Table of contents for May 2016 in Idees

Die aantal hotelkamers sonder ’n bad gaan my verstand te bowe. As die trotse eienaar van krulhare wat met die geringste bietjie vog begin mince, soos ons Kapenaars graag sê, wil ek regtig nie staan en koes vir die water van bo nie. Ek wil boonop ná ’n stresvolle dag vol vergaderings en rondjaag in die verkeer net vir ’n rukkie ontspan in ’n geurige warm bad. Dalk is dit ’n vroueding, dié salige verhouding met ’n bad. Ek onthou hoe die vroue in ons gesin in die badkamer saamgekuier het terwyl een ná die ander bad, hoe ons drie op ’n ry in die koshuisbad gesit het met ons bene wat oor die rand hang, en hoe my beste vriendin op ’n hartbreekdag vir my ’n diep bad vol…

‘Ek is ’n versamelaar eerder as ’n maker.’ Ons ontmoet Linda in haar lieflike winkeltjie wat nestel bo-op die ou houttrap langs die Melissa’s-tak in Dorpstraat, Stellenbosch. Al moet ons verby hope geborduurde Franse linne, tapisseriekussingoortreksels en haar eie klerereeks skuur, is dit moeilik om die eienaar mis te kyk: Met haar ruie bos grys krulle en ’n eklektiese uitrusting vol patrone en kleure is Linda inderdaad die perfekte poster girl vir Nest. Hoewel haar klereversameling dalk beperk is wat snitte betref, is die moontlikhede regtig eindeloos as dit kom by hoe jy die verskillende stukke meng en pas. Dié reeks is haar jongste breinkind nadat sy jare in Durban, Kaapstad en die Paarl as materiaalontwerper gewerk en toe kinders gehad en na ’n plaas getrek het. ‘Ek maak die…

AMANDELSUIKERKOEKIES Maak: 12-15 Bereidingstyd: 15 minute, plus yskastyd Baktyd: 12-15 minute Oondtemperatuur: 170o C • 200 g sagte botter • 200 g Huletts SunSweet Brown Sugar • 1 groot eier • 2 ml amandelgeursel (opsioneel) • 300 g koekmeel • 100 g amandelmeel • 5 ml bakpoeier 1 Room die botter en bruinsuiker saam tot dit lig en donsig is. Voeg die eier en amandelgeursel (indien jy dit gebruik) by en klits dit goed. 2 Meng die meel, amandelmeel en bakpoeier saam. Voeg dit by die botteren-suikermengsel en roer dit liggies tot ’n sagte deeg vorm wat jy met jou hande kan saamdruk. Draai die deeg in kleefplastiek toe en sit dit vir 15 minute in die yskas. 3 Rol die deeg uit op ’n werkoppervlak wat met meel bestrooi…

MOEILIKHEIDSGRAAD: maklik TYD: ‘n paar uur JY BENODIG • outydse hortjie • handwerkverf en verfkwaste • bamboespennetjies • handwerk- of plakboekpapier • alkant-plakband en nutsmes Verf die hortjie. Handwerkverf is in verskeie kleure verkrygbaar en het nie ’n grondlaag nodig nie. Terwyl jy wag dat die verf droog word, kan jy met die pennetjies werk. Sny stroke handwerkpapier so breed soos die pennetjies en plak dit met die alkant-plakband aan die bamboes. Sny oortollige papier met die nutsmes af. uittreksel uit SKEP ’N TUISTE deur GERMARIE BRUWER en MARGAUX TAIT (STRUIK LEEFSTYL) foto’s en illustrasies © GERMARIE BRUWER en MARGAUX TAIT…

