Table of contents for 17 January 2020 in Vrouekeur

Die gesegde: Life is what happens when you are busy making other plans, was blykbaar John Lennon se wyse insig in die lewe en glo my, 2020 gaan dit weer vir ons bewys. Hier is ons aan die begin van nog ’n jaar met nuwe uitdagings wat op ons almal wag. Dis nou maar hoe dit is – uitdagings (meestal buite ons beheer) is deel van die lewe. Ons probeer hard, maar beheer oor die lewe het ons nie. Ek is besonder bewus daarvan (dit het bykans 60 jaar op aarde my geleer) dat ek oor bitter min dinge in my lewe beheer het. Met my persoonlikheid (het ek ook geleer) hou ek daarvan om ten minste die illusie van beheer oor my omstandighede te hê. Dis hoekom ek elke…

“Toe ek Idols SA gewen het, was my verwagtinge van die musiekbedryf eintlik baie eenvoudig: Ek wou bloot ’n lewe kon maak. Ek het gedink ek was gereed vir die uitdagings en moontlike roem, maar ek was toe nie,” sê Jan Adriaan Hoogendyk, beter bekend as die gewilde en bekroonde musikant, sanger en liedjieskrywer Elvis Blue “Ek was darem al 30 jaar oud en was miskien meer gereed as iemand wat baie jonk is. Ek het geweet ek moet volhoubaarheid skep. Om dit te kon doen, moes baie dinge in plek val. “Ek moes die regte mense rondom my kry, die regte liedjies skryf en goeie verhoudings bou. Roem is egter ’n wonderlike én dodelike ding. Ek verwerk en hanteer dit dag vir dag – soms met meer sukses as…

Suzette sê Elizabeth Kübler-Ross onderskei tussen verskillende roufases: 1 Skok of doodsheid, waar die persoon totaal oorweldig is en nie die omvang van die situasie kan inneem nie. Dit kan vir waarnemers soos gevoelloosheid lyk. Dit verskil egter, want dit is nie ’n karaktereienskap nie, meer eerder ’n emosionele reaksie. 2 Woede wat intense vyandigheid teenoor die self, ander, die situasie en in baie gevalle God behels. Die persoon kan passief, aggressief of selfs passief-aggressief optree. Dit kan onder meer onderskei word deur onttrekking, om tot die aanval oor te gaan of selfs stilstuipe te toon. 3 Onderhandeling, waar die persoon die situasie op ’n manier probeer beredder deur opofferings te maak, gedrag te openbaar met die hoop dat die situasie kan verander en selfs ’n verdrag met God probeer…

KOOP DIT HIER Clicks www.clicks.co.za Dis-Chem www.dischem.co.za Faithful to nature www.faithful-to-nature.co.za Inoar www.inoar.co.za Splush www.splush.co.za Woolworths www.woolworths.co.za…

Vir Caitlin Rooskrantz was 2019 háár jaar, maar 2020 beloof om ’n nog groter jaar te wees. In 2019 het sy 18 geword, matriek voltooi, en die eerste Suid-Afrikaanse vroulike gimnas geword wat ’n goue medalje internasionaal verower het. Sy het boonop vir die 2020 Olimpiese Spele gekwalifiseer. Caitlin, ’n gebore en getoë Johannesburger, het sommer al van kleintyd af geweet daar wag groot dinge op haar. Op sesjarige ouderdom was sy reeds ’n ywerige gimnas. Sy het voorskools aan Monkeynastics deelgeneem en haar ouers het gedink dis ’n goeie plan om hul sportiewe dogter aan gimnastiek te laat deelneem. Haar pa is oorlede toe sy agt jaar oud was en haar ma moes alles in die stryd werp om haar kinders alleen groot te maak en om Caitlin te…

JANUARIEWENBOEK Januarie-wenners wen Kristel Loots se boek Eendag is nou met die komplimente van Lapa Uitgewers. Jacomien se lewe bestaan daaruit dat sy haar man, ’n eiendomsagent, na begrafnisse vergesel om te netwerk en huise wat te koop mag wees op te spoor. Dis een van die rare maniere waarop die nimlike JanKoos sy sake bedryf en goeie vrou wat sy is, ondersteun sy hom daarin. Maar Jacomien is moeg en verveeld met JanKoos en hul manier van lewe. Sy trek uit en gaan bly in ’n strandhuis. Haar lewe lank wag sy daarop om eendag waarlik gelukkig te wees, net om te besef dat eendag nie meer op háár wag nie. Om die kroon te span, is haar 20-jarige dogter begogel met haar filosofieprofessor en Jacomien se bekommernis hieroor…

