Table of contents for 2026-01-20 in Isolezwe

KUZAMAZAME izinkundla zokuxhumana ngesikhathi inkakha yomculo kamaskandi uMandla "Shwi" Xaba imemezela ukuthi iqembu lakhe noZwelenduna "Mtekhala" Magubane, likhuza ibuya emculweni. UShwi, odume ngeleKhehla Lenyoni, udalule lezi zindaba maqede kwachazeka abantu abaningi. "Kukhona esikuphekayo. Aphinda abuya lawo madoda, uKhehla Lenyoni noGolog' Obomvu. Anisasazi senisizwa ngendaba. Kulo nyaka lukhulu oluzayo. Uzozwa ngetshe njengenyoni," kuchoma uShwi. Kwenzeka lokhu nje, lezi zinsizwa ezidabuka eMahlaba, eMsinga, bezingasabhekani, seziyinkukhu nempaka emuva kombango okwagcina kungacacanga ukuthi wawuqutshulwe yini. Abanye babethi baqhathwa yimenenja kodwa abanye bethi baqhathwa yizingoma. Ukungahoshelani kukaShwi noMtekhala bekucaca uma bebizwe kumaYouTube Channel ngoba omunye ubekhuluma kabi ngomunye. Omunye ubefike akhombe omunye esweni, nomunye avikele iso lakhe. Nasemicimbini bese beqashwa ngokwehlukana. Ukukhumelana umlotha kugqame ngesikhathi uShwi etheleka emcimbini wokwethulwa kwecwecwe likaMtekhala elithi Inkunz' Emavava eMahlathini Park eVosloorus, ngoDisemba 13. Kwamangala abantu abaningi bebonakala esiteji becula…

SHAQISE noMengameli Cyril Ramaphosa ingozi okushone kuyona abafundi abangu-13 izolo ekuseni, ngesikhathi itekisi ebithwele abafundi abebeya esikoleni, ishayisana mahlanze neloli. Kuthiwa umshayeli wetekisi uzame ukudlula izimoto ezine kanti uzoshayisana neloli. Endaweni okwenzeke kuyona le ngozi eVaal, eduze naseVanderbijlpark, kudume ukuthi amaloli ajwayele ukuhamba ngesivivini esiphezulu. URamaphosa udlulise amazwi endunduzo emndenini yabafundi abashone kule ngozi. Kubikwa ukuthi abanye abafundi baphuthunyiswe esibhedlela, lapho belashwa khona. "Sidlulisa amazwi endunduzo emndenini yabafundi abashone kule ngozi. Ngaso sonke isikhathi kumele kulandelwe imithetho yomgwaqo. Silahlekelwe kakhulu siyizwe kule ngozi," usho kanje. UNgqongqoshe weMfundo eyisiSekelo, uNksz Siviwe Gwarube, uthe ngaso sonke isikhathi kumele zibe sesimweni esifanele izimoto ezithwala abafundi. "Abezomthetho kumele baqinisekise ukuthi ngaso sonke isikhathi zisesimweni sokuba semgwaqweni izimoto ezithwala abafundi. Siyazi umsebenzi woMnyango wezokuThutha ukuqinisekisa ukuthi izinto ezithwala abafundi zisesimweni," usho kanje. Unxuse abathwala abafundi…

UMPHENYI wamacala othinteka ezinsolweni ezenziwa wuKhomishana wamaPhoyisa KwaZulu-Natal, uLieutenant General Nhlanhla Mkhwanazi, uMnuz Paul O'Sullivan, uyaqhubeka nokugolozela amalungu ekomiti lasePhalamende njengoba enqaba ukuzifikela mathupha futhi ethi ngeke avume ukuhlohlwa ngemibuzo ngamanye amalungu ekomiti awabize ngezigebengu. U-O'Sullivan uthe usamile ekutheni ngeke azifikele mathupha ePhalamende kodwa uzovela esebenzisa ezokuxhumana. Lokhu kuhlaluke ngesikhathi kunomhlangano wekomiti, izolo. Usihlalo wekomiti, uMnuz Soviet Lekganyane, uthe u-O'Sullivan ubabhalele incwadi ebazisa ukuthi ngeke akwazi ukuzifikela mathupha ngenxa yokubona engaphephile nokuthi akekho kuleli. ULekganyane uthe u-O'Sullivan uthe uvakasheile eLondon, wathi uyoze abuye ikomiti seliwuqedile umsebenzi walo okufanele liwuphothule ekupheleni kwenyanga ezayo. "Uthe uhambo lwakhe waluhlela ngaphambi kokuthi kusungulwe ikomiti." ULekganyane uthe u-O'Sullivan uthe ngeke ayiphendule imibuzo yamalungu eMKP, EFF, nawe-ActionSA. "U-O'Sullivan uyasithuka, uthi iPhalamende ligcwele izigebengu. Wenza izinsolo ezibucayi lapho esola khona amalungu ePhalamende ngokuthi asebenzisana nabantu abafuna…

