Landbouweekblad 31 October 2024

SA se veemeesters binnekort bekroon Christoff Lourens van Napier in die Wes-Kaap is op 30-jarige ouderdom dalk betreklik jonk om Schietpad se Merino- en graanvertakkings vir sy werkgewer, André Wessels, te bestuur, maar hy doen dit met ’n meesterlike hand. Christoff is een van die drie skaapboerfinaliste in Voermol se Skaap- en Beesboer van die Jaar-kompetisie, waarvan die wenner in November aangekondig word. Die beoordelaars het in Oktober die drie beesboer- en drie skaapboer-finaliste besoek tydens ’n reis van sowat 3 200 km wat gestrek het van Mooketsi in die noorde van Suid-Afrika tot Napier in die suide. ’n Kort oorsig van al die finaliste word in die volgende uitgawe van Landbouweekblad gegee. Benewens Voermol en Landbouweekblad, word die kompetisie aangebied saam met FNB, BKB, Zoetis, die RPO en NWKV.…

Tornado by Balfour ‘was soos ’n Amerikaanse fliek’ Hy het eers gedink dit is dalk ’n swaar donderstorm wat op pad is, maar toe was dit ’n tornado wat baie min reën gebring het, sê Danie Bester, boer van die Balfour-distrik in Mpumalanga. Dit is een van die droogste Oktobers wat hy nóg op sy plaas, Rietbult, beleef het. Hy het nog net hier en daar 1-2 mm reën gehad. “Die reën val weer spoeg-spoeg en kol-kol. Daar is boere in die streek wat die naweek tot 30 mm reën gemeet het, maar hier het nog niks geval nie.” Bester het Sondag 20 Oktober “ ’n vreemde fluitgeluid gehoor, en toe sien ek die tornado vinnig naderkom. Dit was soos iets wat ek al in ’n Amerikaanse fliek gesien het.…

SPEENKALF- en lamsvleispryse aan boere het begin styg en die tekens vir verdere prysstygings lyk belowend. Die gemiddelde prys vir speenkalwers wat 200-250 kg weeg, het volgens AMT se syfers in die week van 14-18 Oktober met 2,7% gestyg tot R30,48/kg (lewende gewig). Dié prys is egter 9% laer op ’n jaargrondslag. Die druk waaronder die ekonomie sedert die covid-19-pandemie in 2020 verkeer, blyk uit meegaande GRAFIEK. Prof. Nick Vink, emeritusprofessor aan die Universiteit Stellenbosch se departement landbou-ekonomie, het op AgriSA se afgelope kongres in Kaapstad bewegings in die bedryf die afgelope eeu ontleed. Die per capita-verbruik van pluimvee het sedert 1956 drasties teenoor dié van rooivleis toegeneem. In die 1980’s en die vroeë 1990’s het mense se verbruik van hoender teenoor rooivleis weer wipplank gery, waarna verbruikers per jaar…

KOBUS VISSER sê hy kan die dag nog goed onthou toe hy op 2 Januarie 1986 by die deure van die destydse Suid-Afrikaanse Landbou-unie (nou AgriSA) in Pretoria ingestap het. Hy het getwyfel of hy die regte besluit geneem het om Bloemfontein te verlaat, maar hy kan vandag onomwonde sê dit was een van die beste besluite wat hy in sy lewe geneem het. Visser tree einde Oktober af “ná ’n wonderlike tyd saam met wonderlike mense by AgriSA”. Hy is egter nie vir die landbou verlore nie. AgriSA het hom gekontrakteer om steeds met die AgriSecuritas-trustfonds, asook die administrasie van Agri Gauteng te help. Wat was vir jou ’n hoogtepunt? Een wat my bybly, is die gesprekke wat ons met oudpres. Nelson Mandela oor landelike veiligheid gehad het en…

Anderkant die reënboog Nog nooit was ek só bly oor ’n rits kansellasies nie! ’n Klomp boere bel die oggend van Landbouweekblad se onlangse Vee-akademie op Nampo-park by Bothaville en laat weet: Jammer, dit het gereën, daar moet nóú geplant word. “Die ark is nou wawyd oop,” is hoe ’n pêl dit vanuit die kajuit van sy trekker beskryf. ’n Rapsie oor 200 mense daag toe wel deur al die geplantery en kalf- en lamtyd op vir wat uiteindelik ’n fantastiese, interessante dag sou wees met goeie, wyd uitlopende sprekers. Van voerkraaleienaars tot die manne met vrylopende beeste was daar. Topsjefs het kom vertel wat hulle in vleis soek, terwyl daar insigte gedeel is oor die enorme geleenthede in die informele mark, waar miljarde rande ongesiens bestee word. Dieetkundiges het…

POSBUS 1802, KAAPSTAD 8000; e-pos: lbw@landbou.com Veterane pronk op Villiersdorp Die milde winterreën in die Boland het in Augustus gesorg vir minder besoekers aan Villiersdorp se jaarlikse skou, wat vanjaar ook die tweejaarlikse nasionale skou van die Suid-Afrikaanse federasie van veteraantrekker-en-enjinklubs (Savtek) ingesluit het. Die besoekers is egter getrakteer op baie goeie restoureerwerk, asook op ’n versameling artikels van geskiedkundige betekenis wat selde op een plek in die land bymekaar gesien sal word. Om te sien hoe ’n Caterpillar-padskraper van 1918 deur ’n 1911 Fairbanks-Morse-eensilindertrekker getrek word, is vir baie min mense beskore. Ditto om die Fairbanks-Morse saam met ’n 1913 Rumeley Oil Pull in ’n arena te sien rondry. Die Rumeley is spesiaal vir die skou van Clocolan in die Oos-Vrystaat na die Wes-Kaap gebring. ’n Wes-Kaapse skou vir…