ALTYD AA N ’T BRAA I Braai waar jy ook al is met dié draagbare houtskoolbraaiertjie. Volg net die paar maklike instruksies om dit op te stel en siedaar – jy is gereed om te braai! Die braaier sal kos vir twee mense kan braai en dit is ook maklik om weer af te slaan. Dit sluit ’n vlekvryestaalrooster in, R899. www.woolworths.co.za MINDER SUIKER Canderel se nuwe reeks granola-produkte sonder bygevoegde suiker is ideaal vir ontbyt, nagereg of selfs gebak. Canderel Granola se veselinhoud is hoog en dis laag in natrium. Selfs koolhidrate en kalorieë is min. Dis in drie geure beskikbaar: Granola Original, Granola Four Seeds en Granola Nuts & Seeds. Die 500 g-pakke is van R44,95 tot R49,95 te kry en die 4 x 40 g-strookpakkies teen R18,95.…

ROLPRENTE LES MISÉRABLES 9/10 Met Damien Bonnard en Alexis Manenti Regisseur Ladj Ly DRAMA Hoewel hierdie rolprent natuurlik dieselfde titel as die klassieke roman van Victor Hugo (en die musiekblyspel en vele ander rolprente hieroor) het, is hierdie weergawe absoluut uniek. Dit speel in dieselfde Paryse voorstad, Montfermeil, as die Hugo-roman af, maar wel in 2019 en wys niks het eintlik verander nie. Daar is steeds erge armoede, nou met dwelmhandel, korrupsie en polisiebrutaliteit besmet. ’n Groep straatkinders raak in ’n gewelddadige oorlog met die polisie betrokke wat hulle teister en verneder. Een polisiebeampte verstaan egter die armes se kant van die saak en probeer help. Daar is woeste en ontstellend gewelddadige tonele, maar die rolprent praat die waarheid onomwonde en vreesloos, met ’n styl wat op die rand van…

Die eerste keer dat iemand vir my die vraag gevra het, was ek seker agt of nege jaar oud: Wat wil jy eendag doen wanneer jy groot is? En baie jare het ek net een antwoord gehad: Ek wil eendag in die sirkus werk. Iets omtrent ’n lewe in die sirkus het vir my besonder aanloklik gelyk. Daar was diere, hansworse, pragtige meisies in kostuums, ’n wonderwêreld van kleur, blink ligte en spookasem. Ek het ook van hul nomadiese lewenstyl gehou. Jare later het ek as joernalis ’n storie oor die sirkus gedoen en deur die oë van ’n volwassene het dit nie meer so romanties gelyk nie. Die diere in hul klein kampies en hokke het my ontstel en in die daglig het die sirkuswerkers allesbehalwe flambojant gelyk, eerder…

Die feestyd is verby en Januarie is amptelik die langste maand van die jaar. As jy nou graag iets in jou tuin wil plant, maar jy wil nie ’n fortuin spandeer nie, is daar gelukkig plante wat nie net maklik groei nie, maar ook billik geprys is. ENGELVLERKIES (GAURA LINDHEIMERI) Hierdie mooi meerjariges is beslis waarde vir geld. Mens kry vir ongeveer R50 ’n plant wat nie baie aandag nodig het nie, mal oor die son is en boonop rypbestand is. Hul skoenlapperagtige blommetjies kom in middellente te voorskyn en jy kan dit tot ongeveer laatwinter geniet. ICEBERG FLORIBUNDA-ROSE Die bosse sowel as die standaardrose vertoon wonderlik in die tuin. Dit is dus nie verbasend dat dit die gewildste rose op die mark is nie. As jy die grond voor…