CHILIZWE ngokuthi wenganyelwe yimimoya emibi owesifazane obonakale kwi-vidiyo esabalale ezinkundleni zokuxhumana ephuca umfundisi waKwaSizabantu iBhayibheli eshumayela epulpiti. Kule vidiyo kubonakala owesifazane ephazamisa uMfu Jabulani Dube emphuca iBhayibheli bese emsola ngokuthi uyena owamphuca ubuntombi bakhe ngesikhathi elele naye. Okhulumela ibandla, uMfu Michael Ngubane, ukhulume neSolezwe ngalesi sehlo. Uthe isehlo sibethusile kakhulu ngesikhathi senzeka kodwa babuye bakhumbula ukuthi owesifazane unemimoya emkhungethe akhulekiswayo kuyona esontweni. Ukuqinisekisile ukuthi owesifazane uyilungu lebandla labo. "Ufike ebandleni evele enezinkinga ezihlukene ebezimhaqile. Kodwa ngenxa yokuthi siyibandla elingakhethi iphela emasini sabona ukuthi asimamukele enjalo. Ngemuva kokuzwa zonke izinkinga zakhe sabe sesiqala samkhulekela sifuna akhululeke kule mimoya," usho kanjena. Uthe yize ekuqinisekisa ukuthi owesifazane unemimoya kodwa ngokwenqubomgomo yebandla abavumelekile ukuthi badalule izinkinga zomzalwane esidlangaleni okanye kwabezindaba. Lokho uthe akugunyaziwe futhi kungaletha ungabazane ngaleli bandla, ngoba abantu bacela usizo khona…

KUBA mnandi uma kuhlangene imindeni, izihlobo nabangani kudliwa izibiliboco, kugeleza neziphuzo. Sikuphathele imicimbi ehlukene exoxwa ngezithombe. Uma ufisa ukuthi izithombe zomcimbi wakho zishicilelwe kuleli khasi, zithumele nge-email ethi: isolezwe@inl.co.za. Bhala kafushane ukuthi bekuwumcimbi kabani? Umayelana nani? Ukuphi? Uma esithombeni kukhona abayisihlanu kuya phansi, sicela nibhale amagama nezibongo zomuntu ngamunye. Izithombe zemicimbi sezishicilelwa njalo ngoLwesibili.…

UKUQALA isizini ka-2025/26 yeBetway Premiership ngonyawo oluhle kwamanye amaqembu aKwaZulu-Natal kwenza kubhekwe ngabomvu ukuthi azokwazi yini ukubamba umgqigqo awuqale ngayo isizini njengoba kuqala umzuliswano wesibili.IBetway ibuyela ensimini kuleli sonto ngemuva kwekhefu le-Africa Cup of Nations (Afcon), njengoba iqale izolo ngomdlalo weMamelodi Sundowns ne-Orbit College. Womane amaqembu avula unyaka ngemidlalo emithathu yasekhaya, nowodwa wasekuhambeni. AmaZulu FC YIZE kunemidlalo AmaZulu alahle amaphuzu kuyona kungafanele kodwa ukubuya kwawo namaphuzu amqoka kweminye yemidlalo yikho okwenze kwayiwa ekhefini le-Afcon esendaweni engcono kwi-log yePremieship. Asendaweni yesihlanu ngamaphuzu angu-24 emidlalweni engu-14. Ukungena emakethe koSuthu kuleli windi likaJanuwari lokuhwebelana nokubhaliswa kwabadlali, kuyinkomba yokuthi luzimisele ngokuqhubeka nomgqigqo oluqale ngayo isizini. Leli qembu eliqeqeshwa ngu-Arthur Zwane, lisanda kusayinisa abadlali abathathu kuleli windi, okungowasesiswini, uMason Mashore osuka kwiHighlanders yaseZimbabwe, uGustavo Lopes osuka kwiFerroviario Beira yaseMozambique naye ongumdlali wasesiswini, nomunye…