Ek het maande lank stadig aan dié gehekelde spiraalmat gewerk. Dit is ’n wonderlike manier om hope oorskietmateriaal op te gebruik – ek het ook ou lakens en klere gebruik. Al die materiaal is herwin, ook die hekelgare wat ek by ’n spaarwinkel raakgeloop het. Die enigste hekelsteek wat gebruik word, is kortbeen, wat redelik basies is. JY BENODIG • baie oorskietmateriaal • sterk tou, dun koord of baie sterk matgare • hekelpen (omtrent 4 mm, na gelang van die dikte van jou gare) • masjiengare (opsioneel) • matonderlaag sodat die voltooide mat nie gly nie • baie tyd SO BEREI JY DIE MATERIAAL VOOR 1 Jy moet jou materiaal voorberei volgens die soort lap wat jy het. Die idee is om lang, aaneenlopende stroke van 5 cm breed te…

GEWILDE MARKTE • Die Wedgewood Family Market Ervaar die plattelandse lewe by dié kos-en-varsproduktemark wat op die tweede Saterdag van die maand van 9 vm. tot 2 nm. by die Wedgewood Golf and Country Estate in Port Elizabeth gehou word. Koop gebak, delivleise, ingemaakte produkte, jogurt, kase of boetiekbier, of loer in by een van die kostrokke. Toegang: R10 vir volwassenes, gratis vir kinders onder 12. Meer inligting: Soek Wedgewood Family Market op Facebook. • Die Woodmill Lifestyle Market Hierdie binnenshuise mark word van 5.30 nm. tot 10 nm. op die laaste Vrydag van die maand gehou by The Woodmill in Vredenburgweg, Stellenbosch. Bo en behalwe heerlike kos, drinkgoed en leefstylprodukte wag daar vintage-klere, leerhandsakke en dekoritems. Proe heerlike Indiese kos, Hollandse poffertjies of krokette, pannekoeke of ’n smoothie. Daar…

the-kate-tin.blogspot.co.za Katelyn Williams sê kos is van kleins af al haar passie en ontvlugting. Sy is ‘een van daardie irriterende mense wat op agt al geweet het ek wil ’n sjef wees’ en beskryf haarself as die ‘ultimate food nerd’ met ’n abnormale groot versameling kookboeke en koekiedrukkers. Die blognaam The Kate Tin (’n woordspeling op haar naam) bevat al haar bakresepte en het haar twee jaar agtereenvolgens die prys vir die beste kosblog by die Suid-Afrikaanse Blogtoekennings in die sak gebring. onesheepishgirl.com Meredith Crawford is ’n gareliefhebber van Dallas, Texas, en haar blog is die plek waar sy haar liefde vir brei-, hekel-, borduur- en allerlei kleurryke handwerk deel. Meredith het haarself leer brei nadat sy The Friday night knitting club gelees het: ‘Ek was verslaaf nog voor ek…

In Ouma se resepteboek vertel elke spatsel sous, vetkol of aantekening in die kantlyn ’n storie oor ’n ou familiegunsteling of flatervrye resep. Hou hierdie kosbare familiestories netjies bymekaar en veilig in ’n aandenkingsboek wat op sigself ’n kosbare erfstuk kan word. Probeer ons wenke om jou eie kosjoernaal te maak. PEPERMENTPOEDING 1 lb. wafelkoekies (vanielje) 1-1/2 pt. room (geklop) 1-1/2 koppie malvalekker (in klein blokkies) 1 koppie gekapte neute 5 pepermentlekkerstokkies Rol die wafelkoekies fyn. Druk ½ van koekies in pan van 8 x 12 cm. Meng die room, malvalekkers, neute en fyngemaalde pepermentlekkers saam en giet dit bo-op die koekielaag. Sprinkel res van koekies bo-op hierdie laag. 1 Gebruik die boek soos ’n foto-album en plak ’n foto van die persoon wat die resep neergeskryf het, op dieselfde…