Ds Janine Bevolo-Manders is verbonde aan die Nederduitsch Hervormde Kerk Witfontein in Pretoria-Noord en is al 20+ jaar ’n predikant Lees Lukas 7:36-50, die verhaal van Simon die Fariseër en die vrou met die albastefles vol olie. ’n Vrou was op ’n oorsese vlug toe sy een van die lugwaardinne roep en sê sy voel sy kry ’n hartaanval. Die lugwaardin vra toe dadelik: Is daar ’n dokter aan boord? Altesaam 67 hartspesialiste het opgestaan. Hulle was almal na ’n konferensie vir hartchirurge op pad. Kan jy haar vreugde en verligting voorstel toe sy al die dokters sien? Hulle was gereed, gewillig en in staat om haar probleem reg te diagnoseer en die regte behandeling voor te skryf. Hulle het die kennis, die bevoegdheid en die begeerte gehad om na…

Vandag ontmoet ek Taliep Petersen se dogter Jawaahier en natuurlik is die herinnering aan ’n merkwaardige man en sy voortydige heengaan in jou agterkop. Ek durf egter nie vergeet dat Jawaahier, ’n jong vrou wat haar eie pad in die wêreld stap, die rede vir die onderhoud is nie. Tydens die gesels praat ons wel oor Taliep, soms loop die trane, maar meestal is dit in ’n gees van blydskap, liefde en dankbaarheid. En nie net oorrompel die aktrise jou met haar warmte en sjarme nie, dis haar waardigheid en integriteit wat ’n blywende indruk laat. Sy’s ’n pragtige vrou, jy sal nooit raai dat sy olik voel nie. “Ek is af vandag en dit gebeur so selde, ek het sommer verkoue gekry,” sê sy laggend. “Soveel jare lank het…

Volgens die Suid-Afrikaanse Depressieen Angs-steungroep (Sadag) ly tot een uit elke ses Suid-Afrikaners aan angs, depressie of middelmisbruikprobleme. Dit sluit mense met ernstige toestande soos bipolêre gemoedsversteuring en skisofrenie uit. Mens wonder hoeveel Suid-Afrikaners ly as gevolg van misdaad aan angs en depressie? Dr Hermann Liebenberg, ’n sielkundige en Vrouekeur se rubriekskrywer oor sielkunde, sê dis ’n werklikheid dat misdadigers tydens huisrooftogte nie net daarop uit is om jou besittings te steel nie. “Ek het al in praktyk gehoor van ’n pasiënt wie se magtelose man langs haar in die bed geskiet is, na hul kind se kamer gekruip het en weer geskiet is en toe aan sy wonde beswyk het. Kan jy jou hul trauma indink?” Hermann sê slagoffers van huisrooftogte moet gewoonlik lank terapie ondergaan omdat daar verskeie…

Caitlin het in 2019 haar eerste goue medalje internasionaal op die ongelyke brug gewen. Net voor die World Challenge Cup in Hongarye het sy ’n voetbesering opgedoen en wondere moes verrig word om haar gereed te kry. Sy het in September in die vierde plek gekwalifiseer vir die finale van dié kompetisie wat in Szombathely, Hongarye, gehou is. En daar wen sy toe goud – ’n uitsonderlike prestasie, aangesien Caitlin die eerste Suid-Afrikaner was wat goud op die ongelyke brug gewen het. Só het sy geskiedenis vir haar land gemaak. Haar afrigter sê hulle was oorweldig toe die Suid-Afrikaanse volkslied tydens die medaljeseremonie gespeel is. “Dit was die eerste keer dat ek dit by ’n internasionale gimnastiekbyeenkoms gehoor het. Ek was só trots – daar is vantevore nog net silwer…

OOSTERSE HOENDER IN RYSPAPIERPAKKIES 4 porsies 3 hoenderborsies, in repies gesny125 ml (½ k) sojasous5 ml (1 t) fyn knoffel5 ml (1 t) fyn gemmer12 ryspapiertjies1 komkommer, in julienne-repies gesny100 g (1 pakkie) wortels, in julienn-erepies gesny100 g (1 pakkie) klein mielies, in helftes gesny6 radyse, dun gesnykoljander SOUS 60 ml (¼ k) sojasous30 ml (2 e) heuning45 ml (3 e) rysasyn60 ml (¼ k) grondboontjiebotter 1 Marineer hoender in soja, knoffel en gemmer vir ongeveer 20 minute. 2 Braai hoenderrepies tot gaar 3 Maak ryspapier met kookwater nat. Sit plat op kapplank neer 4 Pak komkommer, wortels, mielies, radyse en hoender in ryspapier. Vou toe en rol op. 5 Maak pakkies tot alle bestanddele klaar is. 6 Sous Meng alles en doop rolletjies daarin. Garneer met vars koljander HOENDERPASTA…