SILOMO somsakazi weGagasi FM, uFelix Hlophe, sizehlisile saxolisa kubalaleli besiteshi ngesehlo esaqoshwa kwi-vidiyo siqophisana ngamazwi nomkaso nabanye ngoDisemba saze sanikwa ikhefu emsebenzini. UFelix ubuyele okokuqala emoyeni nonyaka izolo ngesikhathi yena noMinnie Ntuli bethula uhlelo lwabo iThe Uprising. Kusuka kuqale unyaka belubanjwe nguHeazy noLuyanda Khambule. UFelix kwakulindeleke ukuthi ethule uhlelo lokuwelisa abalaleli ku-2026 noLinda "Mr Magic" Sibiya noSelbeyonce Mkhize ngoDisemba 31. Uhlelo lwagcina lusakazwa uMr Magic noSelbeyonce kuphela. Ngenyanga edlule Isolezwe labika ukuthi umkaFelix wahamba emuva kokucasulwa yisicelo somyeni wakhe sokuthi makalungise izibiliboco kujatshulelwe ukuthi izingxoxo zelobolo likamnakwabo zihambe kahle. Kwi-vidiyo wayezwakala kungathi uzobalanda kubo kamngani wakhe lapho umkakhe ayesekhona. Esitatimendeni uFelix wathi emuva kokuvela kwezindaba ezithinta yena, umkakhe wamukela isimemo somngani sokuyoshaywa wumoya nezingane, wabe esehamba eyobalanda. Ngaleso sikhathi, wathi kwaphakama umoya kodwa akaze ambeke isandla. Waveza ukuthi badla uKhisimusi…

ICHONYWE uphaphe lwegwalagwala iziboshwa eziphumelele ngamalengiso izivivinyo zika-matric, ezigqunywe emajele akuleli. IKwaZulu-Natal, ihambe phambili ngabaphase u-matric. Isikole esisejele iDurban Westville, i-Usethubeni Correctional Centre, yisona esiqwaqwade ezinye izikhungo ngokuthola u-100% kuleli banga. Bonke abangu-31 ababhalile kulesi sikhungo baphase ngamaBachelor. UNgqongqoshe wokuHlunyeleliswa kweziMilo, uDkt Pieter Groenewald, uthe sebebonke ababhale esifundazweni bangu-50, abangu-45 babo, baphumelele ngama-Bachelor. "Sekuphele iminyaka engu-10 lesi sikhungo siphasa ngo-100% iminyaka ilandelana. Lokhu kuveza ngokusobala ukuthi ukufunda akumi uma umuntu egqunywe ejele. Kusengenye yezindlela zokuhlumelelisa izimilo kulabo abasuke begcinwe ezikhungweni zethu," usho kanje izolo, ededela imiphumela yasemajele eGoodwood Correctional Facility, eWestern Cape. Uthe noma begqunywe emajele kodwa kubalulekile ukuthi uma bededelwa, kube kukhona abakuphethe. "Asigcini ngokuthi sibagqugquzele ngakwezemfundo, kodwa sibuye sibafundise ukuthi babuyelwe yithemba nokuzethemba. Ukuboshwa akusho ukuthi kusuke sekuphelile ngawe." Isikhungo i-Baviaanspoort esiseGoli yisona esilale endaweni yesibili ngokwenza kahle…