VERSUIKERDE NARTJIESKYFIES 1 Sny 2 nartjies in skywe, pak dit in ’n groot, vlak kastrol en bedek dit met water. Verhit dit tot kookpunt, verlaag die hitte en laat dit vir 3 minute liggies prut. Haal die kastrol van die plaat af, dreineer die nartjieskywe en sit dit eenkant. Gooi die water weg. 2 Gooi 350 ml water en 150 g suiker in die kastrol. Verhit dit oor lae hitte, roer dit tot al die suiker opgelos het en pak dan die nartjieskywe in die stroop. Bedek die bokant van die vloeistof met ’n sirkel bakpapier en laat dit vir 35-40 minute baie liggies prut tot die nartjies doeksag is. 3 Skep die skywe nartjie met ’n gaatjieslepel uit en sit dit eenkant. Voeg die sap van 1 nartjie by…

BADFLES-ETIKETTE Kopieer die etikette op bladsy 78 in die verlangde grootte op papier van jou keuse. Knip dit uit en plak dit met ’n gomstiffie op jou flesse vas. STORTGORDYN MET VAL MOEILIKHEIDSGRAAD: maklik TYD: 2 uur JY BENODIG • wit stortgordyn • materiaal van jou keuse • bypassende masjiengare • wateroplosbare merkpen SO MAAK JY DIE ONDERSTE VAL 1 Knip ’n strook materiaal twee keer die breedte van jou stortgordyn en 14 cm wyd uit (naattoelatings van 2 cm is hierby ingesluit). 2 Kap die rande om en stik die onderste soompie in. Stik twee rye rygsteke aan die borand van die val en trek die rygdrade in. Stik die val aan die onderrand van die stortgordyn vas. SO MAAK JY DIE BOONSTE VAL 1 Knip nog ’n strook…

Die Britse Financial Times het Suid-Afrika onlangs as een van 2016 se 10 top- internasionale vakansiebestemmings aangewys. Britse vakansiegangers kan nou vir dieselfde prys as 10 jaar gelede hier kom baljaar – met vergunning van ons swak rand, natuurlik. Maar wat van ons, wil ons skreeu. Waar laat dit ons kreatiewe mense wat graag ’n inspirerende oorsese vakansie wil hê? Wel, miskien nie in Parys, Rome of New York nie, maar eerder iewers in Asië of Suid-Amerika. Dié twee kontinente bied hope bestemmings waar ons lewe in ons kreatiwiteit kan blaas met ’n kort kursus of werksessie. DIE NUWE GENERASIE REISIGERS Die internasionale tendens waar mense ervarings soos vakansies en kursusse voor besittings stel, het in so ’n mate gegroei dat Amerikaanse winkels se verkope die afgelope Kersfees heelwat laer…

KREATIEWE GESKENKE V Wat is ’n goeie geskenk vir my ma? Sy is kunstig en is mal oor handwerk. A Ons het by die handwerkwinkel The Deckle Edge aangeklop en hulle het dié vier wonderlike idees gedeel: 1 Oorweeg ’n houtkissie waarin sy haar handwerkbenodigdhede kan bêre. Dit is pragtig en stylvol en sy kan dit maklik inpak as sy iewers heen gaan. 2 Pak self ’n projek aan en druk byvoorbeeld ’n foto van jou en jou ma op ’n geblokte skilderdoek of houtblok oor met akriel-jelmedium (daar is so ’n produk in die Dala-reeks). 3 Gee vir jou ma ’n selfdoen-kintsugistel. Kintsugi is die antieke Japannese kunsvorm waar gebreekte erdeware met ’n goue lakvernis reggemaak word. Die kuns is om die stukkende voorwerp mooier te maak as toe…

ideesred@media24.com My lewe verander Dit was 2012. ’n Bitter egskeiding en eensame oomblikke het my laat besluit om julle tydskrif te koop. Daardie stap het my hele lewe verander. Idees het my geleer kerse maak, tot ek selfs begin PVC-pypkerse maak het. Die tydskrif het my oë oopgemaak en my laat begin droom en besef dat ek wel ’n toekoms het. Die tydskrif het my hoop en selfvertroue gegee. Ek het in my vrye tyd met ekstra geldjies elke keer iets gekoop wat ek wou aanpak. Van muurbehangsels tot verf. Idees gee hoop en lewe en ek sal almal aanraai om dit te koop. Die idees en praktiese voorbeelde laat jou besef jy kan dit ook doen. Ek het al geld gemaak met my ontwerpies en glo ek gaan vorentoe…