Die ontdekking van die ryk goudrif aan die Witwatersrand was die doodskoot vir vele klein dorpies wat weens kortstondige goudstormlope ontstaan het – met al wat oorbly die klein stukkies in die legkaart van vervloë jare se geskiedenis. Dié plekke bied telkens ’n verrassing van ’n ander aard wat uit die vreugdes van die edelmetaal spruit Barberton, soos ’n spikkel goud omring deur die Makhonjwa-berge in Mpumalanga, is juis so ’n dorp wat nie prullerig op die rug van sy herkoms ry nie, maar die omgewing daadwerklik ontwikkel, herontgin en as weldeurdagte toevlug vir toeriste en navorsers aanbied. Om die een of ander rede het ek altyd die dorp met ’n ietwat onaantreklike vissoort geassosieer totdat ek op die spore van Percy Fitzgerald en sy geliefde Jock kon loop, na…

Van alles wat kan taan, verloor roem sy glans waarskynlik die vinnigste. Dit sien mens in die eietydse musiek-en rolprentwêreld met sterre wat ’n tyd lank blink flonker net om later heeltemal van die toneel te verdwyn. Hoewel daar deesdae meer glansganse is wat om kalklig meeding, is dié verskynsel egter so oud soos die mensdom. Bykans sewe eeue gelede was die Florentynse skilder Cimabue die blinkste ster aan die skildersfirmament. Georgio Vasari se beroemde boek oor die lewe van die voorste skilders, beeldhouers en argitekte van die Renaissance begin immers met ’n eerste hoofstuk oor Cimabue, die man wat hy sê die grondslag van die skilderkuns in Italië gelê het. Die einste Cimabue was egter verantwoordelik vir sy eie ondergang – die dag toe hy ’n jong skaapherder sy…

VROU MAAK BED NAT Ek en my vrou is al 30 jaar getroud en in ons vyftigerjare. Ons het onlangs ’n rooftog in ons huis oorleef. Daarna was my vrou nooit weer dieselfde nie. Sy word snags gillend van nagmerries wakker en soms maak sy die bed nat. Dis vir haar ’n groot verleentheid. Sy was by ’n uroloog en daar is nie fout nie. Wat is jou raad? – Bekommerde man Dit wil voorkom of sy ’n psigosomatiese reaksie op die trauma toon. Hierdie tipe reaksie is nie vreemd gesien binne die konteks van ernstige trauma nie. Indien die uroloog geen fisiologiese oorsaak kon vind nie, is die oorsprong in alle waarskynlikheid psigies van aard. Jou vrou moet dringend ’n traumasielkundige gaan sien om die trauma te ontlont. Met…

Hierdie jeugroman het die Sanlam 2019 Silwer Prys vir jeuglektuur gewen. Die 16-ja rgie Paul is verwikkeld in ’n gevaarlike hofsaak. Dan ontdek hy per abuis ’n smokkelary en dinge word baie gevaarlik vir hom en sy vriende. www.nb.co.za 3 lesers kan die boek wen. SMS SINDIKAAT gevolg deur jou naam, van en adres voor 22 Januarie 2020 na 48410. SMS’e kos R1,50 en is net vir mense in SA. Geld word vir foutiewe sleutelwoorde gehef en gratis SMS’e geld nie. Bepalings en voorwaardes: Deur vir hierdie kompetisie in te skryf, gee jy Caxtontydskrifte die reg om ander Caxton-tydskrifaanbiedinge aan jou te bied.…