LINGANISELWA ku-R449 million imali etshalwe ohlelweni lwezindlu ezizohlala izitshudeni zase-University of KwaZulu-Natal (UKZN), ophikweni lwayo iHoward College, eThekwini, okulindeleke ukuthi zimumathe imibhede ewu-2 500. Lolu hlelo, olwenganyelwe yinkampani yokwakha i-Enza Construction for Growthpoint Properties, luyingxenye yezindlela zokulungisa inkinga yokushoda kwezindlu ezihlala izitshudeni. Kulindeleke ukuthi kusizakale futhi kufukuleke umnotho ikakhulu ezindaweni okubalwa kuzona iBerea, Glenwood, Cato Crest naseManor Gardens. Kubhekwe ukuthi ukwakhiwa kwalezi zindlu kwakhe amathuba omsebenzi etoho awu-1 200 nawu-50 okuqashwa ngokugcwele uma lezi zindlu seziqalile ukusebenza - abazoqashelwa ukuthi babheke isimo sazo nokuthi kuphephile yini nsukuzonke. UMnuz Shawn Theunissen weProperty Point, uthe lolu hlelo luyithuba lokusebenzisa ukutshala imali embonini yezokwakha ukufukula umphakathi nosomabhizinisi abasafufusa abazohlomula ngeqhaza abazolibamba kulona. “Lolu hlelo lungaphezu kokuthi kwakhiwa isakhiwo nje sezindlu zokuhlala. Empeleni luyindlela yokusiza osomabhizinisi abasafufusa ukuthi babambe iqhaza ekufukuleni isifundazwe. Okuhle ngalokhu…

JABULELA ukuthi useqalile ukuzilolonga nozakwabo umdlali wasesiswini we-Orlando Pirates osehlale izinyanga engadlali ngenxa yokulimala, uSelaelo Rasebotja. Lo mdlali walimala emsipheni osedolweni ngoMeyi nyakenye, kwadingeka ukuthi ahlinzwe. Njengoba esehlale izinyanga ebukela ozakwabo besenkundleni ngesikhathi esalandela izinhlelo zokwelulama, kumqinisa idolo ukuthi kukhona asekwazi ukukwenza neqembu. “Sengisesigabeni sokugcina sokululama. Sengiyaqala kancane kancane ukuziqeqesha neqembu. Ngiyathemba ukuthi emasontweni noma ezinyangeni ezizayo ngizobe sengiqala ukuzilolonga neqembu ngokugcwele ukuze ngikulungele ukuqokwa abaqeqeshi,” uphawule kanje lo mdlali oyibamba enkabeni yesisu. EZimnyama, okuyiwe ekhefini le-Africa Cup of Nations ziqhwakele kwi-log yeBetway Premiership, zizobuya ngomdlalo onzima ezizowudlala neSekhukhune United engelinye lamaqembu azilandela eduze. Lo mdlalo uzoba sePeter Mokaba Stadium, ePolokwane, ngoMgqibelo ngo-3.30 ntambama. Ngesikhathi la maqembu ebhekene emdlalweni wokuvula isizini weligi e-Orlando Stadium, iSekhukhune yanqoba ngo 1-0. “ISekhukhune ikhombisile emidlalweni yakamuva esiyidlale nayo ukuthi iyiqembu okunzima ukubhekana nalo. Yithuba…

UNCOME indlela iqembu elilandele ngayo izinhlelo enkundleni ngesikhathi linqoba umqhudelwano obuseDubai, ngempelasonto, umqeqeshi weqembu lesizwe labesifazane lombhoxo weSevens, uCecil Afrika. IMbokodo ibe ngompetha bomqhudelwano weHSBC SVNS 3, yaphinde yazibekisela indawo emiqhudelwaneni yeHSBC SVNS 2 ezodlalwa ngenyanga ezayo nangoMashi. Iyinqobe yomithathu imidlalo yamaqoqo ngoMgqibelo, iqumba phansi iMexico ngo 61-0, iCzechia ngo 24-5 neThailand 33-5. Kowandulela owamanqamu ngeSonto, iguqise iPoland ngo 36-5, yabuya isilandela ngemuva kowamanqamu inqoba i-Argentina ngo 12-5. Bekuyisicoco sesibili esinqotshwe yiqembu lakuleli selokhu u-Afrika ethathe izintambo ngo-Okthoba nyakenye, njengoba lithathe neseRugby Africa Women’s Sevens Cup eKenya ngoNovemba. “Siwunqobe kahle umqhudelwano futhi kufanele ngibashayele ihlombe abadlali. Besimaka kahle siphinde sibe yingozi uma sihlasela. Ngicabanga ukuthi sikulandele kahle ebesikuhlelele lo mqhudelwano. Uma kudingeka sivale emuva besikwenza lokho kanti uma sithola amathuba besiwasebenzisa ngokushaya ama-try amahle,” usho kanje u-Afrika. “Abadlali bebebambisene kukhona…