DÍS IN SEISOEN IN MEI: Groente: Aartappels, beet, blaarkool, blaarslaai, blomkool, broccoli, brusselse spruite, ertjies, grasuie, groenbone, jerusalemartisjokke, komkommer, kool, murgpampoentjies, pampoen, patat, preie, radyse, rape, sampioene, seldery, skorsies, soetrissies, spinasie, tamaties, uie, witloof, witwortels, wortels. Vrugte: Appelliefies, avokado’s, koejawels, lemoene, papaja, piesangs, pynappel, suurlemoene. BLOMME BESKIKBAAR IN MEI: Angeliere, asters, barbertonse madeliefies, goueroede, gousblomme, Heliconia, inkalelies, irisse, kangaroepoot, krisante, leeubekkies, nerinas, Oosterse lelies, orgideë, papierblomme, pronkertjies, ridderspore, rose, sintjanskruid, sintjosefslelies, sonneblomme, stokrose, strelitzias, tjiekerientjees, tuberose, tulpe, veronikas.…

MOEILIKHEIDSGRAAD: gemiddeld TYD: 2 uur, plus droogtyd JY BENODIG • resep vir amandelkoekies en harde versiersel op bladsy 40 • kameesilikoonvorm • ovaalvormige koekiedrukker (of gebruik ’n ronde koekiedrukker soos in stap 1 gewys word) • spuitsakke • nr. 1-versierspuitstuk • lint-versierspuitstuk • versierspuit-koppelstukke wat dit maklik maak om spuitstukke te ruil • gompasta (gum paste) • jel- of poeierkoskleursel • glanspoeier • mielieblom Volg die resep op bladsy 40 om die koekiedeeg te maak en rol dit uit op ’n oppervlak wat liggies met meel bestrooi is – die deeg moenie dunner as 5 mm wees nie. Druk ovaal of ronde koekies uit die deeg en pak dit op ’n gesmeerde bakplaat. Bak die koekies en laat dit op die bakplaat afkoel. Maak die harde versiersel volgens die resep…

My lewensmaat, James, is in 2014 net voor Kersfees in ’n tragiese ongeluk dood. In dié tyd van verlies en verdriet was skryf en kook die twee dinge wat my die meeste getroos en my met my genesingsproses gehelp het. Op Nuwejaarsdag in 2015 het ek sonder enige spesifieke plan of doelwit met ’n joernaal begin – niks spoggerigs nie, sommer ’n doodgewone sagteband-oefeningboek met skoon blaaie. Ek het begin om van die resepte uit te skryf wat ek vir en saam met James gekook het. Heel eerste op die lys was my resep vir Indiese botterhoender waaroor hy mal was en bakke vol kon eet. Natuurlik het die inskrywing nie net oor die kos gegaan nie; ek het ook my gevoelens en gedagtes neergeskryf, asook spesiale aanhalings wat vir…

BORDUUR VOORT Hierdie pragtige geborduurde rok is gemaak van ’n dikker materiaal, wat beteken jy kan dit ook in die winter dra. Dit lyk mooi met ’n langbroek onderaan of met warm kouse en stewels. Rok (R1 399) van Zara. Langbroek (R399) van Woolworths. Oorbelle (R990) van Mr & Mrs. APPLIEK-DETAIL Dié ligte langmoubloes met appliekwerk is perfek vir tussenin dae, óf vir broodbak in ’n lekker warm kombuis. Bloes (R559) van Zara. Oorbelle (R1200) van Mr & Mrs. FYN STIKWERK ’n Lospassende top met mooi stikwerk en ’n liggewig-langbroek is ideaal om oor stil naweke binnenshuis te dra. Top (R899) van Trenery. Langbroek (R699) van Old Khaki. Skoene (R449) van Call It Spring. Halssnoer (R990) van Mr & Mrs. NEEM DIE BREIPENNE OP Wees op die uitkyk vir ’n…

