthede ontgin kan word. Volgens Maass word wêreldwye voedselproduksie deur uiterste markkragte in die gesig gestaar. Met die wêreldbevolking wat binne die volgende 30 jaar met 2…

Die maatskappy FlightWave Aerospace maak daarop aanspraak dat sy Edge UAS ’n volledige verkenningsplatform in die lug is. Dit kan van enige plek af opstyg of land omdat dit vertikaal kan opstyg. Die Edge kan 112 minute in die lug bly as dit vlieg en 34 minute as dit stil in die lug hang, en bly op koers in wind van tot 75 km/h. Die Edge kan tot 1 000 m hoog vlieg en het ’n topspoed van 93 km/h. PRYS: R145 000. NAVRAE: Mnr. Callie Mortimer, e-pos: callie@flightwave.aero…