GCWALE ngaphakathi eNkantolo yeMantshi yasePinetown, waze wasala ngaphandle umphakathi waseCoffee Farm, KwaNdengezi, obuwotha ubomvu, kuvela umakhelwane osolwa ngokubulala omunye izolo. UMnuz Sibongiseni Johannes Mbhele uvele enkantolo ngecala lokubulala umakhelwane wakhe uMnuz Kholwani Cele (34) ngo-Okthoba 23 nyakenye, emsola ngokuthandana nomkakhe. UCele ubelokhu abikwa njengomuntu odukile kulandela ukuthi engabuyanga ekhaya kade eye emsebenzini eNorthdene, eQueensburgh, ngosuku lwesigameko. Kuvele ngoLwesihlanu, ukuthi wenzakaliswa uMbhele nabanye besilisa ababili bendawo, emva kokuthi uMbhele ezinikele emaphoyiseni aseMariannhill, wafike wagonyuluka ngokwenza icala. Kuthiwa egonyuluka, utshele amaphoyisa ukuthi bambulala bambelethisa itshe, bamphonsa emfuleni uMngeni, ngaseSpringfield. Ngesikhathi evela phambi kwenkantolo, umshushisi woMbuso, uMnuz Sfiso Mtshali, utshele inkantolo ukuthi bazosiphikisa isicelo sebheyili. Uveze ukuthi bewuMbuso basalinde incwadi efungelwe kamphenyi wecala, uDetective Sibongiseni Mbonambi. “Alikabi bikho nekheli eliqinisekisiwe umsolwa angaphuma ayohlala kulo uma kwenzeka ededelwa ngebheyili,” kusho uMtshali. Ummeli kamsolwa uthe…

-MKP ifuna owayengumengameli, uMnuz Thabo Mbeki, axolise ebantwini baKwaZulu-Natal ngenkulumo yakhe abathe icwasa ngokobuhlanga abantu basesifundazweni iphinde igqugquzele udlame. UMbeki uzithintele ngokuthi enze izinsolo zokuthi iMKP yasungulwa yizinhlaka zezokuphepha ezazisetshenziswa uhulumeni wobandlululo ukuxova abantu ababelwa nobandlululo ngesikhathi somzabalazo wenkululeko. Ubuholi beMKP busole uMbeki ngokudukisa, baze bamvusela ngisho amaphutha akhe amadala. UMbeki wenze izinsolo eziningi ngokusungulwa kweMKP ngesikhathi ekhuluma engqungqutheleni yokukhetha ubuholi bophiko lomakadebona kwi-ANC, i-Umkhonto weSizwe Liberations War Veterans. UMbeki uthe abantu kufanele bazibuze ukuthi kungani iMKP yathola amavoti amaningi kakhulu KwaZulu-Natal, yaphinde yenza kahle nasemahostela aseGauteng. "Lezi nhlaka (zikahulumeni wobandlululo) azikaze zihlakazwe kuze kube namhlanje. Ngayikhuluma kaningi le nto." UMbeki uthe abantu kufanele bezibuze ukuthi yini eyenze ukuthi abaningi abahlala emahostela eGauteng, bavotele iMKP okhethweni lwango-2024? "Abantu bakula mahostela babevotela i-IFP ngesikhathi kusenodlame lwezepolitiki. Into eyenza ukuthi bavotele iMKP…