Vir Dina Viljoen, wat onder die naam Dihanna Taute skryf, sal verlede jaar altyd uitstaan. Sy het die MER-prys vir die beste jeugroman ingepalm en is met alopesie gediagnoseer. Dina en haar man, Louwrens, het drie seuns, Eras, Henru en Janko, en ’n dogter, Corlisha, en het twee jaar gelede na Wellington, Nieu-Seeland, verhuis. Sy is ’n boorling van Welkom en nadat sy in 2001 gematrikuleer het, het sy na Bloemfontein verhuis. Sy is later as tekenaar by stadsbeplanners aangestel. Nadat sy vir Louwrens ontmoet en hulle getrou het, het hulle gereeld vir sy beroep as padingenieur getrek. Die MER-prys vir die beste jeugroman in Afrikaans of Engels en die beste geïllustreerde kinderboek is vir die eerste keer in 1984 toegeken. Dina het dit vir Die legendariese Lua Verwey met…

’N GEBREK AAN SEKSUELE AANTREKKING As julle nie regtig seksueel aanpasbaar is nie, kan julle daaraan werk deur te kommunikeer en te eksperimenteer. Julle kan mekaar mettertyd seksueel “vind” en wonderlike seks hê. As daar géén seksuele aantrekking is nie, moet jy in gedagte hou dat hierdie probleem nie altyd opgelos kan word nie, veral as julle nie bereid is om daaroor te praat nie. ’N OORHEERSENDE EN VEELEISENDE PERSOONLIKHEID Soos gesê, gedra mense hulle aan die begin van ’n verhouding baie goed. Hulle wil ’n goeie indruk maak en sit hul beste voetjie voor. Moet dus nie enige tekens dat jou nuwe maat oorheersend en veeleisend is of ander toksiese karaktertrekke het, ignoreer nie. VERSKILLE OOR HANTERING VAN GELD Verskillende benaderings tot geld en die uitgee daarvan is die…

Die platform is deur Barbara van der Westhuizen, ’n mediese dokter met ’n skeppende hart gestig. Sy raak passievol daaroor om ander se drome aan te moedig en wanneer ’n sagte pienk blokkie met sinvolle raad van @creativ.and.kind in jou lys Instagram-foto’s opduik, kan jy maar weet dit gaan jou nuwe perspektief gee. Hier is ’n paar van Barbara se wenke: ▸ 20 dinge wat vroue nie meer moet dra nie: 1–2 die gewig van ander mense se oordeel en verwagtinge.▸ Dinge om aan die einde van die dag te verwyder: bra, grimering, toksiese mense en perspektiewe wat jou beperk.▸ Inspirasie beteken niks as dit nie deur aksie gevolg word nie. So laat waai en wees skeppend.▸ ’n Meisie wat groot dinge gaan doen, kan nie toelaat dat klein dingetjies…

SOMERWYNE Dis weer tyd vir die jaarlikse Franschhoek Summer Wines-partytjie. Die geleentheid word op Saterdag 1 Februarie by die Leopard’s Leap-wynlandgoed gehou. Heerlike wyne word deur seisoen-geïnspireerde kos van die sjef Pieter de Jager en sy span gekomplementeer. Kaartjies kos R280 per persoon. Voorafbespreking via www.webtickets.co.za is noodsaaklik. Meer inligting by 021 876 2861 of info@franschhoek.org.za DON QUIXOTE OP DIE PLANKE Joburg Ballet se 2020-seisoen skop in Maart met Don Quixote af. Die balletopvoering met musiek deur die Johannesburgse Filharmoniese orkes is van 13 tot 22 Maart op die planke. Kaartjiepryse wissel en as jy voor 26 Januarie bespreek, kry jy afslag. Vk Bespreek by www.joburgtheatre.com of www.webtickets.co.za STERLING EQ OP DIE VERHOOG Die V&A Waterfront-amfiteater bied weer hul gewilde gratis somerkonserte aan. Die instrumentale poptrio Sterling EQ tree op…

#bakliefde Mareli KRUIEBROOD 1 brood 325 ml water, louwarm1 pakkie (10 g) kitsgis7,5 ml (½ e) suiker950 ml (500 g) witbroodmeel7,5 ml (½ e) sout7,5 ml (½ e) olyfolie30 ml (2 e) botter1 knoffelhuisie, fyngekap1 blok (150 g) wit cheddarkaas, fyngerasper15 ml (1 e) vars roosmaryn, fyngekap45 ml (3 e) vars pietersielie, fyngekap Voer ’n broodpan van 8,5 cm x 28 cm met bakpapier uit en spuit met kleefwerende sproei. 1 Gooi water, kitsgis en suiker in mengbak en meng tot gis opgelos is. 2 Gooi meel en sout by en meng tot deeg vorm. Gooi olyfolie by en knie vir vyf minute tot deeg glad en elasties is. Bedek deeg met plastieksak en laat tot dubbelvolume rys. 3 Smelt botter en meng met gekapte knoffel. 4 Keer deeg op…