MANDALA AFKORTINGS beg begin 5-bobbelst hekel 5 lb in ks-sp, laat die laaste lus van elke st op pen, do en trek deur al 6 lusse op pen 3-bobbelst hekel soos 5-bobbelst tot daar 4 lusse op pen is, do en trek deur al 4 lusse op pen do draad oor gls glipsteek her herhaal kb kortbeen ks kettingsteek lb langbeen pofst * do, steek pen in ks-sp, do en trek lus deur (3 lusse op pen); her van * in dieselfde ks-sp nog twee keer (7 lusse op pen), do en trek deur al 7 lusse op pen rdte rondte sp spasie st(e) steek(steke) vlg volgende JY BENODIG • oorskiet-katoendubbeldraad in elk van die volgende kleure: oranje, geel, turkoois, liggeel, donkergroen, wit, liggroen, ligperske en donkerpienk • 4 mm-hekelpen…

As jy kreatief lewe of dalk ’n kreatiewe besigheid bestuur, het jy oneindige bronne van inspirasie nodig om vooruit te boer én altyd een stappie voor die res te wees. Ons put ons idees uit ’n magdom uiteenlopende dinge – van kulturele tradisies tot natuurskoon en ons entrepreneurshelde. Dié dinge veroorsaak ’n ‘vonk’ in ons agterkop wat ons aanmoedig om oor te gaan tot aksie, wat hopelik die begin van groot dinge is. Inspirasie bestaan uit twee dele: die ondefinieerbare stimulus en die begeerte om oor te gaan tot aksie. Inspirasie sonder aksie is niks minder nie as doodgewone verbruik. In haar video When inspiration backfires verduidelik die lewensafrigter Marie Forleo hoe die internet ons insuig en hoe ons in dié proses die teenoorgestelde van kreatief word. Ons wil dalk…

Ons het vir Nicole op Jeffreysbaai gekontak en haar gevra om ons meer te vertel van haar liefde vir alles wat kreatief is en spesifiek die lieflike selfdoenpartytjie wat sy gehou het. Hier volg haar antwoord: Ek is ’n gekwalifiseerde sjef wat by The Mills Culinary Academy geswot en daarna hoofsaaklik in spyseniering en geleentheidsbestuur gewerk het. Ek was mal daaroor, maar studeer op die oomblik verder en is besig met my tweede jaar van grondslagfase-onderrig aan die Nelson Mandela Metropolitaanse Universiteit in Port Elizabeth. Vandat ek kan onthou het ek ’n liefde vir onthaal gehad. Ek is regtig mal daaroor om te organiseer – van die perfek gedekte tafel tot die dekor, selfs al is dit net vir ’n pizza-aand saam met vriende. Grondslagfase-onderrig daag my ook uit om…

Knop in die keel Dit is met groot opgewondenheid dat ek vandag my Maart 2016-uitgawe van Idees van die rak kon gryp en koop voordat hulle uitverkoop. Daar is geen lekkerder lekker as om my Idees-tydskrif deur te blaai voordat ek elke artikel sorgvuldig deurlees nie. Vandag vang my oog die artikel op bladsy 94, ‘Vars voor jou deur’: ‘Onthou jy nog die Dairy Belle-lorries van dekades gelede wat vars melk en lemoensap in glasbottels by jou deur kom aflewer het in ruil vir koepons?’ Hier sit ek nou met ’n knop in my keel en die nostalgie het my beet. Ek dink aan my oorlede moeder wat elke oggend die oranje koepon verruil het vir ’n bottel melk. En so wrintiewaar het ek Ma se Dairy Belleglasbottel geërf toe…