BAVUTHA bengabaselwe abefundisi bamahlelo ehlukene benhlangano, iReformed Independent Church Association (RICA) abasola isandla semfene ngokugqunywa ejele kukaMbhishobhi Michael Sandlwana webandla i-International Pentecostal Holiness Church (IPHC). Kuzokhumbuleka ukuthi lwaba yindaba egudwini udaba lukaMbhishobhi Sandlwana owakhalelwa ngamasongo kaSigonyela ngo-2021, ngemuva kokuba ezinikele yena emaphoyiseni. Nokho uphinde waphuma wase ephinde eboshwa ngoNovemba wonyaka owedlule, ngecala lokugwazela iJaji laseNkantolo eNkulu yasePitoli, uPortia Phahlane, ngemali elinganiselwa ku-R2.4 million eyifaka kuma-akhawunti asemabhange ehlukene. Kusolakala ukuthi lokhu kwenzeka phakathi kuka-2021 no-2022. Ngokwezinsolo, lokhu kuthiwa uMbhishobhi Sandlwana wakwenza ngenhloso yokuthi inkantolo ikhiphe isinqumo esivuna uhlangothi lwakhe ecaleni lombango webandla. Ngemuva kokuvela kwalezi zinsolo ezibucayi, uphiko loKlebe ngoNovemba 5, lubophe uMbhishobhi Sandlwana, iJaji uPhahlane, Mnuz Vusi Ndala noKagiso Phahlane oyindodana yejaji. Laba abanye uMbhishobhi aboshwe nabo bangaphandle ngebheyili. Kodwa bonke abathintekayo kuleli cala kulindeleke ukuba bavele eNkantolo eNkulu yasePitoli,…

NJENGOBA iNingizimu Afrika isajabulela futhi ihalalisela abafundi baka-matric wangonyaka odlule abaphase ngo-88%, kukhuthazwa ukuthi abafundi basukumele eyokubheka ezinye izindlela abangazisebenzisa ukuqhuba impilo, kubalwa ukugxila ekuthuthukiseni amakhono abo ezamabhizinisi ukuze bakwazi ukuzimela. Lokho kushiwo wuMnuz Shawn Theunissen, umnikazi weProperty Point and Entrepreneurship to the Point (ETTP), ejobelela ngokuthi nakuba le miphumela ka-matric iwuphawu lokuphumelela, kepha futhi iyisikhumbuzo sokuqala kobunzima bempilo obuzobhekana naasebephothule leli banga. “Siyaziqhenya kakhulu ngabafundi bethu nothisha ngomsebenzi wabo neqhaza elibanjwe wumphakathi ukuze izingane zethu ziphase kahle kanjena. “Kodwa-ke kuhle futhi ukuthi sibhekane neqiniso lokuthi ukuphasa kwabo akwanele uma kuhamba kodwa. Kusekhona inselelo yokuthi bazokwenza kanjani ukuthi ukuphasa kwabo kuthele izithelo ezinhle nezibonakalayo ezizosiza ukufukula umnotho wezwe,” kusho uTheunissen. Eqhuba, uthe kulo 88% ophasile kubafundi abawu-900 000 ababhalele ukuhlolwa kuka-matric nyakenye, bayingcosana abazothola ithuba lokuqhubeka nemfundo ezingeni lemfundo ephakeme.…

BUYELE esicongweni se-log yeBetway Premiership iMamelodi Sundowns iqoqa amaphuzu aphelele ngokubhaxabula i-Orbit College emdlalweni obuseLoftus Versfeld Stadium, ePitoli, izolo ebusuku. Amagoli eSundowns avalelwe phakathi ngu-Arthur Sales ngesiwombe sokuqala noBrayan Leon ngesesibili. ISundowns ingene enkundleni idinga amaphuzu amathathu ukuze izogudluza i-Orlando Pirates esicongweni se-log. Nangempela kusheshe kwacaca ukuthi lokhu kuzokwenzeka nakuba idlale ngesikimi esihlukile. ISundowns ebiphezulu ngomdlalo kusukela ekuqaleni kwawo, isheshe yakhombisa ukuba yingozi uma kuhlaselwa njengoba ibifika emapalini e-Orbit kuvalwe amehlo. Icishe yahlabana ngesikhathi ibhola likaJayden Adams lishaya ipali selimdlile unozinti we-Orbit, uCyril Chibwe. Nokho kusheshe kwayilungela iSundowns ithola igoli ngonyawo lukaSales oshaye uqethu ngomzuzu ka-21 ngemuva kwephutha elenziwe nguChibwe ehlulwa wukususa ibhola kuyena ngokushesha ekade eliphaselwe ngumdlali wangakubo. Zibuya nje esiwombeni sesibili, iSundowns ifake umdlali wayo omusha esanda kumsayiniswa, uLeon waseColombia, ongene endaweni kaLebo Mothiba. Kube ngesifanayo nakwi-Orbit nayo…