NEIL NACHTREIN SE KLANKRYKE WOORDKUNS Die sanger-liedjieskrywer Neil Nachtrein is beter bekend as ’n lid van die duo Blomtrein (saam met Jan Blohm). Neil het sy debuutalbum, Gisters & Blisters, in 2012 uitgereik, waarna hy drie jaar lank saam met Blomtrein “gestoom” het. Nou het hy besluit om sy eie spore te trap met die uitreiking van sy oorspronklike album, Op plekke waar ons eens was. Die nuwe album is ’n reis na gister. Dié Vrystater delf in herinneringe en nostalgie en verken emosies intens. Sy lirieke besing die alledaagse en die onverwagse; altyd met ’n verrassende wending. Hy lê sy siel bloot. Hy word beïnvloed deur dit wat hy lees en waarna hy luister en hy word begeester deur dit wat hy waarneem: die werklikheid. Dit is ’n alternatiewe…

In die reeks “Komponiste om van kennis te neem” het veral bekende komponiste in die musiekgeskiedenis tot dusver die kollig gekry, dié wie se musiek mens in konserte en oor radioprogramme hoor: die Bachs, Beethovens en Brahms van die wêreld. Nietemin is daar ’n magdom komponiste wat óf in die skadu van die meesters gestaan het – dink maar aan Salieri, ’n tydgenoot van Mozart – óf mettertyd gewoon in vergetelheid geraak het. Die bekendste van dié “onbekende” komponiste is gewis Antonio Salieri (1750–1825), die Italiaanse komponis wat ses jaar ouer as Mozart (1756–1791) was en aansienlik langer as Mozart gelewe het. Die naam Salieri en snitte van sy werk is dalk aan die meeste mense bekend, danksy Amadeus, Milos Forman se 1984-rolprentweergawe van Peter Shaffer se verhoogstuk. Dit was…

Rocco, ’n suksesvolle argitek met ’n “byna volmaakte lewe”, besef naby aan die einde van Jaco Kirsten se jongste roman, Nadraai, dat “die oorlog waarmee hy en sy tydgenote besig was, deel is van ’n groter siklus wat nou eers voltooi word”. Die Grensoorlog wil maar nie gaan lê nie. Die eerste “grensverhale” het in die 1970’s verskyn, maar veral in die 1980’s het die sogenaamde “grensliteratuur” as ’n soort subgenre sterk op die voorgrond getree. Die manier waarop die Grensoorlog en dienspligervarings destyds weergegee is, was meestal in die vorm van kortverhale – en die bundel deur Alexander Strachan, ’n Wêreld sonder grense, is seker een van die sterkste bundels uit dié tydperk. Ander skrywers soos Etienne van Heerden, Louis Kruger, Harry Kalmer, Gawie Kellerman en Koos Prinsloo het…

Teiken Hoeveel woorde van vier (4) of meer letters kan jy uit die gegewe letters saamstel? Elke letter in die rooster mag net een keer in ’n woord voorkom. Elke woord moet die letter in die ingekleurde blokkie bevat en daar moet minstens een woord met nege letters wees. Meervoude, verkleinwoorde, eiename, woorde met koppeltekens en uitheemse woorde tel nie. (Die stamwoord vir elke woord is in die Verklarende Afrikaanse Woordeboek, HAT en/of WAT). TEIKEN: 07 woorde, goed 10 woorde, baie goed 14 woorde of meer, uitstekend OPLOSSING: Parufeer, ampere, ereamp, pareer, amper, puree, rampe, aper, aper, pure, ramp, rape, reep, repe Koderaai Elke syfer verteenwoordig ’n letter van die alfabet. Om mee weg te spring, is 3 (drie) letters klaar ingevul. Kyk nou of jy kan uitwerk wat elke…